#وجودك_أمان 🤍
الحلقة [10]
بالقاسم براحه : مبروك
أنا مارديتش نبكي
بالقاسم بحت فيا : آسف كان وجعتك
عطاني منديل و غطاني وخر لبس و طلع جابلي اميه خش الحمام الضيوف
أنا صبيت شربت اميه و خشيت دوشت و لميت السرير قعدت نغير في الفوط بشويش
بالقاسم خش خذا الفوطه طرحها ع السرير : ارقدي تريحي
أنا تمددت ع السرير بالقاسم رقد
أنا من الألم و تغيير المكان عليا قعدت لعند طلوع الشمس واعية
حاطة مخدات رافعة روحي بعد أذن الفجر بالقاسم ناض
بالقاسم : تصلي و لا
أنا صبيت : نبي نصلي
و صلينا ردينا رقدنا كل حد فينا ع طرف السرير
.........
نزهه ترضع في مريم : ما قتلكن ديرن هك بس أنتن ادورن في الحس اقسم بالله كان يسمعكن بالقاسم يقتلكن أنتن الأثنين
رندا : نزهه الله يريحك فكينا من النكد هذا أسبوع يعني نبوا انديروا جو نحن و البنات
زهور : تبي الحق بنات عمامي هنا اللي شوشن علينا عدينا للماما نقينا عليها لين وافقت
نزهه : حي كان يسمعها حمادي أين بالقاسم هذا
رندا بحتت في زهور : حي ع أمنا وحي ليلتنا سوده
زهور : اسمعي إنت متجوزه أكيد يتحشموا منك ما يهزبوكش قولي هديتي لبالقاسم جبت حتي اليوم فرقة في الحوش
رندا تخبط ع كرعيها : تي تقولك حمااااادي حمااادي والله ذبح طول هذا ما يفهمش
نزهه تضحك : الله يرزيكن في عقولكن تخططن بدون ما تفكرن
زهور : يعني تبي تحليها و إلا لا
نزهه : توا نحلها نقوللهم جايبها
رندا قصت عليها : قوليلهم راجلك جايبها الفرقة
نزهه : تمام خلاص عدن وتن فطور للصبايا اكيدة عزايز نايضات
زهور فرحت : نعلي و أخيرا
طلعن قعدن يوتن في الفطور للصبايا ...
.......
بالقاسم ناض الساعة عشرة خش للحمام
أنا نضت كراعي من فوق توجع فيا و ظهري بكل عديت ع الزيانة سقمت شكلي فتحت تلفوني حطيته و رديت قمعزت ع السرير مع طلعته من الحمام
بالقاسم يمسح في وجهه : صباح الخير
أنا بحتت فيه صبيت : صباح النور
خشيت للحمام غسلت و طلعت ما لقيتش بالقاسم في الدار غيرت روبي لبست بيجامه حرير بيضا كم لفيت شعري قعدت نبحت في شكلي شوي و نزلت للدور الأول لقيت بالقاسم مقمعز ع الصالون و يدخن
أنا : نوتي الفطور
بالقاسم رفع عينه و نزلها طول : أها و ياريت فنجان قهوة سادة قبل الفطور
أنا : تمام
خشيت للمطبخ درت قهوة و حطيته جنبه ورديت للمطبخ قعدت نوتي الفطور
أنا طلعت من المطبخ لقيته سرحان : الفطور واتي
بالقاسم فطن صبي : إحم
قمعز ع الطاولة
أنا قمعزت
بالقاسم ياكل و ساكت
أنا نبحت فيه مرة مرة و ناكل
بالقاسم : هلك رنو عليك
أنا : لا لا
بالقاسم : افتحي تلفونك أكيد يرنوا عليك
أنا خنقتني العبرة : مفتوح
بالقاسم : ما اتصل بيك حد
أنا كانه ضربني كف وجعتني
بالقاسم بحت فيا عرفها من وجهي : أكيد مش فاضين لاهيين في حوسة الفرح
أنا حسيت روحي ولا حاجة لا حد دورني من هلي و لا سأل عليا
بالقاسم صبي : الحمدلله
أنا صبيت : صحة
بالقاسم شير بحواجبه و طلع
أنا قعدت في المطبخ نرتب في الحاجات و نغير في مكان المواعين و الآلات اللي منظماتهن في التفريش كملت ركبت فوق للجناح بالقاسم في الدار ما خشيش عليه عديت لغرفة الملابس في صالة الجناح هي جنب الحمام الدار
لقيت دبشه معلق و لقيت كم بدلة عربية بس اخترت البيضاء لبسة كاجوال حددتهن أخرى حطيتهن و نزلت
ساعة 2 و نص رن الجرس طلع بالقاسم فتح رد بالغداء تغدينا و بالقاسم خذا السفرة و طلعها لهم ورد
أنا : حددت لك الدبش فوق
بالقاسم : بدلة الصباحية واتية هنا
أنا : وين الدار اللي فيها دبشك
بالقاسم يشير : في الدار هذه حطيت حاجات أمس عشان تاخذي راحتك فوق
أنا : أها تمام
بالقاسم : أنا موتي بدلة عليش تعبي في روحك
أنا زمطت ريقي : لا عادي مافيهش تعب
بالقاسم سكتت
انا : نركب دبشك فوق
بالقاسم : لا خليه توا نركبه انا
أنا ركبت رقدت و بالقاسم خش خذا دبشه ركب حطه و نزل
نضت ع العصر دوشت جففت شعري جتني نزهه عشان تلبستني العربي و معاها مزين طلع بالقاسم بدبشه من الحوش قعدن نزهه و المزين يجهزن فيا
.........
