عاجبني اعد شامات جسمك عد
بس مشكلتي بس المح كتر منك
أصيرن ماي واتفرهد
**
عسل : عمام ياسر كلهم اعرفهم بس هاي البنية أول مرة اشوفها وياهم جانت محجبة ولابسة صاية بس بيضة بحمار عيونها كبار وصفر وجسمها تارس اني كدامها اضيع
شفت ياسر من ألتفت جنه متفاجئ بيها وممتوقع يشوفها بس يمكن زاهر قصده عليها من كال ضيف ممتوقعه
سلمت عليه وهو رد السلام بس نضراته الها غريبة ما ريحتني
شمس : ألف مبروك الزواج ..آسفة ولو متأخرة بس انته منطيتنه خبر ..وكل هالفترة اني جنت تعبانة وداراجع مكدرت اجي
ياسر : الله يبارك بيج ..اي صح هي صارت بسرعة ومجان عندي وقت اتصل بيكم
شمس : بس اتصور بابا وماما اجوي صح ؟!
ياسر : اي عمو وزوجته ابد مقصروا ويانه بس سامي خطية مجان فارغ وقتها يمكن جان مسافر
شمس : هو حيجي اليوم ..كال يريد يكسر هالبرود الي بيناتكم وترجعون نفس قبل
ياسر : اكيد ليش لا ..هو يضل ابن عمي ومثل اخوية هو وزيد وحيدر نفس المعزة
بعدها ألتفتلي سحبني لحضنه وكال : هاي عسولة زوجتي ..انتي مشايفتها قبل
تقدمت عليه بوستني وكالت : مهناين ان شاء الله عسولة ..انتي متعرفيني بس اني بنته لعم ياسر الوحيدة لأن مثل متشوفين اني معندي خوات ولا عمو عنده غير حيدر وزيد
عسل : شكرآ ..اتشرفت بيج
بعدها قدمنالهم الضيافة اني ونبا وكعدنه
التفتتلي هاي البنيه وكالت : لعد انتي عسولة ياسر .. تفحصتني بعيونها من فوگ ليجوا وكملت: حلو ذوقك يسور.. اقصد ياسر بس مو مبينة زغيره عليكَ؟ شكد عمرج
رديت : ١٨
تفاجئت وكالت بدلع : اوي كولش زغيرونه هاي وين لگتك ياسر وكعتك الها
رد ياسر واني احس بنبرته مزعوج بس ماعرف ليش : مو وگعتني وكعت كلبي الها .. لزم ايدي وكمل : من اول ماشافتها عيوني مكدرت اطلعها من بالي .. باوعلها وكمل : وحبيتها ورحت خطبتها ومثل مدتشوفين هسه هيه حبيبتي وزوجتي
جاوبته وعيونها مركزه بعيونه : حبيتها ؟!
بس موجن هواي فارق عمر بينكم
صراحه كلامها استفزني كولش احسها تريد طلعني جاهلة كدام الكل .. قبل ليجاوبها ياسر رديت اني : لا حبيبتي العمر بس رقم مضر بشي المهم بالعلاقة هو الحب والتفاهم والحمدلله متواجدات بيناتنه .
باوعتلي بنضرة مكدرت افسرها اذا جانت ضايجة او معجبها كلامي ودارت وجها ..
بعدين راح زاهر جاب اكل من المطعم واحنه حضرنه الطاولة ...
**
حيدر : من ذاك اليوم الي دفنت بنيتي ورويحتي جوا التراب اني نفسيتي كولش تعبت لا اكل ولا شرب ابد لمن كلش افقد طاقتي واوكع واني فرحان اكول حموت واروح يم حبيبتي غيوده ، بس اصحه الگه روحي بالمستشفى مثل كل مره والمغذي بأيدي وامي دموعها تجري وتتوسل بيه انتبه لنفسي ومتريد تخسرني ، واني لو الله ممحرم الانتحار جان انتحرت بس حرام ومااريد اغضب ربي ..
