#حبي_الاول_والاخير
الجزء الثالث عشر///
هدى ظلت متمدده وصافنه على نفسها منين جابت هل القوة من واجهت محمد ، وحتى محمد من سد التلفون ظل صافن ومصدوم ، هاي هدى البزونه !!؟؟ هاي حبيبتي لو وحده ثانيه ، الي حجتها جان بيه شي صحيح ، قصدها بديت انزل من عينها ، لو شنو؟ ..
ام هدى جانت واگفه وره الباب وسمعت كل الحديث الي صار وجانت وهي تسمعها دموعها تنزل ورادت تدگ عليها الباب وتحضنها وتگوللها اني فخورة بيج ، خليج هيج قوية، حتى اذا متت اكون مطمئنه عليج ، كبرتي هداوي ونضج عقلج يابنتي !!! جانت مامصدگه اذنها ، وفضلت تنزل بهدوء وتعوفها لوحدها.
هدى حست بحركة وره الباب وتصورت امها هستوها صعدت ، وانقهرت عليها ، لان صار مدة طويله مگعدت وياها لو نزلت يمها ، بس تذكرت من نزلت ذيج المرة وانفتح الموضوع وهي متريد بعد تسمع او تحجي ويه احد ، غيرت رأيها وقررت متنزل .
ثاني يوم كان جمعه وهدى گضته تنظف بالبيت وتعزل وعينها على التلفون ، تنتظر يتصل بيها ، تنتظر تشوف اسمه على شاشة التلفون وماكو ..
محمد راح للمحامي وفهمه وحجى وياه وگاله قراره انو ميوافق على الخلع ، وانو هو متمسك بيها ، لكن المحامي نبهه انو اذا قدموا اسباب قويه راح يكون قرار القاضي بصالحهم ، ولازم يكون هو همين عنده اسباب قويه للرفض .
ام محمد اتصلت بيه وحاولت وياه انو يرجع للبيت ، وهو طمئنها انو راح يرجع هالايام .
وظل يوم الجمعه كله ويوم السبت كله بالمستشفى وهو ماخذ على خاطره من هدى ويحس النهايه قربت ، لان هالمره لا هدى وياه ولا حتى كلام المحامي كان يطمئن وحالته النفسيه بالحضيض وبتول تكسر عليه وكلما ينفتح الموضوع تگوله لا تستسلم ، وهذا جان شويه يرفع معنوياته.
وبدأ اسبوع جديد ودوام هدى ، وهمين كلما ينتهي الدوام تشوف هي ولمى ولانا الورده وظلت شكوكهم تدور حول فلان وعلان من البشر ، الى ان بيوم الثلاثاء من نفس الاسبوع .. كانت المفاجئه.
&&&&&&&&&&&&&&&&&&&&&&&&&&&&&
هدى يجيها اتصال من سكرتيره رئيس القسم يطلبها ، ودگت باب غرفة رئيس القسم وسمعت صوته يگول تفضل :
هدى// مرحبا استاذ
عمر ( رئيس القسم) // هلا ستنا تفضلي
هدى// طلبتني استاذ؟
عمر// اي نعم ( عيونه عليها ويگص كل شي بيها من فوگ لي جوه) .
هدى گعدت على الكرسي مقابل المكتب مالته وغاصت بيه بحيث رفعت عنقها حتى تشوفه:
هدى// أمرني استاذ ؟
عمر// شلونج ست هدى ، عندي موضوع وياج ، بس سبحان الله ماادري ليش من اشوفج مااعرف ..
مخلته يكمل :
هدى// لعد استاذ اوگف خلي اندار واحجي 😁 وابتسمت
عمر// هههههههه همين ميفيد
عمر رجل بنهاية الثلاثينيات ، طوله متوسط ، عنده شيب خفييييف بشعره ضايفله لمسة من الهيبه ، حنطاوي ، يلبس نظارات طبيه بس من يقرأ ، الكل يعرف انو هو منفصل مرتين عن زوجاته ومحد يعرف السبب ، اغلبهم رجحوا انو ميصير عنده اطفال ، انسان عصامي ، متمكن ودبلوماسي بشكل فظيع ، عنده لباقه وقوة اقناع فضيعه ، رغم هذا شديد والكل يحسبله الف حساب من يوگف گدامه.
هدى// احسن شي استاذ تفوت راساً بالموضوع وبدون مقدمات حتى يصير اسهل .
عمر// اوك.... هدى .... اسمحيلي طبعاً اگول هدى بلا ست وانسه ( هزت راسها بالموافقه) ... اني معجب بيج حيييييل ومن زمان ..
هدى انصدمت😳 ، وجهها صار احمر ، حست اذنها گامت تطلع نار ، وحاولت تلعب بالموضوع .
هدى// اشكرك جداً استاذي ، هذا الشي يزيدني فخر لان اكيد كلنا نتعلم منك .
عمر// تره اني مگتلج معجب بشغلج ، ولو شغلج وشطارتج وقوة لغاتج هاي ماعليها غبار واني اول الناس الي رشحت اسمج للي راح اوصله بالحديث ، واعرف اتقانج للغة الانكليزيه اضافه للاسبانيه وارجع اگولج مو هذا موضوعنا ، اني قصدي معجب بيج شخصياً ، ونيتي شريفه طبعاً .
هدى گامت وگفت // استاذ تدري مو هذا المكان المناسب لهيج موضوع .
عمر// اگعدي ليش وگفتي ، خليني اكمل ، وبعدين احجي .
هدى رجعت گعدت وسكتت وصارت متباوع على وجهه وبس تباوع على ايدها وتفركها.
عمر// اني معجب بيج من فترة طويله وراح اگولج من شوكت بالتحديد ، من يوم المؤتمر الي صار بنادي العلوية ، تتذكريه؟
هدى ريگها نشف وصارت بحة ببلعومها وبالگوه طلعت كلمه // اي
عمر// اعذريني نسيت اگولج شتشربين يمكن لان اني همين اموري مو تمام ومرتبك ، شتشربين ؟
هدى// مي ، بس مي.
عمر// بس اني اعرفج تحبين الگهوه ؟ راح اطلب گهوه ومي الي والج .
اتصل وطلب اثنين گهوه وحده ساده والثانيه وسط وتعجبت شلون يعرف شنو الگهوه الي تشربها .
عمر// اني اعرف كل شي عنج ، ومثل مگلتلج انتي دخلتي عقلي من زمان ، اكذب عليج اذا گلتلج دخلتي گلبي ، لان اني الحب يجي عندي بعد العقل وانتي اخذتي عقلي.
هدى// استاذ .... حضرتك نسيت شي مهم كولش ... اني مخطوبه وگاطعه مهر و....
عمر // استاذ ، وحضرتك ، الغيها هسه من فضلج ..
هدى// گلتلك المكان مو مناسب استاذ .
عمر// وموضوع خطبتج ادري بكل شي اني وادري انتي فصختي وكل شي انتهى ..
هدى// غلطان استاذ .. الي وصلك هاي المعلومه غلطان .. اني بعدني على ذمة خطيبي او زوجي مهما تكن المسميات .. وبعده كل شي ماانتهى .
عمر// بس الحلقه ماكو بيدج؟
هدى( باوعت على اصبعها) // وهذا مايعني انو كل شي انتهى استاذ لهذا ...
كطع كلامها//اسف جداً ، من مشفت الحلقه عبالي انتهى.
هدى// لهذا اگولك هسه صار لا المكان ولا الوقت مناسب للكلام هذا .
اندگ باب الغرفه وجاب الساعي الكهوه وگاله يحط الوسط گدامها. انتظر الساعي يطلع حتى يكمل وهي جرت كلاص المي وشربت نصه .
عمر// المشكله ابد ماشفتج لوحدج وكلما اريد اشوفج لوحدج واحاجيج الگى وياج صديقاتج ، والأ اني ماجان طلبتج هنا ، بس أيست من الموضوع واضطريت .
هدى// اني بعدني على ذمة رجل ، وحتى اذا ماجنت اني مامستعده هسه افكر بهيج موضوع .