عميمه : وينك الساعة سبعة من امبدري نرجي فيك
نزهه : شوي و تجي كملتلها
عميمه : باهي الحمدلله شن كويسه البنت
نزهه : من حركتها حسيتها تمام
عميمه فرحت تزغرت
نزهه : الحمدلله
رندا جت تجري : نزززهه الفرقة جت و محمد حصل زهور في التليفون هزبها
نزهه : توا بعدين نصرف مش وقته الكلام هذا تعالي نشوفوا العشاء الضيوف بدوا يوصلوا هل رحمه في الطريق
........
اسماعيل : نازل لاصحابك بتوته معقولة
بالقاسم من الحمام : عادي شنو فيها
اسماعيل : وين المدام ههههههه
بالقاسم سكت قعد يفكر : شن تبي تلبسني ع مزاجها هيا
محمد : اوووي بلقا هي طولت راه
بالقاسم طفي دوش قعد يمسح لبس و طلع
محمد : ها تمام
بالقاسم : جيبلي الكاط والساعة بس
محمد جابهن عطي ساعة لابسه الكاط
بالقاسم يلبس في الساعة و ساكت
محمد : تمام
بالقاسم : البلغة وين
اسماعيل : فم الباب تعال
بالقاسم يبخ في عطر خذا تليفوناته و دخانه : هي
طلعوا مع بعضهم
نزهه شافته طالع من جناح محمد جاته تجري ابتسمت : بالقاسم
برموا كلهم
نزهه تزغرت : نجك ليا عيني عليك بارده
بالقاسم مد يده سلم
نزهه : الف مبروك ربي يهنيك
بالقاسم : إن شاء الله
اسماعيل : نحن نطلعوا من باب حوشك الحقنا باهي
نزهه : بالقاسم كلمنا مصوراتية جت
بالقاسم : باهي هي
عدوا جيهت الحوش فتح بالقاسم بالمفتاح خشوا و نزهه ركبتلي
أنا نزلت من الدار معايا المصوراتية تساعد فيا و نزهه جاء مصادرني بالقاسم لابس البدلة العربية و كاط كحلي عيونه في التليفون كان شكله خيالي بكل طول في عرض شعره مرفعه فوق لحيته مرسومه كانت لا خفيفة و لا ثقيلة وسط عطره قالب الصالة
بالقاسم قعدت نرجي فيهم سمعت صوت طقطقه كعب ما بيتش نرفع راسي بكل و الصوت كل ما له كل ما يقدم مني رفعت وجهي لقيتها مقابلتني لابسه عربي شكلها حلو بس ما بيتش ندقق جت المصوراتية اللي أمس قربتنا من بعضنا قعدت تصور فينا كم لقطه
نزهه تلبس فيا في الكاب : هي عشان تجيبها لنا هللها جو
بالقاسم مسكني : باهي
نزهه في يدها فستان و كعب : خذيت الفستان عشان بعدين بالقاسم طلعها من بابكم اللي ع الشارع بعدها جيبها لنا من بابنا سلام
المصوراتية طلعت وراها نزهه
أنا متغطية قلبي يبي يوقف مسكني قعد يمشي فيا نسمع في صوت البيبان وهرجه قمعزني في السيارة ...
