Gun X Bounty

Chapter 26: Sa muling pagkikita ng dalawang magkaibang uri.

Tatlong araw magmula ng masira ang bundok malapit sa bayan ng Szuwask. Kasalukuyan na ngayong nandito sina Rael, dahil malaki ang hinala niya na dito sa bayan ito makakakuha ng impormasyon sa mga nilalang na hinanahap niya.

Sa ngayon ay nasa tanggapan na siya ng punong bayan at dito ay nagtatanong na siya tungkol sa nangyari sa bundok.

"Totoo po bang isang hindi tukoy na bagay ang biglang lumabas sa bundok na dahilan kung bakit ito nasira?" Tanong ni Rael.

"Tama po. Isa yong malaki at lumilipad na bagay. Sa tingin ko ay sasakyan ito ng mga hinihinala na'ming nilalang na hindi nagmula sa ating planeta." Tugon ng punong bayan.

"Mukhang sila na nga ang mga hinahanap ko. *Tsk! Ano pa ang silbi ng pagpunta ko dito kung wala naman na sila?!" Sambit ni Rael derekta sa kaniyang isipan.

"*Umm.. Maitanong ko lang punong bayan, may dalawang lalaki ba dito ang na nagngangalang Sazs at Hian?" Sambit muli ni Rael.

"Opo! Pero sa ngayon ay nawawala na sila at pati na rin ang iba pa niyang mga kaibigan." Tugon muli ng punong bayan.

"*Tsk! Kung ganon ay nandito nga sila!" Sambit muli ni Rael.

"Bakit po ginoong Rael? Kilala nyo po ba sina Sazs?" Tanong ng punong bayan.

"Sa totoo lang ay hindi ko sila kilala, pero alam ko ang tunay nilang mga pagkatao." Sambit muli ni Rael.

Sa mga sandaling ito ay natahimik ang punong bayan. Ilang sandali pa ay may hinanap ito sa ilalim ng kaniyang lamesa at ng matagpuan ay agad niyang inabot kay Rael. Samantala, kahit nagtataka ay kinuha naman ni Rael ang isang envelop na inaabot sa kaniya ng punong bayan.

"Ano ang bagay na ito?" Tanong ni Rael.

"Sa totoo lang ay bago tuluyang umalis sina Sazs ay inamin niya sa'kin ang katotohanan sa kanilang pagkatao. Hindi sila tulad na'tin at nagmula sila sa ibang planeta. Pero mababait sila at iniwan niya sa'kin ang mga yan, dahil gusto pa rin nilang tumulong kahit wala na sila dito." Sambit ng punong bayan.

Hindi inaasahan ni Rael ang kaniyang mga narinig at ilang sandali pa ay agad na niyang tiningnan ang laman ng envelop na hawak niya. Subalit matapos makita ang unang pahina ay agad siyang nagulat, kaya nagmadali na siya upang tingnan ang iba pang mga pahina.

"Ang mga ito! Wag mong sabihin sila ang gumawa ng planong ito?!" Gulat na pagkakasambit ni Rael.

"Ganon na nga. Iniwan ni Sazs sa'kin ang bagay na yan at ang sabi niya ay ibigay ko daw ito sa isang syentipiko." Sambit ng punong bayan.

Sa pagkakataong ito ay hindi makapagsalita si Rael dahil na rin sa labis na pagkamangha sa planong binabasa niya ngayon. Alam niya sa kaniyang sarili na hindi lang basta plano ang nakasulat sa mga papel na hawak niya, kundi isang plano na may katiyakang resulta.

"Sobrang detalyado ng planong ito at ang lahat ng mga materyales ay hindi gaanong mahirap hanapin." Sambit muli ni Rael.

"Mukhang sinadya nilang gawin ang plano na yan, base sa resources ng ating planeta. Alam kasi nila na hindi pa gaanong mataas ang ating teknolohiya kumpara sa kanila." Sambit muli ng punong bayan.