الحلقه التالته عشر والاخيره🙂
روايه احببت طلياني
الكاتبه الجميله🌚😁
😈سوبي محمد☠️
#كلنا رسول الله
اللهم اجعل همي الاخره✨🖤
اللهم اجعل همي الاخره🖤✨
اللهم اجعل همي الاخره✨🖤
.......
اللهم صل وسلم وبارك على حبيبنا محمد
اللهم صل وسلم وبارك على سيدنا محمد
اللهم صل وسلم وبارك على سيدنا محمد
،،،،،،
في عام ال92
محمود:ياغزاله حطيلي العشي في السقيفه نصلي العشي ونجي هي
غزاله:حاضر يا سيدي هي
مشي محمود يصلي وغزاله صبتله المكرونه في صونيه كبيرهشوي ومعاها فلفل اخضر وحطتلع الميه والمنشف والغساله باش يغسل يديه لما يكمل
كمل محمود صلاته وقعمز ياكل
.
.
.
.
.
.
.
خلو الراجل ياكل في حاله عليك مزعجين معقوله تتفرجو عليه وهو ياكل 🙂
.
.
وانت كمل ماكلتك هيا🌚😂
اهو سمع الكلام
كمل محمود ماكلته ولبس لبسه العسكر لانه بيمشي للبلديه قعد يستنى في ولده محمد الي طالع في البيجو وماشي اصحابه سيف وجماعتهم وهدرزه وضحك استنى محمود ولما عطل ولده ركب في سيارته التانيه العاديه
(البيجو وقتها غاليه ومليحه ومفيش زيها بكل والي عنده بيجو كأنه عنده بي ام توا 😂🌚)
ركب محمود ومشي للبلديه
خلونا نمشو شوي لفاليرو
فاليرو باش قلنا انحبس سنتين لاكن شاء القدر انه يطلع قبل نهايه السنه التانيه يعني يعتبر انحبس سنه ونص واول شيء فكر فيه الانتقام من احمد وللافس لقي احمد متوفي وجعه هلبا لانه صاحبه وهو اكتر واحد كان يهدرز عليه في الحاره الليبيه ف وجعه فوسط اكبيدته🙂 وتاني شيء فكر فيه اللّى فطومه من تاني يوم طلعته من الحبس مشي قدام الحوش ولقي محمود مقعمز برا وحسم امره ومشاله
فاليرو:السلام عليكم
محمود وهو متكي ولابس الجرد وواضح عليه هيبه وشخصيه واعره :وعليكم السلام و الرحمه
فاليرو:الحاج محمود *******صح ولا اني غالط؟
محمود: لا اني تفضل
فاليرو: عندي كلمتين مهمات بنحكيهملك وبنمشي على حالي
قعمز محمود كويس :تفضل أن شاءالله خير
فاليرو:اني فاليرو صاحب الحاج احمد والد مرتك فاطمه
محمود عقد حواجبه :كيف؟؟ خير شن في
فاليرو:بنحكيلك الموضوع اني ربيت فاطمه بيديا اني إلي علمتها الصح من الغلط كانت تنادي فيا بابا حبيتها حب ميعلم بيه الا ربي وبوها كان يعرف بالي هدا وقالي تعالا اخطبها وهي ليك خشيت الاسلام عخاطرها كنت حناخدها فعلا لاكن لما مسكها القدافي طلعنا احني قعدت سنين بعيد عليها ولما رجعت لقيتك انت واخدها هدا باش ظلم انحبها تعرف شن معنى نحبها والله لو تكون باحفادها راضي بيها وقام راسه وشاف محمود مدمع
فاليرو:خيرك ياحاج تبكي؟؟
محمود:تأترت ياراجل اول مره نسمع حد يحب هك😭
فاليرو:والله بجديات نحكي نحبها ياراجل
محمود:تعرف شنو خودها هي ليك
فاليرو فتح عيونه:شن خودها ؟
محمود:باش تبي فاطمه برا خودها خل انطلقها وهي ليك
فاليرو:جديات تحكي؟
محمود:اي والله لاكن قولي شن اسمها التاني نعرفك نحبها حق ولا لا
فاليرو:اسمها اللّى
محمود:دقيقه بس. وخش نادا على فاطمه وطلعت
محمود:يابنت الناس الراجل هدا اولى بيك وانتي طالق خودها حلال عليك خل تكمل العده بس
فاليرو فرح :وربي منور هي ووصل فاطمه لحوش اماليها ومشي فرحان
اما محمود قعمز يبكي من الفرحه وانه اتأتر هلبا
وبعد فتره تزوجها فاليرو وحصلت اولاد واحفاد ومن ظمنهم اني
