قصة ورود

قصة ورود ﴿ الاغتصاب ﴾ حقيقيه

بارت 7

مرت الايام ورود كانت متردده انو تحچي ويه مصطفى ومصطفى كان كل يوم ينتضر بأمل يجي اتصال من ورود بس ماكو
وره فتره مو كلش بعيده اتوفه ابو ورود
طبعآ ورود انهارت لأن ابوها چان يعنيلها هواي چان صديقها وتستشيره بكل شي وهو اكثر شخص ساعدها ووگف وياها
محمد زوجته جابت ولد سمته على اسم جده يعني على اسم والد ورود اسمه حاتم

قربت تنتهي العطله وبده الدوام
داومت ورود چانت حيل متغيره وضعفانه ولابسه اسود بس بعدها بكامل جمالها واناقتها
والاسود طالع عليها يخبل ...

مصطفى : من خلصت العطله فرحت كلش لأن راح اشوف ورود هواي جنت فرحان گعدت الصبح سبحت واتعطرت ولبست ملابس جديده
وجنت مغيره قصة شعري ومسوي استايل جديد
وهذا كله سويته الخاطر ورود
رحت للكليه سلمت على الشباب ورحت على سوزان سلمت عليها
وسألتها على ورود گالت هسه راح تجي بالطريق بعدها ازدحام شويه
واحنه واگفين نسولف چان تتقرب علينا ورود متغيره حيل والسواد مغطيها
باوعت على سوزان بنضرات تساؤل
چان ادگلي ابو ورود اتوفه
وصلت يمنا ورود سلمت علينا وابتسمت
گلتلها البقيه بحياتچ
ردت : حياتك الباقيه عزمتهم على ريوگ رحنا اتريگنا
بالنادي واني عيوني ابد ما شلتها من ورود من گد ما چنت مشتاقلها
بس مقهور عليها لأن حسيتها مكسورة بسبب وفاة ابوها وحته ابتسامتها چان وراها حزن كبير

بدت مرحله ثانيه بالكليه ورود وسوزان ومصطفى وصديق مصطفى اسمه فارس
صارو اصدقاء گعدتهم سوه ويقرون سوه
فارس بده يحب سوزان وسوزان هم اتحبه
ومصطفى ضل يوم عن يوم يتعلق اكثر بـ ورود
لكن ورود بعدها ما منطيته اي فرصه
وتعامله معاملة صديق مو اكثر وهي بداخلها ضلت تحبه بس ما تگدر تبين هذا الشي
بيوم من الايام ورود چانت گاعده وحدها بحديقة الكليه
اجه مصطفى وگاللها صباح الخير
ورود : صباح النور هلو مصطفى
مصطفى : هلو ورود شلونج ممكن اتفظل يمچ
ورود : ما يحتاج تسأل اكيد اتفظل ☺
مصطفى : ورود انتي ما اتقبلتيني حبيب الچ
بس اريد اسألچ انتي تثقين بيه لو لا وشگد نسبة ثقتچ بيه ؟
ورود : صدگني مصطفى اثق بيك هواي
مصطفى : اوك خوش حچي زين تتذكرين العام من گلتيلي عندي اسباب خاصه
اريدچ هسه اتفتحين گلبچ الي وتسولفيلي كل شي
بأعتباري صديقچ وانتي واثقة مني
وتعرفين ما راح يطلع الراح تحچينه ابد وراح يبقه سر بيناتنه
ورود : فدوة مصطفى السر الشايلته صعب ويجوز من راح تسمعه راح تكرهني ويمكن حته صداقتك اخسرها

مصطفى : لا ورود ثقي بالله لو شراح يكون التگولينه
راح تبقين انتي نفسچ ورود الحبيتها وما راح ينقص من حبي الچ شي
ورود : ماشي راح احچيلك 😔
سولفت المصطفى كل شي بالتفصيل وادموعي تصب وهو يباوعلي مصدوم من خلصت كلامي گلتله هذا اليمنعني احب واتزوج واعيش مثل بقية البنات

مصطفى : من سولفتلي ورود كبرت بعيني لأن وثقت بيه وحچتلي كل شي بس بنفس الوقت النار شبت بيه وضلت الافكار الغريبه تجي ابراسي
ومن شفت ادموعها ما عرفت اتصرف بقيت بس اباوعلها اريد اگللها كافي لأن ما اتحمل وبنفس الوقت فضولي يدفعني اعرف شنو صار للأخير

ورود :من رخصتك اريد اروح راح تبدي المحاضره
مصطفى : اوك اني هم اروح وياج

راحو ورود ومصطفى للقاعه ومن انتهى الدوام
مصطفى اجه على ورود وگاللها
ورود بس دقايق احچي وياچ

ورود : اتفظل مصطفى
مصطفى : اني اريدچ ورود اريد اتزوجچ
حته بعد كل اللي گلتيه
انتي چنتي طفله وما الچ ذنب بشي
بس عندي شرط واحد
ورود : شنو هو شرطك
مصطفى : اريدچ اتدليني على بيت الشاب اللي اغتصبچ
ورود : مصطفى انت شتحچي السالفة صارلها سنين
حته ما اعرفه هسه
مصطفى : فدوة ورود اريدج اتدليني بس اشوفه
ما اسويله شي ....

يتبع...