اسعد الله اوقاتكم بكل خير احبتي ❤️
//// البارت الثاني عشر /////
#بيوت_بلا_جدران
#شمس_السعدي
انا جروحي محطه وناس تدفع ناس
ركب بيه الحزن والنوح والدمعه
وجرى بروحي الحزن مجرى النهر لو فاض
وغرق ناعور حزني وما نشف نبعه
انقفل باب الفرح واسئلت عالمفتاح
اضنه ببير يوسف وياهو الي يطلعه
صبح خشبه الكَلب يتونس عالنار
حرك هندام روحي وياهو الي يصلحه ..
---------------------------------------------
شهر الثاني 1972 ..
هذا الشهر النولدت بي رحمة بالسنة الفاتت .. بس يايوم ماادري نسيت ماحاسبة الها ..
بس جنت اتذكره ببداية هالسنة واضن 2 بالشهر ..
رحمة الغيرت حياتي من يوم الاجت .. جنت مااخاف على روحي ولا يهمني شيصير .. جنت اتمنى الموت بكل دقيقة .. صح عندي رضوان بس رضوان مو مثل رحمة اكو من يدير باله عليه .. الشيخة كلما يكبر تگربه الها ..
اما رحمة من صغرها محد معترف بيها .. ومحد حتى يعرف اسمها .. يصيحولها بت الفصلية ..
گمت ادعي الله يطول بعمري علمودها بكثر ماجنت اريد الموت ..
صح اهلي نسوني ومابيهم واحد ذكرني .. حتى خاجية الجانت تجي وتجيبلي اخبارهم بعد ماتجيب ذيج الاخبار .. نسوني ويمكن متت بالنسبة الهم ..
حتى المگابر بالنسيان هم تموت ..
ايييييه يمرمر .. سبع سنين عشتيها وجن عايشة دهر
اجيت طفلة ماتعرف من الدنيا غير بس الحب والونسة والاحلام ..
وكل هاي المشاعر هسا ماتت بيه .. صرت احس روحي بكبر فهيمة واكبر ..
رحمة توها تمشي ..
مخليتها گبالي ومخليه الطشت اغسل الهدوم بالحمام وهي تلعب ..
اجت نضال بت منيرة .. دفعتها طاحت ..
گمز من مكاني الها ..
" ليش تدفعيها هاي اخيتج "
" هاي بت فصلية مو خيتي "
اتنهدت وگومتها .. ماعندي شي يشفي جروحها الا حظني حضنتها الى ان سكتت ..
جانوا علي ورضوان يلعبون سوه ..
اجو من شافوها تبجي ..
سأل رضوان " ياهو وياها "
رديت " وگعت محد "
ردت نضال " انه كتلتها عبن تجي يم نهوة "
( قصدها نهاية بنت منيرة وفرج سمتها هيج بلكن تكون النهاية وماتجيب بنات بعد )
صاح بيها علي " عبن اذا طگتيها بعد اموتج " عمره اربع سنوات بس السانه اكبر من عمره
طلعت منيره شافتهم يتناگرون ..
" شنهي شبيكم متولين بناتي وانت فرحانه ماتعرفين تسكتيهم "
نضال مشت تبجي الامها ..
اجتهم بالعصا .. رادت تكتلهم صرت گدامهم ..
" ميلي عني اريد ايدبهم "
اجه علي " بتج طگت رحمة "
ردت عليه " وانت شنهي محامي الها البت الفصلية لو تدوس اعله راسها مالك شغل "
رديت عليها " ليش وشمسوية هي ادري ماتحبني بس هاي اخيتجن "
ردت بصياح " هي حالها من حالج بهالحوش وماتصير اخت النا ولا تتكرب اعله بناتي دووم "
سحبت بناتها واخذتهن طلعت حورية من غرفة جوري
" اتهدي يمنيرة اتهدي وخلي رجلج بالگاع لاتوگعين وتنكسرين "
باوعتلها بغضب ودخلت ..
