نصفي العقيم ( مكتمله )

بارت(١٧)

وها انا اليوم بين يدي مفترسي الذي وئد برائتي
وقتلها ..
لم تراعي دعمتي ولم تشعر بوجع قلبي !
سلطت انواع العذاب على جسدي المتهالك
.. حتى اصبحت رُفات انثى تذره رياح نسمات السم بقربكً مني 💔
_______________________

روايـة "نصفي العقيم"

البارت السـ١٧ـابع عشر...

للكاتبه : يُمنا نـآصر
_______________________

قراءه ممتعه ..

_دائماً نگول انو مرات الانسان الغضب يعمي ويسيطر علي ويخلي يسوي اشياء خارج ارادته .. بس احنه عدنه عقول والعقل البشري قادر على انو يتحمل اشياء معينه ولو يريد يكدر يسيطر على نفسه ..

بس من تنوز العقول من طرف شياطين الانس هنا المصيبه تكبر لان وسوسة بني ادم ادهى من وسوسه الجن والشيطان ..

بغداد : من طب عليه جانت النيه واضحه من عيونه شيريد يسوي والشر ينطق كبل لسانه وافعاله .. من كلتلي امه على ذاك الكلام خفت ليروح يسوي بيه نفس الشي الكالتله

.. رغم الخوف الجبير الساكن اعماقي لكن ردت ابين اله انو اني ماخايفه عسى ولعل يتركني بحالي صرت ادفع بي كتله ..

"وخررر هشاام شبيك ..

"حجه بوعيد .. شبيه مووو شبيه .. فوت ايده بشعري وصار يعبث بي .. همس قريب على اذني بصوت يتملكه الشر والنوايه تبوح بالبائقه والضلال ..

صوته تغلغل بداخلي ووصل لوردة عمري الجان عندي امل بانو تزهر من جديد وتتفتح بيوم وبدل مايرويها كان هو سبب ذبولها

.. للاسف محد رحمها وهالشي السواه جان مثل العاصفه الي اقلعت هل ورده من جذرها ..

گال" اني موو رجال ولج انييي ، صار يتمادى اكثر واحس روحي نلچمت

"بانزعاج ممزوج بخوف .. ومن حلاة روحي عطت بي بصوت كان يتجاوز دقات قلبي الصوتها يردف بالغرفه ..

وخر عفيه منيي وخرررصرت ادفع بي واصرخ اريد اخلص نفسي منه ..

ضربني براشدي بكل قوته وكعت ع السرير وهو اجه فوكي .. دفعته وكمت منه ركض اريد اطلع من الغرفه و لزمني من شعري صار يسحل بيه مثل البهيمه ..

حسيت خلص راح انتهي اذا سوالي شي قطعت الامل انو اكدر انهزم او افلت منه لان لا بنيتي ولا قوت جسدي تسمحلي

.. مالكيت حل غير انو اتوسله حتى يرئف بيه ويلين كلبه ويايه ..
نزلت على ايده بستها ورجعت على رجلي ابوس بيها وابچي .. واتوسله .. فدوه هشام لسويلي شي والله ماحجيت شي ولا كلت شي لامك..الوب مثل الحمامه المذبوحه وافرفح جوه ايده

" دفرني على حلگي برجله و حجه بغضب وصوت عالي ..لچ كح.... لعد شلون عرفت اني مماخذج بعدني .. لج اني مو رجال اليوم اشوفج منو المورجال يا عار .. يابنت الداعشيه الساقطه ..

" اجه هجم عليه واني مثل اللبوه الشرسه الي تريد تحافظ على نفسها ومتكون فريسه سهله ، صرت اتلاوه وياه ومره هو يضربني مره اني اضربه ..

اجه وهو مقيد حركتي بقيت ارفس جواه مثل الخروف من يذبحوه ويرافس ..  من يسنتشق عبير عطري بمثابة مخلي سكين على رقبتي وبكل جرة نفس يذبحني وارجع احتيي اريد اتخلص من لمساته القذره

استنزفت كل طاقتي واني ابچي واظرب بي .. ماعاد اكدر اسيطر اكثر وللاسف كدر يحقق غايته !

صرخت صرخه اجه البيت يوكع من قوتها ..

.. ااخذني قوه وغصب عني .. كام من يمي بسرعه وطلع ماشفت حتى وجها .. 

لفيت نفسي باللحاف واني اصرخ من الالم كل صرخه جانت تحجي روايه وقصه ماتحمل بين طياتها بس الضيم والوجع ..

صرخت بعلاة صوتي .. ااااااااااااه وينج يااايمه ااااااه تعالي شوفي بنتج الرخصتيها ومحد من بعدج غلاها ...

يمه تعالي شوفي وحيدتج الداس عليها للزمن والناس ومحد رحمها .. يااارب دخيلك انقذني والله للحيل ماضل حيل كافي تعبت .. بلشت صرخاتي تنكتم وحنجرتي تهترء من الصراخ .. اكتفيت بالدموع والانين بصمت ..