🌚😂😂😂انبصر انبصر قصدي بجديات مفضاني كتبت هدا كله عالفاضي
تخايلو جديات صارت واني نطلع حفيده الطلياني😂🌚 نقعد كل فتره نمشي لايطاليا نقوللهم لازم نزور جدي وعيلته🌚حقي ولا مش حقي😂
خل جديات نكتبلكم شن صار لما حكاله فاليرو
محمود: شتقول انت وضربه بوكس
فاليرو:انحبهاااااااا و
وجاه بوكس طيحه عالوطا وبدي فيه ضرب لين خلاه كله دم
محمود:ياحقير تبيني نضحكلك عالكلام إلي قلته وقعد يضرب فيه
فاليرو:وربي يااني ياانت وتو تشوف
اما محمود وروح للحوش قلب الدنيا على فاطمه وهي يناري مش فاهمة شيء وبعد ايام هدي الوضع ورجع محمود طبيعي مع فاطمه وفاليرو معاش شافه تاني
رجع فاليرو من ذاكرته وهو حاط الارقيله قدامه ويارقل
برونو:تي فوتها ياراجل تحشم بصغارها واحفادها راهي
فاليرو:اني مش عليها هي ربي يهنيها هي لاكن الكلب راجلها الضرب إلي خديته منه والله ماني ساكته عليه
برونو:شن بتديريله وهو رئيس البلديه بتضربه متلا باش تاخد المره هادي سنين حبس
فاليرو ابتسم على جنب بمكر: بنقتله وناخد مؤبد😏
برونو ضحك:نتوقع كل شيء الا انك تقتل تي فوته ياراجل وعيش حياتك واتزوج ودير صغار الهى بعمرك
فالير:حرمت على روحي النساوين كلهم من بعد اللّى
برونو:تي شن حرمت على روحك اني نزوجك غير انت اشر بس نعطيك حتى اختي
فاليرو شافله 😒:خيرك انت اختك زايده عليك ولا شن كل متشوفني تقولي نعطيك اختي تي ياراجل مش بالسيف هي اختك خليها عندك
برونو قعد يضحك: تي باهي الزفت اني من حبي ليك بنعطيك اختي خيرك
فاليرو:من حبك ليا؟؟ قصدك بتبليني بيها وهي منظرها استغفر الله يارب لاتعرفها ولد لا بنت
برونو:خيرها😂ياكلب عاديه والرب
فاليرو:تي قاصتلي شعرها لودانها وموليه طرف لوحه طويله قريب اطول مني ومعمريش شفتها مساويه روحها ديمه وهي مبهدله شكلها زي الاولاد
برونو:تي ماهو عايشه بين سته اولاد شن نبيها تكون اكيد زينا
فاليرو:منلاخير اختك منبيهاش بالسيف هيا 😒نوض من بحداي ترا خل نمشي نفكر كيف اندير مع إلي اسمه محمود
برونو:الرب يهديك نعديلك ديمه عند الرب
فاليرو: أن شاءالله
طلع فاليرو ركب سيارته وقعد ماشي ويفكر لين فجأه
بوووووووووم بوووووووووم عنجد بووووووووم
قبل دقائق
غزاله:يما نبي نمشي لبنت جيرانه بالله
امها فاطمه: خليها غدوه توا بوك ماشي للخدمه والدنيا ليل وخوك محمد طالع من بيرفعك اقعدي للصبح تو نمشي معاك
غزاله:حاضر
سعده :حاسه روحي مش مرتاحة
فاطمه:خيرك اسم الله ان شاءالله خير
سعده:مشعارفه والله نحس بضيقه وخنقه ربي يستر
في البلديه
محمود:يااسطى ديرلي شاهي ترا
الاسطى:حاظر افندي
محمود: انت والي وراك غدوه تستلمو للملفات وامشو لوادي الربيع وانت ياعيسى بعد ساعه ارفع الختم للعماره انتو خودو السلاحات وخليكم في باب المركز
وقعد يعطي في كل واحد شن يدير وكلهم يردوا حاضر افندي وركب سيارته وكان طالع بيمشي للحوش نسي وراق بياخدهم وبيمشي لوادي الربيع تقريبا
وهو ماشي في الطريق شاف فاليرو قدم عليه بالسياره بيكلمه لاكن فاليرو كان يفكر وماشي فعالم تاني لين فقد السيطره على السياره وكان في جزيره وخشو السيارتين فبعض وجت خشتهم في الجزيره بالزبط
إلي واضح أهنئ أن سياره فاليرو هي الغالطه
.
