#الحب_الاول_ولاخير
الجزء التاسع والعاشر//
الجزء التاسع///
هدى// يعني شنو؟
محمد// انسي الي سمعتيه ، عصبي ومينأخذ بكلامه
هدى الف كلمة والف فكره والف لقطه صارت ببالها وگامت تضحك ، تضحك بشكل هستيري ؛ محمد على الخط ومنصدم ، واستمرت تضحك بصوت عالي بحيث امها سمعت ضحكها وارتاحت شويه عبالها دتسولف ويه لمى ولانا بالتلفون بالگروب .
محمد// هدى اهدئي
هدى// وهي مستمره تضحك اييي مو شايفني داملخ بشعري ههههههههههههههاي
محمد// هدى
هدى// بس جانت هااااااي عايزه ( وتضحك بشكل جنوني)
محمد// لخاطري .... مخلته يكمل
هدى// بس بقى ابوك وتضحك
محمد سكت ومجاوبها ...
هدى// جنت حاسه بس اكذب نفسي ( بدت تبجي بصوت عالي)
هدى صارت تبجي بحرگه وعايط وبصوت عالي
هدى// وانييي اگووووول ليش
وهي تتذكر مواقف ابو محمد وياها ، امها سمعت صوت بجيها وعياطها وگمزت من الفراش وراحت ركض لغرفتها .. فتحت الباب وشافت هدى لازمه التلفون وتبجي بحرگه وتعيط ..
محمد// اگولج لخاطري اهدي
ام هدى// سلام قول من رب رحيم شبيج ؟؟
هدى// زين ليش مگلتلي قبل؟؟ ليش مگلتلونا وباوعت على امها ..
امها واگفه ومدتفتهم شي
ام هدى// ويامن تحجين جاوبيني
هدى// ماما جنتي تعرفين انتي همين ومگلتيلي موو ؟؟ لووووح انيييي؟؟ نعاااال اني محد يگولي؟؟
ام هدى// شنو نگولج غير افتهم؟؟
محمد// امج مالها ذنب هدى اهدي
هدى// كلكم الكم ذنب .. كلكم حالياً مذنبين گدامي وكلكم شاركتوا بالي ديصير بيه ، انت وهي( وتأشر على امها ومستمره تعيط وتبجي) وامك وابوك ورواااااان ، كلكم اجرمتوا بحقي وكلللللللكم اكرهكم .
ام هدى جرت التلفون من ايدها :
ام هدى// احجيلي انت الي صار لان راح اتخبل
محمد// خاله مصار شي والله ، ابويه بساعة عصبيه وتدرين بيه من يعصب مناخذ بكلامه
ام هدى// احجيييي شگال وخبل بنتي
هدى// گال عمره ميريدني ولا يريد يشوفني
ام هدى// شنووو ؟؟ محمد هيج گال؟؟
محمد واگف بنص الغرفه وبدأ يحس انو الامور صارت اكبر ..
محمد// خالة ساعة عصبيه مايعنيها شبيج انتي
ام هدى // دروووووووح .. ساعة عصبيه يحترم نفسه ويعرف بنات الناس مو لعبه وحسب مزاجه سمعت
وسدت التلفون بوجه محمد ..
ام هدى // مجنت اعرف والله بنتي
هدى // مستمره تكذبين موو مستمره حالج حال محمد وصبيحة .. انتي امي لج انتي امي شبيج ..
ام هدى// والقرآن مجنت اعرف وروح ابوج مجنت اعرف..
هدى// گوووليلي ليش هيج ديصير بيه اني بالذات ليييييييش .. لييششششش من عرفت احب وحبيته وتعلقت بيه لييييييش .. لييييش من عيوني صارت متشوف غيره .. جاوبيييني انتي لو همين متعرفين ؟
ام هدى اخذتها بحضنها وبدت تبجي وياها .
ام هدى// اني طلبت منه اصلاً اليوم الصبح انو تنفصلون وكلمن يروح بدربه .
هدى// شنوووووووو شنووووووو وگمزت من حضنها ودفعتها . انتي شلون تقررين هيج قرار بدون مترجعيلي او تسأليني ؟ حياتج لو حياتي يخصني الييييييي هذا الموضوع .شبيييييكم اني زماااال هنا لو نعاااال وين ميعجبكم تحطوني وتشيلوني وترگعوني
ام هدى// لمّا الموضوع يكون بدا يأذيج ويأذيني وحياتج الشخصيه تصير تإثر عليه وعليج وعلى حتى اخوتج واشوفج يومية واگعه وتموتين الف موته باليوم الواحد ، هنا لازم اتدخل واخذ قرار احميج بيه اني امج وغصباً ماعليج .. ماكو ام تشوف بنتها بدت تذبل وتموت ودمعتها ولگمتها سوه وتظل ساكته.
هدى// ليش لعد بالبداية شجعتيني وظليتي تمدحين بيه انتي وصبيحه وگومتوني وگعدتوني محمد رايدج محمد يحبج محمد ومحمد ؟ هاي جنتي انتي لو خيالج ؟
ام هدى // جنت اني نعم .. بس مجنت ادري بروان ولا ادري بأبوه مثل مهسه سمعت ..
