نصفي العقيم ( مكتمله )

بارت(٢٢) والاخير من الجزء الاول

احس بروحي خنگة ناس
والتابوت يتمشى بداربيني
واحس بكلبي عصرة شوگ
والعدلين كلهم ماتو بعيني
_______________________

روايـة "نصفي العقيم"

البارت والثاني و العشـ٢٢ـرون عشر...

للكاتبه : يُمنا نـآصر
_______________________

البارت من ٢٨٩٦ كلمه 🌚♥️

قراءه ممتعه ..

بغداد : مرت حياتي الايام متشابها ومابيها شي جديد مابين طبخ وتنظيف ودراسه وابني حبيب گلبي .. اني قربت اكمل معهد واتخرج هذا اخر شهر ادرس بي ولتهيت بالامتحانات هواي ..

جانت عندي شغلات ماحيل افهمها فَـ يجي صگر مرات يدرسني خطيه ماقصر ويايه ابد .. وكلما اروح امتحن هو يوصلني بسيارته ويراجعلي كل الطريق يسمع الي واسئله من احتاج شي

.. عدت فترة الامتحانات على خير وطول هالفتره اني مادري بهشام وبصراحه بعد السواه بيه كرهته اضعاف كرهي السابق اله ..

هو صح انجبر عليه بس اني هم نجبرت عليه مو من حقه يعاقبني بشي اني مالي دخل بي ، وهو ع الاقل ولد جان يگدر يرفض مو مثلي اني نغلب على امري وغصب عني ازوجته من ورى تهديد رواء .. 

اوووف يارواء شسويتي بيه وشراح تسوين

تنهدت بحسره ورجعت بذاكرتي من ظربني اخر مره هشام .. انتظرته يرجع وخابرت على ابويه كتله تعال اخذني هشام هيج وهيج سوه بيه

رد بكل برود ، وين تجين يابه هي هاي كل مره ورجال يصير بينهم مشاكل والحياة تمشي خما بس انتِ هيج .. وبعدين لاتخافين اني احجي وياه وبعد ميعيدها..

كتله "بس بابا والله ديأذيني يعني موتني كتل جلدي تفزر وصار يطلع دم من ورى ضرباته واني تعبت ماعاد بيه اتحمل ..

"ميخالف بنيتي عود اني احجي وياه ، يلا بويه اروح اني عندي شغل .. سديته منه واني كلي خيبة امل

قطعت سلسلة افكاري رحاب وهي طابه للمطبخ جنت داغسل مواعين .. طب وراها رجلها سلمت عليهم ودخلتهم جوه .. شويه واجتِ الاء سلمت عليهم وكعدت وياهم ، اني كمت من يمهم رحت للمطبخ اكمل شغلي ..

خليت الجاي ع النار طلعت كليجه ومعمول وكيك حتى نظيفهم .. كملت البيدي وشلت الصينيه رحت انطيهم .. بسرعه رحاب اخذت الصينيه قبل مانطي لرجلها وهي انطته .. اخذت ستكان جاي وكعدت يمه .. كالت ..

"لعد امي وين ؟

جاوبتها الاء " راحت لبيت خالتي رواء

"سئلني زوجها شتدرسين .. كتله معهد حاسبات .. بقه يحجي ويايه ويتناقش كلش انسان مثقف ومحترم .. رحاب حسيتها ضاجت لان يحجي ويايه .. كمت ع المطبخ وهي جتي ..

"كالت ، ترى هالسوالف مو عليه ..

"باوعتلها باستغراب كتلها ياسوالف ..

"سمعي لج انتِ تعرفين ياسوالف ، والله اكوله لهشام عليج يجي يشك حلكج .. وبعدين شكو هيج مكيجه ولابسه .. لو لان عرفتي جاي رجلي ركضتي زوكتي نفسج كباله ..

"هيي هيي شبيج انتِ شدتخربطين احترمي نفسج اني مرت اخوج .. وبعدين ششفتيني حجيت وياه وهيج تخبلتي .. ترى جنا نتناقش بالدراسه وكلام جداً محترم وبوجودج انتِ واختج ..

وبعدين دتهددين بهشام روحي كليله لاخايفه منج ولا منه .. اني ممسويه شي غلط واذا انتِ هيج تحسين فمعناتها عندج نقص ..