بالقاسم ،،، حسيتها مازالت مرتبكة برمت بيها في الشارع برمه كاملة درست قدام الحوش نزلتها سمعت زغاريت قابلتني نزهه و أمي خشينا ع المربوعه
أنا،،، نزهه حولتلي الكاب بحتت لقيت الكل يسلم ع بالقاسم الصبايا و البنات و بالقاسم يسلم عليهم بعدها طلع قعدت نركز في البنات الشبابات كيف كان لابسهن و سلمن عادي ، و عميمه و البنات فرحانات بيا بكل
نزهه مبتسمه : هي بيش تطلعي للخيمه هلك وصلوا
أنا هزيت راسي طلعنا كلنا انقلبت الخيمه زغاريت و غناء بحتت لقيت فتحية و جداتي الأثنين و خالاتي و صبايا خوالي و عماتي و صبايا عمامي و صبايا خوتي الأربعة و أم نيروز بس سلمت عليهن و قمعزت ع الكنبة
نجوي جتني حطت جنبي أكياس الهدايا سلمت عليا : كيف حالك
أنا : الحمدلله كويسه
نجوي : جبتلك هدايا لعربك اللي تسلمي عليها عطيها هديتها الشباب نفس لون الكيس و البنات نفس كيس و عمك البدلة العربية و عمتك و صبايا خوت بالقاسم ذهب و عمتي عفاف حتي هيا جبنالها كبرنا بيها و جابت عمته اللي من طرابلس حتي هيا ذهب أما هدية بالقاسم تلقيها في الكيس الكبير
أنا : تمام فهمت
نجوي : شن طمنيني تهنيتي
أنا هزيت راسي : الحمدلله
نجوي ابتسمت : ألف مبروك
أنا : يبارك فيك
نجوي : يسلمن عليك البنات كلهن
أنا : الله يسلمك كنهن ما جن
نجوي : إنت عارفة في الأسبوع البنات مايجنش
أنا من كثر ما وداد مش دايره فيا خير ما اذكرتهش و لا دورتها
نجوي : كيف حاله بالقاسم كويس معاك
أنا تنهدت : الحمدلله كويس
نجوي ضغطت ع يدي صبت : ربي يهنيك
أنا : إن شاء الله
نجوي ردت مكانها و أنا قعدت مقمعزة و ساكته قعدوا يعشوا
نزهه مبتسمة : عروسنا السموحه هي بيش تحولي العربي و تلبسي الفستان
أنا ابتسمت صبيت و نزهه تساعد فيا
خشينا لجناح فيه حمام و دار نوم في الممر اللي بين صالون الرجال و المطبخ
نزهه تساعد فيا تحول في الذهب : الفستان حطيته لك هنا
أنا : شكرا تعبتك معايا
نزهه : نجك لنا إنت تعبك راحة ياخيا
أنا ابتسمت
نزهه : نطلع كملي وبعدها كلميني " شيرت ع باب في ممر" هذا الحمام
أنا : تمام
نزهه طلعت أنا قعدت نغير نتفرج ع الدار كانت منظمة قمعزت ع السرير لين خشت نزهه طلعت معاها قمعزت في الخيمه اخرى و البنات يرقصن و يغنن مع الفرقة شوي و هلي صبوا عشان يروحوا جو سلموا عليا و أنا ماسكه دمعتي بالسيف
نجوي وصتني نعطي الهدايا كلمت نزهه عشان تكلمهن ليا
عميمه و عمتي عفاف و عمة بالقاسم اللي جايا من طرابلس و نزهه ورندا و زهور و صبايا خوت بالقاسم خواتم ذهب كلهن كل وحده فيهن ردتلي كيس هدية بس ما فتحتش
عطيت كل وحده من صبايا خوته كيس فيه ساعة ماركة و عطر لزوجها و خوهم الصغير محمد عطيت هديته لنزهه و عميمه عطيتها هدية عمي بدلة عربية بالكاط و البغلة و العطر
شوي شوي خيمه قعد تخف و الناس تروح بعدها خشينا للحوش قعدن بنات يتحوسن خش بالقاسم
نزهه : قالك بالقا هي
أنا صبيت قعدت ناخذ في حاجتي
نزهه : كنك يا بتي هو اللي يشلهن
خذتهن قعدت اطلعله خذا البدلة العربية بالذهب و أكياس الهدايا رندا جبتلي عبايتها لبستها و لحقته حط الحاجات ع الوطي فتح الحوش و خشينا
تفصيلة الحوش إن حوشي و حوش عربي في نفس السور بس كل حد عنده باب ع الشارع و باب المطبخ امتاعي يفتح ع جنان الخلفي المشترك
خشينا أنا كنت تعبانه بكل ما تعنيه الكلمة و نعسانه خشيت سلحت كعب و لبست شبشبي و ركبت و هو معايا سلحت العباية فطنتله كسر عينه فيا شافني بالفستان خذيت روبي خشيت دوشت و طلعت لقيته مدوش و لابس جففت شعري
أنا : انديرلك حاجة تأكلها
بالقاسم : لا تعبيش روحك شوي و يجيب محمد هي ننزلوا
نزلنا سمعنا الباب يدق فتح بالقاسم و خش بالسفرة فيها رز بالخلطة و ثلاثة أنواع مالح و سلطة حط السفرة ع طاولة الاكل
بالقاسم : تعالي تعشي
