نصفي العقيم ( مكتمله )

البارت (١٥)

بالـَك تدـك البـاب ـعَ الموُش اجاويـد
مـآي الوجـه لُـو طـاح يَم النذل عـيد

_______________________

روايـة "نصفي العقيم"

البارت الخـ١٥ـامس عشر...

للكاتبه : يُمنا نـآصر
_______________________

قراءه ممتعه ..

بعد حفله ورگص وزفه طلعت روحي الى ما وصلنه للفندق وكعدت على لسرير ..

نزلت راسي وصرت افرك اصابعي بتوتر ..عيوني تسرق الانظار حتى تشوفه لاول مره اكون وحدي اني ورجال وبهالقرب  ..هو كان وضعه ايظاً متوتر مثلي .. بس ملامحه هدائه جداً

خايفه كلش لا يسوي الكالت علي اخته بيه .. وخايفه اكثر من مصيري وياه الي هو المفروض زوجي هسه و نصفي الثاني ..

اجه يمي وحجه بصوته الجوهري .. ترنحت كلماته النطقها لمسامع اذني رفعت راسي واني اباوع بعيونه بذهول وصدمه !

عيونه الچانت بارده وجامده اتجاهي ومابيها اي لهفه ولا شعور ..

گال "بغداد اني مااحبج ولا راح احبج انت من اليوم خدامه لامي وبس اني احب وحده وجبرتني امي عليج ..

"  مرات الموقف يخلينه خرسان وتنلچم كل حواسنه ، وهالموقف جنت اني نفسي مستغربه من السويته

باوعت اله لمده ثواني واني احاول استوعب الديگوله .. گمت بدون مانطق ولا حرف ولاول مره ماتنزل دموعي وتكون ويايه وماتخوني مثل زماني الكل صفعه يضربني تخيلني ادوخ منها ..

فتحت الجنطه المخليلي ياها البنات وبيها شغلات وملابس النه .. طلعت سيت النوم وباوعت علي .. جان متكون من مثل الاتگ قصير وابيض بي دانتيل وفوكاه روب ابيض طويل وقطعتين ثانيه مثل الفانيلا تعلاگه قصيره ووياها بجامه

.. اخذت البجامه والفوكاها واخذت الروب .. طبيت للحمام وهو انظاره تلاحقني  يمكن مجان متوقع سكوني وماخذ احتياطاته لعاصفه هوجاء راح تنبع مني ..

طبيت للحمام .. غسلت وجهي وشلت الرموش والمكياج  لفيت شعري وطلعت .. شفته گاعد على القنفه نازع سترته والرباط وفاتح اول ازرار قميصه .. فتحت الباب وهو نضراته تتنقل علي .. اخذت مخده من السرير ورحت لقنفه  الخاليها  بالغرفه خليتها عليها واجيت انام ..

"هو گال بغداد اني اعتذر يعني اذا....

"قاطعته بجمود وكتله ، ماجان اكو داعي للتجريح اني مو خدامة احد لو كايل تساعدين امي مابيها شي بس كلمة خدامه موحلوه بحقك وبحقي ، اما للموضوع الثاني فصدگني اني ابد مانزعجت وبالعكس يمكن هالشي فرحني لان اني حالي حالك هم مجبوره !

كلت هالحجي ونراديت غمضت عيوني .. هالشي السواه حسيته رحمه من رب العالمين انو مراح ياخذني .. رتاحيت كلش بس الجرحني كلمته من كال خدامه ..

جابو العشه كال تعالي اكلي كتله شبعانه .. هو جذب اني كاتلني الجوع بس سويت نفسي ماشتهي ..

رجع گال .. ليش نايمه هنا كومي نامي ع السرير

"لا هنا مرتاحه.. نداريت منه وهو ماعرف بس اسمعه ينفخ بالغرفه ويطگطگ.. بصراحه ماگدرت انام لان هو يمي ومامتعوده على وجوده ... للفجر سمعته اذن كمت توضيت و صليت باوعت علي هو نايم

.. دعيت ربي يسعد قلبي وتكون حياتي الجايه افضل .. كمت مددت بس احس رگبتي نكسرت من النومه .. بالگوه غفيت كم ساعه وكعدت على صوته وهو يگعدني حتى نرجع للبيت ، كمت بدون ماباوع علي رحت للحمام بدلت ملابسي لبست كوستم وردي فاتح وتمكيجت مكياج بسيط .. طلعت وگتله يلا اني جاهزه ماعندي شي .. هو بقى يباوع لشكلي من فوگ لجوه عبالك ديقيمني گال ..

