مفستورما

٤

صحت الصباح اتجهزت لي الجامعة دخلت لي امها المطبخ و بقت تاكل في السلطة البتقطعا امها بي استعجال
نازك:طيب اصبري خليني اقطعا زي الناس و احشي ليك شي تاكليه
اماندا و خشمها ملان اكل:لا لا متأخرة و حازم منتظرني تحت
نازك:قوليه يجي يتغدا عندنا بكرةةة
اماندا من بعيد:حنسا يا امي اضربي ليه انتي بعدين
نزلت و نفسا قايم دخلت العربية و بقت تلوك في اللقمة الفي خشمها و بتتنفس بسرعة :من صباح الرحمن بتاكلي؟
اماندا :ما عندي شي اعملو غير الاكل فما تنق لي كل م تشوفني باكل ☺️
حازم:والله في سؤال محيرني
اماندا و هي بتصلح في شعرها:الي هو؟
حازم:معدتك دي زي معدتنا؟ يعني مهما م تاكلي م بتشبعي !
اماندا:ما عارفة  بدون الشكلاطات البتجيبا لي (شالت الشكلاطة الخاتيهة في درج العربية و كملت كلاما):كنت حستحملك كيف :)
حازم ضحك و قليها :و انا م عارف شنو البخليني اصحا من الدغش عشان شافعة زيك بتجيب لي الصداع 😔
ربعت يدينها و ختتوم في الحتا البتكل فيها السواق يدو  و عاينت ليه بي كل جدية و وجهت نظراتا في عيون حازم و قالت ليه:خلينا نتفق !
بادلا بنفس النظرات و عاد نفس الكلام القالتو :خلينا نتفق!
قالت ليه و هي بتخت صباعا في جبهتو :انو يومك م بتعدل الا بشوفتي
قال ليها و هو بمسك صباعا و بلويهو ليها:جايبة الثقة دي كلها من وين 😂
اماندا:ااايييي حااززمممممم
فكاه و هو بضحك و بدور العربية..قالت ليه:سسسغغغيلللل خلاص 😒
حازم:الله بحب التكشيرة دي من الصباح
قالت ليه و هي مركزة مع الولد الفي الشارع:حازم اقيف
حازم:مالك؟
اماندا بي كواريك:اقيييف بس
وققف بعدين قالت ليه :مش دا حسن؟
حازم :اي ياهوو...اماندا كانت عاوزة تنزل قام حازم مسكا و قال ليها:ماشةةة وين؟؟!
عاينت ليه و هي بتحاول تفك في يدها:ماشة ليه
حازم بي نبرة حادة:لا ي اماندا
اماندا:بنفس النبرة:ليه لا؟؟!
حازم:لانو م معروف الولد دا وراهو شنو
اماندا كانت بتعاين لي حازم بي استفزاز و قالت ليه:انت منو عشان تقول لي اعمل شنو و م اعمل شنو؟
فكا يدها و طلع نفس حار و قليها :امشي ي اماندا
فتحت التأمين و قالت ليه:اصلا ماشة
نزلت و مشت على اتجاه حسن و بقت تتمعن الضربات و الكدمات الفي يدو كان قاعد في الارض و نايم قربت عليه زيادة حسن قام مخلوع و بقا يقول:لا خلاص عليكم الله خلاص
حاولت تهديه بس هو كان في حالة هستييرية م عرفت تعمل شنو قعدت في الارض و مسكت يدو و بقت تقول ليها :انا اماندا انا اماندا حسننن!!
حسن سكت و بقا بتنفس بي سرعة كأنو كان جاري و هي بقت تقول ليه :اهدا انا اماندا
قليها بصوت شبه مسموع:جاية هنا تعملي شنو؟و عاوزة مني شنو ؟
اماندا:اي زول بعرفك و يلقاك نايم في الشارع كدا طبيعي حيجي يسألك
حسن و هو بمسك في راسو :اماندا انا حالياً م قادر اتكلم مع زول ابعدي مني عشان م تتأذي
اماندا:لا م حبعد قوم معاي بيتنا بي جاي ادخل غسل وشك و تحضر لي الجامعة
حسن و هو بضغط على راسو و بحاول انظم انفاسو :اماندا زحي مني
اماندا:لا م حزح لانو قعدتك هنا م..