.
.
.
.
.
.
قبل دقائق ،،:
غزاله:يما نبي نمشي لبنت جيرانه بالله
امها فاطمه: خليها غدوه توا بوك ماشي للخدمه والدنيا ليل وخوك محمد طالع من بيرفعك اقعدي للصبح تو نمشي معاك
غزاله:حاضر
سعده :حاسه روحي مش مرتاحة
فاطمه:خيرك اسم الله ان شاءالله خير
سعده:مشعارفه والله نحس بضيقه وخنقه ربي يستر
....
في راس الشارع
محمد ينادي بصوت مخنوق بصوت واحد ماسك دموعه بالسيف:يا اعمرررر اعمرررر
طلع يجري اعمر وحكاله ومشي معاه
رفعو الحاج محمود للمستوصف وتاني يوم طلعوه لطرابلس لان فيها مستشفيات قعد سبعه ايّام في المستشفى وتوفى
ودارتله عزي كبير والأحباب والأصحاب كلهم جايين
وأمه سعده ماسكة على لسانها غير :بنموتتت بنموتتت جيبولي بناتي بنموووت
وفاطمة تهز في راسها لانها تعودت عليها هادي خامس مره اتديرلهم فيها لقطه انها بتموت يغمى عليها واتنوض اتقوللهم راهو بنموت نادولي بناتي نشوفهم قبل منموت دارتها مره لما مات راجلها وناضت تلهد زي الحصان مفيها شيء ودارتها مره لما ماتت اختها تقريبا ومرتين تانيات منعرفش امتى وهادي المره لما مات ولدها. عموما هي أغمى عليها وبناتها التموا يبكوا وحاله وتاني يوم ناضت مفيها شيء 🙂
وفي تاني اسبوع من وفاته التموا الجيران عالكسكسي واللحم الكبير
فاتت فتره وجت الأربعين متاعه هديكا الفتره امه تعبت هلبا هلبا يقولولهم رقدوها في الاسبيتار لاكن ميبوش كانو يفكروا ان للعزوز مشاءلله عمرها 105 كان حطوها في الاسبيتار تو الناس يقولو عليهم حادفين للعزوز بعيد عليهم باش تموت بدل ميخلوها ويهتموا بيها وهي اصلا خلاص عمرها انتهي ف خلوها عندهم لاكن يهتموا بيها ادويتها وماكلتها وهك
ورابع يوم في الاربعين متاع الحاج محمود توفت امه سعده 💔رحمهم الله
تالت يوم من وفاه سعده فراق السو الامر الدنيا كلها علعصبان والكسكسي واللحم والسلايط وكل ماتشتهيه الأعين والابطن (يقصد بالابطن جمع البطن اَي المعده ليس الابط 🙂)
(لما جداي حكتلي على فراق السو متاع جداي التانيه قريب هبلت قلت ياريتني حضرته🌚😂)
فاليرو تعب هلبا من الحادت وبعدين توفى على فكره هو في العمر تقريبا 45 هكي كانوا يحققو معاه الشرطه كل يوم وعلى اساس انه بينحبس بعد ميطلع من الاسبيتار لاكن ربي خدي امانته
في عام ال
94 محمد خطب فايزه اخت سيف هو كان حاكي في الموضوع من قبل السنتين هادوم بس انشغل بموتت بوه وجداه وخدمته دارو العرس في نهايه العام تقريبا
بنحكيلكم اول يوم في الخطبه شن صار؟؟
فاطمه كانت مقعمزه ومش عاجبها شيء لانها تبيه باخد بنت خوها الاكبر منه بسنيين عديده 🙂💔 كانت مقعمزه جنبها ام فايزه وعمتها او عماتها الزوز منزبطش وطلعت فايزه بتقدم القهوه وعطتهالها بكل احترام وفاطمه تشوفلها من فوق للوطا خشت فايزه للمطبخ وقعدت تضم وتحوس جتها عمتها
عمتها:قتلك فايزه تعرفي عزوزتك شن حكت عليك؟
فايزه:شن🙄
عمتها:قالت هادا اختيار الولاد عليك راي
