ماء مغلي

٥٥

..♣️🩸 ماء مغلي 🩸♣️..
* adzzon *

ضلت تباوعلي وترجع تباوعله وبعدين دفعت الباب وطبت ..
- هااااي شبيهه بيوتكم مغبره ومظلمه
عيننني يالساده

هو كبل جرهه من ايدهه وضل يباوع لابنه ويباوعلهه بعصبيه ..
وهي جرت ايدهه منه وكالت ...

- اوووووي د وخر شبيك مستعجل
ههههههيييي وين هاي منين افوت بيتكم
شو مسدسدين كلشي ادري شبيكم تخافون من الشمس لاباب ولا شباك فاتحين

صاح على ابنه ..
- روووح طب جوه امشششي منااا

الولد راح جوه وهي لامه عبايتهه بايدهه
وتفرفر بذيالهه وتتمعلج ..

كلتله..
-هااي منو ؟؟؟

ضل ساكت وينفخ نفس بعصبيه ويباوعلهه
وهي صاحت بي...
- اوووووي شكد روووحك طويله
شاتلني بالباب شبيييك
د وخر خلي افوت اكعد جيبلي كلاص مي
جايتك من عرعر  وانته تسمطني بالشمس !!

هي اندارت تريد تطب للهول وهو جر ايدهه
وانه صحت عليه...
-حسنيييييين هااااي منوووو !! منييين هاي
شجابهه بيتك !!!!

ضحكت هي وخلت ايدهه على لحيته
وهو جر ايدهه عصر اصابعهه وهي تضحك وتكول....

- يعني منوو غير مرررته
شبيك انته شو مطايقني !
تريد ارجع وتجيني للبيت ؟؟ شسوي كولي
ابقى ارووح !

ضليت رافع حواجبي وفاك عيني بوسعهه
واباوع لحسنين وهو يباوعلي ويدنك
تالي كاللهه ...

- لفي عباتج زين استري روحج وطبي كعدي جوه

جرت عباتهه ولفتهه على جسمهه وهي تجر نفس قوي وبعدين طبت للهول
وانه كبل جريته من ياخته وهو مجلب بايدي

- ماخذلك كحبه ! وتستشرف براسي ولك
چااااا ويييين الشرف والعلويات وعشرة اخيتي وييينهننننن هاااااااا وييييييين كل الزنيت براسي بي

- هددددنييي وماالك حجايه عليه
انته مسوي الاضرب من سوايتي

- ااااانه تزوجت بعلم اهلي والدنيا كلهه
مااجتي مرتي تسرسح لبيتي بكوة  عينهه

- مااااااااعليك بيه
انه رجال وعندي احتياجاتي وتزوجت
بشرع الله ما زنيت وياهه
مثل ماانته اخذتهه بشرع الله انه هم نفسك
واثنينه شباب والنه عيشتنه
متعة حلال هاي ماكفرنا

ضربته بنص وجهه وادفع دفع اخذته للحايط
وضليت اضرب بي بوجهه ماانطيته مفكه
يطلعله حس ..

امه اجتي وتعيط علينه وجرتني منه وهو كعد بالكاع وكامش راسه ..
ضليت اخذ نفس وكلتله ..

- نتحااااااسب بكل شي نتحاسب

طلعت من بيتهم واحس النفس حار بصدري
وتشنج رجعلي .. امشي وصدري مقبوض
وتلفون بايدي خابرت ريري وهي كبل جاوبتني ...

- منيييين عرفتيهاااا هاي منييين عرفتيهاا

- كحاب ليش ماعرفهن يعني !

- جنتي تدرين بيهه كلشي مخططه وتدرين بي متزوج ومتكليلي !!!

- لااا مو شغله ادري ومااكول
بس نبشت وراه بالجديد ولكيتهه

- وليش ماكلتيلي

- حتى داشوفك شتسوي رده فعلك من صدك تصير مو تمثل مصدوم
دتشوف بعينك صاحبك المنزه نفسه
من الناااس شيسوي ميسوي

- يااااااااالله ياااااااااالله
ليييش ريري لييييش هيج كل نااااسي دغش عشرتهم
ليييييش !!! وعلليييييي كرهت جنس البشر
ليش كلهه تطلع طايحه حظ ومابيهم الخير
هاااي انه عمري كله ماطلع بوجهي ابن اوادم  كلهه ولد شيطاااان

- تررره  ادم من مات اخذ وياه ولده اووكيي
هذوله البقو هيج مثل شطرنج على خشبه

ضليت اكح وطبيت بيتنه .. صعدت الدرج وماكدرت اكمله واصعد لغرفتي ..
كعدت على البايات واحجي وياهه..

- شلووون لكطتيه هالكواد ! جاي لهناك !

- انيي اعرف شكول الكواويد شلونهه
وهذا طابعه بكصته طينته

هيج شكول اعرف شيدورون يانوع نسوان
ورحت لميتهن كلهن بكروب ودزيتلهن صورته وكلتلهن الي تعرفه وطالعه وياه
تخابرني
بس ولا وحده منهن طلعت صاحبته
خليتهن يدزن بصورته بين كل البنات
ولحد ما لكطته هاي وخابرتني

كلتلي شتريدين منه ؟ كلتلهه احسبلج الحجايه
بمية الف
كلتلي شتريدين توصلين. ؟
كلتلهه.. متفقين بالفلوس حتى نحجي
طك بطك
افيدج وتفيديني وبالحالتين انتي الربحانه
كلتلي اووكيي

وسألتهه متزوجج لو هيج علاقتكم
كلتلي متزوجين متعه
وين عرفج ؟ كالت بالفيس تراسلنه ومكالمات بعدين تواعدنا وصار عشر شهور متزوجين
ويروحلهه لبيتهه
وتكول مدللـهه وساحبه منه فلوووس يابو فلووس

كل فتره تسويلهه زعله وتريده يطلكهه
وهو يمدد بالزواج وينطيهه فلوس يراضيهه بيهن وترجع ادك ناعم وياه

- الله يطييييييح حظك ياكواااد
جااان هوو هناك وياهه فختيه صايرلهه
ويمي يجي شرع الله وملايكه الرحمن كلهه يحطهه كدامي ويكرهني روحي !

