كواكب امي

البارت الثامن عشر

اعذروني اذا البارت قصير باجر اعوضكم 😘
#كواكب_امي
للكاتبة روشان
الجزء الثاني-البارت الثامن عشر

شمس: امي كامت تبجي وهي تسمعها وهي تصيح وكامت تدوس عالجهاز المكسور بالكاع وتصيح
ريا : عوفووووني طلعوو من حياتي طلعوووو
ماريدكم ولا اريد هالتلفون ولا اريد كلشي بعد اريد اموت واخللللص ...

شمس: امي الجانت واكفه بشموخ مهما دار عليها كل الشهور الفاتت ،حسيتها بلحظة انحنى ضهرها والدمعة نزلت من عينها
طلعت منها كلمات رغم نطقها الها بهدوء بس جانت توصل لريا مثل الشرار الي يحرك كلشي بيها

ليلى : يمكن صدك مهزوزة اني ،لعد سوايه ابوكم بيه وين تروح ! بس مال امثل عليكم القوة غلطانة يمة ،،اني واكفة على طولي بحيلي وبقوتي وكل طاقتي مو تمثيل هذا واقع هذا اجتهاد نفسي وجسدي مني حتى اكون سند وضهر ومرجع يستاهلوه بناتي ..القوة هاي مو تمثيل ،اني هيج حتى احميكم واوكفلكم شلون حميتج هسه رغم غلطج !!امج الي تكولين عليها مهزوزة
هي الوحيدة الي جرتج وخلتج ورى ضهرها هي الحمتج ومستعدة طول العمر توكفلج وتحميج هي الوحيدة الي تغفر اخطائج ومو بس انتي ،كل وحدة بيكم اني حايطها التختل وراه من اي اذى
اني بابها الي تسدها بوجه كل شر ...اني اذا انكسر گلبي والفضل لابوج فمو معناها انكسر ضهري هم
ترى محد يكسر ضهري غيرجن وخلن هالحجي ترجية بأذنجن ..محد يكسر ضهري غيرجن ..

شمس: كالت اخر جملة كلمة كلمة بثكل وعافت الغرفة وطلعت ،بقينا اني وسديم وحدة تباوع للخ وترجع عيونا تباوع بعتب لريا
وهي رغم صلافة عيونها بس نظرة الندم والحزن جانت تارسة هالعيون الي كلمن يشوفهن يكول عليهن عيون صلفة

عفناها ويا فشلتها وندمها وطلعنا احنا هم ،جريت سديم من طلعنا وكلت الها ممنوع تحجين وياها اي شي واذا حاجتج جاوبيها على كد السوال وهذا هو ،خليها تعرف غلطها ووين وصلت روحها بهالحجي الكالته لامي

ليش ميكفيها هم ابويه انوب تجي ريا تكمل عليها الله يساعد گلبج يمه يوميه لچمة من احد ،

سديم : ثريا راسلتني كالت حاولن تاخذن رقم افراح من اجيكم اخابرها من تلفوني

شمس: ادري وشتريد تكوللها !!هي بت الحرام المخافت من ربها تخاف من ثريا ؟!
سديم : شدراني المهم نبرد گلبنا بيها الله ينتقم منها ،دتشوفين كلشي ديصير ببيتنا بسببها
حتى سواية ريا ترى مو عالخالي بلاش
ريا من صارت المشاحنات بين امي وابويه لحد الان هي اتغيرت جاي تلاحضيها حتى احنا خواتها ابتعدت عنا ،وكامت تحب تعزل روحها
وهاي تالي طلعت ملتهيه بتلفوناتها والله اليعلم وين واصله بعد وكله بسبب الحالة النفسية الوصلت الها

شمس: الله يهديها شنكول غير هيج ،خل تعرف غلطها وتروح تعتذر من امي ذاك الوكت نرجع احنا نحتويها ونحاول نعرف منها كلشي ،لان بكل الحالات اذا بقت براسها اليابس هذا معناها ميفيد وياها اي حجي