اني كد ما امي عزيزة عليه بس ماكدر اخذ بكلامها وانتبه لنفسي همه شيحجون اني اريد اموت اريد الحكها ف ضليت على نفس رويتيني يومي كله كاعد بغرفتي القديمة وصورها واغراضها يمي ومره احجي وياهن وجنها تسمعني ومره ابجي واصرخ بس اريد افرغ الحزن البداخلي الي داحسه ينهش بروحي ويحولها لرمااد .
غرفة زواجنة مفتحتها ولا رح افتحها لان اني وعدتها افتحها بس لمن تفوت الها وهي ماكو فضل مقفولة ، مرت الايام واني اذا مو كل يوم بين يوم ويوم اني بالمقبره يمها يم قبرها اشكيلها هم الحزن والفراق شسوا بيه من لمن تركتني ..
حد مامرت ٣ اشهر من فقدان روحي وضحكتي ك عادتي رجعت من النجف واني ملامحي هادئة عكس صدري الي مملي بالحزن ، دخلت للبيت وتوجهة لغرفتي ومجاوبة على اسئلة اهلي الي لأن كلها تلومني وبس .. دخلت للحمام وطلعت نمت من التعب ..
واني نايم شفت اجتي غيداء بفستان ابيض كولش وجهها وملامحها كولش حلوه وابتسامتها الي تفرح دگات كلبي مرسومه على شفايفها ، اني جنت كولش فرحان بالحلم لأن هاي اول مره غيداء تزورني بعد وفاتها .. كمتلها بالهفه ودموعي تنزل بسعاده .. لزمت اديها واني ممصدك هيه كدامي
كلتلتها بنبره حزن وعتب وغصة خانگتني : ليش هيج غيودتي مو تدرين اني مكدر اعيش بدونج شلون تركيني لوحدي .. بس لا تخافين ماضل شئ واني حجي يمج
رفعت جف ايدها وخلته على شفايفي وكالت بأبتسامة : لا حبيبي لدگول هيج اني هسه بخير، بس انت دتأذيني من اشوفك دائما هامل نفسك وتتمنى الموت ، خلت ايدها على خدي ومسحت دموعي وكالت : حبيبي انتَ مؤمن والمؤمن ميجزع من آمر رب العالمين لازم ترضى بالقاسمة ربك ..
وشوي شوي تلاشى طيفها من گدامي واختفت ، فزيت اني ودموعي تجري ومتعرق وكلبي ينبض بكل قوته .. لكيت امي يمي وتمسح على راسي وتقرا آيات ..
خليت راسي بحضنها واني اشهك مثل الطفل الزغير الضايع منه شغله كتلها : ماما .. ه..هيه اجتي .. اني شفتها
نزلت دموعها وكالت وهي تمسح على راسي : اي ياحبيبي تجيك لان هيه تحبك ومتقبل تشوفك تضر نفسك ، انت اذكرها بس مو بالـ بجي وتتمنى الموت .. لا وليدي صليلها اقريلها قرآن
وصدك من يومها اني عدلت روحي وكمت دائماً اصليلها واقرالها قرآن وكل جمعة اني يمها اكعد يم قبرها واسولف وكأنو دتسمعني واضحك اي اضحك من كل گلبي واني كاعد يم قبرها من اذكر طفولتنه سوا .......
**
عسل : هاي شمس كولش نفرزتني ومادري شسالفتها كامت ورانه للمطبخ وكول ساعه ذبلها حجايه وكلهن بلألغاز ونبأ تأشرلي اسكت واني اسكت وماحجي ..
كعدنه كولنه دنتعشة واني كعدت يم ياسر واكل بلا نفس وهوا يجيب ويخلي كدامي يكولي اكلي .. وهاي الشمس كاعده كدامنه ومشالت عينها عني اني وياسر
كالت بنبره خبث : اي شنو ياسر ماكو خبر مفرح؟
ياسر وعينه بصحنه : احد گلج اني اوزع اخبار مفرحه
ضحكت بصوت وكالت : لا يمعود بس اني اقصد شوكت تصير آب يمكن هالخبر شوي يطلعكم من حالة الحزن الانتو بيها ..
شفت ياسر شد على جف ايده حيل وكال ابرود : بعد وكت منريد هسه ..!