عمر// مخليتيني اكمل ، الموضوع الثاني هو التالي ، اجى ترشيحج او بالاحرى اني رشحتج انو تكونين بسفارتنا بفنزويلا واني راح اكون هناك همين واريد من نروح تكونين ويايه بصفتين ، صفة موظفه بالسفاره ، والصفه الثانيه زوجتي .
هدى انتهت وراسها صار يطلع نار 🔥
هدى// يعني اذا ماوافقت على الصفه الثانيه تنلغي الصفه الاولى لو شلون؟
عمر// ابداً ابداً .. هذا الموضوع ماله علاقة نهائياً واني بالعكس مُصر على الصفه الاولى اكثر من الثانيه ولا تتصورين اني من النوع الي يوگف بطريق مستقبلج ، بل بالعكس ، اشجعج واحب اشوفج توصلين حتى سفيرة وتمثلين العراق كله ، لان مستحيل احد يگدر ينكر مهارتج وخبرتج .
هدى// استاذ انت هسه فاجئتني وخليتني اتخربط ومستحيل اگدر انطيك رد على اي موضوع منهم هسه.
عمر// ومنو گالج اريد رد هسه ؟ بالنسبه لموضوعنا الوقت عندج مفتوح ، واحب تعرفيني اكثر ، واذا تريدين بعد ماينتهي موضوعج ويه خطيبج ، نگعد سويه بمكان انتي تختاريه مره واثنين وتلاثه وتعرفيني اكثر اكون جداً سعيد ، اما بالنسبه للموضوع الثاني فالوقت عندج منا لشهرين وكلما استعجلتي يكون افضل واذا رفضتي همين مو مشكله ولو يعز علينا ترفضين وتضيع هيج فرصه حلوه لمستقبلج المهني . ولا تنسين راتبها ومخصصاتها راح تكون شي لطيف واي وحدة بمكانج تتمناه.
هدى// صحيح ، انطيني وقت افكر .
عمر// اشربي گهوتج ، ولو ناقصها شي مهم كان مفروض ينحط بصفها .
رفعت راسها وباعت عليه // شنو هو؟
عمر// القرنفله الحمرا ( غمزلها)
هدى ظلت صافنه ومصدومه ، ورادت تشيل الفنجان ايدها ترجف . وتحجي ويه نفسها لك هااااااي انت؟ خرررررب حظي🤦🏻♀️
عمر// تفاجإتي ؟
هدى// اكيد
عمر// الورد مايلوگله غير الورد ، وانتي انسانة رقيقه لا يمكن حتى الورد يعبر عنه مكانتج او قيمتج عندي .
بس سؤال ظل يدور بعقلي وانتي تعرفين اني صريح ومااحب اللف والدوران ؟
هدى// اهاا
عمر// سبب انفصالج عن خطيبج هو الحرگ الي صار عندج مووو؟
هدى ضاجت وانصدمت // لا ابداً ، مطلقاً ، واصلاً تعالجت وكل شي رجع لمكانه ، ونهائياً مو هذا الموضوع . گامت وگفت راساً .
هدى// اترخص استاذ اذا ماعندك شي .
عمر گام وگف وطلع من وره المكتب مالته وشافها شلون ارتبكت وعينها انملت دموع 😢 واجى گبالها.
عمر// اسف جداً ، اعتذر اذا سببت الج اي احراج ، سامحيني بس هذا السؤال جان محيرني وگلتلج اني صريح .
هدى// ممكن اروح استاذ ، استأذن منك ؟
منصيه راسها وماتريد ترفعه حتى لا يشوف عيونها
عمر// اذنج وياج ، اخذي راحتج .
طلعت من غرفته وهي منصيه راسها ومرت من يم السكرتيره وهي منصيه وطلعت وسدت الباب وجرت نفس قوي وتحجي ويه نفسها : لا تنزلن لا تنزلن ( وتقصد دموعها) .
@@@@@@@@@@@@@@@@@@@@@@
هدى نست الي الكلام كله وجملة وحده طبعت بعقلها ( سبب انفصالج عن خطيبج هو الحرگ) ، نار گبت بصدرها يشعلها الالم والحسره والغضب ، هذا معناه انو الكل راح يفسر انفصالها عن محمد بهذا السبب ، يعني روان والي سوته حتى لو راح تنفصل عن محمد يبقى وصمة بحياتها والكل راح يشوفها بعيون الشفقه، گامت تتخيل الحجي الي ممكن تسمعه، خطية احترگت وتشوهت وعافها ، المگروده رغم جمالها بس كل حلو بيه لوله، دموعها وصلت حدها وركضت للحمام قبل مايشوفها احد.
بالحمام تمسح دموعها وتغسل وجهها وتباوع على نفسها بالمرايه وتفكر ، خلص ... اذا انفصلت عن محمد لازم تقبل بالموضوع الثاني اقل شي حتى تبتعد عن الناس . فتحت التلفون وكتبت بالگروب الخاص بيها هي والبنات .
( لو الله خالقني صونده ولا هل العيشه🐸)
البنات قروها .. وظلوا شكو .. شصار.. وبدت الملحمه بيناتهم. ومن طلعوا من الدوام ، لگت وردة القرنفل جوه الماسحه وملفوف كارت همين عليها وشدود بلاستيك ومن فتحت وقرته لگت مكتوب ( اسف واعتذر مره ثانية اذا جرحتج) وهل المرة كان موجود اسمه ... عمر..
$$$$$$$$$$$$$$$$$$$$$$$$$$$$$$$$
ثاني يوم داومت هدى وهي تحس انو الكل يعرفون راح تنفصل عن محمد ولسبب الي ذكره عمر والي زاد قهرها وخنگتها انو محمد لليوم مااتصل بيها وعرفت من سعيد عن طريق لانا انو هو مخنوگ ومصدوم من كلامها وياه ، يعني مستحيل كبريائه وعنفوانه وطبعه الي هي تعرفه كولش زين راح يخليه يتصل بيها او حتى يجي ويشوفها ، وكانت الكآبه مالتها تقره مليون بس ابداً ماكانت ندمانه انو حجت وياه هيج وانفجرت بكل القهر الي بداخلها .ولمّا خلص الدوام وهمه بالسيارة راجعيين ، اتصل سعيد ب لانا واثناء سوالفهم گاللها باجر عيد ميلا محمد ، ومدت راسها على هدى وگالتلها :
هدى/ ادري ، بس شلون وهو محموق.
لانا فتحت سبيكر ويه سعيد // سمعت سعودي؟
سعيد// اي سمعت ، بس عندي فكرة ماادري توافقون عليها لو لا .
لمى// اطربنا سعيد
سعيد // تجون باجر للمستشفى ، باجر خميس ، يعني انتوا نص دوام وبالوحده تطلعون ، تجون بربطة المعلمه هدى للمستشفى وتجيبون كيكه صغيره واني احاول ارتب الباقي ونخلي هدى ومحمد يتصالحون ، وفرصة شوية همين نتغدى سوه كلنا وننجمع ونكسر الجليد الي بيناتكم .
لانا// حبيبي ابو الفكر 😍 شگلتي هدى ؟
هدى // ماادري اشو گلبي مامرتاح اخاف يفشلني .
لمى// مااعتقد يفشلج ، محمد يموت عليج وهسه بوجهننا للصالون حتى تسرحين شعرج مثل ذيج المره وباجر مكياجج ولبسج وشكلج اذا يشوفج ينسى اهله صح لو لا سعيد؟
سعيد // نعم نعم ولو هو ميستاهل اخططله لان صاير وجه القندره وميتحمل مني حجايه بس راح اسوي بأصلي واكون احسن منه🙃
البنات// 😂😂😂😂😂😂
واتفقوا وهمه بالصالون على كل شي باجر يسووه وهدى صارت تضحك من عيونها وحتى الليل كله منامت تنتظر باجر يجي .
&&&&&&&&&&&&&&&&&&&&&&&&&&&&&
محمد ميدري بالاتفاق طبعاً ، بس يدري انو عيد ميلاده ثاني يوم من يكتب التاريخ بطبلة المرضى .
