حبي الاول والاخير

البارت15

#حبي_الاول_والاخير

الجزء الخامس عشر///

استعجلت الرحيل ورحلت في غير اوانك
هنا خطوط ايديك، صمتك ، صدى صوتك ، عنفوانك
هنا ضحكت ، هنا بكيت ، هنا على صدري غفيت
هنا تصاوريك على حايط البيت ، هنا على كتفي لعبت لعب الاطفال ، هنا بقايا من بقايا امنياتك
رحلت انت وهي ظلت في مكانك ...
في وجوه الناس اطالع ، وجهك الحاضر الغايب
وين انت... ومتى اشوفك ...
وحدي اسال .... وحدي أجاوب ....
حتى في اصغر اشيائك ابقى اتأمل واراقب
استجديييي  صوتك ... استجدييييي  وجهك
ولو في لحظه وهم ...
جمدت الدمعه بعيوني وانتهى احساس القلم ..
هنا ضحكت .. هنا بكيت .. هنا على صدري غفيت
هنا تصاوريك على حايط البيت ، هنا على كتفي لعبت لعب الاطفال ، هنا بقايا من بقايا امنياتك
رحلت انت وهي ظلت في مكانك ...

استعجلت الرحيل ... ورحلت في غير اوانك...

&&&&&&&&&&&&&&&&&&&&&&&&&&&&&
محمد انتهى، وگف بالبالكون ويراقب هدى صعدت للسياره وظلت خمس دقايق حاطه راسها على الستيرن وتبجي ، وهو يراقبها ودموعه تنزل وياها ، عرف هاذي نهاية حبهم وانو حتى لو راد مايطلگ ، راح تگدر تخلعه بكل سهوله ، مات بيه بهل اللحظه كل شي ، گلبه ، روحه ، عقله ، كله خسره من هدى طلعت من يمه . ماتوقع بيوم من الايام انو هو راح يكون سبب انفصالهم ، خسرها واقسم وهو يقفل الشقه بالمفتاح انو گلبه انقفل ويه هذا البيت وراح ميخلي احد يدخل بيه وياخذ مكان هدى.
رغم هدى تغيرت وماشاف هدى الطفله ، لكن حب وعشگ هدى الجديده ، حسها صارت أمرأة كامله من كل شي ، وهذا الي حطمه اكثر .
كملت هدى طريقها للبيت وخدها واضح بيه الراشدي مال محمد وكل شويه ترفع راسها للمرايه تشوفه ، وتنزل دموعها وتمسحهم ، وصلت الماركت ونزلت تجيب الاغراض الي امها كتبتها بالورقه، واشترت الاغراض ووصلت للكاشير تنتظر سراها حتى تحاسب ، وهي صافنه انتبهت رف الجگاير الي وره الكاشير ، وتذكرت محمد جان يضوج من الدكتوره الي ناقشتها بالماستر لان تدخن ، وقطع افكارها الكاشير وهو ياخذ اغراضها يدگها ، ولّما وصل للحساب گلتله انطيني باكيت جگاير اخف نوع عندك ، دور الها الكاشير وانطاها باكيت وگاللها هذا اقل شي نيكوتين وقطران ، حطته بجنطتها وحاسبت وطلعت .
رجعت للبيت وانطت امها الاغراض وشافت امها خدها احمر على ازرگ وسألتها ، وبررت لأمها انو مريه بالماركت وگعت قوطيه معجون عليها من دتسحب وحده وصارت الضربه على وجهها ،  وصعدت لغرفتها حتى تتجنب اسئلة امها وفاتت غرفتها  حتى تغير ملابسها ، وفتحت الكنتور وشافت صور محمد على الباب ، وبدت تشيلهن وتذبهن بالگاع ودموعها تنزل ويه كل صورة ، گعدت بالكاع والصور گدامها وصارت تشگك بيهن صوره صوره وتبجي بشكل هستيري ، الى ان تعبت والم الراشدي على وجهها وعظمة خدها توجعها ، مسحت دموعها وگامت بدلت ونزلت جوه ، امها ركضت جابتلها جيس ثلج وگلتلها تخليه عليها ، وظلت تدردم وتدعي على المرية الوهميه.
هدى مرادت تصعد للغرفه  بعد وتبقى لوحدها لان راح تظل تتذكر كل شي وتتذكر محمد  لهذا ظلت تلهي نفسها ويه امها ، وسوت الها گهوه وراحت گعدت بالمرجوحه ، وبدت تتراسل ويه البنات بدون متجيب سيرة محمد او هي التقت بيه ، وتذكرت الجكاير وراحت جابت الباكيت واللايتر الي اشترته وياه وورثت جگاره واختنگت من اول نفس ، لكن جانت مصرة انو تبدي تدخن ، طلعت امها تگعد يمها وشافت الجكاره بيدها انصدمت.
