نصفي العقيم ( مكتمله )

بارت (٢٣)

مشيت في طريق معتم ومغبر ومليئ بالنفايات ..
رايت هناك اناساً !
يضعون أقنعة مبتسمة ولكنني خفت ..
بل ارتعبت من تلك العيون الحمراء الدامية ، التي كانت تختبئ خلف تلك الاقنعه
گئنها عيون وحوش مفترسة مررت من جانبها ويا ليتني لم أمر نهش ثيابي وبعض من لحمي ،
صرخت في أعلا صوت تملكه حنجرتي سااعدووني ...
خرجت من هذا الشارع البائس التقط اخر انفاسي وابحث عن قطرات المياه لتبل حنجرتي الجريحه ، فوجدتني صحراء.....
رباه ربما خلقتني من أجل العذاب ؟
_______________________

روايـة "نصفي العقيم"

- الجزء الثاني

البارت والثالث و العشـ٢٣ـرون..

للكاتبه : يُمنا نـآصر
_______________________
متحملت انتظر للـ ٨ وكلت هسه انشرلكم ياها 😍
قراءه ممتعه ..

يگولون من شي على شيء شاب عليه .. واني من شبيت جان ضهري مكان تنغرز بيه  السجاجين ، شبيت على التهايم والغدر والطعن والبهتان ..

اليوم نطبقت عليه مقولة "تجيك التهايم وانت نايم"

احس نياط قلبي تقطعت من الفزع والخرعه الي صحيت بيها على صوت عمتي الي يدوي بالبيت ، ومابين نومتي وضنوني  انو هالشي ممكن يكون حلم ، ادركت بصحوتي انو هو واقع !

وانو الي صار اليوم هو ندبه مثل ندب الحروب الكثيره الي تمركزت على اراضي جسد بغداد ..!

وذكرى سيئه راح تتسجل مثل باقي الذكريات الي كلما ذاكرتي تهدُج عليها تزيد لوعتي واني اذكر بكل مره شصار ويايه بالماضي ..

جنت نايمه مثل كل مره الصبح والدنيا شتاء وبارده كلش
.. ماحسيت غير على شعري وهو ينجر

.. فتحت عيوني مرعوبه
وماحس غير راشديات ماعرف من وين اتلكاها .. وخرت نفسي الهزيله بالكوه وكمت اريد اشوف شكو ..

صحت بصوت مرعوب "شكووو شكووو عمه  شبييج شصاير  ..

حجت بغيض وغضب وحقد مدفون بكلبها اجه وكته انو يطلع ..

نجود : ولچ عااااااار حيوانه .. والله عرفتج مثل امج عرفتج كحـ... هاي تاليتج تبوگيني تمدين ايدج يابنت الفگر .. طلعيها لا هسه اذبحج طلعيها تحجي وتصرخ وملامح الشر ماخذه الحصه الاكبر من وجها ..

"باوعتلها باندهاش والنوم بعده بعيوني ، شنو هو الي بگته وين ماده ايدي اني ،شكو شصاير

"ماتريد تطلعيها مووو بعيني انتِ الجنيتي على روحج يا بواكه ياعار ..

"اجت عليه مثل الغوله عبالك شيطان رجيم متلبسها .. اجت جرت شعري بقوه الا صرخت من قوته

.. على صرختي فز محمد من النوم وكام يبجي ، ردت اروح عليه ورجعت جرتني ونزلتني من الدرج سحل لازمه شعري بايدها احسه تكطع .. تسحل بيه وتجر عبالك بهيمه مو انسان ..

ابچي واترجى بيها اريد بس اروح لمحمد صوته موتني واني اسمعه شلون يبچي ويناغي حسيته راح يموت من البچي والطفل كلبه حيوكف وهو يشوف امه المظلومه شون تتعذب

وصلتني ع الباب الحوش دفعتني ع الشارع وسدت الباب بوجهي بقوه  .. بقيت واكفه واباوع للباب بصدمه وذهول وبس الدمع يجري على خدي مثل سواجي الجمر تلهب ، شنو الصار ونقلب حالها هيج شسوييت اني و شنو الشي البايگته الدتحجي عنه ..