ضليت اباوع للسقف ودموعي تنزل من عيوني مثل المطر .. شگد رخيصه دموعي عليه ومالهن قيمه .. واحس نفسي اني هم رخيصه من فعلته بيه

.. بين اهات ودموع ووجع والم .. اخذت عيوني الطريقه الوحيده الارتاح بيها .. غفيت والدمع معلگ على رموشي .. ماصحيت الا بعد مرور ساعات هواي كمت احس راسي مفرور فر

.. بديت استرجع الصار كله وعبالي هذا كابوس مو حقيقه .. بس وعيت على واقعي من كمت اريد اتحرك والوجع موتني .. باوعت حاوليه عرفت الصار حقيقيه بشعه ومُره جداً ..

كمت امشي على كيف الوجع ذابحتي .. طبيت للحمام سبحت وطلعت ..

ورى ساعه كامله يلا طلعت امشي على كيف طلعت فرشه جديده فرشتها شلون ماجان وجيت مددت لزمت بطني بوجع .. ورجعت ابچي واني اذكر السواه بيه

.. باوعت للساعه بالـ١٢ونص بالليل .. معقوله محد من البيت سمع صراخي وعياطي..

محد اجه وكال اروح اشوف هاي ميته عدله .. اووف يازماني شتراويني بعد النوب كل الليل اني مره انام ومره اكعد احسه كل شويه يجيني وكلما انام اتحلم بي من جديد بقيت هيج لينا طلعت الشمس ..

.. الصبح نفتح الباب وطبت نجود تهلهل والابتسامه شاگه حلگها .. اجتِ تبوس بيه ولا كانه هي سبب الصارلي البارحه .. درت وجهي عنها وهي كالت وين نيشانج ..

"مارديت عليها .. حجت رحاب ..

"انتِ اشو مو محترمه مو جاي تحجي وياج امي ماتردين شنو صمخه ..

"كمت افور من داخلي وبلايه شي اني روحي كارهتها كتلها بصوت غاضب وعالي .. امشي ولي اطلعي من الغرفه ..

رحاب : لج انتِ صدك ادب سز وعينج عين امج الكحـ...

بغداد : والله اذا شوفوني كح.. ع كولتج فهذا اختياركم منو كاللكم تعالو اخطبوني اني دكيت بابكم لو انتو الجيتو عليه .. وبعدين سيرة امي لجيبيها ع لسانج

"ردت ، عشتوو والله وتتحسس بنت الداعشيه لج مو زين منه ملفيج بيتنه انتِ الشارع مكانج وهم الشارع زايد عليج ..

رديتلها "  اذا انتِ شوفيني بنت شارع فهذا من تربيتج العاليه وها ترى كل من يشوف الناس بعين طبعه خاف متدرين ..

"عاطت بعلاة حسها .. ولج والله انتِ طالعه عينج ومستقويه على شنو اريد اعرف على شنووو !
بس بسيطه يجي هشام واخلي يكسرج تكسر ..

"صاحت بينه عمتي نجود ، وجع تا وجع كافي عاد اسكتن اني شنو واكفه هنا خراعة خضره ندارت عليه وكالت .. وانتِ اللخره مو بس لسانج بطول القندره .. طلعيلي النيشان وفضيني يلا ..

ردتلها رحاب ، يوم هاي اكيد مو بنيه مشوفيها مغلسه ع النيشان وبعدين البارحه ماسمعتي هشام شلون كتلها .. اكيد (......)
وبعدين اكولج انتِ شنو هالعياره هاي متستحين البارحه صوتج وصل لسابع جار وتعرفين اكو ولد وابويه موجود .. كلها درت انتِ ساقـ....

بغداد : صرخت بوجها وكتلها انجبي لا لسانج اكصه ولج شلون تتهميني بشرفي وتطعنين بعرضي .. كمت رغم الالم بس ماكدرت اتحمل كلامها وغضبي طغى ع كل الم بيه

.. ركضت للحمام وجريت الشرشف الجنت فارشته البارحه .. طلعت عليها وشمرته بوجهن .. وحجيت واني ارجف وابچي ..

"هاح يلا هذا نيشاني رتاحيتي هسه !  شفتي شلون ابنج رجال شفتي انو اني بنيه .. لج كل صرخه صرختها من ع كولتج كلها عرفت بيه ساقـ .. جانت تطلع من هناااا من هناااااااا .. وااشر على كلبي ..

من هذا المسكين المحد رحمه من هذا الي من عمر ١٥سنه شاب من كد الضيم ..
هذا المحد رحمه هذا الدستو علي مثل مدوسون النمله برجليكم .. الله اكبببررررر عليكم ولكم الله اكبر .. نهاريت اكثر وصرت اصرخ بعلاة صوتي وابجي بهستيريه .. حسبي الله عليكم حسبي الله على كل واحد اذاني منكم ... اااااخ ياعسى حوبتي ماتتخطاكم يارب بجاه ال البيت والامه والانبياء كلهم

.. وكلمن اله جاه ومكانه عد رب العالمين حوبة كلبي وقهري ماتتخطاكم ياظلام ..