"اذا احد سئلج اخذني لو لا كولي اخذني فتهمتي..

"هزيت راسي بمعنى اي وطلعنا سوه .. صعدنا بالسياره ومحد يحجي ويا الاخ هو هادئ واني ماحجيت شي .. مسافة الطريق وصلنه لبيتهم .. نزلنه وتلگونه بالهلاهل والجكليت ..

جابو خروف ومددوه جوه رجلينه يمه اني شفته وكمزت وره هشام لزمته من قميصه وهو تفاجئ من حركتي .. لزم بايدي ... وكتله مو حرام عليكم هذا الحيوان شنو ذنبه ..

حجه واحد ماعرفه "كال .. يمعودين شهالاجرام هذا شهالفلم الرعب .. خابرونله على جمعية الرفق بالحيوان .. خلي تجي تسمط ابهاتنه ..

ردله هشام "ايي خابرولنه خل يكولوهم عدنه كديش يجون يرفقون بحاله بس اخاف ياخذوك مكانه ويعوفوه

مؤيد"شبيك لك احترمني كدام العروس عاد بعدها جديده ..

بغداد: اني بس واگفه واباوع عليهم .. هو الولد اجه سلم علي وكال اني حماج مؤيد اخو رجلج المطي ..

"ضحكت وكتله اهلاً وسهلاً ..  هشام كلي تعالي نسلم على ابويه .. رحنه سلمنه عليوهو تباركلنه ولبسني محبس ذهب جبير باس راسي وكال هلا بيج بين اهلج بنيتي ..

ابتسمت ووخرت بصفحه

ذبحو الخروف خطيه واجيت ابجي علي والله حرام عليهم هيج يذبحوه .. تذكرت حسان من كام يضحك عليه شلون اكول تلي

.. ابتسمت واني اذكره تنهدت بحزن وتالي طبينه جوه اني وياه بالمطبخ بنات هوايه واكفات ماعرفهن هو سلم بسرعه ودخل امه واحواته يبوسن بي واني بقيت يمهن ..

سلمن عليه وباركولي .. وگالو طبي سلمي على الجده فرحه جدت هسام ام ابوه ..

ماشايفتها ابد قبل

.. طبيت سلمت عليها جانت مره موقره التجاعيد ماخذه حصه كبيره من خبرتها بالحياة وحكمتها متمثله بشكل خطوط وترهلات ..

لازمه بايدها جكارتها والدگ مزين جبينها وحچنها ، طبيت سلمت عليها وبستها من راسها .. كعدتني يمها وبقت تتمثل بيه .. وتسئلني .. اجتِ عمتي نجود ام هشام گعدت شويه وگالت ..

"هاا يمه كملتو كلشي ..

"كتلها .. شنو شكملنه ؟

"هي كالت شبيج يمه يعني شكملتو قابل ..

حجة الجده فرحه"شبيج يحظي قصدها اخذج قابل شتكملون لعبة براميل اسيا ..

باوعت على عمتي وكتلها شنو براميل اسيا ؟

"ضحكت وگالت قصدها ابطال اسيا ..

"هزيت راسي واني ابتسم واباوع على الحجيه .. رجعت عمتي سئلتني كالت هسه ها اخذج ..

"بلعت ريگ وكتلها اي تم كلشي ..

"فرحت حيل وكامت تهلهل وطشت الخبر بين الكل .. الحجيه جرت جكاره وكالت صخونه كون لهالصوت والهلاهل البايره ، عبالك  تعوي مو  تهلهل..

"تفاجئت بيها لان اول ماكامت كتصها ، كالت يمه لا طججين (تفتحين ) عيونج عليه هيج متعجبه انا احجي من قهرة كليبي المسچبن ..
هاي الغمه سليحان تزوج خالتها علي والله شنهو حتى تجيبله النوب زعاطيط چود انا جبتله اربع ولد وبنات ثنين ..