.. شفت نفسي صفيت بالشارع واني اباوع ع البيت باسى، نتبهت على روحي حتى نعال مالابسه طلعتني بالتراك وحالتي يُرثى لها حتى شعري مفلول ، الناس كلها طلعت على صوتنه ، وتحولت انظارهم عليه بتساؤل وشفقه ..

عزت عليه روحي حيل وحسيت نداس عليه ونذليت لدرجه وصلت بيها قاع الارض ، رحت اركض والدموع تنهمر على وجناتي .. بقيت ادك بالباب واحجي وياها اريدها تفتحه ..

"عمه الله يخليج فتحي الباب  شهكت بصوت مسموع وكملت كلامي ، الله يوفقج والله صرت فرجه للناس كلها الله يخليج فتحي الباب ونتفاهم جوه  اعتبريني وحده من بناتج فدوه اروحلج افتحي الباب خل اطب شوفي الناس كلها تباوع عليه ..

ردت بغيض" زمحت بيه بصوت عالي ، دنجبي لج تقارنين بناتي بيج ولج بطني لو حملت وحده مثلج اني اموت روحي ، طبه ماكو للبيت وقسم بالله لو تموتين مافتحه الا تطلعين الكلاده ياحراميه ولج مو زين من عدنه اخذناج چنه لبيتنه موو زين رضينه بيج وانتِ امج داعشيه وفوكاها نهبت واحد ونهزمت وياه ..

"شهكت وحجيت بصوت خافت واحس الناس اكلوني بنضراتهم ،والله العظيم وداعت ابني وداعت ابني ماعرف شي عن الدتحجي ولا بگت كلاده ولا غيرها ..

" حجت بعالي  صوتها كانه دتريد تفضحتي بالزايد وتوصل الكلام  لكل ارجاء الناس الواكفه ، لج حيوانه بنت الداعشيه القذره لتحلفين براس حفيدي لا اجي هسه اموتج

ولج كلاده بخمس ملايين تاخذيها وتحلفين جذب ، الله وينه مايشيلج ولو هي العارات متموت ميصير عليها شي .. واذا تكولين وين الكلاده والله اخليج تعفنين وما اطببج وابنج تحلمين تشوفيه ..

"ضرب الباب بقوه واني احجي باندفاع  وادافع عن نفسي وكانه اريد اثبت للناس الواگفه انو اني مو حراميه وعبالك اريد افهمهم انو اني مالي علاقه ولتخاذون عني نظره مو زينه الزمن لعب بيه وباك مني هواي شغلات مو اني البگت  ...

حجيت بشراسه وادفاع مستميت ونبرة صوتي لوحدها كفيله انو تبرئني من هالتهمه الباطله ..

داااااااااااكلج ماااعرف وينها والله وحق رب السبع سماوات ماااا اعرف وينهاااااااا ولا اخذت شي وحق الحق الماعرفتوه وماراعيتو الله بيه ولا حق القرآن بيه اني ماااا ماخذه شييييييي ماماده ايدي والقران
رفعت ايدي وهبطت ع الباب بقوه واني ابچي ، كتلها

انشالله اذا ماخذه شي اني هالايد تنگطع جوه رجليج ، انييي ماماخذه
وحق الحسين المات مظلوم وعطشان والله ماسويت شي .. فتحيي الباااب اريد ابنييي فتحيييي

"وكفت ثواني واني ابچي واشهك بهستيريه  ، صوت الشهكات تدوي بداخل صدري وتغللغت باعماق قلبي
رجعت سمعت صوت ابني يبچي جوه وكانه من نغمات صوته الحزينه ديكولي اريدج !

