#شارع_ال60
-9-
" لها الرحمة مدراراً من فيض ربي " !
- الحي الله و الدايم الله انا لله و انا اليه راجعون لاحول ولا قوة الا بالله
"مع تذايد الكواريك والصريخ من اخواتي"
*الليلة وااااي يا يمة الليلة وووب وووب المشيتي قبال نودعك الليلة وااااي ياامي الخليتينا خليتينا لي منو الليلة الما ونستينا والليلة احي واحي احييي انا يا عزو امك ماتت امك ماتت ياعز امك فاتت وخلتنا منو البنضحك معاه منو البنتلما معاه يا عزو احيييي انا
"بقيت واقف في حالة جمود رغم كواريك اخواتي ومسكتهم لي وبكي اخواني وجرجرتهم لي بس تقول وقعت فيني خرصانة ..
الدنيا دايرة ولافة وعمر العشرة سنوات الكنت حاسي روحي فيه فجأة كبر كبر شديد وصحيت علي روحي في لحظة زمن اتختفت فيه امي يا ناس..
قلبي كلو اتشال ما حتة بس.
قعدت في الارض دي وبطول حسي بكيت دي امي ياناس الما لحقت اتونست وشميت ريحتا الما لحقت اتمليت من حنيتا الما لحقت مليت عيوني منها..
صوتي رفع وانا "بجعر"بطول صوتي
"الناس دي كلها بقت حوالينا تصبر وتكبر لينا عشان نوعي"
قعدت اردد
-انا لله وانا اليه راجعون لا اله الا انت سبحانك اني كنت من الظالمين..
سامع صوت زول بعيد بقول:
يوم تموت الأم ينادى مناد من السماء يا بن أدم ماتت من كنا نكرمك من أجلها فأعمل عملا صالحا نكرمك من أجله..
ف امك امك امك يا ابني ويابنتي..
انا هنا انهرت زيادة لعنت الغربة لعنت اي شي خلاني بعيد منها اتمنيت لو لحظة بس تكون فيها معاي..
........ً...........
"جانب سلوان...
** عشان تعرفي روحك كضابه كيف ! اها
رايك شنو رُقيه ما جابت سيرتك ! عشان
تعرفي غبائك كيف ! قومي قومي على
حيلك تقوم قيامتك !
جريتا من توب امها بتاع الهزاز لما اتشرط
ووقع منها ما خليتا تلفو فيها سمح وجينا بيت ناس رقية كالعادة بابهم فاتح شارع كررب ضربتو زيادة ودخلنا"
*اصلي الليلة ما حاارحمك يا سهام
-وحات حبوبتي الماتت
"بي صوتها المبحوح وكبير"
وحات حبوبتي يا سلوان ما قلت ليها شي عنك خليني النلحق الخلوة فاتتني..
*خلوة شنو انتي بتلعبي علي ربك يا سهام شي تحلفي بحبوبتك وشي تبهتي الناس وتفتني فيهم عليك الله بطلي نفاقك دا عشان امورك دي تتعدل..
"خالتي جات مخلوعة طالعة من جوه"
-في شنو بسم الله
*معليش يا خالتي ما تدخلي انتي اسمعي من سكات عشان تعرفو سبب المشاكل
رقية يارقية تعالي هنا بسرعة..
يا رقية انتي يارقية عارفاك سامعاني
-اها يا سلوان ما تكوركي الحلة كلها سمعتك انتي ما ممكن تتكلمي براحة دخلتك علي وطلعتك بالفضايح والكواريك
*انا كدا يا رقية علي الاقل ما بتظاهر بشي ما فيني
-رمي رمي لي الكلام وانا ما قاعدة اتظاهر برضو
*والله تمام خلاص عيدي كلامك تاني قبال تقوليه سمح ولا طلعي اول بأول ما تكتمي وتشيلي جواك ووقت تزعلي ما تطاعني بالكعب قبل الشين سمح..
المهم دا ما موضوعنا انا جبت ليك سجم الرماد دي لحدي عندك
"رفعت ليها السير وحدرت فيها "
وريها
-انا والله يارقية جيت بجمب بيتكم لقيت الباب فاتح قلت اشغلا ليك بدل عدم الموضوع العندي دا دا كل الحاصل..