- ايييي هذاا العار ابو صماخ بعد
تدري تكول موصيهه من تريد تسبح تخابره
ويضل وياهه كاميرا بالحمام

- دخييييييييييييل ربببببببببج
كاااااافي كاااااااااافييييييي

-اوووي ديلا هسه شحجيت
غير ابو صماخ مدود على الن...ج مفول صماخه عليه

ضليت اخذ نفس قوي وازفره وكملت الدرج
وكعدت بغرفتي ...

فتحت السبيكر وضليت اشرب ماي
وهي تكلي..
- تره اني دليتهه على بيته وكلتلهه تروحين تشهرينه شهيره بين اهله
كون تخليه مايعرف يفتح حلكه بالبيت
وانتي اخذي كلشي كشولي العنده والماعنده

كلتلهه .. هو بيته بس امه واخته وحده قندره
روحي اسحليهه تصيرلج خدامه وامه فاهيه معليج بيهه شمريهه على صفحه
وجهاله لا صوت ولا نفس وهو حبل كرونه بايدج .. فرصه عمرج هاي روحي لزمي من خناكه احسن مايعوفج ويشمر عليج فلسين
انتي روحي حصلي البيت والرجال والفلوس وصيري انتي الااامر والناهي بالبيت
وخوش دفعتهه دفعه عليه هسه تسمط ابو ابوه

-  زين سويتي
خلي ينكسر وجهه الشايخ ع الناس بي

- حيداار بعد هواي عندي شغل عليه
بس اريد منك تسوي شغلتين هسه

- شتردين!

- اول شي تلم غراضك اليوووووم اووكييي
هسه تكعد تحضرلك جنطه من كل شي
تحتاجه
وتعوف جوازك وجنسيتك بالميز
وجنطتك تخليهه بسيارتك بس اخابرك واكولك اطلع كببببل تشغل سيارتك وتطلع

-يوااااشج بويه هسه انه شفتهمت!

- لتفتهم هسه بعدين افهمك اوووكييي

-لاااااا هسه تفهمينيييي انه مابيه حيل بعد اضل حاط ايدي على كلبي من المصايب
احجي شعندج

- لك شبيك حيداار هسه داريد اسويلك مصيبه !!!
خايفه عليك انييي اوووكييي
دا اريد احميك منه هذا نغل يوكعك بكارثه يوكعك
اريد اخليك بعيد منا

- وييييين اروووح ريري وييين اروح
جا اطلع منا مايندلوني بغداد وين كاعد !

- ماابقيك بغداد
وصيتلك على جواز بغير اسم تاخذه وتسافر

- صدددددك تحجييييين !!!!

-لعد اعوفهم يموتوك !! لو اخليهم يكربسون براسك مصيبه !!!

شعبالك راح يسكت هو علينه ! هو بدون شي كارهنه كره العمى النوب راح نفضحه ونكسر حاله شيسوووي يسسكت ويحبس روحه بغرفه !
وعلى دكتك بااخته عبالك يعديهه !
عيونننييي هذا مايتقشمر هذا يسكت ويجازيك بس حتى يسممك ويشل حالك على راحته من جوووه لجوووه يشتغل هذا النغل لااا عبالك كلبه فطير مثلك

- ادرررررري بي ادررري ما يسكت
بس مااكدر اسافر ريري
وين اروح ! انه ملتزم بدوام
اجازه ماكدر اخذ اذا مانطي عريضه شكبرهه شكدهه
وين عاد اشرد واسافر سكتاوي !!! واخسر دوامي !

- لك ابوووووويه انته لشوكت تضل تخاف هنا وهنااااا واني عقلي مشتغل وياك
شبيه اني ثوووووله وانسى عندك دوام !
مو جبتهه للوظيفه بالشدات الك هيج اضيعهه من ايدك !!!

-جاااااا شسوين !!

- شسوي يعني نفس الوظفك ياخذلك اجازه
غصبا على راسه وراس الخلفه
منطيته سياره مو راس بصل يحطه بحلكه ويسكت
غصبببببا علييييه شتحتاااج انته بدوامك هو يسهله الك

- حبيبي نعوف السفر اخذج ونكعد بيت نأجر بفد منطقه ومحد يعرف بينه ومنحتاج لمانيه احد علينه

- يلكطووووووك ابويه يلكطووك
حتى انييي هسه يخلون عينهم عليه
بس اني مو مهم اعرف اتصرف
اهم شي انته تصير بعيد منا وتخلي عقلي مركز اكثر

- ماااااكدر اعووووفج وامشي لاااا تضلين تعااانديييين لخااااطر الحسيييين

- مااعاند هسه مدااعاند
داكولك انته هنا تتاذى هذااا يضل يحومي فوك راسك
روح اطلع سافر و وظيفتك شوكت ماترجع هي الك تبقى
ومصرفك كوله ادزه الك ماخليك تحتاج شي بره

- ياااامصرف انتيييي عوفي الفلووس عوفيهاااا كرهتها وحك لا اله الا الله
اريدج وياااااااااي ريري مااعوفج واطلع منا والله وحك اسم الله مااروح اذا مو انتي وياي

- لتتخببببل انتتته افهم حجييي افهمه
اني بيه حيل واجي ويااااك !!!
لك اني روحي بالكوه شايلتهه وين بيه حيل سفر

- جاااا ترديني اعوفج هيج وانتي بالمستشفى واطلع اسافر ! اخاف على روحي وماخاف عليج !!!

- حيداار انيييي مخططه لكل شييي لاتخرب تخطيطي
مدبره عيشه زينه الك معليك بيه اني مااطول واموت تبقى يمي تعوفني اني ميته ميته
كعدتك وياي متغير شي اوووكيييي

- اموت وياج والله جا انه حياتي عدم بلياج
على شنو ضال عايش ! وبعيشه زينه !! شسوي بيهه وانتي مو وياي !!!