ردت حورية " يله علي امشينا "
رد " اريد العب وي رضوان "
ردت " العب بحوشك هذا مو حوشنا ولاهم اهلك فهمت"
اخذته وراحت ..
اباوع للبيت جبير كلش والغرف تارسته .. جاه ومال وفلوس بس كل هذا ومابينهم محنة .. جنا صغار واللگمة حسرة علينا بس گلوبنا متوالفة والضحكة ماتروح من وجوهنا ..
اخذت رحمة يمي للحمام ..
بعد ماحمدية اخذت رضوان وماخلته يلعب وي رحمة
من صغرهم وفركوهم لو كبروا شلون ؟؟
كملت الهدوم ومشيت اشوف فهيمة ..
جانت تشتغل وتحجي وي روحها ..
شافتني " تعاي كظي عني عبن مااگدر اشتغل وبالي يم رملة "
سألتها " شبيها ؟"
ردت " مشيت الها امس شفتها تلوب من الوجع واخافن تطلگ ومحد يمها "
رديت " گلي للشيخة وامشيلها "
هزت راسها " اي اگللهة بس هي وينها مااجت اليوم للحوش "
رديت " يمكن عندهم طلابه "
ردت " بله طلايبهم ماتخلص "
سألتها " اذا جابت رملة شلون شناوين "
اتنهدت " اييييه شمدريني اضن فرج گال اخليها تجيب واحجي وي اهلي بس تعرفين لجن اني خايفه من هذا اليوم "
رديت " الله يستر منيرة ماتسكت لو عرفت "
ردت " هالمنيرة هينة بس الشيخة مااضن تسكت "
جانت فهيمة خايفه وهي الشجعت بتها بالبداية ..
من يوم زواج رملة ..
جان اول يوم فرج يبات بي برة البيت ..
بقى يومين يله رجع للبيت ..
گايل لأبوه صاحبه بغير محافظه عازمه على عرسه
وبعد هاليومين صار بين يوم ويوم يبات يمها ..
ومنيرة تضل سهرانه وناطره .. وبيوم المايجي تگب هوسة بالبيت ..
وحجته يسهر وي جماعته واخر الحجي ينهيها بجملة
" اشرد من نگرتج وعركج "
لو يسوي عركه ومنيرة ماتقصر وياه . ويلگيها فرصة يمشي بيها عن البيت ويروح الرملة ..
رملة عرفت شلون تخليه مايشوف غيرها .. والاهم خلته يحجي ومايسكت جان كلشي يكلوله يسويه حتى من زوجوه من منيرة سكت ماحجة ورضا ..
سمرة جانت فرحانة من تشوفه مايريد منيرة .. وكل يوم تگعد تزن براسه حتى ياخذ بت اختها ويخلف منها الولد وتكسر خشم منيرة ورضية ..
بس جان يصيح من تفتح الموضوع ..
- يزي يمة اخلص من نگرة منيرة تجيني انتي .
- غير اريد منفعتك عبن اريدلك ويلاد يشيلون اسمك
- ومنهو گالج اريد ويلاد من بت اختج لو ردت اعرس اخذ الاختارها اني موش انتو مثل منيرة ..
- شنهي يفريج جن شايفلك شوفه ..
- شوكت تعرفين يمه اني كبرت مو ذاك فرج الصغير
يعوفه ويطلع وهي مثل كل مرة تضل تدعي ..
" اريدن الله ياخذ حوبتي منجن عبن سودنتن وليدي وخليتنه مايشوف دربه "
تطلع رضيه تضحك :
" لجن امه مسودنه هو عليمن يطلع "
ويضلن يتناگرن بينهن..
هاي حياتهن خلال هالسنة .. هاي تريد وليد وهاي تحجي وذيج ترد .. ومنيرة تفكر شلون تخليه يتگربلها حتى تحبل وتجيب الوليد .
ردت فهيمة سألتني ..