حسن لزاها و بقا يكورك :زززحححي مني م بتفهمي؟؟؟؟!م بتفهمي انتي!!؟!؟؟
اماندا كانت بتعاين ليه في وشو كانت في جروح كتيرة في جبهتو و عروقو كانت ناطة و عيونو حمرة كانت خايفة شديد و م قدرت تقوم من الارض و هو لسا بكورك:تان م تفتحي **** دا معاي خلاص جننتيني افكاري
حازم نزل من العربية و جا قوم اماندا من الارض و دخلا العربية و هي لسا كانت مخلوعة من الحصل و حازم كانت اخلاقو واصلة فوق منها لانو حزرا منو
اماندا بصوت مخطوف:حازم..
حازم بي كواريك:ولا كلمة يا امندا ولا كلمة
سكتت و بدت تنضف في هدوما الاتملت تراب و بقت تعاين لي حازم بي الجابس كان زهجان زهجة م طبيعية لي درجة انو عروقو كلها ناطة و كان سايق و ساكت و بطقطق صباعو مع الدركسيون خلت اماندا تتوتر لانو م بعمل الحركة دي الا تكون قافلة معاه
وصلو الجامعة و اماندا بقت تعاين ليه و هو شغال بي التلفون و منتظرا تنزل مرت عشرة دقايق و هم في الحالة دي  قام قليها:انزلي
اماندا:ابيت م بنزل
حازم:يبت حتتأخرري و انا حتأخريني معاك!عندي اجتماع
اماندا عاينت ليه  و قالت ليه بصوت طفولي :يعني م زعلان مني🥺
حكا راسو و قاليها:في زول بزعل من بتو؟
ضحكت و قالت ليه:يعني اتصالحنا؟
حازم:لو نزلتي و لحقتي محاضرتك و خليتيني اتخارج ايي😁
اماندا :عندي موضوع مهم كان مفروض احكيه ليك لكن  انت عامل فيها زعلان و زهجان المهم م علينا محاضرتي بتخلص ١٠ تعال لي
جات نازلة مسكا من يدها و قال ليها:امندا
قالت ليه:اها
حازم:لو حسن لاقاكي اتخطيه طيب ؟ م تتكلمي معاه الليلة شايفة حالتو عاملة كيف!
اماندا:حاضرر خلاص عرفنا فكنيي
حازم:و امسحي الشكلاطة الجغمزتي بيها وشك دي
اماندا :و هي بتمسح في وشها:اوكي طيب
حازم:بحبك
اماندا من بعيد:عارفة
دخلت الجامعة و هي مستعجلة طلعت فوق لقت المستر داخل على القاعة جرت دخلت قبليه و قعدت جمب متاب و نفسا قايم  و متاب استلمتا ليك:معقولة يا اماندا؟؟!!؟!انا حسا كنت قايلاك م جاية قلبي كان في ايدي ،انا زاتي غبيانة !!كيف اخلي معاك حاجة مهمة زي دي وب بس وبب
اماندا و هي بتطلع في البحث:يوم خوفك الزايد دا بقتلك +اصلا قلت ليك شيليه معاك قعدتي تتأفأفي +م شفتي حصل شنو
متاب:حصل شنو؟
اماندا:حسن..