رور كلشي مااريد .. ادري تحبيني وتخافين عليه وترديلي الامان بس انه اذا مو وياج
اضل تايه وماحس روحي عايش
ضلي انتي وياي وكلشي مااريد بعد
والقاسمه الله النه يصير

- اووووووووووف حيدااااااار
صوووجي وحجيتلك هسسسه صوووجي انيييي ثوووله وحجيت
لو عايفتك اخر ساعه واكولك اطلع للمطار بوجهك جان خلصت من شلاع الكلب هذا
هو اني عايزني تعب وصياح واعصاب
وتجي انته تزيدهه عليه تخليني افووور
باعصابي ...

- حجايه وماعليهه نقاش بعد
تردين اسافر تجين وياي
تعاندين اعاند واضل هنا حتى بغداد ماروح

-اهووووووووووو رجعناااا رجعنااا ..
ضل خلي يكتلوك بمصايبهم
فلااااا اديرلك بال بعد
عسى ماناركم تاكل حطبكم اني شكو حاركه اعصابي عليكم
ابقى وبعد لاتخابر
باااي

سدت الخط وانه تمددت واخذتني الافكار
متعجب من كل حياتي .. مابيهه شي منطقي كلهه فوك العقل تجي صدماتهه ..

لليل خابرتني ريري ..
طلعت بالحديقه جاوبتهه ..

- هلا يابعد رووحي
هلا براحتي هلا بكل عافيتي

- هلووو هلووو

- شلون صرتي ياعيني
اكلتي شربتي ؟ شلونه علاجج اليوم !

- كلشي زين لتضل تسأل اووكييي
تره مخابرتك اطك سوالف وياك وشبيه مابيه وشبيكم وشسويتو وشلونك ما لونك
اووكييي تره جايتك بشغله مهمه احجيهه واولي

- اعصابج يااابعد عيني اعصاابج
انتي كلشي الج مسموح احجي بكيفج
ليش بس حجايتين وترحين !

-اييي بكيييفييي مابيه حيل سوالف

- يلا هم ميخالف هاي سمعت صوتج كافي
احجي أمري حبيبي شتردين

- تروح على ابو صماخ وتخابرني اريد احجي وياه

- شنوووووووه !!!

- ايييي يلااااا انتظرك باي

سدت الخط وانه رجعت خابرتهه ومتجاوب
وضليت اخابر واخابر لحد ماجاوبت ....

- شبييك شكو

-انتتييي الشبيج !! شتحجين وياااه
انه الصبح مزورك وجهه هسه اروحله تعال خابر ! شبيييج انتي بويه بالج وين جاي يفكر احجي فهميني وين تردين توصلين

- اريد اتشمت شويه ابرد كلبي
روح بداعة العزاز
خلي اشوفه مطكع وجهه وشايط اعصابه
وادوس بكلبه بلكت كلبي يبرد واعوفكم ماسوي الكارثه بيكم

- لااا وعلييي شاخطه

- ترووووح لوووو شلوون
داكولك اريد ابرد كلبييي بي
شك كلبي نصييين ولوعه الضنى لوووعني
تريد اسكت واكعد ما حجي شيييي !!
امشي روحله عندي حجي يفت كلبي اذا ضل ماحجيته

- استغفر الله
راح اروحله بس علكيفج اعصابج

-ايي ديلااا ادري

طلعت وانه بعدني فاتح الخط واتمشى بالشارع .. كلتلهه..
- احبج يافله

- اي ادري

- شايخه علييييه فد نوووب
يلاا هو الزمن كله دار عليه ضلت عليج انتي هم اخذيلج حصه بي

- كلمن يجي من ايددده الله يزييييده

- وعلييي تعبان بدونج
جاي اختنك كل شويه صدري ينقبض
يمكن محتاج حضن حتى يفك شويه ويتنفس

- باااحلااامك يا ماما

- ايييييه اييه
ربج بكل شي عليم وهو يدبرهه

-ديلاا داشوف بله شلون تدبر لجناب الساده

- والله مايشفعلنه جدنا على سوايتنه هاي بيج
يا رايه
بس نكول الله يعلم بحال بني ادم شلونه وهو يدبر احواله

يلا انه وصلت

- خابرني فيس وافتح كاميرا اووكيي

- جاا البسي حجابج و شويه اعصابج
انه اوصيج لان اخاف عليج انتي تعبانه ماريد تهلكين نفسج بالصياح

- ادررري يلاا اووكي اوووكيييي

سديت الخط و طبيت لبيتهم .. وكفت دكيت باب الهول وفتحلي مؤمل ..
كلتله..
-ابوك وين ؟

- بغرفته نايم

- امشي صيحه خلي يجيني بساع

كعدت بالهول وانتظرته .. اجاني ملزك وجهه
و كبل صاح ...
-شعندك جاي !

- اكععععععد واسكت يلااا اكععععد

فتحت الفيس وخابرتهه كاميرا ..
هو كاعد يمي وكبل صاح ..
- شترررردوون منييي
سده هااي شبييك احاجي مرتك انه شبيك انته تسودنت !

- انججججججب والشرف سد بابه بعد
فشله تحجي بي

هجم عليه خنكني وانه دفرته بنص بطنه
وصيحت عليه ..
- اكععععد واسكت حسنييين حجايتين اسمعهن و اطلع بعد لااريد شوفه وجهك ولا اريد خوتك
ونعلى على صفحه الخلفوه الي يضل مكابلكم
بعد

-يطبببببك مرض اطلع بعد اااانه مااااشرف بيك اخو
شتريد مرتك مابزعت من هجمان البيوت
دارت عليه النوب !!

- انجبب انججججب
سد حلكك واسمعهه واسكت

اول مره هي ماجاوبت بالثانيه يلا فتحت الكاميرا ..
جريت المخده وخليتهه كدامنه ووكفت التلفون عليهه وضلينا نباوعلهه ....