" باوعت عليه بحقد وكالت ، بسيطه ان ماشوفتج شغل المعدل ماطلع اني رحاب ..

"طلعت من المطبخ وشفتها طبت بغرفة امها .. ماهتميت الها خل تولي ماحط عقلي وياها .. شويه وطبت عمتي نجود .. كتلها هنا رحاب وزوجها وهي ماصدكت راحت ركض تسلم عليهم ..

باوعتلها شلون تسأل بنتها بلهفه عن حالها ، زفرت نفس وتنهدت شكد جنت اتمنى هيج امي وياي تخاف عليه وتحاميلي وتكون ملهوفه لشوفتي .. اشكيلها وهي تسمع وتصبر عليه ..

بس للاسف كل هاي احلام ورغم بساطتها الا انو هي صعبة المنال بالنسبه اليه .. اووف الحمدلله على كل حال ..

رحت صعدت بغرفتي منزلت منها الا ما راحو .. مرت كم يوم وطلعت نتيجتي لازم اروح استلمها .. خابرته لعهد كتله تعال اخذني وهو ماقصر اجه اخذني خطيه بسيارة ابويه .. وداني للمعهد طبيت استلمت نتيجتي والحمدلله طلعت ناجحه ..

كلش فرحت والحمدلله صارت بايدي شهاده اكدر اضمن بيها مستقبلي .. عهد اخذني للمطعم بمناسبة النجاح وخطيه بالرجعه اخذ الي كيك وحلويات .. ومكيف يلاعب محمد جنت خالته بحظني اخذته ويايه ..

للعصر وصلني للبيت وراح هو ، طبيت فرحانه حيل وبشرتهم عمتي باركتلي من ورى خشمها بس الباقين فرحولي حيل وباركولي

هشام مجان موجود وحتى لو موجود هم متأكده ميفرحلي ولا اني اكله ..

خليت وصعدت فوك بعدني دابدل وطب هشام .. ختلت بسرعه ورى الكنتور وهو گال .. بغداد بدلي بسرعه اريدج تلبسين شي كلش حلو احلى شي عندج لبسي يلا بسرعه ..

"لبست البدي وطلعت عليه كتله بملامح يعتليها الجمود ، ليش شكو ابدل

"صديقي عرسه اليوم واريد اخذج ويايه مايصير اروح بدون مرتي..

"ضحكت باستهزاء وكتله مرتك !
لا عادي روح واذا كلش متريد تروح وايدك خاليه روح على هاي حبيبتك العجوز اخذها وياك تكيف ع الحفلات ..

حجه بقلة صبر"اريد اعرف انتِ ليش هالگد نكديه وماعندج كلمه حلوه بس تنوحين .. ترى لعبت نفسي منج

"ههههههه شتريد يعني من اشوفك اخذك بالاحظان ؟
رجعت حجيت والدمعه معلكه بعيوني ، واني اقلد التحيه العسكريه كتله ، لو اطكلك تحيه سيدي ..

نزلت ايدي بيأس وباوعتله كتله ، ليش تحسسني انو انتَ تحبني وميت عليه واني الشريره الي منكده عليك حياتك ، ترى انت مفتهم غلط !

ماخذ دوري مسوي نفسك المسكين .. ولا عبالك انتَ الي قبل فتره هنا كطعت نطاقك عليه ومابقت كلمه تنطبق على بنت الشوارع ماكلتلي ياها ..

تنهد وگال "انسي الصار وخلي نبدي من جديد

"عجيب امرك ، فعلاً مادافتهم شتريد بالظبط انتَ ؟
وشنو الانساه حتى انساه ، ولو كدرت احاول امثل واتناسى الصار من اطب اسبح جسمي يذكرني وجروح البيه تصرخ بالالم وتشرحه قبل لساني ، سويت بيه صوره دمويه وتمثلت بجسمي عبالك دترسم لوحه وتخططها .. اشرت على ارجاء الغرفه وكتله ، وهاي الغرفه هم تشهد .. هذا السرير الي جردتني بي من برائتي ماهزتك دموعي واني اتوسلك ، اتوسل بعدك مني !

رد وهو يحاول يتلاشى نظارتي اله
"ذاك اليوم من ضربتج ماجنت بوعيي ..

حجيت بصوت واهن والدموع منتظره اشاره حتى تنهطل على خدي مثل شلال ..