أنا جيت قمعزت تعشينا كملنا بالقاسم وخر و أنا قعدت نلم في السفرة و نغسل كملت ركبت شوي و لحقني
أنا قلبي قعد يدق
بالقاسم يحك في رأسه : احم تريحي اليوم أكيد تعبانه
أنا صبيت ما صدقت من الفرحة خذيت بيجامه و خشيت للحمام غيرت و طلعت حسيت به يبحت فيا رقدت ع طرف سرير وعيونه عليا
بالقاسم سهر شوي و رقد
أنا نضت ع الفجر صبيت توضيت و صليت و قعزت نقرأ في قرآن
بالقاسم ناض ما لقنيش جنبه طلع يدور فيا لقاني في دار جنب جناحنا : صباح الخير
أنا : صدق الله العظيم " بحتت فيه " صباح النور
بالقاسم طلع توضي و خش صلى الفجر و رد للدار رقد
أنا صبيت لحقته لقيته راقد رقدت نضت مع الثمانية قعدت نوتي في فطور ما في حاجة مادرتها كانت سفرة ملوك المنظر بس كان خيال ساعة 9 او عشرة بالقاسم ناض غسل و نزل شاف الفطور
بالقاسم : هذه نوضت باتي ناخذوا الفطور نطلعوا نفطروا معاه
أنا ابتسمت : حاضر نغير دبشي بس
بالقاسم قمعز : اهو نرجي فيك
أنا ركبت لبست بنطلون أمريكي عليه بلوزة لعند ركبه و شخشير لحمي و وشاح نزلت عديت لعند مدخل لبست كندرة و رديت للمطبخ فتح بالقاسم الباب مطبخ اللي يفتح ع الجنان قعد يطلع في الفطور وأنا نمدله طلعت لقيت عمي مقمعز
صالح صبي حضني : مرحبتين مرحبتين نورتي حوشك نورتينا
أنا تحشمت بكل و فرحت حسيت معاهم جو عايلة اللي كنت فاقدته : الله يسلمك يا عمي منور بهله
صالح وخر : ليش متعبه روحك بنيتي
أنا : تعبك راحه صحتين
صالح يشير ع بالقاسم : إن شاء الله هذا منوضك قالك ديري
بالقاسم بحت في باته مندهش
أنا ابتسمت : لا و الله أنا نضت بدري
صالح : سلم بنتي قمعزوا هي
قمعزنا طلعت عميمه
عميمه : صباح الخير عليكم
نحن : صباح النور
أنا : تفضلي عميمه
عميمه قمعزت : إنت دايرة الفطور
أنا : أها
عميمه : معقوله متعبه روحك حتي الكيكة و الفطير دايرتهن في الحوش
أنا : تعبكم راحه
قعدت نصب الحليب و القهوة نقدم في الخبزة فطروا و هدرزوا كلهم و أنا ساكته
عميمه : خلاص خشي لحوشك تريحي
أنا : حاضر
صبيت قعدت نلم و عميمه تساعد فيا خششتهن للمطبخ غسلتهن و بالقاسم خش ركب لدار و طلعت فتحت ع الغسالة غيرت ديكور الصالة و مسحت الحوش
.......
رندا : نكملوا حوسه المواعين الكبار قبل
نزهه : قسمن أرواحكن كم وحده تمسك مطبخ و لخرات كل أثنين يمسكن جناح و الفرش كله يشيله محمد للغسيل
زهور : باهي تمام
عميمه : غالية " عمتهن الي من طرابلس" درت غذاء هي ابدن
رندا : ماما نكلموا رحمه
عميمه و نزهه : لالا
زهور ضحكت
رندا : كنكن بسم الله
نزهه : قايلة خليها تريح
عميمه طلعت و بنات عمتهن خشن
خلود بنت عمتها : بناويت خيرها مرات اسماعيل
رندا : كنها شن دارت
بسمة : قصدي بالله عليهن طبيعيه اهيا
بنات ضحكن
خلود : تي متزرطه في حوايج بنات صغار احني نتحشموا نلبسوه
نزهه : هذه يا حنه غايرة مازلتن ماشفتن شي توا تبقي رأسها من رأس رحمه هذا وجهي كان ما درات طروح
خلود : عليك جو كناينكم ههههههه احني اللي عندنا تبقي دوبها دوب صغارها و راجلها مرات اسماعيل شاحطه خشمها لفوق
زهور : هذا كله عشان ماما قالت فطرتنا رحمه هي و بابا
بسمة : بس كناين ديداي مش كيفنا بذات الصغار كيف كناين خالي صالح هههههههه
زهور : بكل صغار هنا الي لفاعي يا حنه يلا خلنا نبدوا في الحوش بعدين نقرموا
بدن يحوسن و لاهيات طلعن الفرش
.......
بسمه تدق ع باب الشارع
محمد خش شافها ابتسم : يا مرحبا بعرب طرابلس
بسمه ضحكت مدت يدها تسلم
محمد مد يده : شن الجو
بسمه : الحمدلله كيف حالك أنت
محمد : تمام كيف حال عمتي اليوم ما شفتهش
بسمه : باهية الحمدلله
محمد : باهي الي كمل العرس بيش شفناك
بسمه ابتسمت : إي نبيك ترفع الفرش في سيارتك
محمد : هي شويا بس معايا جماعه برا
بسمه : تمام
و خشت و محمد طلع و خشش معاه شابين طلعوا الفرش
.........