" راح اطرش خبر للشيخة وامشي شتگولين عبن شيصبرني لمن تجي وكت الغدة "
رديت " بكيفج "
ذبت الطبخ عليه ومشت تشوف بليل تحاجيه ..
عين ع الشغل عين على رحمة الجو بارد وماترضى تبقى بالمخزن شيصبرها وحدها وهم اخاف عليها ..
منا وبعد ماشفت فهيمة البعد يومين ..
اني حسيت برملة جابت لان فرج من يوم الطلع مارجع
ومنيرة بيومها سوتها هوسة ومصيبة وخلت الشيخة تخلي جعمقة يدور عليه بالسلف بس مالگاه ..
اجت فهيمة جان وجهها يضحك وفرحانة ..
وجايبة واهلية وزعتها للبيت كله ..
اخذت منها رضية وسألتها :
" شنهي المناسبة يفهيمة "
منيرة وهي تفتح بيها وتاكل هم نفس السؤال سألت ..
ضحكت فهيمة ..
" بتي رملة اجاها وليد يوم الجن "
رضية ضاجت من گالتلها هيج . بس منيرة ردت عليها :
" الله يسمع منج "
غريبة هالدنيا .. منيرة تاكل بجكليت فرحت ابن رجلها وهي ماتدري !!
ردت سمرة " اي يفهيمة مادامها بعدهي نفسه ودعوتها مستجابة گليلها خل تدعي بلكن فرج يصير عنده اوليد لجن اهيس راح يكومهن بنات "
راحت فهيمة للمطبخ .. ورحت وراها وشايله رحمة على خصري ..
سألتها " شلونها رملة "
ردت " بخير ونعمة همزين مشيتلها لگيتها تلوب .. من طلعت منا اجاني فرج وخذاني الها .. ومن شفناها تسودنا ركض جابلها الحبوبة واجه .. يمة بتي ماتت يله جابت عبن شنهي طلع شكبره صلوات تكولين عمره شهر و يوم .. وفرج من شافه هيج الدموع تجري وفرحان سماه سعد جيف فرحه "
رديت " الحمد لله وهسا منو يمها "
ردت " رجلها يمها ماعافها ابد من يوم الجابت "
اتنهدت " وهنا البيت مگلوب عليه من ساعة الطلع يدورون عليه "
ردت " عساها بالگلبة شنهي جا هو صغير ويدرون عليه ؟"
رديت " من طلع ماكالهم وين رايح هالتدوهنو عليه "
هزت ايديها " خلهم نارهم تاكل حطبهم الهم بتي جابت الوليد وباجر يو عگبة تجي وتصير هي شي شيخة البيت "
سكتت ماحجيت جانت رحمة بحضني امسح بشعرها البدأ يكشف لونه وصار بني ..
ردت " شنهي شو سكتي جيف گلت تصير شيخة بس لاتردين تصيرين شيخة "
اتنهدت " مااريد اصير شيخة خليني هيج احسن "
ردت " اي هم احسن انتي هذا گدرج "
سكتت عنها…
لان اعرفها ماتسكت وتأذيني بحجيها ..
نامت رحمة شلتها انيمها بفراشها ..
اخذتها للمخزن نيمتها وغطيتها وتمددت يمها لين يصير وكت الغدا ويجون ..
سمعت صوت هوسة گمت ..
شفت منيرة تصيح وتتعارك وي فرج ..
" وين تمشي باليومين والثلاثة وعايف بناتك ومرتك شنهي عندك وحدة تمشيلها "
ضحك " انت مالج شغل اني رجال موش انت .. والرجال مايتحاسب .. انت عليج تربين بناتج وبس "
ردت " وشنهي ماخذني فزاعه لاتوصلني لاتجيني "
رد " شنهي احتاميتي عليه .. مو من جنت اتگربلج تميلين عني وتگليلي مالي خلگك اريد انام .. يوم من تتكبرين عليه وتگللي اني بنت الشيخ موحان مو من حگك تحجي عليه "
ردت " وانت شنهي تريد تيدبني لو تلوي ذراعي خل تجي الشيخة وابوي وهمة اليحجون وياك "
اخذت بناتها ودخلت غرفتها وزقفلت الباب مثل كل مرة ..
