لم اخلق لرجل سواك

الجزء التاسع

#بقلم إيـزابيـل
#الجزء التاسع
#لم اخلق لرجل سواك
..
نكدر نكول من هنا راح تبدي قصه جمانه! تابعوا
..
الموقف جان كفيل بأنو يخليني انجلط بنفس الثانيه بس بوقتهه ماعرف شنو من قوه جنت شايله خلتني ابعد نظري عن الجثه والتفتت للشباك مال المطبخ المفتوح وعيني تصير على الشخص الي طفر من السياج وطلع يركض..

سكنت وكلامي وكف ببلعومي ماعرف شسوي اطلع اركض ورا اصرخ والم الجيران اوكع بصف اسعد واشوفه ميت عدل!

كل الي اعرفه وكفت مثل الي توه كاعد من حلم او كابوس ب الاصح وينتضر عقله يترجم الواقع ويخلص من هل الموقف المخيف!

بس انتضرت لحد ما صدكت انو هذا هو الواقع طحت بصفه واصرخ واحرك ب الجثه : اسعدددد اسعدددد اكعددددد اسعدددددد..

احرك بيهه يمنى يسرى وابجي وادك على راسي..
ولك اسعدددد اكعدددد لا تخوفنييي اكعددد اخ ولج يمه الحكيلي صخام وعزا براسي..

على صوتي التمو الجيران رجال جبير ومرته جانو جوارينه كلش حايط على حايط وحيدين
دخلو يركضون وونصدمو الرجال كام يصيح لا اله اله الا والمره تسحل بيه من يم الجثه واني لازكه
واثبت ب عكس رجلي ب الكاع واصيح ووهي تسحب بيه من جوه ذراعي..

جنت فاقده حرفيا وفاصله ماعرف منو اجه ب الضبط شصار وشلون شالو الجثه بس كل الي اعرفه لتمن عليه اكثر من مره وحده تشيل بيه وتصيح اسم الله اسم الرحمن يحفضج ويقويج والثانيه تفتح بوجهي القران..

وصوت وحده يرن بأذني يكول ياخطيه نكتل جوز كدام عينهه بعدهه صغيره هسه تنجلط وتموت..

المره الجبيره طلعتني من المطبخ واخذتني للصاله حيلي نهد كد ما صحت ذبيت روحي من حضنهه وكعت ب الكاع وضهري صار على الحايط كمت اضرب براسي من وره واصيح : خابروووووو اميييي اريدددد اميييي خابروه ولج يمه اللحكيلي يمةةةةة...
.
غرزت اصابيعي بشعري واهلس بي من الوجع حرت شسوي بس اريد اليطفي ناري ازلغ بجسمي اطيح بشعري وواضرب براسي ب الحايط..

واصرخ بـ : اسعددد ما مااات اسعدددد ماماتتتتت...

متناسه الطفل الي بين احشائي وشلون راح يكون ألمه ووجعه بذيج الساعات
..
حوطني ب دائره وينعنن ويبجن ووخابرو اهلي حتى يجون اجو اهلي اول ما شفت طول امي كمت على حيلي وواركض ومن كد سرعتي عثرت برجل مره واجيت اوكع بحضنهه لو ما لازمتني من عكسي ورافعتني..

ذبيت روحي بحضنهه ودفنت راسي بصدرهه
: خايفه يمه خايفه شفته يوكع الدم منه من بطنه يمه مات يمكن مات...

كعدتني ب الكاع ووجرتني من اجتافي خلتني ب حضنهه وتهمس : زين راسج يارباب سوده عليه سوده بوجهي صغيره على هل هم جمانه يمه
..
ابجي وابجي واضرب بوجهي وبراسي لحد ما حسيت خلص بعد ما كدر احجي سنوني صكت وطبكن وحده فوك الثانيه ورجليه كامن يرتعشن واديه تصلبن تسودنت امي عبالهه بيه شيء تلزم بديه تحاول تفك اصابيعي بس ماكو مسدودات بقوه ووترجع لاسنوني تحاول تفتحهن نفس الشيء..