احببت طلياني 💞(مكتملة)الجزء الاول

الحلقه الاولى(المقدمه)

المقدمه والحلقه الاولى 😁

بسم الله الرحمن الرحيم
الصلاه والسلام على اشرف الخلق سيدنا وحبيبنا محمد عليه افضل الصلاه والتسليم❤️
روايه احبني طلياني 💞
للكاتبه 😍
😈سوبي محمد☠️

نبدو على بركة الله
..بسم الله

في حاره  صغيره شوارعها ضيقه احياشها متقاربه فيها اصوات عاليه بس حلوه
اصوات شعبيه مليئه بالسعاده والفرح ☁️--🌘

في إلي نايض من الفجر ماشي للبحر يصطاد زي الحاج المهدي💞 ...

حوووت حووووت ...حووت يلا من يبي يشري حوووت 

وفي الي مجمع كم حاجة من الشارع وشاري حاجات ومساويهم بروحه وعنده حاجات شاريهم زي الحاج فتحي ....💚

...خردوات خردوات اي شيء موجود أهنئ بلاستك وحديد

وفي الي متأتر بباب الحاره وابو مرزوق😂انبصر انبصر
في الي يطلع من الصبح المزرعه متاعه وياخد الخضروات والفواكه الي مقطعهم هو والفلاحين وجاي يسترزق بيهم زي الحاج مصطفى ....💜

...طماطم يابندوره  خيار ياخيار .. قرعه قرعه خضرا

وفي غيرهم وغيراتهم

شوارع بعضها ضيق وبعضها واسع اسواق مفتوحه 
في نساوين فايتات بالفراشيات بيمشو لسوق القماش (خالتي خيريه وعاتكة جارات وام خيريه مرت عم عاتكة)

وفي إلي ماشيه لحوش جارتها بتهدرز  هيا وجاراتها مع  طويسه القهوه  الي ريحتها تسهف طالعه عالشارع❤️(عمتي ام الخير وام السعد ونجيه جايات عند نوراه يهدرزو )
وفي الي ماشيه لحوش عربها(عيله راجلها) بتشوف عزوزها وشيبانيها وبتهدرز عليهم 👨‍👩‍👧‍👦(عفاف)

وفي زوز ولاد( فتوح وصلوح هه  هادوم ولاد خاله وولاد عم  ديمه مع بعضهم  نولدو في نفس اليوم ونفس الساعه سموهم اسماء مشابها مش اسم الدلع هدا لالا هدا اسمهم هك صلوح وفتوح ههه حلوات الاسماء وهادوم ولاد نصر وعبدالله خوت و مناسبين بعض)
واقفين في نهايه الزنقه يلعبو في حيلاّ(وبيس) ..  صوت ضحكهم عالي لعبه بسيطه بس قادره انها تفرح طفل ياما فرحنا ولعبنا 👨‍👨‍👧
ههه قلتلكم حارتنا فيها الحب كبير

وفي ولد (حسين ولد عمي مصطفى الصغير )ماشي للمحل بيشري حاجات امه تبيهم بتطييب بيهم الغدي  ههه هدا  ديمه امه تعارك فيه يحب يرقد هلبا 😅
وفي وفي ....
ف حارتنا متلقوش غير الاحباب والصحاب عمره مكانت المشاكل عندنا ولو في مشكله في حوش من احياش الجيران الحاره كلها يحاولو يحلو المشكله ❤️الحب والود لحارتنا

(حسيت روحي نتكلم زي  إلي اتدير في اعلان عالزيت العافيه 🙂🌚)

حارتنا ناسها طيبين وديمه ملتمين عيله وحده مشاكلنا وحده الي عنده قرش يقسمه بينه وبين ولد جاره هك تربينا وهك تعلمنا من جدودنا ❤️

فتحيه: امييي كلمي ولدك
مبروكة: خيركم صوتكم عالي عيب راهو
فتحيه:كلميه الفرخ اهوا
مبروكة:تحشمي هدا خوك شن الفرح هادي احترميه
علي:امي قلتلها الفرخه اهيا  معاش تطلع قدام الباب ولد مصطفى يشوف فيها😡
مبروكة:هييييي يشوف فيك هكي ياخايبه يالي متتحشميش بعدين علاش طالعه انتي
فتحيه:يا امي والله كنت لابسه محرمه(شاربه)ومغطيه وجهي كويس حتى انه مشافنيش كنت انكلم في حواء نبي منها  الخاتم الفضي
فتحيه:اها به كان هكي باهي وانت ياوليدي تربح معاش تشدلها شعرها راهو بيتقطع ووخيتك شعرها شويا
علي:معاش توقف في الباب اخر مره انقولهالها كان تبي حواء تمشيلها لحوشهم اهو خطوتين هوا
فتحيه:باهي حاضر ياوليدي معاش تعصب روحك بس انحطلك غداك؟
علي:لالا ماشي اني والاولاد عالبحر قولي لبوي باهي
فتحيه:هيييي قصدك مقلتلاش انك بتمشي نهاري الابيض والله لاما يديرلي نهار احرف على راسي تربح سلم ولدي شاور بوك قبل
علي:يمي يعرف هو قتله امس بس -لو سال عليا قوليله اني مشيت مرات نسي معقوله نمشي من غير منقوله؟
فتحيه:به برا سلم ولدي طريقك بيضه ربي يحفظك وردبالك من روحك  وبالشوي عليك في البحر راهو هلبا مشو فيه ومعاش جو بعيد الشر عنك
علي:حاضر يمي اهم شيء رضاك
فتحيه:ربي يرضا عليك دنيا واخره يوليدي مربوحهً

ومشي علي مع ولد مصطفى(مختار)وولد منصور جارهم (توفيق) وولد عبدالله(عمر)اعمارهم قريبه من بعض وهما اقارب من بعيد وجيران فنفس الوقت
مدايرين زرده عالبحر

في الحوش المقابل  بالزبط
احمد:ياعيشه ياعيشه
عيشه:نعم ياحاج
احمد:وين غني بنرفعه معاي للجامع
عيشه:هي هي اهو نغيرله في دبشه(حوايجه) بس شوي ويجيك
احمد:باهي بسرعه شوي

شوي وطلع غني خداه بوه ومشي بيه للجامع يبيه يتعلم القران
......
استغفر الله العظيم واتوب اليه 💞
استغفر الله العظيم واتوب اليه💞
استغفر الله العظيم واتوب اليه 💞
لاحول ولا قوه الا بالله 💚
لاحول ولا قوه الا بالله 💚
لاحول ولا قوه الا بالله💚
لا اله الا الله محمد رسول الله ❤️
لا اله الا الله محمد رسول الله ❤️
لا اله الا الله محمد رسول الله❤️
اللهم صلي وسلم وبارك على سيدنا محمد💜
اللهم صلي وسلم وبارك على سيدنا محمد💜
اللهم صلي وسلم وبارك على سيدنا محمد💜
...

والباقي تتعرفو عليهم مع الحلقات
شن رأيكم فيها حلقه قصيره كمقدمه  باش تعرفو شوي على بدايه الروايه مش حنعرف عالشخصيات اكتر من هك  تؤ تعرفوهم بروحكم  😅

.....يتبع