واستمر اليوم كله بين المرضى ووقت الفراغ اخذله غفوه لان ماكو احد صار يعجبه يگعد يسولف وياه غير بس بتول ، بحيث صار يعتبرها شي مهم ومكمل بحياته ، والي ضوجه انو اخذت اجازه يومين لان والدتها مريضه ، وهو تعلم على وجودها يمه .
گعد بغرفة الاطباء ومدد رجله وخله ايديه الاثنين وره راسه ويحس اكو نقص اليوم ، ماكو بتول ، شراح يخلصه لليوم ، وبهاي الاثناء اندگ الباب وفتح عينه وشاف منو اجى وصاااح:
محمد// لك هلوووووو ( وهو فرحان وكمز من مكانه)
علي// حبيبي اخوية اشتاقيتلك
وحضنه محمد وبوسه .
محمد// شوكت جيت وليش مگلتلي
علي// اليوم الصبح وصلت ، وبس ارتاحيت وتعرف امك الا خلتني اكل ورحت على الحجي بالشركه ومقبلت احد يگولك حتى اسويلكياها مفاجئه.
محمد ( حضنه) // احلى مفاجئه
علي// شلونك اخبارك ، اسمع ، اليوم مااعوفك لان مشتاقلك هوايه ، ترجع ويايه للبيت وتصالح الحجي ونگعد مثل قبل ونلتم .
محمد// اگعد وياك ، نسهر ، اوافق ، اصالح الحجي هاي اعبرها.
علي// محمد هذا هروب الي دتسويه مو حل للمشكله ، بالعكس ، صالحه واكعد وياه واقنعه ولو حتى متقنعه همين اسمه ابوك يااخي .
محمد// گوووم اطلع لعد ( ودفعه بالضحك) ذاك اليوم اجيت للدنيا وراح تنطيني نصايح .
علي// على كيفك ياب .. تره الفرق الي بيناتنا هو طرگ ٣ سنين يعني مو فد شي .
محمد// اييييي وين مرتك؟ وجهالك ؟
علي// ياا مره!؟😳 ياجهال!؟😳
محمد// مو كلامك مال واحد متزوج وعنده طن جهال دگوووم عفطي هو احنا يوميه جنا نطلعك من مصيبه توگع بيه والله يخلي الحجي وواسطاته ومعارفه😂
علي // عقلت هسه وداعتك وصرت اعرف امسح واكنس واطبخ ياابله😂 يعني ١٠٠ واحد يتمنى اظفري😂
محمد// هههههههههه لك شگد مشتاق لسوالفك ، تمام يجرالك نرجع اليوم للبيت .
رجع محمد ويه علي للبيت ، وصبيحة طارت من الفرحه وظلت حاضنتهم اثنينهم وتبجي وتگول الله لا يحرمني من دخلتكم عليه ، ومها جانت زعلانه من محمد ، وظلت تباوع بعيونه وتگوله مزاعلتك انت متحبني اني مو اختك 🥺 من شافه هيج تسوي انخمش گلبه وتذكر هدى ، وظل يجرها يريد يحضنه وتوخره وتدفعه ، ويتذكر هدى ، وتالي گمزت وتعلگت برگبته وحضنها ، وغمض عيونه وتذكر هدى من تحضنه وتشمه ، ودموعها تبلل رگبته ، وگطع صفنته علي// منو گال انتي اختنا ، ليش ماما الى هسه مگلتلج الحقيقه!!؟
ام محمد// ولك ياحقيقه!!؟
علي// امي الغالية كبرت تره ولازم تعرف كولشي ، مهاوي تره احنا لگيناج بالزباله وحتى جان على راسج گشر موز😂
مها// ماااااما
محمد وامه//😂😂😂😂😂😂
ام محمد// ولا تجوز من سوالفك ، يمه فدوه شگد اشتاقيتلك ، بس شوكت تعقل
علي // من تزوجين محمد اني اعقل من يمي😂
محمد// والله ياحبيبي الظاهر اني وانت راح نبقى مخابيل 😂
وهمه يضحكون ومتجمعين بالهول دخل ابو محمد وجان راجع من الشركه
ابو محمد// صوت ضحككم واصل لراس الشارع، الله مايحرمنا من لمتكم .
محمد شافه وگام وگف ، وابوه تفاجأ هو موجود :
ابو محمد// محمد انت هنا ابويه؟
علي// لا هذا روبوت جبته ويايه يشبه محمد😂
محمد// هلا يابه شلونك
ابو محمد اجى عليه وحضنه ومحمد همين حضنه ودموع ام محمد نزلت .
ابو محمد// انت ابني الجبير وفرحتي الاولى والدنيا كلها متسوه ، والبيت بدونك ظلمه يابويه، بعد لا تعوف بيتك ابني ، اذا تنقهر مني اني اطلع وانت تبقى ، ذوله كلهم امانه برگبتك ورايه ، لا تعوف البيت .
محمد// انت الخير والبركه حجي ، وانت عمود هذا البيت . وتحاضنوا مره لخ
@@@@@@@@@@@@@@@@@@@@@@@
محمد حس انو ابوه متغير هوايه ، وكلامه جان عبالك ده يگوله سامحني ، بس ظل متردد ويگول احتمال اني فهمت غلط . وعاف الموضوع للايام هي تكشف كل شي . سهر ويه علي للفجر سوالف وضحك وانفتح موضوع هدى ، وعرف علي من محمد التلفون الي صار بينهم اخير شي:
علي// كانت قاسيه عليك هوايه اييي اعترف لكن...
محمد// شگد صرت اسمع لكن بهل الفتره هوايه.
علي// لكن عدها حق ببعض الي گالته ، طلعتك من البيت جان غلط محمد .
محمد// اني اعرف دمارات ابوك اكثر منكم كلكم والدليل على كلامي الي صار اليوم من شافني.
علي// بس هدى متعرف ، هي هاي البرشه شتعرف ، هسه حتى من حجيتلي شگالت واني مداتخيلها هيج تحجي ، طول عمري اعتبرها طفله مشاكسه وعنوديه، بحيث هسه عبالك دتحجيلي عن وحده ثانيه.
محمد// انت ماشايفها صار كم سنه ، ايي جانت طفله ، هسه تغيرت ، حتى اني تغيرت.
علي// السؤال الي يطرح نفسه انت تعتبر تغيرها حلو لو محلو؟ يعني هسه انت شدتحس تجاهها ؟ بعدك تحبها وشاريها ؟
محمد// انت شدتحجي ، اني زعلان منها بس بنفس الوقت من گعدت ويه نفسي همين انطيتها بعض الحق . بس طريقة انفجارها صدمتني .
علي// يعني نفرت منها ؟
محمد// مااگدر احكم هيج ، الا تكون گبالي واشوفها واشوف ردة فعلي ، هي بعيدة مااگدر اجاوبك لان مااريد اظلمها او اظلم نفسي .
$$$$$$$$$$$$$$$$$$$$$$$$$$$$$$$$
ثاني يوم .... يوم عيد ميلاد محمد ... محمد كان بالنسبه اله يوم عادي بروتينه العادي والتهى بالمرضى والمراجعين وجان عنده عملية ساعة ١١ وفات للعمليات ومن طلع وره ساعتين تفاجأ بوجود بتول :
محمد// شجابج ؟ انتي مو مجازه
بتول// اليوم جان اجباري اجي ، جتني اوامر اداوم .
محمد// من منو الاوامر ، گوليلي حتى هسه اروح اگلب القسم.
بتول// لا يمعود اتشاقى شبيك، بس امي صارت احسن وجيت ، متريدوني؟ اروح ؟
محمد// بالعكس مكانج كولش خالي
بتول// باوعت بعيونه // صدگ!؟
محمد// قابل اغشج اني// وابتسم
يلا لعد گوم غسل وارتاح وبعدين نحجي ، مااگدر ارتاح لان عندي عمليه ساعة ٢
بتول// لااا محمد عليك الله سلمها لغير واحد اريد اگعد اسولف وياك .