زمخت بيه نجود" اشش صوتج ادبسز شسوينالج وهيج متخبله صدك ماعندج اخلاق فوگ ماضافيج بيتنه ..

" شسويتيلي مووو ..هذا حالي الكدامج نتيجة افعال ابنج بيه .. شفتي شصار !
رتاحيتي هسه ، اريد اعرف ليش شمسويتلج اني وتبليني هيج بلوه وتكوليله تكول عليك مو رجال ..

"ردت هي ، كافي عاد عيب عليج هالحجي قابل اني فتانه

"هههه لعد من جذبين وانتِ الشيب مالي راسج هذا مو عيب !

" ماعاد تگدر ترد لا هي ولا بنتها طلعن من الغرفه وهنا يتوعدن يكولن لهشتم عليه .. طبكت الباب ورجعت تمددت ماعرف من وين اجتني هاي القدره انو احجي بس من گد ما داسو بطني ماتحملت بعد ..

ويريد يكولون لهشام يكتلني خل يكولون بعد صار عادي عندي لو يذبحني هم عادي اساساً هو دبحني البارحه ونهاني من الوجود..

مر ٣اسابيع  وهو ماكو ولا يجي ولا يشوفني وجها .. اني بعد يومين طلعت من الغرفه اروح اكل وارجع لغرفتي وهنا مستمرات يحجن عليه ..

اليوم الصبح نزلت للمطبخ داسوي ريوك وهو طب للبيت .. تفاجئ من شافني .. واني بقيت مجمده بمكاني واحس نعادت عليه ذيج الليله القاسيه ..

هو طب بدون ما يحجي شي بس بعيونه مبين الندم .. طب جوه واسمع امه وخواته تلكنه يحجن وياه .. اخذت اني الصينيه خليت بيها الاكل ورحت باتجاه الدرج داصعد

.. سمعتها تحجيله عني وشلون حجيت وياها وشكتلها واكيد زادت بهارات من عدها حتى تطلع كتله مميزه ...

جنت متوقعه انو راح يجي يكتلني او حتى يرزلني بس نصدمت من سمعته كال

"عوفو بغداد ماعليكم بيها لو تحرك البيت محد تفك حلكها وياها ..

"كال حجايته وطب للحمام يسبح .. وكاللها لرحاب جيبلي ملابس .. اني صعدت لغرفتي وهي طبت ورايه اخذت ملابس بسكوت ونزلت جوه .. مر اليوم واني ماشفته ابد ...

طبعاً خلال هالفتره ضعفت كلش يمكن وزني صار اربعين لان مانزل اكل غير وجبه وحده من يكونون ممتواجدين هما او وقت صبح ميگعدون من وقت اني انزل ، وطبعاً الخبز صارت عمتي تخبز والبنات عليهم الطبخ والتنظيف .. واني عازله نفسي عنهم .. رغم كل يوميه يوكفن يصلن يعدن ويصفن ويخربطن بالكلام ..
الاء مو كلش تحجي بس رحاب وامها يمه منهن حيايه تبن ..

ومره جنت كاعده بغرفتي واجتِ عليه الاء كالت بيبي فرحه جوه وتريد تشوفج .. بدلت ملابسي ونزلت جوه .. طبيت سلمت عليها وبستها من راسها ..

فرحه : هلا يبعد هلي وطوايفي هلا ببنيتي يمه ليش هالكد ضعفانه صايره عبالك عودة مطيرچي ..

بغداد : ابتسمت الها وهي نزلت دك اسئله شلونج شلون هشام رواء الهايشه ابوج اخوانج ماحبلتي .. واني اجاوبها ع كد السؤال ..

كمت من يمها رحت للمطبخ هوسه وكرايبهم كلها جايه اظطريت اوگف بالمطبخ .. اساعدهم .. طبيت للمخزن اجيب بطل زيت وماحس الا هشام فوگ راسي ..

"باوعتله مصدومه ووخرت بسرعه ..

"هو كال شالج عدلي زين مدشوفين العالم رايحه جايه .. والولد تارسين البيت ..

"باوعتله بعناد ونزعت الشال ذبيته بالكاع وطلعت .. حتى ما نطيته مجال  يحجي شي..

كملت شغل غسلت ورحت كعدت بالهول يمهم .. البيت هوسه والطبخ وحرارة المطبخ كلش تلعب النفس .. اجتِ سعاد كعدت يمي وهدومها ملطشه اشكال .. ريحتها ابد مو طيبه ..

