Ang tunog na klembang ng kampanang paos
sa hila ng lubid,awit ay hikahos,
at sa mga paniking baliktad matulog
dahil sa pangambang ipot ay mahulog.
Sa bawat kuliling nitong kampanilyang
lagi na lang hilo't parang nahihibang
na kahit ang santong pinta sa larawa'y
nagngiting demonyo sa banal na ingay..
Ang iba'y naghikab na parang buwaya
sa bawat pagpalad ng mamisong ostya,
at kahit ang lasa'y sadyang naiiba
kainin mo na lang sa abulo'y nagmula.
Para ng palitaw ang nasa upuan
matapos mabasa itong kasulatan,
"o,Dyos na dakila'y ako'y kahabagan
ipot ng paniki'y aking naluhudan.
Sa di pagsalansang ng aking isipan
sa bitumeng kalmeng pulupot sa kamay,
kung kaylan namuti ang buhok sa pilak
saka naiwika yaong kaligtasan!!
Sadyang di mawari ang katotohanan
sa budhi ng taong krus ang kasuotan,
pa'no maliligtas tanang kasalanan
kung sadyang kapalit salaping sukaban!
O, at "pis be wid yo'y tagal ng naukit
sa puso ng taong punong hinanakit,
kahit sa kalaba'y piliting isambit
ng makarating ka sa pintuang langit
At bago lumisan sa pook dasala'y
isiping mabuti kung may pinawalang
barya sa abuloy bago ka mamatay
ito raw ay susi sa kabilang buhay!