အချစ်ဦး (အခ်စ္ဦး) (Completed )

part 15(z+u)

သော်စစ်အိမ်ထဲဝင်သွားသောအခါ ဒီဇင်ဘာနှင့် သူ့အမေသည် ဧည့်ခန်း၌ စကားပြောနေကြ၏။သော်စစ်သည် မလုံမလဲဖြင့် သူ့မေမေ မျက်နှာအား ခိုးကြည့်ကာ အကဲခပ်လိုက်သော သူမ မျက်နှာသည် ပုံအတိုင်းပင် ။ ထူးခြားမှုမရှိ။

" ဒါဆို သားဘယ်မှာ တည်းမှာလဲ "

" ဟုတ် အားတော့နာပါတယ် အန်တီ ။ ဖြစ်နိုင်ရင် ကျွန်တော် ဒီမှာတည်းလို့ရမလားဗျ ။ သော်စစ်နဲ့လည်း မတွေ့တာကြာပြီဆိုတော့လေ "

ထိုစကားကြောင့် သော်စစ်အမေသည် စဥ်းစားဟန်ဖြင့် ငြိမ်သွား၏။ သို့သော် သူမက ချက်ချင်းပင်ပြုံး၍ ခေါင်းငြိမ့်ပြသည်။

" ရပါတယ် ။ သားရဲ့ဘေးအခန်း လွတ်တာပဲ ။ အဲ့မှာ နေလို့ရတယ်။ ကဲ ခရီးပန်းလာတော့ နားလိုက်ပါအုံး "

ယခုအချိန်ထိ သော်စစ်သည် မည်သည့်စကားကိုမျှဝင်မပြောဘဲ ဘေး၌ထိုင်ကာ ငြိမ်နေသည်။

" သား သူငယ်ချင်းကို နေရာလိုက်ပြလိုက်ပါအုံး။ "

သော်စစ်က ခေါင်းငြိမ့်ကာ ဒီဇင်ဘာ၏ အိတ်ကိုဆွဲပြီး အခန်းရှိရာသို့ ဦးတည်လိုက်သည်။ ဒီဇင်ဘာသည် သော်စစ်နောက်မှ လိုက်လာ၍ အခန်းထဲရောက်သည်နှင့် တံခါးပိတ်ကာ သော်စစ်အား တံခါး၌ ကပ်၍ ဖိနမ်းလိုက်သည်။ သူ၏အနမ်းက ကြမ်းတမ်းသည် ။ အလျှင်လိုသည်။ အလွမ်းဓာတ်လည်းပါသည်။ သော်စစ်က မိမိနှုတ်ခမ်းများအား အငမ်းမရစုပ်ယူနေသည့် ချစ်သူကို အသာတွန်းလိုက်သော်လည်း ဒီဇင်ဘာသည် နည်းနည်းပင်မလှုပ်ပါ။ သူ့ခါးအား သန်မာအားကောင်းသော လက်ဖြင့်သိမ်းဖက်၍ တံခါး၌ ဖိကပ်ထားသည်။ ခံတွင်း၌ ဝင်လာသည့် လျှာကလည်း သော်စစ်လျှာအား ရစ်ပတ်နေသည်။ မွတ်သပ်ပြီး ကြမ်းတမ်းသော အနမ်းတို့ကြား သော်စစ်သည် အသက်ရှူကြပ်လာ၍ ဒီဇင်ဘာ၏ ပခုံးကို နှစ်ချက်မျှ ရိုက်ကာ ရပ်စေလိုက်သည်။

အနမ်းတို့ရပ်သွားသည့်အခါ နှစ်ယောက်သား မောဟိုက်နေကြပြီး ပျက်လပ်သွားသည့် အောက်စီဂျင်ကို အသည်းအသန်ရှူသွင်းနေကြ၏။ ထို့နောက် ဒီဇင်ဘာက သော်စစ်အား ရင်ခွင်ထဲသို့ ထည့်ကာ တင်းတင်းကျပ်ကျပ်ဖက်ထားလိုက်သည်။