ماتحملت وركضت ع الحمام استفرغت الا ما كلت بس .. طلعت امشي على كيف ولازمه بطني .. صاحتلي الجده فرحه كالت شو تعالي يمي .. رحت يمها وهي كالت ..

"شمالج خايبه شجاج

"ااخ عمه والله ماعرف ..بس تلعب نفسي وبطني تاذيني كلش

"اخاف حبله ولج ..

"هاا لاا من وين احبل

"منين قابل تحبلين من زرف الحايط غير من هشام ..

مؤيد جان كاعد وكاللها " حجيه شو كمتي تحجين حجي مو خوش .. هذول الجهال كاعدين .. اشو خربانه اخلاقج يفرحه صايره منحرفه ..

"انطم انتَ ذاب اذانك يمنه وسمعت هذول كلهم اشو محد سمع ..

"لا وداعتج كلهم سمعو بس متونسين يريد يعرفون التكمله .. شعب منحرف

"طيح الله حظك يالاغم .. امشي ولي عن وجهي يلا ..

بغداد: رجعت ندارت تحجي ويايه كالت ، اي يالفاهيه هسه احجيلي هيمتا اخر مره جتج العاده .. اني وجهي حمر كتلها بهيج يوم وكمت احسب الها ..

"كالت كومي هسه بسرعه تروحين تحللين ..

"هاا عود بعدين

"لا بعدين ولا بالدين هسه تروحين اكلج .. كالتله امؤيد كوم صيح امك الصخله خل تروح وياها ..

ردلها ، افاا يحجيه بربج اكو صخله تخلف هيج خلقه حلوه مثلي ..

"اي هي الصخول تخلف هيج جهر زفره .. كوم ولي يلا صيحلها .. راح صاحلها وسعاد كالتلها ..

"هسه بيبي ليش تلحين مو حامل هاي عيارة نسوان ترى

"ردت الجده، حجت ام الوصخ .. ولج هو انتِ بزر البارحه حفاظتج واصله لركبج شمدريج بسوالف النسوان ..

"سكتن ثنيناتهن وجتِ عمتي نجود .. كالتلها ها عمه كالو ترديني ..

"ايي ارديج ، روحي بدلي هدومج حتى تروحين ويا بغداد تحلل ..

"ليش شبيها ..

"مابيها انشالله الا كل خير بس تسوي تحليل حمل ..

"لمعت عيون عمتي بفرح وكالت ياا صدك ..

ردتلها الجده ، اي صدك جا نتغشمر(نشاقه) وياج .. طلعتلها فلوس كلتلها وهاي خليها تحلل على حسابي .. وعلي افطسج اذا خليتيها تدفع فلس

ردتلها عمتي .. لا عمه تسلمين عدنه فلوس

"اخذيها ولا ضلين تتمنطقين .. انتو منيلكم انتو مگادي (متسولين)
وبعدين هاي مو لج هاي البغداد ..

حجت سعاد " بيبي خل اروح اني وياها عمتي نجود مريضه وضهرها يوجعها ..

كالتلها الجده " انتِ نلصمي .. شمالها لا مريضه ولا شي جنها حصان .. نطيها سفافه وهي طيب ..

نجود: ياا اسم الله عليه اني اروح ويا چنتي هسه .. راحت بدلت وطلعت ..

بغداد : كل الحوار الصار اني مو يمه .. معقوله !
حامل يعني اني راح احمل جوايه روح .. وراح يربطني بهشام كل العمر .. كمت من يمهم رحت ابدل ملابسي .. بس بدون وعي تفكيري كله بالحمل

.. اتمنى اكون مو حامل .. ماريد اطفال يضيعون بين ام واب متشتتين .. واخاف اصير ام واظلم طفلي مثل ما امي ظلمتني ..

طلعت امشي اخذتني عمتي ويامؤيد بالسياره كل الطريق اني القلق ماكلني والتفكير مدمرني دمار .. وصلنه للمستشفى ونزلت حللت .. كعدنه نتتظر النتيجه ربع ساعه وطلعت الممرضه كالت مبروك المدام حامل !

"دمعت عيوني والدنيا نهدمت فوك راسي .. عمتي فرحت وتبوس بيه وتباركلي بس اني مثل الصنم

... مؤيد هم باركلي وبس هزيت براسي .. طلعنه من المستشفى ورحنه للبيت اول ماطبينه عمتي بشرتهم وكلهم باركولي

.. الجده فرحه بسرعه دزت على جيس جكليت وهلهلت وطشتو فوك راسي .. او بلاحرى فججتني بي لان الجليت صاير يابس ومن تجي وحده على راسي عبالك حصوه ..

ورى شويه صعدت فوك وهشام لحد هسه ماشفته .. مرت خمس دقايق وطب هو للغرفه .. كمت بسرعه وكفت واني خايفه منو .. شحيسوي !

بكل برود حجه وهو مجلي صوته .. كال .. حظرتج حامل !