هدى// بس تأخرتي امي تأخرتي لان هسه اني احبه حييييييل واموت بدونه امي والله العظيم امووووت
ام هدى( نزلت دموعها) : الحياة ياامي مرات تتطلب تاخذين قرار تطلعين بيه بأقل الخسائر
هدى// اني اذا اتركه راح اخسر حياتي ماما
امها حضنتها حيييل وتلوليلها مثل الطفل
ام هدى// تمام .. فكري زين امي .. صيري زينه وفكري بكلامي وقرارج شنو راح يكون اني وياج للاخير بس تذكري شغله وحده بس اني مااكره محمد بالعكس احبه مثلج اني ربيته بس كرامتج وصحتج عندي فوگ الكل .. وظلت حاضنتها وهدى تبجي وامها تهز بيها مثل الطفل لماتعبت ونامت بحضن امها ..
الفجر گعدتها امها وجبرتها تاكل شيف تفاحه وانطتها الدوا ومعافتها وحدها بقتها نايمه بحضنها للصبح ..
&&&&&&&&&&&&&&&&&&&&&&&&&&&&&
محمد انهار واموره كله تخربطت بعد ماسدت ام هدى التلفون بوجهه .. لبس ملابسه واخذ سويج سيارته وطلع للمستشفى . مراد يبقى بالبيت دقيقه وحده بعد الي صار . هو مو انقهر لان هدى سمعت كلام ابوه لان جان متوقع بأي وقت يصير هذا الي صار بس انمرد وتحطم لان هدى سمعته وهي بحالتها هاي .. مريضه ومحروگه ومتشوهه وبسببهم ومن وراهم جان الالم الي هي بيه يكفي وزايد .
وصل المستشفى وهو ميدري شلون وصل مرتين راد يسوي حادث بالسيارة .. فات غرفة الدكاتره وشاف سعيد ويوسف گاعدين ولازمين التلفونات مالتهم .
تفاجئوا من شافوه جاي بهيج ساعة ⏰ جانت تقريباً بالوحده ونص بالليل ..
سعيد// محمد شصاير
محمد// بالقنادر صارت .
يوسف// خرررب شرفه واتفل بوجهه الي يگولي منكم تزوج..
سعيد// انجب هسه خلي نفتهم.
محمد يغير ملابسه ويلبس ملابس المستشفى والصدريه وبغير دنيا ولا حتى سمع يوسف شنو گال ..
سعيد// محمد كمل وخلي ننزل نشرب گهوه وندخن جكاره ونسولف..
محمد// يلا لان راسي راح ينفجر
نزلوا واخذوا الگهوه وانطاه سعيد جگاره وحجاله من راح لروان وره مطلع من المستشفى
سعيد// انت شلون هيج تتصرف؟ تخبلت ؟؟ شلون تمد ايدك على بنية
محمد// لمّا تكون هاي البنيه غضب ومحسوبه عليك ومن اهليتك وتربت ببيت مابيه رجال يشكمها ويعلمها شنو هي حدود وقوانين الحياة ، فلازم تمد ايدك ورجلك همين وتخليها بحلگها حتى تعرف الله حق ..
سعيد// ايدها انكسرت انكسرت لو انلوت
محمد// كسرتها ..
سعيد // كمل شصار بعدين ؟
ورجع محمد يحجيله ومحسوا الا لمّا اجاهم مس كول من يوسف .. يعني جتي حالات اسعاف ولازم يرجعون
@@@@@@@@@@@@@@@@@@@@@@@
الوقت هسه ساعة ١١ الصبح من يوم السبت ثاني يوم بعد الملحمة الي صارت ببيت محمد وببيت هدى
هدى بعدها نايمه لأن الليل كله كل شويه تفز ، وامها همين ماتركتها ولا لحظه الى ان صار الصبح .
اندگ الجرس ومن فتحت ام هدى الباب وشافت منو اجى ، نزل على گلبها مي بارد :
لمى ولانا// صباااح الخيييير (ضحكتهم الحلوه)
ام هدى// فدووووة وفدووووات اجيتوا والله جابكم
حضنوها وبوسوها وسألوها شلون صارت هدى وحجتلهم كل الي صار يم ميري والي صار بالليل وهنه بصدمة وصاروا بس يريدون يشوفون هدى..
ام هدى // بنات اروحلكم فدوه لا تعوفوها وحدها دائماً شغلوها ..
لمى// مستحيل نعوفها بس انتي تدرين صادفت الحادثه ويه الدوام ومنا هي جانت بغير عالم ونايمه ووراها اخذتوها للحرگ واحنا ها اهااا اليوم اول سبت اجيناها ركض .
ام هدى// اني مو قصدي انتوا ممقصرات لا والله قصدي على منا وجاي .
لانا// خالة هدى تحتاج محمد هاي الفتره اكثر من عدنا ويمكن افضل همين لان هي متعلقة بيه هوايه.
ام هدى// واني اريد يخف هذا التعلق واريد تلتفت لحياتها منا وجاي لانا بنتي .. يكفي الي صار بيها من وراه ومن وره اهله..
