قدري الاسود

الحلقة(38)

كال الحاكم" القضيه الفلانيه بيوم كذا الكليشه المعروفه 
اسمع من المدعيه غادة عبدالله ..

اول موكفت  كدامه والقاعه مليانه ناس جسمي كله يرجف واعضائي تصطك ابد محد رحم حالي وعفاني من هذا الموقف لااهلي الي اصرو يتهمون سامي عسى يردون اعتبارهم بالي سواه ولاالقاضي الي ابد مانضرلي ولاسمع مني
كتله"

غادة: سيدي سامي ظلمني وطلقني غيابي وبعد ما.....

بعدني ممكمله كلامي نزل نضارته من على عيونه وباوع لسامي الي مخلينه ورا قفص خشبي عساس متهم بس هوا واثق من نفسه واثق من الحكومه الي جوة ايده

_ ليش بابا تضلمها لغادة خطيه ..

باوع للمحامي مالت سامي كام ولد بعمر الثلاثينيات لازم ورقه من كد ماامغوشه عيوني واحس جدران القاعه تطبك على صدري كتهن كت الي بالورقه ورفعو القضيه انو ماكو دليل يثبت سامي الي داز القنبله ليش ماطلعتيها وكت ماجان الضابط واكف .. وطلعو بريء حكم مااعرف هو عادل بحقه وظالم بحقي لو هو العكس...    

طلعنا من المحكمه بخيبه تابعه لخيباتي المستمرة جان بداخلي تناقض باان انتقم من سامي على الي سواه بيه وبان متاكده سامي ميسوي هيج .. بس بالحالتين سامي طلع منها مثل الشعره من العجين.. طلعنا برا القاعه وانا عيوني كامت تحركني ولعبت نفسي ردت استفرغ طلعت لساحه ورا المحكمه بيها حمامات
كعدت على على الكاع ورشيت على وجهي ماي بارد ردت شي يبرد كلبي الي يوجعني من الموضوع سامي ماهمه وكفتي بنص المحكمه ولاوجودي بقربه لا اصلا كاانو هوا مموجوده رجعت يم اهلي الي واكفين يم المحامي يشرحلهم سبب خسارة القضيه انو موقفنا ضعيف بسبب الدليل ماكو يثبت هو مخليها ولاكو شهود غريبين بااعتبار الشهود من اهل البيت وتخصهم الشغله مااخذو بشهادتهم . 

وكمل وهو يكول طبعا مبين ضهرة قوي من الحكومه القاضي حتى ماسمه جهه الادعاء ولاسمحلنا نحجي هو هيج العنده واسطه باوعلي بنضره قهر على شكلي وضعي كال بابا الج الله هذا الماعنده ضهر يضيع بهاي الدنيا ....

رجعنا الطريق كله اهلي يسولفون شلون يسوونها عشائريا وشلون ياخذون حقهم اني كلبي جان حاس وراها انا الاتأذه من كل هاي القضيه حاولت وياهم ينهون الشغله وينسوها بس خلص ابوي قفل وقفلته اخذت قطعه من كلبي  . . .

ويوم من الايام دز ابوي على ابن عمه جبير العائله وهذا احقر شخص عرفناه لاخر يوم بعمري ادعي عليه بكل مساوئ الدنيا تلاقيه . . . . .
وااتفقو انو يدزون احد لاهل سامي حتى يسوونها كعده عشائريا ...

اقترح ابن عم ابوي اسمه وكال لابوي "

_ابو بسام شلون نسويها عشائريا وانت مربي ابنه ابيتك ماتصير

ابوي: لعد شااسوي

_دزه الهم واخلص من همه شلك بوجع الراس تربي ابن الناس وتالي يطلع مثل ابوه ينكر . او يصير بي شي وابوه يبلينا ويكول اريد ابني منكم ذيج الساعه شيخلصك منه وشفت شلون وياه حكومه وعشيرته معروفه.... 

طبعا ابوي اقتنع من كلامه وكله خلص نكعد وياهم ونشوف ...

وقبل لايدز خبر ابوي الهم خابر اخو سامي الكبير  وكله ابو بسام ابنه نريده ويرجع النا واذا ماقبلت .. اكو مصطلح معروف بين العشائر مااعرف منو سننه او ثبته هو ( ابنه مدرك عليكم ) معناه بمسؤليتكم اي شي يصير بي عليكم ..

كاله اذا طلع بشارع واندعم اكو انتم كتلتو  ابوي اجته من الله على الله وانا الضعيفه التسكت لو شماايسوون بيها قرر ونفذ بدون مايحسبون بيه

بيبيتي ام امي تمرضت ودخلت مستشفى يمنا والتموو خوالي كلهم يمنا يوميه واحد يبات يمها امي التهت ابيبيتي ومرضها والمستشفى ونستني
...

وبيوم مشؤؤم  الله لايراويه لمسلم
صاحني بوجود واحد من خوالي جان نسخه من ابوي ونفس التفكير
جنت اسبح باامير كمل شهر ضبط بدلتله وكملتله واجيت للاستقبال لكيت ابوي وخالي متكابلين ويسولفون ااشرلي ابوي اكعد كعدت كباله بعد متر
كال"

ابوي: بابا اريد احجي وياج موضوع واريدج تفهميني واريد تفكرين بعقل مو عاطفه .

مدري ليش كلبي عصرني
وكمل حديثه الي نصه سمعته والنص الثاني بديت افقد عقلي وتركيزي من كال بابا"

ابوي: ابنهم ندزه الهم مالي حمل للمشاكل
بابا انا كبرت واخوتج بعدهم زغار ذوله وهاي ناس راعيه مشاكل وانا شفتيني حتى عشيرتي مابيهم واحد بي حظ  ولابضهرنا حكومه ولاصخام  تقبليها عليه بشيباتي تالي عمري يذلوني ذول   بابا انا انشلع كلبي وياكم ومهما صار انتي بنيتي وماافرط بيج بس الناس كالو ابنه اذا صار بي شي وقدر نزل من الله انتم المسؤلين وشفتي بعينج رادو يقتلونا وطلعو منها مثل الشعره من العجين تقبلينها النا   ومقدر ضرفج بس بابا ابنج بعده طفل كل عمره ومرجوعه لاهله لو بعد ميت سنه بس شحالج اذا يكبر بعينج ويحلى وتالي ياخذوه تموتين وراه .عاد هسه بعده لاضاحك ولايعرفج انطي وخلصي وخلصينا منه همه........_______يتبع

رااااايكم ........تحياتي الكم ول غادة
#الكاتبة_شهناز_الخزعلي #جيمن_جلال