أنا سمعت الباب انفتح و اسكر نزلت لقيته بالقاسم يحط في سفرة الغداء
بالقاسم : هي تعالي
أنا قمعزت
بالقاسم : الأسبوع جاي نشيلك زيارة للهلك
أنا فرحت : تمام باه
بالقاسم ياكل و ساكت كملنا صبيت غسلت مواعين و بالقاسم يتفرج أنا ركبت فوق شوي مع المغرب طلع و أنا صليت قعدت نتفرج ع الحوش اخري رجيت آذان العشاء صليت و رقدت شوي سمعت بحركة في الدار نضت لقيته بالقاسم يطلع في توته خش للحمام نضت نزلت لقيته جايب وجبه كباب للعشاء سخنتها و تينهن في تباسي و صبيت عصير
بالقاسم نزل قمعز طول حسيته ساكت ما يبيش يحكي معايا بكل مرة مرة يبحت فيا هو ياكل كمل صبي عدا للحمام الضيوف غسل و طلع قمعز في الصالة يتفرج و يدخن أنا حطيت شاهي ع النار و غسلت المواعين مسحتهن ورديتهن طلعت من الكيكة طلعت طاقم الشاهي درت سفرة بسيطة بس راقية طاسة فيها لوز و عرق نعناع براد قزاز شاهي معاه تبسي كيكه و طلعت بالسفرة حطيتها ع طاولة جنبه
بالقاسم : جاء في وقته
أنا ابتسمت : تبي حاجة أخرى
بالقاسم يصب في شاهي ما بحتش فيا : لا
أنا ركبت فوق غسلت و لبست روب توضيت و قريت قرآن قبل ما نرقد بعد نص ساعة ركب بالقاسم سكرت القرآن حولت الملاية الصلاة معش عرفت شن نحكي قلبي يدق و جسمي يرعش عديت للطرف السرير
بالقاسم : رحمه
أنا برمت بحتت فيه كان أول مرة ينطق اسمي : نعم
بالقاسم : بعد ترقدي معش تعطيني بالظهر
أنا نزلت راسي : حاضر
بالقاسم خش للحمام
أنا صبيت بدلت الامخاد عشان لازم نرقد ع جنبي اليمين
بالقاسم طلع رقد ع سرير
أنا رقدت معش قدرت نفتح عيوني حاسه أنه يبحت فيا
بالقاسم عيونه عليا لين نعس
........
ثالث يوم ليا معاه كان عادي وروتيني نفس اليوم الي قبله أنا ما تحركتش من الحوش مرة نبرم مرة نصلي مرة نتفرج رقدنا عادي....
رابع يوم ع 2 ونص الباب يدق
بالقاسم فتح خذا منها سفرة الغذاء : خير خشي
نزهه خشت : كيف حالكم
بالقاسم حط سفره : تمام الحوش مازال مليان
أنا نازلة كنت لابسه بجامه كم و لافه شعري طبعا لا مكياج لا شي : أهلين تفضلي قمعزي
سلمت عليها
نزهه : لا ورايا حوسه نبي نقولك بعدين في العشية بيش تجي عمتي غالية مازالت قاعدة و عمتي عفاف و شوي من الهل
أنا بحتت في بالقاسم
بالقاسم فطنلي شير براسه
أنا : إن شاء الله حاضر
نزهه مستغربة من شكلي : وتي روحك باهي
أنا فهمتها : إن شاء الله
نزهه : سلام
طلعت قمعزنا نتغذوا و نفكر في كلام بالقاسم حوش هلي مكياج لا فقررت نمشي بدون مكياج...