سألته امه " انت وين تمشي بس لاتروح بطريج الحرام"
ضحك " انت همين يمه شنهي اتگبع واگعد وياجن تردني "
دخلت الشيخة وموحان ومنهل وحطاب وولده :
صاحت :
" شنهي صوتكم ليش عالي .. وانت فرج شنهي توك افتكرت عندك حوش "
رد " شيخة جنت بره السلف عندي شغل "
سألته وهي تتقرب عليه وعصتها تطگ بالگاع ..
" وشنهي هالشغل عرفنا بي "
رد " هيج صاحبي رادني اعاونه "
ردت " اممممم اي وهذا صاحبك ياخذ تبياته بحوشه لو شنهي ؟"
رد " شيخة شنهي تحاسبيني اني موش صغير كبرت "
صاحت بي ورگعته بعصتها :
" غصب اعليك واعله اهلك احاسبك .. هذا ابوك وعمامك مايطلعون عن شوري انت عليمن طالع لو هاي تربات سمرة موش ترباتك يحطاب "
حطاب ضاج " شنهي هالحجي شيخة شتعرفيني اسكت عبن انت واكفة هالماحجيت "
هزت راسها .. " امشي يفرج خش طيب خاطر مريتك ولا تزعلها عبن هي بت عمك وام بنياتك .. يزي بزعتونا بمناگركم راح تطيرون بركة الحوش "
راد يحجي فرج خزره حطاب وسكت ..
راح دگ باب غرفة منيرة ومنيرة معانده ماتفتحها لمن صاحت بيها الشيخة ..
كلها راحت الغرفها وبقت الشيخة تحوم بوسط الساحة وبعدين طلعت ..
رحت اصب الغدا وي فهيمة سألتني ..
" شنهي صار ماگدرت اطلع "
رديت " ماادري هو السمعتيه بس "
هزت ايديها " شمالج ماتطلع الجلمة من السانج شنهي اشترتج الشيخة "
رديت " اني مالي شغل بأحد تعرفين محد يحبني ولو عرفوا ادري مايرحموني "
هزت ايديها " والله خوفي لاهمة يعرفون منج "
رديت " لاتخافين تدرين بيه مالي شغل وهاي صارلج سنين تعرفيني اشوف كلشي ومااحجي "
ردت " اي اعرفنج سكوتيه وياهم بس وي حظي ماعرف بعد "
كملنا سالفه الغدا ونظفت ..
صبيت ماعون ومشيت الرحمة ..
گعدتها وگمت اوگلها .. جانت نعسانه وتاكل تكَعد وياي من الفجر بس اگوم تحس عليه ..
كملت اكل وشربتها ماي وخليتها بحضني تمددت شوية احس ظهري يوجعني ويطگطگ من انام .. فد ركضة من الفجر للظهر ..
موحان صارله شهور مايوصل ويجيني لان بكل مرة يجي ومايحصل شي يحطني يكتلني ويمشي ..
واخر مرة وصاني لو سألتني الشيخة گليلها يجيني كل ليلة .. ولاتگولين شيصير ان سألتج گليلها ماعرف ليش مااحبل ..
جنت صدگ مااعرف ليش وشنهي البي ..
لمن صاحتني الشيخة وسألتني ..
" شنهي صارلج كم شهر وماحبلتي هم رجعتي تاخذين شي "
رديت " لا والله مااخذ "
سألت " لجن ليش ماحبلتي لسة "
رديت " مااعرف مو هم ضليت كم سنه يله حبلتي "
ردت " يغبرة ذيج تأخرتي عبن طرحتي هسة شمالج "
سكتت ..