" ومن ظربتني وردت تموت ابنك الي بطني هم ماجنت بوعيك ؟
مسحت دمعه غدرتني وتسلسلت بصمت لارجاء خدي ، خانتني العبره مثل ماخاني زماني والناس ..

رجعت كتله " يمكن اني مثل متكول معقده ، و بس ابجي ودوم البس الوان عاتمه ، بس ترى مو من شويه والله اني اتمنى اصير سعيده بس القدر ما يسمحلي .. نكتب على جبيبني الحزن ونزلت ويايه اللوعه والكدر ، والشجن يتبع اسمي بالهويه قبل اسم ابويه ..

جر حسره وكال " هسه اريدج تجين ويايه ونطيني فرصه اصلح غلطي .. وبدليله لمحمد قاط حلو ..

"ومنو كالك انـ....

بعدني داحجي وقاطعني وهو يخلي ايده على حلكي كال
" اششش هذا امر مو طلب يلا بسرعه لا تتاخرين .. لفظ جملته الاخيره وطلع

" جريت نفس متعوب وزفرته بتنهيده تشيل غصه وابتأس
مثل شجره  بنص صحراء قاحله تاركيها بدون ماي ويريدون منها تثمر وتضل شامخه ، لو لا رحمة الله وعطفه انو يسقيها حبات غيثه تهطل عليها من رحمته جان من زمان ماتت جذورها وطاحت ع الارض ذليله ..

كمت بدلت لمحمد ورحت اني للكنتور ، طلعت فستان عدل قصير يصير ع الرگبه .. لون ماروني طوخ ولبست عليه بوت طويل .. خليت مكياج وحمره بلون الفستان وشعري بس فتحته هو جان مشسور ونازل طويل حيل .. كملت ولبست قبوط فرو ونزلت جوه .. محد جان موجود بس هشام كاعد ع القنفه وديحجي ويا واحد يكله احنه هسه طالعين ..

سد التلفون وباوع عليه ابتسم وگال يلا تعالي .. ماحجيت شي بس طلعت وراه .. امشي صعدنه بالسياره وشغل اغاني ، كلها حب وغزل واني ساكته ماعرف شبي هالرجال لو شيحس مخبل موصاحي ، وتناقض تصرفاته حتخبلني ..

مسافة الطريق وصلنه ع مطعم بس كلش جبير .. باوعتله كتله شنو هنا العرس ؟

"ايي ايي هنا يلا نزلي ..

"شلت محمد ونزلت من السياره طبينا للمطعم .. وكلشي مينشاف هشام راح كبالي واني ضيعته .. بقيت اصيحه وعلى غفله نفتحت الاضويه وكلها عاطت بصوت واحد

هبي بيرث دي تو يو ، هبي بيرث دي تو يو ، سنه حلوه يا جميل سنه حلوه محمد ، سنه حلوه سنه حلوه سنه حلوه حمودي ..

بقيت واكفه متفاجئه شنو السالفه كلها موجوده اهلي واهله وعمه فرحه كاعده ع الكرسي وتصفك وياهم .. رحاب ويُسُر وصگر ورواء وحتى سعاد وهدى وسهى خواتي صارلي كومه مشايفتهن .. هم جايات ..

اجه هشام واخذ ايدي الناعمه بين ايديه الخشنه وكال ، هاي المفاجئه بمناسبة عيد ميلاد محمد حبيت اسويها الكم بدون متدرون ..

باوعتله وعقدت حواجبي بتساؤل " بس هو مو اليوم عيد ميلاده بعد ٣ ايام ..

"ابتسم وكال ، اي اعرف بس اني راح التحق فما لحك عليه كلت اقدمه لعيونكم ..

"هزيت راسي بقبول وكلشي ماحجيت .. هما كالبين المحل كلب حاجزه بس النه وكاعدين كلهم على ميز طويل والنشرات بكل مكان .. وابو المطعم يفتر بنفسه ويشوف شكو ..

جابو الكيكه .. وخلو محمد يطفي الشمع هو وبغداد بنت صگر ، وهو مكيف ويصفك ويناغي .. بقيت شايلته واضحك على ضحكته وفرحانه لفرحة كلبه الصغير ..

عمتي نجود ورواء جانن واكفات ويخوزرن معاجبهن..