كملنا غسلت مواعين مسحتهن و خشيت دوشت و طولت في الحمام توضيت طلعت صليت كملت قمعزت ع مرايا نبحت في روحي شوي و صبيت جبت استشوار شعري ناعم لين بكل ما تعبنيش نص ساعة و كملته صبيت لغرفة الملابس طلعت بدلة رسمية بكعبها بحتت في ساعة لقيتها 4 لفيت شعري و نزلت لقيت بالقاسم ع لابتوب و يدخن خشيت درتله قهوة و حطيت بشكوط حطيتها جنبه
أنا : درتلك قهوة تبي حاجة
بالقاسم مابحتش فيا : لا
أنا وجعتني الحركة ركبت قمعزت رنيت ع نيروز
نيروز بفرحه: اهلين
أنا : أيو كيف حالك
نيروز : الحمدلله طمنيني عليك إنت كيف حالك وةكيف حال بالقاسم
أنا تنهدت : الحمدلله كويسين
نيروز : كنه صوتك فيك حاجة
أنا : لا لا ما فيا شي غير قلت نرن نسأل عليك بس رديتي للدرنه
نيروز : أها اسقدت يوم اسبوعك في الصبح ما قدرتش نجي تحشمت عمتي فتحية كلمت ماما بس
أنا : كان جيتي يا نوزي و الله ريفت عليك و علي خوتي
نيروز : هذه سنة الحياة ياحنه بعدين توا نتلاقوا واجد تخافيش لين تملي من وجهي
أنا ابتسمت : طمنيني شن جو صحتك إنت و الجنين
نيروز : قبل ما نسقد عديت للدكتورة سارة كشفت عليا قالتلي اطمني حملك كويس و الجنين كويس
أنا : باهي الحمدلله
نيروز : وين قاعده إنت
أنا : في داري شوي اخري نبي نمشي عيت عمي عندهم عرب
نيروز : وتيتي روحك
أنا : احم اها واتية
نيروز : باهي زيدي دققي البسي لبسه سمحة ديري بالك على روحك
أنا : إن شاء الله سلام
نيروز : سلام
سكرت قعدت نفتش في دبش نبرم كيف البنت الي رايحه شفت ساعة لقيتها خمسة و نص لبست البدلة الرسمية بخيت عطري لفيت شعري لفه سمحه لبست عباية والوشاح و كعب و نزلت
أنا : واتيه
بالقاسم : لحظه بس
أنا قعدت مصبيه بعد خمس دقائق
بالقاسم صبي بحت فيا : عطيني عشرة دقائق نغير دبشي عشان طالع
أنا قمعزت ع الكرسي : حاضر
بالقاسم ركب توضي و صلي و لبس دبشه بخ عطر و نزل طلعنا مع بعضنا حطني و طلع استقبلني عميمه والبنات خذتني زهور النفس الجناح اللي خشيتله أول مرة
زهور : كنك مش دايرة ميك اب
أنا انحرجت : حسيت إن مش لازم
زهور : كيف مش لازم إنت عروس خليك هنا توا نمكيجك
أنا خفت : لالا مانبيش
زهور طلعت : تي قمعزي و النبي عنجد لالا
جبت ميكاب امتاعها خشت مع بنات خالاتها قعدن يميكجن فيا شرطت يكون خفيف كمللي و طلعنا قمعزت مع الصبايا و البنات يحوسن
أميمه مرات اسماعيل تبحت فيا و تكشخ
رغد : و الله إلا خسارة فيها ولد عمتي قنين
خلود : خيرك عليها المراه قنينه
رغد : إني ما ريت فيها حاجة قنينه
خلود : اشبحي لشعرها قنين شكله طويل و ناعم و جسمها قنين بوكل عويناتها لونهن بني حواجبها قنينات الحق غير دققي فيها
رغد : ماهياش بيضا احني بيض خيره ما شبحلنا و لا نعجبوش الباشا
خلود : خيرها هيا حنطية لون بشرتها و الله إلا قنينه طشه تحسي فيها لمحه من الهنود
رغد : بلا منه الكلام الفاضي لا هنود و لا باكستان بالله درقي وجك
خلود : تي أني جايا نبي نقولك تعالي حوسي معانا خليتيني نحكي ع المراه يا قردة نوضي داهيا إن شاء الله نوضي
........
قعدت معاهم عند الليل و البنات ماخلنيش اندير شي قمعزت و أنا ساكته لعند جاء بالقاسم قالولي يتعشي برا شوي و قالي هي روحت أنا وياه ...
بالقاسم طلع من الحمام ينشف في رأسه و طرح الصلاية
أنا مش قادرة حتي نقوله صحة و إلا نعيما ساكتة مقمعزة ع السرير قعد يصلي فرصتي نبحت فيه هايمه فيه كمل صلاته نزلت عيوني طول حسيت بيه حايس و مرتبك في الدار طالع خاش أنا ارتبكت معاه ف ما تكلمتش خش للسرير و أنا رقدت ع ظهري و تغطيت غمضت عيوني حسيت بيه يتقلب في السرير معش ثبت و نفسه عالي نسمع فيه زمطت ريقي و قلبي قعد يدق
بالقاسم مسك يدي اللي كنت حطتها ع بطني و يده ع وسطي وخذاني لجيهته قربني لين لصقني فيه حط وجه في رقبتي و لف جسمه عليا : نبيك
أنا حسيت بخوف و نفسي ارتفع لا حكيت و لا تحركت
بالقاسم نزل عليا و رحنا في خبر كان ....
..........
عميمه : توصلوا طيبين إن شاء الله
غالية : الله يسلمك إن شاء الله ديما عامر و ديما أفراح
سالمين مرات ناصر ماسكه طاسة امية : توصلوا بخير يارب
خلود و بسمه و رغد مصبيات جنب زهور و رندا و نزهه يودعن في بعضهن
خلود : زورونا عاد
زهور : إن شاء الله نجوكم في الفرح و الهناء
رغد : تعالوا حتي بدون فرح شن ما تجوناش إلا في المناسبات
رندا عين مغمضه و عين مفتوحه
نزهه : إن شاء الله قريب
طلعوا البنات ردن رقدن
ركبوا في سيارة مع ناصر عمته و البنات و محمد ركبوا معاه الشباب الثلاثة واحد منهم صاحب بالقاسم رأس و يشتغل معاه وصلوهم للمطار وردوا ....
