بيوت بلا جدران

البارت 61

من يومها وحطاب اتخله عنا وصار مايسمع الا حجاية الشيخة وسمرة .. وحده تاخذه ووحده تجيبه ..

مرت الايام واني بالي يم علي وشسوة .. يذكرني لو نساني .. بعده ينتظرني بمكانه لو ايس ومايجي ..

فتحتلي الشيخة الباب وهددتني لو سويت شي غلط تحبسني مرة ثانية ..

وافقت بس كون ماتحبسني .. لليل رحت ولگيته منتظرني ماتعب ولا مل .
شافني وجن شاف الدنيا كلها بعيني .. عيونه يصبن ووجهة يضحك ..
جان خايف سوولي شي .. ورايح الحطاب محاجيه وحطاب طارده رايد يعرف بس خبر عني ..

تعاهدنا بيومها مانتفارگ للموت ..
مرت الايام .. وقبل موتت راضي ابن موحان ..
طلب علي نتزوج ..
خفت وماقبلت ..
بس گالي لو وافقتي الشيخة تنجبر تزوجنا عبن صرتي مرتي ..

بقيت افكر ومالگيت الا هل حل حتى ننجمع .. جانت الابواب كلها مزقفله بوجوهنا وبساعة ضعف قررنا وانتهى ..

رفعت راسي الها ..
" يعني تزوجتوا ؟"

ضربتني على راسي ..
" جا شنهي قصدك امك تسوي العيبة ؟"

اتنهدت وسكتت ..
رجعت كملت ..
جان متفق وي اخته ورجلها يرتبولنا السالفه ..
ورحت الهم بالليل والشيخ موجود .. وعقدولنا .. وجماعة علي اثنين وياه جانو ..
لان اخوته معارضين السالفه وماقبلوا بعد المشاكل الصارت .. ماگاللهم ..

عقدنا وكملنا .. رجعني للبيت بساع ..
جنت فرحانه واخيرا صرت مرت علي وهو صار رجلي

بقينا نخطط الزواجنا وگال راح احجي وي حطاب ان ماقبل اگله واخذج غصب عنهم ..

اجانا خبر وفاة راضي والشيخة تسودنت وهو عزيزها .. گلبت السلف ودخلتنا بأنذار ..
حارت بالثار والفصل لين جابوا مرمر فصلية النا . 
تغير الوضع.. 
بس بقينا نلتقي .. جنت اطلع بالليل واروح البيت اخته اشوفه ..
وانت ابني وصعبه احجيها .. بس ماگدرنا نسيطر على ارواحتنا وتممنا زواجنا ..
وعدني نعقد محكمة واصير مرته رسمي وياخذني ونهج من السلف كله وبعيد عنهم ..

جنا ناوين نستقر بغير سلف وحضرنا الكلشي ..
بس المحاسبنا حسابه انه تتسمر لقائتنا ونماشي رغباتنا وماناخذ حذرنا لين ماانكشفنا ..

ومن انكشفنا حبسوني ..
وعلي اختفى ومحد يدري بي وين فجأة .. حتى اخوانه ماخطر ببالهم انه الشيخة وراها ..
تصور حطاب وكلهم يدور عليه كم يوم لين لگوه مطوف بالماي غرگان .. ومايعرفوه مكتول لو قضاء وقدر ..
اني جنت متأكدة انكتل لان الشيخة ماتريد احد يلوي ذراعها ومن عرفت متزوجين .. جان الخلاص الوحيد هو تنهي حياته ..

طفرت من مكاني مصدوم ..
" وليش سكتي ليش ؟"

اتنهدت ..
" لان انت ببطني .. خفت على ثمرة حبنا تنتهي .. ماردت ريحة علي تروح مني .. واصلا مابيدي شي .. يعني لو احجي واصرخ مايتحاسبون .. الشيخة بنت اقطاعيين وايديهم ملطخة بالاجرام . ومن يوم الخلت رجلها بعشيرتنا دمرتها .. بعدت ابوي عن عمامه واهله وصاروا ال عباس وال عناد متفرقين .. عباس ابو ابوي مرداس وعمي نعاس وعمتي دنانير .. وعمي عناد ابو عمامي الباقيين من العشيرة .. يعني جان محد يگدر يحجي وياها وهي بظهرها اهلها .. "