رجعت سألت " موحان ينام يمج يجيج بالليل "
هزيت راسي " اي يجي "
سألت " ويتگربلج "
صفنت بوجهها " اي "
اتنهدت " امشي من وجي عبن ماشفت منج خير من يوم الاجيتي "
عفتها وطلعت ..
وجن كل مصيبة تصير اني سببها ..
بس الشيخة ماسكتت وضلت تحوس وتدور وتراقب وجنها شافت موحان مثل مايجي يروح ومرات مايجي
وبأخر مرة اجاني ضربني بيها وطلع ..
جنت ابجي والملم بروحي .. انفتحت الباب عبالي رجع
فزيت !!
جانت هي گبالي ..
بقت تعاين عليه واني اغطي بروحي ..
سألت " ليش طگج شنهي ماتخليه يتگربلج ؟"
هزيت راسي " لا بس هو مدري شبي من يجيني بس يصيح "
سألت " يعني يتگربلج لو لا .. " وصارت تسألني اسئلة تفشل ..
هزيت راسي " لا "
هزت راسها ومشت ..
قفلت الباب ورجعت حضنت رحمة وكاتمة بجيتي مااريدها من صغرها تشوف دموع امها .. كلما تنزل دمعة امسحها بساع گبل لاتشوفها حتى لو صغيرة وماتفتهم ..
الشيخة ماسكتت ..
وحطت رضية وحققت وياها لان بس هي التگدر تسويله شي وماتخليه يوصلني ..
ورضية گعدت تدك ايمان وتحلف مامسويتلة ولامخليتله شي .. وتهمتني اني خاف اخلي بالاكل
وربطت سالفه فرج مايتگرب المنيرة وگالتلها يمكن تخلي شي بالاكل وهالزلم كلها ماتوصل النسوانها ..
بس بثينة وسمرة جذبنها وگاللها زلامنا مابيهم شي ومارضن عليها من حجت..
ضاجت الشيخة وهددت رضية لو هي السبب لتخلي موحان يهجرها ..
وصدگ من موحان عرف وحس على روحه سأل رضية وضربها اعترفت وگالتله ..
" اي اني خليتلك بالاكل دوة عبن موش تريدني اشوفك كل يوم نايم بحضن الزعطوطة ومحبلها واني اتفرج "
هالشي خبل الشيخة وخلت موحان يهجرها ويطردها من غرفته بعد ماكتلها كدام بناتها والبيت كله ..
وصارت تنام يم بناتها مو بغرفتها.. وماگدرت تروح الاهلها وعمامها لان الشيخة كالتلها لو طلعتي ماتوصليلهم عايشة خافت على سمعة ابنها بين الناس والسلف ..
كل هالسوالف ماتجيني الا وكت مااريد انام .. ابقى افكر واتذكر ووين يله يجيني النوم .. والراسه مليان مصايب منين يجيه النوم ..
نمت شويه وگعدتني فهيمة ..
" گومي بمجاني بالحوش .. اني اريد امشي الرملة وحدها وعبن فرج مايگدر يمشيلها اليوم بعد هالهوسة الصارت گالي امشي بمكانه تعرفيها نفسه ومايجوز نعوفها وحدها "
رديت " ماجبتيها يمج هنا احس قريبة وتداريها "
هزت راسها " هو يمكني اجيبها يمي شيوديني وشيجيبني كل يوم "
لبست عباتها ومشت ..
واني گمت بمكانها اسوي العشا ..
ورضية وبناتها يشطفن الحوش الشيخة مكونه عليها من يومها وتخليها حتى شغل تشتغل بعد ماجانت شيخة من بعد الشيخة ..
وكلما تضوج وتنقهر تطلع حرگتها برضوان وتضربه لان تدري بالشيخة ماترضى عليه ..
ويجيني يبجي يگلي " امي طگتني "
اگوم ابجي وياه وبداخلي اگله .. " اني امك يبعد امك واهلها "
بس شسوي مابيدي شي الا احضنه واسكته ..
