وضاقت الأرض بي

البارت الواحد والثلاثون

#وضاقت_الأرض_بي

للكاتبة #لبنى_الموسوي

خلص الدوام سريع
ظلينة ننتظر واحد منهم يتصل حتى نطلع
شوية وخابر جمار گال اطلعوا الضبع بباب الجامعة واگف الكم

وفعلاً اول ما طلعنة
لگينة گاعد على بنيد السيارة
بس شافنة نزل ع السريع فتح النة الباب بدون ميباوع

صعدنة وظلينة طول الطريق ساكتات
لأن تعبنة من الدوام شوية ووصلنة البيت ريحان نزلها وراها اخذني للبيت

بعدنة نمشي مسافة
لمحنة هوسة گبال بيت الشيخ
ساق ايوب سريع لحد وصلنة يم الباب ما اشوف إلا صخر واگف بنص الزلم ودمة على طولة

نزل هو يركض واني بقيت بمكاني
ما اگدر اتحرك الزلم تارسين البيت شفتة سند صخر واجة للسيارة فتح الباب گال انزلي خوية بسرعة

نزلت واني اباوع علي
چان راسة ينزف بشكل مو طبيعي
صعد حنظل بالصدر وإلياس يم صخر لازم الغترة ومثبتها على راسة لأن الظاهر ماكلة ضربة علي

رادوا يتحركون باوعلي ايوب
- فوتي للداخل بساع گبل لا نمشي

بس حچاها رحت طبيت
بعدني يم الباب هجمن علية النسوان
كلها تصيح شصاير وشبي صخر اما الحجية گاعدة بالگاع تبچي وتدگ على راسها

عفتهن ورحت گعدت يمها
- يمة لا تخافين

والله ما بي شي
حتى چان واگف على طولة بس الظاهر ماخذ ضربة على راسة

- نجيبة ولچ
اندهيلي اعلة وليدچ خن نعرف شني صاير ويا عمة

- اي عمة صار

طلعت تصيحة شوية ورجعت هي ويا
اباوع علي دشداشتة متروسة دم لعد خطية شگد نازف صخر الي هيچ حالتهم صارت

- امري حبوبة

- يمة شمالة عمك احچي

- متعرض الحادث سلابة بالدرب وضاربي اعلة راسة

- يمة سودة بوجهي ان شاء الله
وشنهي العمل خاطر يخلص منهم ما عرفت

- لا ما لحگنا نعرف شي
عبن اجة الضبع واخذوا هو وابوي للمستشفى

- لون سمعت اي شي عنهم تعال خبرنا مو تنسى وليدي

- تامريني امر

حچاها وطلع
باوعت الود دتلعب ويا الجهال وثناء يمهم
صعدت الغرفتي غيرت ملابسي ونزلت ع السريع لگيت الحجية دتحچي ويا إسحاق بالتلفون

ظلت تبچي وتصيح
شلون تريدني ارتاح وآنه ما اعرف وليدي شبي
وكل شوية تعيد الجملة الظاهر ديحاول يهدي بيها

بعدني واگفة يمها اسمع
ما اشوف إلا مسحت دموعها بالشيلة ومدتلي الجهاز

اخذتها منها إسحاق بعدة ع الخط
معناها يريدني رحت للمطبخ حتى احچي ويا لأن الصالة هوسة كلش

- الوو

- شلونچ بوية

- الحمد لله انت شلونك

- برحمة الله
غسق احچيلي صخر بي شي وما راضين يخبروني

- لا والله مابي حتى شفتة بعيني

- وشنهي الصاير گولي

- ما ادري
بس رجعت من الجامعة ويا ايوب
شفنا بالباب واگف الدم على طولة والزلم داير مدايرة

بعدين عرفت من ابن اخوك
متعرض الحادث سلابة والظاهر الضربة صايرة على راسة

بس ليش تسأل ؟!
شنو ما اتصلت بيهم هو احنة نريد نعرف منك شديصير

- لا اتصلت
وحچوا ذات الحچي السمعتة منچ هساع
سلابة محاصري اعلة الدرب الخارجي وضاربي براسة

بس تالي اجت شاحنة حمل
بيها اكثر من زلمة ولمن تنوعوا للموقف گدامهم
نزلوا خاطر يعينون صخر والحمد لله گدروا يخلصوا منهم

- اي ألف الحمد لله،، رب العالمين ميگطع

- يلا بوية محتاجة شي

- انت وصلت البغداد

- اي وصلت
بس وراي شغل لو ما مهم چان عفتة واجيت

- لا وين تجي
عفية دير بالك على نفسك من الطريق حادث صخر خوفني عليك

- لا تخافين بوية
ما يصير إلا الكاتبة ربچ بس گولي يا الله

- يا الله
مع ذالك دير بالك زين
وبطل ترجع الفجر تعال بالنهار احسن

- هههههه
عودن عليش هالكثر جاي توصيني !!!