فايزه سكتت
محمد اختارها وقال ميبيهاش بيضه لاكن يبيها حرفه من قبيله ال******* لان ياكبدي القبيله مشاءلله واعره
ودارو العرس من اول يوم محمد قال نبي مرتي بالردي وفايزه كانت متزوجه من الشيء هدا بس كانت تمشي بكلام بوها المرا تطيع كلام زوجها
كان كل ميشوفها هي وخواتها الزوز الي اصغر منها على طول نفس الكلام يقوللهم فيه المرا تطيع زوجها ولو غضب عليها راجلها الجنه متشوفهاش تبتت في دماغهم هي وخواتها الزوز وقعدوا يطيعو في ازواجهم باي شيء يقولو
فايزه لما خشت لحوشها كان مش مكمل لان محمد مكانش عنده خدمه تابت عليها كل مره خدمه يعني وفنفس الوقت لما توفى بوه وقف على خدمه حوشه ف شري دار كملها بس وباقي الحوش زي ماهو وشري فرش بساطات يعني بس الطبخ فاضي التلاجه فاضيه مفيش غاز مفيش صالونات في الصاله مفيش ادوات مطبخ يعني الحوش منفض تماما
وحوشه كان فوق حوش امه وابوه
(دوختكم الحوش دورين محمود قبل باش قلتلكم دار حوش فوق امه وبوه ؟؟ قالتلي جداي مفيش منها الدوه هادي وانها عاشت مع عزوزتها وشيبانيها فنفس الحوش لان هما عندهم ولد واحد بس اصلا ف الحوش بدي لمحمود ولما ماتو محمد كان يبني فوق امه ف هيا هادي أن شاءالله وضحت كويس بس)
قعدت فايزه تنزل لوطه تحوس وتضم وتعب وحاله لين حملت ب اول ولد لمحمد الي هو "محمود" 🤤ربي يحفظه مواليد ال95 محمد فرح بيه هلبا
وفات سنتين وجابت بنت "ملك "97 😁وبعدها جابت ولد "عماد "98 🙂
غزاله كان عمرها تقريبا 30سنه ومزال متزوجتش وكانت ديمه تحلم بنفس الحلم وتحكي فيه لامها ونساوين خوتها
الحلم انها تخش الحمام بتدوش وميصيرش تطلع من الحمام
وفيوم من الايامات حلمت نفس الحلم بس خشت ودوشت بعد فتره جوها خطابه من طرابلس وصار نصيب
منحكيلكمش عالمعاناه الي عاشتها فايزه مع عزوزتها وحماتها ؟؟ اني صح مشفتش بعيني لاكن سمعت وشفت توا الي يصير قدامي واكيد مش حنكدب عيوني
فاطمه كانت بنت ولدها سعيد الكبيره "اسمها هاجر"ديمه معاها وفي عرس غزاله صارت منهم مواقف هلبا لفايزه ومنهم
ولد سعيد دخل الصواني الكبار لان كمل العرس خلاص غسلوهم الرجاله برا ودخلوهم
ولد سعيد:جداي وبن نحطوهم الصواني؟
فاطمه شافتله لفايزه وقلبت عيونها:حطهم في المطبخ الفون تحت السده
ولد سعيد:به
فايزه:لا ياعمتي وين في المطبخ كيف غاسلاته والله تعب حطوه عالسطح في دار الخزين
فاطمه: هو المطبخ فوق مفيشي شيء اصلا علاش تعب
فايزه:والله ياعمتي منقدرش نخليه هك لازم انظفه حتى -لو فاضي باس يدير غبره وتراب
فاطمه قلبت وجهها خلاص ودارت روحها متعفلقه وفعلا ولد سعيد رفع الماعين وحطهم عالسطح في دار الخزين
فات الوقت وطلعت فايزه تسيق في القراج هي وبنت سعيد "اسمها حوراء"
وجاها محمد يرعد ياكبدي إلي في الحوش كلهم قعدو يسمعوله
محمد:خيرها اميييي😡😡من كلمهاا
فايزه:مشعارفه😕
محمد:شن قلتيلها قتلك انييي شن قلتيلها الا احكي😡😡
فايزه:مقلت شيء😕