"كتلها واني اخفي الضحكه ، سليحان منو

"مدامتي ..

"شنو مدامتي ؟

"اكلج اشو انتِ حيل مطفيه من الرئيسي ..  شني كلما كلت چلمه كلتي شنو ..
ماتتفرجين مسلسلات تركيه ..  من يجي مهند هو مرته نور المشعوطه ام سيقان نحيفه  ويكللهم هاي مدامتي ..

مدامتي يعني سليمان الانادي سليحان هذا  زوجي المامحترم
اخذته مني خالت نجود الجربه حتى تخلفله وربج دعيت عليهم بليلة الزفه كون ماتخلف ولا واحد وشوفي هسه تتحسر ع الظنه ..

"بهالحجي طب هشام ومؤيد .. مؤيد كاللها هاا قرحه خانم شلونج

"قرحه تصيب معدتك يالخايس اسمي فرحه انا هاي امك القرحه چود انها تحمظ ع المعده ..

هشام گله نجب لك هاي فرحتنه الغاليه ..

"حظنته وكامت تمطك بيوتصيح يبعد اهلي وطوايفي ..

"اني كتلها استاذنج عمه اريد اروح ارتاح بغرفتي ..

"روحي خيه الج كل الاذون

"طلعت فوگ لغرفتي بدلت ملابسي لگيت الكنتور مسفطه بي الملابس كلها جايبين جهازي ،  طلعت گلابيه سمائيه فاتحه وخليت شال وردي   على رگبتي ..  

بقيت مدده شويه بالغرفه والجوع كتلني لاهو ريگني ولا هما سئلو اذا متريگين لو لا .. واني هم البارحه رتفعت عندي الكرامه حيل وماتعشيت ..  بقيت اتعزعز

ربع ساعه وندگ الباب طلعت اخته رحاب الصغيره گالت تعالي تغدي امي تكول .. نزلت وراها وهي راحت للمطبخ .. شفت هشام كاعد ع القنفات اشرلي اجي اگعد يمه .. رحت گعدت وناس طابه طالعه ماعرفها منو

.. اجة جاهله يطلع عمرها ٣سنوات   سمره ومسويه كصايب ثنين وخدودها تريد تطك ، گعدت بحظن هشام وتبوس بي

"كالتله هاي مو الحوه العلوسه (الحلوه العروسه )

هو ضحك"كاللها اي هي

"هي كالتله بغضب انتَ مو كتلي اني اعبج(احبج) ازوجج اتي وبعدين اني احلى منها ...

"بستها بخدها واخذتها بحظني .. هي بقت تباوع على عيوني وجتكني باصبعا على عيني .. فزيت من جكتها وسديت عيني بساع .. كالت ببراءه  اشو عنونج زلك(عيونج زرك)

"ضحكت وكتلها ايي هههه زرك ، مؤيد جان گاعد ويانا ..
كللها حقج خالي وين شايفه ناس ملونين كلكم اسود وابيض ..
بس على كيفج وياها هاي مو مثلكم انتووكلشي مايأثر بيكم  ، هاي نازوكيه اذا تعطس مرتين ع السريع تتخربط ..

بهالحجي طبت الحجيه فرحه ... تتوكئ على عكازتها الخشبيه .. اجتِ باتجاه مقعد مؤيد كالتله ولي هناك انيبر

اني اريد اكعد قريب من العروس .. كعدت وهو گام يدردم عليها .. كالتلو سمعتك تحجي وتقلد على بنت ساره لان سميره ليش ولك تحجي عليها ..

ردلها "جده انتِ هناك وذابه اذانج يم مؤيد شيحجي وشيكول .. غاثج حيل انه ماعرف شبيج ويايه ..

"انجب لاكسر سنونك الاربعين سن ..

" ادري حلك معمل مال طابوك هالگد سنون ، هو الحصان ماعندو هالكثر سنون منين جبيتيلي اربعين ..

"انطم عاد واسكت .. اي والله ويعيب على السمر على اساس من بياضك يالاجنبي .. اشو كوعك اسود من تاريخ سليحان ..

