صارن يتعاركن بيناتهن ..
وهجمت حمدية ومنيرة على هدوة رادن يكتلنها لو ما رحيم يحاميلها ويدخلها للغرفة جان طيحن الجاهل ..
صاح بيهن ..
" كافي بسجن .. التوصللها ماتلوم الا روحها . وانتي حمدية انه مامقصر عنج وراح تبقين مرتي وبت عمي وام جهالي بس اعقلي ولا تخليني اخرب وياج "
ردت عليه ..
" شتخرب بعد .. ماانت خنتني وقشمرتني .. گلتلي مااريدها عبن هي مرت اخوي جانت ومايطيني گلبي اوصلها .. بس انه مااگدر ارفض طلب ابوي وهم علمود فروخ اخوي .. تالي تخليني انام وتمشيلها تخلص الليل يمها وبفراش اخوك .. جان استحيت وانت تتختل بنصاص الليالي وتمشيلها "
صاح بيها ..
" كافي ولج حسج مااهيسه .. والسانج اگصه لو حجيتي وعليتي صوتج اعليه .. عودن گلت مااكسر بخاطرج هالضميت اعليج تاليج ماتستاهلين "
گامت تلطم حمدية وتدعي عليه ..
" ريتك بحرگة گلبي يرحيم انت وياها .. ماردت تكسر خاطري عگبيش لمن حبلتها .. ويمي جنت تبجي ظهري ورجلي ومفاصلي هسا عد هدوة صار بيك كل الحيل .. روحلها خل تفيدك ام الرجولة هم باجر عگبة تموت وتاخذ غيرك وتنساك .. وعودن اشبع بيها "
تخربطت ووگعت والتهينا بيها ..
دخل عمي حطاب وعمي منهل سألوا..
" شني الصاير ؟"
ردت عمتي سمرة وهي فرحانه ..
" ماكو شي ابو فرج .. بس هدوة طلعت حبله وحمدية انقهرت "
استغرب عمي حطاب ..
" منين حبلة ؟"
ضحكت عمتي سمرة ..
" ياشمالك يارجال شني منين غير من رحيم رجلها "
هز راسه ..
" هااا اي بالخير بس مو گال مااوصلها شوكت وصللها "
ضلت تتلعثم وتضحك ..
" والله عدك سوالف يحطاب غير رجلها وحلاله ومريته شني شوكت وصللها .. وبعدين بالاول والتالي يوصلها شمدرينا شوكت ؟"
جان رحيم واگف ..
ماباركله .. راح الحمدية ..
" گومي بوية گومي الحجرتج ارتاحي .. لاتقهرين روحج راح تضلين ام موسى ومريته الاولى وبنت عمه .. مو هيج رحيم "
حجاها بصوت عالي ..
رد رحيم ..
" هااا اي يابة والله انه گلتلها بس هي ماتسمع مني "
اشر عمي حطاب المنيرة والي ..
" اخذنها الحجرتها خلها ترتاح "
رحت وي منيرة گومتها للغرفه ..
عمي منهل ضل يحجي ..
" كافي كلما ندخل للحوش نلگيجن متكاونات ماتعبن ماتتهدن .. الزلم تجي لحواشها ترتاح احنه نلگي بس المشاكل والصياح همزين حوشنا جبير وماينسمع بي الحس جان فضحتنا بالسلف كله .. عود مسمايات بنات شيوخ .. "
هز ايده وراح وي عمتي بثينة الغرفتهم ..
دخلنا حمدية الغرفتها وطلعت .
امها ومنيرة يمها…
شافتني عمتي اشرتلي..
" امشي انتي وزهرة ونهاية وكافي زهبن العشا بساع الزلم جاعت "
YOU ARE READING
بيوت بلا جدران
General Fictionرواية تتحدث عن اجيال مختلفة .. اولهم فصلية .. لكن ليست كـ اي فصلية .. عانت منذ ستينات القرن الماضي ظلم وجبروت البشر تحت مسمى التقاليد والعادات العشائرية ..
بارت 49
Start from the beginning