حسيت روحي شاغت واني اريده بس اخلي يشم ريحتي ريحة الام الي طمنه وتخليه يهدى ويحس بالمان من كلشي يرعب بهالدنيا

.. الريحه الي نحرمت منها وبس اريد استنشق هالعطر هذا والله لو ريحة الام تنباع جان اشتريتها ولو كلفتني عمري كله  اشتريها بعمري بس المهم احس بيها يمي ..

تربتعت ع الصبه البارده واني روحي تشتهل من الضيم ، كله منج يايمه كله منج  ااااه شسويتي بيه اااااه
ليش ييمه ليييش مو اني بنت بطنج مو اني ضناج قطعه من گلبج ييمه وينج عنيي وينج ..

اوووف كل الناس من تتاذى تصيح ااااخ يمه الا اني اصيح وينج يمه .. مو يگولون الجنه تحت اقدام الامهات ، انتِ ياجنه التصير تحت اقدامج ياااجنه !

حطيت ايدي على صدري واني احاول اهدىء من ضربات قلبي بقيت كاعده بالشارع وعيون الناس تنهش بيه

تذكرت بوقت ولادتي بمحمد من كنت تحت تأثير البنج وطلعت من الغرفه الي ولدت بيها .. ومابين الواقع والهذيان شفت بنيه جانت داخله ويايه بس البنيه كلبها ضعيف ومريضه وللاسف كدر الموت يمتلكها وراحت من الدنيا وتركت وراها طفل مثل ما تركتني امي ، تنهدت بضيق واني استرجع هالحادثه الطرت على بالي غفله ..
حجيت بداخلي بصوت هزيل ، ياربي يعني ملك الموت جان يفتر يمي ومااخذ روحي .. اااخ حتى ملك الموت عافني مايريدني ..

قطع عليه نوبة البكاء صوت الرجال جيرانه جابلي كرسي ونطاني نعال ( اجلكم الله ) ..

ابتسمت اله والدموع ماتخلي ابتسامه تكتمل على وجهي اذا مايزينها الحزن هو طبطب على كتفي وكانه ديطمني انو الدنيا بعدها بخير ..

باوعت لايده الي مليانه خطوط واضحه عليها تجاعيد الكبر وكل خط يحجي حكمه وحكايه رواها الزمن واخذت حيفها الايام ..

مشى عني واني تمنيت هالايد تكون ايد ابويه يجي يوگف بظهري مثل السيف ومايخلي احد يدوس عليه مثل ماهواي ناس مشو عليه ووداسو على كلبي بدون رئفه ولا رحمه ..

ومن الصار حتى مافكرت اخذ تلفون احد واتصل على اهلي يجون ياخذوني او اطلب تكسي ايديه ورجليه تربطت وحتى لو ويايه موبايلي ماراح اتصل ولا اروح المكان ابني مابيه ..

مرات ٣ ساعات واني على هالحال البرد ينهش باعظامي نهش بس روحي حاااره من الحرك البيها احسها مشتهله وتلهب نيران حارقه ..

كل شويه اسمع صوت ابني يبچي بداخل البيت واني اموت الف موته من اسمعه ، كمت ادك الباب وصوتي خافت كوه يطلع نهد حيلي هد
اتوسل بس احد يجي يفتح الباب .. حسيت بخطوات بطيئه اقتربت من باب البيت .. همست بصوت خافت..

الاء: بغداااد دسمعيني اني الاء

"كمت بسرعه واني احس اجه الفرج كتلها بلهفه وصوت واهن ، الاااء عفيه افتحي الباب فدوه بس خلي اشوف محمد كلبي مثل النار عليه الله يخليج عفيه فتحييي البااب ..

"ماگدر والله ماگدر اذا طببج امي تموتني بالكوه هسه شفتها طبت نامت وجبت محمد كلت بالكت تحجين وياه من يسمع صوتج يسكت ..

"خليت ايدي على حلكي وهمست بعذاب ، حموودي يرووحي حبيبي يا امي انتَ دتسمعني ، لفظت كلماتي الاخيره وهو نفجر بالبچي من سمع صوتي يصيح إما يعني عود ماما توه متعلمها و يناغي بكلمات ما افهمها بس عبالك ديشكي من شي وصوته مقهوور حيل  ..