هي بايدهه الجكاره وشامره الشال على راسهه لافته شلون ماجان وتاخذ نفس من الجكاره وتنفخ الدخان وتضحك .....

- هاااااا يالسااااده ولد الساده
شلونهن الكحاب زيناااات وياكم مووو زيناااات !!
مبين من وجوهكم ممرتاحين كوولش وياهن
شو عبالك مسحولييين متصخمه وجوهكم

اباوعله ويباوعلي واثنينه ساكتين ..
جان هي تطفي جكارتهه وتشعل ثانيه
كالت....

- حسنيييين كحابك الي بالفيس كوووولهن
ادزهن لبيتك وحددده وحدده
وخلي المكافش يصير ماله والي
وخلي امك تحني ايدهه بنسواااان ابنهه
الكحبجي

-سكتتتتهههه لمررتك سكتهههه

- انته اسممممع واسكت
احجي يابعد بيتي

اخذت نفس من الجكاره وكالت ...
- حسنيييين كرعتك هاااي الاااا انبت بيهه
الشيب

- انتي شعندج ويااااي يا طلابه طالبتني
شتررردين انه يمج كرباااج
مشاكلج ويه رجلج امشي تصافي ويااه انه
لا عليه بيج ولاااا واصلج

- قنااااادر احسسسن
ولك مووو علييييه اللعب ياابو جرخ الاسوود
موووعليييييه
كلمممممه كلممممه اطلعهه من عيووونك
اندكيت بيه وبااابني وااااني لاا واصلتك ولا جايبه سيرتك بس دودتك تكرررص بيييك الاا هجمت بيتتتي يلااا ارتاحيت

اسمعو ولكم اثنينكم مطلوبين اليي اثنينكم
يالسااااده مديونييين الي
دنيييا واااخره
مفضله عليكم بكبر طوووولكم وهسسه
اريد دييينيييي كوووووله والي يجر ويعر ويااااااي
اعدددددمهه لعيشته و اني ماعندي شي اخسره
الخساااره عدكم بسس عدددكم انتو خافو
على نفسكم وجرووو عدل وياااااي وخلي نسد باب هالعشره الجايفه

- شتردين انتتتتي شترررردين
روحي اتحاسبي ويه رجلج شتردين مني ! !!

- انتتتتته حاااالك من حاله
استفاااديت مثله
مو هم بنتك تعبت عليهه !!

انيييي معليه بيكم بعد
فلوووووسي واريدهه  منك لو منه فلوووسي
تجي لرجليه

كلتلهه ..
- شكد تردين احنه ماتفقنه بالحساب ؟

ضحكت وشعلت جكارتهه الثالثه وكالت..
- شكد سعر الورقه اليوم ؟
اني اخر شي صرفتهه ب ١٢٤
بس يلا الكم احسبهه ب ١٢٠
اريد ١٠٠ مليون محولات ورق
يعني ٨٣٠ورقه يصيرن ٩٩ مليون و ٦٠٠ الف
تبقى ٤٠٠ الف تخلوهن عشرات وياهن
هاي ٨٣٠ورقه اريدهن كل مية ورقه سوه
وتبقى ٣٠ ورقه تخلون وياهه ال ٤٠٠ الف
اريدهن مرتبات مثل ما وصيتكم
كل ميه ورقه سوه يعني ٨ ضبات مال ورق والتاسعه بيهه ٣٠ورقه واربعميه الف
بالضبط هذني هيج حسابهن اريدهن خلال
شهر تجيبوووهن الي
اوووكييي

ضل هو يباوعلي وانه اباوعله ...
كلتلهه...
- مية مليون !!!! منين اجيبهن هالكد بويه
ماتفقنه هيج

- مشكلتك
انته اجلت الحساب وكلت شكد ماتردين انطيج اذاااا عيشتنه رجعت زينه
بعد اني شغلي كملته وهذا شغلكم

يوم ١٠بشهر ١٢ انتظرك حيداار
فلوسي يوم عشره اريدهن جاهزات
واذا لعبتولكم لعبه منا لو منا اسفركم انتو واهلكم لجدادكم الساده خلي يتلكونكم
شوف بعد وين تتلاكون باب الجنه باب جهنم باب البرزخ
اني عليه ادزكم واجدادكم يضيفوكم خوش يندلون المكان همه يعني اووكي مستسغربون وحدكم

اووووكييي يلااااا چاوووو

سدت الخطت وانه سديت التلفون وكلتله..
- كله مننننننك وييييين وصلتنه وييييين
جانت بكلشي قابله وقانعه وياااااي
اجيت انته خربت الاول والتالي

- يطبببببكم مرررض
روح حير بيهه مادفعلهه فلس احمر
لووو تزرع نخل براسهه

- وااااالله تددددفع وغصبا ماااعليك
انه وياك تشاركنه بكل شي مااااتدير ظهرك وكت الصدك وتعوفني حاير بزماني
ااااانه مو وحدي اهلي تعبو من السحوره
انته جنت بكلشي ويااااي وغصبا عليك تتتحمل كلشي وكع على راسي

- ماااعندي لا فلس ولا مليون وادفعلهه

- ااانه هم ماعندي

- روح قشمرهه بحجايتين مو رجلهه انته
روووحلهه سكتهه قنعهه منين نجيبلهه مية مليون ورق !

