كواكب امي

البارت الثامن عشر

نزلت جوة اجه حمودي ابني جابلي التلفون كال خالة نور (مرت حماية )جاي تدك
فتحت الخط ورديت
هلو نور شلونج
نور:هلا عيني الحمد لله انتي شلونج الجهال ؟
شمس: بخير عايشين والحمدلله
نور: حمويني هم يخابررن يسألون عالجهال يدزولهم شي منا منا ؟
شمس: ضحكت بأستهزاء ورديتلها...منو يسأل خية ليش هو رجلج هم فد يوم خابر وسأل على ولد اخوه اليتامى حتى البقية يسألون !!
هم خلف الله عليج انتي الوحيده من كل عيالي تخابريني كل فترة وتسألين و لما العشرة الطيبة بينا جان هم كطعتي

نور: لا والله شلون اكطع اني اصلاً بالي يمج دايماً،وهم عذريه لعادل خطيه غاط بالشغل لراسه وميلحك لكلشي بس هو يسالني عليكم ومرات هو يذكرني ويكلي خابري على ام محمد شوفي شلونها هي والجهال

شمس: اممم خلف الله عليه ميقصر ..رديت وبداخلي جاي اضحك على حجيها وعبالها اني مادري بيهم شلون كطعية هو الحنين مالتهم وراح يم ربه ، الله ليعوزني لاحد منهم

نور: انتي لتنقهرين هم تعرفيهم كلهم كل واحد ملتهي بروحه والله حتى علينا ميجون كل شكد يلا نشوف واحد منهم
الصغار تدرين بيهم نسوانهم نحسات وكطعيات كلش ويتخبلن ولا يوصلون اخوتهم

شمس: والله ياعيني تلكيهن لا نحسات ولاشي بس عرفن بمكورة سناء وسهاد وحفرهن الي يسونها للجناين وحبن يكطعن راس الحية من الاول ويخلصن من سمها ،،والله سباعيات وهن بس بهالطريقة يفلحن مو مثل فهاوتي اني

نور: والله مادري بعد بس على كولتج يجوز عرفن بسوالفهن ،اني هم الحمد لله من خلصت من سناء بعد عادل حرم عليها تطب لبيتنا وميصيحلها الا ام السحورة
وهذيج الخ سهاد ،هي هم حايرة بضيمها يوميه متخربطة وميعرفون علتها ،تالي طلع عدها ماعرف شلون مرض بدمها وحايرين بيها
هم ما رحنالهم بس مرة وحده ،عادل كال لخاطر اخويه ولكينا بتها الجبيرة يمها زعلانة يردون يطلكوها

شمس: يااا ليش!!
نور: مو مادري جم سنة صارلها متزوجه وماعدها خلفة وتالي رجلها رايد يتزوج عليها وهي هاده عليه وعلى اهله بعد شويه وتكتله وهو متخبل منها وشامرها على اهلها
وتعاي شوفي سهاد جاي تموت خايفة من الفضيحة واصلا هي محجت وكالت بنتي هيج مسويه ...لا مو تدرين بيها متنطي لزمه على روحها حتى لحد يكول تربيتها سكط ..
بس محسوبتج سالت بتها الصغيرة واستفردت بيها كتلها اختج ليش زعلانه وهاي مثل الكاسيت كعدت تخرط كلشي بلا توقف ومن خلصت كالت عزة بعيني هسه امي تحركني شكو حجيت متقبل احد يدري بالعركة

كتلها اتطمني سرج ببير ماكول لاحد واني محجيت لاحد بس الج ولخواتي وشوف المن بعد
شمس: هههه شلون بير لام حبيباتج كلهن
نور: والله لعد شنو بس هن حاطات خشومهن بحياتنا ويتشمشمن اخبار العالم ويسون عليهم افلام ومصايب ،خليهن هسه محتارات بمصايبهن الله يجفينا شرهن