مساء الورد احبتي ❤
//// البارت الحادي عشر /////
#بيوت_بلا_جدران
#شمس_السعدي
في هذا اليوم تنتصب أمامي معاني حياتي الغابرة .. كأنها مرآة ضئيلة أنظر فيها طويلاً فلا أَرى سِوَى أوجهِ السّنينَ الشاحبة .. وملامحِ الآمالِ والأحلامِ والأماني المتجعدة كملامِحِ الشيوخ ..
____________________ جبران خليل جبران
( دمعة وابتسـامة )
من اول ماصحيت واني خايفة اصحى وماالگيه يمي مثل ماصار برضوان ..
جانن دموعي ينزلن لا اراديا .. التفتت اباوع بالغرفة ..
جانت ملفوفة بقطعة صوف وتون بصوت ناعم ..
اباوع عليها وجنها الرحمة النزلت عليه من ربي ..
لحظة الانتظار الجنت اتمناها تجي ..
حرت شسوي .. خفت اشيلها واشمها وياخذوها مني ..
ماجنت اعرفها ولد لو بنية ..
كل الاعرفه گلبي ودگاته من شافها .
گمت على كيفي وجان حالي حال .. فراشي وروحي كلشي بيه مخربط ..
رجلي بعدهن مايشيلني .. باردة وجسمي كله يرجف
سحبت روحي يمها ..
وغطيتها وياي .. قربت شفافي على وجهة الناعم
ودموعي الحارة تنزل على وجناتها الطرية ..
اول قطرة دمع نزلت على حلگها ابتلعتها وهي تطلب المزيد حتى ترتوي بدموع امها الحارقة ..
مسحت دموعي واختلطت الدموع بأبتسامتي ..
قربت ايدي منها وشلتها بتردد ..
عين ع الباب وعين عليها..
فتحت الوصلة اللفيها بيها .. وصرت افتش عن هويتها
لما عرفت بيها بنية .. شهگت وحضنتها .. عرفت ليش خلتها مااخذتها ..
بستها براسها .. وهمست الها :
" نورتي دنية امج الغبرة يارحمة الله الي "
سميتها رحمة .. بهذا اليوم ..
واني اشم بيها تذكرت الثاني .. اي هم توم .. اول واحد جبته ولد سمعتها الحبوبة بشرت الشيخة ..
حتى ماخلتني احضنه مثل رضوان اكيد اخذته الرضيه وراح ابقى اتحسر على شوفته مثله ..
جانت رحمة تدور منا ومنا ..
جوعانه ..
طلعت صدري الها .. احاول اطلع اليرويها منه بس ماكو شي ..
دخلت رملة تضحك ..
" ع الخير مرة .. جنتي تتمنين البنية واجتج .. "
ابتسمت الها :
" شوفيها رملة شلون حلوة "
ردت بضحك :
" وينها حلوة جنها ابوها انت احلى منها "
ضجت منها :
" لا تشبهني شوفيها زين "
ضحكت " اي حلوة حلوة .. عبن ماكو محظوظة بيجن بس مهجة "
سألتها " شبيها مهجة "
ردت " يااا جامادريتي عبن مهجة من سامعه طلوگج جنها هي هم طالگه وش الفجر جايبة.. بس هي مو مثلج يكولون حالتها موشي .. بس جابت ولد وسمرة ومنيرة عبن شني متسودنات جيف جابن بنات "
جانت تحجي واني مستغربة اني من طلگت ماخلتني الشيخة اصرخ وخلت البطانية بحلگي شلون سمعتني مهجة "
سألتها :
" الجاهل الثاني وين "
ردت :
" گصدج ابن مهجة يم الشيخة بحجرتها مخليته "
گمت من مكاني وبالگوة امشي ..
" هاااج خليها يمج هسا اجي "
لزمتني :
" وين ماشية شوفي روحج حميت الحمام امشي غسلي وبدلي "
هي تحجي واني مو يمها .. اريد ابني اشوف ابني وين
مشيت بوجهي الغرفة الشيخة حافيه واجر بروحي جر ورملة شايله رحمة وتمشي وراي ..
شافتني رضية ..
" عبن هالمرة مافلحتي يالمصگوعة وجبتي بنية "
جنت مااسمع اي صوت بس صوت گلبي ..
ادور ابني بين حياطين البيت ..
لزمتني فهيمة " وين موليه الشيخة ماترضى تطلعين من حجرتج "
وخرت ايدي منها " ميلي عني اريد ابني وين ابني "
ضحكت رضيه " شنهي هاي اضنها تسودنت يمصگوعة جتج بنية موش وليد "
طلعت الشيخة من غرفة مهجة وعينها بعيني وتخوزر بيه ..
" انت شطلعج من مجانج .. مو گتلج يفهيمة خلها تغسل وترضع بنيتها ليش خلتيها تطلع "
بقيت عيني بعينها ..
" ابني…… "
سحلتني للغرفه وسدت الباب ..
" شنهي شبيج ولج "
رديت " اريد ابني اني جبت اثنين وسمعت الحبوبة كالتلج ولد "
. التفتت جان مخليتها على فراشها ومغطيته اتقربت اله بلهفة هو هذا مووو هذا وليدي ..
