غياهب الجهلِ والظلمِ

البارت الثامن_عشر

تأفأفت وكالت بملل

اسيل.. تعال ادخل وشوفهم شلون طليان يخبلون من همه عاقلين بالضبط حنونه الفتلاوي صدك لو كالو يخلق من الشبه اربعين...

امين.. ضحكت على سوالفها ودخلت للبيت وجان اشوفلك الجهال مصفوفين بصف حايط البيت وكاعدين .

كاعدين كلهم سرا واحد ولامين ادينهم لصدرهم و عيونهم مغركه بالدموع ...

و خطيه ساكتين وبس عيونهم تحجي للألم والمعانات .خلوني مدري اضحك مدري ابجي على منظرهم ...

باوعتلها وكلت بعتب .. اسيل ليش هيج ولج خطيه شمسويتلهم ..

باوعتلي بدهشه وكالت ... ياااا امين شنو مسويتلهم شبيك بس لزمت عودة الماسحه وكعدتهم يم الحايط وكلتلهم ..

..ابن امه وابو الي يتحرك لأكطع الماسحه على ظهره واعيد تربايته من جده وجديد...

قابل اني شنو سويتلهم..؟

امين.. لالا ابد ممسويتلهم شي ولا مخوفتهم ولا ابد بس تتشاقين وياهم وهمه ميتحملون شقى ..

ابتسمت وكالت .. اي شفت مثل شذر ميتحنلون الشقى صفاء يكلها تشبهين عاليه نصيف وهي مقهوره وتدردم شنو تشبه عاليه نصيف؟

عاد اني ذوله دا اربيهم من جديد معاجبهم شنو تربينه يتعيقلون ياخوي..

امين .. ابتسمت وكلتلها .. بلا انطيني الماسحه من ايدج اشوفه ترلي عدل لا ..

انطتني الماسحه اخذتها فريتها شويه وكلتلها .. اسو شنو تكولين توجع ضربتها لو لا..؟

اسيل.. اكيد توجع ضربتها اله شنو تعيد التربايه من اول وجديد..

امين.. ماشي لعد خلي انعيد تربايتج هم ..باوعت للجهال وكلتلهم ...

...تعالو عمو تعالو لهنا .. اجو يركضون باوعت لاسيل وكلتلهم ..

..هاكم هاي الماسحه والحكو وراها واضربوها وربوها مثل ما ربتكم اتفقنا..؟

اخذو الماسحه مني وطارو وراها وهمه يضحكون وهي تعيط وتكول ..

...ولك اميييين يبن العم يحزام الظهر هيييج تكسر ظهري وتسلمني للأعداء بسييييطه...

امين.. ضحكت على سوالفها ودخلت للطرمه دكيت باب المطبخ طلعتلي شذر ..

كالت .. هلا اموني شلونك ..

..باوعتلها الهدوء والرزانه الي عدها يجنن الفرق بينها وبين اسيل من السماء للأرض شتان ما بين الاثنين. .

طاحظك ينوري المالكي مدري يالعبادي اذا شذوره الورده معاجبتك ومتريدها ..

..ابتسمت وكلتلها .. الحمدلله بخير الى شذر عمي موجود..؟

شذر.. اي موجود تفضل تعال ..

امين .. لالا بس احجي وياه عالسريع واروح تعرفين البيت هوسه والشباب كله هناك مايصير اتأخر عليهم...