بيوت بلا جدران

بارت 35

صاحت بيه ..
" انلصمي واسكتي كافي "

اجت الحبوبة ..
فحصتني وشافتني :
انطتني اعشاب تثبت الحمل ..
" اضن الفرخ بعد موجود .. هاج ذني فوريهن واشربي منهن وانه فد اسبوعين وامرلج اشوفن نبضه بس لاتخليه يگربلج ولا تشيلين ثگل ونامي اعله ظهرج "

اطتها كروتها وراحت ..
بقت امي يمي .. تدرايني ..
راحت فورت الاعشاب وجابتلي شربت ..
شوية هديت .. والوجع خف ..

تغطيت ونمت ..
بيومها بقيت بغرفة امي مارحت الغرفته ..
وعمتي سمرة ..
گالتلي ابقي ارتاح بحجرة امج .. وانه حجيت وي عيد مايتگربلج بعد ..

كيفت من گالتلي ابقي يم امج .. لان كرهت ذيج الغرفة وريحتها وكلشي بيها ..

امي كل شوية جانت تجيبلي شي توكلنياه ..
بس ماجنت اشتهي اكل ..

شگد جنت احس روحي قوية لو اتصنع القوة .. بس بهذا الشهر حسيت روحي هزلت وضعفت ..

لليل انجبرت ارجع للغرفة .. بس جان يتأخر يله يجي ..
وهالشي فرحني ..
يمشي يسهر وي جماعته .. ويجي بتوالي لليل ريحته تخنگ ..
ينام گبل وبهدومه نفسهن ..

گمت افرشلي فراش بجهة من الغرفة علمود يضل طاهر وانام عليه من يجي ..
لان احس الجرباية مو طاهر بسببه ..

كل يوم ابدل الجراجف مالتها واغسلهن بس من يجي تلعب روحي منهن ولازم ابدلهن ثاني يوم ..

خاصه من حجيت الامي وگلتله ..
" يمه يشرب شي مدري شني ويضل يطوطح ومرات يضربني من يشوفني ومرات لا "

ردت عليه ..
" بس لايشرب خمر "

رديت :
" شمدريني وانه وين اعرفه "

ردت :
" يمه هذا حرام اني قاريته بالقران .. ديربالج يقشمرج وتشربين منه "

من سمعت هيج گمت استغفر ربي.. جبرني وخله بحلگي اول يوم العرس بس ماشربته ذبيته بساع ..

صرت من اشوفه بهيج حاله اتجنبه ..
وهو هم يجي دايخ فد مرة يلف راسه وينام ..

بعد اسبوعين رجعت الحبوبة فحصتني .. وگالت الفرخ موجود وحالتي احسن من قبل ..

شگد ماردته وكرهته بس من نزل دم .. خفت وبجيت حسيت قطعه من گلبي تريد توگع..

هسا عرفت امي ليش كلما تحبل ماتطيحهم وتتمسك بيهم ..
لان هالشي مو بيدنا .. غريزة الامومة تحكمنا ..

بس الخلاني ارتاح اكثر ..
كلام الشيخة من گالت صدقوا عقدكم بالمحكمة معناتها ماراح ياخذوه مني مثل امي ..

بس عيد ماجاب طاري التصديق ولاحجة بيها وهذا المخوفني ..

اتحمل شهر ودور صار يدور حگه الشرعي ..
ورجع يطالبني ويتقرب ..
واني خايفه على ابني لايصيرله شي ..