بجيت بقوه واني اكله سوده بوجهي حبيبي وليدي  يروحي اصبر شويه يبعد الماما وروحها هسه اجيك يروحي انت .. حجت الاء بصوت ناصي كالت بغداد راح انومه وانتِ غنيله بالكت يغفى على صوتج ..

مسحت دموعي وكتلها ايي ايي يلا خلي ينام خطيه يرتاح ، بس الاء فدوه انتِ ملبسته زين اخاف يروح يبرد ..

"لا لتخافين لبسته قمصله وتك ثاني جواريب ولابس كلاو ، طالع چنه دجاجه محشيه ..

"ابتسمت بانذباح على كلامها وبلشت الوليله بصوت تختبئ بين ثناياه الكثير من لشجى والشقاء  ..

يلا تنام .. يلام تنام

واذبحلك طير الحمام

روح يا حمام لطول

رفرف ع الغالي تا ينام

وياحمام المدينه

سلم على نبينا

بالجنه نشوفو يارب

يصلي ويباري بينه ..

"بقيت اعيد والولي بصوت عذب ويمتلكه الحزن ، الا ان نام وغفى

سمعت تنهيده بتعب وبعدها اجه صوت الاء وهي  تكول سوده بوجهي  الدموع بعدها بعينه معلكه .. بعدها جرت نفس وكالت لازم اطب لا تجي امي طيح حظي

"شكرتها لان جابتلي محمد وكتلها طبي لا يبرد وعفيه عينج عليه ،طبت وبقيت اني كاعده على حالي عبالك مجديه ..

وبس اريد احد يجي ماكو هشام ملتحق ومينزل بعد كم يوم يلا
وعمي طالع لمحله مايرجع للمغرب ومؤيد ماعرف وين رايح ..

يارب دخيلك انت ماترضى بالظلم واني نظلمترونذليت هواي وانتقص من شئني دخيلك ارفع كرامتي ومرجع مقداري ياكريم ..

دنكت راسي ونزلت عيوني الي كأنها غيمه مجوفه بماء غزير ماينتهي من الهطول وبدل مايروي زهرات عمري كل يوم يموتهن وحده بعد الثانيه ، غمضتهم ماريد اشوف نظات الناس وتساؤلاتهم هاي ليش كاعده هنا ، وكل ظني اذا غمضت عيني ومشفتهم راح اختبئ من انظارهم و هما هم ماراح يشوفوني

كل ثانيه وكل دقيقه اكعد بيها بالشارع اكره بيها امي اكثر واكره كل عائلتي الي هما بس بالاسم عائله .. للمغرب الله رحمني واجه عمي بالسياره .. نزل منها وهو متفاجئ من منظري باوعلي باستغراب وكال ..

"عمو بغداد شعندج هنا ليش كاعده بالشارع..

"نفجرت بالجي وكتله مو بكيفي كاعده هنا عمه نجود طردتني من البيت ومن الظهر اني هنا صرت فرجه للعالم ..

"باوعلي بقهر و وهو يقوي قبضته على خرزات السبحه
كال ، خل ندخل ونفتهم .. يلا بنيتي تعالي طبي تعالي

.. مشينه اني وياه طببني بالطارمه و هو ركن سيارته ونزل يمشي واني وراه طب ع المطبخ وناده بصوت عالي ..

"نجوووووود نجووووووود وينج ..

"ع صوته اجتِ نجود تركض كالتله ببابتسامه ، هلا ابو هشـ...
انتقلت مظراتها عليه وجمدت ملامحها لثواني

وبعدها تغيرت وحل مكانها الغضب عقدت حواجبها وكالت ولج عاااار شطببج هناااا امشي اطلعي بره لا اروايج نجوم الظهر امشي ولييي  من بيتي يلا ولي ..