......
أنا نضت خشيت للحمام توضيت للصلاة صليت بديت في الفطور بعد ساعة نزل بالقاسم فطر ركب لبس و نزل
أنا قعدت نبحت في لبسته وشعره كان شكله أنيق : اندير الغذاء
بالقاسم يلبس في كندرة : لا ماتعبيش روحك توا نجيب جاهز تريحي
أنا : حاضر
بالقاسم بحت فيا : تبي حاجة من برا
أنا : لا سلامتك
بالقاسم طلع وسكر الباب
أنا قعدت نحوس و نظم في الحوش نظيف ماخذش مني وقت كديت الحمامات غسلت جلدي طلعت لبست روب عادي و قمعزت نتفرج لعند الساعة ثلاثة روح تغذينا ركب بالقاسم رقد و أنا لميت الحوسه صليت و ركبت رقدت ناض بالقاسم مع الساعة ستة شرب قهوة و طلع كمل اليوم بروحي رد ساعة 11 جايب معاه زبدة و لبن حطهن في التلاجة و ركب لقاني راقده غير دبشه و رقد
ثاني يوم نضت بدري بكل درت ندير في الفطور درت بان كيك كنت حايسة في المطبخ بس بالنظام و منسجمه و تنسيقي كان عاجبني
بالقاسم نزل : صباح الخير
أنا برمت : صباح النور
بالقاسم : أمس جبت لبن و زبدة من واحد صاحبي كان تعرفي اديري عصيدة باتي غالية عليه أكيد واعي
أنا : حاضر نعرف انديرها
بالقاسم : تمام أنا برا
فتح باب المطبخ و طلع سكره كملت البان الكيك و دارت عصيدة وتيت بدال سفرة أثنين عشان نتحشم ناكل أنا و عمي نفس الصونية مش نفس فطور تباسي كنت ناكل من الي في جنبي درت صونيتين و حطيت عسل و رب في سفرتين
صحن بان كيك في كل سفرة و براد الشاهي و بكرج قهوة لبن طواسي للبن كنت واثقة من شكل و الطعم
لبست ملاية الصلاة فتحت باب المطبخ طلعت راسي كان مقابلني شيرتله جاني طول
بالقاسم خش مندهش من شكل السفر : توا نطلع أنا اركبي البسي حاجة طويلة
أنا : حاضر
ركبت لبست بسرعة و نزلت لقيته يرجي فيا و مطلع الفطور طلعت أنا وياه لقيته مقرب طاولتين جنب بعضهن حاط السفر لقيت عميمه و عمو يرجوا فينا صبحت عليهم قمعزنا
بالقاسم تلفونه رن صبي : افطر يا باتي نشوف تلفون بس
و وخر من جنبنا و أنا عيوني فيه
بدوا يفطروا عمي يسأل فيا ع خوتي يطمن
محمد طلع : كيف الفطور اليوم بوادي و حضور
أنا : هو أنا درت البان كيك و بالقاسم قاللي ديري عصيدة غالية على عمي درتها
محمد : اوووه قوية هذه
عميمه و عمي ضحكوا
عميمه : ماتعدليش عليه هذا
مع جيته بالقاسم
محمد غمزله : عطيني الطريقة اللي خليتها تغير فطورها من كلمة يا وحش
نحن قعدنا نضحكوا و أنا ضحكت بالصوت
بالقاسم طبس و فنص بالجنب في محمد بعدها برم طول بحت فيا خفت سكتت
بالقاسم : صبح قمعز افطر و أنت ساكت
محمد قمعز عشان يفطر : شهدتك من دينك و الشهادة واعرة كيف سمعت كلامك
أنا ساكته و عيوني في صونيه
عمي : يا راجل اسكت المرأه أول مرة تشوفك توا تقول عليك الهبل
محمد برم عليا : اووي رحمه ما تصدقيهمش كان قالوا عليا عاقل
أنا بحتت فيه ابتسمت هزيت راسي
محمد : بالمناسبة عطينا رأيك في خونا العاقل
و شير على بالقاسم
بالقاسم بحت فيا
عميمه : بالك تفطر و تطلع لعملك و أنت ساكت
محمد : تي آخرك شهر موضوع الحشم هذا مايطولش معانا
أنا ابتسمت
محمد برم ع بالقاسم لقاه ياكل : بست
بالقاسم بحت فيه
محمد غمزله بصوت واطي : لنقانك مسيطر و راس الشايب و العزوز بعد نجوز تعطيني طريقة
بالقاسم ضحك بشويش
أنا بحتت فيه لقيته يضحك تريحت كان أول مرة نشوفه يضحك
عمي : سلم ايديك بنيتي
أنا فطنت : صحه يا عمي بالعافية إن شاء الله
عمي صبي : الله يعافيك
