زٍوِاٌيٌـاٌ اٌلِـحٍيٌـاٌةُ
اٌلِـحٍلِـقْةُ "60"
ڪْتْآبْآتْيْ : Raghad
وتين : اخترتي بيديك يوسف كان مصر يبينا كنت عارفه ان يوسف مستحيلل يسيبنا
عشق ابتسمت و حزت دمعتها في عينها : امم يمكنن
عشق لفت و ضحكت : بنردوا للجو القديم و الي هو تسخين الميه
وتين : ديري دوش بميه مصقعه جوو سااخن قاعد
عشق : صدقتي والله
لمت عشق ملابسها و خشت للحمام "اكرمكم الله" دوشت بميه مصقعه مش عارف هنكون صادقه او لا بس تقريبا دموعها عادلوا مية الدوش ..
بكت بكت واجد يوسف مش متخيله تقعد بلاه ساعتين !! كيف تبي تقعد بدونه عمر ؟؟
لو كان اي شيء غير مس كرامتها لو انها تعافتت و مشت الامور
بس هيا حاسه روحها منهانه هو وصفها بالرخص ..!
ولو ان قالها بطريقه غير مباشره ..
و الشيء الموجع عشق اكثر ان هيا مش قادره تبوح عن مشاعرها
فارضه على نفسها انها تخبيهم حتى قدام وتين ماتبيش تتشوه صورة يوسف المرسومه في مخيلتها ..
هيا مش قادره تبكي ولا تعيط ولا تشهق ولا اطلع صوت ...!
قلبهاا واجعهااا من السكوت الاسبوع هذا كلها
مش قادره تحكي لزبيده ع خاطر تقعد اخت يوسف و نوريه تكون امها
ولا قادره تحكي لوتين الي اول ما هتحكيلها هتكرهه يوسف و تفركش مع معاذ
و هبا ماتبيش تخرب حياة اختها بسبب طلاقها
مسحت دموعها و غسلت وجها عدة مرات بالميه المصقعه طلعت و هيا مدعيه الابتسامه و اتكت جنب اختها
عشق : احم ، بكرا ان شاء الله هنطلع اندور ع شغل
شافت لوتين : مش هنحرمك من شيء هنحاول نغطي عن كل شي كان مقدمه لك يوسف مادياً و معنوياً
وتين ابتسمت و حضنت عشق : يا روحي انتِ فهمتيني غلط والله وجودك جنبي يعادل ميه من يوسف
خبزه و زيت معاك ولا اشهى الاكلات مع يوسف
انت امي و اختي و صاحبتي و كل شيء بالدنيا
عشق : ربي يخليك ليا 💙
انا عارفه انك ازعلانه لانك انحرمتي من اجواء العيله بس توا تجوزي معاذ و تقعد عندك عيلله و تجيبوا صغارر
بعدت عليها و شافتلها بضحكه
عندي حق عندك تجيني يومين في الاسبوع
وتبن : مستحييلل مستحيللل اني نسيبك ولا ف عمري هنخليكك قعدتي معايا عمري كله كبرتيني و قريتيني و طلعتني ب احسن تقديرات حتى بعد تجوزتي خذيتيني معاك و ما خليتنيش تبيني انا نتجوز و نسيبك بعدها انا نعرف انك تخافي ترقدي بروحك تبيني نسيبك تعيشي بروحك ؟؟
عشق : ده كان زمانن 😂
بعدها انا مش بروحي اهي خويله عائشه "جارتهم مش ام معاذ" و خويله خيريه و ايمان جنبنا
وتين : مهما كان
عشق : خلاص صكري على هالسيره
وتين : شن هتشتغلي ؟
عشق بحيره : مشعارف والله هنطلع و نشوف
لو مثلا مدرستك العامه قبلت اني نكنس او اي شيء مع ان ما اعتقدش لان العام الدراسي كمل
بس هنشوف يعني نبرم ع الحواشين لو يبوا شغاله او طباخه توا تفرج ان شاء الله
بعدها محمد جابلنا حاجات لو اقتصدنا فيهم هيقعدوا لاسبوع قدام
وتين : محمد و معاذ اساساً مش هيسيبونا انا عارفتهم
ما تجهديش روحك بتفكير واجد هتفرج
عشق ابتسمت : ان شاء الله
هيا ع الاقل عشنا ايام حلوه غادي 😂💙
وتين : هيوحشني عمو علي
عشق ضحكت بحزن : حتى انا اكثر حتى من يوسف
وتين دفتها بشويه : كذابه
عشق : ههههه جديات مش مدوره لاني كنت حاسبه لليوم هذا و الحمدالله طلعت منه بدون حمل او ان معايا وليد نمرمطه مع عيشتي
اما بالنسبه ليا انا سيوري ببنسى
قدرت نكمل حياتي بدون بابا و ماما
هتوقف ع يوسف يعني ؟؟
وتبن تنهدت و سكتت
طلعت وتين تحل في الباب لايمان و هرجته الي تنسمع من اول شارع حكت معاها و قالتها ان امها خيريه تبيها
تفهمت وتين ان ايمان بتحكي مع عشق ع انفراد خذت بعضها و طلعت
اما عشق اول ما شافت ايمان بكت وقتها بكل ارياحيه
فضت كل خاطرهاا حكت كل الكلام الي في قلبها بطريقه سريعه و غير مفهومه
متأكده من ان ايمان هتفهم كل كلامها و هتنظمه
ايمان : يا روحي انتِ معقوله يوسف يبيعك هكي بالرخص؟
عشق : بس يوسف كويس !💔
يوسف ما كانليش زوج بس
يوسف كان بابا الي يخاف عليا يوسف كان زي ماما مهتم بيا
يوسف لما يشوفني نحس ولا ندمع يبكي
يوسف لما يشوفني نضحك نحس فيه مالك كل شيء في يديه
يوسف كان اول ما يكمل شغل يجيني ع طول
يقولي انا مسيب دنيا كلها اصحابي و ناسي ع خاطر دقائق معاك
عارفه يجي جنبي و يقولي العبيلي بشعري بيش نحكيلك شن صار معايا في المستشفى اليوم
ضحكت و مسحت دموعها
يبدا يحكي وانا نلعبله بشعره يرقد و يفوتني
صاح كان يقضي في اوقات كثيره ف المستشفى بس لما يجي يعوضنيي
ايمان : باهي بالك انتي فاهمتيه غلط ؟؟ و ما عطتيش فرصه تذكري ايام منتهى كيف ظلمتيه ؟؟
عشق قعدت تضحك و تبكي في أن واحد بوجع ..! : تي نقولك يبي يتجوووز يتجوزز مش يخطب او كابسته يكلم في وحده
ايمان تنهدت : والله شن نقول بس عارفه حتى انتِ غلطانه راه ؟؟
انت مفكره يووسف هيسيبك لو امه قالتله او شيء من ذلك ؟ هو يطلب في حقه يبيك تسيبي في دواء الي تجيبي فيه من وراه و تاخذي فيه و هذا غلطط يا عشق غلط ..!
هو يبي عيال يعني لو تكلمتوا و وتفاهمتوا في الشيء هذا كان هينحلل انت كنتِ مشاركه في طلاقك المحتم ..
عارفه هو عليش بيتجوز ؟؟ بيش يقهرك و يقولك من زواجه ان هو هيجيب عيال و يعيش حياته لو مش معاك مع غيرك
عشق قعدت تبكي و ترشف في خشمها : عارف شن الي واجعني في الموضوع كله ؟؟
ان تجوزز نور ..!
نور يا مني نور الي يقولي هذي كيف اختي
نور الي لما شفته ماسك يديها قالي اختي يا هبله هذي كيف تغاري ..!
نور الي يحكيلي عليها من فتره الخطوبه و يقولي هذي اختي ما تقربيهش ولا تغاري منها
نور الي نص مشاكلي مع يوسف بسببها
بس ما عمرهش وصلت لهدرجه
كنا نتعاركوا الصبح يجي يصالحني الليل
ما عمرش وصلت لممرحله هذي
تعبانه يا مني والله تعبانه كان يجيني و يقولي خلاص انسى كل الي قلته وماصارش موضوعي مع نور و الله هنسامحه و نروح معاه وقتي
ايمان : لان بيقهرك ولان عارفك ان نور اكثر وحده تغاري منها
و هذي لقطة تانيه توضح ان يوسف غبي و يحبك ولا خانك ولا شاف لغيرك ف حياته من الاساس
المهم يا روحي اهدي كان مزال لك فيه نصيب ل
الا هتردوا و هتنحل المشكله
وكان هذا متزعليش ، بالك ربي مبعد بوسف عن طريقك بيش يحط شخص افضل يسعدك و يهنيك في حياتك ؟
عشق : مستحيلل ندخل لراسي فكرة زواج من جديد
ايمان : ولو كان يوسف ؟؟
عشق مسحت دموعها و سكتت
...............................................