بغداد: سكت هو وهي بس دردم .. حجيت ويه الطفله كتلها انتِ شسمج ، اثاور بنت ثاره وعدنان (اساور بنت ساره وعدنان )  ضحكت على حجايتها شويه وجتِ ام اساور ..

كالت يمكن موكلش تذكريني لان بس حظرت المهر والعرس اني اخت زوجج اسمي ساره الجبيره بالبنات .. مزوجه بس بالبصره ..

"اهلاً وسهلاً بيج حبيبتي .. بقت شويه سولف وتالي كالت اروح اساعدهم .. فرشو السفره وكعدنه حاطين لحم وتمن ودولمه وزلايط ..گعدت اكل شويه شويه .. لفيت لحم بالخبزه وحطيتها بحلكي جان يگول مؤيد .. لااااا

كلها نتبهت علي كلوله شبييك .. كال

"بغداد اكلتي المرحوم هذا الطلي الذبحوه بره .. وين الرفق بالحيوان خلي يجون يشوفوج شون افترستي

"صارت اللكمه بحلگي وعيوني دمعت لا اگدر اطلعها ولا اگدر ابلعها ..  حالتي حاله ، نداريت على هشام وعيوني تتوسله

" كال  وهو يضم بضحكته .. جذاب يمعوده وين لحكو يكصبو

عاد حجه مؤيد وهو يضحك  .. كال اشاقه وياج خويه اكلي اكلي ..

حكت ورجعت اكل بس مامديت ايدي بعد ع اللحم خفت يكون خطيه هذا الطلي صحيح ..

بقيت اكل دولمة واغمس بالمرك .. كملنه وشالو الاكل كمت انگل الاكل وياهم طبيت للمطبخ شايله بايدي صينيه

.. اجتِ وحده ماعرفها ولاشايفتها گبل ضعيفه حيل يطلع عمرها ١٨سنه هيج ووجها مليان ملي مكياج  اني العروس ماخاله بگدها

تلت الصينيه من ايدي وكالت روحي گعدي لا تتندرين بروسنه ..
تفاجئت من تصرفها رجعت ندارت عليه كالت ، شبيج صافنه على وجهي ماتروحين هسه صير بيج ريحت بصل يشم عطرج هشام لو ريحة البصل ..

باوعت على رحاب وضحكن ثنينهن .. اني هم ماريدت الهن طبيت جوه للهول .. كعدت يم هشام .. والنوب كلش نعست منايمه زين .. هما كلمن مدد ورى ماشربو الچاي حتى ينامون .. واني كتله لهشام حصعد فوگ انام ..

"اخذي راحتج اني ماصعد هسه لليل ..

"صدعت وطلعت دشداشه كودري خفيفه ربع ردن .. عليت السبلت لان كولش حاره .. ومددت ع الفراش بسرعه نمت من التعب .. ماوعيت الا المغرب على صوت هشام وهو يگعدني ..

"فزيت من شفته ولميت صدر الدشداشه ونزلتها كتله انتَ شجابك مو كلت ماصعد هسه ..

"اجيت اخذ عراض من الغرفه .. مادري بيج انتِ من تنامين تحبين تتهوين حيل ..

"حمر وجهي من الخجل وكتله المهم بعد لا طب اذا مادك الباب ..

"ضحك باستهزاء وگال امرج عمه .. رجع كال عود انزلي ترى اجوي اهلج ..

كعدت بدلت ملابسي ونزلت جايه رواء ويُسُر بس .. سلمت عليهم برود وگعدت يمهم .. هنا يسئلن بيه واني اجاوب على گد السؤال .. نطوني هديتي عشتو وراحو ..

الجده فرحه كالت " يمه ماشوفيلي هاي الوصخه وين ولت

"منوو

"سعاد كتلها جيبلي ماي ماجابت يبس ريجي

"هسه اني اجيبلج .. رحت للمطبخ كتلهم عمه فرحه تريد ماي .. كالت ساره اي هسه انطيج ..