كتله بصوت يرجف " اييي

"وشلون تحملين اني مو كلت ماريد صخام جهال واحب وحده غيرج شنو انتِ متفهمين ..

"باوعتله باستغراب وكتله .. صدك ، والله ضحكتني ليش منو الاغتصبني هنا ! ، هو بكيفي يعني ..

"هز راسه وگال .. انتِ الجبتيها لنفسج وبعد ماكو خلاص مني .. طلع ورگع الباب وراه بقوه ..

.. تنهدت وغمضت عيوني ..  كعدت ع السرير وكمت ابجي على حالي ، ياترى شنو تاليتي وياك !

"صفنت شكد احنه رخاص يم بني ادم .. لو اني بمكانه واكوله نجبرت عليك واحب واحد يسوه راسك ماجان هسه ذبحوني .. بس هذا احنه مجتمعنه دائماً الذكر اله كلشي مباح والمراه لو بيدهم يدفنوها مثل ابو جهل وهم يكولون شويه

.. طلعت من غرفتي نزلت جوه .. رحت للمطبخ وماخلني اشتغل عشتو ع اساس خايفات عليه .. كعدت ماسويت شي .. لليل تعشينه وكعدو يتعللون كلهم .. اجو ولد عمهم كلش حبابين .. صارو يلعبون دومنه واحنه تتفرج عليهم .. كالولي تعالي العبي واني ماكلت لا ..

رحت بسرعه كعدت وصرت العب وياهم يعلمون بيه ويضحكون على كلامي لان مكسر ..

بس اشو هذا هشام نار وكبت بي من شافني كعدت وجها صار احمر وكل حجايه واللخ وزامخ بخواته لو بالجهال.. رجع عليه كال ..

"بغداد بلا امر عليج كومي جيبلي ماي ..

"كتله اي ، نداريت عليهم كتلهم امانه لحد ميغش اني هسه اجي .. صارو يضحكون واني رحت جبتله ماي وجيت .. كعدت ورى شويه هم كال بغداد شاحنتي فوك روحي جيبيها .. رحت جبتها وكل شويه ومكومني موتني .. تالي عاطت بي عمه فرحه كالتله

"سد حلكك عاد يالاحول خل البنيه كاعده مو كفرتها

.. (طبعاً هو عيونه وحده من عدهم مكسوره مو حوله بس هي تسمي الاحول)

.. تالي للـ١٢ خلصت التعليله وكلمن راح نام بمكانه ، هشام صعد فوك نام بالغرفه .. اني فرشت بالكاع وهو نام ع الجربايه ماكلف نفسه وكال تعالي نامي انتِ هنا

.. تصرفاته جداً متناقضه .. اكو امور يسويها يخليني اشك انو يحبني واكو مواقف تحسه يشوفني عدوه .. ماعرف ليش وشنو السبب ..

غيرته عليه وميقبل احد من اهله يجاوز ويايه وهواي امور صارت متناقضه كلش .. تعوذت من الشيطان ونمت بعد مابعدت عني هالافكار

.. ثاني يوم دكت عليه اخت حسان .. من شفت رقمها احس رجعت ذيج الايام الحلوه .. فتحته وحجيت وياها بلهفه واسئل عن احوالها .. وهي اكتفت بالسؤال عني وبس

.. سديته منها ونزلت جوه .. للعصر اجوي يُسُر وصگر .. ووياهم بغداد.. طبعاً سهى وهدى ماشفتهن صار ٦اشهر من زوجت لحد هسه حتى من اروح لبيت اهلي هما دائماً مموجودين بس يُسُر تجي هي ويا صگر بحكم قرابتهم سوه ولان صگر ابن عم هشام اللح.. فدئماً يجون .. وهالنوبه جايه مروه وياهم ..

هم تونست وياها كلش ولليل تعشو وراحو .. طبعاً وبيت عمهم هم رجعو لبابل .. ومرت الايام والشهور

.. ومر على حملي ٧اشهر سويت سونار وطلع بيه ولد عالي طارو من عرفو البطني ولد ..

طول  هالفتره ماصار شي جديد .. بطني كبرت كلش واني هم دعبلت صرت عبالك طوبه

.. هشام مبتعد عني وينام جوه بالهول مثل العاده .. والمصيبه تجي امه تحجي عليه انو اني الي اهججه ومن ورايا

.. طبعاً رجعت لروتيني انظف واطبخ واخبز محد تساعدني .. بس الاء مرات تجي تشلع الخبز من التنور .. وبمره جنت واكفه وياها وكتلها ااوف يابه تعبت ..

كالت "كعدي ارتاحي هسه اني اكمل ..

"جريت رغيف خبز وكعدت اكل هي خبزت مكاني بقيت اباوع الها وكتلها ، الاء اني ابد ماعرف عنج شي وعن حياتج .. ليش احسج دوم حزينه وعيونج بيها الدموع واكفه ..