صفقوا الراكبين بعد هطول الطيارة على مطار برج العرب بالأسكندريه
نزلت سارة و هيا مزالت ساكته ، صدمه زعل اكتئاب صايرلها ، مش فاهمينها حتى هلها الي محكتش معاهم حتى نص حرف ...!
نزلوا امام العماره ، ركبوا لشقه و رتبوا الشناطي و نضموها
مابوش امها و باتها يضغطوا عليها و يسألوها خشوا تريحوا شويه ع خاطر بعد ينوضوا يمشوا يدهوروا و يغيرولها جو
رقدت سارة بعد رتبت شنطتها ع جنبها
و اخيراً افرجت عن دموعها و سمحتلهم بالنزول !💔
نورا : ممكن نفهم شن في ؟
سارة هزت راسها بشويه و نزلوا دموعها
قالت بعبرتها : خ خلاص ..!
نورا : شنو هو الي خلاص قصدي مالك
سارو قطعت عليها و نزلوا دموعها بحسرة : معش في مالك
نورا : باهي بنفهمواا مش معقوله تقعدي ساكته هكي ؟؟
ضربك ؟ هزبك ؟ هانك ؟ وصل فيك ولا في عيلتك ؟
سارة : هو كسرني
نورا : كيف يعني ؟؟
سارة : تحملت ٣ سنين ٣ سنين وانا نعاني نكاافحح نحاول نغيره نحاول نكسبه و نخليه في صفي و نبعده عن كل شيء
ولما نلت تعبي كل هالفترهه ..!
رد لنقطه الصفر و كسرنيي ..!
نورا : سارة احكي بوضوح لو سمحتي ..
سارة نزلوا دموعها و حكتلها كل شيء من اول يوم لها لقبل ساعات قليلة بطريقة مختصره و بدون لا تغوص في التفاصيل
نورا : مالك يطلع منه هكي ؟؟
مالك الي بخاف عليك من هبة الريح ؟؟
سارة نزلوا دموعها بحسره كبيره : لانه يعززني بس ولان يشوف فيا كيف سحر
مالك عمره ما حبني
نورا : ما تحكميش عليه هكي ، يمكن يكون مظلوم ..!
انت ما سمعتيش منه و كريتي روحك كيف الشعره من العجين
بدون ما تخليه يدافع عن نفسه
و هذا غباءء ردبالك تطلبي طلاق خليك تريحي فتره معنا في مصر لما نروحوا قمعزي معاهاا لوميه و عاتبيه و اسمعي منه
ريتي كلامه منطقي و صحيح نفذيه
ريتي ان هو يخريط و يلف و يدور وقتها اطلبي طلاق
بس ما تسرعيش
نورا شافت لاختها الساكته و تنهدت : متزعليش روحك شوفت عيني ان مالك تلبست ليه القصة
يعني حتى كان بيتلاقى مع وحده
شن بيخلي حد يصورهم ؟ ولا كان نيته مش نظيفه عليش متلاقي معاها في مكان عام ..؟
مالك ما عندش عداوه مع حد ولا حاجه ؟؟
سارة سكتت و جا جلال في بالها
بس نحت فكرة جلال من بالها ع خاطر عارفه ان جت فتره مالك حكا فيها مع بنات بعدد شعر راسها ..
مافيش حد فاضي لهدرجه بيش يصوره او هكي
و كيف ما قلتلك هذي اكيد وحده تبيه
واخذه رقمي من فونه و دزتلي صور بمعنى خليه ليا
وانا مش هنخش في صراع على مساحه ليا في حياة اي شخص ..!
نورا : هذا زوجك الي مفروض تتمسكي بيه اكثر من هكي
قعدتي الفتره هذي كلها ياما شايفه و ساكته
و جيتي على لقطه زي هذي فيها ربكه و شيء مش طبيعي و رخيتي بيه ؟
قاعده تقوليلي مالك عنده كيف الفوبيا من البعاد وانت مسيبتيه بدون حتى لا تسمعي منه ؟؟
سارة سكتت و غمضت عيونها بدون لا تعير اهتمام لكلامهاا
اما في ليبيا
و في حوش مالك بالتحديد حيث سحر تسمع في صوت عالي بطريقه و كأنه مالك يهزب في شخص و يحكي معاه بعصبيه و بطريقه حادهه
كانت تسمع في صوت تكسير الي جانب الصراخ
...............................................
صباح تاني يوم و على تمام الساعة ال 9 صباحاً
سمعن البنات صوت طرق مستمر على الباب
استغربن في من هيدق في الوقت المُبكر هذا !!
صبن و لما فتحوا الباب لقوه معاذ محملاً بلأكياس
معاذ : صبااحح الخيرر صباح نوررصباحح الخبزه و تنورر
ع طاري الخبزه وانا جاي لقيت كوشه فاتحه و خبزتها مش عاديه
جن في بالي سندوتشات عشق الي مذقتش كيفهن
فقلت نجي نفطر عندكم ، مش هتقولولي خش ولا كيف ؟؟ 😁😂
عشق ابتسمت و وسعتله الطريق : لا تفضل اكيد
وتين شافتله وخشت بدون م تحكي معاه
معاذ : كنها السوده هذي ؟؟ شن دايرلها انا ؟؟ شن ذنبي الناس تغلط وانا نتعاقب حسبي الله و نعم وكيل سأخبر الله بكل شيء
عشق ضحكت : مفيش حد غلط لا انت ولا عيلتك ولا حتى يوسف ؟
هيا مش عارف من شنو متضايقه يمكن ع خاطر تحسابني متضايقه
معاذ اتكى ع بار المطبخ و شافلها : توا انت بجديات مش مضايقه ؟؟
عشق : عادي يعني اول ولا اخر وحده هتطلق ؟؟
معاذ : يوسف مش حاط في باله موضوع الطلاق
عشق بدون لا تشوفله : اوكي لو يببي يتبهدل في المحاكم ف عادي يعني
معاذ : كنك قعدتي قاسيه هكي حلو الموضوع ودي
عشق التفت و شافتله ببتسامه : عادي نصكروا على الموضوع هذا ؟؟
معاذ : لامتى بيتصكر انتِ تصكري و هو يصكر شن الحل ؟؟ فهمونا اقل شيي شن الي صار و انقلبتوا هكي ؟
عشق : تجادلنا على موضوع او الأصح هو موضوع قديم بس كبر و هذا كان انسب حل
معاذ : اكيد هو موضوع بس الي بنعرفه شن هوو ؟
عشق سكتت لفتره طويله قبل لا تقول : اختلفنا في موضوع الانجاب هو يبي عيال وانا منبيش توا
معاذ : بعدك يوسف حشيشته عيال صغار
يعني نفهم منك ان هو تزوج عشان يقهرك ؟
عشق : لا هو يبي عيال
معاذ : يبيهم منك راه !!
زواجه كله بيش يقهرك قاعده واضحه تعيط
عشق لمعوا عيونها و التفتت : معاذ خلاص بالله هو تزوج وانا قاعده هنا و تمم
معاذ : مفيش شيء تمم هو مزال متزوج انتِ قعدتك هنا مؤقته
يجي تتناقشوا و تنحل بعدها تمم ..!
متقعديش مضحكه هكي ويريح منك
عشق : وانا مش هنافس على اي شخص حاط منافس ليا...!
معاذ : محطش منافس لك انت الي اخترتي الشيء هذاا
عليش رافضه الموضوع انت ؟؟
مش حابه تكون عندك عيله
عشق مسحت دمعتها الي كانت على وشك السقوط : معاذ لو سمحت ما تضغطش عليا ؟؟
معاذ : مافيهش الا ان في حد مضايقك !!
امي صح ؟؟
عشق بحتت فيه لفتره طويلة و سكتت
: تبي سندوتشات ولا سفرة ؟
معاذ : شنو قايلتلك ؟؟
عشق : ولا حاجه ..
معاذ : سيوره هيبان كل شيء بس اطلعي انت الي كاسبة خير ما تطلعي خاسره و تعضي صوابعك ندم بعدين ..!
عشق : سندوتشات ولا ندير سفرة ؟
معاذ : سندوتشات ، و خليك هكي باهي غبيه و ماده وجهك
عشق : اوكي
معاذ : بطلي استفزاز !!
عشق : موضوعك مع وتين هنحله في اقرب وقت و مش هنقعد عائق في موضوعكم
معاذ : فيش تحكي انتِ مش ع هذي انا
عشق : خلينا ناكلوا و نهدرزوا بدون هالسيره تم ؟؟
معاذ : سكت و طلع لوسط الحوش قمعز برروحه يتفرج ع تلفزيون و شويه و جت عشق مدتله سندوتشات و كباية شاهي و الحليب و قمعزت جنبه ةكان صمت سيد الموقف يكسر فيه مره مره معاذ ببعض الاسئله
رن عليه يوسف
شاف للعشق ورد عليه
معاذ : ايوه ؟
يوسف : وينك انتِ ؟؟
معاذ : عند عشق و وتين !