عمتي جانت واگفه اجت يمي تباوع على شعري وتتلمس بي وطبعاً طول اليوم هي اكثر من مره كل ماصعد على غرفتي وانزل هي تباوع علي .. حتى حسيت نفسي بيه قما  من كد ماكل شويه زاركتني بسونار..
حجت بعدم رضه كالت

" وخرت مني وهزت ايدها معجابها  ..ضحكو البنات كلولها يمه شبيج..كالتلهم ادري بالعروس اول يوم كل شويه شعرها مبلل ماينشف من الماي.. اشو هسه كلشي ماكو

كل البنات  بقو يضحكون واني مثل الاطرش بالزفه ..

اخذت گلاص الماي ونطيته للجده .. هي شربته واني گعدت لزمت تلفوني وراسلت خالي علي .. طول هالفتره هو يوميه احجي وياه .. طبت هايي الاخذت الصينيه مني بالمطبخ عرفت اسمها سعاد .. صاحت بيها الجده الا فززتني .. كالتلها ..

"ولج سعده اني مو كتلج جيبيلي ماي عشطانه(عطشانه) اشو وليتي راسج راس الكر ومارجعتي ..

"جده مادري نسيت لتهيت ويا البنات

"اي ملتهيه تثردين سوالف مابيها خير مثل وجهج ..

"اهوووه شكثر تلحين ..

"ايا چلبه ، ولج بسيطه اني لج اذا ماخلي الخيزرانه تلعب على ضلوعج المعصعصه ماطلع فرحه .. ولي منا الله لايبارك بهيج خلفه ..

"راحت ذيج دردم واني بقيت گاعده للعشا صبو تعشينه وصعدت فوك على غرفتي .. طبيت بسرعه اخذت ملابس ورحت للحمام سبحت وطلعت ، هشام متمدد ع السرير بلعت ريگي من شفته ..
هو نزل نقاله ورمقني بنظره كال

"نعيماً ..

"شكراً، الله ينعم عليك .. حجيتها واني ماباوعت بوجها اصلاً .. رحت مشطت شعري وشسورته  وهم زين لابسه دشداشه طويله .. رشيت ريحه متعوده على هالشغله لازم ارش عطر قبل مانام .. ووكفت اباوع علي .. هو حس وكال ها شبيج ..

"احم هو اني وين انام ..

"عدل كعدته وجله صوته .. نامي ع السرير

"وانتَ ..

"اني هم انام عليه ..

"لا ماريد

"هههههه  شبيج جافله ماسويلج شي هو بس هاليوم وراها عود انزل انام جوه لتخافين ..

"زين ماكو فراش اجيب هنا انام بالگاع ..

"اكو بس بالغرفه الجوه وهسه اذا تنزلين كلهم يشوفوج ميگولون شعدنه بالفراش الثاني واحنه عرسان ..

"بقيت متوتره ماعرف شكول لو شسوي .. هو جر نفس وكال تعالي نامي لاتخافين .. رحت امشي على كيف ونمت على حافة الجربايه ..

غمضت عيني سهيت ، وشفت بالحلم طيف امي مر عليه  هاي اول مره اشوفها وتزورني بالحلم .. ماعرف شنو الصار بيه رحت الها اركض جانت واكفه بالشقه القديمه البتركيا ..

تقربت الها وصرت اشكيلها حالي رجعت ذيج الطفله بنت الخمس سنوات اخذو كلشي حلو منها وتشكي لاحن حظن عليها الي جرت علي مثل اللعنه وصار اقسى حظن بالدنيا ..

.. شبكتها وصرت ابوس بيها وينج يمه ارجعيلي الله يخليج الدنيا هدت حيلي ..يمه ماريد شي بس اريد عطرج اشمه .. مديت ايدي بالحلم واني اشوفها اثار الباقيه من الحرك البجسمي..

شوفي يمه شون حركوني بس هاي لاشيء على لچمة كلبي عليج ولزمن الجار عليه

.. ضليت ابوس واشم بريحتها  معدت من النوم مختنگه واحس الروح تريد تطلع باوعت قريبه حيل من هشام عاقد حاجبه ويباوعلي

كال بغداد وخري عني وستري على روحج لا اتهور

فزيت بسرعه ووخرت من عنده نطيت من شفته هشام مدحوسه دحس بحضنه  ..شعري مكفوش والدشداشه مفتوحه الدكم مالتها و كله طالع .. لميت صدر الدشدادشه وكتله
.. جنت شسويتلي انت ليش ما مؤدب ..