"ابتسمت بخزن وكاالت اوووف يا بغداد الي من ايده الله يزيده واني الصار البيه  كله من ايدي ..

"احجيلي اذا تحبين

"هسه اكمل واحجيلج كلشي .. كملت خبز واني يمكن اكلت رغيفين خبز .. اجتِ كعدت يمي وصارت تحجيلي .. كالت ..

"اني جنت بنيه كلش شاطره بالمدرسه ومن المتفوقات دائماً .. وجنت حريصه على دراستي وانو اطلع معدلات عاليه وادخل كلية طب .. بس للاسف كل هالاحلام راحت بسبب طيشي والمايخاف الله ..

بيوم رجعت من المدرسه مثل عادتي .. جنت ارجع مشي لان مدرستنه قريبه .. وصلت قريب ع البيت وشفت هشام واكف هو وولد وياه شاب ..

بس جان لابس مدني موعسكري مثل هشام .. هو ضل يباوع عليه فصصني من فوك لجوه ، اني نزلت راسي وطبيت للبيت

.. ورى يومين طلعت من المدرسه بوقت الحله واشوف هذا الولد نفسه كبالي .. تحاشيته ومشيت عنه .. هو اجه يركض ورايه وحجه ويايه .. كال ..

"اني اركان صديق اخوج هشام ..

"بقيت ارجف بالشارع لا احد يشوفنه وتصيرلي مشكله .. كتله اي ممكن توخر من طريقي ..

هو جر ايدي وخله ورقه بيها وكال اقريها من ترجعين للبيت .. وارورح فدوه لهالخدود الخجلانه عبالك طماطه

.. مشى من يمي واني صميت الورقه بسرعه بالجنطه ماشمرتها فضولي دفعني انو اعرف شنو موجود بيها

.. وصلت للبيت ودخلت غرفتي قفلت الباب كلش زين وكعدت اقره بالرساله جانت كلام حب وغزل بيه وبالاخير مكتوب رقمه .. شلت الرساله واني كلبي يدك الف

.. نغريت بكلامه المعسول وبصراحه شكله هم جان شاب كلش حلو ..

مادكيت عليه ابد .. بس هو ماكطع نفس وصار كل يوم يجي ويخلي بايدي رساله .. الى ان يوم تشجعت ودكيت علي .. وبدت علاقتنه تتطور .. كلام حب وغزل يحجي يخليني طايره فوك الغيم

.. طبعاً مستوايه الدراسي بلش ينزل .. وصرت ضعيفه بالمواد مو مثل قبل ..

و هما حالتهم مو كلش زينه يعني فقره .. فدائماً يطلب من عندي فلوس واني جنت انطي دائماً وصلت بيه انو نطيته ذهبي كله

.. كثرت جياته على هشام .. بس جان هشام مايحترمه ودائماً يحجي علي وهو ماعنده كرامه يضحك لو يمسحون بكرامته الكاع ميفك حلكه

.. حتى مرات اسمع اصدقاء هشام من يجون ع البيت حتى على امه وخواته يحجون ويغلطون وهو بس يضحك مايردهم

.. اني انقهر من اشوفه هيج ضعيف شخصيه وبس يمي يجي يهوبز ويزامط على اساس هو فد شي ..

واني اكول يمكن مايكدر يفرض شخصيته عليهم فيجي يمي يحس نفسه شخصيه ، فـَاسكت ماجاوب واكله اوامرك طاعه ..

وبيوم اجه تقدملي .. وكان الرفض قاطع من هشام انو ماينطيني اله لو اموت رجع طلبني اكثر من مره واهلي يرفضون .. واني هنا نهاريت ..

هو كال اني راح اخذج غصب عنهم وبالكوه .. بصراحه بالبدايه خفت بس حبي وصغر سني عمو عيوني ورضيت انو اتزوجه غصب عن اهلي يعني بين قوسين يكولون (نهبت) ، من درو بيه هشام وابويه تخبلو خبال ..

ورادو يرجعوني بس كان فايت الاوان وهو ماخذني وصرت مرته رسمي ..

مارضى ابويه و اجه وكاله تجي تزفها من بيتنه وتخلي الناس تشوفها تطلع من بيت ابوها حتى ماننفظح ..

وصدك رجعت لبيت اهلي وسويت عرس ، بس الفرق جان انو اهلي مراضين عليه ويمكن عدم رضاهم هو الي طيح حظي بحياتي .. ابويه حسيته رضى شويه وباسني من راسي ومؤيد هم ماحجه شي..

اما هشام اجه كدام الكرايب لبسني كلاده ذهب جبيره حتى يكسر عيونهم وهمس يم اذني كلام للموت ماراح انسى .. كال ..