متاب قاطعتا و قالت ليها:تتاااني حسن؟؟؟يا بت الزول د مجنون اختيه ياخ لا لكن انتي لو م حشرتي نخرتك في حياة زول م بترتاحي
اماندا:متاب متاب خلاص جبتي لي صداع من الصباح و قفلتي لي نفسي من المحاضرة منك لله يا شيخة
المحاضرة خلصت و مشو لحدي بوابة الجامعة منتظرين حازم متاب لكزتها قالت ليها :شوفي طلال قاعد مع منو
اماندا و هي بتعاين لي البت من فوق اي  تحت:اها مالي و مالو اسوي ليهو شنو
متاب:سمح م تعايني لي فلانة كدا
ضحكت و قالت لي متاب:في عز الشمس دي البلبسا احمر شنو
متاب:اااششكك (نظام اسكتي) طلال جاي علينا
اماندا:حسا يجي ماعطنا بي سويت و فعلت و جبت
متاب :النبي م تحرجيه عارفاه لايوق و بحب النقة حيدخل في نقاشات م حيطلع منها تاني
اماندا:يبت هي ها م عندي ليه شي
طلال من بعيد:اوووو اماندااا
اماندا عاينت وراها و قالت :معاي انا؟
طلال:هو في اماندا غيرك هنا؟
اماندا:شنو ي طلال اخبارك شنو
طلال:والله ي اماندا م عارف اقول شنو
اماندا:ليه كدا
طلال:والله مشتاق ليكك
اماندا:حتصاحبني ولا شنو؟
طلال:شنوو؟
اماندا:لا ولا حاجة..ام احمر منتظراك امشي ليها
طلال عاين مسافة وراي بعدين ختا يدو فكتفي و قال اي:اها معسلامة
اماندا و قفت مسافة م عرفت تعمل شنو قبلت لقت حازم وراها قاليها :الحيوان دا كان بقول في شنو
اماندا:حازم روق اصلا هو كان عارفك بتعاين لينا عشان كدا عمل كدا قاصد يغيظك عشان تجوط و تمشي تضربو هو بس عاوز فيك فرصة انا عارفاهو
حازم مشا خطوطين على طلال قامت اماندا سبتتو و قالت ليه:حازم خلاص ياخ خليه م تخت نقرك من نقر الشافع
حازم:و انتي ماشاءالله عليكي م عملتي اي شي ولا كوركتي فيه عاجبك الموضوع
اماندا عاينت ليه بي غيظ و قالت:م لي خلق اتشاكل معاك حسا و اوهنداك طلال كان عاوز تضربو امشي اضربو م لي دعوة بيك
اماندا اتحركت على اتجاه العربية قامت متاب قالت ليه:حازم الله يرضا عليك م عاوزين مشاكل
حازم قاليه من بعيد:كان راجل تعالي و شوف البحصل ليك شنو
متاب و هي بتجر فيه:حازم  خلاص عليك الله 😩
حازم عاين  لي متاب و هو مكشر زحا منها و مشا ركب العربية و متاب لحقتوم..
نزلو متاب و بعدا بقو ساكتين حازم قال لي اماندا:الموضوع المهم؟
اماندا:لو م كام مهم شديد م كنت حتكلم معاك لي يوم الدين
حازم:حسا انا عملت شنو !!؟!؟
اماندا:تقولي انا عاجبك الموضوع؟؟؟انت ما بتعرفني ولا شنو!!؟
حازم:زلة لسان متأسفين يبشا
اماندا بقت تضحك و قالت ليه:طيب عاين
حازم:اها؟!
اماندا:امبارح و نحن بنضف في الحديقة لقيت دفتر  و انت عارف فضولي طبعا!!قلت الا افتح اشوف د شنو المهم لمن رجعت البيت و بديت اقرا فيه حسيتو غريب شديد فاهمني؟حتا الكتابة كانت بي خط الايد لكن مفهوم و واضح شدديد لمن خلصت الصفحة الاولى كان مكتوب كلام بي تحت م عارفاها ياتو لغة بظبط و مكتوب جمبها سبب حزني قلت اقرا الصفحة البعديها لقيتا مقطوعة
حازم قليها و هي ماسك التلفون:طيب و انا حسا المفروض اعمل شنو
اماندا بي كواريك: تسيب التلفون و تركز معاااي!!
حازم:تعالي كفتيني عليك الله!
اماندا:يا حازم ياخ انا بتكلم معاك جادة انا عاوزة اعرف الحاصل شنو و دي شنو اللغة المكتوبة دي !؟
حازم:طيب طلعي الدفتر اشوفو اللغة الما عرفتي ليها دي
شال الدفتر و بقا بعاين فيه و قال ليها:شكلو قديم
اماندا:ما عارفة ما حاسة بيه قديم بس عشان كان مغطى بي التراب
حازم فتح الدفتر و بقا بقرا في الكلام و عينو وقعت على الكلام المكتوب تحت و قليها:ما عارف والله
دور العربية و قالت ليه:ماشين وين؟
حازم:لي ابوي
اماندا:ليه؟
حازم:انتي عارفة انو بابا بعرف كم لغة و بعرف لي الحاجات دي شديد يعني حتى لو ما عرفا اي لغة ممكن يورينيا اي شي نقدر نعرف بيه الرطانة دي
عاينت ليه ومسحت وشها و قالت:عارف اول مرة اكون خايفة كدا
حازم:كيف م فهمت؟
اماندا:انا زاتي م فاهمة ما عارفة ليه انو حاسة في شي غريب في الكتاب دا !؟
حازم و هو بضحك:جايباهو من حديقة الطاهر و كمان كان مدفون و تقولي لي ليه حاسة انو في شي غريب؟🤣اها دي زاتا تلقي شعوزة
قالت ليه و هي بتفتح الكتاب و بتتحسسس في الورقة المشروطة:اكيد الورقة المقطوعة دي ليها علاقة بي الكلام المكتوب دا!