يوسف ارتبك : دير روحك ما تكلمش فياا
معاذ : شن في يا معتصم ؟؟
يوسف : عشق مش واخذه دواها ع اساس جايبه بفلوسي مابتش تاخذه وضروري ما تاخذه انا قريب منهم اطلع دير روحك انت الي جبته
معاذ : قاعده واضحه راه انه انت !!
يوسف : تي يا بهيمم
معاذ : اول ما يصير معاك جديد ديريلي رنه
يوسف : حاجة عشر دقائق و نوصل
معاذ : تم تم هيا اوكي
معاذ : وين ما المشاكل وين ما راسه الفرخ هذا
عشق ابتسمت : كنه ؟
معاذ تذكر اخر موقف حكا له عصومي : بايت عند خاله و مالقش وزره يمسح بيها كاويشه قص من جلابية خاله الي تقريبا ما عمريش شفته سالحها و مسح كاويشه بيها
ناض خاله يعيط و يهزب و هو عامل نفسو ميت
عشق : حتى هذي يقولها لك؟😂
معاذ : كل شيء اول باول
رفقتي هذا
عشق ببتسامه : ربي يدوم صحبتكم فعلا عصومي ولد ناس و كويس
معاذ شاف لسندوتشها الي بالكاد كلت منه فمين و سيباته : كنك ما كملتي ؟؟
عشق : شبعت خلاص
معاذ : لازم تاكلي انتِ تاخذي في ادويه
عشق سكتت
معاذ : عندك ادويتك ؟
عشق سكتت شويه و قالت : اها
معاذ : تكذبي ولا ؟
عشق : توا شويه و نطلع نجيب
معاذ : حلوه حتى هذي 5 دقائق و نجي
طلع معاذ بدون م تقوله عشق حتى ع اسماء الادويه
وقف عند راس الشارع يرجا في يوسف لين جا
و خذا منه الادويه
يوسف بلهفه : شن جوها كويسه هيا ولا تحسها تاعبه
كان هذاا يا معاذ صرر عليها و شيلها للمستشفى
معاذ ضحك بهزوه و شافله : غير بشويه !!
دامك خايف عليها و قريب تموت مسيبها عليش ؟؟
يوسف : نزل عيونه في الارض ناظراً لجيهة اليسار : اكيد ما نتمنلهش الشر و ما نتمنلهش الموت !! حتى لو خذيت غيرها في الاخير في عشره بيناتنا
معاذ : مش سبب انك تسيبها ع خاطر هيا رافضه موضوع الجياب راه !!
انت الي غالط !!
يوسف رفع عيونه و شافله : هيا قالت هكي ؟؟
معاذ : عشق ما تكذبش يا يوسف مش من اول امس نعرفوها !!
يوسف : ما قلتش تكذب انا ! صح هذا هو الموضوع
لكن هيا الي اختارت الفراق تي ما فرقتش معاها ما جادتلتنيش ما جتش قمعزت معايا و قلتلي كل شيء ينحل !! ع طول قالت طلاق و فراق و انا ماجبتش السيره هذي من الاساس
معاذ : تي يا راجل بالله شوف الدنيا صح و قمعز مع روحك شوف من الي غلطان !!
تقوللها بنتجوز و تمشي تقلب الدنيا و تخطب شن تبيها تقولك مبروك يا وسيفا ؟؟
الطبيعي ولانها بنت ناس متربيه ع العزة و الكرامه بتقول بنطلق !
قاعده تقولي دوااها الي شريته بفلوسك مابتش تاخذهاا
تي كان بنت امهاا راههخءت منك حقها تالت مربع
يوسف : ذكرها بأدويتها و خليها تاخذ حبة المضاد توا فات وقته هو بس مش مشكله
معاذ : كنت تنوض من نومك و انت مروح تاعب من المستشفى
تجيها قدامنا و انت شبه راقد تعطيها دواها الي هيا نساته اصلا
تبيها كيف تذكره !!
يوسف : قوللها هتموتي و محد هيقعد لاختك توا تخاف و تاخذهن نظم امورك معاها
معاذ : عليك قسوه فيك الزح ..!
يوسف : مهيش قسوه عشق عايشه على الادويه هتبطلهن مش هطول في الدنيا ..!
معاذ : و عارف و مسيبها
يوسف : هيا الي تبي ..!
معاذ : وانت وقت تبي حاجه تعرف تحافظ عليها انت توا رقيتلك منها هتندم يا يوسف
تي زحح نور شن جيبها لكك طفلهه هذيي .!
يوسف ركب سيارة و فاته
معاذ : تييي امشيي يا عيييلل
...
عشق : شكرا تعبت روحك
معاذ : تعبك راحتي
عشق ضحكت : انت مش شاطر الا في الكلام الرطب😂
معاذ بضحكه : نعمه هذي راه
عشق : بس كيف عرفت اسامي الادويه ؟؟
معاذ : تذكري يومها لما يوسف دزني للصيدليه نجيبلك الادويه و كتبلي اساميهم في ورقه ايوه الورقه مزالت معايا
عشق : اهمم باهي بارك الله فيك 💙
معاذ بضحكه : مش بينا يا حبي
خطرها
عشق : شنو ؟؟
معاذ : انقنها بجو بنمشي لوتين ما طلعتش من بدري و ليها اسبوع قالبه وجها بنحكي معاها
عشق : خشلها في دار اكيد.
معاذ : تمم
طلع معاذ من المطبخ
مشا لدار دق دقتين و خش
كانت مقمعزه في سرير و تشوف للساس
معاذ قرب و قمعز جنبها : بنفهم عليش قالبه وجهك عليا شن ذنبي انا ؟
وتين ساكته و دايره روحه ما تشوفش فيه
معاذ : ي هو انت نحكيلك
وتين : لو سمحت عادي تطلع ؟
معاذ : تي شن نطلع هذي انا شن داير فهميني بس ؟
وتين : انا مستحيل نسيب عشق
كبرتني و هيا الي ربتني من لما كنت ف الاعداديه
معاذ انا توا خاشه جامعه و عشق تكفلت بيا في كل شيء
حاولت توفرلي كل شيء و ما تحسسنيش بالنقص عن غيري
تعبت و تحملت ع خاطري حاجات مافيش واحد يقدر يتنازل عليهن
سيبت قرايتها و اشتغلت خدامه في حواشين
بيش توفرلي فلوس و تقريني و تكبرني
تعبت معايا واجد والله ؟؟ انت تبيني نجازيهاا ب اني نتزوج و نسيبها بروحها ؟،
عشق ابتسمت و خشت : انا سمعت كلامكم بالغلط
قربت منها بشويه و قمعزت جنبها
شوفي يا روحي الشيء الوحيد الي هيفرحني في دنيا هذي !!
انك تكملي قرايتك و تاخذي شهادتك و ترفعيلي راسي
و معاها انك تتزوجي و اديري عيله و تجيبي عويله صغار يجوني يقولولي يا جديده عشق 😂
مسكت يدها و طبطت عليها : مافيش شيء هيتغير ع خاطر انا هنطلق من يوسف تمام !!
حتى لو تبوا الدفع و البيان الاسبوع الجاي و اديروه مع عرس يوسف عادي شوف عميمه عائشه يا معاذ لو مزالت تبي نفس الموعد و نديروه
و تطلع انت و يوسف مع بعضكم 😂
وتين : مستحيل نسيبك بروحك
عشق ببتسامه : كنك مصره اني بروحي ؟؟
لو في يوم خفت هنمشي نبات عند خويله خيريه بيناتنا خطوه نوض صبح نمشي شغلي و نكمل وقتي هنا و نمشي نبات معاهم و بعدها هنتعود
معاذ : وراس عشق الا انديرلك جناح عندي و عمري ما هنتضايق منك بس خليها توافق بس
وتين : لو هيا جت معايا اوكي
عشق لمعوا عيونها و خبطت كتف معاذ : خوياا انت والله و سندي و غالي عليا واجد و عارفتك ديما في ظهري لكن ما يصحش الكلام هذا
معاذ : وعليش ما يصحش حاسه في يوسف انتِ طزز فيه !!