كالت ام شمس : ليش ياوليدي انت هم كبرت ولازم تشوف جهالك قابل تنتضر كل عمرك؟
رد هوا بهدوء : الله كريم عمه كولشي بأيد رب العالمين
كالت شمس : شنو بس لا عسل متجيب اطفال؟
ردت أم ياسر بتأنيب : لا اسم الله ليش ددكولين هيج مابيها شي البنية مثل الورد وان شاءلله ربنا يرزقهم جهال يملون البيت ..
طبعاً اني حسيت غصة البجي متكسره بلعومي وبس واحد يكلي شبيج انفجر ياربي ليش ديصير وياي هيج...
شويه ودگ موبايل ياسر طلعه من جيب التراك مالته ورد .. وفجئة كام من الكرسي وكال : جاي جاي ..
كلنه التفتنه اله بتوتر وگلنه : شكو
هوا كال : عسل حبيبي لازم نروح للمستشفى يلا لبسي صايتج وتعاي
نزلت دموعي بدون ماارمش حتى وكتله : ي ياسر ابويه مات هاا؟
هوا لزمني من اكتافي وكال : لا اسم الله بس الولد اتصل بيه وكال يريد يشوفج .. التفت لنبأ وكال : خوية بلا زحمة جيبيلها الصاية
راحت هيه جابتها بسرعه لبستها واني دموعي ما بطلت تنزل ابد ، وطول الطريق اني اناشغ وادعي يكون ابوية بخير ..
**
ياسر : صراحه من اتصل بيه الولد كال والد عسل متوقف گلبة وصاعقينه اله راجع ينبض ضعيف وطالب يشوف بنته قبل لا يموت .. بس اني ماردت اخوفها اكثر ف مكتلها وهي اوف مردت گلبي مرد بجيها ماالومها الوالد غالي واني حاس بيها ..
وصلنه للمستشفى واتجهنه بسرعة لغرفته دخلت عسل وحضنت ابوها وكالت بحزن وخوف : شلونك بابا زين
رد هوا بتعب وبالكوه يطلع الكلمة : ب.. بابا ع.. عسل سا..سامحيني خل.. خلي اموت بسلام اني ضلمتج بنيتي ..
مسحت دموعه وكالت : لدكول هيج بابا اني مسامحتك وليش حتى اشيل بگلبي عليك انته ابويه والوحيد من عائلتي .. مسحت دموعها بضهر ايدها وكملت : اني حسامحك نهائياً بس بشرط
باوعلها بعيونه وكملت : ان شاءلله تطلع من هنا بالسلامة ..و. ونروح اني وياك .. على كل مكان تمنيتك تاخذني بطفولتي .. متفقين
رد عليها بتعب : اني اسف بنيتي حرمتج من اشياء هوايه .. وما.. ما ادري اذا الله كاتبلي عمر بعد حتى اعوضج
برطمت بحزن وكالت : لا بابا انته حتبقى عايش وحتشوف اطفالي ، و.. واني من احزن اجي يمكَ تمسح على راسي ، انته محتعوفني بابا
كالت كلماتها وحضنته وبجت بقوه ، رفع ايده الي ضاله جلد على عضم من المرض وخلاها على راسها .. بالغرفة مينسمع غير اصوات شهكاتهم واصوات الاجهزه ، اني جنت اتأمل منضرهم الحزين والاكثر بجي عسولتي الي فطر گلبي ..
شوي وسمعت جهاز القلب اتوقف .. ابتعدت عسل عنه وضلت فاتحه عيونها على وسعهن ودموعها تجري .. صحت لدكتور وتقربت اخذتها من يمة ، جان هوا يباوع بنضره كلها خوف وعيونه مفتوحه وطالعه روحه لدار حقها ...