وهو كلما تضربه يبجي يبجي وبعدين يرجعلها گلبه حنين ويحبها ..
من اشوفه هيج گلبي يتگطع عليه .. وهو يستجدي الحنان منها وعباله هي امه ..
الشيخة دوم تخليه يتغدا ويتعشى وياه وتگعد تسولف وياه وتعلمه ..
مرات اخاف لاتعلمه طبعهم ويكبر ويصير مثلهم ..
بس من اشوف شلون يحب رحمة ويخاف عليها من توگع لو تلعب گلبي يتطمن وادعي يكون سند الها ..
جنت اشوف روحي اني وعدنان بيهم .. واتمنى يصير مثل خاله حنين وجان صديق الي مو بس اخو ..
اااااه يعدنان وينك ووين صفى بيك الدهر هم تذكر مرمر لو نسيتها ..
هالسؤال دوم اسأله الروحي لمن تجي خاجية وماجايبة خبر منهم ..
مرت الايام وفرج رجعت علاقته بمنيرة حتى يقنع الشيخة وحتى مايطلع بالليل بعد .. لان رملة جابتها فهيمة عدها بالبيت ويخاف يروح لايشوفوه من السلف وتوصل الحجاية للشيخة ..
بس الشيخة ماجنها نست السالفة ..
ومن رجعت رملة البيتها ورجع فرج يروحلها جانت الشيخة مخليه منو يراقبه .
وبيوم وليلة ..
دخلت وهي تصيح بالبيت ..
فهيمة فهيمة…
جنت اني وياها بالمطبخ .. عافت كلشي بيدها وراحت
صوت الشيخة يخوف وجن صايرة مصيبة..
راحتلها فهيمة " هااا شيخة شصاير "
قبل ماتحجي ضربتها بالعصا مالتها وجانت راس العصا مثل الطوبة قوية طلعت الدم من راس فهيمة ..
وگعت فهيمة وتخربطت مو من الضربة من الخوف وجنها عرفت اجه اليوم الموعود ..
ردت اتكرب اكومها واشوفها من شفت الدم صاحت بيه
" ابقي بمجانج لحد يوصلها "
جورية من شافت الدم تخبلت وتصيح گامت وتحجي ع الشيخة بس مانفهم حجيها ..
بالكوة سحبناها اني وبلبل للغرفه وبقيته يمها وسديت الباب ..
ردت حجت وي فهيمة " اي يفهيمة لو نگول شيخة فهيمة سنين ولج واني مخليتج ببيتي ومأمنتج اعله اسرارنا . وتالي تطلعين تفكرين للبعيد وتخشين بتج لبيتي تخربه .. لجن لسا اتذكر ماردتها تخش وانت ضليتي تزنين عليه لمن گلتلج جيبيها .. عبن گلت فهيمة من يوم العرست وجبتها وياي لهنا صارت رفيجتي وماشفت شي منها مو زين وطلعتي تحفريلي واني ماعرف "
گامت فهيمة وايديها على راسها :
" شيخة ماعرف والله ماعرف بيوم وليله اجاني گال اريدها وعبن هو ابن شيوخ شلون ارده واطردنه واني جتافي من خيرهم "
ضحكت الشيخة :
" لا اصيلة فهيمة وماتردين طلب لأبن الشيوخ والتاكلين من خيرهم .. لجن لو گايلج خليني ازني وي بتج ترضين ؟؟
اي الزوم ترضين لجن تاكلين من خيره وماتگدرين ترديه لو طلبها "
دور صاحت بيها :
" شنهي شايفتني جاهلة وتضحكين عليه ولج اني الشيخة ربحة ازلام مشوربة مايضحكون عليه تجين انت الجربة الخدامة التلمين وسخ اصغر واحد بحوشي تخلين راسج براسي "
حجت بثينة :
" شنهي السالفه فهمونا فهيمة شمسوية هي وبتها "
ردت الشيخة :
" مامسوية لان من اليوم بعد ماعدها بت .. وفوكاها بوكاحة تعزمنا على عرس بتها اي ليش ماتعزمنا عبن هو عرس ابننا "
سألت سمرة :
" ياابن المن اخذت رملة "
اندفرت الباب حيل ودخل فرج وراه حطاب
" شيخة وين مرتي وين وديتي رملة "
سمعت منيرة تخبلت ..