عشق : لعرم اسباب واحد منهم يوسف
هذي توا نقمعزلك معاها في الليل و نعطيها ع راسها لين تفهم الصح من الغلط
وتين قعدت تبكي و حضنت عشق : يا روحي انتِ البكايه عليش تبكي بس؟
وتين ؟؟
معاذ : مش هناخذك توا تودعي فيها عليش 😂
وتين حولت من عشق و مسحت دموعها و ضحكت : تعطي فيا لانسان مهمل زي هذا عليش؟
عشق : الوحيد الي عارفته هيحافظ عليك و هيحطك في عيونه
معاذ : راضيه علينا توا ؟
وتين مسحت دموعه : لا طبعا
معاذ : لا انا ماشي للشغل تأخرت
وتين : شغل ؟؟
معاذ : جاي بنفرحك بس انت بهيمه
وتين ضحكت : جديات شغل شنو ؟
معاذ : محل ملابس
وتين : نسائيه شيل من عليك
معاذ : زبقتيلي فيها المره الي فاتت يا بهيمه و راتب كان مسقم
لكن لا محل شبابي
و بعد ما نتخرج و ناخذ الشهاده باتي حصلي شغل في مصرف 😂
وتين بفرح : يااخياا مبروكك
عشق : تستاهل كل خير انتِ !💙
معاذ : تسلمي حبي
شن مالا يا وتين صافي يا لبن ؟
وتين ببتسامه : حليب يا اشطاا
معاذ : خلاص معناها تبن اي شيء ديرلي رنه مش اديرن جو غريبات
طلع معاذ لشغله الجديد في المحل الي حصل فيه هو و عصومي 😂💙
و طلعت بعدها وتين لما بعتتلها ايمان ان امها تبيها
شافت عشق للحوش الهادئ كلهن شهور و هتتعودي على روتين هذا بعد وتين تعدي
قمعزت في زاوية الغرفه و نزلن دموعها بضعف و انكسار
مستعده تشري الوقت الي تقعد فيه بروحها بيش تبكي براحتها
تذكرت نظرته لها الي كل معانيها انتِ رخيصه !!
و ما تنفعيش !!
واقل مي في المستوى المادي
فقيره ، جاهله ...!
نظرته بعيداً عن كلامه الي خلتها تحس بنقص و فرااغ كبير
كنت متوقعه نهون على كل حد عرفته في حياتي
حتى بابا و ماما هنت عليهم من لما سيبوني بروحي شايله المسؤليه هذي ع صغر سني
بس عمري ما توقعت نهون على الي لما يشوف دمعه في عيوني يبكي
الي يقعد مضايق من كل شيء حوله وقت يشوف ضحكتي
يقعد كأنه مالك الدنيا
ما عمريش توقعت نهون على يوسف الي يخاف عليا من هبة الريح
قدرت نتجاوز صدمه بابا و ماما بيه
كان شايل حمل من عليا
انا 3 سنين و هذي الرابعه من موتت بابا و ماما ما شافتش عيوني النوم الا معاه كنت حاسه براحه و امان ماكنتش انا الي لازم نسهر نراقب و نشوف لو في صوت حركه برا او اي شيء
ماكنتش حاسه بخوف معاه
حتى في بعض الاحيان قدرت نتجاوز رهبتي من الظلام و نرقد وانا مطفيه الوناسه الي كان ينزعج من ضوءها و متحمل ع خاطري
غطت وجها بيديها وقعدت تبكي بعبرتها : حرام عليك يا يوسف ..!
خشت للحمام "اكرمكم الله" قبل لا تجي وتين بيش تغسل وجها
..
شاف يوسف لوتين و الايمان الي كان واضح انهن شايلات غداء و مشيات بيه شور عشق
اطمن يوسف عارف ايمان هتزر على عشق عشان تاكل
زي ما كان هو يزر عليها ع الاكل لانها تاخذ في مضاد
قعد واقف يقلب في صورهم في مصر يبتسم مره مره لما يشوف لقطات عشق العفويه الي في الفيديوهات او صور
قعد قدام حوشهم لين كلمه رئيس القسم
طلب منه يحضر حالاً للمستشفى لعمليه طارئه
..
نورا : لابسة تيشرته الي مليانه عطره و تقوليلي خلاص انا نسيته ؟
سارة مسحت دموعها محاولةً اخفاءهم على اختها : مش عشان حاجه بس واسعه ورطبه تريح فيا
نورا : تحسابيني منسحش بيك وانت تبكي في الليل ؟؟
سارة سكتت
نورا : لو مزلتي تحبيه عاطيه فرصه تانيه !!
ما تقعديش ساكته هكي
احكي
سارة: شن بنحكي ؟؟
نورا : تشوفي في الي اديري فيه صح ؟؟
سارة : اهاا صحح
نورا : مالك يكلم فيك كل دقيقه و تانيه !!
سارة ،: وانا عفته ومانبيش نسمع حتى صوته
نورا : مافيش حد يعرف شخص يلبس تيشرته و يبكي عليه و يشوف صوره !!
سارة : برضوا مافيش شخص قادر يتخلى عن شخص يحبه بالسرعه هذي !!
كله يجي مع الوقت
نورا : مالك يحبك
سارة : وانت ما تعرفيش الي مرينا بيه
نورا : باهي احكي فضفضي ما تشيلش في قلبك هكي
سارة سكتت
..
نزل مالك بشويه و بقلة حيله بعد ما طلبو منه يجي لشركه في اسرع وقت
كان مش واكل من امس مش راقد مش شارب حاجه
مش مبدل حتى دبشه
تقريبا يوم كامل من وقت ما طلعت سارة قمعز على الارض ما صبش الا توا ..!
قربت منه سحر الي طول الوقت كانت تبيه يفتحلها عشان تحكي معاه
و يفضفضله او ع الاقل تخليه ياكل شيء
و اول ما شافاته حاولت تستغل الفرصه بيش تفطره و تخليه ياكل شيء بس هو أشرلها بمعنى ما تقربيش مني و طلع
شكله كان مرهق و باين ان باكي وجهه اصفر من قلة الوكال
كان ما عندش جهد يرد حتى رد ع الي كان سبب
لان هيا اساسا من اول ما نهت معاه طلعت شور البيضاء
الفويسات و المكالمات ما ينفعوش ..!
..
مر اسبوع كان فقط سعيد بالنسبه لنور الي و اخيرا هتتجوز من يوسف
ورغم رفض خوتها التام ليوسف الي شافوا فرحته لما تجوز من عشق
ماقدروش يمشوا كلمتهم لان باتهم كان موافق على يوسف
كان تفكير باتها ما يفرقش عن تفكير هل عائشه ام معاذ
من ناحية اول حد يدق الباب طالب بنت من بناتهم يعطوها اه
الاختلاف فقط كان ان يشوفوه خل محترم و ولد عيله و ناس او لا
ما يهمش موضوع ان مطلق ثلاثه و عشرين مره و ارمل سبعة و اربعين مره ..!
و نور طبعا ما رفضتش لان تكن ليوسف مشاعر
..
و بالنسبه لسارة مزالت مصممه على قرارها تحكي مع ايمن او سحر في بعض الاحيان تسأل فيهم وقتها على مالك من بعيد
و تجيب فيها بطريقه غير مباشره
و نقدر نقول مالك رد لحالته زمان
ساكت كئيب مهموم و مضايق ما يحكيش مع حد و ما يحاورش في حد ..!
نفس حالته في موت مها و باته ردلها من جديد توا
..
اماني و محمد بدت حالتهم احسن من قبل نقاشات اكثر و حوار اكثر
هدرزه اكثر محمد ياكل معاهم و يديرلهم ديما في جو و يحضروا في افلام
بدا معش يحسس في اماني انه ثقل عليه و او اي شيء من ذلك
حتى انهم هو و معاذ و عائشه و اماني و زبيده مش مسيبين عشق و وتين بكل و ديما عندهم
حتى بدت عشق تهزب فيهم بعدت حست انها ثقل عليهم و بدوا يقسموا في الايام و كل مره يجي يقعد معاهم واحد
يوسف برضوا مش مسيبهم يومياً يبات قدام حوشهم
و كل ما يحصل وقت فراغ يقعد جنبهم ولو فصلت بيناتهم مسافه
اليوم عرسه نور جاهزه و فرحانه و متحمسه للشيء هذا ولان الفتره قصيره نست تفكر حتى في حب يوسف الكبير لعشق و عايشه لحظتها
اما هو حتى لحلاق مامشش ماشرش بدله
الشيء الوحيد الي داره أجر شقه في نفس شارعهم
كان رافض نور تخش لحوش كانت فيه عشق
مزال بيحتفظ بريحتها في الحوش ع امل انها ترجع
..
احمد و اسيل وضعهم من الاسوء للأسوء
احمد هالك روحه شغل بيش يوفر فلوس و يوفر لاسيل كل شيء
يحساب روحه بالطريقه هذي يسعد في اسيل
الا انه يزيد في الشكوك لها كل مره اكثر من الاولى
مع صاحبتها او الشيطانه الي بدت تخلي فيها تفكر بجديه في فكرة الطلاق من احمد
..
اه بالمناسبه سمعو حكا لمحمد ان يبي سحر من فتره ولان ما عندش فلوس ما قدرش يخطبها و هذا سبب تغيره عليه الفتره الي فاتت
تكها معاه محمد من جديد ع خاطر كيف ما حكلش شيء زي هذا !!
