كمين الضراير

التانيه

سندس بهزوه :هه قلت الكلام هذا لما تزوجت وردة 💔 بس كل شيء تغير وقلبك انقسم اكثر وانى عارفه انه توا قلبك مايل لضرتي لين يجي يوم وتمسح سندس من قلبك بكل

شاهين :سندس مكانك نفسه ديما ♥️

سندس  ابتسمت بزعل :نقدر نطلب تخليني اليوم بروحي ؟

-شاهين تعفلق و طلع بدون ولا كلمة اكثر شيء يكرها انه حد يرفضه يحب يكون لي يبيه يوصله حتى لو كان على حساب راحه الغير

-وردة  يلي كانت تستنى فيه هي وبنتها في غمرها في فم الباب ابتسمت

شاهين  شافلها :خيرك نايضه لتوا ؟ بعدين كيف طالعه هكي وحتى صقع على البنت

وردة :قصدك على شوية المكياج يلي حاطتتها

-شاهين تأفف وجي بينزل درجة

وردة شدت يده :لولي مستاحشاتك معقوله بتمشي؟

شاهين بدون ما يشوفلها: تو نجيها حتى غدوا

وردة قرصت بنتها بلعاني :ها ريت ما تبيكش تمشي حرام عليك " وقعدت تهز بي بنتها"..اشش خلاص لولي خلاص

شاهين رف قلبه وخداه منها وخلاته يشد يدها ويمشي معها لجناحها طول 🤷🏻‍♀️ انه كيدهن عظيم😂.. وبعد ما خلاته يغير شمال ولدها ودارتله منوم في العصير باش يرقد.. وهوب تليفونه رن.. خداته طول ولقت.. يتبع

.........................
....
عند سندس :
بعد ما خلت شاهين ييخش وتأكدت انه خش..وشافاته من عين السحريه.. نزلت تجري لقت ولدها يلعب مع بنت ورده التانيه.. تمشي تضرب بنت ورده بي غل غلها كف لين طبعو صوابعها على االخد البنت.. وتعيط عيطه البنت من حراره الكف.. تخلي ورده تنزل زي الصاروخ بقدره القادر جت جنب بنتها واقفه 😂..

ورده منصدمه: خييرك خيرك سرور مني ضربك

-سرور "بنتها " اشرت بصبعها على سندس وتبكي

ورده وماصدقت ورده تبرم على سندس تشدها من شعر سندس وتباركن.. والحزاز طبعا عبير وزي ما نعرفو ديما الحزاز واكلها 😂.. والسي البي شاهين راقد ما يندري الشمس من وين زارقه والدنيا رابخه.. وفاتت ليله بطبيله 😂😂

-بعد يوم :

ناضت سندس اول وحده.. عطشانه..خشت للكوجينه.. وشربت مايه.. شوي سمعت ورده تقول لي بنتها

ورده :سرور بري لي للمحل جيبي حليب باش ندير الفطور

سندس مشي خطرتلها فكره وفتحت تلاجه قالت :لوااه يا مصطفى وليدي تعالى جيب دحي نهاري بوك تو ليوم يحارف ويصارف كان ما يلاقاش الدحي.. "ومشت وقفت في فم الباب تصنت "

ورده :هيي مالا سرور هاك خمسه بري جيبي دحي فيسع

سرور :نخاف ماما يتكسر مني

ورده :افف به بري جيبي عبايتي فيسع بدون ما ديري صوت

-وبالفعل مشت سرور تجري جابت عبايه امها وعطتهلها.. وطلعو جميع

سندس :واحد اثنين تلاته اربعه خمسه.. اهو خمسه ثواني اكيد توا تبعدت عن السور.. خلي نتأكد.. "مشت خدت مفتاح الحوش من على المكتبه وطلعت من الحوش.. لقت باب السور مردود بي بومشيه ".. واحد اثنين تلاته اربعه خمسه.. اكيد هك زادت تبعدت.. هه غر العبي كان ما نخليك شوشانه ليوم من الشمس يا فرخه ورده اني تضربيني صار ووه عليك ضوافر فيها مالا شعري لين طايب من الجبد لكن حتى اني ما قصرتش ضربتها على بطنها كان عيل في بطنها راهو طاح 😂.. " ومشت تجري صرفقت باب السور بالسام والمفتاح .. وخشت وطفت التاكو عن يرن الجرس 😂"

-وفاتت ساعه وساعتين وتلاته.. وناض السي البي يتمختر

شاهين نازل من الدروج :ورده يا ورده

سندس مقعمزه على الكرسي وتقلب في القنوات بالريموت :ورده طلعت

شاهين استغرب :وين طلعت؟

سندس هزت كتفها: عاد وين نندري عنها قلتلها تربحي في طولك في عرضك غر اقعدي غر ابعدي شيطانك قالت مدام شاهين بيجيبلي ضرة ماني قاعدتها في حوش.. قبل بتخلي الصغار كلهم غر البنت سرور كرشت فيها وطلعت في جرتها يصلح الله حالها

شاهين :تي كيف هك؟.. "بعدين تفكر لقطه سندس امس دار روحه مش طايقها سكت ومشي لي عبير "

فتحت الباب منى :اهلين بوي صباح الخير

شاهين :ناديلي امك

منى تنهدت: يام يبيك بوي "وطلعت *

عبير حطت الصفرة الفطور وطلعت :اهلين شاهين

شاهين استغرب ان تحكي بجفاف بعدين تفكر انه امس هزبها تنحنح وقال :كيف حال اا ما شفتيش ورده؟

عبير :اها نحسابك تسأل علينا.. لا ما شفتهاش

شاهين :ماشي سلام

-عبير صكرت الباب بدون ما تزيد حرف على غير العاده.. اما شاهين ما اهتمش لانه ضامن وجودها ببساطه..

سندس :وين ماشي

شاهين عاطيها بظهره :بندورها بالك في حوش هلها

-سندس تخزرطت..

منى بشك:زعما تعاركتو مره تانيه؟

سندس بأستعباط :وليش بنتعاركو

منى بهزوه: على اساس ما تعاركتوش امس

شاهين فتح الباب وجي بيطلع التفت :شن توشوشو

سندس :لا شي غر تسأل فيا على صطوفه وليدي تبي تلعبه سلامتها ههه

شاهين ما تقتنعش بس سايرها:همم .. "طلع لقي باب السور مصكر بالمفتاح استغرب.. رجع تاني خدي المفتاح من المكتبه ومشي فتح الباب و.... يتبع
...................................................................
....
برايكم ح شن ح يصير؟😂 .. وليش فيروز سيبت محمد رغم تحبه زعما شن السبب لي خلاها تتنازل على حبيبها.. وشن ح يصير مع سندس ومهند برضو لي ح تعرفو الحلقه جايه شن بيصير معاه لي ح يقلب كل شي 😉توقعاااتكم ورايكم وتعليقاتكم تفااعلو ح نصفي 🔥
#فاطمه_سالم_الورفلي