- خاااااب ماتسسسكت انته الشعلتهه وكلبتهه علينه

- والله مااادخل بيكم بعد وفلس واحد ماانطي
وخلي تروح شتسوي سوي

- اسسسمع ولك
خاااف هي تسكتلك اااانه مااسكت والله وقسم بالله اروح اشهرك بين اهلنه كلهم ومعارفنه كلهه واحجيلهم على كحبتك هاي وشمسوي ممسوي وياهه وكل الحجي اروح اسحبه من ريري وهي كلشي عدهه كل سوااالفك الخايسه وكعت بايدهه بعد
واكسرلك وجهك بين ناسك
وبيك زووود جذب حجيي وكتهه

هجم عليه وضل يصيح بوجهي وانه افك ايده مني ..
- لااااتشرف نفسسك وتخزيني
انته حالك من حااالي كحاااب هنه ثنينهن كحاب

- انه احجي كلششي ماااخاف بعد انه خسرت كلشي
واهلي يعرفونهه وعاشروهه مو مثل هاااي جايه كسره وجه عليك راح تلعب بيكم صول جعاب

وعليييي احجي كلشي واخليك الباب ماتطلعه
انه كارهكم وكاره المله كلهه شيحجون عليه خلي يحجون مايهمني شي اعووووفكم وامشي و كوااد اليعاشركم بعد

دفعته وكمت .. عدلت ملابسي وكلتله ...
- عدنا قطعه كاع نبيعهه ونجمل فوكهه وننطيهه ونخلص
وخلينه مستورين

- يا كاااع حيدر يااا كاع

- كاعنه انه وخواتي مو عندك حصه امل
تنازل عنهه وخلي ابيعهه وحصه اختي الثانيه انه بعدين انطيهه بس افك من هالمشكله اجمعلهه وانطيهه

- ماااااتنااازل هاي الكاع للجهال ضلت
مااتنازل وانطي فلوسهه للكحاب

- تنطيهاااا وغصبا ماعلى رااسك
تنطيهه وانته الممنون
واللله اخلي حتى جهالك يتبرون منك
والله وحك هو الله مااسكتلك بعد وهي عرفتهه شكد كدرت عليك وتكرهك واخذ منهه كلشي عليك وافضحك انته واهلك وضل خاتل مثل النسوان وكتهه

- استغفر الله حيدر جووووز عنننني رحمه لجدك جووووز عني ابتلييييت بيكم صرتو اهلي تعااال الا تدفع ماااادفع ماعندي فلس وانطيهه انته الورطتنه بيهه

- انه ورطتك ! مو خلصتك وخلصت بنتك
واهلنه كلهم خلصتهم من ذاك المر العلكم روحنا بي
لووو ماانه مجازف بيهه جان ضلينه ناكل مر ونتفل مر

حسنييييين اخررر حجايتي وياك
الكاااع تتنازلهه الي وانه باجر احاجي اختي واخليهه تتنازل وابيعهه شوف شكد تجيب
نجمل فوكاهه

طلعت من بيته ورجعت لبيتي .. صعدت لغرفتي وخابرتهه ... جاوبتني ..

- هااااا

- هاا شبيج !

- شتريد. مخابر ! شعندك !!

- رجعت للبيت حبيبي شبيج جاي احاجيج هسه الا اريد شي

-مابيه حيلك اريد انام

- بس اوكفي خلي احجيلج
على الفلوس

-لااا تحجيلي ولا احجيلك
مية مليون شلون ماتدبرهه دبرهه
تبوك تذبح تصلخ تهجم بيت اهلك وتهجولهم
عسى ماتبيع روحك وروحه
ماااعليييه بيكم
فلوووسي تجيني حاضره
٨٣٠ورقه واربعميه الف اريدهن يوم
١٠ -١٢

-ادري ترديهن ادددري بس اسمعيني
ريري ماكدر ادبرهن بشهر والله اكدر لنصهن
انطيج خمسين وخمسين الثانيه اصبري عليه
بيهن

- مييييية مليوووون كااامله
ماعندي جمعيه وابيعلك اقساااط

- شبيج انتتتتي شبيييج هسه فوك الزمن كله عليه انتي هم تجمليهه!!!
افهميني والله متعوب ودايخ بزماني
لا تحصريني هيج

- هذا الينكر العشره بعد مايشفعله شي عندي

اسمع حيداار هسه اني لا مرتك ولا حبيبتك
اني داتعامل وياك على اساس شغلنه العرفتك بي
وهنا ماكو عيني واغاتي .. شروط وتتنفذ
اوووكييييي

لان هذااا حساب وحد وحساااابي وياك على العشره والحب هذاك وحد بعد مابدينا بي

تجيب فلوسي هذني حق تعبي اني اجيت اموت بيتكم وتعبت بكل شي جازفت
للموت مشيت كدامك وحميتك من كل شي انته واهلك تعبت عليكم وهذني اقل شي تجازوني بي
فلوووسي اريدهن كاملات مثل ماشرحتلك شلون ترتبهن هييييج اريدهن شهر الجاي يمي
وغير هالحجي بعد ماعندي وياك لحد ما تجيب فلوسي يلااااا نحجي

سدت الخط ورجعت انه اخابرهه قفلت تلفونهه ...
ضليت كاعد حاير وراسي مسطوور
احس جبال شايل على ظهري ..

خابرت اختي حجيتلهه على الكاع وكلتلهه محتاج الفلوس كلش مضطر عليهن
وهي انطتني رجلهه هم حاجيته فهمته
ارجعهن الهم الفلوس بس افك ديني وقبلو

رحت ثاني يوم عرضت الكاع للبيع
هاي كاع ٤٠٠م ابويه مسجلهه باسمي واسم خواتي .. انه الي بيهه ٢٠٠ وهنه كل وحده ١٠٠ ...

حاجيت ابويه على سالفه الكاع وما قبل ابيعهه
كال ماتحصل هيج كاع بعد .. بس انه لحيت على بيعهه وحسنين تنازل عن حصه امل
وضليت انتظر شراي الهه ....

بهالوكت انه رجعت لبغداد .. مريت عليهه للمستشفى اريد اشوفهه اول مافتحت الباب وطبيت غرفتهه كلتلي ...

-شعندك جاي ! شتريد !!

- اشوفج ياروحي شبيج مو مرتي انتي شلون اعوفج مااسال عليج !