و قاله ان هو لاحب سحر لا شيء و كله كان بضغط من امه
وان هو توا متريح مع اماني ولا مفكر في سحر ولا غيرها
و ااه سمعو قدر يقنع سحر بيه و فعلا تقدملها
ما رفضتش سحر بيش تبين لمحمد ان دنيا مش واقفه عليه
..
و ااه عشق لتوا م حصلتش شغل بس دزوها لخياطه قالولا كويسه و ان شاء الله هتقبلك
..
صباح تاني اليوم و ع تمام ساعه 7 صباحا وعت عشق او واخيرا حل الصباح بيش تنوض من السرير لان ليل كله مارقدتش
سيبت وتين راقده حنبها و صبت
مشت شور المطبخ بعد صلت الصبح
كان في تن و جبنه و دحي و هكي بس مافيش خبزه من امس
معاذ لهى بشغل و محمد ايضا لاهي بعرس يوسف الي كان هامله استاذ يوسف و محمد هو الي يشيل و يجيب و يشري في الحاجات
حتى ان امس انقرت الفاتحه !
و تحشمت تطلب من خيريه لان مراة ولدهم كانت راميه و حايسين
و عائشه مش قاعده في الحوش من امس
جت ع نفسها
و لبست عبايتها و طلعت للمحل الي جنبهم
شافلها يوسف الي كان يكلم في معاذ بيقوله تعال مدلهم الخبزه
ولما لقاها طالعه للمحل
نزل من سيارته و قعد يراقب فيها من بعيد لبعيد
قعدت عشق تبرم في المحل لين طلعوا الي فيه كلهم كانت متحشمهه من الي بتقوله بس ضروري ما تقوله
قربت عند الكاصه و شافت للراجل الكبير في السن بخجل : عمو عبدالله عادي ناخذ منك شكاره خبزه بالدين و نردها لك في اقرب وقت
عبدالله : بس يا عشق انت امس خذيتي حكية طماطم معجون بالدين برضوا !!
عشق بنبره هاديه : معنديش فلوس يا عمو والله ماك عارف حالتي بس قالولي ع خياطه هنا في منطقتنا تبي اثنين يشتغلوا معاهه والله هنردهن لك
خش يوسف من وراها و شاف لعبدالله : بكم حكيه طماطم الي خذتهاا امس
عبدالله : ب 3.50
يوسف مدله خمس جنيه
عشق : عمو عبدالله قلت هنردهن انا ما تاخذش منه لو سمحت اليوم هيكونن عندك
يوسف حط يوسف الفلوس ع الكاصه و كر عشق من يدها و طلعها
عشق : يدييي حولل !
يوسف : اركبي السيارة خير ما انديرلك فضيحه
عشق : مش راكبه معاك لاي مكان نبي ناخذ خبزه و نروح لحوشي
يوسف ببتسامه مستفزه : اركبي خيرلك ..!
عشق : مانيش راكبه و بعد من طريقي لو سمحت
يوسف قرب منها : تمام هنشيلك
عشق بعدت خطوه و قالت بخوف : لالالالا خلاص تمام هنركب
يوسف فسحلها الطريق : ما كان من الاول
و ما تجربيش تجري لان هنجيبك هنجيبك وانت عارفه
عشق فتحت باب السياره وركبت فيها و صرفقاته بالقوه
يوسف : حسبي الله فيكك
ركب من قدام و شافلها : خلخلتيي البابب و تجيي عند شيشه القزوزه و ما تعرفيش تحليها
عشق : ركبت هيا وصلني هالخطوتين لحوشي و عديي
يوسف سكت و مشا شور الكوشه
نزل من بابه لبابها فتحه و صكر البطمه خلاها ما تقدر تفتح الا من برا
جاب خبزه بخمسه جنيه وركب
عشق : شكرا لكن مانبيش شيء منك
يوسف : مازلت راجلك راه !!
عشق : لفتره مؤقته قاعده نمشي في عرسك ومانبيش نكد عليك بعدها بنبدوا ف اجراءات طلاق و اختفي من حياتي يا يوسف تشوفني ننحرق في شارع صب عليا بنزينه
يوسف : ما تهونيش
عشق ضحكت : ورحمة ماما هنت
يوسف شافلها لفتره طويلها و تنهد قائلا اليوم عرسي كان يرجا فيها تقوله ما تمشيش الغي كل شيء و هو كان هيخط ع كل حاجه داروها بكل سهوله
يبي دفعه منها بس او قال هكي ل يجس نبضها
عشق بحتت لأعلى محاولة السيطره ع دموعها : رببي يهنيك و زواجة الدهر ان شاء الله
يوسف حس بغضب من اجابتها الي ما درتش لموضوعهم اي اهتمام : خذيتي مضادك ساعه 9 توا !!
عشق سكتت
يوسف : عايشه ع ادويتك وانت عارفه الشيء هذاا صح ، "تكلم بقسوه" انتِ جنازه مؤجله يا عشق ..!
عشق : كلنا جنائز مؤجله و مافيش حد دايم بعدها فارقه معاك في شنو متت ولا انخطفت ولا انقتلت ؟؟
يوسف يردلها في طريقتها في عدم الاهتمام لما قاللها اليوم عرسي ..!
: انا ما تهميني في شيء اهو بنتجوز و بندير عيله سيوري ببنساك في اسبوعين ..!
لكن اختك هتقعد بروحها و هتخش في حاله نفسيه
بطلي الانانيه بتاعك و شوفي للي حواليك لو مره في حياتك
عشق دمعوا عيونها و شافتله بكرهه : نكرهك
يوسف : اجمل شيء في علاقتنا شعورنا ديما متبادل لاني نكرهك لحد كبير و مش طايق وجودك حتى ولا سماع صوتك
شاف لدموعها : امسحي دموع تماسيح
انسانه رخيصه جو البراءه مش راكبه عليك
و قناعك اخيرا سقط و ظهر وجهك الحقيقي انسانه خبيثه طماعه ما يملن عيونها الا الفلوس
و توا اكتشفت انك نصابه و سراقه تاخذي من راجل و توهميه انك بتردي الفلوس وانت ولا من شاف ولا من دري
عشق قعدت تشوفله بصدمه و تضحك حتى دموعها ما نزلوش
: شايل في قلبك هذا كله ؟؟
يوسف : و اكثر غير عاد العشره الي بيناتنا و منبيش نحكي و نزعلك
عشق ضحكت بصدمه و حاولت تفتح الباب ما قدرتش لان كان مدايرله التأمينه
عشق : افتحلي بننزل
يوسف عليش خليك نبرم بيك و نردك ؟؟
عشق قعدت تبكي بعبرتها و تعيط : افتحليي قلتلكك افتحلييي ، يوسفف افتحلي البابب
ولع سيارة و مشى شور حوشهم
رن معاذ عليه حط الفون سايلنت و زر بطمة القفل و دار روحه يكلم ف نور
_ ها حبي شجو ؟
_ تي فكي شويه الاثنين حلوات
_ حتى هيا الي شفناها امس ماشيه
_ تمام مشيتي للكوافير انت ولا مزال ؟؟
_ باهي مسافة طريق و نكون عندك نمشوا و نشوفها من جديد ما تربكيش روحك يا روحي
_ تعبك راحتي
_ انا قاعده في المستشفى شوية و جاي
_ حتى انا نحبك
_ هيا اوكي نديرلك رنه انزلي
اوكي اوكي
عشق حطت يدها الي ترجف من الرعشه ع فمها بيش تكتم صوتها و مستمره في محاولة تمالك نفسها و عدم البكاء
وقف عند حوشهم و شافلها: ادويتك راك تنسيها
عشق : افتحلي الباب
يوسف : امسحي دموعك مش حلوه قصدي تخشي ع اختك هكي !!
عشق مسحت دموعها بيديها الي يرجفوا : افتحلي يا يوسف خلاص
يوسف نزل من بابه و فتحلها
نزلت و شافتله بكرهه و بلوم و عتاب ع قسوة كلامه كانت نظره اخيره كل معانيها
معش هتشوفيني يا يوسف !!
و الامل ال 1% الي كنت حاطته بيش نتسامحوا شلته من قسوة كلامك
فتح الحوش و خشت ولان كانت فاطنتله وراها سيبت الباب مفتوح حط شكارة الخبزه و المونه الي كان جايبها قبل لا يشوفها حتى و طلع بهدوء
..