- اخاف عليك غير

- ليش

خجلت وما عرفت شنو المفروض اجاوبة
ظليت ساكتة
شوية وسمعتة يضحك وراها گال ديري بالچ اعلة روحچ وفصل الخط

للعصر جابوا صخر
الحمد لله عدت ويا سلامات
بس كذا خياط براسة لأن ضاربي علي اكثر من ضربة

اجت ريحان تبچي واصللها الخبر
وراها انترس البيت بالنسوان عماتهم وبناتهن من غير المعارف والجيران

ما اعرف ليش بكل مناسبة يتجمعون
حتى لو چانت متسوة هسه مثلاً صخر تعبان كلش
يعني وقت زيارات؟!! ميعرفون زيارة المريض لازم تكون خفيفة 

رحت للمطبخ وبلش الشغل الميخلص
دنسوي بالعشى دگ جهاز ثناء چانت واگفة بصفي گالت هاي شمس

- جاوبي خطية اكيد عرفت

- مو داحمس باللحم انتِ جاوبيها

نشفت ايدي من الماي وطلعت برة
صعدت الغرفتي فتحت الخط سمعتها تناشغ من البچي گبل گلتلها اهدي ترى ما بي شي

- غسق هاي انتِ
عفية احچيلي صخر شبي اترجاچ گولي الحقيقة

- والله ما بي شي
حادث بسيط والحمد لله عدت سلامات

- اي گال حبيب متعرضيلة سلابة
لعد اذا هو بخير ليش الي فوگ العشر دقايق اتصل وميجاوبني

- ما ادري صراحة
بس والله صار زين وحتى هذا وينة موجود بغرفتكم

- وحدة لو يمة احد

- لاوحدة

- عفية روحي شوفي خاف بي شي ومتدرون

- هسه انتظري

حچيتها ونزلت
ما اگدر راوحلة للغرفة ظليت اباوع بالصالة
شفت بت إلياس دتلعب يم الحجية صحتها اجتني تركض

دزيتها تشوفة شوية ورجعت
گالت عمة نايم رجعت الموبايل الاذني ها خو سمعتي بنفسچ نايم الرجال لذالك مديرد عليچ

- غسق اريد اجي شلون

- يمعودة وين تجين شبيچ تخبلتي

- ادري شلون اظل هنا وصخر هذا حالة

- عادي مثلچ مثل حبيب مو گاعد وياچ وساكت

- ماشي عود اشوف شلون ترهم
راح اسد الخط هسه بس شيصير اتصلي بيه عفية

- تتدللين

شمس..  سديت الخط منها وظليت الوب
لا ساعة ولا ساعتين ردت بس اسمع صوتة حتى ارتاح

قريب العشرة
گاعدة بالغرفة وحدي احاول ادرس دگ الجهاز
باوعت من بعيد هو اني شفت اسمة لو طفرت من مكاني جاوبتة بلهفة

- حبيبي شلونك واخيراً اتصلت

- ها حياتي شمالچ هدي

- متت صخر
دمي نشف من الخوف عليك شسويت بية

- سلامتچ بوية
انتِ ياهو الگالچ حبيب ؟!!