ضربتني بعصتها على ظهري احسه انشل .. بسرعه تكومت بالگاع ماگدرت اكوم بس دموعي تنزل ..
" منهي گالج اجاج وليد .. هذا موش ابنج ابن مهجة جابت الفجر . ابنج مات وجعمقة خذاه دفنه محد يدري بي ميت لان لو عرف موحان يموتج لجن منتظر هالوليد من زمان ولو گلتيلها ابني مات يكتلج وتضل بتج وحدها محد الها "
عيني عليه واحجي " شيخة احلفج بالله ابني مات لو لا راضيه اشوفه من بعيد مثل رضوان وحتى مااتگرب اله بس گليلي مامات "
ردت ببرود " مات لاعبالج هينة عليه لجن اريد اشرب من دمج من وراج لان ثولة وماعرفتي تكولين اول ماصار عندج طلوگ الفرخ اختنگ ومات طلع ازرگ سودة عليه وگاطع النفس .. انتظر الوليد يوم يوم وانت ضيعتيه مني "
گمت ابجي بحرگه " لو مخليتني اشمه گبل لاتاخذوه "
ردت " ماردت احد يشوفه خليت جعمقة يدفنه روحي راحت من شفته ازرگ وگاطع النفس .. گومي امشي الحجرتج هالمرة بتج راح تضل بحضنج باريها وداريها زين .. ماراح اخذها منج عبن اني مو هيج ظالمة واحرمج من البت وتوه وليدج ميت .. عبن رضوان گبال عينج جان .. بس هذا ماشفتيه والبت راح تجبر خاطرج بي .. ومثل ماوصيتج لاتگولين اجاني اثنين فروخ لجن لو سمع موحان مالي شغل بيج يمكنه يحرمج من البت هم "
مسحت دموعي " يطيج العافيه شيخة .. مااحجي هاهي مااحجي بس خلو بتي عندي .. اريدها رحمة الي تجبر خاطري بويلادي "
هزت راسها " يله امشي ولاتورجين الحوش علينا "
گمت على كيفي من مكاني وظهري يوجعني من ضربتها
صارت عيني عليه .. شكله سحب روحي وياه من شفته
فتحت الباب وطلعت ..
رملة وفهيمة ناطراتني بالباب ..
اخذتها من رملة وحضنتها ..
صاحت الشيخة وراي ..
" فهيمة خليها تسبح وترتاح وسويلها تشريبة دجاج تشد حيلها بي "
مشيت للمخزن .. رملة شالت الفراش طلعته ..
خليت يمها رحمة ومشيت للحمام سبحت .. وفرغت دموعي كلها ..
دفنوه وماشفته لو باقي مثل رضوان گبال عيني اهون عليه ..
يمكن ربي غضب عليه واخذه مني .. لين ماردته وردت اطيحنه ..
ربي جان حجي السان مو من گلبي ليش سمعت حجايتي ..
طلعت من الحمام .. رملة معدلتلي الفراش ..
جابتلي معجانة جبيرة ومخليه بيها بطانية مصفطتها ومنيمة رحمة بيها ..
شافتني ابتسمت " جوعانة تعاي رضعيها "
گعدت بمكاني .. جابت فهيمة الي طاسة تشرب وبي فخذ دجاجه ..
" هاج اشربيها كلها واكلي الفخذ .. وهاي الخلال خليه يمج گبل لاترضعين اكليه "
فهيمة وبتها رغم سوالفهن بس هن الوحيدات البارني بنفاسي ..
سألتها رملة " ومهجة شلون صارت "
ردت فهيمة " شمدريني الشيخة ماتخلي احد يمها بس هي تدخللها وتگول مالها خلگ وبس نايمة وهالفرخ يبجي من الجوع والشيخة لاتخلي منيرة ترضعه ولا سمرة "
اتنهدت بحسريتي على وليدي ..
بقن رملة وفهيمة يسولفن بينهن .. واني اتخيل صوت الحبوبة من كالتلها ولد ..
سألت فهيمة .. " شسموه "
ردت " گصدج ابن مهجة الشيخة طرشت لهلها الزوم يجون وهمة يسموه شلنا غرض ..يله اني امشي عندي شغل وانت رملة امشي وياي يله "
ردت رملة " خليني يم مرة اخاف تريد شي "
ردت عليها " شتريد هالگاعده مثل الورد وبتها يمها الا ذيج المگرودة جنها عين سمرة ومنيرة صابنها جيف جابت وليد "
مشت وراحت رملة وراها ..
شربت تشربيه شويه ..
واكلت خلاله ..واخذتها الحضني ..
گعدت اشم بيها ومااشبع .. طلعت صدري الها وهي اخذته من جوعها بسرعه ..
تذكرت رضوان من جان ياخذه ..
بعدني ماذكرته فتح الباب ودخل..
فرحت من شفته ..
اتقرب مني ..
" مرة مرة هاي عنون "
هزيت راسي " اي هاي عنون اسمها رحمه تعالي بوسها"
گعد يمي واشرلي اخليها بحضني ..