لانا// بس خاله.. (وگرصتها بسكوت لمى )
لمى// يصير خير خاله وان شاء الله كل شي يتصلح ، يلاا گوومي لانا خلي نصعد نكعدها وننزلها تاكل ..
ام هدى// فدوة للعاقله (وباستها )
لانا // واني؟🥺
ام هدى// تعالي ابوسج انتي همين احلى البنات .
لانا// بس مو عاقله😂😂
وجرتها لمى وصعدوا وفتحوا باب الغرفه وشافوها انصدموا 😳 وحده تباوع على اللخ وحلگهن مفتوح ، شافوا شبح اسمه هدى ويتشاورون ووحده تگول للثانيه معقووووله لااااا لااا مو معقوله .
هدى جانت نايمه بالفراش عباره عن بس هدوم ، وزنها نازل خلال اسبوع ٥ -٧ كيلو ، صفره ، شاحبه ، اجفانها وارمه وجوه عينها وارم ، جف وحده من ايديها ازرك على بنفسجي ، شفتها متشككه وباهته بلا لون.. لمى دمعت عينها عليها ولانا تشاورها اياااااج تبجين اياااااااج لان مراح اتحمل وابجي اني همين
هدى حست على حركتهم وصوتهم بالغرفه وگعدت فتحت عينها ولمّا شافتهم ابتسمت ومدت ايديها الاثنين الهم ورأساً راحوا عليها حضنوها اثنينهم .
بدت سوالفهم وشقاهم وهدى منطقت ولا كلمه بس تباوع عليهم . وقرروا بدون مياخذون رأيها انو لازم يسبحوها و يرتبون شعرها ويمكيجوها
وهدى اعترضت لان الحرگ والضماد اضافة الى نفسيتها التعبانه وگالولها معليج احنا نتصرف .
ونزلت لانا تركض طلبت من ام هدى نايلون جبير او حتى لو الي ينفرش على الميز النايلون الي استعمال مره وحدة وانطتها ام هدى رول جديد جان عدها بالدولاب وطلبت لانا من ام هدى تسوي اطيب ريوگ الهم وصعدت تركض مره لخ ، ودخلوا هدى الحمام وهمه لبسوا بجايم من هدى ونزعوها ملابسها ولفوا النايلون على الضماد وداير مداير بطنها وهدى تضحك وتصيح نيلنوني 😁 وبدوا اول شي غسلوا شعرها وبعدين سبحوها ولبسوها البرنص وطلعوها من الحمام ولانا تهلهل ولمى تغني ياااخاارجه من باب الحمام وكل خد عليه خوخه ولانا ترد خوخه خوخه 🍑..
دخلوا الغرفه وطلعولها بجامه شورت قصير جداً والبدي مالتها تعلاگه ومرسوم دب على الصدر وجبروها تلبسها وگعدوها على الكرسي وجابوا جهاز الليس وقرروا يسرحون شعرها من باب التغيير
هدى// لا مااسرحه لان راح اطلع وجه الـط......
لمى// انجبي هو وجهج طامس بكفشه شعرج وصاير بگد الفلس ومامبين بيه شي انتي انتظري النتائج ومعليج .
لانا// المكياج هل المره اني احطلج واشگ حلكج اذا تفتحيه ..
هدى// شلون مراح اشوف راح اخلي راسي بالمغسله وارجع كل شي بمكانه.
وهمه يسولها شعرها بدت السوالف وانفتح الموضوع لانا حجتلهم الي سمعته من سعيد وشلون محمد كسر ايد روان وشلون رجع كسر البيت والغرفه وهدى مصدومه وتصيح هذا مو محمد جذب ميسوي هيج وخلال السوالف دگ عليها محمد مرتين وتعوفه يدگ ومتجاوبه. ويطلبون منها ترد وهي تگوللهم لا كذب عليه وضم عليه ويسألوها شنو الموضوع ( حتى ميبين امها حجتلهم) وتگوللهم كملوا اريد اعرف كل شي وبعدين احجيلكم واستمرت لانا تحجي وكانت لمى خلصت شعر هدى وبدت لانا تحط ميك اب لهدى ورسمت عيونها بالاي لاينر وخلتلها شدو خفيف وحطتلها خافي عيوب تحت عينها و..... الخ ومستمرات يسولفون ومحمد كل نص ساعة يدگ ومتجاوب وبعدين هدى حجتلهم الي صار وشلون سمعت ابوه شنو گال وراساً لانا من سمعت وگفت تحطلها ميك اب وجمدت بمكانها الى ان دغتها لمى.. ووصلت هدى لموضوع امها وشلون طالبه من محمد ينفصلون وهنا تدخلت لانا وگالت ندري ولو فايته الگروب جان شفتي شلون گلبنا الدنيا نريد نگولج ونحجي وياج وانتي ماكو ..
لمى// اسمعيني هدوشه اول شي اذا نحجي بالحق فمااعتقد انو محمد غلط من ضم عليج رأي ابوه لان انتي مو بحاله صحيه تمام حتى يگولج واذا على امج همين تره من حقها ، صح جان مفروض تحجي وياج اول قبل متحجي وياه بس اني من رإيي حقها..