طلع الدكتور وكال : البقية بحياتكم
صرخت هي وبجت اقوى واني حضنتها حيل واهديها
**
عسل : جنت متوقعه موت بابا بأي ساعة لأن هذا الي كاله الدكتور
بس لمن شفته مات صدك وبعد مشوفه ولا اسمع صوته متحملت وحسيت نفسي ضعت لأن من عافتني امي جان هو موجود ورغم قساوته بس يحبني ومتخلى عني مثلها مجنت حاسة باليتم بس هسة حسيت بي وشكد ندمانة على كل يوم بقيت بعيدة بي عنه ومزرته قبل ليروح
كمل ياسر تقارير المستشفى وطلعنا للمغيسل وودعته لآخر مرة
واجه زاهر وولد عمه بعد ما اتصل ياسر بيه والبنات بس خالة مكدرت تجي ..ردت اروح وياهم للمقبرة بس مقبل ياسر كال محتتحملين واني اخاف عليج
رجعوني للبيت كوة وسوينه الفاتحة واجن رهف ومريم يواسني وبجن وياي
رهف : الله يرحمك عمو ابو عسل ابرينه الذمة لأن جنه نحجي عليك
مريم : اي والنبي شكد ندمانة على كل كلمة حجيتها عليه ..الله يرحمه ويغفرله
عسل : خلصت الفاتحة والناس طشت واني حالتي مثلها ياسر يحاول يهديني ويقنعني آكل وانتبه لنفسي بس ما اكدر حاسه بالندم وتأنيب الضمير وما اعرف شنو السبب
ياسر : حبيبي عسولة كافي يروحي ..شوفي عيونج شلون ذبلانات.. هاي هي الدنيا وكلنا حنموت بيوم من الأيام
عسل : ما اكدر ياسر ..هذا ابويه ..واني حاسة نفسي جنت مقصرة وياه
كعد يمي وحضني خليت راسي على صدره وبجيت
ياسر : لا عسولتي انتي ممقصرة وياه بشيء لتلومين نفسج على شيء ممسويته ..ابوج الله يغفرله هو الي جان محسسج انتي دايمآ غلطانة لو عندج قصور بس هالشيء مو صحيح
هو بس جان متأذي من امج ومكسور متوقع هالشيء منها وهذا جان سبب كل تصرفاته ..بس المهم هو يحبج واكيد ميريدج تأذين نفسج
كافي حبيبتي ..رحمي نفسج شوية ..الأب ميتعوض اني وياج بهالشيء
بس انتي مو وحدج اني وياج ..اني كولشي الج أبوج ، أخوج ، وحتى أمج ، انتي بس قويلي نفسج وراويني بسمتج الي تثلج كلبي
أبتسمت أبتسامة صغيرة ودموعي بعيني مرر جف ايده ومسحهن وكال : فديت حبيبتي اني
حضنته اقوى وكلت : الله ليحرمني منك حبيبي
باسني بكصتي وكال : ولا منج يا عمري انتي
**
ياسر : اليوم أول مكعدت الصبح آجه حسوني على بالي ماعرف ليش بس يمكن لأن حلمت بيه البارحة
ضليت محتار وماعرف شسوي من جهة ماريد اسببلهم كلام ومن جهة كلبي عطشان عليه ..تعلقت بيه هواي حتى اكثر من جهال زاهر اخوي
تعبت من التفكير وآخر شيء قررت اروح حتى لو أوكف السيارة بعيد عنهم بس المهم اشوفه ولو يمشي صدفه بالشارع كولش عطشان على شوفته
أنتبهت لعسل جانت بعدها نايمة لأن هي هالأيام متنام الا الفجر بعد ما تتعب كولش من السهر وتفقد كل طاقتها
آخذت ملابسي وفتت للحمام ..نزلت بعدها لكيت بس ماما كاعدة بالصالة صبحت عليها وبوستلها ايدها وراسها وكتلها عندي شغله صغيرة اخلصها واجي
طلعت بعدها واني افكر اذا حكدر اشوفه لو لا وألتحاقي قرب ومستحيل اكدر اروح واني مشايفة كل هالفترة
وصلت لمنطقتهم بس خليت السيارة بعيدة عن فرعهم ونزلت اتمشى وكفت قريب عليهم بشوي وأباوع باب بيتهم مسدود ..