خليتها بحضنه گام يضحك وباسها .. دور گام يضحك بصوت مامصدگ ..
يريد يشيلها بدياته الصغار .. شلتها وياه قربها الحلگه وباسها بخدها وهي فاتحة حلگها وتدور واخذت خشمة ترضعه خاف منها شمرها "
" تعفني " قصدة تعضني
ضحكت " لا ماتعضك بس جوعانه تريد تاكل "
سأل " اجيب لفه "
رديت " لا تريد حليب مو لفه "
اشرلي بدياته الصغار " هسا هسا "
عافني وراح ..
بقيت ارضع بيها ومدري تحصل مدري لا بس حسيت ظهري انگسم بالنص .. عبن ضربتها توجعني فوگ وجع الجياب ..
اجه وبيده گلاص ..
" هذا حليب جيت حليب "
ابتسمت " لا ماتشرب منا .. اني انطيها منا "
صفن عليه .. واشر الصدره " هنا حليب "
هزيت راسي ..
رد " شو اشوف اني اريدن حليب منا "
رديت " انت صرت جبير عيب تشرب حليب منا "
مارضى زعل وراح ..
اجت حمدية تدور عليه ..
" شتسوي هنا مو كتلك ماتروح يمها .."
كالها " حدية هاي عنون "
ردت عليه " بيها كخ لاتمشيلها بعد مو حلوه "
هو يعاندها " لا حوة "
سحلته واخذته بالگوة ..
ااااه يبعد امك .. شلون راح تكبرون بنفس البيت وانتو اخوان واغراب هم .. راح تصير حنين على خيتك لو يخلون الحقد بگلبك من صغرك ..
نيمتها بمكانها .. اجت جورية ..
" ممممة ممممة "
جايبتلي هدوم الرحمة .. اخذتهن منها ..
شالتها وتبوس بيها .
دور اجه بلبل ..
" هااا مرة حلوات حلوات .. هاي اني جبتهن جبتهن "
صاحت بي جورية " لاااا "
رد " هي هي وصتني واني جبتهن جبتهن ليها "
جانوا يتناگرون واني اضحك على سوالفهم ..
دور گابلوها وگعدوا ..
سمع الشيخة صاحته راح ..
شوية واجه ..
" مرة مرة الشيخة تنهده اعليج "
گمت بالگوة وخفت اعوف رحمة وحدها شلتها ..
رحت الغرفتها اشرتلي ..
" شعدج جايبتها وياج "
رديت " مااگدر اعوفنها وحدها "
اشرت .. خليها يمج بالگاع وتعاي رضعي هالفرخ .. مهجة مريضه ماتگدر ترضعه ..
جانت شادة راسه وعيونه بالعصابه .
شلته خليته على صدري .. من جوعه اخذه بسرعه
وصار يرضع ..
حسيته وجن ابني وارضع بي مو ابن غيري ..
بجت رحمة ..
اشرتلي " معليج بيها هسا تسكت كملي انت "
جان ياخذ صدري ومايلگي بي حليب ويكوم يبجي
سألتني " اكلتي خلالات "
هزيت راسي " اي كليت "
بقت فوگ راسي لمن كملت ..
گامت ..
" يله اخذي البت وارجعي .. ولاتگولين لحد انت رضعتيه جيف يتشمتن ببتي لان مريضه وماترضعه"
اخذت رحمة ومشيت للمخزن .. خليتها ع الصدر الثاني ورضعته ..
كلما تبجي اشيلها بسرعه واشمها وارضعها ..
مااريد افارگها ابد خايفه ياخذوها مني مثل رضوان ..
المخزن جان بارد وخفت عليها تممرض ..
طلعت سترتي الصوف قديمة عندي غطيتها بيها هم بس وجهها طالع ..
لليل ومااجه احد الي بعد .. حتى موحان الجان ينطيني وعود ماشفته ولااجه البته شافها .. جنها غريبه عنهم ..
بس اسمع هوستهم يم مهجة ومگابليها وگاعدين وفرحانين لين اجاها ولد .
گبل لاتطلع رملة اجت تشوفني ..
" هااا مرة اني رايحة الحوشنا تريدين شي "
رديت " اريد هدوم الرحمة ماعندها شي بس ذني االابستهن واخاف احجي وي الشيخة "
ردت " عندنا هدومنا من جنا صغار امي مخيطتهن لينا حضاين وعصايب اجبينهن وعود من تكبر رجعيهن "
هزيت راسي " اي ينطيج العافيه "
مشت حسيت بالجوع ..
اخذت الخلالات وگعدت اكل ..
بقى فخذ يمي گمت للمطبخ جبت خبز من المعجانة وگعدت اكل ..
الليل كله مانمت وي رحمة بس تبجي ومااعرف شبيها
گمت ابجي وياها اخافن يوجعها شي واني مااعرفلها
فتحت حضينتها لگيتها موسخة روحها ..
مااعرف شسويلها ..
والماي بارد شلون اغسللها ..
مشيت للمطبخ حميت ماي الها ..
وجبت طشت من الحمام .. وگعدت اغسللها بالمخزن
ومااعرف اشيلها اخاف تزلگ من إيدي .. خليت رجلي بالطشت وخليتها على رجلي وغسلتلها ..