"من اليوم تنسين عندج اهل وعندج اخو .. والسويناه مو لسواد عيونج انتِ فلس ماتسوين ورخيصه حتى بعيون رجلج .. لان التخون اهلها وترخص نفسها محد يغليها ابد .. وتذكري انو الخنجر الغرزتي بظهري يخيتي راح يضل يوجعني الى ما اموت وما انسى فعلتج هاي ..

"كال هالكلام الي عبالك رصاص اخترقت جدار روحي .. باسني من راسي والعالم تباوع النه عبالهم ديودعني لو ديوصيني

.. ما يدرون بدل مايكول هذا بيتج وهيمتا ماتريدين تعالي ... سمم روحي وهو يكولي لا تجين ولا تشوفينا وجهج .. طلعت من بيت اهلي مكسورة خاطر رغم هذا الردته اني .. وللاسف اكتشفت بعد فتره انو كل الحق لهشام واني غبيه وانعميت

... بعد شهر من زواجي .. ام اركان صارت تكومني بكتله وتكعدني بكتله .. عجوز مشرانيه وحاكمه بيتهم محد يكدر يفك حلكه وياها ... حتى المنطقه تكرها كلش

واركان طلع يشرب ويدورمكسرات .. واصلاً طلع لا صديق هشام ولا شي ...

طلع هو مجرد صبي يخدم ويجيبلهم اخبار للمركز .. يعني يكتب تقارير ويطيح حظ العالم .. وامه يحجون بيها انو هي مره مو خوش واصلاً طول ما اني يمهم  ماشفتها وگفت على سجاده ولا شفت قران بالبيت

.. خواته جانن ساقـ.. وسمعتهن طالعه بالمنطقه بيت ام اركان وبناتها .. وحتى الاسكال الجانت تزورهم من زلم ونسوان مبينين موخوش .. اركان عنده اخ اصغر من عنده بالبيت تخيلي مره لكفته هو وبنت جيرانهم بالهول ..

اني خفت على نفسي وصرت اشتغل بسكوت بدون بدون ماحجي شي وبس اكمل اطب لغرفتي بسرعه .. اهلي ماعاد يريدوني واكثر من مره اخابر على امي وتكولي اذا جيتي محد يستقبلج واخوتج ميردوج النوب انمرد ت مرد من سوايتي وياهم ..

.. اركان نگلب كلاب .. عليه وبس يجي (....) وياخذ حقوقه ويروح لو داموت هو ميهمه صرت اخذ حبوب منع حمل خفت لا احمل منه واجيب طفل يضيع بين هالعائله الحلوه

.. وحجايت هشام صدك من كال انتِ الرخصتي نفسج وماكو احد راح يغليج.. وفعلاً .. ذلوني مذله وخاصه اركان سكولي انتِ وحده كح... حالج حال ذن الاروح عليهن ..  ويعيرني شلون عفت اهلي على موده

"ماعنده اي اسلوب بالتعامل ويايه يضربني ومعيشني بجحيم .. الا ان بيوم جان ديدور بين اغراضي على فلوس جان ماعنده وكتله ماعندي اني هم ..

عباله اجذب علي وراح يدور لكه باكيت الحبوب منع الحمل .. ولزمني جنزني تجنز .. ٣ ايام اني بالمستشفى .. ومن طلعت بسرعه لميت ملابسي واجيت على بيت اهلي .. والباقي انتِ تعرفي من امي جابتني  واجت ..

تنهدت وسحبت نفس بضيق كالت .. خسرت دراستي وخسرت نفسي واهلي من ورى طيشي وعدم فهمي .. كم كلمه قشمرني بيها وصدكت ..

بغداد : ابتسمت بحزن عليها وكتلها الله كريم ميخالف حبيبتي الله يعوضج انشالله .. هي هزت راسها وسكتت

.. طبينا اني وياها .. صعدت على غرفتي دورت للموبايل اريد اخابر على عهد يجي ياخذني يمهم كتله لهشام وكال روحي .. بقيت ادور ع التلفون كلبت الغرفه علي ماكو نزلت جوه سئلتهم كلهم كالو مشفناه .. رحت للمطبخ ادورله وهم ماكو .. رجعت لغرفتي واشوفه ع الميز تفاجئت هذا شجابه هنا !!

اخذته كلت يمكن خدودي ماثره عليه مداشوف زين من السمن .. لزمته التلفون حار .. استغربت هذا ليش خار هيج !

رجعت خابرت عهد وكال اجيج .. كمت بدلت ملابسي ورفعت شعري ذيل حصان .. قررت اذب الحجاب .. وكله عناد بهشام وبزماني رغم ادري هالشي غلط وحتى من اطلع ملابسته احس ضميري يانبني

.. بس بنفس الوقت ماعرف شسوي وتايها حييل .. طلعت من الغرفه لبست فستان قصير بس مو كلش جوه الركبه يصير مال حوامل اسود  ووياه ترانشوز ابيض .. نزلت وتلكتني رحاب كصتني كص ..

