كمين الضراير

الخامسه

زينب :نوضن حناتي الماعين يراجن فيكن

سندس :لا حبيبتي مدايره مناكير وحبيبي قالي ما تمسي حاجه جاب شغالات و واقفات عشاني

زينب حطت ايديها في وسطها :لا حبيبتي حبيبك هوينا روح بيهن الشغالات والواقفات اثنين يغسلن و واثنين يفرقن.. منى و ورده يفرقن.. وسندس وعبير يغسلن..

ورده بخبث: اللطف زينوبه خيرك شايفتنا مبدلين معقوله هكي!

زينب :والله هادو اوامر اميمتي.. وانتن لي خيركن تكايرن فينا

ورده :اللطف من قال انتن على روسنا غر الضرة مُرة مشي رقصنا نبردو على روحنا ونفرغو في طاقه السلبيه

زينب :ايوااه همم خلاص مالا تو نقول لي شاهين يخلي الواقفات لكن غدوا بتحنني عندي عرس سلفي الاسبوع جاي

ورده :اي حاضر تو نجيبلك حنايه سودانيه تنقرشلك التنقريشه لي تبيها انتي زينوبه

زينب :امم ايي باااه نوضن امالا ايديكن الماعين

عبير :زينوبه خليهن بعد ناس يروحو حرام عليك

زينب :امالا اديرولي الحلوى؟

عبير :حاضر حاضر زينوبه

زينب :ايووااه انتي عبير ديريها شاطره فيها انتي

عبير :حااضر

زينب :همم مااشي ثانكس

-ومشت زينب وبدن الضراير يسلخن فيها

ورده تعايب عليها :همم ماشي ثانكس انن قاقا دراه كبد عليك هالشكل رايحه كيف العنز تدلع

عبير :عليك قهرر قهرر يقهقرن

سندس :والله شكلي بنطلق نكمل العدة متاعي ونمشي نسافر بالفلوس نفقه والمؤخر

ورده :ههه ونديرو بيهن مشروع شن رايكن

عبير :اريح من هالعيشه

ورده عجبتها الفكره وحطت رجل على رجل :ايي مرات اني نديرها ره

عبير :يا حليلي على الماعين وخلاص

سندس بخبث: عندي فكره

عبير :شنوو

سندس :نهربوو لحوش هلنا

ورده ناضت من مكانها :هدا لي بيصير وزعميتني حرجانه

-ومشت كل وحده اتصلت بي خوها باش يجيها.. الا سندس قعدت تعدل في مكياجها وتراجي فيهن يمشن باش ادير عملتها  .. اما ورده لبست عبايتها وطلعت في الزحمه.. وعبير طلعت هي ومنى في نفس الوقت تحت انظار سندس من وراء الستار

سندس :هي واحد اثنين تلاته اربعه خمسه.. ههه مهبولات على اساس قلبي عليهن.. خلي نمشي نكمل باقي الخطة

-ومشت سندس للكوجينه لقت الماعين كوكش قعدت تكسر فيهن وحده على التانيه على التالته وتعيط.. لين خشت عليها زينب

زينب :اللطف اللطف خيرك غر خيرك سندس بسم الله

سندس تبكي بلعاني :يا حليلي تعبت اني تعبت ناديلي شاهين

-وفي لحظات هدي خش شاهين باش يطلع فيروز..

زينب التفتت شافت شاهين خش :اهو شاهين خش غر خيرك شن في

-وهي زينب قالت هكي.. وتهجم سندس ادفها وتطلع تجري.. بينما شاهين واقف بيسلم على فيروز.. تمشي سندس ادفه وتشد في جاكيت متاعه باش ما يسلمش .. وتبدا تبكي قدام الناس..

سندس :زودلي زودلي

حضريه تلطم في خدودها :حي حشايم حي الناس الناس يتفرجو

سندس تعلي في صوتها :ضربوووني زودلييي تعبت اني تعبت

-واللي هادا قعد مستغرب.. ويقولو :شكله عزوزتها ابصر شن دارت.. حي وباقي الضراير طلعن وهدي تبكي!.. هديما مش بلاش اشبح شن دارتلهم حضريه.. يا كبدي عليهم مسيكينات ".. ما يحسابوش هدا كله ما وراء الكواليس 😂

شاهين نحرج يبي يبعدها من عليه باش يهدي الاوضاع :اشش خلاص سندس حولي شوي

سندس زادت عكشت فيه وتعلي في صوتها:لااا لاا بيضربونيي

شاهين :اسكتي خلاص ماحدش بيضربك اسكتي

حضريه :تي حولي يا بنت خلي يلبسو الدبل لي بعضهم حولي وانتي كيف العفينه

-وهنا صار لازم ندخل 😂جو الصدمه 😂.. وخشت هنا ام سندس مالقت ما دير حضريه

ام سندس :احني عطيناكم بنتنا باش هكي اديرولها؟.. زودي يا سندس هيا البسي عبايتك وهيا معاي

حضريه :كيف تطلع بلا شيره راجلها

ام سندس :راجلها مش محترمها يبدا معاش عنده حق عليها هيا يا سندس

-وسندس ولا كأنه تبي شاهين يدير لقطه 😂

شاهين :عمتي صلي على النبي شن لي قاعده تقولي فيه

-ام سندس شدت بنتها من ايدها بقوه كرتها وخلتها تلبس العبايه.. و حضريه ما خلتش شاهين يلحق سندس.. بس شاهين اول ما بدل الدبله لي فيروز.. طول عطاها بظهره ومشي يجري.. والناس مشمته وحاله.. وبعد طلع شاهين الناس قعدت تروح

فيروز:يا حليلي يام هادو من اول يوم وقلبو الدنيا

حضريه :مدام محلوله فم بيتكومدو عليك اعقلي واحسبيها صح يا مريوحه

ام سندس :صح كلام عزوزتك يابنتي

فيروز بصوت واطي :اني بنتزوج مش بنحارب😒

-فايزه نخصتها وفنصت فيها

حضريه :الناس روحت.. زينب خلصي الصاله وتو غدوا نردهلك.. وانتي فيروز الحقيني نوصلك لشقتك..

فيروز :شاهين قال حاجز في فندق

حضريه :شني بتمشي تقعدي بروحك مالا.. تعال معاي بلا عناد.. " وقالت بصوت واطي ".. هدي فيروس مش فيروز

-فيروز سمعتها.. وزينب قعدت تضحك و فايزه تسحن بجد كلولها كبدها فيروز 😂.. وبالفعل مشو كلهم لي الحوش.. الا ام فيروز و فايزه وصلوها للحوش وروحو.. بس لما خشت فيروز لقت شي.. يتبع
.....................................................................
....
برايكم شن ح ادير ورده وعبير بعد يعرفو سندس كدبت عليهم وزلبحتهم.. وشن ح ادير فيروز في سندس و ورده 👀.. و شاهين شن ح يدير بعد يعرف بهدا كله 😂🔥زي ما شايفين الروايه نار فا لازم تفااعل عشان بنصفي حبايبي ❤🔥
#فاطمه_سالم_الورفلي