" يامرة بس لا رملة مرتك ماخذها عليه يفرج .. تخلي راس بت الخدامة وي راسي وتكسرني "
جانت تصيح وخبصت البيت وتلطم ..
" ولك وين تطول تاخذ بنت شيخة من اب وجد . بس انت مستواك فلاليح وخدم موش انه "
صاح بيها :
" اسكتي انت لا اطگج .. صمي السانج .. مايوم حبيتج ولاردتج انجبرت عليج جبرتني الشيخة ماشفت شي من عمري وخلتني اخذ وحدة اكبر مني وحاسبها اختي مايوم حبيتج ولا راح احبج "
منيرة گامت تدك وتلطم ورادت تهجم عليه لزمنها اخواتها بالگوة وامها دخلتها لجوة ..
فهيمة من سمعت گامت تبجي وتتوسل بالشيخة :
" شيخة بتي وينها شيخة لاتسويلها شي عندها فرخ صغير ارحميها "
رد فرج :
" وينهم شيخة ابني ومرتي وينهم احجي لااكلب السلف عليهم "
ردت ببرود وسألته :
" تريد مرتك لو ابنك اختار "
صفن :
" شنهي تخيريني وينهم گليلي "
سألته سمرة " ولك اني امك جبتك وربيتك وتعبت عليك وماتگلي تزوجت.. ضحكت عليك بت الخدامة وخذيتها ردتلك بت خالتك ومارضيت ودور مخلف منها"
صاحت فهيمة :
" وشبيها بت الخدامة مو بني ادم .. اليشوفج يگول بت شيوخ هو انت فلاحة بت فلاح وبت اختج بت فلاحة هم الخدامة الماعاجبتكم خدمتكم نص عمرها ونظفت جيفتجن ووسخجن "
صاح حطاب :
" احترمي روحج لو مامرة جان ماسكتتلج .. وانت فرج مثل خذتها من غير علمنا تطلگها "
ردت الشيخة :
" اني مو لان بنت خدامة وبنت شيوخ .. اني لان ماخذتوا شوري وسويتوا هالعملة من وراي .."
فرج : ولو گتلج جان رضيتي .. ادري ماترضين عبن منيرة بت ابنج..
الشيخة : لو گايلي اريد اعرس علمود الوليد جان عرستك واخذتلك اغاتها
فرج : واني مااريد اغاتها اريدنها هي لان حبيتها
الشيخة : حبتك حية وشتعرف من الحب ذاك اليوم صرت والحب شنهي هذا ينوكل ينشرب لا ابوك ولا عمامك طلعوا عن طوري بس انت واللزوم تتيدب
فرج : انطيني ابني ومرتي وماخليج تشوفين وجهي
ضحكت الشيخة :
" مو انت التتشرط هسا .. ولاعبالك انطيهم الك واگلك اخذهم وامشي من دون مااحاسبك .. تريد ابنك لو مرتك "
فرج : " لاتلوين ذراعي بيهم "
مشت بالساحة الغرفتها :
" بكيفك عودن من تقرر گلي اني بحجرتي مرتك بمجان وابنك بمجان شوف منهو تريده يجي يمك "
ركضت وراها فهيمة تتوسل ..
ضربتها برجلها ودفعتها ..