محمد // اگولج مااگدر
هدى والبنات طلعوا من الدوام وركبوا سيارة هدى وديسولفون وفرحانين ، هدى جانت مسرحة شعرها ولابسه فستان 👗 لف حرير مشجر ورد ناعم والوانه صيفيه حلوووه مشمشي واخضر فاتح والمكياج والحمره المشمشي وحذاء كعب ٣ اوف وايت وطالعه جنها اميرة ولانا ولمى اندهشوا من شافوها ، واشترت كيكة صغيره وخلت بيها شمعه وحده واخذت لمحمد هديه نفس السوار الي هدالهياه ربر اسود عليه بليته مستطيله ذهب بس مكتوب عليها ( you’re mine forever)
وصلوا المستشفى ولانا اتصلت بسعيد وهمه بالاستعلامات اجى علي وشاف هدىوظل صافن عليها وهو حاط ايديه بجيوبه وهي مامنتبهه عليه:
علي// سبحان الي خلقج ولج ، هاي شصايره
هدى والبنات انداروا وتعجبوا وهو مشال عينه عن هدى .
هدى// ماادري وين شايفتك . اني اتذكر اعرفك ، اهااا ، انت موووو الي جان يصلحنا الحمام؟😂😂😂😂😂😂😂 حتى جان اسمك علااااااوي 😁
علي// هههههههههههههههههههه ملگيتي غير الحمام وحضنها .
هدى // هذا الي طلع على بالي😂😂 شلونك ( حضنته) حمدلله على سلامتك ومبروك الماستر اخويه.
علي// الله يسلمج ، تسلمين ، لج هاي شصايره ، والله عمي حقه يتخبل عليج ومن وراج🤭😂
لمى ولانا صافنات والى هسه معرفوا هذا منو الى ان عرفتهم هدى وتسالموا .
هدى// جاي على محمد مووو ، صدگ شوكت رجعت؟
علي // البارحه الصبح
هدى// ومحمد يدري
علي// اي يدري ، جيتي علمود عيد ميلاده (ويأشر على الكيكه والهديه الي بكيس الكارتون الي بيدها)
هدى// اي .
علي// عاشت ايدج ، راح يفرح بيج هوايه .
وتوجهوا لغرفه الاطباء وبالممر تلاگوا ويه سعيد ويوسف وزينب والتيم وتوجهوا كلهم لغرفة الاطباء حتى يفاجئون محمد
واتفقوا انو هدى تدخل اول شي لوحدها وتفاجىء محمد ، ويوسف اكد الهم انو محمد بالغرفه لان شافه من طلع من العمليات وتوجه للغرفه
ووصلوا الباب وشعلوا الشمعه وهدى شايلتها حتى تدخل ومقبلوا تدگ الباب حتى محمد يعتبر الي دخل واحد من التيم مو زائر .
@@@@@@@@@@@@@@@@@@@@@@@
#حبي_الاول_والاخير
البارت14
الجزء الرابع عشر///
بتول جانت بعدها بالغرفه تقنع محمد يسلم العمليه لغير دكتور ، محمد گام وگف ومطى جسمه:
محمد// ولو اني هلكان لان البارحه كله سهران ويه علي اخويه ومشبعان نوم
بتول وگفت گباله حتى لا يطلع ..
بتول// اني هسه افرگلك جتافاتك واخليك ترتاح بس لا تروح. ومدت ايديها تفرك بجتافه وهو واگف گدامها وعينه بعينها، وظلت تباوع بعينه وايدها نزلت على صدره ومدت ايدها تلمس بصدره وشعر صدره وعيونها بعيونه وقربت جسمها عليه الى ان لزگت بيه .
محمد حس بشي غريب ، ومد ايده وحطها على خدها وقرب شفافه من شفافها وباسها .
هدى فتحت الباب وهي شايله الكيكه الي بيها شمعه معلوگه والهديه وشافت محمد وبتول ، وشافت محمد لازم بتول من خدها وشفايفه تبوس بشفافها وجانت بتول منطيه ظهرها للباب ومحمد وجهه على الباب
هدى ...................... الصدمه جانت اكبر من يشيلها عقلها ، محمد تفاجأ ، الكيكه والهديه وگعت من ايد هدى ، هدى تباوع على محمد وبتول اندارت راساً وانصدمت، هدى متگدر تنطق ولا كلمه واگفه يم الباب وعيونها مفتوحه وحلگها مفتوح ، والدنيا صارت سوده بعينها ، يباوع على هدى وهو مرتبك
محمد// هدى ، انتي..........
الباب من فتحته هدى كان الكل وراها واگف وينتظر يشوف ردة فعل محمد من يشوف هدى ، يعني اغلبهم شافوا الي شافته هدى .
هدى// اي ... اني ... هسه كولشي وضح محمد ، ياااااااااقذر ( صاحت بصوت عالي) وطلعت تركض بالممر ولمى تركض وراها ولانا تصيح لك سعيد هااااي شنوو!!!!!!! وراحت ركض وره لمى .
محمد جامد بمكانه ، وبتول من الخزي والعار الي هي بيه رجلها صارت متشيلها ، وگعدت على القنفه الي بالغرفه وغطت وجهها بأيديها .
سعيد// خرررب دينك هاي شسويت ، وانتي حسابج ويايه بعدين. ( وطلع من الغرفه)
علي// لك محمد ليييييش ؟ خربت كل شي محمد.
يوسف وزينب مانطقوا ولا حرف بس نظراتهم على محمد وبتول .
محمد طلع من الغرفه وركض يدور على هدى .
هدى ركضت وركضت ودموعها مانزلت وطلعت من المستشفى وراحت تركض بالكراج تدور سيارتها ومن الي هي بيه مدتتذكر وين صفتها ، لمى ولانا وراها يركضون ، لگت سيارتها وهي فتحت القفل ولزمت يدة الباب حتى تفتحها وعاطت بصووووت عالي:
هدى/// ااااااااااااااااااااه ( صارت تبجي بحرگه وكل الي بالكراج اندار عليها ، تصوروا مات عدها شخص عزيز بالمستشفى وتعاطفوا وياها من بعيد بدون محد ميتقرب منها) وهي گعدت ووجهها على الباب ولازمه اليده مال الباب وتبجي وتضرب راسها بالسياره
اجوها لمى ولانا يركضون ولمى تبجي وحضنتها ، ولانا گعدت بصفها وتبجي وطلعت بطل مي من جنطتها تشربها .
لمى// هداوي خلي نروح منا بساع .
لانا// مراح تگدر تسوق خلي اصيح سعيد
هدى تعيط // اااااااااااه ياربي ، ااااااااااااه ارحمني
سعيد اجى يركض لما لگاهم وشاف منظرها ومنظر البنات ويفرك بوجهه :
سعيد// هدى لخاطري.........
هدى// اششششششش ، انجب ، انجب مااريد اسمع اي واحد بيكم ، اتفقتوا تموتوووووني ، قررتوا اشوف الموت ، شفته هسه ، شفتتتتتتته.
گامت لحيلها واستندت على لمى
هدى// لمى خلي نروح.
لمى // يلا
سعيد// اني خلي اسوق اوصلكم
هدى// مااااريد ، وخر من گدامي لا احرگكم كلكم .
فتحت السياره وصعدت وصعدت لمى يمها ولانا وره وشغلتها وايدها ترجف ورجعت بگ بجنووون وداست بنزين قوي وطلعت بسرعة من الكراج .
محمد جان ديدور عليهم بالكراج ومشاف غير هدى طالعه طايره من الكراج .
محمد// لك سعيد ، شلون خليتها.
سعيد // اكل خررره ، سمعت، ولزمه من قميصه، مقبلت ، حتى اني مقبلت بيه ، وخر من گدامي لا افلش وجهك ( عافه ودخل)
سعيد راح على بتول ورزلها وشتمها ، وهي تبجي وتگوله لحظه ضعف مو عن قصد ، علي گاعد على القنفه ويباوع على بتول وصافن .
بتول// والله لحظه ضعف .
علي// ماادري ليش مداصدگج ، على فكره اني عندي خبره بالبنات .