كالت رواء : بنت الفگر عشتو مسويلها مفاجئه مو تستاهل ام حلك

نجود: اي والله وعاد هم لو يغزر بيها ..

ردتلهن الجده فرحه ، هجم بيتجن يمعزايات اذا هي بنت فكر انتن شتطلعن

بغداد : طنشت كلامهم ورحت اتعشى ..
كعدنه ع الميز وهشام اصر اكعد يمه ، كعدت وصار صگر مقابيلي .. دا اكل واتعشى ملتهيه واشوف هذا ابو المطعم واكف كبالي ويسوي حركات غريبه ويغمز

.. اني من شفته هيج غصيت باللگمه وختنكت .. اشو هذا ركض جابلي ماي خلاه ع الطاوله وطخ كتفي بايده .. بلعت ريكي وشربت الماي صگر بقه يباوع عليه ..

اني وضحت عليه علامات التوتر وبقيت اكل والهي روحي بمحمد .. كملنه ووكام هشام .. جر السماعه ووكف يغني بس شنو صوته يجنن .. كلنه كاعدين ومنطربين ع صوته .. ماحسيت غير شي يوگع بحظني ..

اخذته طلع ورقه مكتوب بيها رقم .. باوعت من بعيد شفت هذا ابو المطعم التوي غمزلي واكف ويتبسم .. شمرت الورقه من ايدي بسرعه ورجعت اكل كيك بس شنو متت من الخوف يذبحوني قطرة دم مايلكون بيه ..

بس خلي تخلص هالليله ع خير .. اجه صگر وكال شنو شمرتي ؟

"كتله بتلعثم ،هاا مْـمـا شمرت شي ..

"لا شمرتي رقم شفته هذا الدثو خلاه بحظنج بس بسيطه ان ماربيته لهالعار ماطلع اني صگر ..

"راح يمشي يم هشام شفته ماعرف شكاله .. اني لازمه بايدي الممه مالت حمودي .. جان ديلعب بيها ونكب شويه من الحليب على فستاني ، كمت رحت للحمام غسلت ورجعت بعدني دامشي وجان يطلع هذا ابو المطعم كال

"اويلي يابه حسدت الكيكه بحلكج ، والله اول مره اشوف حلو وياكل حلو ..

"بعدني داردله وماحس غير هشام وصگر فوك راسي .. گله صگر .. ايي والله واني هم اول مره اشوف نعال وياكل نعل

.. كال هيج  وسحله هشام من ياخته بره المحل  زوعه العافيه ..
اني متت من الخوف ورواء ونجود موتني بس يگرن فوك راسي ..

رواء : كله منج شوفي شكلج ولبسج عبالك انتِ ام العيد ميلاد جان لبستي شي مستور وحشمتي نفسج لو كح... لازم تفرجن الزلم عليجن

ردتلها رحاب " اي والله خاله ماتستحي وحتى بالبيت لبسها كله تراكات واربعه وعشرين ساعه مكيجه وبعدين شعرج شدعوه هالطول جوه الورك يلفت النظر  ويخبل الزلم ..

"بس اسمع الهن ماكدر اجاوب لو ارد شي .. ونجود تكول هسه يسحلج وتعال عاد فكج من ايده مشفتي ذاك اليوم شلعب بيج لعب ..

رواء: والله تستهل حيل وابو زايد هو ينلام ..

النوب موتني من الخوف وحده ترفع وحده تكبس متت ارجف من السعفه وايديه صارن ثلج من الخوف

.. بالكوه فكوه الولد من ايد هشام وكام ذاك يكح طب جوه بسرعه وهشام كام يتنفظ ويعدل بياخته ولا عبالك سوه شي .. اجه باتجاهنه يمشي اني كلت راح يموتني ..

صاحت عمه فرحه "خايبين كضوها ورى ظهوركم جاها الثور الهايج وعلي هسه يفطسها للمگروده ..

"من الهبطه والله ردت اوكع هو اجه شال محمد ولزم ايدي وكال يلا احنه نترخص .. اخذني يعت بيه واني اطرد وراه بالكعب عبالك حصان 

.. بس هو لازمني وايدي ترجف رجف مو طبيعي وصلنه يم السياره والانظار كلها علينه جانو ديباوعون اذا هشام حيسويلي شي ..