لانا// واني من رأيي انو هي غلطت فتحت الموضوع اصلاً وانتوا بهيج وضعيه وجان مفروض تنتظر تگومين بالسلامه . ( انكفخت لانا من لمى)
لمى// محد گال انو الوقت جان صحيح لكن تبقى أم وقلب الأم ميصبر وميعرف توقيت
هدى// اني حالياً اكو دوامه بداخلي بين عقلي وگلبي شلون اگدر الغي عقلي واختار گلبي او العكس .
لمى// هدى ... كلنا شفناج شلون تغيرتي من بديتي تحبين محمد بس سؤال مهم لازم تسألين نفسج راح تگدرين تستمرين بدون ميأثر هذا على محمد وعلاقته بأبوه ولاتنسين هو بطور اخذ البورد يعني مستقبله
هدى// هو جان متحملني لما اخذت الماستر والفتره الي قبلها كلها اني جنت هاملته ومعتبرته شي تحصيل حاصل مو اساسي . ورغم هذا صبر وتحملني.
لانا مستمره تحطلها ميك اب// لان يعبدج مو بس يحبج ..
لمى// وانتي همين صبرتي وتحملتي روان وسوالفها وحتى اخرتها هذا الحرك والالم الي انتي بيه يفوووووق الي هو تحمله وصبره فماكو داعي تحسين انو هو مسوي شي عظيم او لازم تتحملين بعد حتى تتساوون .
هدى// احنا هنا مو عدنا مقارنه بين الي هو سواه والي اني سويته . احنا هنا لازم نفكر راح نگدر نستمر رغم عدم موافقة ابوه واني راح اگدر اتحمل سوالف روان وغيرها . وشمدريني اذا راحت روان مراح تجي روان ثانية بدالها .
لانا// روان ثانية بدالها؟ شنو قصدج ؟
هدى // الرجل عمره ٣١ سنه طبيب 🥼 وسيم جذاب عائله وحسب ونسب المحيط مال شغله مليان بنات مثل روان ..
لمى// بس هو يحب وحده بس هي هدى ولاتنسين المحيط الي انتي تشتغلين بيه ومؤهلاتج همين يتمناها الف شاب.
هدى // بس هدى بدت تتعب وهمه بأول الطريق
لانا// هذا يصيحوه عدم ثقه بنفسج حبيبتي
هدى// وماما ؟؟؟؟ نسيتوها ؟؟ وللعلم مو عدم ثقه لانا بس اي حرب من هيج يرادلها اسلحة واني ماعندي غير سلاح الحب وهذا نوبات ميكفي وخصوصاً اذا الجبهة الثانية سلاحه اقوى .
لمى// تقصدين ابوه.. كلامج صح
هدى// اخاف خلال هاي الحرب اخسر امي
لانا// الله لايگولها شهل الحجي
هدى// امي شفت وجهها البارحه . حيل متأذيه واخاف اخسرها بنات هي عندي اهم من كل شي حتى اهم من حبي لمحمد .
لانا گعدت على السرير بعد ماخلصت بس الموضوع مخلى ولا وحده بيهم تنتبه على شكل هدى شلون صار ..
لمى// اني ادري انتي هسه افكارج متخربطه بس عوفي الموضوع وخلي نشوف الايام شراح تبين
هدى// تدرون هسه انتوا شنو سويتوا من جيتوا يمي وحجيت وياكم ؟؟.. تدرون هسه اذا اجى محمد مستحيل راح اگدر اعصب عليه او اخذ موقف منه!!
لانا// ندري ندري احم احم احنا الثلاثه سكر نباته 😂
اندارت هدى على لمى حتى تاخذ منها جهاز الليس ولمى انصدمت ..
لمى// لج هاااااااي شطلعتي😳😍
لانا // ياااااا خرررب ولا انتبهت اني 😳😍
هدى // شكوووووو ؟ وراحت على المرايا
هدى// هاااي اني!!!؟؟؟؟
لمى// لج ايييييي😂
جانت طالعة شي فوگ الوصف ، العيون الكبار العسلي ومجروره ومبينه اكبر والشدو الي على خضار وخفيف وضارب على لون عيونها والماسكاره خلت رموشها تبين وتنطي عيونها جمال اكثر وخشمها الي كأنه مرسوم وشفايفها الي بينت متروسه اكثر وشعرها الابرش الي نازل سرح على وجهها وعلى جتفها وزنودها وبياضها الشفاف ..
لانا// الف مليون ترليون مره اگولج حطي ميك اب مثل الاوادم ومتسمعين كلام .. يلاا هذا الميك اب اوڤر عليج الله لمى ؟؟
هدى// ارسلي حلم او دريم على رقم الهاتف حتى تفوزين بموافقتي على الميك اب😂😂😂😂
لمى // لا والله اصلاً جداً مبين بسيط بس هي حلوه ولو تخلي بس لمسات خفيفه حتى بس تبرز جمالها .