بتول// وانت منو؟ وشنو؟ حتى تحكم عليه
علي// شوفي ، كلهم هسه ديباعون بمنظار معين لان داخل نفس الدائره ، بس اني داباوع من غير منظار لان اني خارج هاي الدائره .
بتول// احتفظ بفلسفتك لنفسك بالله ( طلعت وعافت الغرفه)
محمد رجع لغرفة الاطباء وهو يزخ عرگ واخذ مي بالگلاص من البراد ويشربه. وعلي صافن عليه وماحاجاه.
محمد// ابدل ونطلع زين.
علي//.................
اندار محمد وشاف الكيكه بالگاع ومتكسره وشاف كيس الهديه ، دنگ وشال كيس الهديه ، وخلاه بجنطته الرياضيه وبدل ملابسه وشال جنطته واشر لعلي وگاموا طلعوا.
الطريق كله هدى تبجي وتمسح دموعها وتسوق ولانا ولمى ولا كلمة بس يباعون عليها ودموعهم تنزل وهدى جانت تگهد وبصوت عالي ، لحد محست انو معدتها صارت تگلب وتريد تستفرغ ، داست بانزين ونزلت الجسر سريع واخذت السايد اليمين وطبگت وفتحت باب السيارة وصارت تستفرغ ، ولانا ولمى نزلوا ركض ونزلوها من السياره وهي مستمرة تستفرغ.
محمد وعلي طلعوا وركبوا سيارة محمد والطريق كله علي ابد مانطق ويه اخوه ولا كلمه ، ولابس نظارته الشمسيه ومصعد تك رجل وذاب جسمه بشكل راخي بالصدر ، قطع السكوت محمد :
محمد// علي .... لو انت مكاني هسه شتسوي ، دماغي وگف.
علي// والله ماتمنى اكون مكانك صراحة ، بس اقل شي جان سويته هو وگفت گدام اقرب بنكه وتفلت حتى التفله ترجع على وجهي ، لان لومو انت اخوية الجبير وعيب جان اني تفلت بوجهك.
محمد// اتفل علي .. استاهل .
علي// مسبح تفال هسه مايوفي حقك لهذا خليني ساكت.
محمد// شتگول استاهل.
علي// لا تعبر اليوم ، روح عليها محمد .
محمد// مااگدر .. مااگدر اباوع بعيونها ولا بوجهها.
علي// ميخالف ، بس خليها تحس انت ندمان.
محمد// مااگدر ، مااااگدر
علي// اوگف محمد ... لك اوگف ، اطبگ
علي انتبه انو هدى والبنات واگفين بالجهه اليمين وفعلاً محمد طبگ گدام سيارة هدى بمسافه ورجع بگ ، بس بقى مسافه بينهم ، والبنات جانوا حايرات بهدى وهي تستفرغ ويغسلون وجهها وماانتبهوا عليهم . نزل علي وبعده فاتح الباب شاف محمد يباوع عليهم بالمرايه ومانزل.
علي// شتنتظر انزل، بسرعة.
محمد// مااگدر اواجهها هسه راح اذيها اكثر
علي// لا تتفلسف وانزل.
محمد// روح انت علي ، مااگدر
علي ركع الباب حييل وركض عليهم .
علي// شصار؟
لمى// تخربطت واستفرغت .
علي جر هدى من ايدهم ، وهدى الاعياء الي جانت تحس بيه وحرارة الجو خلاها مثل الخرگه بيده .
علي// هدى اوديج مستشفى؟
هدى// عوفني مااريد
علي// زين صعدوا خلوا اني اوصلكم .
هدى// عوفني گلتلك.
علي// لا تكفريني ، لا تعاندين ، خره على محمد ، مااگدر اعوفج وانتي هيج .
جرها وگعدها ليوره وصعدت لانا بصفها ولمى صعدت بالصدر ، محمد مستمر گاعد يباوع عليهم بالمرايه من بعيد ، وشاف علي صعد بالسياره وشغلها وحرك ومشى وعبره ، وانتبهت لمى على محمد من عبروه.
علي// وحده منكم تدليني الطريق لان اني مااندل وصار فتره تارك بغداد.
لمى // اني ادليك ، بس انت عندك اجازه سوق؟
علي// لا .. نزلت من الحجله هستوني وگعدت وره الستيرن😏، عندي اجازه دوليه.
لمى// مو قصدي بس عبالي ماعندك اجازه وسيطرات و...
علي// وحدتكم عدها بدل دماغها دماغ بشه🤨
لمى بسكوت// شگد سخيف😕
محمد ظل واگف وهو يشوف سيارة هدى تبتعد وعرف انو خلص كل شي خلص . مابقى امل يفوز بهدى .
علي وصل لبيت هدى ولمى ولانا وياها نزلوها وفتحوا باب الگراج وطلعت امها وتفاجأت ب علي والي فاجأها اكثر حالة هدى ، ووجهها الاصفر و حالة الاعياء الي هي بيها
ام هدى// هدى ماما.. شبيج !!؟؟واخذتها من ايد البنات .
هدى// ماكو شي بس تخربطت من الحر .
علي// خلوووده حبيبتي مشتاق.
لمى ولانا اخذوا هدى وصعدوا بيها لغرفتها وعلي حضن ام هدى وباسها.
ام هدى// علاوي حمد لله على السلامه بس شجابك على هدى ، وشلون ؟
علي// اول مرة انطيني مي بارد وهسه اگعد وكل شي اخرطلج واعتبريني صبيحة وگعدت يمج😅
ام هدى// تعال فوت تعال ولا غيرتك السنين.
&&&&&&&&&&&&&&&&&&&&&&&&&&&&&
هدى اول ماصعدت فاتت الحمام واستمرت تستفرغ لحد ماوگعت بالگاع وشالوها البنات غسلولها ومددوها على الفراش ، وهدى تقرنصت وگامت تبجي بسكوت والبنات يهدوها.
لمى// هداوي مااگولج الموقف جان مو صعب ، بالعكس كولش صعب ، لكن انتي مفروض هسه تكونين اقوى شويه.
لانا// لمى شدتحجين شدتخربطين لج ياااقوة ياااصخام اي وحدة مكانها جان هسه گلبت الدنيا .
لمى// لانا رجاءاً .
لانا// انتي رجاءاً دخيلج اتركي المثاليات هسه رحمه لاهلج وخليها تبجي وتعيط وتكسر وتگلب الدنيا حتى ترتاح تره الي بيها هسه نااار تعرفين شنو نااار.
هدى// ناااااار والقران ناااار ، احس احد شلع گلبي ويحفر بسجين بمكانه. صدري ديشگك ، اريد املخ نفسي ، اريد املخه اله ، اريد املخها هي .
لانا// حقج ، بس منو هي؟ تره احنا مشايفيها قبل ولا نعرفها لهاي الكح......
لمى // اي معرفتها منو .
هدى// ومااريد اعرف منو هي ومنو تكون ( وگامت گعدت بالفراش ومستمره تبجي) المهم جان ديبو........... اوووووف ( وغطت وجهها بيدها) شفته شلون هو...... يااااناس النار تحرگني بكل جسمي ياناس .
لمى// اهدي خلي انزل اجيبلج عصير شي لان هوايه استفرغتي .
نزلت لمى وشافت علي گاعد ويه ام هدى وغمزلها بما معناه لهيتها.
ام هدى// حبيبتي لمى ، شجاها هيج تخربطت ؟
لمى// خالة اليوم حارة كولش وگضينها بره على اساس نتغدى ونفتر بالسوگ وهدى نازكه تعرفين ومتحملت .
علي// ايي خلوده تره بنتج حيل مابيها لحمه (ويضرب على رجلها) شبيج شجاج متوكليها؟😁 وعدل نفسه ورفع حاجبه مثل محمد وكمل: بعدني تره لابس دور صبيحه🤨.
لمى ابتسمت وام هدى ضربته وكامت تساعد لمى تسوي عصير .
علي// اني اترخص، بس راح استأذنج اصعد اسلم واشوف هدى قبل مااروح.