محمد:حوراء خيرها امي؟
حوراء شافت لفايزه ولمحمد وهي ترعش يناري عمرها وقتها تقريبا 16يعني تفهم وفاهمة الموضوع بس هي تحب فايزه هلبا واكيد مش حتخبر فيها :مشعارفه
محمد:توا تحكي خيرها احكي😡علاش نتكلم فيها متردش وجوها اخيي
فايزه حكتله
محمد:تي شن دخلك فيها لا انتي شن دخلك بأمهم الماعين ؟
وقعد يحطلها في كلام اشكال انواع بصوت عالي حتى ولاد سعيد الكبار يسمعوا وطلع مشت فايزه وهي بتبكي خلاص تو باش حوشها وحقها فاتت كانت بتركب فوق لقت هاجر وفاطمه مقعمزات ويشوفولها بشماته فاتتهم ومشت تبكي بعدين في الليل خشت فايزه الدار الكبيره بتغير لواحد من صغارها لقت فاطمه وهاجر مقعمزات وقدامهم صونيه معبيه شواء"قلايا" وحكك راني وهدرزه وضحك بصوت عالي لما شافوها سكتوا بدلت للصغار وطلعت
به انتي إلي اسمك فاطمه لما شفتي ولدك قلبتي وجك علاش ؟ ودرتي روحك متعفلقه علاش؟؟ لما عارك مرته عخاطرك قعدتي تضحكي؟؟ اكيد بتقعد فخاطرها وتوجعها ولاه؟؟
صراحه اكتر من موقف صارم بس اني بحكم اني بنختم الجزء هدا بسرعه ف مش حنكتبهم كلهم يكفي انك عرفتوا طبيعه العلاقه بين فاطمه وكناتها وكنتها فايزه غير عن سالمه ونعمه وحنحكي بوضوع اكتر في الجزء الي بعد هدا أن شاءالله
تزوجت غزاله من طرابلس راجلها كبير شوي ومتزوج من قبل ومرته ميته وخدي بعدها وحده تانيه برضو توفت وعنده صغار من التانيه تلات اولاد وسبع بنات مشاءالله ف عاشت غزاله في طرابلس وتأقلمت والجو مليح
اما فايزه ف بعد عماد جابت اميره
يوم 30.12.1999 الساعه 12 في الليل ولدتها والدنيا كانت مقلوبه العاب ناريه واحتفالات بدخول العام الجديد ف معرفوش امتى يسجلوها يعني يسجلوها 99 ولا 2000؟؟ لاكن ولد سعيد قال سجلوها 2000 افضل لانها الساعه 12
وعاد من وقتها والكلبه اميره شايفه روحها والي يسالها قداش مواليدك ترفع راسها وتحكي بفخر قال شو؟؟ قال العالم لع يحتفل لما اني جيت😒😒تي روحي امشي
واحم بعد الكلبه اميره وفي عام 2003 يؤم 26 شهر 2 ولدت اجمل واحلى واروع واحسن وافضل بنت في العالم إلي هي اني😁😌😌😌ربي يحفظنا وخلاص كلا اني عسل منلاخير😌😁
وفي سنه 2005 ولدت مجاهد اني وياه قطوس وفار
وبعده جابت ولد ومات وبعدين جابت رغد اخر العنقود ربي يحفظ الجميع❤️
حنحكي في التفاصيل الجزء الجاي
الجزء هدا حبيت نحكي على حياه جداي كيف كانت في طفولتها ولما كبرت وشن قصه الطلياني إلي حبها وحباته لاكن هي حياته حب طفوله على انه بوها وكانت تقوله بابا وهو كان فتره مراهقه حبها لين كبر وبدي شيباني
الجزء التاني حنحكي على حياه الاحفاد وكيف عاشو حياتهم بتقاليد والعادات وحياتهم بحلوها ومرها
لهني توصلوا للختام وان شاءالله تكون عجبتك ونكون خفيفه عليكم
صراحه اني منحبش نكتب نصائح وهك في نهايه القصص ف اب بس هي سلامات نتلاقوا أن شاءالله
❤️✨
متركزوش عالاخطاء الاملاىيع لان نكتب بسرعه والكيبورد يخرط 🙂...
#سوبي محمد