كملت لفيتها بسرعه بالبطانية ورحت شلت الغراض وشطفت رجلي واجيت..
ماعدها وصل الفها بيهن ..
طلعن من هدومي .. وگصكصتهن مثل الحضاين صغار ولفيتها بيهن .. ورحت جبت گونية خليتها وخليت عليها غطا ونيمتها خاف تسوي مايعبر للبطانية الجوة
مااعرف شي ولا واحد علمني .. لو امي يمي جان علمتني .. جنت لاهية بدنيتي وبمهران جابت بهار وگلبهار وبعدين ارجوان ماشفتها يوم شتسوي وشلون تبدللهن .. ماجنت اضن هيج يصير بيه
خلصت الليل كله هيج من غير الشيخة كلساع صايحتني ارضع ابن مهجة .. وبتي بحضني ..
ولو بجوا اثنينهم وخليت واحد من هذا الصدر وواحد من الثاني..
ماتقبل وتحجي عليه تگلي :
" لايشرگ الفرخ ويموت .. عوفي البت تبجي عودن من تكملين رضعيها "
وجه الفجر يله رجعت للمخزن تعبانه وبردانة ورحمة لافتها كلها بالبطانية اخاف عليها تستبرد وهي بزر نفاس على حجاية فهيمة..
رجعت للمخزن بارد هم.. مااعرف شسوي ويدفئ ..
اخاف على بنيتي تتمرض ..
خليتها بحضني ملفلفتها وتغطينا سوية علمود حضني يدفيها ..
غفيت شوية للصبح حسيت بيد تمدت الي تسحب برحمة .. فزيت خايفه ..
وحضنتها ..
جانت رملة ..
" شمالج هيج خانگة البت لاتنامين عليها وتكتليها "
رديت " لا ماانام عليها بس المخزن بارد واخاف عليها تستبرد خليتها بحضني "
هزت اديها ..
" دهاج هاي الهدوم والحضاين الكلتلج عليهن .. وشوفيلج بطانية دگيها على الباب حتى مايخش الهوى لهنا "
جان اختبار رحمة الي صعب .. اخاف عليها من الهوى
صح رضوان ماربى بحضني مثلها ..
بس جان فراشه دافي وغرفة دافيه ويديرن بالهن عليه لأن يخافن من الشيخة ..
رحمة محد مهتم بيها ..
حتى موحان مااجة ولا شافه لمن سمع بيها بنية ..
وهالشي فرح رضية الجانت متشمتة وتگول تحلمين بعد تشمين ريحة الوليد ..
مااخليج ترسين الحوش ويلاد وتشيخين عليه..
يومين والشيخة گالتلي كافي نوم گومي الشغلج ..
واليسمعها يگول اني نايمة ..
شو اخلص الليل سهرانه بين رحمة وابن مهجة ارضعنه
وبالنهار شغل ..
مخليتها بالمخزن اخاف عليها .. بس كل شوية اركض اشوفنها وارجع ..
بعدين جورية ينطيها العافية خلتها يمها ..
گمت اطلعها من الصبح وياي اخذها الغرفة جوري انيمها يمها لان غرفتها قريبة للمطبخ وكل شوية اجي اشوفها واروح ..
رحمة بجيتها الي رحمتني من التفكير والبجي .. صح گلبي ينزف على ابني الماعرفته ميت لو عايش حتى ماشفته ولا شميته ..
بعد كم يوم من جيابنا ..
اجه رجل مهجة ودنانير والشيخ وياهم ..
جايبين ذبايح .. رماح رجلها ناذر يذبح ذبايح جوة رجلها لو جابت ..
دنانير دخلت تهلهل ..
وتلگتها ربحة ..
" گرة عينج دية بالخير ماجاكم "
ردت دنانير " اي يربحة ماصدگت يوم يوم تجيب مهجة الولد وتگر عيني بي "
دخلتها للغرفه ..
اباوعلها شلون تحضن بي وتبوس ..
معقولة راح ياخذوه ويمشون تعودت عليه وجن هو ابني من ارضعنه وي رحمة ..
اجه الشيخ دخل جان رجال جبير بس موقر ..
خذاه وباس ويقرأ بأذنه ..
سماه درع ..
گاله " اريدك درع الابوك وسند تصيرلو "
رماح جان فرحان وحاضن مهجة ..
كل النسوان جانن يباوعن الها ويتحسرن ..
رادوا ياخذوها بس الشيخة مارضت :
" ادريكم مشتاگين الريحته بس بنيتي خلصت تسع شهور نايمة ومريضه .. ووصلت الموت لمن جابت وصارلها كم يوم فاگدة وماتحس بالدنيا شبيها
اليوم يله وعت على روحها وموش حمل طريج طويل عبن اريدها تكمل الاربعين هنا ويجي زلمتها ياخذها غير وكت ويمشي "
الشيخ مارضى لان مسوي هناك عزيمة وجامع ناسه واهله .. بس دنانير گالتلها ماكو هي عشر ايام ويجي رماح ياخذها ناسنا ووادمنا ناطرين هناك ..