هدى // اشو من شفت نفسي هيج بالمرايه جعت🙄😂
لمى ولانا// ههههههههههههههه
لانا // عبالي راح تگولين اريد محمد🙃
هدى // ومنو گلج مااريده🥺 تدرون صرت اخاف منه من يعصب بعد الي حجيتوه🤭
لمى// والله اذا شافج هسه بهل الشكل مستحيل يعصب منا لسنه😂 يلا خلي ننزل امج هسه كاعده تاكل بروحها ..
هدى// يلا.
نزلوا جوه وهدى بالگوه نزلت ، بكل درجه تصيح الـ آاااه.
اول مدخلوا المطبخ امها شافتها وصلت على النبي وگامت تقرا المعوذات . ولانا ولمى يضحكون
ام هدى// لج لعابه طلعتي .. اللهم صل على النبي شگد لا گلج شعرج هيج يمه فدوه اروح للبنات عشره واگول گليلات
هدى// يعني من رأيج اظل اسرحه ؟
ام هدى // هيج وهيج اسبوع هيج واسبوع هيج بس كل يوم خلي هيج مكياج
لانا// يحيى العدل 😂😂😂 لمى شفتي يعني انتي مره بالاسبوع واني يوميه💃😂
هدى اول مره تاكل بشهيه من فتره طويله وضحكتها وتحشيشها ويه البنات ماوگف وعيونها رجعت تلمع ..
@@@@@@@@@@@@@@@@@@@@@@@
محمد كان عكس هدى متحطم واعصابه تعبانه وكل نص ساعة يخابرها ومترد وميتجرأ يتصل على امها بعد الي صار البارحه. خلى سعيد يتصل بلانا وطلب منه انو يخلي لانا تتصل بهدى او امها وتسأل ، لكن لانا من اتصل مگدرت تجاوبه لان جانوا كاعدين ياكلون وام هدى موجوده وانطت رفض للمكالمه راساً وكتبت مسج اله ( الارض ملغومه ) . وهاي صيغه بيناتهم معناها اكو احد يمها ومتگدر تحجي .
محمد بين المرضى وبين التلفون وبين الفحص واعصابه حيل تعبانه وباله مشغول . اخير شي قرر يتصل بأمه ويطلب منها تخابر ام هدى وتسأل .
ام محمد مكذبت خبر وراساً اتصلت بأم هدى وسلمت وبحجة انو تعتذر منها لان البارحه مكدرت تجي هي ومها مثل مگالت لان صارتلها شغله مو على البال.. وسمعت صوت البنات وضحكهم وسألت ام هدى منو يمهم وام هدى گلتلها صديقات هدى الله جابهم .. وام محمد گالتلها راح تجي ويه محمد المغرب حتى تروح وياهم لميري وام هدى گلتلها بعد احسن وهي اصلاً تريدها تجي ويه محمد ( لغرض في نفس يعقوب) وسدت التلفون ..
ام محمد اتصلت بأبنها وحجتله الي صار وارتاح لما امه گالتله سمعت ضحكهم وشقاهم ونفسيتها زينه كأنو مي بارد انطش على صدره .. وحس بأرتياح اكثر لما امه گلتله انو اتفقت ويه ام هدى يرحون سوه لميري .
وصل محمد وامه بيت هدى بحدود ال٦ العصر وكانوا البنات مصارلهم ساعة 🕰 من طالعين بعد مااتفقت لانا بمسج ويه سعيد انو يجي ياخذهم ويوصلهم وفرصة حتى يتشاوفون.
دخلوا بيت هدى بعد ما امها فتحتلهم الباب وكان وجه ام هدى جداً ثقيل على محمد . وهدى جانت كاعده بالهول ولازمه التلفون بيدها تگلب بالانستا ودخلت ام محمد اول شي وشافت هدى وصلت على النبي بعلو صوتها وحضنت هدى..
محمد ماافتهم ليش امه صلت على النبي بصوت عالي لان ام هدى وبصفها واكفه ام محمد ومغطين هدى مثل السياج ومشافها.
وخرت امه وهو بعده واگف وشاف هدى وشكلها وبجامتها وشعرها واندهش😳
نسى حتى يسلم على هدى او يسألها شلونج وتبسمر بمكانه وتك حاجبه انرفع وشافته هدى وضمت الضحكه مالتها بالگوه واستمرت وجهها ثگيل عليه وهي من جوه غيييير .. تقرب منها :
محمد// شنوو انتي!!!!!
$$$$$$$$$$$$$$$$$$$$$$$$$$$$$$$$
نهاية الجزء التاسع///
الجزء العاشر///
هدى// هلو محمد ( وجه ثكيل) وكل شويه تحط شعرها وره اذنها ويرجع يوگع على وجهها
رفعت عينها وباوعت بعينه وهمين قراها
كانت عيونها خجل وعتاب وحزن 🥺
ام محمد// تعالي خلوده اريدج بموضوع واخذتها وراحت للحديقه على المرجوحه .