" انت بعد مااريدنج هنا .. ومو بس هنا لا بالسلف كله ماتبقون لا انت ولا رجلج وابنج الكم مهلة اسبوع تلمون غراضكم وتولون "
ردت فهيمة وهي تبجي :
" اي اروح اروح وماتشوفينا بعد بس انطيني بنتي ووليدها ونمشي مانضل "
ردت الشيخة :
جان فكرتي بهالحجي گبل لا تخلين هالفكرة براس بتج عودن تاخذ زلمة مني وتصير شيخة براسي . وهااا الفرخ موش ابنها من اليوم عبن هو ابنه ومرجعه النا يعني لاتصدگ انطيه الها "
بقت تتوسل فهيمة بيها وهي مااهتمت دخلت ..
رجعت تتوسل بحطاب وفرج.
" بنيتي .. فرج انت گلتلي اخليها بوسط عيني وينها بتي وينها "
صاحت بيها سمرة " تستاهلن عبن خليتن عينجن على ابني وضحكتن عليه . صگد جن هسا تذكرت الگردان اللابسته بتج العوبة هذا ذهبي مووو"
التفتت الفرج " احجي ولك بگت ذهبي واشتريت بي گردان للوسخة من باجر تجيبه الي لو حتى انت اخليك ماتخش الحوش بعد "
صاح فرج :
" بوية احجي "
رد حطاب :
" شحجي هو خليتلي وجه .. بگتنا واخذت وحدة من غير شورنا ومخلف منها وماندري .. لو جايني گبل ماتاخذها جان خذتها الك .. بس هسا مابيدي شي بعد شتقرر الشيخة سوي "
لطمت فهيمة :
" يعني شنهي بتي راحت .. بتي راحت بالرجلين .. مابيكم زلمة .. كلكم مشيتكم مرة .. اي استاهل عبن عبالي انت رجال طلعت مثلهم تمشيهم الشيخة وتردهم"
صاح بيها حطاب :
" اطلعي منا يله ولي لمي جوالاتج وولي "
گمت شلتها من الكاع واخذتها للمطبخ وهي تبجي والدم تارس وجهها ..
جبت وصله وماي وامسح بوجهها واغسللها ..
عاينت عليه " بس لا انت گلتيلها "
اتنهدت " هي كل مصيبة تصير براسي "
ردت " جا شعرفها شعرفها "
رديت " ليش ماتعرفيها لو شكت شتسوي . وفرج خلاها تشك بطلعاته تلگيها مخليه واحد يراقبه "
گامت تلطم " يم سودة عليه بتي شسوولها وشكالت روحها من خذوا ابنها من حضنها "
گامت " خن امشي اشوف ابوها اخوها يدورون عليها ماامشي منا لمن الگيها "
لبست عباتها والدم بعده يجري منها وراحت ..
لاكتها منيرة هجمت عليها وصارن يتكافشن .
فهيمة ماسكتت وماخلت شي ماحجته طلعت سوالفهن كلها ..
واخر شي دعت عليهم وطبگت الباب وطلعت ..
بيومها البيت انخبص حتى اكل مااكلوا ..
سمرة حايرة بذهبها الباگه ابنها وبايعه ومشتري گردان الرملة ..
حتى سالفه زواجه وابنه نستها ..
ومنيرة حايرة لان تزوج بت الخدامة عليها وماهمها لان تزوج واجاه ولد منها ..
اما الشيخة فجانت الها حسابات ثانية ..
بعد يوم من الصار .. وبدون ماتنتظر قرار فرج شنو ؟
جابت ابن رملة وفرج .. وخلته بحضن منيرة ..
" هاج اخذيه هالفرخ من اليوم صار الج ربيه وي اخياته"
احس گلبي انفطر من سمعت حجايتها.. محد يحس بشعور رملة غيري .. صعب الام ياخذون ضناها منها ويتسجل بأسم غيرها .. ياما حذرتها الرملة وحجيت وياها ومافاد .. جانت ببالها احلام وطموحات خلت غشاوة على عيونها وحجبت الحقيقه .. ماتدري بلحظة وحدة اصبحت كل احلامها هباءً منثورا والثمن كان غالي جدا ..
# يتبع… ..
( شمس السعدي )
لاتنسون التصويت حبايب ..