friEND(COMPLETED)

Chapter-27

Unicode

တိမ်ညိုလေးလည်း အနွေးဓာတ်လိုပါတယ် ၈

လောကသဘောအရ လုံးဝရပ်တန့်လို့မရနိုင်သော သဘာဝတရားဟုဆိုလျှင် အချိန်ကိုပဲ လက်ညှိုးထိုးပြရလိမ့်မည်။ သူနှင့်အတူရှိခဲ့သည့် ကာလတွေက တစ်ရာသီမှ နှစ်ရာသီသို့ ကူးပြောင်းလာကာ ‌နွေဦးကာလရဲ့ ညည်းငွေ့ဖွယ် အချိန်ကို အတူကျော်ဖြတ်ရန် ရောက်လို့လာခဲ့ပြန်၏။

ပြီးခဲ့သည့် နှစ်တွေမှာ အရိုးပြိုင်းပြိုင်းထနေသည့် သစ်ပင်တွေနဲ့ ခြောက်သွေ့နေသည့် နွေလမ်မတွေကို ခါးခါးသီးသီး မုန်းတီးခဲ့ပေမဲ့ ဒီနှစ်မှာတော့ မုန်းချိန်မရှိအောင် အလုပ်များနေသည်ဆိုရမည်။ အမှန်မှာ ပိုက်ဆံရသည့် အလုပ်မဟုတ်ပဲ နေချိုမောင်နှင့် ဆိုင်ကယ်တစ်စီးစီးကာ ဟိုဟိုဒီဒီသွားသည့် အလုပ်ပင်ဖြစ်၏။

သောကြာနေမှလွဲ၍ ပိတ်ရက်ကြုံတိုင်း တိုင်ပင်စရာမလိုအောင် တစ်နေရာပြီး တစ်နေရာ လိုက်ပို့သည်ကလွဲလို့ နေချို့မောင့်ရဲ့ ခြေလှမ်းတွေက ရဲရဲကြီး ပြောင်းလဲသွားတာမျိုး မရှိခဲ့ပါ။ သူ့ဘက်က သွေးအေးအေးနှင့် ပျော်မွေ့နေသည့်တိုင် ခွန်းနစ်ဖက်မှာ သေချာသွားတာ တစ်ခုတော့ရှိသည်။ နေချိုမောင်က အတွေးထဲမှာ လုံးဝ စိုးမိုးသွားခဲ့ပြီဆိုသော အချက်ပင်။

သူ့မိဘများ သိသွားသည်ဆိုသော နောက်ဆက်တွဲအနေဖြင့် ခွန်းနစ်က အန်တီဟန်နီလင်းသူကို သုံးကြိမ်ခန့်ဆုံခဲ့ရသော်လည်း ဆိုးရွားသည့် စကားတွေ အပြုမူတွေကိုတော့ မကြုံခဲ့ရပါ။ အံ့ဩစရာ ကောင်းသည်က သူမက ကန့်ကွက်ရမည့်အစား နေချိုက ခွန်းနစ်ကို အတော်သဘောကျသည့် အကြောင်းတွေကိုသာ ရွှန်းရွှန်းဝေအောင် ပြောခြင်းပင်။ အင်္ဂလန်ကဲ့သို့ အနောက်ပိုင်းယဉ်ကျေးမှုတွေမှာ အသားတကျဖြစ်ခဲ့ပုံရသည့် သူမဟန်ပန်က ယုံကြည်ချက်အပြည့်နှင့်။ တစ်ခါတစ်ရံ ခွန်းနစ်တစ်ခါမှ မမြင်ဖူးသည့် သူမရဲ့သား အဲရစ်အကြောင်းကို ထည့်ပြောတတ်သေးသည်။ ဟိန်းထက်အောင်ဟု မြန်မာလို အမည်ရသည့် သူမသားက အင်္ဂလန်မှာ အိမ်ထောင်ကျစဉ်က ရခဲ့သည့်သားဖြစ်ကာ နေချိုနှင့် ဖအေပါ မအေပါ ဆက်ဆံရေးမျိုးဖြစ်၏။ နေချို့ ဖခင်နှင့်‌ သားသမီး မထွန်းကားပေမဲ့ သူမသားငယ်က မိသားစုထဲ ဆက်ဆံရေးကောင်းပုံရပါသည်။