هو نتبه عليه وزمخ بصوت غاضب " شبيييج دترجفين لخاطر ربج مدكوليلي شبيج

"فزيت من الصوت واجيت اسويها ع روحي ..

"باوع على ايديه وكال هدي هدي .. وبدون مقدمات باسني !

حسيت بملمس دافي على شفايفي ، وهو يبوس بيه بلهفه وهاي العالم كلها واكفه تتفرج .. ايد لازم بيها محمد وايد مطببها بشعري ومرتكز شفايفه ع شفايفي .. ابتعدت منه بخجل واتمنى الكاع تبلعني من الفشله .. هو مسح بايده خفيف ع شفايفي

اني بسرعه اخذت محمد منه وصعدت بالسياره ووجهي يغلي من الفشله .. صار عبالك طماطه .. بقه كل الطريق ساكت وماحجه اي شي ..وصلنه للبيت وبسرعه صعدت لغرفتي هو راح للهول تمدد هناكه ماشفته بعد ..

ورى نص ساعه سمعتهم اجوي بيت عيالي مانزلت من فشلتي .. بقيت لثاني يوم الصبح يلا نزلت

جانو كاعدين ديتريكون .. وطبيت اني صبحت عليهم شفت رحاب جانت موجوده الظاهر بايته هنا .. رحت صبيتلي استاكنت چاي وكعدت ..

عمه فرحه كالت " هلا يمه هلا بالتركيه ، خايبه طلعتي صحيح تركيه ع المطجه(البوسه) مالت البارحه جنكم سميره وهذا الاصيفر الوياها بس عاد هذاك الفرخ حلو وملون موش مثل هشام اچلح املح (تقصد سمر ومهند)

"ضحكت عليها وسكتت هي جرت نفس بقر وكالت .. ايييه ذكرتيني بايامي وسنيني ويا مشعول الصفحه جان يموت عليه وهم مثلج كل اليوم يبوس بيه ..

ردلها مؤيد "جده علينه هالدروب ، اذا هو هالكد يحبج ليش سنتين وطكج بمره .. لا تخافين احجي الحقيقه المُره كلنه بظهرج ..

ردت عليه بعصبيه "شلون هسه راح اكوم اكسر راسك وراس الخلفك ليش اني من منهو خايفه

"لعد ليش متكولين الحقيقه واني شكو وتكسرين راسي

"لنك جحش وكديش وتريد تتمضحك علي .. وعلى جدك سلحيان ..

"ديلا هسه انتِ شفتي منه هنا كلهن سنتين العشتيهن وياه وكضيتيها كل يوميه مكتوله ..

"على كلبي احلى من العسل ديلا شتريد انتَ ، وبعدين هو مات هسه ماتجوز عليه غير الرحمه ..

"يارحمه يمعوده ذاك اليوم جدي اجاني يلطم بالحلم يكول حطو بلاستر على حلك فرحه ترى راح اطلع من الكبر هالكد متحشين بي ..

"كالتله بخوف وترقب، بروح جدك صحيح اجاك ؟

"ردلها ايي اجاني وكال كول لفرحه خل تنطيك ٢٥ الف لو اجي اخذها ويايه

"عوذه ٢٥ماليش

"ثواب على روحه

"خايب وانتَ هم بيك ثواب ، خلت ايدها على خدها وگالت وهي تشعل بالجكاره مالتها ، اوووف يالغالي اووف

"هاا شوصار غالي ع غفله ، لو خفتي لا يجي يسطرج ..

"خايب دولي شيسطر مني ليش شصار سيد لو امام ..

"هاا لعد تحبي بعدج

"چا هو مو رجلي وابو ولدي شلون ما احبنه .. بس انتَ شعرفك بالعشك ابو وجه المصوفر انا لو ما اعشكه جان مابقيت ارمله ومانزعت الاسود وراه ، لچن انه وفيه، ورغم هو منعول والدين وجلب ابن جلب ..وتزوج علي وحط على راسي شريجه .. انا جنت احبه ومارضيت بزلمه غيره ..

" بغداد ، اني بس كاعده اسمع لحديثهم ومتونسه حيل وياهم .. كام مؤيد لبس نظاراته وكال اني ماشي للدوام .. هي باوعت عليه وكالتله ولك مؤيد يخايب شو تعال جاي .. هو راحلها كاللها ها جده تذكرتي سليحان بوجهي وتريدين تطمكيني ..