تلفتت للشارع جان فارغ ..بس ترددت اروح ادكه لو لا
بقيت متحير وواكف بمكاني فوك العشر دقايق بس اتمنى تطلع وحدة منهن وبيدها حسوني ..بس ماكو آيست وردت ارجع
شوية وسمعت الباب أنفتح ألتفتت بسرعة وبداخلي عبالي امنيتي تحققت ..بس لا جانت أم علي وأم حسوني وحدهن بيديهن جنطة والواضح عدها ولادة لأن هي تتلوى وعمتها بالكوة لازمتها ولأن قريب عليهم سمعت كلامهن
زهراء : عمة فدوة بعد ماكدر الألم موتني ..اخ
أم علي : اهدئي يمه ..بس خن الكالي سيارة صبري شوية ..خن اروح لجيرانه بلكت الكه واحد من الولد
هي وكفت متكية عالحايط وام علي ركضت على جيرانهم ودك ابابهم ..ردت اتقدم عليهن واعرض اوصلهن للمستشفى بس تراجعت لمن تذكرت آخر كلام صار بيناتنه
وقبل لا يفتحون الباب ..صرخت زهراء حيل وكالت : عمةةة.. الطفل حينزل ..عمةةة...
هي تركت الباب واجت عليها ركض وطلعت أمها من البيت وهي لازمة رجليها بالكوة تمشي وخايفات ويتلفتن يمنه يسرة
اني قلقت اذا كلهن هنا لعد حسوني وين وعدمن ؟!
بس تركت تفكيري ونسيت الكلام وكولشي صار وتقدمت عليهن كلت : السلام عليكم ..
هنه تفاجأن وضلن يباوعن عليه مستغربات
ياسر : اني اعتذر اعرف مجان لازم اجي بس مكدرت اشتاقيت لحسوني وهسة سيارتي موجودة خن اوصلجن المستشفى
أم علي وام زهراء بقن وحدة تتلفت للثانية
شوية وصرخت زهراء : اخ ..لج يمة مااكدر بعد ..عمة فدوة ألحكيلي ..
أم زهراء : اي ..اي أبني ..يلا بسرعة
ام علي : أم زهراء انتي ضلي ويه حسوني احنة ان شاء الله ما نتآخر
اني رحت بسرعة وجبت السيارة للباب صعدت ام علي أول وبالكوة صعدتها وسقت بسرعة لأقرب مستشفى
جانت هي كل الطريق تصرخ ومهدت دقيقة واني حاولت اوصل اسرع بس الواضح هنة متآخرات
أم علي : اهدي يمة كولي ياالله مبقى شيء حنوصل
زهراء : عمة مااكدر الطفل حيوكع ..نزلت مية الراس
ام علي : عزه العزاني ..لك يمة استعجل ..ياربي سترك ياربي سهللنا
**
عسل : كعدت شفت الساعة ١١ تقريبآ وياسر مجان موجود
فتت غيرت ملابسي ونزلت جوة بس ملكيته بس خالة ونبأ كاعدات
عسل : صباح الخير
خالة ونبأ : صباح النور عسولة
أم ياسر : ها بنيتي شلونج اليوم ؟!
عسل : الحمدلله خالة ان شاء الله احسن ..خالة وين ياسر ؟!
أم ياسر : ماعرف بنتي هو طلع من ال٩ تقريبآ ومكال وين رايح كال عنده شغله صغيرة يخلصها ويجي
شوية وانفتح الباب ودخل زاهر وكال : يوم ..عدنا ضيوف
أم ياسر : أهلآ وسهلآ ..خلهم يتفضلون
شوية ودخلت هاي الي اسمها شمس ووياها واحد ينطيها شبه يمكن هو أخوها سامي الي كالوا عنه
كمنا ورحبنا بيهم
زاهر : يوم هذوله شمس وسامي حيبقون يمنه الليلة وبعد العشى يجون حيدر وزاهر الليلة نريد نرجع أيام قبل
ام ياسر : هلا بيهم يمة ..عين غطى وعين فراش
شمس : الله يخليج عمة متقصرين هواي مشتاقين لكعدات وسهرات قبل
اني ونبأ ألتفتنا وحدة للآخ واثنينا ممرتاحات الها
نهاية البارت
هلو حبي ..هالبارت طويل تعويض للتآخير
وان شاء الله كلما زاد التفاعل اطوله اكثر