محمد بدأ ياكل يحكي بشويش : دكتورة و طعامها سمح لا هذه وين ميزاتها كثرن يا بالقا تحس روحك واخذ مفخرة مصفحه
بالقاسم فنص فيه : محمد بلاش منه التشفيط هذا
محمد يضحك غير مكانه : عادي نشفط هكي
عميمه ضحكت : سيب خيك يتهني في فطرته
محمد : و الله ماجيت شوره
بالقاسم صبي غسل و رد
محمد يوشوش لبالقاسم
بالقاسم عيونه في التليفون
و يضحكوا قعدت نبحت في بالقاسم هو يضحك طلعن البنات فطرن و محمد يشفط و نحن نضحكوا
بالقاسم و محمد طلعوا لأشغالهم و عمي طلع برا أنا قعدت نحوس معاهن و نظم و اليوم كله قعدته معاهن درنا الغذاء مع بعضنا و العشية جتنا أميمه و عيت خالة بالقاسم و بناتهن
أنا مابيتش نقمعز قعدت نحوس مع زهور و رندا
ساجده : شن جوك مع ولد اخويله
أنا : الحمدلله
ساجده : شنو مش دايرلك جو شين
أنا : لالا
ريحان : ليش جو الشين هو أصلا بعد شرط قال مايهمنيش الجمال
أنا وجعتني الكلمة تقول ضربتني كف
ريحان ضحكت باستفزاز : مش قصدي عليك طبعا
أنا ساكته
زهور خشت في يدها صابون كانت في المخزن : حي غريبة في مطبخ
ساجده : كنا نشربوا في اميه
أنا خذيت الصابون بديت نغسل
زهور تبحت فيا : اها شربتن و لا نعطيكن
ريحان : لا شربنا عطتنا كتنكم الجديدة
زهور تبحت فيا كيف نغسل وسكتت
أنا نغسل مش فاطنة في وحده من الطواسي مشقوقه شوي كانت ملبزة شوكولاطة نغسل بالقوة انكسرت في كف يدي عزقتها طول : اممممممممم
زهور خافت جتني : حي عليا كنك
أنا نبحت في دمي دموعي ينزلن : ساهلة ساهلة
ريحان بتقزز : حاولي تكفي دم راسي يدوخ انا
طلعت
زهور جبتلي لفة المناديل تقطع و تحط على يدي
و أنا نضغط بس دم مابش يكف
زهور : يا ماماااااا يا رندااااا
أنا : اسكتي ما تفجعيهمش ساهلة
زهور : حي عليا آسفة و الله ياريتني ماخليتك تغسلي سامحيني
أنا نمسح بكتفي دموعي حستها غبشت قدامي : لا عادي غير اهدي بس عطيني قهوة
عميمه و رندا و أميمه و خالتهم و باقي بناتها خشن
زهور : ماما
عميمه جتني : حي عليا كنها المراه
أنا : ساهلة ياعميمه والله
عميمه تضغط على يدي : رني ع بالقاسم بسرعة
زهور طلعت و أنا دموعي ماكفنش : شكله كيف درس قدام الحوش
عميمه طلعتني ماسكه ايديا للصالة و قمعزتني ع الكنبه قمعزت جنبي زهور و رايا بحفاظه القهوة تحط ع يدي
زهور : سامحيني يارحمه
عميمه : الله يرزيني فيكن يا بنياتي المراة عروس خاشه المطبخ ليش
أنا مسحت دموعي : لا ياعميمه ما تدعيش أنا نبي نساعدها
بالقاسم خش : أمي زهور
رندا طلعته
بالقاسم : من اللي فتحت يدها مافهمت شي وين أمي كويسه
رندا : كويسه ماما بس
بالقاسم طول قص عليها : زهور كويسه
رندا : بالقاسم رحمه الي فتحت يدها
بالقاسم قرن حواجبه : وينها طلعيها ليا
عميمه مسكتني من ايديا اللي أنا ضغطتهن على بعضهن : امسك نلبس جلبابي و نجيك بيش نسعفوها
بالقاسم بحت في عيوني و بعدها ايديها : لا خليك رندا جيبي عباية بسرعه
رندا عدت تجري جابتلي عباية جتني لبستها ليا بشويش
خالته : ربي يطمنكم عليها يا اوليدي
بالقاسم : إن شاء الله خير " بحت فيا " هيا
طلع و أنا وراءه ركبت السيارة طول طريق ساكتين لا قالي من شن و لا كيف انفتحت يدك وصلنا نزل و نزلني خشينا للعيادة دفع طول للطواري خشيت ع الدكتورة قعدت نشرحلها قلتلها خياطة 8 بونتو نظفت الجرح و خيطت عرفتني دكتورة شوي و طلعت لقيته بالقاسم
........
#يتبع...
#Fafy fa