ام هدى// بس علاوي ، مااريد تفتح وياها موضوع اخوك لان كل شي انتهى ، اترجاك ابني .
علي// هو مال كل شي انتهى( ويهز بيده) .. لا تخافين خلوده ماافتح.
صعد ودور منا ومنا وسمع الصوت منين يجي وتوجه لغرفة هدى ودگ الباب رغم جان مفتوح:
علي// هداوي ادخل؟
هزت راسها هدى وهي تبجي وبعدها گاعده على الفراش . اجى گعد يمها وشكله صفح ينطي شبه من محمد، وهدى صارت تبجي اقوى ، علي مد ايده ولزم ايدها ، هي اندهشت، ورجع سحب ايده :
علي// تربات الاجانب اني لاتهتمين ، نحجي بالمهم ونعوف الشقى والتحشيش
هدى// لا مااريد اسمع اسمه، مااريد احد يجيب طاريه.
علي// هو صح اخويه ، بس كلب ابن كلب على هالدگه مراح اگولج غير هيج ، بس ، يموت عليج ، كلمة يموت قليله هداوي ، تدرين شگد هسه هو ندمان ، تدرين شنو حاله؟
هدى// لحظه لحظه اول شي منو هاي الي جان.... (وغطت وجهها وتبجي)
علي// منو متكون هداوي شبيج ، دكتوره وياه والظاهر استغلت وضعكم او حالة الضعف الي هو جان حاس بيها ، لان البارحه بالليل اني وياه كله بطاريج.
هدى// انت گاعد گبالي تبررله ؟
علي// لا والله.. گلتلج كلب ابن كلب وناقص ، بس لازم نشوف الامور من غير منظار
لانا// بس الي سواه جريمه.
علي// خليج محضر خير انتي ، مگلت اني مو جريمه ، بس لازم نسمعه اله همين ، والطبيبه من طلعتوا ظلت تبجي وتصيح لحظه ضعف ، يعني تعترف انو هي غلطانه وهي بادرت بالغلط .
هدى// وهو شريف عفيف ملاك منزل وطفل معرف يتصرف مووو؟ لو الصورة مقلوبه واني هيج سويت ، تتصور جان هو شنو رده فعله؟
علي// شوفي ياحلوة ، احنا الرجال بصورة عامه نضعف گدام هيج شي اسرع واقوى منكم ، اني رجل واگولجياها بصراحه احنا گواويد 😂 ، لا جديات ، احنا اضعف منكم بهيج سوالف ، ولاتنسين الظروف الي انتي وهو دتمرون بيها وهو تره اني شفته البارحه منتهي من وره اتصالج الاخير بيه وهاي البربوگ الي وياه اكييد استغلت الموضوع.
هدى// انت شدتحجي علي ، اني لعبت نفسي هسه منه وتقززت ومستحيل اگدر انسى.
علي // مااگولج سامحيه ، او اغفري اله ، بالعكس شراح تسوين مراح احد يلومج واني اول الناس اوگف وياج ، بس ضميري يوجب عليه انو احجي الحق .
هدى// انتهى كل شي انتهى بيننا ، هاي الشعره الي قصمت ظهر البعير .
صعدت لمى وجايبه للكل عصير ، واخذ من عدها علي وغمزلها :
علي// لو باجه جان استوت ، ساعة بس تسوين عصير ؟
لمى// لاع يافهيم ، جنت احاول اشغل خاله حتى تاخذون راحتكم لهذا اشرب العصير وتوكل .
علي// بارك الله بيج ، بس تره لاحظي اني ماگاعد ببيتج ، حتى تطرديني ، استجني شويه واهدي ورده.
لمى // شگد ........
علي// ماسمعتج بالله عيدي ، شگد شنو؟
لمى// غثيث ، وف....
علي// اشش اشش ، لا تلحين.
لمى عصبت منه وكرهته حيل وهو رجع يحجي ويه هدى ويباوع صفح على لمى وهي تتأفأف ومعصبه ويبتسم :
علي// هداوي اروح اني حتى خلوده متحس ، بس اريدج توعديني انو راح تلبسين الدنيا وتضربيها بقندره ، واني ابقى يمج سواء سامحتي محمد او ماسامحتيه انفصلتوا ماانفصلتوا اني عندج هنا وبمكان ضرغام.
حضنته هدى وگامت تبجي حيل وهو حضنها وشاورها: هسه عرفت ليش اخويه متخبل ، لج وخري وخري ودفعها.
هي ابتسمت ومسحت دموعها وسلم عليهم وطلع .
لمى// شگددددد مكروووووه ياااالله ، خرررب خرررب شايف نفسه فد شي .
هدى ولانا وحده تباوع على الثانيه وعلامات تعجب واستفهام بينهم .
@@@@@@@@@@@@@@@@@@@@@@@
محمد رجع للبيت وراساً دخل جوه الدوش ، وگام يبجي بحرگه وبسكوت ، ظل جوه الدوش بالنص ساعه وهو بس واگف ويبجي ويضرب حايط الي بصفه بيده ويصيح حيووووان ، حيووووان، مراح تسامحك ابداً .
وطلع من الحمام وگعد على الفراش ، وهو عينه وارمه وخشمه احمر ، ويحاجي نفسه، لك ليش ، شنو الي خلاك هيج تسوي، وظل يفكر ببتول شلون هي بدت ومدت ايدها لصدره جوه القميص وشلون حفزت غرائزه ، وتذكر وجه هدى وشلون وگفت گباله بفستانها وشعرها وشايله الكيكه وعالگه شمعه، جان يتمنى يروح يبوس رجلها بس حتى تسامحه . هو انطى بتول هيج مجال هو شال كل الموانع بينها وبينه ودگ ميانه وياها وتقربلها ، هو عاملها بشكل يختلف عن معاملته ويه باقي الطبيبات، ورجعت نزلت دموعه ويبجي من تذكر هدى ، وشكلها وعيونها والكيكه والهديه...... الهديه..... وگمز على جنطته وطلع الكيس وشاف علبه بداخله وفتح العلبه وشاف السوار وقره المكتوب عليه وگعد بالگاع واتكأ على الكنتور ورفع راسه يبجي . وظل بالساعه لازم السوار ويفكر بيها ويتذكر من انطاها سواره وگمزت حضنته وريحة جسمها، شلون راح يگدر يرجعها ، شلون يخليها تسامحه ، وقرر مايستسلم ..
گام گعد على المكتب مالته وطلع تلفونه يتصل بأخوه علي ، وجان التلفون يدگ عنده وباب غرفته وفتح علي الباب وهو شايل التلفون ويهز بيه بيده.
علي// جيتك هياتني
محمد// تأخرت .
علي// وصلتهم كلهم لبيتها وظليت شويه يمها ، وبعدين طلعت اخذت تكسي وجيت ، ااااخ يابه الحر يخلي الزمال يبول دم ، وابو التكسي لك خرب بالگواد ماسكت، دمرني ، بس اريد انزل ، اگولك لازم تشوفلي سيارة 🚘 تره مااتحمل.
محمد بيده سوار هدى ويگلب بيه// نشوفلك مو غلط .
علي// خشمك احمر وعينك وارمه .
محمد // طب شامبو بعينه وابويه استلگ من دااسبح .
علي// صدگتك😁 خلي يولن🤨
محمد// راح تحجيلي ؟
علي// اروح انزع واسبح واكل لگمه وبعدين نسولف.
محمد// عليييييي.
علي// گوووم لك ، قابل الدنيا كلها الك ، مداتحمل نفسي من الحر . وطلع وعافه.
&&&&&&&&&&&&&&&&&&&&&&&&&&&&&
هدى الليل عدها ماانتهى وصار طويل وخصوصاً من البنات تركوها المغرب ورجعوا لبيوتهم ، ومگدرت تحط لگمه بحلگها رغم جانت مجبوره تمثل گدام امها انو هي متأذيه من الحر بس ، ويادوب كم خاشوكه وصعدت لغرفتها.