بالگوة قنعوا الشيخ .. جانت دنانير كل شوية وتگلها رضعيه ومهجة مخليته على صدرها وهو يبجي مايريده مدري شبي ..
تغدوا وكملوا وراحوا لهلهم ورة الغدة ..
اول ماراحوا دزت عليه الشيخة بغرفة مهجة ..
جنت ارضع برحمة عفتها يم جورية ورحتلها ..
اشرتلي ..
" زقفلي الباب وتعاي رضعيه لجن الفرخ مات من الجوع ومهجة حليبها قليل مايشبع صارلها ساعه مخليته على صدرها ومايشبع "
اخذته منها جان حلگه فاتحه ويدور منا ومنا ..
سألتني " جنتي ترضعين البت يو لا "
هزيت راسي " اي جنت ارضعها "
ضاجت " طلعي الصدر الاخر موش الرضعتيها بي خليه يشبع "
طلعته اله ارضعه وهو يرضع حيل من جوعه جن صدرها مايشبعه ..
سألت مهجة امها :
" يمة شلون هناك لو حجت عمتي "
ردت " شنهي تحجي اني گلتلها مايشبع على صدرج وانت هم گليلها صدري مامش بي حليب بلكن تشوفلج وحدة ترضعه "
اتنهدت مهجة وسكتت ..
رضعته وكملت وهو مايرضى يعوف صدري جنه تعود على صدري .. شفتهن يسولفن ..
شلته وقربته الخشمي شميته وبسته .. ريحته مثل ريحة رحمة ..
دخل الگلبي وحبيته تخيلته ابني الراح وماشفته ..
دارت وجهة عليه ..
" هااا كملتي يله امشي "
اخذت مني الجاهل وطلعت ..
جانت رملة تدور عليه .." وينج فريت الحوش عليج بتج تبجي مدري شنسويلها وهي المسودنة تفتر بيها وتبجي وياها "
ركضت الغرفة جورية لگيتها تفتر بيها وتبجي وياها
شافتني گامت تصيح عليه مدري شتحجي ..
اخذتها منها وگعدت ارضعها ماشبعت سودة عليه عفتها ورحت رضعت درع ..
دخل بلبل شافني غمض عيونه .. بسرعة اخذتها ورحت للمخزن .. خطية بلبل من يوم الجبت وجورية طاردته من وراي فرحانه بيه اني ورحمة ..
اريد امشي للمخزن طلع موحان شافني .
" تعاي اگللج "
جنت لافه رحمة وحاضنتها ..
رحت يمه عبالي يريد يشوفها .
" شنهي هاي راح تضل يمج "
هزيت راسي " اي الشيخة گالتلي خو ماتاخذها عمي مني تعودت عليها لاتاخذها "
رد " شصخم بيهة اخذها بس كونج خابصتني ببطنج شكبرها وانه ضنيت تجيبين وليد طلعت هاي "
قربتها يمه " شوفها عمي حلوة "
رد بعصبية :
" اخذيها وولي من وجهي عودن من اجيج هم هيج خليها بوجهي "
عافني ومشى ..
بقيت افكر بحجايته .. " شني يجي وشعنده "
مشيت للمخزن نيمتها ورحت كملت شغلي وغسلت هدومها وهدومي شريتهن ورجعت لكيتها گاعده ..
مر كم يوم واني السهر والشغل هدو حيلي .. بس من اشوفها انسى التعب كله ..
خلصن العشر ايام واجه رماح جاب سيارة ..
جانت مهجة تلم بغراضها واني گاعده ارضعه گالت شبعيه لايبجي بالطريج ..
جنت حاضنته حيل ومااريدن اعوفه .. تعودت عليه
اسبوعين واني ارضعنه وهو تعود عليه ..
لمت غراضها والشيخة مسويتلها كركوت من خشب حلو اخذته وياها ..
كملت رضاعته اخذته لبسته ولفته ببطانيته وشالته
امها تمشي وتوصي بيها ..
كلهن واكفات يودعنها هاي مهجة مو اي وحدة ..
طلعت الشيخة وراها الحد الباب ..
لمن راحت يله دخلت ..
رجعت للبيت حسيت شي ناقص بيه وجن روحي راحت وراهم .. ضاج خلگي ..
مامشيت للمطبخ يم فهيمة ورملة مشيت للمخزن يم رحمة حضنتها وگعدت احجي وياها ..
من عمرها ايام وبديت احجيلها قصتي .. احسها صارت شريكتي بقدري ..
البيت بالشتا مو مثل الصيف ..
كلها بغرفها ومحد يطلع الا للحمام لو المطبخ ..
والجهال مايطلعون يخافون عليهم من البرد ..
ورضوان ماشايفته صارلي يومين ..
احس روحي ذايبة الشوفته ..
كلما اسمع باب انفتحت اگول هو ويطلع مو هو ..
منيرة من بعد ماجابت البنية زادت مشاكلها وي فرج وبتحريض سمرة..
مرة منهن جنت اريد اروح للمطبخ وسمعتها تگله ..
اني منك اعرس عليها واكسر خشمها .. شو شايفه روحها عليك وهي خلفتها بس بنات ..