محمد : تعبت زحح وهوو مش معدل
اماني : معليش كلنا تعبنا بس قدر وضعه
محمد : تي شنو وضعه مراته خاينته كابسها مع واحد ؟ ماده لسانها ع هله ؟
شنو عشق شن بدير ؟ تي زح كنا هو ، تي حتى دوة ربي ما نسمعوش ف صوتها
اماني سكتت
محمد غير الموضوع بسرعه : سرور وينها ؟
اماني : راقده في دارها
محمد : حتى انا بنغفي 10 دقائق
اماني هزت راسها و جت بتطلع
محمد : تريحي شويه حتى انت عشر دقائق و نصبوا مع بعضنا
اماني : امبهه
مشت للسرير و تمددت و اول ما غمضت عيونها كانت بترقد
كمية التعب الي تعباته مش عاديه في تعزيل الحوش
محمد تمدد جنبها
واول ما جا حكت راسها على كتفه
محمد ولع فونه و طلب رقم
اماني : بتكلم من ؟
محمد : يوسف صمطها حتى هوو داما بيتجوز يشقى بروحه مش رامي كل شيء وراه و مش معدل
اماني : معليش هو متلخبط و عارف قراره غلط و ماشي فيه
محمد : اقسم بالله ماني راضي عليها زيزته هذ بس اهوو شن بيقول الواحد
زرط روحه ولازم كل شيء يندار بالاصول
يوسف : ها يا محمد ؟
محمد : نمشي نروح بيها انا بعدين ولا كيف ؟
يوسف تأفف : جاي جاي
و بعد ما تم كالكلمتين الي قالهن صكر عليه
اماني : كنا ؟
محمد : صكر !
اماني تنهدت : خلاص ما تضغطش عليه توا يجي
سمعوا صوت سرور الي صبت من سرير و مشت لوسط الحوش قعدت واقفه و تعيط
اماني جت بتصبي تجيبها بس محمد منعها و ضغط عليها : ما دلعيهش واجد توا تجي بروحها
سرورر يا بابا هناا نحنااا
مشت سرور بعدت سمعت صوت محمد ناحية الدار وقفت عند الباب ماسكه دبدوبها و تشوفلهم
محمد : تعالي يا سماحتي
قربت منهم وركبت على السرير جت في نص بينهم و قعدت تعيط بيش تحول اماني و تجي مكانها
اماني حولت و قمعزت ع سرير : هي تعالي
محمد ضحك : عليش حولتي مامي توا ؟
سرور : بابا تاعي انا
اماني : والله ؟🙂
سرور هزت راسها بإيجابيه
صبت اماني و قعدت تشوفلها بنص عين : اوكي
محمد : تعالي
اماني فتحت الدولاب و تشوف لدبشها : بنلبس قفطان خفيف حماني الجينز
نجيلك سروال توته انت ؟؟
محمد : لالا شويه و نصبي ساعة قريب ثلاثه توا
اماني : به
خشت اماني للحمام " اكرمكم الله " بدلت دبشها و طلعت جنبهم رقدت في الجيها المقابله لسرور
و اول ما قربت من محمد قعدت سرور ادف فيها و اتأتأ و تأفف بيش تحول 😂
اماني : أفففف هاا محوله بكل
حولت اماني راسها من على محمد
و رقدت ع جنبها و عطتهم بظهر و رقدت
محمد : هكي زعلتي ماما
سرور : هيا ديما معاك ؟؟
محمد : امتى صار يا كذابه ؟؟
سرور شهقتت : ماميي بابا قالي كذابه
اماني و هيا قالبه وجها : لانك كذابه
سرور : يعني انت تحب مامي وانا لا
محمد : اها 😂😂
سرور قعدت قريب تبكي : حتى نحبكمش نحب عشق و عمو يوسف بسس 😭😭
محمد : انت عيوني اناا غير ارقدي
خلا محمد سرور لين ترقد حولها من عليه
حط راسه ع كتف اماني و ضمها : متخلنيش نرقد اكثر من عشر دقائق
اماني حطت يدها على يده : ارقد شويه مش لازم تمشيلهم بدري حتى على الاربعه
محمد : مش غابيه فيه عمك كان ما قعدنش بيمسكها لنا قرنين قدلم ان هو دار كل شيء بروحه
نمشي نمد وجهي حداه و خلاص
اماني سكتت
و فوتت نص ساعه و وعاته ما هنش عليه توعيه بعد عشر دقائق لان رقد بعمق من التعب
..............................................
روح يوسف بعد الساعه اربعه للحوش بعد ما كان واقف قدام حوش عشق ..!
عشق من اول ما خشت لقت وتين مزالل راقده
خشت الصالون و صكرت عليهاا و قعدت تبكيي بعبرتهااا
مواقفهاا مع يوسف كلهنن مرنن قدام عيونها
من اول يوم ، يوم كانت تشحت ، لتقربه لهم ، ليوم طلعت زبيده اخته ، لبوم اعترفلها ان هو يبيها و ناويها بالحلال ، للخطوبه ، لزواج ، للاستقرار المؤقت ع الاقل
مواقفها معاه في مصرر
لما تمرض كيف يسهر عليها
لما تتعب شويه كيف يخليها تقمعز و هو يدير كل شيء
لما يتعاركوا الصبح كيف يجي الليل جنبها يقوللها انا متعارك مع لسانك الي يرزيك ربي فيه مش معاك كله
لقشوة كلامه توا !!
حيره كبيرهه عايشتها !!
يوسف شنو ؟ و من ؟ و شنو نواياه ؟؟
تعبت حتى من التفكير
عليش قال ما يملن عيونها الا فلوس ؟
انا شن عمري طلبت منه ؟
اين قناع الي سقط مني ؟
يوسف كان ديما يقولي نحب براءتك و عفويتك ؟ عليش قال انها مصطنعه توا ؟
عليش وصفني بالرخص في اكثر من مناسبه ؟
شن شاف مني ؟،
كيف قدر ينساني بسرعه هذي ؟ يحكي مه نور و كأنه عشره 10 سنين !!
حتى التفكير المفرط يقتل في بعض الاوقات ..!
..............................................
مر الوقتت و يوسف وح من نور
و مر يوم و يومين و ثلاثه و اسبوع و عشر ايام عشق هملت روحها بدرجه كبيره ما تاكلش ولا تاخذ في ادويتهاا
نقصت و و وجها ذبل ..!
و في بعض المراحل توصل للعجز و تحس بشلل في ايديها و كرعيها
و الي زايد متعبها ان كاتمتها في قلبها ..!
لا تحكي ولا تشكي لحد
ايمان مشغوله عند مراة خوها الي راميه و الناس خاشين طالعين عليهم
و واين ما تقدرش تحكيلها
و هيا الي واكلتها في روحها
نور و يوسف مشاكل من اول اسبوع
يومياً يوسف يبات قدام حوش عشق و وتين خايف ينقطع عليهم الضي او يصير اي حاجه و عشق تجيها حالتها و تخاف
الشيء الي مضايق نور هو عدم وواجد يوسف ف الحوش رغم انها ما تعرفش وين يقعد ولما تجي تناقشه ينهيها بِ
بالله فوتيني و يبدل ملابسه او يدةش و يطلع من الحوش مره اخرى
و قدام الناس نور تقول ان حياتها مريحه و مستقره مع يوسف
مالك كان أشر من عشق لان هو انحط في موقف و تلبسله و هو مظلوم و مش قادر لا يشوف ساره ولا يحكي معاه
هالك روحه بالدخان و خلاص و معاهاا مايحطش في حاجه في فمه ..!
احمد و اسيل مش هنحكي على ايامهم لان بدت روتينيه خلاص و معروفه ..!
اماني و محمد اظن انكم ملاحظين التحسن الي بدا في حياتهم ..!
..
لين اليوم الي كان صدمه للحمبع و نصيب الاسد خذاهه يوسف
لما كان في احدى الايام مصبي قدام حوشهم و شاف وتين طالعه تعيط و تبكي في الشارع تستنجد ب الجيران
عشق جوا طايحه ..!
نزل يوسف يجريي من السياره شور الحوش مسيب حتى وتين الي اول ما شافاته خشت وراهاا
خش و قعد يفتش بعيونه عشقققق عشققق
وتين تبكي و تشهق : في صالون في صالون يا يوسف عشقق ماتت يوسف عشق ماتت
خش يجري للصالون و اول ما شافها انصدم برغوه الي طالعه من فمها
كانت لابسه ملاية الصلاه و واضح انها كانت تصلي
يوسف قعد يبكي و يضحك : لالا ياربي لالا مستحيل
لالا يا وتين لالا قوليلي تبصر
عشق نوضيي عشق هياا الله يربحك
حط راسه في حضنها و قعد يبكي بعبرته : عشق نوضي ما تسيبنيش بالله عليك
لا ياربي ما تختبرش صبري فيها لالا
وتبن وراه و تبكي بعبرتها : ماتت هيا يا يوسف صح ؟؟ قولي هيا ماتت ؟ اختي ماتت ؟؟
حط وذنه يتحسس في نبضه واول ما سمع نبضها قريب طار : حيهه
خشوا وراهم عائشه و خيريه و ايمانن و الجيران الي سمعوا عياك وتين
ايمانن تبكي و تخبط على وجها : ينعللييي ينعلليي يا عشقق ينعليي قتلتها بغصتهاااا
ينعليي يا مامااا امس كنت نحكيي معاهاااا
انتت الي قتلتهاا يا حقيرر
يوسف شمرها بين يده و هو يرعش و تحاوزهم و طلع بيها يجريي
حاولت وتين تلحقهه لكن هو طلع يجري بعشق شور المستشفى
يوسف يشوفلها من المرايه و يباسم و دموعه تقول شيشمه : حبيبي انتِ هتعيشي باهي اصبري اصبري ع خاطري ع خاطرنا مزلنا نبوكك
هياا اوعيي بيش تنزلي المستشفى على كرعيك
عشق يا روحي هيااا !💔
هيا ما تقهرنيش فيك
هيا نوضي و اضربيني ختى الضربب
هيا علي صوتك علياا
هياا راضي بكل شيء اديريه بس ما تقهرنييش بيك
..