كلما تحاول تغمض عينها ترجع تتذكر محمد وبتول والصوره مالتهم من ديبوسها گدام عينها ، وتفتح عينها وتتگلب وتگوم تبجي وتحاجي نفسها ليش ؟ ليش ؟ لحظه ضعف شنو؟ زين شلون گدرت شفايفه تضوگ غير شفافي ، مهما يكن مو مبرر هذا ، اصلاً مااگدر بعد اباوع بوجهه ، اكرهه واكره الساعة الي حبيته بيها ، اكره كل شي بيه ، وتذكرت قساوته عليها بالايام الاخيره وشلون يحاجيها كلمتين بالگوه، وكرهته بالزايد وحست نفسها كولش مغفله وهوايه استضعفها واعتبرها هي ميته عليه وتريده ، لهذا راح تسامحه ، وقررت تنهي كل شي وياه وتمشي بالقضيه حتى اذا عاند ورفض وتخلع وتنساه وتحتقره همين ، وتحتقر وتكره كل شي يذكرها بيه .
علي بالليل گعد وحجاله لمحمد كل الحديث الي صار بينه وبين هدى وبالاحرى كل الي صار ببيت هدى وبالسياره وحتى مشاحناته ويه لمى :
علي// وهذا هو اخويه .
محمد بعده السوار بيده ماتركه من اول ماطلعه من العلبه.
محمد// يعني اكو امل تسامحني؟
علي// تره تحبك هوايه هاي البرشه لكن انت هسه جرحتها، والمجروح ماتگدر تتوقع شيسوي .
محمد// لازم اشوفها.
علي// گلتلك انزل ، انت ثگلت طيزك.
محمد// مجااااان فاد اني اعرف اكثر منك .
علي// وشلون هسه ؟
محمد// ماادري ، بس لازم اشوفها واحجي وياها ،
علي// تره حتى اذا سامحتك متگولي شيفيد وانتوا راح تنفصلون ؟
محمد// مراح ننفصل .
علي// شلون هيج بالله متأكد؟
محمد// ابوك لان متغير .
علي// شنو الي يضمن؟
محمد// اني هيج حاس
علي// ابو جاسم مدام هيج حساساتك قويه وتشتغل ، منطتك صافرة من لزكت بالدكتوره وتقربت منها قبل ماتبوووس رحمة لوالديك؟
محمد// لا تذكرني (ومرد السوار بيده )
علي// شنو قصته؟( اشر براسه على السوار)
محمد// هديه هدى . وشوف المكتوب عليه.
علي// مو جان عندك اخوه ؟
محمد// اي مكتوب عليه غير شي بس هديتلهياه.
علي// تسمحلي اتفل عليك؟
محمد// وشيل النعل واضربني .
علي// اضرب كمان انا عايز اتووب😂
محمد// شلون اشوفها ؟
علي// روحلها للدوام.
محمد// لا... ميخدمني دقايق بالكراج ، ثم مااريد مكان عام ، اريد اخذ راحتي من احجي وياها .
علي// مااعرف ، وين يعني ، على هذا الحجي حتى مطعم وكافتريا مراح تخدمك .
محمد// لا.. ميخدموني .
علي// شقتك.
محمد// لك ايييييي. عاشوا ، بس شلون اجيبها او اخليها تشوفني .
علي// اتصل بيها واطلب منها .
محمد // خابرته قبل متجي يمي انت ٣ مرات وماشالته وبالرابعه ضربتني بلوك من كل مكان .
علي// خلص ، انطيني رقمها ، وعوف الموضوع عليه.
محمد// اخيك اني ، اذا وافقت تشوفني ، الك مني سيارة موديل الفين وهسه .
علي// مهما تكن نتائج اللقاء بينكم؟
محمد// مهما تكن..
علي// deal
محمد// deal
انطاه رقم التلفون واتفقوا انو ثاني يوم الجمعه يتصل بيها ويقنعها يلتقون السبت العصر بالشقه مالتهم . ولبس السوار بأيده وهو كله امل انو تسامحه.
@@@@@@@@@@@@@@@@@@@@@@@
ثاني يوم گعدت هدى مكسره وراسها ينفجر من البجي الليل كله وروحها بخشمها وماتتحمل اي كلمه من اي احد . حاولت تسوي كم شغله بالبيت مثل كل يوم جمعه ، مگدرت ، جانت نفسيتها ووضعها ووجع راسها ميخليها ترفع ايدها ، سوت الها گهوه الها والأمها واخذت مك گهوتها وراحت گعدت بالمرجوحه رغم الحر ، بس جانت مدتطيق البيت ولا غرفتها لان كلما تگعد مكان تتذكر محمد بيه، حتى من جتي گعدت على المرجوحه تذگرت من لگته غافي وصاحته ونامت بحضنه للصبح وبدت دموعها تنزل وحست بتقزز وكره اله لان رجعت تذكرت الي شافته، وقطع افكارها تلفونها دگ رقم غريب ، ظلت متردده ومشالته لان اجى على بالها استاذ عمر ، مراح تگدر حتى تجامله ، بس منين جاب رقمها، هلووو يعني هي هاي تصعب عليه ورقمها مسجل عنده بالقسم🤦🏻♀️ وسكت التلفون وماردت وشويه ووصلتها مسج ، جاوبيني اني علي : دگ وجاوبته
هدى// هاا علاوي
علي// شلونج اليوم؟
هدى// شنو تتوقع؟
علي// اكيد عينج وارمه وخشمج الابرش احمر مثل الي يمي.
هدى// وهسه مفروض يعني انقهر لو ينكسر گلبي عليه لو شنو؟
علي// لا.. المطلوب تشوفيه وتگعدين وياه وتسمعيه ويسمعج.
هدى// علي... اني مااريد اشوفه او اسمعه .. واصلاً ماعندي شي اگوله اله.
علي// لخاطر الحب والعشرة الي جانت بينكم
هدى// بعد الي صار ، مااعتقد هو خلى خاطر للي ذكرته. اترجاك علي لات.....
علي// من حقه انو تسمعيه للمره الاخيره على الاقل ، حتى من تتخذين اي قرار متندمين . لاحظي احجي بصالحج، اسمعيه للمرة الاخيره، وراها انتي تكونين سويتي بأصلج ولاخر لحظه محد يعتب او يلومج ، حتى گلبج.
هدى// مااگدر .. مراح اگدر علي ، راح اذيه واذي نفسي.
علي// شفتي شگلتي؟ الى هسه تخافين او متريدين تأذيه رغم الي سواه.
هدى// فهمتني غلط ، من راح يتأذى يعني راح احجي كلام اني مااحب او ميعجبني اگوله .
علي// لخاطري اني، انطيه فرصة اخيره .
هدى//...............................
علي// الوو ، ويايه انتي ، هدى؟
هدى// لا... مااريد اشوفه.
علي// راح تنجبرين تشوفيه بيوم من الايام واحتمال يتهور ويطلعلج بمكان متريدين تصير بيه هوسه ، اني داحجيلج لان اخويه واعرفه وانتي همين تعرفيه احسن مني بعد ، من يريد شي يسويه لو مهما تكون النتائج .
هدى// قصدك فضيحه واحتمال يجيني للدوام
علي// عفيييييه ، لگفتيها ، واني صدگيني مجان طلبت منج هذا الطلب لومو اخاف عليج واعرفج شگد حساسه بهيج مواضيع وفضلت انو اني احدد المكان حتى تحجون براحتكم ومحد يدري.
هدى// تمام ، وين؟
علي// باجر بال٤ العصر ببيتكم .
هدى// قصدك هنا ، ماما ولايمكن تس....
علي// قصدي شقتكم الي جنتوا راح تزوجون بيها.
هدى// لوحدنا؟
علي // تخافين منه لو تخافين من نفسج؟
هدى// لا ... لا هايه ولا ذيج .
علي// خلص اتفقنا ؟
هدى// تمام ان شاء الله.
سدت التلفون وگالت خلص خلي تنهي كل شي ووين متوصل خلي توصل وبدت تفكر شراح تحجي وشراح تسوي وشلون راح تعرفه قيمته وكمية الحقد والكره عاميتها.