"رقية بقت تتنحنح وتتململ في محلها"
-يعني كلام اخوك وان سلوان ما دايراني اعرسو عشان وضعو احسن من احمد دا كضب؟!!
-اي غشيتك ساي كيتن في سلوان وقت شاكلت امي
"عاينت لي رقية بزعلة"
*بس دا العايزة اصل ليه ان شاءالله صدقتي وليك ولي زمانك يارقية الناس دي كلها لو عندك واحد انا لا لا تختيني في كفة براااااي فاهمة عشان انا ما اي زول عليك الله انتي كان ما سجم زاتك تخلي السوس يخش بينا ونحن عشرة عمر واكتر من صاحبات انتي اختي يا عويرة..
-معليش يا سلوان والله انا كنت زعلانة بس وقت شافوك ف...
*عضيت ليها خشمي وحركت عيوني علي جهة امها يعني تسكت"
-خلاص فكي البت تمشي يا سلوي بتقتليها..
*بفكها بس بعد تاخد الفيه النصيب اول عشان تاني كان جابو ليها اول حرف من اسمي ساي تقوم جارية
"مسكتها ووقعت ليك فيها لبع وضرب بسير الوصلة المقطوع"
"السكاليب والصواريخ اتفتحت منها"
"والساعة ربب وقعت في الارض وقعدت تتمردغ"
*واااااي وااااااي" وقامت جارية هي عليها سمينة لكن حركتها خفيفة وقفت جمب باب الحوش هناك
"وب حسها الكبير شديد خمشت ليها تراب من الحوش واتفتحت فيني:
هوووووي يا الاسمك سلوان انحن البنريدو بنولع ليهو اللمبه والما
بنريدو بنحرش ليهو الكلبه
الليلة بعد السويتي دا ارجي الراجيك بس ارجي الراجيك وحات حبوبتي التاية "بتبكي" وحات جدي الزبير وحات يمة
وافهميها من هسي و اعملى شخيط واقيفى بعيد يا ترا ترا شبه اللستك الورا
و هيييييييييييييييييييييي وتااااااااانى هيييييييي وتانى وتاااااانى هييييييي ماتكبى الريحه وتعملى تفتيحه وتخليني اقيف ليك فى طرف الملعقه واوريك قلة الادب الصحي ..."كشحت التراب"
كان جبل طلعتو وكان عسل لحستو و هوووووووووى تدقيني انا ياكرور
ياوسخ الخور يا تربيزة الجزاره يا اللامه الوسخ والزفاره بطااااطس ومستوى
غاااااااااطس
هيييييييييييييي
ييييييييييييييي اخير ليك فتحى عينك قدر الريال وخلى
اضانك قدر العقال ما تخلينى ادق الصفايح وأطلع الفضايح
يا سلوي يا مجنونه ياشبه حجر الطاحونه يا الليمونه وعامله فرعونه ....
هيييييييييييييييييييييييي غادى غادى الجزام بعادى يا الككويه يا ام جضوم مويه الشمس ضربتك والباقي انتي عارفاه...****
"وكرررو رزعت ليك فينا الباب شديد لما نطينا ومشت"
"بقينا مخلوعات في الكلام الاتقال ورقية قعدت ترجف ويديها بقت تلج وشابكاني براحة وبعلياااا الليلةوالليلة ارجي الراجيك يا سلوي والليلة وووب
" امها واقفة وممحنة بس"
"عاينت لي شديد"
*سلوان امشي بيتكم هسي
-خالتي طيب افهمك
"رقية قرصتني وبصجة سنون"
*سلوي امشي هسي بعد الدنيا تروق بجيك انا امشي
"لزتني"
"طلعت من دربي من سكات جيت البيت"
"اليوم دا مشي بخيرو وشرو كل زول في همو انتهي".