وبقوا محمد وهدى لوحدهم بالهول
محمد// شربتي الادويه؟
هدى// اكيد مو صغيره اني .. تشرب جاي لو گهوه
محمد// لا هذا ولا هذا
هدى// عصير ببسي؟
محمد// مااريد شي بس .. ومد ايده على خدها وهو عبالك خدران ويگص بيها من فوگ لجوه
هدى// (وخرت من گدامه) تمام لعد اصعد ابدل ملابسي حتى نروح ..
محمدجرها من ايدها ورجعها گباله // مو هسه .. بعدين
هدى باوعت بعيونه وهو تقرب منها وجرها عليه
محمد// انتي شطالعه اليوم ؟ هذا عقابي ؟؟ تريديني اموت هسه بين ايدج ..
هدى// اسم الله وايدها على صدره تدفع بيه ..
محمد// شعرج وجهج شكلج عيونج
هدى// البنات هيج سووا ...تغيير مود مو اكثر
محمد// شعرج هيج احلى
هدى// تمام لعد بعد مراح اسويه هيج اول واخر مره ..
محمد// اييي دخليج لان مااريد يوميه اكتل واحد من وراج ..
هدى// ممكن تعوفني اصعد ابدل
محمد حس تريد تبعده .. نزل ايديه ووخر عنها .. وهي مشت تطلع من الهول
محمد// هدى..
وگفت واندارت عليه:
محمد// ابويه مو مهم رأيه ولا مهم شنو يريد
هدى// بس امي مهمة محمد وهي عندي بالكون كله . واندارت وطلعت من الهول وصعدت للغرفه.
&&&&&&&&&&&&&&&&&&&&&&&&&&&&&
ام محمد وام هدى گعدوا على المرجوحه :
ام محمد// خلوده شجاج وخبلتي الولد تگوليله لازم ينفصلون؟
ام هدى// راح تعرفين جواب هذا الموضوع من نوصل لميري.
ام محمد// شنو الربط؟؟
ام هدى // لا تستعجلين
ام محمد// تدرين كسر ايد روان ؟
ام هدى// بعد وگت.. المفروض هذا الشي يسويه خالها مو محمد .. لكن ابو محمد البارحه بالليل غرز سجين هالمرة ببطن بنتي، وخلاها تون وتبجي للصبح ومستحيل اگدر بحياتي كلها انسى شكلها وهي تبجي وتضحك ومتهستره ولا راح اسامح رجلج بيوم من الايام.
ام محمد// عبد الرحمن شعليه( قصدها ابو محمد) ان عجبه او رادها او مارادها ، همه حتى مراح يسكنون ويانا ، بيتهم وحد وعيشتهم وحد ، عووود لا يرضى ولا يقبل .
ام هدى// انتي صدگ تحجين لو تشاقين !!؟ بنتي لا هي بايره ولا ارمله حتى رجلج ميوافق ولا حتى ابنج متكرم عووود وياخذها ، بنتي الف رجل يتمنى تراب رجلها .. والباب الي تجيك منها الريح سدها واستريح .
ام محمد// صلِ على محمد هسه واهدي وخلي بس هدى تگوم بالسلامه ولكل حادث حديث.
ام هدى // عليه افضل الصلاة والسلام ، لكن هذا الي اني اشوفه لازم يصير لان يكفي عاد ، اني ماعندي ١٠ بنات ، هي بنيه وحده وحتى اخوتها ميدرون الى هسه احترگت وتشوهت ولو يدرون جان تدرين شسووا وخصوصاً ضرغام ..
ام محمد // فدوة اروحلج لا تكبرين الموضوع وشوفيهم شلون واحد يموت على الثاني والله محمد يموت بيها اذا عافته وحتى هدى تره باعيها مثل الطفل متگدر بلياه..
ام هدى// يصير خير هسه .. سدي الموضوع..
بدلت هدى ونزلت الدرج على كيفها وشافت محمد گاعد بالهول وساند راسه ليوره ومغمض عينه ، لان الليل كله مانام وبالمستشفى واجى مباشرة لبيتها ، انقهرت عليه ورادت تروح ركض بحضنه ومنعت نفسها ..
هدى// محمد.. نروح؟
محمد فتح عينه وباوعلها // يلا .
طلعوا كلهم وهدى رادت تگعد يم امها وام محمد مقبلت وطلبت منها تگعد يم محمد .. والطريق كله هدى ساكته ومحمد ساكت وبس ام محمد تحجي ماسكتت .. وهدى كلما تصير فرصه تسرق نظرات لمحمد ، ومحمد كل شويه يندار عليها ويحاول يلزم ايدها وهي تبعدها.
وصلوا بيت ميري وجانت بأنتظارهم ومثل ذيج المره اخذت هدى ووياها محمد ومقبلت لا ام محمد او ام هدى يدخلون وياهم ، وگعدت ام محمد ويه ام هدى ينتظروهم بالهول .
هدى وجهها صار اصفر وريگها نشف لمّا تذكرت الم ذيج المره وسألت ميري :
هدى// همين راح اتأذى ؟
ميري // حبيبتي انتي مو تريدين يروح وميبقى أثر وترجعين ورد ، خليج قوية وصبوره .
