ماء مغلي

توضيح

#ماءمغلي

✨✨
لِنجومي التي تبقت سلامي وللتي رحلت احترامي ..

💕

^^
قبل خمس سنوات جنت اكتب مقتطف نثري بسيط بأول بدايتي بتعبير افكاري  والكتابه
كل النصوص جمعتها بملف بالحاسبه واخذتها لابويه يقراها لان هو نظره ضعيف بوكتها ميكدر يباوع بالتلفون او الورقه .. حتى شاشه الحاسبه والكتابه تتكبر خليتهه كدامه وكلتله ' اني جربت اكتب  واريد رأيك '

اخذ الحاسبه وصار يقرأ .. انعجب بجمله جانت من ضمن النصوص وهي

[ و مالرجوى من قوم يستعيذُ بالله من الخُبث والخباث و هم لهُ عنوان ]

سألني شنو الي صاير وياج وخلاج تكتبين هيج شي ؟

بوكتها اني فعلاً ماصاير وياي شي بهذاك السوء المحفز للكتابه
بس مجرد حضرتني الجمله

كلتله ولاشي مجرد كلام رتبته ..
هو كمل قرائتهن وكعد يحجي وياي ..

كالي ..
الكاتب لازم عنده قضيه
اي واحد منا يكدر يكتب بس لقب الكاتب ومهمته لازم تتجسد بقضيه او فكره يدرسها ويصوغ كتابتها

كالي .. انتي اكتبي اليعجبج هسه بس شوكت ما تحددين قضيتج واهتمامج ابدعي ..

^^

اني كتبت اكثر مما نشرت بس جنت امارس هوايه لا غير
( لا حباً بالشهره .. ولا طمع بالمتابعين .. ولا لضيق وحزن حدث اني عايشته  )
مجرد اتخلص من طاقة الكلمات الي تتكتل داخل عقلي ..

اما عند ابواب ( ماء مغلي ) جذرياً تغيرت

طمعت بشهرة  كتابتي هاي لانها حرام تندثر وبيها كلشي يمسح الغشاوه عن العين

واستعنت  باراء صديقات لزيادة المتابعين وكفلت بعض منهم مسؤوليه زيادة عدد مشاهدات ماء مغلي
حتى اكبر عدد من القراء يكونون على درايه بتمام مواضيع مبهمه

وعشت الحدث ' بالحزن ' والتأثر '
كوني بالاول ' بنيه ' احس بمعاناة الي من  جنسي واتفهم وصف الشعور والاذيه واتخيل لو اني محرومه الاهل ؟ لو اني مُغتصَبه  ؟   لو اني مريضه و وحيده ؟
جان شلون عشت !!

وبالاخير ... صار عندي قضيه .. ومحور اهتمام .. اسخر  كتابتي اله

قضيتي صارت ( كشف واقع مبهم /متجبجب الحديث )

ابتدأت .
-السحر ( ماكو احد يحجي عن ناسه الي منه وبي شلون يسحرون وشسوولهم )

- الدعاره ( محد يتقبل يحجي بسيرتهم خوفاً على المكانه المجتمعية والصوره المتأطره بالمديح المتفاقم عليه )

- السياسه ( نقطة حذر المجتمع .. واقعياً والكترونياً)

- تبعات النفسيه ( محجوزه داخل الاشخاص نفسهم ماكو احد صرح عن سوء نفسيته ..الكل يحب يطلع بيرفكت دائمآ)

هاي قضيتي اني .. واني احب انطي لقضيتي كامل تعبي وطولة كلامي ..

اني دااجازف بحوار ومعلومات  ممكن اذا احد ساء
استخدامها ضدي  يأذيني او يسببلي مشاكل

وبالمقابل .. يجي رد .. ( هذا انحراف لموضوع القصه / ملينه / وين الابطال وحياتهم )

اني دانطيكم شي من واقع عمل اشخاص
اهم من حوار درامي بين شخصين

و رد اخر ( احنه نريد نغير جو بالقصص شكو تدخلينه بسوالف سياسه وتاريخ شعلينه احنه )

زين الي ضايج ويريدله قصه تعدل مزاجه
يجي يقرا قصه الكاتب وين ما يندار يكتب تره قصه بيهه سياسه

والي يكول خارج موضوع القصه
ليش هو قارىء سطحي !
اذا من نوع الي قراءته ( طفر كلام واخذ مقتبس واعبر )
فاني كل مره ارجع واكتب ( مواضيع القصه )
واحصرها بين قوسين ومن اول ما نزلت المقدمه
كتبت

مواضيع القصه
(سحر /دعاره / سياسه / تبعاااااااات نفسيه )

يعني حتى لو عبرتو المقدمه تلكوها بنص البارت/ تلكوها بمنشور توضيحي / تلكوها وره كلمه يتبع / وبدايه البارت / ومتناقله بين المتابعين

بعد اني دا طلع خارجج موضوع القصه شلووون؟؟؟؟

ليش هي القصه شنو موضوعها !

اذا انتو اقتبستوها بكلمتين مو ذنبي
لان اني مقصدي وطريقي واضح
اربع مواضيع لكل موضوع حصته

والي كمل وياي الطريق لازم يمر على كل المواضيع 

والي مو صاحب خلك
اني ذكرتله ( وقف القصه وانتظر بارت الختام )

ليش الاساءه والتوضيح موجود
والخيار  انته حر بي

اعتقد  هذا الكلام شبعنا من تكراره

//
اما بالنسبه
ل ( يتبع بجزء اخر لبارت ٦١)

ماعدكم بداهة  الفكر !

شلون شخص قار ىء  ماعنده حدة الفكر ! ولا  فهم المغزى ! ولا تفسير وقع واثر الجمله !!!

الجملة تعني .. جزء اخر لتكمله الاحداث .. والاحداث محورها سياسي يعني الجزء الثاني مااممكن يكون رومانسي لانه تاااابع لتكملة فكره بحوار سياسي ...

القارىء الفذ   المفروض هذا يكون تصوره للبارت الجاي لان المعنى واضح وايضاً مضمون ..

//

وشغلة تخلون بصمه على شخص من مجرد ذكر كلمه 
هاي عيب على القراء

لان الي يقرا  لازم يقرأ  للنهايه حتى يكون فكره واضحه عن محور الموضوع
وينتقي رده وتعليقه على اساس فهمه لجوهر الموضوع
مو مجرد تفاعل على رؤوس اقلام

اني كقارئه لارائكم ماستعجلت بالرد  للكل  و وكفت على كل كلمه
انتظرت اكبر عدد  يبدون رأيهم
حتى يكون توضيحي. و ردي. منصف. للكل

هذا هو ردي لاغلب الاراء الموجهه الي

واتمنى تتحسسون بداخلكم معنى ( ان الانسان هذا مكلف بتوصيل شيء وانه صاحب قضيه )

قبل ما تكتبون ارائكم الاخيره الي  افهموني 

//

التعليقات الي نحذفت. هي بسبب التنويه على منع الردود والإساءة المبالغة