- اي
هسه احچيلي
شلون صار هالشي معقولة فرات ورى الموضوع

- لا يابة شمالچ
كل طلابة والاخرى صحتي فرات
سلابة جايين ينهبوني ولمن ما سلمت الهم طگوني وانتهت السالفة

- موجوع

- شوي
بس هساع صرت احسن عبن سمعت صوتچ

- صخر بعد لتجي
الله يخليك لتعتب بغداد اصبر لعطلة نص السنة واني اجيك

- شو دسكتي

- صخر فدوة
اذا تحبني صدگ لتجي والله اخاف عليك

- تنوعي شمس
آنه بيچ بلياچ رايح راد البغداد
ما اجي اعلة تالي العمر اگطع رجلي من يمها
والله شني تعرضت الحادث عابر حتى ما يسوة ينحچي بي

- بس انت عندي تسوة هواي
صخر اني مالي غيرك بالدنيا ليش متستوعب هالشي

- وآنه ما اعوفنچ ريحي رويحتچ يرويحتي انتِ

- اذا تريدني ارتاح لتجي بعد

- ما اگدر اوعدچ بشي آنه اعرف ما راح التزم بي

- زين لعد عندي حل وسط يرضيك ويرضيني

- وشني هالحل

- تعال بس بالشهر مرة مو كل اسبوع
يعني احنة هسه ببداية الشهر على نهايتة سويلك جية شگلت

- وآنه اظلن كل هالمدة ما شايفچ !!

- وداعتك عندي اني اشتاقلك بالدقيقة سنة
واتمنى ويا كل رمشة عين والثانية اشوفك گدامي بس رغم كل هذا اخاف عليك كلش

مو كافي بسببي افترقنا
هسه تريدني اخسرك وهم اني السبب غير اموت والله

- اسم الله اعليچ لا تحچين هيچ

- لعد وافق حباب

- احاول

- لا مو تحاول اريدك توعدني

- اوعدچ بوية ولا يهمچ

- اموت عليك يروحها الشمس

- وآنه بعد اموتن اعليچ
بس تعالي حاچيني شلون بـ هالطلابة
اليوم چنت جارچ وهساع مشتاگلچ بكثر رحمة الباري

- هههههه
شلون يعني مشتاقلي ممكن توضح

- بلاية هالمياعة ولچ جوزي عاد

- ههههه
بلا هسه اني شسويت

- لا بوية شنس مسوية قابل بس سامطة جد جدي

- هههههه
وجدي هم مسموط ويا جدك ترى

- ههههه
خلي الوادم نايمة بگبورها ولچ

ظليت اسولف ويا بالنص ساعة
ارتاحيت شوية من سمعت صوتة وتأكدت ما بي شي لذالك گدرت انام

الصبح جهزت نفسي شوية واجاني حبيب
طلعنا للدوام قريب العشرة چنت گاعدة ويا صديقتي بالحديقة تفاجأت بفرات سلم علية

بس شفتة گبالي گمت سريع
اخذت غراضي داروح لزمني من ايدي سحبتها منة حيل

- لتتجاوز حدودك وياية احذرك

- ممتجاوز بس اريد احچي وياچ شوية

- ليش اعرفك تعرفني حتى تريد نحچي

- ابن عمچ غير

- هه اول مرة ادري عندي عم تصدگ

- عيني ممكن تعوفينة شوية

- لا نرجس ظلي هسه نروح سوة

- احسنلچ تسمعيني شمس

باوعتلة رافعة حاجبي
لخص بسرعة وياريت تحچي شي بي حظ

راح گعد ع المصطبة وايدة بجيوبة
انتظر صديقتي تروح شوية وگال شايفچ شردتي من البصرة بسرعة

- وليش داشرد
بس اكمل هالسنة ارجع الها ببغداد مالي عيشة بعد

- يعني مرتاحة هناك

- كلششششش فوگ متتصور صدگني

- هه حلوة والله
اول مرة اشوف بت المدينة ترتاح يم ابن الريف الجاهل الهمجي 

- دير بالك تحچي على صخر
هذا ابن الريف الما عاجبك رجااااااال
حتى النعال رجلة متگدر توصل خاف متدري

- راح تندمين
راح يجي يوم وتندمين بي شمس لأن فضلتي واحد مثلة علية

- هههههه
ضحكتني تصدگ
اكو وحدة يدخلوا للجنة ويندم لأن طاوعهم

من يوم ما خطبني صخر واني دخلت للجنة
خلصت من نار حقدكم وطمعكم بية ورغم كل شي سويتة وراح تسوي يا فرات بس مگدرت ولا راح تگدر تبعدني عنة تسسسمع