محمد// اني يمج.
هدى// اوك.
تمددت هدى على السديه وصارت ترجف حيييل وسنونها تصطك وتصيح بردت بردت ، محمد دنگ عليها ومثل ذيج المره كان واگف يم راسها ولازم ايديها الاثنين وهي تباوعله وتصيح بارده . بردت حييل .. محمد عرف هاذي ردة فعل من الخوف وبده يشاورها // اني يمج ، انتي هدوشتي القويه ، تحملي شويه بس .
ميري رجعت تحجي على الدهن الاصفر وشلون تعتبره صفار بيض ولو حاطيه جان انحفر مكان الحرگ وهدى بس تريد تعيط بيها انو تسكت لان مدتتحمل اي صوت .. فتحت ميري اللاصق عن الضماد وبكل خفة وسرعة صلخت الضماد وجرته حييييل وصرخة هدى هزت البيت كله وعياطها وبجيها سمعته ام محمد وام هدى، بحيث ام هدى گامت لحيلها وگفت واندارت على ام محمد :
ام هدى// سمعتيييي ، سمعتييييي ، هذا الي ردتج تسمعيه، هذا جوابي لسؤالج، تتحمليييييين بنتج هيج تصيح وانتي تسمعيها ومابيدج شي تسويه ( دموعها نزلت) لج صبيحة جاوبي ، تتحملين ؟؟
ام محمد// لا مااتحمل( بجت)
ام هدى// صرختها هاي عندي تسوه عشيرتكم كلها مو محمد بس ، وفوگاها مارحمتوها ، رجلج مااارحمها وخلاها الليل كله تبجي وتون گدامي ، شنووو الله دزكم غضب عليه وعلى بنتي والله انعل ابو ابنج لابو حتى الزواج الي يخلي بنتي تموت يوميه گدامي.
لزمتها ام محمد وگعدتها// اگعدي ، حقج ، حقج، اهدي ..
هدى بصرختها وعياطها وبجيها خلت محمد ميگدر يوگف على رجله وگنمبص يم راسها ولازم ايدها ويشاورها // اشششش اشششش خلص ارتاحي
ميري وهي تدهن الحرگ وتنظفه// خلص ، خلص باجر بعد ماكو هيج شي وراح الصعب ، اليوم شدتها بس ، الالم راح يبدي يقل من عگب باجر وابونا اليسوع راح يشفيج وتصير سوالف.
هدى متشنجه وتبجي وتصيح بعلو صوتها وتصيح اريد اموووووت اريد ارتاح .
محمد// خلص حبيبتي سمعتي خاله ميري شگالت بعد ماكو .
خلصت ميري وضمدت الحرگ وغطته بالشاش واندارت على هدى وجتي يم راسها :
ميري// هااااي شنو ، حرامات هذا الوجه الحلو هيج يبجي ، عيونج الحلوات راحت ياحبيبتي ، خلصنا ( واشرت لمحمد يگومها وطلعت من الغرفه)
محمد نزل التي شيرت ورفع هدى وظل حاضنها على صدره ويبوس براسها :
محمد// انتي گمر اليوم طالعه ، لا انتي برشه ، انتي شمس ، لا لا الگمر همين يصير برتقالي نوبات ( يحاول يكسر عليها ويهديها) ، وهدى جانت تشهگ من البجي والالم وتگوله يحرگنيي ، يحرگني .
محمد// شويه ويروح .
هدى// لاااع مراح يروح ، انت متدري ، مراح يروح ( وصارت تضرب بيديها على وجهه وصدره)
لزم ايديها وباسها وسكت وظل حاضنها لما حس خف بجيها وهدأت شويه وظلت تگول يحرگني .. شافها هدأت سألها تگدر تمشي لو يشيلها ، باوعت بعيونه وگلتله بصوت ناصي // نار محمد 🔥 نار تحرگني ببطني ، رجع حضنها وسكت لما هي وخرت من صدره وساعدها تنزل من السديه وظل محوط ايديه خصرها ورجعوا للهول وامها وام محمد گاموا عليها وهي تگوللهم يحرگني يحرگني .
ميري طلبت منهم يجيبوها ثاني يوم حتى تغير الضماد ورجعت اكدت على محمد على موضوع الانتي بايتك .
شكروا ميري وطلعوا ومحمد ساند هدى وراد يگعدها بالصدر ، مقبلت ورادت امها ، وگعدت يم امها وهي حاضنتها وام محمد بالصدر وكالعاده الطريق كله هدى تون ودموعها تنزل ومحمد يباوع كل شويه عليها بالمرايه وجان يتمنى امه تعرف تسوق او ام هدى حتى هو الي يگعد يم هدى ويهديها.
وصلوا بيت هدى ونزلوا وسندها محمد ودخلوا وهدى مقبلت تگعد ورادت تصعد لغرفتها ، وشالها محمد من وصلوا الدرج وصعدها وهي متعلگه برگبته وضامه وجهها برگبته ودموعها بللت رگبته . مددها بفراشها وفتح المكيف وگاللها انو تنزع البنطرون حتى ترتاح ، وطلبت يصيح امها :
محمد// ميستوجب امج تصعد وين بنطرون بجامه الگيه؟
هدى// هذا شورتي.