ام هدى// صدگ تحجين؟ من امتى تدخنين واني مااعرف؟
هدى// من زمان ماما ، من وره مانزعت الحلقه وانطيتجياها ( كذبت على امها)
ام هدى// زين ليش تخبلتي؟
هدى // بالعكس عقلت ، جنت مخبله، وراح تشوفين وتعرفين عني منا وجاي اشياء هوايه ، بيها الي يعجبج وبيها الي ميعجبج ، وبالحالتين حاولي تتأقلمين ويه الواقع الجديد بدون متسأليني ليش او شوكت ، او تطلبين مني اترك او ارجع مثل هدى القديمه، لانها مااتت ، تمام ماما؟
ام هدى// هدى القديمه ماماتت ، انتي شلتيها وضميتيها ، وراح ترجعيها من يصفى بالج ويطيب گلبج .
هدى // بالي صااااااافي حالياً  ، اما گلبي ياامي فأحترك وتفحم  وتشوه والف من خالتي ميري مراح تگدر تشفيه.
ام هدى والدمعه بطرف عينها// اني السبب ، صوجي ، خطيتج برگتي.
هدى دتحجي بكل بروود وتدخن بالجگاره// مراح اكذب عليج واگولج مالج ذنب ، كلكم الي جنتوا حواليه الكم ذنب بشكل او بآخر  وكل واحد منكم نسبته اكثر من الثاني ، المهم ، اريد احاجيج بموضوع ، بعد مااخذ الخلع ، الوزاره رشحت اسمي بسفارتنا بفنزويلا،  وهاي الشغلة يمكن الله ديرحمني دزها هديه الي ، لهذا  شتگولين؟
ام هدى// اذا  تريدين وتشوفين مستقبلج هناك ، سافري ماما .
هدى// سافري ماما؟ ليش انتي مراح تجين ويايه!!؟؟
ام هدى// لو اريد اسافر او ماابقى بالعراق جان وافقت من اخوتج رادوا كل واحد بيهم يسويلي لم شمل واروح يمهم ، انتي تعرفين كولش زين اني هذا البيت مااگدر اعوفه ، ريحة ابوج بكل مكان بيه ، واني اذا اموت اريد اندفن هنا ، لهذا بنتي هذا الموضوع لا تفتحيه ويايه.
هدى// اهااا يعني بقى عمر عندي
ام هدى // عمر منو؟
هدى// رئيس القسم  ( حجتلها  الي صار والعروض الي قدمها)
ام هدى // بس فرق العمر هوايه جبير .
هدى// ومطلگ مرتين ، ويگوووولون انو لان ميخلف او ميصير عنده اطفال ، بس اني مامقتنعه بهذا السبب لان لو علمود الاطفال نگول طلگ الاولى ، زين ليش يروح يتزوج مره لخ ويطلگ
امها شافت شالت جيس الثلج عن وجهها اخذته من ايدها ورجعت هي خلته وظلت لازمته.
ام هدى// احتمال الاولى مثل مگلتي بس الثانية احتمال ماتوالموا او يمكن طلع غيور او عنده سوالف مكسره ، متدرين البيوت اسرار ، بس مستحيل انتي توافقين عليه او اخوج ضرغام حتى لو انتي وافقتي.
هدى// تدرين سألني هل خطيبج ترگج بسبب الحرك؟
ام هدى// ياااااا ، صدگ .
هدى // لهذا اريد اترك هنا كل شي واسافر ، لان اذا رئيس القسم هيج فكر ، لعد اكيد باقي الموظفين مثله ، او هذا السبب الي طش بينهم ، يعني خوووووش وصمة روان ، مو عار.
ام هدى// وليش وصمة؟ طبهم مرض شلون ميفكرون خلي يفكرون.
هدى // انتي گلتيلي مرة جملة ظلت تدگ براسي مره من المرات. گلتيلي حاولي تطلعين من الموضوع الي راح يستهلكج ويستهلكنا بأقل الخسائر ، تتذكرين.
ام هدى// اي
هدى// امي اني طلعت واني خسرانه كل شي ( نزلت دموعها) ، مابقى شي مخسرته ، حتى روحي ، طلعت اليوم.
ام هدى// اليوم؟ شصار اليوم؟
هدى // قصدي يعني بعد التفكير والتعب طلعت اليوم .
ام هدى// راح ترتاحين صدگيني ، واذا تشوفين راحتج بالسفر ، سافري ماما .
هدى// واتركج لوحدج هنا ، مااگدر ماما ، مااگدر بدونج ( وحطت راسها على صدر  امها)
&&&&&&&&&&&&&&&&&&&&&&&&&&&&&