- مااريدك روح ارجع منين مااجيت

- ريري لااا تضلين بعنادج هذا دخيل الله

- اكولك انته شنو تدور وياي رجعه !!
تره اني بعدني عتاب ما عاتبتك تريدني اصالحك ونرجع هسه ! !!

- عاتبيني بووويه عاتبيني وازعلي بس خلي اضل يمج وعلي كلبي جمره على فراكج
وانتي مريضه كل بالي يمج وحك لا اله الا الله

- زينه هسه اني زينه بعدني عايشه انتظر فلوسي من تجيبهن يلا اموت
اووكييي يلا روح اطلع ماريدك يمي
اني مرتاحه وحدي

مشيت خطوتين وصلت ليم السديه
وهي رفعت ايدهه وكلتلي..

- اووووكف وييين جااي وييين

- شبيج بوووويه شبييييج لخاطر الله
خلي نكعد ونتفاهم واخذي حكج من هالعيون بس انطيني مجال احاجيج

- ولااا اريد احجي وياك  ولا اسمع منك
ومكانك هذا بعد ديربالك تدنى يمي
هاي مسافه بعد بيني وبينك
ديربالك تتعداهه وتكعد يمي وتحاجيني

عندك شي ضروري تحجي اكو تلفون ودز رساله واحجي سالفتك كبل لتضل تجي وتكابلني وتخليني احرجك بتعاملي وياك
اني ماتجاوز عليك لان احبك ماريد اجرحك بحجيي بس انته لتوازيني على التجفيص وياك

روح واكطع جيتك لهنا بعد مااريدك تجيني
اني دزيت عليك اول مره حتى نحجي بسالفه ابن عمك وغيرهه بعد ماعندي حجي وياك هسه
تعبانه ومريضه واريد راحه بالي واني من اشوفك كلبي يحترك وروحي تنمرد

خليك بعيد لتشوفني وجهك .. روح دبر الفلوس احسن ماتكابلني وتكعد
جيبلي فلوسي روح طلعهن من بطن هذاك المصخم
انطيني فلوسي ونكعد نحجي ونتفاهم بعدين
غير هالحجي ماتلكى عندي

ضليت واكف واباوعلهه وهي تباوعلي بعصبيه ...
غصه بكلبي صار حجيهه وكل يوم جاي اشوفهه تصعب عليه اكثر من الراح

كلتلهه..
- املي بيج اقوى من عنادج وياي

راح اطلع منا حتى اجيبلج فلوسج ونسد
باب الشغل ونكعد نتفاهم بعلاقتنه وين تصفى
بس ديربالج على نفسج والتدخين عوفيه
صحتج تندمر بي وانتي مريضه شويه
انتبهي على روحج

- ديلاااا اوووكييي ادري

ضليت اباوعلهه وهي اندارت وغطت وجهه
عفتهه وطلعت .. امشي مهموم ..
ماردتلهه الاذيه وبعيني خليتهه مادري شلون وبيا ساعه خسرتهه ....

صارت كل الايام وره هذا اليوم حساب عليه
وصراع ويه الوكت عندي حتى ادبر الفلوس
اداينت من اخوتي ومن امي وكل فلس عندي ضامه هم خليته وياهن والعذر كدام اهلي جان
اني مشغل فلوس وجماعه مشتركين وياي وخسرنه واريد اوفيهم ...

تحملت اشكال الحجي واهلي وصلوني
٣٠ مليون والكاع بالف ياعلي يلا بعتهه ب ٤٥ صار عندي ٧٥ مليون .. بقى عندي ٢٥ معتازهن

خابرت حسنين وكلتله ...
- باقي ٢٥ مليون دبرلي نصهن

- منين ادبرلك ماعندي فلسين ماعندي

- جاااا انه العندي
هذا كل الاكدرله جمعته بعد مااضل عندي ولا عند اهلي غير المصرف
انته كلشي ما دفعت والكاع هي من اصلهه لاختي يعني مرجعهه النه ماتعبت بيهه

- هااااي العندي حيدر هاي العندي بس الكاع واخذتهه
بعد منين اجيبلك

- هاذ اخر كلام عندك !

- اي ماعندي غيره

- خوش جا نتحاجى بعدين

سديته ودزيت رساله لريري ...
' وصلت ٧٥ جمعتهن الباقي حسنين مايرضى يدفعهن
تصرفي ويه مرته '

لثاني يوم خابرني حسنين من الصبح  ..
- اكلك هسه بس عشرين بقن لو خمسه وعشرين ونخلص من شرها

- خمسه وعشرين

- انطيك السياره بيعهه

-شكد تجيب سيارتك ! ماتجيبلهه ١٧ مليون

- اي دبر الباقي هاي سيارتي وانطيتهه بعد شنطيك !! انطيتك الكاع والسياره شسوي بعد كليي شسوووي !!!

-ماادري دبرهه هذني عليك اني شلت فوك النص من المبلغ بعد الباقي عليك
انته حير ودبرهن تره هي ماتسكت وحياتنه اثنينه باقيلهه شجم يوم ولو تنعدل لوو
تتصخم بعد لو يحضر المهدي  ما يعدلهه

- ااااانه شبلاااني بيكم
ماااعندي هاي السياره تعال اخذهه بيعهه

-انته بيعهه وجيبلي الفلوس
ماعندي مجال انه مشغول مالحك

- شوكت ترجع ؟

- يوم ٨ انزل للبيت
دبرلي الباقي لو من جوه الكاااع دبرهن

- زييين زييين بس كللهه خلي تكف عنا رحمه لاهلك
المره حتى تلفون سحبته منهه وهاي مدري منين توصلهه كللهه ننطيهه فلوووسهه
بس خلي تكف شرهاا

- ضب مرتك هي التندك بيهه
يلااا انتظر الفلوس

سديت الخط و دزيتلهه رساله ..
' عشتي مااضل شي واكمل الفلوس '

مثل كل مره ماترد على رسايلي
بس انه ادري بيهه تشوفهن ...