رد عليها " يمة شنهي ترديني اعرس والشيخة "
ردت " والشيخة شنهي مو خذت الفصلية لأبنها الشايب عبن تريد ويلاد .. حلال اعليهم وحرام علينا "
كلام سمرة شجع فرج .. وخلاه يفكر يتزوج .. بينما رضية بقت تزن عليها تحبل مرة ثانية .. بس شلون تحبل وفرج مايوصلها من يوم الجابت ولايدخل غرفتها ..
الشيخة من شافت هالوضع ..
حطته گبالها وسألته ..
- شنهي يفرج لويش هاجر مريتك وتنام بحجرة اخوتك
- عبن شيخة تعبت دوم تعيرني وتكلي اني بت الشيخ موحان موش ياهي الجان ..
- وانت ضايج خلگك منها الهيج لو جيف جابت بنية
- هن كلهن تكومن عليها .. اني من حگي اشوف مرة الي تسمعني وتطيعني موش وحدة تحسسني هي اعلى مني ..
- اسمع يفرج لاتشوف ساكته ومااعرف سوالفك . لجن گلبي حاسني انت عندك سويلفات والضاحجة على عگلك ماتفيدك عبن بنت عمك هي سترك وغطاك ..
- شني شيخة تحاسبيني هالعمي منهل يمشي البغداد كل اسبوع شدراج شيسوي .. وعمي موحان يوم الماعنده ويلاد اخذتيله الفصلية جابتله وليد ويمكن تجيبله الاخر بعدين شنهي وكفت على فرج ..
صاحت بي :
" شنهي ولك حسبالك كبرت وصارت عندك خلفه وتحجي وياي هيج . عبن اكسر راسك بهالعصة لو عليت حسك عليه . شنهي تقارن روحك بعمك منهل .. جيف هو راح يصير بالدولة واللزوم يمشي بالبغداد بعد يومين الدنيا كلها تحسبلك الف حساب من وراه . وان جان موحان اخذت الفصلية لجن هو شيخ واللزوم ذريته تكثر وتشيل اسمه "
ماعجب هالحجي فرج .. وسوة الماگدر ابوه يسويه ويعاند الشيخة ..
بيوم من الايام جنا گاعدين بالمطبخ ..
اجانا فرج ..
باوع الفهيمة ..
" فهيمة اني رايد املج على رملة ترضين لو لا "
فهيمة جانت تاكل غصت باللگمة :
" شنهي شگلت .. ؟"
رد عليها :
" اضن سمعتيني "
ردت :
" والشيخة شتگول "
رد عليها :
" مالج شغل بالشيخة "
"اني راح اخذلها حوش وحدها محد يدري بيها لمن تجيبلي الوليد واجيبه واخش البيت وذيج الساعه مالهم شغل عندي "
جانت رملة مصدومة مثلي ..
باوعلي وهدد .. " وانت لو نطگتي بحرف للشيخة لو لحد ماتلومين الا روحج "
گمت عنهم ..
" اني مالي شغل لاجن سمعت ولا ادري "
عفتهم وطلعت ..
وبالي يم رملة معقولة توافق ..
رحت ارضع رحمة..
شوية واجت رملة ..
" شنهي شفتج ضاج خلگج لمن فرج راد يملج عليه ويخليني ببيت وحدي "
رديت :
" وليش يضيج خلگي شلي شغل بيكم "
ردت :
" يعني ماضجتي لان راح يصير عندي بيت ويملج عليه"
ابتسمت :
" هاي اني گبالج مالج عليه شحصلت منهم "
ضحكت :
" انت وحد .. انت اسمج فصلية واجيتي جبر .. اني من اخذ فرج اخذه بشروطي موش بشروطه .. ماتشوفيه كاتل روحه علي .. عبن اني مطيرتله عگله مخليته يتمناني لا حسبالج كاتل روحه اعله الفرخ .. هاي حجة لگاها "
شلت راسي الها :
" ومافكرتي الشيخة شتسوي لو عرفت "
ردت " منا لمن تعرف لن اني عندي فرخين وثلاثة شتريد تسوي بعد "
سكتت عنها .. وهي بقت تسولف وحدها
" تدرين هسا شگلتله .. تروح لأبوي تاخذني منه وتشتري البيت واشوفنه ونملج عند السيد وعند الحكومة عبن شني حتى اضمن حگي موش مثلج لاولد ولاتلد "
اتنهدت بداخلي .. وجن اني اجيت بكيفي لهنا ..
ومعقولة راح الشيخة تسكت لو عرفت ..
مر كم يوم وفهيمة مامرتاحة احسها وبس تتصفن وتفكر ..
وتحجي وحدها ..
" اگلج لو درت الشيخة شتسوي اخافن تطردني منا واخسر الاول والتالي "
ماعرفت شگلها ..
باوعتلي وهزت ايديها " شوف اني المن احجي .. اهمدا حظي الخلاني اسولف همومي وياج "
رديت " واني شريد اگلج لاتطيها لو لاتضيعها البتج "
ردت " وانت شدعواج ماراضية عبن راح تصير وحدة من هالحوش وتخافين تعلى عليج مووو .. عبن ذيج سمرة فلاح وصعدت وحد عنا "
سكتت عنها ادري شمااحجي مايعجبها ..