حازم:طيب اقري الصفحات الجاية امكن تفهمي شي
اماندا:لا كدا ما حفهم اي شي كاتب جمب الكلام دا "سبب حزني"  يعني انا لو قريت باقي القصة حكون زي الاطرش في الزفة:)
حازم:بتحبي تعزبيني معاك في أمورك التافهة دي😊انزلي نمشي نشوف الحاج بقول شنو
——————-
رؤى:انا بضرب ليك من امبارح ليه م بترد علي؟؟!
طلال:ياخ كنت مشغول ي روى م تكرهيني
رؤى:طيب ممكن تهدأ و م تكورك؟؟!
طلال:عاوزة شنو حسا؟
رؤى:حنتلاقة متين؟
طلال:انا الايامات دي ما فاضي
رؤى:ااممم بالله؟!طيب ممكن اعرف امبارح كنت وين؟
طلال بي زهج:كنت مع عثمان بنجهز لي لبحث
رؤى:متأكد يعني؟
طلال:رؤى انتي عاوزة توصلي لي شنو بظبط؟اي كنت معاه متأكد
رؤى:تمام
قفلت في وشو و عاينت لي صورة طلال و بت كدا كان ماسكا من خصرها قفلت التلفون و رقدت في السرير و بكت قدرتا
————-
حازم:يابوي عاين لي الكلمات تاني معقولة م عرفت اي شي ؟
منصور:ياخ هو حصل لاقتني لغة زي دي بس م متزكر وين بظبط ..منصور بقا بعاين لي الكلمات و هو في حيرة من امرو طلع كتيب صغير و بدا يقلب فيه و نظراتو كانت بين الكتيب و الدفتر لحدي م اشر بي صباعو على كلمة و بقا بعمل فيها دوائر قاليه بي تردد:تقريباً اللغة دي اغريقية
اماندا عاينت ليه و قالت:اغريقية؟
منصور و هو مركز مع الكلمات:بي الأصح يونانية
حازم:يونانية!!!
منصور:ايون
حازم:و طيب  اشمعنا يوناني يعني؟
اماندا و هي بتطلع التلفون و بتفتح قوقل ترانسليت:عمو اديني الدفتر
قعدت جمبو و مدا ليها الدفتر و حازم جا وقف بي فوقيها و هو تاكل ايدو في التربيزة ،امندا صورت الكلمة الاولى " Ψυχές" نطقها "سيكييس" طلعت ليهم "ارواح " اماندا عاينت لي حازم بلعت ريقا و مشت لي الكلمة التانية " Νεκρός" نطقها "نيكروس" طلعت ليهم "اموات " حازم عاين لي امندا و بقا بضحك و قال:مش عاملة فيها م خوافة و قلبي قلب اسد و بتاع؟اشربي بئا🤩
امندا و هي بتقلب في عيونا:نهاائي م وقت هظارك دا
لزا راسا من ورا قاصد يستفزها و قال ليها:امشي لي الكلمة البعدها "Παιχνίδια" نطقها "فسنديا" طلعت ليهم "العاب" مشت طوالي لي الكلمة البعدها " Παιχνίδια" نطقها "بيديا" طلعت ليهم :اطفال
اماندا بدت تردد في الاربعة كلمات ديل ارواح،اموات،العاب،اطفال بقت تفكر د شنو و قاصد بي الكلام د شنو؟عاينت لي حازم و قالت ليه بي خوف :اها؟
حازم:طيب ترجمي اخر كلمة بعدين نشوف حل لي المصيبة دي
قالت ليه و هي بتمسح يدها في كتفو من العرق و مسكت التلفون و بدت تترجم قليها وشو فيه ملامح القرف:انتي حتخلي حركاتك دي متين
اماندا كانت مركزة شديد مع التلفون و مع اخر كلمة الي هي "Ευτυχία" نطقها "افتيشيا" طلعت ليهم :سعادة
اماندا:سعادة!؟سعادة دي تبقى خالتك
عاينت لي حازم الكان واقف فوقيها احساس اها؟
قليها:مش عاملة فيها كونان؟يلا حلي اللغز د يا شاطرة عشان انا صدعت
مشا قعد في الكرسي القدام مكتب ابوهو و بدا يلعب بي القلم و منصور كان ساكت ساايييي و اماندا بي هنا بتنق:ارواح و اموات عرفناها،طيب الدخلل السعادة و العاب و اطفال بي ارواح و اموات  شنو؟مع انو كاتب د سبب حزني! ممكن اقول اموات و ارواح شوية منطقية بس سعادة و العالب و اطفال الدخلوم شنو؟
منصور سكت مسافة بعدين قال:امكن في زول مات!