علي سد التلفون وراح لغرفة محمد:
علي// وين السويج ؟
محمد// يا سويج ؟
علي// السياره.
محمد// وافقت!!؟؟
علي// ٤ العصر بشقتكم
محمد// تعاااال ابوووسك.
&&&&&&&&&&&&&&&&&&&&&&&&&&&&&
محمد منام الليل كله ويعد الساعات وجان فرحان وخايف ويدري هذا لو اخر مره يشوفها ويحجي وياها ، لو اكو امل وتسامحه ، يعني هذا اللقاء مصيري وهو راح يحدد ، يعيش ، لو يموت.
هدى جانت عكسه جانت تتحظر تنتقم منه وتحقره وماترحمه مثل مارحمها ، هو متصور راح يشوف هدى الي تحبه وتموت بس يحضنها ، هدى الي راح تنزل دموعها وتعاتبه. لكن.. هدى هايه ماتت ، قتلها هو ببروده وخيانته وكبريائه ، هدى الطفله ماتت.
$$$$$$$$$$$$&&&&&&&&&&&$$$$$$$$
صارت ساعة ٣ العصر وهدى حضرت نفسها ولبست لبس عااادي جداً بنطرون جينز وقميص وردي فاتح وشالت شعرها لان الدنيا حاره ، وگالت لامها راح تروح تشتري كم غرض الها وطلبت منها قائمة الحاجيات الي تريدها للبيت حتى تجيبها بدربها وبالفعل امها انطتها ورقه بكل شي تريده .
محمد لبس وتعطر وكأنه اول مره راح يقابلها ، وركب سيارته ووصل الشقه من قبل نص ساعة من الموعد ، وفتح التبريد بالشقه وهواها ، وظل گاعد ينتظر هدى
وصلت هدى وظلت كاعده بالسياره وجانت الساعه ٤ وعشره ، وحاولت تجمع اعصابها وتجر نفس ومتدري محمد جان يراقبها من البالكون ، واول مدخلت البنايه هو دخل من البالكون ووگف ينتظر تدگ الجرس ، ودگته وراساً فتح بحيث هي تفاجأت لان عبالك جان واگف وره الباب.
محمد// هدوش هلو ، ادخلي ، تفضلي،
هدى// على كيفك ، اخذ نفس. شنو اول مرة تشوفني ؟ وتحاشته ودخلت.
محمد// اول مره تكونين زعلانه مني.
هدى// زعلانه!!!!؟؟؟؟ هههههههههههههه تره زعلانه متوصف الي بداخلي يعني . ( وابداً ماباوعت بوجهه ، مشت بالشقه وتوجهت للهول وصارت تلزم بالقنفات وتتذكر من اشتروها.
دخل وراها محمد وظل واگف يباوع عليها. برودها مو طبيعي ، كل الي جان متوقعه يصير تلاشى ، جان متوقع راح تحجي عليه وتعتب وتبجي لكن...
گعدت هدى على قنفه كرسي واحد وتقصدت حتى لا يگعد يمها، والسويج بيدها ومرفعت راسها تباوع وتلعب بالسويج ، ومحمد واگف بباب الهول.
محمد// عطشانه؟ اجيبلج مي.
هدى// لا ... مااريد ... اسمعك محمد.
محمد// اني.....
هدى// انتتتتتتت ؟؟؟
محمد// مراح تسامحيني ادري وكل شي بيج هسه داشوفه يگول هيج ، بس اطلب منج طلب واحد ، ارفعي راسج وباعي بوجهي .
هدى// اعذرني مراح اگدر، مووو لان راح اضعف ... لا ... بس مااريد استفرغ.
محمد// الله يغفر .
هدى// اني مو الله ، اني عبد اثول جانت عيونه متشوف غير شخص واحد وراه جل جلاله ، وهسه عرفت شگد جانت ثوله ،
محمد// انتي مو ثوله ، انتي نقية ، وصافيه واني اعترف اني غلطت ، ( تقرب منها وگمبص گبالها ) اني گدامج شتريدين تسوين سوي ، لج اني اموت عليج وادري نسوان العالم كلها متعادل اظفر منج و....
هدى// والي شفته بعيني والي انت سويته شيسموه هذا ؟
محمد// لحظه ضعف ، اعترف ( وگام من كبالها وصار يفتر بالهول) شوفي ، بالوضع الي جنت بيه والضغط ، وحسرتي واحساسي راح افقدج يوم وره يوم ، جنت ضعيف ، ضعيف كولش ، وهي تقربت مني بالايام الاخيره وصارت صديقه ، وهي بادرت واني ضعفت ، هي مذنبه اي ، لكن ذنبي اني اكبر ادري والله ، ذنبي انو ضعفت ، صدگيني هاي جانت اول مره المس بنيه غيرج واخر مره .
هدى حست جسمها صار نار لان رجعت تذكرت المنظر .
هدى// يعني مافهمت لحظه الضعف ليش جانت ، محتاج حنان وحضن جنت لو شنو؟
محمد// ماادري
هدى// بس اني جنت موجوده وانتظر منك كلمة بأتصال .
محمد// لا مجنتي موجوده ومجنتي حاسه بالنار الي بيه واتصالنا الاخير حسيتج مستصغرتني وبديتي تملين ، ردتج تحتويني
هدى// احتويك؟؟ ليش شلون احتويك ؟ بالجنس مثلاً ؟
محمد// تعرفين مو هذا قصدي
هدى// لعد من جنت حاضنها وتبوسها هذا مجان جنس ؟؟؟ ( علا صوتها) هذا جان شنو يسموه بلا زحمه لو الا اشوفك راكب فوگاها يلاااا اعتبر هذا جنس .
محمد( علا صوته) // عمري كله حتى من جنت المسج او ابوسج او احضنج مجنت افكر بشي اسمه جنس ، جنت ومازلت اعتبرج حبيبتي الي مااريد اعوف حضنها ولا ابتعد عنها.
هدى// وهي؟؟ شنو جان اسمها لان اني جنت اعرف بس روان خلف الله عليها وعلى ايامها على الاقل الوضع وياها مجان +١٨
محمد// بتول .
هدى// بتوووول، شوف شگد تحاول هسه تبرر بس مراح تقنعني ، سؤال واحد راح اسألكياه وجاوبني بصراحه ، لو جان الوضع مقلوب وانت شفتني يبوسني واحد ، جان سامحتني ، جان غفرتلي؟
محمد// .........
هدى// شلون لعد تطلب مني الي انت متگدر تسويه
محمد// اني غلطت ( وگام يعيط) غلطت وندمان واعترف وادري الي سويته غلط وقذاره وكل شي تريدين تگولين عليه بس مامستعد اخسرج ، مااگدر ، سمعتي مااگدر .
هدى// بس مستعد وعندك قابليه تلمس وتبوس غيري لان جنت محتاج حنان وحضن وتقربت منه وفتحت قميصها وكشفت عن ستيانها وصدرها .
هدى// تفضل .. اخذ حنان ، تفضل ، تره كلنا نفس الطعم بس العبوه تختلف( وغمزتله)
محمد صعد الدم لراسه ورفع ايده وضربها راشدي بحيث وگعت بالگاع وحست خدها صار نار وظل واگف فوگاها وصاح : انيييي مو حيواان .
هدى رفعت نفسها وشاف خدها ايده طابعه عليه واحمر ، ولما رفعت عينها ، شاف دموعها نازله ، بدت تسد دگم قميصها وگالت:
هدى// الي بيني وبينك انتهى ، انت يمكن مو حيوان صحيح ، بس انت قتلتني وتركت حرگ المه اقوى من حرگ روان .
محمد// مااطلگ هدى.
هدى// اجيب بتول وروان شاهد گدام القاضي ، ونشوف شلون مااخلعك مثل ماخلعت گلبي.
جرت السويج وجنطتها وطلعت وعافته وهي تبجي ، وعرفت هي هاي النهايه لحبها لمحمد .........
@@@@@@@@@@@@@@@@@@@@@@@
نهاية الجزء الرابع عشر💔