كال"مشي لج لو ما انتي صارلج ساعه تتحرشين بيه كعدت من النوم ماحس غير تتحشكين بيه

"حجيت بغيض ايي مامؤدب ليش ماوخرتني وكعدتني ، وبعدين اني جنت حلمانه بامي

"حجه ببراءه شمدريني اني هم جنت حلمان بامي قابل اكلها كافي يمه واغضبها واصير عاق لا طبعاً .. وبعدين لا تكعدين تحطين بختج وتضلميني ترى اني شريف والله

" باوعت للساعه جانت ٣ بالليل ... كتله هسه نامو نگدر نجيب فراش

"اي نامو بس بقت اللزكه سعاد تلكيها مشتغله نفر حراسه وجاي طوف حول البيت ..

"هسه شلون لعد انام ..

"تعالي مو جنتي نايمه شمسويلج قابل ..

"رحت كعدت ع كرسي الميز تواليت (التسريحه) كتله لا هسه بالكي ورى مايأذن تنام سعاد وانزل اجيب فراش .. هو گال براحتج ورجع نام .. واني بقيت كاعده بس النعس بعيونس وكل شويه غافيه

.. تالي سمعته نفسه ثقل ورحت مددت ع الجربايه بس بقيت كل شويه اجفل .. واشوفه نايم ..

گعدت الصبح هو ماكو .. كمت توضيت وصليت الفجر قضى ونزلت لكيتهم بالمطبخ دايحظرون للريوگ ..

صبحت عليهم ردت اساعدهم مقبلو وكالو هسه نسوي ميصير انتِ عروس .. ردت رحاب اخت هشام الصغيره .. اي عروس تگعد ورجليها محنيه واحنه نگرب گراب المطي..

هاي شبيها من هسه شاده حزامها عليه ، مارديت الها ورحت كعدت بالهول .. شفتها لجده فرحه صبحت عليها وهما جابو الريوگ .. تريگنا وكملنه كمت للاستقبال والنسوان تجي كل شويه وحده تبارك واني كاعده .. دگ تلفوني باوعت للرقم شفته ابويه ..

جده فرحه كالت "منو هذا كتلها بابا

جاوبته "سلم عليه وبقه يسألني عن احوالي واذا مرتاحه .. اووف هالائسله شكثر تمنيت اسمعها منه قبل .. بس بعد مايفيد ..

كال "شلونج مرتاحه ..

رديتله اي الحمدلله .. حجت فرحه .. اي مرتاحه وجها يتر عبالك طبگ مال خبز ..

ضحكت ورجع كلي .. محتاجه شي عايزج فلوس ؟

تنهدت وكتله لا عندي تسلم ..

هي كالت "شني شعندج ..

وكلما يسألني واجاوب هي كاعده على حلكي .. بقيت احجي وياه
وفرحه كاعده كالتلهن للنسوان بهمس بس صوتها جان عالي ..

هذا ابوها الاغم مزوج نسوان ثنين اني الاولى شايفتها سلحيان احلى منها .. رجعت حجت بصوت ويايه ..

عود سلمينه على ارشد ابو راس المربع .. هو سمعها بالتلفون وضحك كالي وصليلها سلامي ..
حسيت صوته مو طبيعي .. كتله يابه خما بيكم شي ..

سحب نفس وگال لا انشالله مابينه بس عهد ..

حطيت ايدي على گلبي واحسه عصرني كتله شبييي؟؟

وكالعاده قفلات يُمنا التجلطكم 🌚 بس هالمره اهون مو مثل البارتات الراحت .. 😁

اليوم البارت مسلي وبيه ضحك .. موتگًلون مترحمين دموعنا يلا هذا مابي بچي ..😎 مدللتكم يابه وين اكو مني

وهاا ماحاجه اوصيچن النجمه الاورنجوز يعني برتقاليه ، هاي دروس  ثقافة فرحه 😂 ام البراميل
ولاتنسون شاركون الروايه ويا اصدقائكم محبين القراءه ..

وصدك دافكر انزللكم مشهد من المستقبل تريدون انزل ؟

وهسه حبايبي

تقبلو اطيب تحياتي..

الكاتبه : يُمنا نآصر

احبـ♥️ـكم

_________________