((سلسلة عشق الرجال الجزء الثالث من رحم للإيجار ))
((حب الفرسان)
(( البارت السابع والخمسون))
🌹بقلم ريحانة الجنه🌹
كان قاعد في قمة غضبه وجنونه من الحيرة اللي جواه واللي كانت اقرب منها لليقين جواه شعور واحساس انها هي ورا كل اللي حصل لكن الامل الضعيف اللي جواه واللي بيحاول يشفعلها عنده ويدافع عنها انها مستحيل توصل بيها القذارة لكدة لكدة !! كان بيتمني مع مرور الوقت والدقايق يتاكد انها بعيد عن كل اللي حصل!!
رفع عيونه لعيون لعيونها الساكتة بهدوء واتزان وهو جواه احساس الذنب اتجاهها بيقتله انه دخلها دائرة هي ما لهاش ذنب فيها !!
عشق قربت منه بود وهدوء وابتسمت بخفة: ممكن افهم بقي انت ليه متعصب بالشكل ده !! حكاية وانتهت خلاص وانا واثقة في نفسي وفي شغلي وكل مكان يخصني هي مسألة وقت وهمشي من هنا ورعد مش ساكت ومش هيسكت يا عدي ارجوك اهدي انا خايفة عليك من التوتر والعصبية دي!!؟
عدي بغضب : ازاي اهدي مش فاهم وانتي مضبوط عندك في شركتك كمية من المخدرات تلبسك اعدام !! ازاي اهدي وهما كانوا بيفتشوا شقتك كأنهم عارفين مكان حاجة وجاين يطلعوها !! عشق اللي حصل ده متدبر وانا متأكد بس صدقيني لما هعرف مين وراها مش هرحمه!!
عشق قامت وبعدت عنه خطوات وهربت من عيونه بحزن: لا يا عدي هترحم! بحكم السنين والعشرة والحب هترحم انا متأكدة ..لكن عمري ما هلومك ولا اعاتبك لان ده حقك..ولعلمك حتي هي انا مش بلومها علي اللي عملته هي عايزة تستردك ليها بأي شكل وبأي ثمن وشايفة ان ده حقها فيك..علشان كدة مهما عملت انا مسمحاها ومش هلومها !!
عدي ابتلع غصة اتهامها بمرار وحرج ووجع : وانتي ليه متأكدة انها هنا!! عشق هنا يمكن تكون عنيدة او عصبية او يمكن مجنونة لكن مش حقيرة !! ارجوكي هرجي هنا من دائرة شكك!! انتي ليكي اعداء كتير وده بإعترافك! ليه بقي حصرتي كل ده في هنا !؟
عشق التفتت ليه وابتسمت بخفة : انت من جواك متاكد انها هنا بس حقك تدافع عنها وقولتلك مش هلومك ..بس عارف انا مصممة اني مسمحاها مهما عملت الا في حالة واحدة بس ياعدي عارف ايه هي!!..
وكملت بغليل ووعيد : انها تاذيك انت او تجرحك او توجع قلبك وقتها انا ممكن اكلها بسناني! اقتلها لو حكم الامر كمان! انا اسامح في حقي لكن فيك انت لا يا عدي لا!
قرب منها بدهشة وحزن وتأنيب: اوعدك يا عشق مش هخرج من هنا الا وانتي في إيدي مش هسيبك ولا اتخلي عنك ابدااا وصدقيني لو كانت هنا ليها يد في اللي حصل هيكون ردي عليها عنيف ومش هتتوقعه!!
باب المكتب اتفتح ودخل رعد ومعاه اللواء محمود..رعد دخل وقعد بهيبة وغضب مصحوب بإرهاق..
عدي قرب من اللواء محمود بتوتر: هاه يا محمود ايه اللي حصل طمني!!؟
اللواء محمود قعد بتعب: اقعد يا عدي بس واهدي كدة هفهمك كل حاجة بس اهدي !!
