دمعت عيونها عليه ..
واخذت نفس وكملت ..
" وصدگ حبه مافارگني للموت "
حسيتها وهي تحجي عليه وجن جاي توصفني بكل حرف ..
جنت دوم اسأل روحي اني اشبه منو بأطباعي .. طلعت اشبه ابوي وماادري ..
خنگتها العبرة بس جانت تاخذ نفس وترجع تكمل ..
كبرت وكمل دار معلمين .. وتوظف بساع واجه يخطبني ..
بس الشيخة مارضت .. وبقت تدور سوالف وتريد مهر يليگ ببنت الشيخ مرداس وغايتها تخليه يعجز ..
بس هو ماعجز .. وجان يداوم ويشتغل علمود يجمع النا .. واني جنت وياه خطوة بخطوة عودن الشيخة منعتني بعد امشيلهم .. بس جنا نلتقي بورة الحوش ويحجيلي ..
جان عندي ذهب وفلوس شلتهن واطيتهن اله ..
ماقبل ياخذهن .. گلتله اخذهن وعود رجعهن من نعرس .. وبالگوة قنعته ..
وللعصر دز امه واخواته وبيدهن المهر والفلوس..
والشيخة هنا بذكائها ومكرها فهمت السالفه وعرفت علي واهله مستحيل يجيبون هيج مبلغ وهيج فلوس..
صاحتني للحجرة وسألتني ..
" ذهبج وين حورية ؟"
بقيت صافنه بوجهها ..
" ها بالصندقجة "
اشرت ..
" طلعها وافتحيها خن اشوفها "
ارتبكت وردت بأي طريقه اخلص ماخلصت..
فتحته وشافته فارغ ..
ضربتني بيومها وگالتلي ..
" مو بنت الشيخ مرداس ترخص روحها وتطي فلوس الواحد فگر علمود تاخذه "
بجيت وواجهتها لأول مرة ..
" ابن خالتي واريده .. انت مالج شغل انتي مو امي وتتحكمين بينا "
ضربتني وقفلت الباب عليه ..
وراحت طردتهن واخذت ذهبي منهن وگالتلهن بعد ماتجن ماعندنا مرة الكم "
صاحت حطاب وكالتله ..
" علي قشمر اختك وباگ ذهبها علمود يجي يخطبها ويستولي على ورثها "
بقت تزن براسه لين راح الهم وتعارك وياهم وقطع علاقته بيهم ..
بقيت بالغرفة محبوسة ماطلعوني وجوري تبجي تريدني الا لمن اجاني حطاب ..
جان مقهور وزعلان مني ..
" السويتيه مو صح "
رديت ..
" ابن خالتي واريده وين العيب .. علي ماكو منه "
رد ..
" اكو احسن منه يستاهلوج انت مقامج شيخ مو علي "
ضحكت ..
" هاي سوالف الشيخة مو سوالفك هي ربتك على هالحجي وغسلت عقلك "
اتعصب ..
" ضبي السانج شني غاسلة عقلي جاهل اني "
رديت ..
" جا مااخذت بنت شيوخ انت .. ليش خطبتلك فلاحة وماعلت مقامك ببنت شيوخ "
اتعصب اكثر ..
" وشبيها سمرة .. بعدين لو اني اريد جان خطبتلي مو كل بت شيوخ بيها خير .. ومقامي عالي مايحتاج اعليه .. انتي ماتلام بيج الشيخة .. ابقي محبوسة لين مايرد عقلج الراسج "
YOU ARE READING
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
البارت 61
Start from the beginning