وهي سمرة بالاصل تريد بنت اختها الفرج من گبل لايتزوج منيرة .. مني يگول ترضى برملة ..
رملة الگطعت رجلها من الحوش فجأة وبعد ماشفناها
حتى الشيخة حست عليها وصاحت فهيمة ..
" فهيمة بتج شنهي شو مااشوفهة وياج "
توترت فهيمة وماعرفت شتحجي :
" هاااا اي شيخة عبن اجتي قسمتها وراح تعرس "
ردت الشيخة :
" صلوات صلوات جا شو ماگلتي لجن هم محسوبة اعلينا .. واللزوم ندري ونباركلها "
ردت :
" مشكورة شيخة ماتگصرين بس هي صارت بساع بساع "
سألتها :
" ومنهو هذا من السلف "
ردت " هاااا لا من عمامها موش منا "
هزت راسها الشيخة ..
" شنهي تحتاجه تعاي گليلي عبن هي هم بحسبة بنياتنا"
هزت راسها فهيمة وراحت تركض للمطبخ ..
جانت تفتر وماتعرف شتسوي ..
شافتني " اكلج شفتيها شلون تحجي لو عرفت بي فرج الرايدها راح تگول هيج لو تطلعنا خدم عندها . من سمعت راح تنزف العمامها گالت بحسبة بتنا لو عرفت شتسوي هم تگول هيج "
رديت عليها :
" هي ملجت لو لا "
ردت :
" لا بعدهي لمن يشوفله بيت يريده بعيد عن السلف وهو كال مايريدها تجي لهنا تشتغل بعد عبن مايريد يحسس احد "
سألتها :
" وشلون راح تزفوها "
ردت :
" لا اسويلها بس ليلة حنة واحنيها وعودن الزفه اگلهم يم عمامها موش هنا .. لجن الزوم نعرف الناس هي راح تعرس "
اجت جورية تأشرلي ..
مشيت وراها رحمة گعدت جوعانة هالاجت جورية..
دخلت الغرفة جورية لگيت حورية گاعدة ويمها علي ورضوان يلاعبوها الرحمه ..
ابتسمت من شفتهم ..
هي باوعت الي .. " هاااا لجن الله جبرج بالبت وماخذوها منج .. شو جيبيها خن اشوفها "
شلتها انطتهيا ..وعلي ورضوان مگابليها ..
علي يكلها " يمة حوة "
عود حلوة ..
باوعتلي " ماتشبهج انت احلى شمالج جنج تتنسين على موحان صح بيضان وحلوين بس معانيهم تشبه موحان شسمتيها ؟؟"
رديت " اني سميتها رحمة بس مااعرفن الشيخة تقبل يو لا "
ضحكت " مالها شغل عبن لو وليد جان هي سمته بس هاي لا .. ايييييه هيج وينگطع نسلها وماتشوف الوليد بحياتها "
گامت " يله اني اگومن اجيت اشوفجن جورية .. وانت ديري بالج عليها لجن محد الها هنا "
هزيت راسي " جورية مثل اخيتي "
هزت راسها وباوعت العلي ..
" يله يمه امشينا "
عاند " ماا ماا "
بالكوة اخذته يريد يبقى جان مگابل رحمة وگاعد ..
وهي يحب يلعب وي رضوان..
عبن رضوان ماعنده احد يلعب وياه ومنيرة ماتخليه يتگرب البناتها ..
طلعت حورية وجانت الشيخة تراقب من بعيد واكفة
سديت الباب وراها ..
اشرتلي ..
رحتلها ..
" شعندج تتخشخشين وي حورية شنهي تردين تصفين وياها عليه بس كون باكت السانج وحجيتيلها اسرارنا "
هزيت راسي " لا شيخة لا والله ماحجيت شي هي اجت تشوف جورية وراحت ماضلت هواي "
هزت راسها وهمست " دور اريدنج من تجي حورية لمن تطلع تخلين عينج عليها وشتحجي تكليلي عبن لو سمعتي حجايتي اخلي رضوان يجيج وتشوفيه براحتج"
هزيت راسي وسكتت ..
ماحجيت وياها وشحجي .. تريدني انگل حجي واخرب بيوت حتى تخليني احضن ابني هو اني من البداية احضنه واشمه بالبوگات شتفرق بعد .. واني ادري برضيه ماترضى يجيني .. وهي الشيخة بلسانها گالت
لو بيوم واحد گال الرضوان رضية موش امه اگص السانه كل ضنها اني ماافتهم .. ماتدري عشت وياهم سنين وعرفتهم كلهم .. صح ساكته ومااحجي بس اعرف كل واحد وطبعه وان جان زين يو شين ..
بعد اربعين رحمة ..
اجت فهيمة واستأذنت من الشيخة علمود حنة رملة وعزمت الحوش كله ..
بس محد راحت منهن واني لااطلع ولااطب ..
بس سمرة من شافتهن مراحن عاندت ومشت للحنة ومن رجعت كامت تحجيلنا .. فهيمة مسوية حنه صغيرة وعازمة بيها بس السلف وكالت باجر يكولون يمشون العمامها مناك يزفوها ..