وصل يوسف للمستشفى و نزلهااا و قعد فم باب غرفة الطوارئ ماحش عزم يخشش دارولها صدمات كهربائيه و منهن وعت لان نبضهاا ضعفف بكلل !
كان بمعدل 39 نبضه في الدقيقه
و المعدل الطبيعي للأنسان البالغ 72 نبضه في دقيقه ..!
طلعت عشق للغرفه العاديه و بدوا الناس يتلقطوا واحد ورا واحد
جت وتين و الجيران و معاذ و محمد و علي و نوريه و زبيده و فاطمه و اماني
الي خلاص ظنوا انهم اللحظات الاخيره لعشق و كلهم كانوا بيشوفوها
خششوا عليها كلهم الا يوسف
الي كان مختفي و محمد و معاذ
كانوا يدوروا عليه
ولما قربوا من غرفه سمعوا صوت عياط و هرجه عاليه قدروا يميزوا ان هذا يوسف
و طلعوهه من الغرفه بيش يفهموا منه شن في ؟
و اول ما طلع معش قدروا رجليه يحملوه و طاح على الارض و هوا يبكي و يشهق بعبرته بطريقة نلفته خلت الي في المشتشفى كله يعزيه ..!
وحد الله يا خوي ..!
لا اله الا الله
عطوك طولة العمر ..!
البركه في راسك ..!
عظم الله اجرك ..!
ما تستغربوش لان منظر يوسف كان يقول اكثر حتى من موت ..!
و بعد فضوا محمد و معاذ الهرجه الي صارت و طلعوا بيوسف برا بيش يلقط نفسه و يقوللهم الدكتور شن قال ؟؟
قمعز يوسف على عتبة الشارع حط يده على شعره و قعد يبكي بطريقه مش اقل من الي كان حوا بس على الاقل كاتم صوته شويه
معاذ : يوسف الزح ما تشيطليش السكر شن في ؟ شن قالك ؟
يوسف بعبرته و بصوت مبحوح من البكاء : قالي روح بيهاا
نزل يده على عيونه و قعد يبكي
محمد : لا حول ولا قوة الا بالله ، تي عليش باهي شن فيها هياا ؟
معاذ بصدمه : كيف روح بيها حاجه كويسه ولا مش كويسه ؟
محمد شافلها بنظره تخوف بتاع صكر فمك ..!
طبس على يوسف و طبطب على كتفه : اهدالي انت بس
من امتى تعبر فيهم دكاتره الليبين ؟؟
يا ملي حالات نهوهم و لما طلعوا بيهم برا طلعت مشكلتهم ساهله
بكرا ان شاء الله نطلعوا بيها ف اسعاف لالمانيا ولا لأي مكان
يوسف قعد ساكت و يبكي حاط في روحه ذنب ..!
اكيد بسبب كلامي لها و موقفي قدامهاا
انا كنت نبيها تفكر ف كلامس و تكرهنيي حاولت ما نخليهش تفكر ان اليوم هنتجوز و اليوم عرسي اه و بيش نقهرها كيف ما قهرتني ببرودها
بس ماكنتش متوقع هتوصل لدرجه هذي
مكنتش حاط احتمال انها هتتعب
محمد : شفتها انتِ ؟
يوسف هز راسه بمعنى لا و مسح دموعه
محمد : عدي رطب معاها الجوو بيش ترضا عليك و تمشوا متسامحين
يوسف صبا و مسح دموعه
معاذ : هاك اشرب
يوسف شرب من الميه و غسل بيها وجهه و رماها لمعاذ
ركب لغرفة عشق دق دقتين و خش
و كان في عرم ناس بجانبها اغلبهم يهدرزوا مع بعضهم
و وتين و اماني و ايمان و زبيده فقط بجانبها
واول ما جت عينه عليعا كانت مقمعزه و حاسه بعجز في تحريك ايدها و كراعها
جت عينه في عينه و حولتهم على طول لان نور كانت متواجده مع امها سمية
جا و قمعز على ركبته تحت منها بزبط
عشق بنبرة منخفضه : صبي يوسف اطلع نور قاعده مش حلوه
حط راسه على ركبتها و قعد يبكي : سامحيني
عشق بصوت واطي : يوسف صبي
يوسف صبا و شافلها : سامحيني انا حمار و غبي و تافهه و حقير بس سامحيني بالله
مسكها من يدها و قعد يصبي فيها ولما صبت حضنها و قعد يبكي بعبرتهاا
هيا توا فعلا جنازه مؤجلا لاسبوعين قادمين على الاقل ..!
عشق لفت يده عليه و طبطب على ظهره : يوسف اهدى شويه كنك هكي انت كويسه انا شوف قاعده
ايمان : يوسف شن في قالولك حاجه مش كويسه
وتين قعدت تبكي : يوسف احكي عاد
يوسف : نقعد حمار كان سيبتك مره اخرى
عشق قعظت تشوف لنور الي قريب تاكلها بنظراتها و خافت
سحبت روحها من يوسف و قمعزت على سرير
يوسف : تعباانه في حاجه توجع فيكك تبي تاكليي
شربتيهاا ميه يا وتين؟؟
يوسف : ماشي نجييلك حاجه و جاي بيش نروح بيك دارولك خروج هما خلاص
عشق : ما تعبش روحك توا نروح مع خويله عائشه ولا خيريه
يوسف : هتروحي معاياا انت تعبانه تواا ..!
عشق بصوت واطي بالكاد يستطيع يوسف سماعه : يوسف نحكوا في للموصوع هذا بعدين بالله عليك انا تعبانه اصلا
يوسف : مش بجوكك هيااا !!
عشق : ولا بجوك
يوسف : ما صارليش خلاص من الحاحه الي نجيبها
طبس عليهاا و رفعهاا و طلع بيها للمامر
عشق : يوسف نزلني وانا هنمشي معاك وين ما تبي تم
يوسف ضحك و شافلها : لا تتعبي هكي
عشق غطت وحها بيدها بخجل : نكرهك
يوسف : وانا و رحمة عصام نموت على خاطرك
نزلها في سيارة و مشى من جيهته
محمد : شنو مروح بيها ؟
يوسف : اهاا مروح علاء قالي في دكتور كويس حجزلي عنده ع اساس بكرا
محمد : و الطياره نظمت امورك بيش تطلع اسعاف ؟
يوسف : حكيت مع مدير المستشفى و قالي تهنى عليه الموضوع لكن طياراة تطلع بكرا في الليل
محمد : باهي يستر اللله و خلاص
يوسف شاف لمعاذ : وتين خليتها فوق راه روح بيها عندنا
و حتى نور قاعده شوفوا وين تحطوها
محمد : دير عملتك و خلبنا نحنا الي حاصلين ؟
معاذ : بس متحيش اطلقها من اول عشر ايام ..!
محمد تحشم من سؤاله لخوه و تردد واجد بس قاله : لمستها ؟
يوسف شاف لعشق الي كانت قالبها وجها و تشوف للجيهه الاخرى المقابله لهم قال بتنهيده : اها
معاذ : حلاوهه
محمد : مروح للحوش ؟
يوسف : بنشوفها و بعدها ساهل
محمد : تمام خلاص بيناتنا الو
يوسف اشرله وركب سيارته و طلع من المستشفى : وين نمشوا ؟
عشق : لحوشنا طبعاً
يوسف فرح : تمام
عشق : مش حوشك يا يوسف حوشنا نحنا
يوسف : هنقعد معاك سواء هنا ولا هنا
عشق : لا
يوسف : شن الي لا ؟
عشق : معش نبيك انااا ..!
مش كان حضنتك و هكي معناها سامحتك !!
لا انا بس ماحبيتش حد يشوف كسرتك ولا دمعتك ولا ضعفك
عشان هكي فقطط و الشيء هذا كان قدامم ناسس فقط توا روح بيا لاني تعباته بجد
يوسف : لانك تعبانه مش هنقدر نروح بيك و ضروري ما نكون معاك
عشق : وانا مش في حاجتك
يوسف : نروح بيك لحوش هلك ولا حوشك
عشق : حوشي لاني مزلت عند قراري يا يوسف مازلت نبي الطلاق ..