- اني ما سويت
بس تگدرين تگولين هو النحس
مجرد حط عينة عليچ كل شي بحياتچ تغير

اهلچ ماتوا
بيتكم احترگ
علاقتچ بعمامچ انهدمت
مدينتچ وتركتيها
شظل بعد ذكريني خاف نسيت شي

- انت بس تخيل
مموافقة على صخر وقابلة بيك
يمامي ع الحياة الحلوة الراح اعيشها وياك يمامي

- ترجعيلي وداعتچ
ومو اي رجعة مكسورة وتتسولين بس حتى اقبل اباوع بوجهچ

- ههههه
الثقة عندك شي خيالي
وزع وزع ع الناس حرامات نعمة الله خليهم شوية يستفادون منها

وهسه كافي ترى دوختني كلش
عبالي راح تحجيلك كلمة بيها خير
نسيت انت فارغ وراح تظل كل عمرك فارغ وسخيف

- ههههه
دشوفي بس السخيف شراح يسوي بيچ

- يمة يمة خوفتني فاندام
استقر شوية هو انت سوي براسك حظ اول عود بعدين سوي للعالم هي يا الله

حچيتها ومشيت
ابد ما هزني كلامة ولا شعرة
قبل چان مسيطر كلش لأن گاعدة ببيتهم

بس هسه اني بعيدة عنة
كل شي ميگدر يسوي شو حتى املاكي وصفيتهن شعندي قابل يحاربني بي

رجعت للبيت ويا حبيب
گبل خابرت صخر اتطمنت علية وراها تغديت ونمت

هناء.. وصلنة الخبر بالحادث الصار ويا ابن عمي
بلليل ورى العشى امي گالت نروح نزورة فشلة الولد صارلة ايام نايم بالفراش

ما چنت حابة اروح
بس طبعاً امي ما قبلت اظلن بالبيت الوحدي
بدلت ع السريع ورحت وياها وصلنالهم چانوا كلهم گاعدين بالصالة

گامت الحجية استقبلتنة واخذتنة للمضيف
ظليت گاعد ويا البنات نسولف بالربع ساعة تالي اخذني ورحنة الغرفة ريحان

رغم شكثر سولفنة وضحكنة
بس مكان شمس وريحان چان فارغ كلش والكل حس بهالشي

صارت بـ 11 تأخر الوقت حيل
گمت من يمهن اشوفن امي شكلها ناوية تبات يم بيت الشيخ اليوم

صار طريقي على غرفة صهيب
وصلت يمها صوتة چان عالي جاي يحچي بالتلفون

ركزت ويا سمعتة يگول
خلص بسچ من الملحة فكي مني عاد
شوي سكت وراها صاح بعصبية اي آنه مو خوش ادمي شني الرايدتة هساع

فجأة شو انفتحت الباب
صار صهيب بوجهي باوعلي بخزرة وراها اشرلي خاطر اطبن للغرفة

ردت اروح سحبني من ايدي
دفعني جوة وسد الباب ظليت صافنة بوجها
كلش زين شافني من چنت واگفة يم غرفته يعني ما بيها مجال انكر

- شجاي تسوين هنا

- هيچ ماشية لامي واجيت من هالدرب

- وانتِ وماشية گلتي خن اتسمع اعلي شوي من باب الفضول

- لا عاد لا عبالك مهتمة الامرك
ترى كلش مو بعيني ولا براسي فـ عليش اتسمع بعد

- يعني ما تغارين

- كلش

- وعادي عندچ لون تزوجت اعليچ مرة ثانية

باوعتلة فاتحة عيوني
- لا عاد شوف واسمع زين
ترى سكوتي وقبولي بزواجي منك چان الاجل امي مو الغير شي

فـ ابد لا تتصور تذلني واظلن ساكتة
عبن انت تدري هناء ما تسكت على الغلط لو مدري شني يصير

ومن هسه گلي
اذا عندك وحدة ولو واضح هالشي
فـ خلنة من هاللحظة كلمن يروح بدربة احسن الي والك