صدري كلش خانكني هالفتره ودايماً دايخ
رحت لدكتور وسويت فحوصات وانطاني
حبوب مرخيه للعضلات .. اخذهه كل مااحس بتشنج لان تخطيط الكلب زين مابي شي

صار وكت نزولي ورحت للبيت ...
جانت ملوكه هنا يمنه ... وكل شويه تسألني على ريري ... تريد تشوفهه شهادتهه
ناجحه وتريدهه تقريهه للامتحانات
وانه اكللهه بيت اهلهه بعدين شجم يوم وترجع ..

تعشيت وهي يمي كاعده تخلي غراضهه
بجنطتهه وتغني بصوت ناصي ..

- يااابيتي الصغيييير انتَ سراجي المُنير

كل ساع تعيد هالجمله لحد ما حوراء رزلتهه
وكلتلهه كافي دوختينه بيهه .. وضلن يتعاركن
وسكتتهن ....

هي كلتلي ..
- خالو هاي مو حلوه الاغنية كول حلوه لو لاااا كول

ضحكت وانه اطابق نبره حجيهه بنبره حجي ريري ... وكلتلهه..
-مادري ما سامعهه

- شلون ماسامعهه خاله كل يوم كل يوم تغنيهه واحنه نكعد نغنيها من الصبح كبل مانطلع للمدرسه

- ماسامعهه والله

- هاي  مال إيروكاا
اغنيهه الك خالو تسمعهه ! هاا اغنيهه؟

- يلا خلي اسمعهه منج

حوراء كبل ضاجت وطلعت متحب تسمعهه
وهي كمشت جف ايدي وضلت تغني وتحسب على اصابعي ...

- رسمتُ بيتًا صغيرًا اسميتهُ الاحلام
في قلبي ينااام وازورهُ في كل منام

خبأت فيه لعبي وصور الاحباب
مع بعض الزهور .. فتحت كل الابواب  

رسمتُ فيه الزمان تنقصه بعض الالوان
اراه يبتسمُ في آن وحزينًُ في بعض الاحيان

يـا احلااامي قولي للايام
سألون الدرب سألون كل الساعات باحلى الوان الحـيـاه

يا بيتي الصغير ..انتَ سراجي المُنير
يا بيتي الصغير ..انتَ سراجي المُنير

ضحكت وحضنتهه ومسحت دمعتي من عيني
حسيت انه هدمت كل هذا البيت وانه الجنت باني الهه ...

عفتهه وصعدت فتحت باب السطح وكعدت على الدرج ...
وصدري مخنوك .. اريد احجي واصيح
واشكي كل عمري اشكيه بس مدري المن !
الجان يسمعني راح .. والجان يشيل همي راح
بقى كلمن حاير بهمه والجان باحضانه مطيب خاطري هسه مفاركني ..

دعيت ربي وتوسلته كافي من عذاب الفراك
راح انطيهه كلشي بس كون ترضى وتكعد تتفاهم وياي وارجع اخليهه بعيوني ..

الليل كله كضيته هنا ... على الهوا البارد
وتالي تعبت وطبيت نمت ...
ثاني يوم خابرت حسنين على الفلوس
واجاني العصر انطاني ٢٥ مليون كاملات
كلتله ...

- الخوف يعدل الشوف
منين طلع عندك فلوس !

- كلشي بعت السياره و حتى البيت بعته
اخذت مقدم فلوس وبس اشيل منا استلم الباقي اخذهن واسافر بعد ماكعد هنا لو يدرلي العراق ذهب

- هااا وين تروح لايران ؟

-اي هناك اعيش احسن

- خووش خووش روح بعد احسن نتكاطع ونخلص
عوف ملوكه هنا لتاخذهه

- عايفهه الكم ارتب اموري وارجع اخذهه على السنه الجديده

- اي زين

- بس اختي ترجع لعادل

- لييييش ترجع !!! طلكهه بعد ماكو رجعه

- المره عدهه ولد ترضون اخذ ابنكم اربيه
هناك بايران وتنحرمون منه ؟!
اذا ترضون اخذهم واروح كيفكم بعد

دار وجهه وراح وخلاني بناري اشيط وماانطفي ...

خابرت عادل وحجيتله السالفه ضل ساكت تالي كالي ...
-شوف الاهل شيكولون ونتصرف

حجيت لابويه وضل يفكر لليل جمعتهم وكلتلهم هسه تنطوني خبر ترجعوهه لو لا

ابويه كال ...
- هي ما تنراد بس هذا ابنه وين نخلي يتربى بالغربه !

وامي كالت ..
- اذا عادل يريدهه خلي ياخذهه ويطلع بيت وحده ما تعبش ويانه جنه بعد ابد

- اي هذا خوش حجي
مال ارجع واطب البيت واشوفهه كدامي
ماتصير الااا من اموت
يريدهه ياخذهه ويطلع وانتو هم منا تطلعون نبيع البيت ونكعد بغير منطقه

باوعنه لعادل وهو كال ...
- هاذ هوه شسوي بعد مجبور ارجعهه لخاطر الولد و هي اول وتالي بنت عمي زينهه وشينهه عليه

انخصمت سالفتهم يأجر بيت ويكعد بي
واحنه بين مانبيع البيت ننطي حصته ويدبرله كاع ويبنيهه ويستقر ....

ثاني يوم طلعت لبغداد .. يوم ١٠-١٢
حولت الفلوس ورق
ورتبتهن مثل مارادت وخابرتهه ...
سمعت صوتهه ناصي كلش ... كلتلهه..

- رور نايمه حبيبي ؟

- اي هسه كعدت شتريد

- موعدنا اليوم نسيتي !
وين انتي بالبيت حتى اجيج هسه ؟

- اي تعال بالبيت انتظرك

سديته ورحتلهه ...
طبيت وشفتهه كاعده وبايدهه الجكاره
وهي كلش ضعفاااانه الوجه اصفر والعيون جواهه سواد جبير ..
مخليه كانيور يم رجلهه وكاعده تدخن ..