"تخصرت وكالت وين انشالله .. حامل وبطنج لخشمج وتفرفربن عبالك عروس ..

"وانتِ شنو الحارك دمج بكفيفي احب اظهر جمالي .. مو مثلج لو تحطين مكياج الدنيا هم ماكو فرق طلعت من يمها ورحت بالطارمه شويه واجه عهد صعدت وياه سلم عليه وسئلني على وضعي وحملي كتله الحمد لله .. كال مدا داومين بالمعهد ؟

كتله" لا والله اخذت اجازه من المعهد كلت اولد وبعدها يصير خير .. 

"هز راسه وكال الله كريم .. وكفنه يم محل يبيع حلويات وكيك راح جابلي بقلاوه واجه خطيه وكل شويه وكال شمشتيه شتريدين ..

.. ويمشي على كيف يخاف عليه وعلى حملي

.. كتله ادري على كولت عمه فرحه .. خما لازكته بعلج .. هو بس يضحك ويبوس بايدي

"وصلنه للبيت طبيت سلمت على ابويه تلكاني بالاحضان وبوسني .. طبعاً ابويه ورى مزوجت صار يسئلني عن احوالي ودائماً يستفسر مني اذا هشام ياذيني او لا .. وصار مهتم بيه اكثر

.. وكلما اجي عليهم لازم ينطيني فلوس مصرف الي .. ومن اروح الهم يتلكاني بلهفه ..

بقيت يمهم تعشيت ورواء اصلاً ماجيت يمها مجرد سلام وبس .. رجعني عهد ونزل يتعلل يم الولد .. طبيت للبيت وصعدت لغرفتي .. بدلت ملابسي وطب هشام عليه .. جان يدور اوراق بالمجر مالت الغرفه .. دك التلفون واني دا امسح المكياج واكفه ع المرايا .. راح هو شاله وباوع نعقج وجها كال منو هذا ..

"ماعرف ليش منو ممكتوب اسم ؟

"لا ممكتوب بس رقم ..

"اهاا ماعرف والله بس قبل يومين هم دك رقم غريب ومجاوبت .. هز راسه بمعنى اي اخذ تلفوني والاوراق مالته وطلع اني هم ماسئلته ليش اخذته

.. رحت نمت لان كلش تعبانه .. ورى يومين .. جنت نايمه بغرفتي وكعدت على صوت صراخ قوي .. صوت بنيه تصرخ بعلاة صوتها .. فزيت مرعوبه وطلعت من الغرفه داشوف شكو .. نزلت جوه واني اسمع الصوت كلما جاله يعلى اكثر .. طبيت لغرفة الخطار واشوف بنيه واكعه بالكاع والدم من راسها لرجليها بخيث ملامح وجها مختفيه ..

.. اشرت عليه باصبعها وكالت .. هييي هييي السببب هي كالتلي هي .. تحولت نضراته الغاضبه عليه ..  عروق رقبته بارزه وعيونه شفت بيها نار مستعره وتلهب بشررر .......

Next.....

هلووو بنات .. مصدكون شكد مشتاقتلكم كلش كلش هوايه وهيج احس مشتاقه لتعليقاتكم وتفاعلكم والقفلات الاجلطكم بيها ..

.. بس والله صار عندي ظرف واظطريت اغيب كم يوم صارت عدنه حالتين وفاة من اقاربنه الله يحفظ اعزازكم انشالله ونشغلت شويه ..

اضافة الى انو البطله والدها توفى 💔

ارشد ابو بغداد انتقل لرحمة ربه وبصراحه مدا اكدر اخذ احداث وتفاصيل منها على الاعرفه داكتبه اني .. وشويه داواجه صعوبه

.. اتمنى تقروله الفاتحه وتراعون مشاعر بغداد بالتعليقات ومتجرحوها بتجاوزكم عليه واكيد اكو بعد اسرار منكشفت بالقصه فاتمنى متتسرعون بالحكم ..

.. اريدكم تدعوله بالرحمه ،  حتى لو جان عنده اخطاء بس محد من عدنه معصوم من الغلط ..

كلش منهاره هي .. خطيه ومدمره نفسيتها .. حتى القصه كالتلي الغيها  بس حجيت وياها بالهداوه ووافقت انو اكملها ..

انشالله الايام الجايه راح انزل بارتات بكثره لان الدوامات جايه واني طالبه مدرسيه فراح احاول قبل الدوامات اخلص الروايه .. واكيد مراح اختصر شي بيها كله ينذكر ..

وها ترى البارت من ٤٠٠٠كلمه تعويض عن الانقطاع

لاتنسون التصويت للروايه بظغطكم على النجمه باللون البرتقالي .. وتفاعلكم ويا الروايه يشجعني اكثر  .. ابعثوها لاصدقائكم محبين القراءه والروايات الواقعيه..

تقبلو اطيب تحياتي..

الكاتبه : يُمنا نآصر

احبـ♥️ـكم