- لا ما عندي

- چا ويامن چنت تحچي قبل شوي

- مو گلتي ما تسمعت اعليك وما يهمني

- صهيب لا تلعب بـ اعصابي
احچي ويامن خاطر اعرف اتصرف صح

بس حچيتها تقرب علية
صار يمي كلش وحط ايدي ورى ظهري شلون يعني تردين تعوفيني

- يوم الهنا والله

- بس آنه ما اعوفنچ فـ لا تحاولين

- صهيب شني التريدة مني
انت مو ما تحبني عليش مچلب بية بعد

- وياهو الگال ما احبنچ

صفنت بوجها مصدومة
ما احس إلا باسني بلهفة گبل دفعتة وطلعت من الغرفة اركض

ما ادري عليش ضجت حيل
يعني فوگ ما خطبني غصب وآنه ما طايقتة طلع عندة وحدة يحچي وياها

غسق.. بعد ما راحوا خالة وهناء صعدت الغرفتي
غيرت ملابسي وطفيت الضوة توني اريد انام حسيت الباب انفتح باوعت هذا إسحاق گمت ع السريع

- الحمد لله على سلامتك

- الله يسلمچ بوية

- شعجب هسه اجيت

- غير سمعت حچيچ
موش انتِ گلتي لا تجي من الفجر هاي آنه اجيتچ بلليل

- ههههه
ما سويت شي لو جاي الصبح هم احسن من الظلمة

- انتن النساوين كل شي ما يقنعچن
اروحن اسبح جهزيلي شي اكلة عبن ميت جوع

- اي تتدلل

رحت للحمام حطيت ملابسة ونزلت
بين ما سويت العشى لگيتة طالع ودينشف بشعرة
گعد ياكل واني صافنة علي بس الله يعلم شلون مرت الايام وهو مو يمي

خلص الاكل نزلت الصينية وصعدت
لگيتة متمدد طفيت الضوة ورحت يمة بقيت اباوعلة نايم وايدة على عيونة شنو يعني مناوي يحضني ؟!!

ظليت صافنة علي
شوية ودرتلة ظهري ضايجة خلي انام احسن شكلة ما مشتاقلي

غمضت عيوني مخنوگة
ما احس إلا ايدة صارت على بطني وسحبني علي
حط حلگة يم اذني وهمس بصوت هادئ

- شني يصير يعني
لو بس مرة تتجرأين وتجين تحضنيني بدل ما گاعدة تحمسين بداخلچ

بوية تراني زلمتچ
يعني كل شي تعملي وياي حلال
لا هو عيب ولا حتى حرام فـ عليش بعد مستحية هالكثر

درت وجهي علي خجلانة
حطيت راسي على صدرة وگتلة اشتاقيتلك إسحاق

هو سكت واني هم سكتت
ما ادري اصلاً شلون تجرأت وحچيتها بس يمكن هيچ احسن

كلامة انطاني شوية قوية
وشجعني احچي ولو جزء بسيط من الشي الگاعد احسة بداخلي اتجاه إسحاق

فجأة رفع راسي بـ ايده صارت عيني علي
گال وآنه بعد اشتاگيتلچ حيل،، گبل ابتسمت الكلامة

باسني من جفوني ورجع راسي على صدرة
ظل حاضني خمس دقايق ونام لأن چان تعبان كلش
اما اني للفجر ما نمت فرحانة بالشي البسيط الصار بيني وبين إسحاق بهاي الليلة

ريحان.. رجعت من الدوام الضهر
لگيت جمار جاي استغربت موش بالعادة يرجع هيچ وكت

صعدت الغرفتي غيرت ملابسي ونزلت
حسيت اكو شي مو طبيعي وجمار مبين علي ضايج بس ما گدرت اسألة واحنه بنصهم

بعد الغدة غسلت المواعين وصعدت
لگيتة جاي يخابر بقيت اسمع
چان يطلب منهم مهلة وما اعرف شني عرفت الشغلة تخص ديون عمي الله يرحمه

قفل الخط وتمدد بمكانة
رحت يمة حطيت راسي على صدرة گبل حضني وابتسم

- شمالك حبيبي

- ما بية شي حياتي تعبان من ضغط الشغل شوية

- لا بيك
آنه جاي احسن واحساسي ما يخيب

- لا تفكرين اهتمي بدراستچ وبس

- انت اهم عندي من كل شي
احچي شمالك بلكي اگدر اسويلك شي

- حبيبتي شغلة تخص شغلي صدگيني

حچاها ودنگ يبوس بية
اعرفة كلما يريدني اسكت يسوي هالشي خاطر ينسيني السالفة

شمس.. طول هاي الفترة
ظليت ويا صخر بس ع الاتصال وكلما يريد يجيني ابقى اتوسل بية لحد ميقتنع ويگعد