"احتدت ملامح عمي بغضب وزمخ بيها بصوت فززنه
نجووووود لسانج لا اجي اكصه الج ، انتِ تطردين منو من بيت منو ..

شلون تطلعيها بالشارع هيج ومن الظهر هي كاعده ماكلتي الناس يشوفوها وتحجي عليج وعلينه وجوهنه تصير بالطين من سوايتج شنكول لاهلها وشنكول لابوها ، ولج انتِ شنو من مله موتيني وراح تطلعين روحي الله ياخذج  وافتك من جهرتج الزفره .. طلايبج ماتخلص يعني ..

الاء جانت واكفه بس ماللها اي ردة فعل ..

ردت عليه بصوت اعلى وكانه دتتحداه بنبرة صىتها  .. هييي انت شكو جاي هداد عليه ومطلع مراجلك يمي ، ماتندار على هالكح... الواگفه وراك لو دافعلها لان ساقـ.... رجعت تلعلع بعلو صوتها مو هو كالها ابو المثل حظ العواهر جواهر وعاد انت تكيف ع الكح.. وبنات الشوارع

"فتح عينه على وسعهن متفاجئ من كلامها اللاذع ، واتجه عليها بكل شراسه نزل ايده على خدها بقوه الا الصوت نسمع بكل البيت ..
وكاللها بغضب وعروق رقبته بارزه

والله ولخلقج ولخلقج يا ونجووود هسه ارمي عليج اليمين واهجولج تالي عمرج .. لزم اكتافها وهزها بغضب ، رجع كال .. ولج ماكفاج الفضايح السويتيها قبل بكل منطقه نسكن انتِ دكين اسمج بداية الفرع ام الطلايب والمشاكل شلووون اني كم دوب وكم عمر اكضي وياج هيج!!!

"رفعت عينها علي مصدومه منه وكالتله بحقد ، تضربني على مود هاييي هاي الادبسز بنت الداعشيه ..

" تنفس بصعوبه ورفع اصبعه السبابه وكانه ديحذرها

كاللها وحق رب العرش والسبع سماوات يانجود اذا ماصرتي ادميه وجريتي عدل لامسيج بكتله واصبحج بكتله ، ولج شلون انتِ ماتعقلين زوجتي ولدج وخلفو وانت بعدج عقل الصخله

.. شلون تطرديها اريد اعرف شلووون ولج هايه مرت ابنج يعني عرضنه وشرفنا يا قليلة الاصل والتربيه تفووو على هيج اخلاق وهيج عقل شايلته بين كتوفج ..

نطق كلماته الاخيره وراح للهول هي لحكته وضلت تحجي بعلاة صوتها وما تخاف ولا تنكسر عينها اني ركضت فوك دورت لموبايلي وبسرعه  اتصلت على هشام ..

رن وشاله "گال بصوت جدي ، الوو هلا بغداد

"كتله واني ابچي ، هشام هسه تجي للبيت هسه تجي لا والله العظيم احرگ روحي حرك وابليكم بيه ..

"وضح التوتر على صوته وگال ، شبيج شكو شصاير محمد بي شي ..

"داكولك تعال هسه وانت تفتهم كلشي ..

"حجه بفضول ، تمام تمام هسه نص ساعه واني يمكم .. قفلت الخط منه وبسرعه كمت طلعت جنطه لميت غراضي وغراض ابني كلها والمستمسكات وماخذت ولا فلس حتى ذهبي ماخذته قفلت الجنطه ودزيتلها رساله لـآلاء تصعدلي محمد هي شويه وجابته الي ..

احس من شفته ردتلي روحي يمه ابني حبيبي اخذته من ايديها بلهفه وكمت ابوس بي واشم بريحته  وعطر البوطره الطيب البي يمه والله افدي بروحي كلشي ولا محمد هو عندي يسوه الدنيا ومابيها ماكدر افاركه لو دقيقه مو هو المتعلق بيه اني المتعلقه بيه ..