خليت الجنطه مال الفلوس على الطبله
وهي كلتلي..
- هذا الكرسي اشتريته الك
اكعد عليه مكانك هناك بعد

باوعت للكرسي صاير يم التلفزيون
وهي كاعده على القنفه مسافه عنه ..

كعدت هناك وكلتلهه ...
- فلوسج كاملات مثل ما ردتي ترتيبهن

فتحت الجنطه وكلبتهن بايدهه بسرعه
وكالت ..
- عفيييييه هسه فاد اللعب ببيت ابو صماخ

رجعت ارتجت واخذت نفس من الجكاره وباوعتلي ..
- شلونك ؟

- تعبان

- اووكي
سمعت هذاك راح يسافر لايران

- اي وفضه راح ترجع لعادل

بهتت ملامحهه وهزت راسهه واخذت نفس من الجكاره ... كلتلهه..
- راح يطلعون بيت وحدهم واهلي واح يبيعون البيت نشيل بغير منطقه
رجعوهه علمود ابن عادل مايريده يتربى بالغربه

- اووكي هسه شسويلهم شكووو دتحجيلي عليهم يطبهم مرض عاشو ولا تصخمو شعليه اني

كامت راحت غسلت وجابت كلاصين ماي
من الثلاجه انطتني واحد وانه كمشت ايدهه
ضلت تباوعلي..
- ماكتفيتي بفراكي هاذ  كله !

- بعدنه ما بدينا اووكييي

جرت ايدهه وراحت كعدت بمكانهه
وكلتلي ...
- يلا خلص موعدنا فلوسي واخذتهه
بعد ماعندي شي وياك

- جا انتي ترديني بس ع الفلوس !!!
وعلاقتنه شنو مانحجي بيهه!!!

- ما بيه حيل بعدني تعبانه

- ريررري جزعت روحي وعليي
كلبي شيب كااافي رحمه لاهلج
لا تضلين تماطلين كليلي شسوي وترجعيلي كليلي شلون بينا شلووون نعيش
عاتبيني احججي شي لاتضلين ساكته وساده السالفه هيج

- ماااابيه حيل عتاب هسه
اني من اصير زينه ادز عليك واعاتبك ونحجي براحتنه لتستعجل لاحك على وجع الكلب

- جااا ماصرتي زينه لهسه شمكعدج هنا !
ماتمشين للمستشفى

- ضجت هناك مليت والعلاج حفظته كوله
واعرف اعالج نفسي هنا بعد شعندي رايحه

- جا شلون تضلين هيج وحدج !!!
خلي اضل وياج اداريج باكلج بعلاجج لما تصيرين زينه واحجي عاتبيني براحتج

- مااااا اريدك يمي
اني بيه حيل وامشي على رجليه واداري نفسي
اكلي وشربي وعلاجي عندي ايد واسويهن
انته بيك خير داري روحك

- وتااااااالي هاااالحاااال وتاااااالي وياااج

- اني اعتبر مريضه ولازم الناس تخفف زيارتهه على المريض حتى يرتاح
اوووكييي

خلت كانيور بحضنهه وضلت تمسدله
وانه طلعت واعصابي خانكتني ..

شويه ورجعتلهه ..
طلعت البطاقة مالتهه خليتهه ع الطبله
والسويج هم خليته وكلتلهه..

- كلشي انطيتيني رجعلج
هاذ انه حيدر الماعنده بس كلبه
وهم مخلي بايدج
راح امشي هالمره وانتظر بس على كلبي تحاجيني
لا تعوفيني ميت انه الحجايه وياج تحييني
قدري لو مره قدري لوعه كلبي عليج
قدري شويه حسي انه رجال محتاجج
كلبي مو وياي عايش بلايه كلب وشعور
غلطت اي غلطت وياج بس الدنيا ماتوكف على غلط واحد
انطيني فرصه و ماتندمين والله
كافي التعب العشناه

ضلت دايره عينهه عني وانه اخر شي كلتلهه..
- اريد الله يحفظج ويشافيج بجاه محمد وال بيت محمد

طلعت اتمشى لراس الشارع اخذت تكسي ورحت للقسم .. ارتاحيت هناك واخذت دوايه ونمت ...

ضليت كل يوم اروح عبريه للدائره
انزل مسافه واتمشى ..

مرات اراسلهه من اكعد الصبح ادزلهه ..
' مااكدر ماااحبج كل يوم اكثر من الراح '

العصر من اطلع ادزلهه ..
' الجوهذا يحتاج حضنج '

' مشتاق اشتم ريحتج الدافيه
هذا عطرج الشتوي مشتاقله '

من اختنك واضل محتار شسوي واخلص من وجع صدري اطلع بره امشي واسوي شهيق وزفير قوي .. وبعدين ادزلهه ...

' صدري مخنوك متدمر والله جاي اتعذب منه
محتاجج وياي '

' رور تعبان بدونج حبيبي ليش هيج هنت عليج '

ما تردلي ولا حرف ... ولليل انام واكعد بنص الليل مرات مخنوك مرات افز مادري شبيه
ادزلهه..

' شعجب كلبج ما يحن انه كلبي عليج ممرود '

مشت الايام وانه صرت من حركه كلبي
ادخن جكاير وكل ليله ادزلهه صوره
الجكاير والنفاضه و وجهي المتعوب
واكتبلهه ...

' هسه صرت افهمج ليش تدخنين وعاذرج
عليه '

' محروك الكلب ما يطفي الا الجكاره
والله حتى على ذاك الشرب عاذرج
الله على وجع كلبج شكبره جان '

دخلنه سنه ٢٠١٨ ... شهر الواحد ..
نايم يوم الجمعه بالقسم من العصر نمت وتالي كعدت ب ٣ بالليل ...
باوعت لتلفوني ولكيت منهه رساله على الفيس ...

فتحتهه ولكيتهه دازتلي ..

- لـيش يـا اول و تـــالي الـحـبايـب

.
.
.
يتبع 💕