بدت امتحانات الشهر الأول والتهيت كلش
هو هم عافني علمود ادرس زين واحافظ على معدلي

باخر يوم كملت امتحاني وطلعت
لگيت صديقتي گاعدة تنتظرني گدام القاعة بس شافتني اجت

- ها بشري

- جاوبت الحمد لله

- شمس شو وجهچ اصفر شبيچ

- ما ادري يجوز لأن مدانام زين

- لا مو هاي الشغلة
شوفي لو على فراگ الحب لو حامل ماكو غيرهن

صفنت على كلامها
صدگ اني شو بسبب الامتحانات تيهت الأول والتالي

عصرت مخي حاولت اتذكر
اي اخر مرة اجت قبل لايجيني صخر يعني صارلها اسبوعين ماكو

- ها ولچ شبيچ صافنة

- نرجس يمكن صدگ حامل

- اي وشبيچ خايفة هيچ

- ولچ هسه وكتها
متدرين بية مسكربة هبوط وفقر دم منا لاخر السنة شيصير بية

- ميخالف تكضي شلون مچان المهم راح تصيرين ام

- اني راح اطلع

- ليش

- صخر ديجي بالطريق

- ههههه
ليلتكو زي الفل ان شاء الله

- ههههه خايبة دسكتي

- ههههه يربي النوب صارت تحچي مثلهم

ضحكت وعفتها
رحت الحبيب چان واگف ويا جماعتة بس اشرتلة اجاني

- توصلني لأن صخر ديجي

- اي تامرين مرت اخوي بس اجيب غراضي واجي

راح سريع جابهن وطلعنة
وصلني للبيت سبحت وجهزت الغراض اول ما كملت رمشلي صخر

طلعت ع السريع لگيتة گاعد بالسيارة
من گد ما اشتاقيتلة چان يعجبني احضنة بنص الشارع بس لزمت نفسي عنة بالگوة

- شلونك حبيبي

- هساع صرت زين بشوفة عيونچ

- ههههه
مشتاقتلك والله

- مو بكثري
خلينة نوصل للفندق واثبتلچ كلامي

ضحكت ودرت وجهي عنة
وصلنة للفندق طبيت قبلة وهو راح يجيب اكل من برة لأن انتبه علية تعبانة وعرفت ضغطي هابط

جهزت نفسي بين ما اجة
وراها تغدينة وصلينة مدري شبية احس بروحي بالگوة واگفة كل شوية اريد اوگع على وجهي

تمددت ع الجرباية لازمة راسي
شوية واجاني سويت روحي ما بية شي خطية صارلة فوگ الشهر ما شايفني ولازم اعوضة

- بيچ شي حياتي

- لا حبيبي بس گاعدة من الصبح ودايخة

- تنامين شوي خاطر ترتاحين

- شبية تخبلت وانام
صارلي فوگ الشهر مشايفتك حتى ممصدگة گاعد گبالي هسه

حچيتها وتقربت بستة
انشغلت عن كل شي حتى دوختي لحد مانمت بحضنة يلا رجع راسي يفتر

- صخر

- ها يعيون صخر

- اريد اگولك شي بس ممتأكدة منة

- خير ان شاء الله

- اني يمكن حامل

بس حچيتها طفر من مكانة
حتى شمرني بدون ميحس على روحة لأن چنت نايمة بحضنة

باوعلي يضحك
بروح اهلچ تحچين صدگ شمس
چا عليش ما گلتيلي وآنه صارلي ساعة لاعب جولة

- مو گتلك ممتأكدة
بعدين على شنو فرحان متشوف شحالني
هاي عود بالبداية لعد باخر الحمل شراح يصير بية

- شمالچ مثل الورد
واذا اعلة الضغط آنه دوم اصعدة الچ وغمزلي

- ههههه
مو وكت شقاك والله داحچي جد

- شمس
مامش شي بهالدنيا يفرحني غير البطنچ
لون چنتي تحبيني صدگ حافظي اعلي لبين ما تگومون انتِ ويا بالسلامة

- هذا ابني مثل ما هو ابنك
يعني اكيد مراح اسوي شي يضرة بعدين خلي نتأكد عود احچي هالكلام ساعتها

