" انت حبك كنه الحكم السعودي ثبته عبدالعزيز ولا تغير ".

الجزء السادس :

دخلت البيت وهي ترمي عبايتها وشنطتها على اقرب كنبه مافيها حيل ترقى الدرج فتحت شعرها ورمت الربطة جت بدريه : هلا حبيبتي متى وصلتي ؟
بشرى قامت تبوس رأسها : هلا فيك يمه الحين وصلنا
قامت تجمع أغراضها
بدريه : تغديتي
بشرى وهي متوجهه لدرج : اي الحمدلله لاتصحوني الا بعد العِشاء
طلعت فوق وهي تسحب رجولها
راحت بدريه المطبخ خذت الفطاير والشاهي وراحت لمقلط الريجيل عند أبو مطلق وأم مطلق وفيصل الي نايم على التكايه في اخر المقلط تحت المكيف وحاط شماغه على وجهه
أم مطلق : وينها بشرى 
بدريه : راحت ترقد ماعاد تشوف
أم مطلق : ياويلي عنها يالله ان تعينها يالله
نزلت رأسها مالها حيله تساعدها : الله يعين
أبو مطلق : بكره ان شاء الله بنطلع نتعشى فالمزرعة
أم مطلق : زين ماقلت نبي نطلع نغير جو
شوي الا دخلو عيال بتال محمد ووضحى جايين من عند امهم
راحو لجدانهم وسلمو عليهم دخل بتال وجلس بعد ماسلم يتقهوى
أم مطلق : ترانا بنروح المزرعة نتعشى فيها بكره تعال معنا انت و العيال
صد بضيق : عندي دوام ماقدر والعيال أخذوهم معكم وانتبهو لهم
بدريه : ابد لا تشيل همهم في أمانتي
بتال بامتنان: الله يجزاتس خير والله ما الحق جزاتس فـ اللي تسوينه معهم
بدريه ؛ مابيننا الله يهديك حنا أهل
أم مطلق : راحو لامهم اليوم ؟
بتال : ايه سلمو وجو ماطولو عندها
أبو مطلق : ليه ما خليتهم عند اميمتهم لاتحرمها منهم وتاخذ ذنّبها يابوك
بتال مسح وجهه بقهر : هي الي ماتبيهم
أبو مطلق : كيف ماتبيهم !
بتال : ايه ماتبيهم لامنهم جاوها مشتاقين لها سلمت عليهم وقالت خلاص روحو لاتجلسون عندي
أبو مطلق : لاحول ولا قوة الا بالله
بدريه في نفسها "مايحس بقيمة الشئ الا فاقده الحمدلله الي رزقني بشرى بعد تعب وخلها تنور حياتي والا هذي راميه عيالها ماتبيهم ماخافت الله فيهم" : الله يلين قلبها عليهم

___________________________________________

تجمعو الحريم عند شريفه
صيته وبناتها وضحى وساره ومشاعل ، وفاطمه وبناتها الهنوف ورنا
شريفه : حيا الله من جانا
باصوات متفرقه : الله يحييتس
شريفه : تو مانور البيت
= : منور باهله ، بنوركم
شريفه وهي تصب القهوة : صرتو ماتجون الا بعزيمه وشدعوه
صيته : والله ياختس اشغال ومدارس والوقت ضيق يادافع البلا مايمدينا نسوي شي
فاطمه : والله انّ مقصرين مير اعذرينا
شريفه : ابد معذورين ، واخباركن يابنات اربكن طيبات
جاها الرد باصوات متفرقه: الحمدلله ، تمام
اعتلا صوت رنا وهي تقول : ابشرتس نزقح وننتظر متى تحددون العرس نبي نرقص من زمان ماجا عندنا عرس
استحت وضحى ونزلت رأسها بإحراج
مشاعل : وش من زمان هذا اول عرس فالعايله اول حفيدين يتزوجون
شريفه : قريب ان شاء الله بنحدده
صيته : الله يكتب اللي فيه الخير
ريم وهي تصفق بحماس : الله وناااسه
الهنوف : اعميمه لا اوصيتس جيبي مطربه مانبي طقاقات
فاطمه : الحمدلله والشكر بناتي ذبحهن حب الرقص
رنا : اي والله يمه نبي نرقص احس بـ استنزل
العنود : والله ما اخليها في خاطرتس بنسوي عرس الليله هنا
رنا : كفووو والعروس اعميمه
شريفه : على كيفتس! على طول اعميمه! ، ليه ماتكونين أنتي العروس ؟
رنا : العروس تستحيي ماتردح وانا ابي الردح
شريفه : ترى عرس كذبي موب صدق
رنا : طيب دامه كذبي أنتي العروس
الهنوف : العروس انحاشت بس خلونا نرقص
ريم بغباء : ليه تنحاش
مشاعل : يمكن غاصبينها
العنود : المهم ذا الحين تقسمو من أهل العروس ومن أهل العريس
ساره قالت لرنا الي بدت تهز أكتافها من الحين : لو سمحتي اذا بتستنزلين لاتجين ماحنا ناقصين يطلع علينا جنون
رنا : لا ماعليتس مايطلع مني هو يحبني
ساره حست بقشعريرة وهي تخاف من الجن : يمه بسم الله
شريفه : خلو العرس بكره عشان نجهز زين وتحضر نوره
مشاعل : صح نبي عرس ذرب
رنا وهي توقف : انا راقصه راقصه الليله الي يبي يجي معي
راحو معها البنات كلهم حتى وضحى بدو يرقصون وأنواع الضحك والاستهبال مابقى احد الا قلدو رقصه حتى أنفسهم صار يطقطقون عليها