.. خطيه هو يبچي واني ابچي عبالك واحد ديشكي للثاني .. باوعت ع الاء خطيه واگفه هم وعيونها مدمعه تالي نهبت ع روحها وكالت اني راح انزل ..

هزيت راسي باي بدون مارد هي نزلت وبقيت اني كاعده بالغرفه ويا محمد وحاظنته بحنان اتمنى اطببه بظلوعي واحمي من كلشي رغم كل شويه ينعاد الكابوس اليوم الصار وشلون طردتني بس انطلقت ويا محمد وشويه رتاحيت من شفته بس والله بعدني ممصدكه هيج صار ويايه ممصدكه ..

اوووف يبغداد اوووف شحشوفين النوب شراح تراويني يازماني اووف .. بقيت انتظر هشام سمعت صوت سيارته اجت ِ وكمت اخذت الجنطه ونزلت جوه بعده توه طاب للبيت واني صرت بوجها ، كال شكووو شصاير ؟

"داريد احجي وسبقتني امه ، وهي تباوع للجنط كالت

"تعال عيني شوف شملفي بيتك تعال شوف بنت الداعشيه شسوت مايكفيها هي حراميه النوب ضربتني ..

"ندار عليه وهو متفاجئ كال .. بغداد صحيح هالحجي انت ضاربه امي ..

"بلعت ريكي بصبر وكتله لا ماضربتها ولاجيت يمها اصلاً عمي ضربها ..
بهالحجي طلع عمي من الهول بس خطيه وجها اصفر عبالك مرتفع ظغطه كاله .. اني ظربتها واكسر راسها النوب اذا تسوي هالسوايه مره ثانيه ..

طارده مرتك بالشارع من الظهر للمغرب كاعده وصايره فرجه لخلايك الله .. والله شنو باكت كلادتي الذهب ، غشيمه وماتعرف تتصرف ماحطت قدر وقسمه لا الك ولا لمرتك ولا لاهلها وخلتنه علج بحلوك الجوارين ..

هشام باوع على امه مثل الممصدك ماللها بدهشه ممزوجه بغضب .. يمه صدك هذا الحجي ..

بقت ساكته ماردتله وهو زمخ بصوت عالي .. يمممممه احجي صدك هذا الحجيييييييي !!

"حجت بعدم رضى ، اييي صدك شسويلك اذا انتَ طلي يمها وكتلك مرتك بايگتني وماهتميت وكلت الله كريم وطمطمت السالفه ..

"احتقن وجها صار احمر دم ، ظرب الفازه جانت ع الدرج برجله صار طشارها ماله والي وحجه بصوته الجوهري الغاضب ، وهو يعلي نبرة صوته اكثر كاللها .. شلوووون هيج سوييييين شلوووون هاي مرتييييي هاي ام ابني ام حفيدج هااااااي شبييييكم راح تخبلوني انتو ولكم كوااااا...... شلون وياكم انيييييي شلوووون ... كل يوميه جاييني بمصيبه شكل

ردتله "شبييك تخبلت بس عوزك تضربنه مرتك عايله وبواكه شسويلها يعني

رد عليها بقهر ونغس الاعصاب " ادري اني مو اكلت خ... وكتلج مووو هييي مو. هيي يمه مو بغداد دوري عد غيرها بس بعد قفلتي عليها لان تكرهنها ..

"ليش متكول حظرتك مو رجال ومو كفو تطلعها من مرتك ..

"مسح على وجها بتوتر وندار الي جنت واكفه وبس اسمع ودموعي تنزل بس بنفس الوقت اكو شعور حلو انو هشام دافع عليه ووثق بيه وحسيت للحظه انو اني مو لوحدي .. باوعت عليه وكتله عفيه وديني لاهلي ..

حجت عمتي بسرعه وكالت " ويييين وييين رايحه والله ماتخطين خطوه اذا مطلعين الكلاده هنا ادفنج بكاعج  ياحراميه ..