جانت تسولف على الگردان اللابسته رملة ومستغربة لان عمامها هيج عندهم فلوس وهمة يشتغلون فلاليح وخدم عندهم ..
وماتدري هالگردان والفلوس هي فلوس ابنها الماينعرف منين جابهن ..
لان كل الفلوس والوارد مال محاصيل بيدها وهي تنطيهم يومياتهم وتعبهم .. وفرج مو مثل حطاب تنطيه لان هي تنطي حصة حورية وجورية وحطاب من الارباح وهمة يتصرفون بيها ..
بس بعد ايام سمرة تطلع تصيح من غرفتها وتلطم ..
لمت البيت عليها ..
وصارت تگلهن ..
" ذهبي وين طلعنه عبن محد يخش الحجرتي وين راح ذهبي "
صاحت بيها رضية :
" واحنة شمدرينا بذهبج خاشين حجرتج ندري بيها "
گعدت سمرة بوسط الساحة وتبجي وتلطم ..
اجت فهيمة تركض ..
باوعتلنا اثنينا ..
" انت التفترن بالحوش وين ذهبي احجن "
ردت فهيمة :
" على بختج ام فرج شو حتى حجرجن مانخشها وانتن ليل ونهار نايمات بيها ماتطلعن .. حتى من تردن حاجه انتن بيها جاعدات بعد شلون ناخذ ذهبج "
بيومها ماخلت واحد ماتهمته ..
واجت الشيخة وصارت هوسة..
سألتها " شني ذهبج الرايح يسمرة "
ردت " بتوتي جابهن الي حطاب من اخر محصول بعتوه توني لبستهن حتى ماتهنيت بيهن "
اشرت الشيخة :
" اسمعي يسمرة احنه موش حرامية حوش عز ودلال وحجايتج هاي تتحاسبين عليها عبن تهمتي اهل حوشي وان جان يريحج فتشي الغرف كلها وان مالگيتي شي حسابج عندي "
گامت سمرة :
" شتسوين سوي المهم ذهباتي يطلعن "
گامت تدخل للغرف تدور بيهن وكل غرفه تدخلها تتعارك وي صاحبتها عليها .. الا بثينة ماخلتها تدخل وكالتلها
" اني موش حرامية .. الذهب العندي يشتريج ويشتري عشرة مثلج .. وان تردين انطيج واحسبهن صدقه الوجه الله عبن اني مااخلي وحدة غيري تعتب حجرتي"
من اجه حطاب ضاج بس مارضى على تصرف سمرة طيب خاطرها ووعدها يشريلها غيرهن . بس هي جانت تبجي وتريدهن هن نفسهن ..
بنيتي صارت تكبر گبالي ..
وكلما تكير تحلى بس مابيهم واحد طلع نفس شعري لاهي ولا رضوان ..
اما موحان فرجع يجيني بالليل ..
جنت ارضع برحمة دخل عليه ..
" وخري هاي من يمج وتعاي الي . "
جانت بعدهي جوعانه ..
صاح بيه " ثولة ماتفتهمين كتلج وديها هناك "
خليتها بمكانها وهي تبجي من الجوع ..
ماخلاني ارضعها ..
مثل كل مرة تقرب من غير مقدمات .. بس هالمرة جان بي شي .. مااعرف شصارله مو ذاك موحان ..
من شاف روحه مايگدر طلع الصوج بيه .. وصار يضربني ..
" شمالج باردة وهاي منا صوتها طرشني دور تنيميها من وكت وتحضرين روحج الي "
گام متعصب ويحجي عليه وطلع ..
مااعرفن شبي .. بسرعه رحت شلت رحمة وكملت رضعتها ووجع جسمي من الضرب مالته نسيته بمجرد ماخليتها على صدرها ..
گمت كل يوم انيمها من وكت وارضعها خاف يجي ويحجي عليه .. وجان يجي وهم نفس الحاله مايسوي شي وتاليها يكتلني ويكوم ويضل يسب بيه وبأهلي ..
وجن بيدي هي كل مرة يطلع الصوج بيه ويكلي تطيرين الواهس ببرودج ..
مرة منهن ضربني وضرب رحمة لان تبجي وهي عمرها شهرين ..
گمت بسرعه دفعته عنها وصرت فوگها لايكتلها .. تخبل لان دفعته كام يدفر بيه واني نايمة فوگاها خاف تلوحها ضربه منه وهي تفرفح جواي ..
لمن طلع يله اخذتها الحضني وسكتتها .. موحان تغير كلما مايحصل شي يتخبل عليه ويضربني .. والغريب انه رضية كم مرة شافته يطلع منه او يدخل الي .. وماتحجي ولاتصيح مثل عوايدها ..
#يتبع…… ..
حبايب الرواية بيها احداث هواي لكن لازم اسردها بصورة متسلسله يعني مااگدر اعبر سنين طويله .. اصبروا عليه ولاتستعجلوني..
احبكم .. ❤️
لاتنسون التصويت حبايب .. لان مشاهدات عالية والتصويت قليل !!
اضغطوا ع النجمة بعد متكملون ..