လူအများနှင့်ရှုပ်ယှက်ခက်နေသော နေရာတွင်တောင် ဘယ်အရာကိုမှ မျက်လုံးထဲမမြင်သလို ဆူညံနေသောအသံတို့ဟာလဲ နားအတွင်းသို့ ဝင်ရောက်နိုင်ခြင်းမရှိပေ ။
စိတ်အစုံတို့လွှင့်ပြယ်သွားတဲ့အခါ
အတွေးတို့နယ်လွန်သွားတဲ့အခါတို့တွင်
ပုံမှန်လှုပ်ရှားလည်ပတ်နေသော ပတ်ဝန်းကျင်သည်လည်း အသက်မဲ့သွားနိုင်သည် ။
ဝီစကီခွက်ကိုကိုင်ထားသော ဖြူဖြူသွယ်သွယ်လက်လေးဟာ စီးကရက်တစ်လိပ်ကိုလဲ ကြားညှပ်တတ်သေးသည် ။
အမှောင်ကျသွားတဲ့နေ့ရက်တွေမှာ ဝီစကီတွေဟာ အဖော်ကောင်းတစ်ခု ဖြစ်ခဲ့သလို စီးကရက်တွေကလဲ စိတ်ထွက်ပေါက်တစ်ခု ဖြစ်လိမ့်မယ် ။
" မတွေ့ရတာတောင် အတော်ကြာပြီဘဲ "
မျက်နှာချင်းဆိုင်ခုံတွင် ဝင်ထိုင်လာသောလူကို စီးကရက်အငွေ့တွေကြားမှာ မသဲမကွဲမြင်လိုက်ရသည် ။
ကြားလိုက်ရတဲ့အသံဟာ ရင်းနှီးတယ်ဆိုတာထက် မှတ်မိနေသော အသံဖြစ်သည် ။
" ဘာကိစ္စရှိလို့လဲ "
ဆူညံစွာထွက်ပေါ်နေသောသီချင်းသံများဟာ စိတ်ကိုရှုပ်ထွေးစေသလို တဖျက်ဖျက်လင်းနေသော ရောင်စုံမီးတို့ကြာင့် မျက်ခုံးတို့စုကြုံလာရသည် ။
ဒါတွေဟာ အရင်နေ့ရက်တွေက ပုံမှန်လိုဖြစ်နေသော်လည်း ဒီနေ့မှစိတ်ရှုပ်စရာကောင်းအောင် အကျည်းတန်နေသလိုပင် ။
" ဒီမှာပြောလို့အဆင်မပြေဘူးထင်တယ် ... အချိန်ရရင် အပြင်ခဏလောက်ထွက်ခဲ့ပေးပါလား "
စိတ်ရှုပ်ဟန်ဖြင့် ဆံပင်တို့ကိုထိုးဖွလိုက်ပြီး ထထွက်သွားသော ကျောပြင်နောက်သို့ လိုက်လာခဲ့ရသည် ။
စကားပြောပုံသာအနည်းငယ် ပြောင်းလဲသွားပေမဲ့ အပြုအမူကတော့ အရင်အတိုင်း မာန်တက်နေဆဲ ။
ဘေးတွင်ယှဉ်ရပ်လိုက်ပြီး စီးကရက်တစ်လိပ်ကို မီးညှိကာ ဖွာရှိုက်လာသည် ။
" ဘာပြောစရာရှိလို့လဲ "
စီးကရက်သောက်ကာ နားစွင့်နေသော်လည်း စီးကရက်တစ်လိပ်ကုန်သည်အထိ ဘာစကားမှပြောလာခြင်းမရှိခြင်းကြောင့် စိတ်မရှည်တော့စွာနဲ့မေးလိုက်ရသည် ။
လက်ကိုခပ်တင်းတင်းပိုက်ထားကာ ပေါ်လွင်နေသော မေးရိုးတို့ကြောင့် အံကြိတ်ထားဟန်တူသည် ။
မနှစ်မြို့ဘဲနဲ့များ ဘာလို့လာတွေ့နေသေးသလဲ ။
VOCÊ ESTÁ LENDO
ကျနော်ချစ်သော ထိုအမျိုးသမီး
Contoနာကျင်မှုတွေကိုသာ အဖော်ပြုပြီး ရှင်သန်ခဲ့ရတဲ့ ကျနော့်ကို ထိုအမျိူးသမီးက မုန်းသည်တဲ့ .....