حازم:قليه و هو سرحان في الدفتر :لا
منصور:طيب وريينا ي فالح قاصد شنو؟
حازم و هو بعاين لي اماندا و مضيق عيونو كدا بي تركيز:اماندا زي م قلتي انتي في ورقة مشروطة!
اماندا و هي بتفتح الدفتر :اايي
حازم:على حسب فهمي المتواضع انو مطلوب مننا نفتش الورقة دي عشان نفهم العبارات دي معناتا شنو!و بتقصد شنو بظبط!
منصور طقا اصابعينو و قال ليه:و اديك الزيت؟
حازم و اماندا :اها؟؟
منصور:كلامك صح بس بي المقلوب!يعني نحن م سحارين عشان نعرف الورقة المقطوعة قاعدة وين!
حازم قليه :اها؟
منصور:ي ولدي اي شي بقا واضح الكلمات دي هي مفاتيح عشان نعرف الورقة وين!
امندا:و بي التالي حنعرف القصة شنو!
منصور :ايوا زي م قلتي
حازم:طيب كلامك منطقي يا ابوي،لكن برضو في حتا م مفهومة
اماندا:حنلقا الورقة كيف
حازم:بظبطط!
منصور :الكلمات الخمسة القدامنا ديل زي الشفرة!شفرة و محتاجين نفكها!او لغز و نحلو محتاجين بس نشغل عقلنا شوية و نعرف الكلمات دي قاصدين بيها شنو بظبط
حازم و هو بعاين للكلمات:اذا كلامنا لحدي حسا صح!ابقا الورقة المقطوعة دي اكيد مختوتة في مكان..
اماندا قاطعتو و في وشها ابتسامة :و المكان دا اكيد حنطلعو من الكلمات دي!
حازم:بظظظاااابط!
شالو نفس كلهم مرة وحدة و رجعوهو في نفس الوقت بعدين اماندا قالت:طيب ارواح و اموات سهلة بس سعادة و اطفال و العاب؟يعني نفتش في العاب اي طفل نلقاهو ولا كيف؟
حازم بعد م طلع من السرحة الهو كان فيها و قال بي صوت عالي و لهجة سريعة كدا:اموات و ارواح معناها اكيد مقابر!!!
منصور و اماندا  عاينو ليه في نفس الوقت بعدين منصور قاله ليه:طيب في مليووونننن الف مقبرة في السودان!؟
اماندا:لا مستحيل مقابر !بعدين قول مقابر كدي الالعاب و الاطفال و السعادة دخلوم بي ام المقابر شنو؟؟!!سكتت مسافة بعدين قالت ليهم :دقييقة!!