يوسف : لازم نحكوا في موضوع مهم وين هتتريحي و حطي في بالك هنكون معاك في المكانين
عشق تنهدت : لحوش هلي
يوسف : براحتك
روح بيها لحوش هلها واول ما خشت حولت
ملاية الصلاه الي كانت عليها
للبسه تحت منها تيشرت نص كم قبل ركبتهغ بشويه واسعه لونها سماوي و استريتش ابيض و شخشير قصير الي كانت لابسته بيش تغطي كرعيها و تصلي بيه
قمعزت ع صالون مابتش تشوفله
جا و حط راسه في كترها و مسك يدها يحب فيها بشويه و يبكي
بينحرمم من حنيتها و كلامها و ضحكتها حتى شوفتهااااا الي بالبعاد كان مستغلها توا معش يقدر هيا خلاص موتها بداا شيء لا هروب منه و السفره كلها محاوله ..!
يوسف بنبرة مبحوحه : انا والله نحبك
سكت شويه و قال
اها صح تجوزت و خليتك
لكن والله كلا على خاطر نقهركك لكن قهرتت روحي والله
اخترت نور لان عارفك اكتر وحده تغاري منه واول ما تسمعي بهالخبر هتتقهري زي ما حسيت
كان خاطري نردها لك بنفس الوجع
لكن انا قهرت روحي
ماشي بلا هدف 18 يوم مشعارف كيف عشتهن
كنت نصبي قدام الحوش خايف عليك خايف ينقطع الضي خايف يخش حد عليكم
خايف تكوني محتاجه لحاجه
وقت شفتك كنت قربب نطير و بينت عكس هكي
لان كان عرسي كنت نعتقد لو حكيت معاك ب الاسلوب هذا هتكرهيني و مش هتفكري في عرسي
لكن كله رد عليك بسلب و كلامي اذاك واجد
عشق سكتت و مسحت دموعهاةو قعدت على هالحال لفتره طويله قبل لا تقوله حول يا يوسف
يوسف : العبيلي بشعري خليني نحكيلك على الي فات !
انا هننحرم من كل شيء !💔
..
تعبت في بعدي عنك
كان ناقصني حاجات كتير
و حاسس برضوا بيك و عارف انك مش بخير
عشان فاهمك و عارفك
و كمان حبيبتي شايفك بتحني لكل ذكرهه حلوهه جنبك عشتها
وانا زيك برضوا و اكثر
اوقات اسرح و افكر
انا و انت بعدنا ليه ؟
مالقيتش اجابه جيتلك .
مانا يمكن لو حكيتلك !
تقوليلي كسبنا ايه ؟
محدش فينا عارف لسه بكرا مخبي ايه ؟
لكن كل الي فاتك يمكن احكيلك عليه !
اصعب ايام في عمري ما اقدرش اوصفها عمري .
و اكيد حاسيتي بيا و عشتي ايام زيها !
وانا زيك برضوا و اكثر
اوقات اسرح و افكر
انا و انت بعدنا ليه ؟
مالقيتش اجابه جيتلك .
مانا يمكن لو حكيتلك !
تقوليلي كسبنا ايه ؟
..
حكاله يوسف على ان خالتها خطيره دون ما ينهيلها امرها زي ما نهاله الدكتور حط بصيص امل
ع خاطر نفسيتهاا و بيش تسافر و هيا حاطه ولو 1% قدامها انها هترد بكامل صحتها
سكتت عشق لقتره طويله و قالت : مانبيش
يوسف ضحك بصدمه : شنو هو الي ما تبيش ؟
عشق : نسافر ، منبيش نسافر
مفيش حد يموت ناقص عمر
خليني هنا في يلادي و بين ناسي و وقت تحي ساعتي بنموت بنموت
يوسف : تي عندنا فرصه نحاولواا عليش بترفضيهااا عليش بترمي روحك للموت بسهوله ؟
عشق : احسن هيا نتمناها الموت والله وتين تستقر و تتزوج و انا نمشي لربي و نتريح
يوسف : وانا من ليا ؟
عشق : الي اخترتها
يوسف : اجبرتيني
عشق : عذر اقبح من ذنب ..!
يوسف : باهي ع خاطر الي بينا حاولي بس و خلينا نجربوا
مش متقبله فكرة نعيش بدونك
حط راسه على كتفها و قعد يبكي زي العيل : ردي عليا ما تقعديش ساكته
...
مش ناسي كلامك في وداعنا
ولا قسوة قلبك و عينيك
كنت بقولك خليك جنبي
ما تهزتش و هنت عليك
بقى مش عارف ايه غيرني
يا برئ يا حنين يا ملاك
هبعد علشان بتفكرني
بالجرح الي انا عشته معاك
ردي عليك مبقاش هيفيدك
ضعت و ضيعتني من ايدك
يا خساره بتيجي الحاحه
لما الواحد ما يعوزهااش
راجع بتقولي الي ما بينا
و بتسأل ليه ما كملناش
اسأل روحك مين استنى
و مين استغنى و باع ببلاش
..
صباح تاني يوم
وعى يوسف من كثر التفكير و الخوف
لقاها مزال حتى على الفجر
كانت عشق متمدده جنبه
قرب منها و حط يدها على وجها :
الا هذي يا ربي عاقبني بكل شيء و اختبر صبري في كل شيء الا هذي
يارب احفظها ليا يارب اشفيها و عافيها
يارب انا بدونها هنقعد مشلول ومش هنمشي قدام
هذي عيوني الي نشوف بيها
روحي الي مافيش اغلى منها
سمع يوسف اذان الفجر و صبا صلى
و بكاء من كل خاطرهه خوفه على عشق و فقد الامل منها بدا يتزايد
دعاء ربي ان السفره يصير منها و ان عشق تتعالج و تبقاله
كان اول مره يبكي بالطريقه هذي في صلاة بعبرته يبكي و مش قادر يقرا حتى ايات السور استصعب في نطقهن
لم الصلاية
و جا تمدد جنبها رفعلها راسها و حطه في حضنه و قعد يلعب بشعرها
فتحت عيونها و شافتله
يوسف : وعيتك ؟
عشق شافت لدموعه و تأففت : كنك هكي انتَ انا الي مريضه مش انت ؟
يوسف : وانا الي هنموت
عشق : مفيش حاجه اسمها هتموت عندك عيله ام و بات و اخت و خوت و زوجه عندك كل شيء ..!
يوسف : انا نبيكك و مستغني عن كل شيء
عشق : الراجل ما يبكيش
يوسف : يبكي لما الامر يتعلق بشيء عزيز عليه
الفجر اذن هيا صبي صلي
عشق : باه
صبت عشق من جنبه توضت و صلت و هو مقمعز جنبها يرجا فيها تكمل
عشق طلقت السلام و شافتله : يوسف مش لدرجه هذي ..!
خلاص تم بيجي صبح بتروح انا مش ماشيه وانت شوف حياتك
يوسف : متقعديش قاسيه هكي
عشق : تعلمت منك شويه دامك سيبتني في اكثر وقت كنت محتاجتلك فيه
معش في حاجتك انا توا
يوسف : سامحيني
عشق : الله يسامحك لكن مانبيش نمشي انا
يوسف : غصب عنك
عشق : مفيش شيء اسمه غصب عني ..!
..
8.00 ص
عشق ،: اووكيي اووكي والله نمشيي لكن نزلني
يوسف : حلفتي
عشق : نمشي بكرامتي وانا لابسه خير ما نمشي ملفوفه في انسوله
يوسف خمس دقائق و تطلعي
عشق : اسكتت
خشت عشق للدار
لبست استريتش ابيض و فوق منه قفطان لونه سماوي و كاويش ابيض و محرمه بيضه
و طلعتله
يوسف : هو دكتور هيناسبك يعني ؟
عشق : تبي تطلع ولا والله نخش ؟
يوسف : اطلعي
طلعت عشق و قعدت ساكته المشاور كله و في هالوقت يوسف يكلم في علاء يسأل فيه الدمتور ماسك ف اي مستشفى
قال خش لمستشفى الفلانيه و قول انا فلان الفلاني
و هيخشكك
و فعلا خش يوسف للمستشفى عرف على نفسه و خشوهه على الدكتور على طول الي كان معاطي بظهره و اول ما قال يوسف السلام عليكم
رد السلام و التفت عليهم
و هنا كانت صدمة عشق الي مسكت في يد يوسف بالقوهه و قعدت تشوف تحاول تستوعب ..!
.. يتبع ..
اسفه جدا على التأخير بجدياتت
المهم لان الحلقه طويله واجد و عارفتكم مش هتقروها تجاوزت ال 8000 كلمه ف قسمتها جزئين ..!
و عذراً لاني مانزلتهش في الموعد الي وعدتكم فيه بس الحق النت كمل و معش عرفت كيف انزلها
المهم الجزء الثاني هينزل اول ما نحصل نت