"ضربته على راسه كالتله وصمخ ، انجب وكلي .. هاي الناظورات (المناظر ) اللابسها نفسها الكالو عليها الامريكان .. يلبسونها ويشوفون الوادم مصلخه ..

"هو طكها بضحكه وكاللها ، اي وداشوفج مصلخه كبالي ..

"حظنت نفسها وكالت جايبات ولن جيبلي لحلف خل اتدثر نفظحت وعلي ، جيبلني شي خل اطم عاري .. وانتَ يالادبسز انزعن لا انعنع ضلوعك انزعهن ..

"هوكام من يمها وهو يضحك طلع من المطبخ وراح ع داومو .. رجعنه احنه بين شغل البيت والتنظيف والخبز .. واكيد اني الابتلي وخاصه من تصير هيج لمات ويجوهم كرايبهم

.. بس ع التنور مرات اخبز فوك الـ(٥٠)رغيف  .. كملت وطبيت جوه رحت بسرعه سبحت وبدلت ملابسي ونزلت اتغده وياهم .. ورى الغده راحت رحاب بس ماعرف شبيها تضحك حيل وكل شويه وباوعتلي ..

العصر اجه رجلها اخذها وراحت 
من طلعت كالت يلا عيني بقت عدكم العافيه انشالله

ردتلها جده فرحه ،  اخذيها وياج ماتفيدنه ..

ثاني يوم مشو كرايبهم توسلت بجده فرحه تبقى بس ماقبلت ، من تجي احب سوالفها حيل وتونس رجع البيت يهدئ ورجعت حياتنه الطبيعيه اني عبالي الكه تعيين ، بس ماكو وبصراحه ماريد اكول لابويه يتوسطلي رغم هو يگدر بس اني ماريد اذل نفسي لاحد ..

وبيوم اسود .. جنت نايمه مثل كل مره الصبح والدنيا شتاء وبارده كلش .. ماحسيت غير على شعري وهو ينجر .. فتحت عيوني وماحس غير راشديات ماعرف من وين اتلكاها .. وخرت نفسي بالكوه وكمت اريد اشوف شكو ..

صحت بصوت مرعوب "شكووو شكووو شبييج ..

حجت بغيض وغضب وحقد مدفون بكلبها اجه وكته انو يطلع ..

"ولچ عااااااار حيوانه .. والله عرفتج مثل امج عرفتج كحـ... هاي تاليتج تبوگيني تمدين ايدج يابنت الفگر .. طلعيها لا هسه اذبحج طلعيها تحجي وتصرخ ..

"باوعتلها باندهاش ، شنو هو الي بگته وين ماده ايدي اني ،شكو شصاير

"ماتريد تطلعيها مووو ماشي ..

"اجت عليه مثل الغوله عبالك شيطان رجيم متلبسها .. اجت جرت شعري بقوه الا صرخت من قوته

.. على صرختي فز محمد من النوم وكام يبجي ، ردت اروح عليه ورجعت جرتني ونزلتني من الدرج سحل لازمه شعري بايدها احسه تكطع ..

وصلتني ع الباب الحوش دفعتني ع الشارع وسدت الباب .. بقيت واكفه اني متفاجئه شنو الديصير .. شفت نفسي صفيت بالشارع واني اباوع ع البيت بذهول ، ماجنت اعرف انو بعد هالبيت يحرم عليه وماراح اطبه بحياتي ...

Next..........

مساء الخير واسفه ع الانقطاع .. اكيد كلكم شفتو التوضيح النزل وانو راح اسوي جزء ثاني .. من الروايه .. مو كلش هواي اغيب يعني تقريباً من اسبوعين الى ٣ اسابيع ..

وهاي صفحتي بالانستا ☺️ ضيفوني اذا عدكم حنزل شغلات بخصوص الروايات ، واشياء كلش حلوه ..

توقعاتكم للجزء الثاني والجاي شنو ؟

واكيد لاتنسون التصويت للروايه بظغطكم على النجمه باللون البرتقالي .. وتفاعلكم ويا الروايه يشجعني اكثر .. ابعثوها لاصدقائكم محبين القراءه والروايات الواقعيه..

تقبلو اطيب تحياتي..

الكاتبه : يُمنا نآصر

احبـ♥️ـكم