"كلمتها المكرره (حراميه وبواكه ) جانت مثل الماي الي يمتلي بكأس واخر قطره تواجدت بجملتها الاخيره وهالقره خلت الكيل يطفح .. تقدمت عليها بقهر وحجيت وياها واني ابجي .. فقدت السيطره على روحي واريد بس اخلص من هالعبئ البداخلي ..

كتلها " موووو اني مووو اني الحراميه انتو الحراميه انتو والزمن بگتوني اني مابگتكم ولا اخذت شي منكم .. انتو الاخذتوني من نفسي ومن روحي الحلوه واخذتو سنين عمري وهدرتوها جوه رجليكم .. انتو البگتو  بغداد مني .. رفعت ايدي وكتلها اخذتو ايدي هاي الكم وبگتوها غصب .. ايدي الي كل يوم تطبخ وتغسل وتخبز ومراضين عليها .. بكتو عيوني وحرمتوها من كلشي حلو خبيت ايدي على گلبي بوجع وكملت ، بكتو كلبي الحرمتوه من اعزازه واحبابه .. بكتو روحي وبكتو كلشي حلو بيه ..

.. سنين العيشتوني بيها من جيت لبيت اختج لحد هاللحظه وانتو دوسون بيه لحد مامحيتوني من الوجود .. ليييش شنو السويته انييي ؟؟؟

وبذنب منو اتعاقب هيج عقاب لا يرضي الله ولا عباده .. من يوم الجيت بي وتعرفت على اهلي المفروض يكونون سندي وعزوتي واني اتصبح واتمسى باذيه اجيت طفله وكبرتوني وربيوتي بالقهر والضيم .. شحصلت اني من عمري كله كليلي شحصلللت ، تگوموني وكعدوني بنت الداعشيه واخذناج لابنه ..

مشيليني مانيه  على شنو ترى انتو دفتوني بالحياة من اهلي وهي نازله .. اشرت على هشام وعيوني مرتكزه عليها وماتحركت

.. هذا ابنج الاخذتيله بنت الداعشيه بيوم العرس يكولي جايبج خدامه لامي وماريدج

ابنج  وصلني للموت ابنج موت برائتي وسلب اخر امل عندي .. ابنج اخذني قوه وغصب واني اتوسله وابوس برجليه بس حتى يتركني و ما ياذيني دمرني وخلاني ساعات مشموره فوك ماكلف نفسه بان يدز احد عليه ..

ابنج  اني بالنسبه اله لعابه ماعدها احساس ولا مشاعر يجي يفضي نفسه بيه واذا يعجبه يضربني هم عادي ..  وبس الله يفكني من ايده كم مره اني اشوف الموت بسببه وما انوله .. ابنج راد يذبح طفله البعده مشايف الدنيا .. شتريديني اعددلج بعد وشحجي النوب هذا كافي لو احجي بعد ، نزلت راسي بقهر واني ابجي وامسح بدموعي ..

" اجه هشام كال يلا بغداد كافي امشي اوديج لبيت اهلج .. بدون هزيت راسي بدون مانطق ولاحرف مشيت وياه للسياره وهو اخذني لبيت اهلي وطول الطريق الصمت هو سيد للموقف .. وصلني للبيت ونزل جنطتي وطب ويايه ..

دكينه الباب وطلع عهد ، شمرت نفسي بحظنه بدون مقدمات جنت محتاجه هالحظن حيل محتاجته .. هو خطيه تفاجئ وضل يسئل بيه بخوف  ، بيج شي شنو شصاير احد مات .. هزيت راسي بلا وبعدها اجه ابويه هم استغرب من منظري وسئلني شبيكم شصاير ..

هشام كله عمي اني اترخص وبغداد هسه تفهمكم على كلشي .. مشى بدون ميسمح لاحد يحاججه واني طبيت جوه للبيت .. كعدت ويا ابويه وعهد جت رواء هم شافتني ووكفت تسمع بس عبالك تدري بالموضوع لان عيونها جانن بنطن شرار وحقد كلما اجيب طاري اختها ، حجيتلهم كلشي صار بالتفصيل

انتفض عهد من كلامي وكال ، شنو هي سايبه تطردج ماعندج اهل يوكفولج لو شنو .. نطلكج منه وخل يولي ..