حازم بادلا نفس النظرات و قال ليها:الي بالي بالك؟
<فلاش باك >
كانو ماشين برجلينوم و بياكلو في حلاوة قطن اماندا قالت ليه و هي بتنطط :حازم انا عايزة الدبدووب داك
حازم :دبدووب شنو يا بت بسمالله
قالت ليه و هي بتأشر على محل الالعاب:ياخ داك المعلق فوق عاين ليه
دخل ليها لقمة في خشمها و قال ليها:عايني ليه كبير كيف ي اماندا و نحن م سايقيني عربية ممكن اعرف حنشيلو كيف و نحن ماشين بي رجولنا؟
اماندا طوالي كشرت و عملت نفسها زعلانة و قالت ليه:مش المفروض نحن تمينا ستة سنين من ما بنعرف بعض و على اساس حتعمل لي اي شي نفسي فيه؟😔😩
حازم:قلتي لي (و هو بحاكي فيها) حازم عليك الله ارح نمشي كدااري الجو حلو قلت ليكي ي امندا اعقلي م ممكن نمشي بدون العربية قلت لي لا عادددي و قعدتي تتبكبكي
عاينت ليه بنظرات طفولية و قال ليها:اي زي دي كدا
اماندا:ابو الزوز م بزعل اماندا صح؟😔
حازم:غوري قدامي طيب و حتشيليه انتي م لي دعوة بيك
دخلو المحل و طلعو بي الدبدوب و طبعا حازم الشالو قليها بي زهج:حسا لي مراض ادفنك انتي و دبدوبك في المقابر القدامنا دي و ارتاح منك!!!
اماندا و حازم رجعو من الماضي لي الحاضر و قالت ليه و هي بتصفق و بتنطنط :للقييننااهاااا!!!😭🏃🏻‍♀️
حازم:زائد انو لاحظي م بعيد من البيت حقك !
اماندا و هي بتستعجلو :قوم يلا نمشي
حازم مشا العربية و اماندا لحقتو بي حماس و منصور من بعيد بحاول اوقفوم قال ليهم :هي انتو سعادة م حليتوها!!!+حتمشو تفتشو وين في المقابر الكبيرة ددي؟!!!؟؟!؟
عمكم كان بكورك و ديل قربو يوصلو المقابر و هم في العربية بعد م استوعبو انهم ماشين مقابر عاينو لي بعض حازم قليها:انتي متأكدة بي انو عاوزة تمشي؟
اماندا بي توتر:انو اي !يعني اكيد عاوزة اعرف الحاصل شنو!
حازم و هو بوجه عليها نظراتو بي كل جدية:بس دي م زي امورك الهايفة ي اماندا! د زول مخطط لي د كلو و دارس أي شي و مشا المقابر و ختا فيها الورقة!و د شي خطير على فكرة،،.. عادي ممكن يكون قاتل والا شي يقتلك و يدفنك وقتي في المقابر🤣
قالت ليه و هي بتخت يدها في يدو:طالما ابوالزوز معاي م حخاف🙈
قليها و هو بضحك:اه وين ابو الزوز اول م يجو يقتلوك حيقوم جاري ها عان دي🤣
اماندا و هي بتضربو:ي حيوان مش كنت بتقول لو متنا موتة زي دي حنموت سوا؟
حازم:كان يتقطع لساني قبل مقول كدا😭
اماندا :بجد رفعت لي ضغطي ي حبوب ❤️
حازم ركن جمب المقابر و قليها ننزل؟
لقاها نزلت قبل م يسألا هزا راسو و ضحك و مشا لاحقا و اول م ععتبو المقابر حازم قال:د الشي الما حسبنا ليه حساب!ممكن اعرف الورقة حنلقاها وين؟نحفر قبول الناس ولا الحنك شنو؟
امندا و هي بتمسك في ايد حازم و بتردد في كلمة سعادة!و هي بتمشي خطوطين لقت قبر مكتوب عليه "فرح الزين" نبهت حازم و قالت ليه:تتزكر اخر كلمة ترجمناها كانت سعادة
حازم:اها؟
قالت ليه و هي بتأشر على المقبرة :عان المقبرة دي بي أسم فرح الزين!
حازم:اماندا:طيب قولي الورقة هنا!حنحفر القبر يعني ولا كيف؟!
اماندا و هي بتللف بي الناحية التانية من القبر :لا !
دنقرت و شالت الورقة المغروزة بي الطول في التراب عاينت لي حازم بي انتصار مسك يدها وطلعو من المقابر و دخلو العربية و بدت تفتح فيها و تقرا في الكلام المكتوب ...
#يتبع
حسابي لي المتابعة:
_.zeezyy