#في العزاء
-الدوام لله الدوام لله
"الدنيا ليل الجو كان رايق يوم اتنين صيوان للرجال بره بداية الشارع وواحد للنسوان جوه ..صوت بكاهم وكواريكهم مع كل دخلت مرا تذيد"
ماسك مصحفي شديد وبقرا في سورة البقرة هزتني الاية
"وَاتَّقُوا يَوْمًا تُرْجَعُونَ فِيهِ إِلَى اللَّهِ ۖ ثُمَّ تُوَفَّىٰ كُلُّ نَفْسٍ مَّا كَسَبَتْ وَهُمْ لَا يُظْلَمُونَ"
دموعي دي نزلت وصوتي طلع غصبا عني..
"جاني صوت هادي"
-الله يصبرك ياعزالدين ادعي ليها وكل ما تضايق زيد قراية قران ما فراق الام دا حاااار حااااار شديد ووجعو ما بنتهي.. خالتي الزيها منو زولة حارة حنييينة وطيبة
"بقت تبكي"
"بقيت بعاين لي البتتكلم معاي دي ، قشت دموعها"
-انا هاجر ، البركة فيكم احسن الله عزاءكم وربنا يصبرك يارب
"كانت شبه بترجف وصوت ياالله بطلع منها ومرة تعاين لي والتانية عيونا تمش بعيد ، كانت واقفة هناك زي الخايفة تقرب مني ، مرة تعاين ومرة تدنقر وتدعك في يديها"
*البركة في الجميع ربنا يرحمها ويغفر ليها يارب..
- اللهم اميين ..
عايزين مصاحف بنعمل في ختمة ونقصت
ناس كتار ما شالو اااا..
* حاضر هسي بجيب
-لالا ما تجيب انا كنت جاية اشوف زول يوديني خلوة الجامع حقنا بشيل من هناك
*كويس ارح انا بوديك
-امشي انا بمش من وراك
*انتي شيخة فيها؟!
-في شنو؟!!
*قصدي في خلوة الجامع حقكم!!!
-لالا بس داخلة فيها والشيخة مرة جيرانا بتمسكني المفتاح لاني ملتزمة وااا ممم "فجأة سكتت لما لقيت روحي مسترسلة في الكلام معاه ودا ما وقتو"
*"للحظة استحضرت اخر كلام من امي في هاجر ياها دي شكلها بديت اتزكرو بس بعيد بعيد عمري ما ركزت فيها زي الليلة دي امكن ما هي لالا ياها زاتا ..
حاضر يا امي وقت ما تميت ليك مناك في الدنيا دي ..
حا اعرسا ...
#عوض_ربنا_سمح°°•
*من الليلة يا مروة حركة مااااف تاني انا مبسوووط ياالله شفتي عوض ربنا دا حلو كيف والله عاوز انطط بس..
-"بتبكي وبتضحك" الحمدلله يا مدثر الحمدلله والشكر لله انا كنت خايفة ما يطلع حمل بالاصح كنت بكذب في روحي عشان ما اتصدم ،، الله كريم.. والله انا من زغاريد قبيل حلقي واجعني هسي"بتضحك"
"بفرح شديد وجراها حضنها عليه قوي"
*حركة شنو مااااف انا حا اتصل بسلوان افرحها والله قدم خير علينا وافتح ليها اضانها تنزل الجامعة معانا في البيت..
لازم يكون معاك زول ما ينفع اخليك براك تاني..
#في_جانب_سلوان
كانت بتحاول تصل ل احمد ال هسي ما اداها وش من اخر كلام حصل بينهم وكمان جات بلوة جديدة..
"بتتكلم مع روحها"
الله يهدي رويحتك دي يا سلوي الله يهديك من الخراب البتعمليه في نفسك
هي لكن كل ما انوي اتعدل وجادة والله تجي حاجة تطلع السوء الجواي احييي انا بس احيييي بس..
"التلفون زززززنننن زنننن عاملاه هزاز تحت المخدة"
اخيرا اخيرا طريتني يا احمد
مع رفعت التلفون والووو
-سلوان انا مدثر
*مدثر
" وانا كان بالي في الباب"
"سلوان"
*يمة...
#دمتم_بسلامة☕
#سحر_سمير🎻
#فاطمة_قسم_الله🌼