كتله "وابني شلون اكيد حياخذه مني ماكدر اني اعوفه واكيد محيقبل يطلكني

"ياكل تبن وغصباً عن ابو يطلكج والله اسويها دم اذا ماطلكج ..

تدخل ابويه وهو يحاول يهدئ من روع عهد كله ..

"اكعد ابني اكعد اعرف محترك دمك عبى اختك بس مو هيج تنحل الامور والطلاك مو حل ، الناس شتحجي علينه وشتكول ..
وبعدين لا تنسى هما بيناتهم طفل يعني راح يتبهذل ويةون هو الضحيه انشالله محلوله وماكو بيت مابيه مشاكل وارجعها لبغداد وكرامتها مردوده وراسها مرفوع بزود ابوها ..

كتله بترجي " لا فدوه كلشي ولا ارجع واعيش ويا ام هشام

رواء: ليش عيني شبيها اختي متتحمليها اعتبريها امج وباريها لو ماتكدرين الا تعصين الله وعباده ..

"ابتسمت مستهزه على كلامها وكتلها ، نفس حجايتج اليوم حجيتها واني واكفه بالشارع واترجي بيها تفتح الباب ، بس جان جاوبها انو مايشرفها اكون بنتها ولو جيب وحده مثلي تموت نفسها !

رد ابويه ، كومي بنيتي روحي ع الغرفه ارتاحي وهسه اوصيلج على احلى عشى اكلي وارتاحي وانشالله محلوله وكلشي تريدي يصير .. باس راسي بحنان واني هم كمت للغرفه انطيت محمد لعهد وطبيت سبحت وطلعت ابويه موصي عبى عشى سمج مسكوف وكص وخطيه ما مخلي .. كلي يلا تعالي اكلي رحت كعدت وياهم بس ماشتهي رغم اليوم كله اني ما اكلت ولا خليت لكمه بحلكي .. بس عهد وابويه جبروني اكل بالگوه .. كملنه وبالتعليله اجوي يُسُر وعهد وياهم بناتهم الاثنين بغداد ورحمه الصغيره سموها رحمه .. هم استغربو وجودي لان اني ماجي ابات ابد .. للـ١٢هما راحو واني رحت لغرفة يُسُر نمنا بيها اني ومحمد .. اخذت عيوني النوم بسرعه من التعب وحاولت اتناسى الصار ومااذكره واعيش حياتي وابدى صفحه جديده ، بس هيهات زماني يسمحلي !

Next.........

هلوووو متابعيني الجميلين ، شكد مشتاقه الكم ومشتاقه لكلمة next الانهي بيها البارت واعذبكم بالقفله 😂

بس لا من صدك الكم وحشه وحيل مشتاقتلكم يارب تكونون كلكم بخير وسعاده ..

اليوم البارت طويل ومشبع وانشالله من اليوم للخميس اني حنشر يومياً بارت  ، بس اريد تفاعلكم ويايه حتى نرجع نحيي القصه من جديد ..

وبعدها حبدي انشر يومين والثالث بارت لان بدت الدراسه الالكترونيه وهم تاخذ وقت وماكدر اهمل دروسي 🙏🏻

بس ححاول اوافق بين الروايه والدروس .. وان شاء الله الختام حيكون مو كلش بعيد  ..

ولاتنسون التصويت للروايه بظغطكم على النجمه باللون البرتقالي .. وتفاعلكم ويا الروايه يشجعني اكثر  .. ابعثوها لاصدقائكم محبين القراءه والروايات الواقعيه..

تقبلو اطيب تحياتي..

الكاتبه : يُمنا نآصر

احبـ♥️ـكم

_________________________

مليت والله يا زمن ☹️☹️