- بوية حامل اخذيها مني
هو آنه يمتة اجيت يمچ غير بس المرة الفاتت
وهاي صارلي اكثر من شهر ما شايفچ ولا مگرب صوبچ يعني اكيدن حامل

- الله كريم احلل ونشوف

- العصر اخذچ للمختبر

- ان شاء الله
يلا تعال احضنك شوية حتى انام راسي انسطر

- سلامتچ يگليبي

حچاها وسحبني الحضنة
بقيت افكر ويا نفسي ما ادري شلون يمر الحمل واني هذا حالي لحد ما غفيت

گعدت العصر على صوتة
گمت بدلت واخذني للمختبر احلل
وفعلاً طلعت حامل احتار صخر شيسوي من الفرحة بحيث من يمي فرحت على فرحته المتنوصف

رجعت للفندق خابرت خالتي بشرتها
وفرحتها ما چانت تفرق عن صخر بحيث يمكن حتى الجيران سمعوا صوت هلاهلها

چان هو طالع يجيب العشى
سديت الخط منها وخابرت على ثناء حتى احچي ويا غسق لحد الأن متعرف زواجي من صخر تم

رن شوية واجاني صوتها
- هلا والله عاش من سمع هالصوت

- ههههه
هلو ثنو شلونچ

- بخير والله اسأل عنچ

- تسأل عنچ العافية
رجلچ جهالچ ان شاء الله كلهم زينين

- بخير حبيبتي
هاي غسق يمي تريد تحاچيچ

- اي جيبيها

بس اجاني صوتها گلتلها صيري وحدچ
شوية وگالت يلا صعدت الغرفتي خير گولي خو ماكو شي

سولفت الها كل شي
فرحت مثلها مثل الكل وظلت توصيني ادير بالي على نفسي لأن هي تدري عندي مشكلة بالدم

دقايق وسديت الخط منها
رجع صخر تعشينا وخلص الليل يتغزل بية
هم صارلة هواي مشايفني وهم فرحان بخبر حملي كلش

يومين ورجع للبصرة
كلما يجي ويروح اتأذة لأن اتعود علي فترة يلا ارجع الطبيعتي

گعدت الصبح كالعادة
غسلت ورجعت للغرفة دگ جهازي صخر ديتصل جاوبتة والابتسامة على وجهي

- صباح الخير

- يسعدلي هالصباح الحلو

- ههههه
شلونك حبيبي

- آنه زين
المهم انتِ وابني شلونكم

- اذا انت زين اكيد احنه عال العال

- دومكم يارب
شمسي ما اوصيچ بعد
ديري بالچ اعلي ولا تعبين رويحتچ تراچ مو حمل التعب

- ممسوية شي حبيبي
شو بس اداوم وارجع انام شعندي قابل

- اي احسن
يلا آنه اروحن ما ظل وكت

- احبك

- اموتن اعليچ

سديت الخط ورحت سويت الريوگ
خليت الاكل بالمطبخ ورجعت للغرفة غيرت ملابسي ع السريع وراها تريگت وطلعت ويا حبيب

بنص الطريق صارت عندي اوجاع
ولأن ادري التقلصات طبيعية ببداية الحمل ونهايتة ما اهتميت

وصلنة للجامعة دخلت للمحاضرة الأولى
دقيقة والثانية تزيد الأوجاع بشكل ملحوظ گلت بس اخلصها ارجع للبيت ارتاح

طلع الأستاذ گبل حبيب طلع ورى
ما لحگت حتى اصيحة
گمت اخذت غراضي وتمشيت بالممر ادور علي

شگد دورت ماكو اختفى
رحت للحديقة لازمة بطني الوجع صار مينطاق وگفت يم الحايط وسندت ظهري علي

اباوع داير مدايري بلكت الگا
هناك ولمحتة واگف يم جماعتة اشرتلة وين يلا شافني استأذن منهم واجة باتجاهي

ما تحملت بعد اكثر
احس نفسي داموت لو شما احچي ما اگدر اوصف ذرة من الوجع الحسيت بي وقتها

باوعت الحبيب من بعيد
حسيت شي دينزل مني لزمت بطني وصرخت بوجع مينوصف حبيييب.....

يتبع

لتنسووون ⭐⭐⭐⭐⭐⭐