محمد// لا هذا لاستيكه قوي
هدى// هناك ( واشرت على باب كنتور)
فتح محمد الكنتور ورجع شاف صوره وهو يدور على بنطرون بجامه لاستيكها راهي .
محمد// هذا اوك
ورجع يمها غطاها وطلب منها تنزع بنطرونها وهو يساعدها .
مدت ايدها وفتحت البنطرون ونزعته وهو رجع مد ايده من جوه الغطا وسحبه من رجليها وانطاها بنطرون البجامه وگام وگف بعيد ودار وجهه على الباب. وهي تتلوى وتبجي وتلبس .
محمد// خلص؟
هدى// اي
اندار ورجع گعد يمها ، وغطاها وهي ترجف وتبجي وتصيح بعده يحرگني قوي .
محمد// راح اضربج هسه ابره مسكن وترتاحين تمام؟
هدى هزت راسها بالموافقه اخذ كيس الدوا من الكوميدي الي يم راسها وطلع الابره وراد كولونيا او سبيرتو واشرتله وين. ورجع شال الغطا وطلب منها تنزل البنطرون وهو نزل الكيلوت وضربها بالعضله .
محمد// هسه يروح الوجع وتهدين .
هدى// بس يحرگني حييل
محمد// ادري وكولش حييل همين بس انتي قويه واني يمج .
هدى// اني مو قويه اني مدتحمل
محمد// اي واحد مكانج مجان تحمل الي تحملتيه بس انتي حبيبتي لهذا تتحمليه..
هدى اندارت وباوعت عليه ودموعها تنزل ومحجت ولا كلمه ..
محمد// وخري شويه وانطيني مكان اريد اتمدد يمج
هدى سوتله مكان ، نزع حذاءه وتمدد بصفها وجرها وخلى راسها على صدره :
محمد// اليوم لو تنگلب الدنيا ولو تضربيني انتي او امج بالطابوگ مااعوفج ، باقي يمج اليوم تريديني ماتريديني مو بكيفج ، محد يشلعني اليوم من يمج.
هدى مجاوبت بس حست بطمأنينه عجيبه وبدت تهدأ ، متدري مفعول الابره لو مفعول محمد .
حس محمد انو بطلت تبجي وهدأت وگام يدندن بصوت ناصي اقرب للهمس :
هذا حبيبي .. احبه كولش
عيني عليه مساهره بس گلبي يرمش
احبه كولش .. كولش احبه
واتحدى واحد من البشر مثلي يحبه
هدى ابتسمت رغم الالم وهي مغمضه وصعدت راسها وباسته من رگبته وظلت تشم بيه ودموعها تبلل رگبته.
محمد// شوفي يابنت الناس لو ينزل اليسوع على گولة ميري مالتكم مااعوفج ولا اخلي احد غيري ياخذج . اذا سمعتيني هزي راسج
هدى ابتسمت وهزت راسها .
محمد// عفيه ( باس ايدها)
بهل الاثناء ودخلت ام هدى وام محمد الغرفه وشافوهم بهل المنظر .
ام محمد// هااا خلوده دشووفي ! مووو حرام عليج تفرقيهم ؟ اثنينهم يموتون والله.
ام هدى بعصبيه// اوووف صبيحة اوووف الي ايده بالمي مو مثل الي ايده بالنار متسكتين لخاطر الله.
محمد// اني باقي اليوم هنا يمه شوفيلج احد يرجعج للبيت.
ام محمد// ههههههههههههههههه اشتعلوا يول
ام هدى// منو گال اني اقبل تبقى داده؟
محمد// بعد اذنج طبعاً خاله بس هسه لو تجبين كرين ماانشلع منا ، تطرديني من الباب ، ارجع ادخل من الشباك ، تعاندين ، اخذ مرتي واروح انيمها يمي بالمستشفى واداريها هناك ، شگلتي؟؟
ام هدى خفت عصبيتها وابتسمت// گلت لا اله الا الله..
طلعوا من الغرفه وعافوا الباب مفتوح مقبلت ام هدى تسده .
محمديهمس// هي اليوم طالعة تخبل وعيونها تشل الواحد وعطرها يگولي اكلني مو احضني وشعرها يصيح تغطى بيه وشفايفها تگول لاتهدني ويريدوني اروح ، لج امج ، ابويه، العالم كله ميگدرون يبعدوني عنج سنتيمتر واحد ( وحضنها اقوى)
حست هدى گلبها راح يوگف من سمعت كلماته وفتحت عينها ووگفت تبجي ، وفكرت انو هذا الوقت المناسب حتى تحجي وتوصل الي تريده لمحمد ، رفعت راسها وعدلت نفسها وگعدت واندارت عليه وايديها على مكان الضماد وجانت تتألم.
محمد// ليش گمتي؟؟ ضايقتج؟؟ اگوم من يمج؟؟
هدى// لا .. مضايقتني .. بالعكس .. دفيت بيك وحسيت نفسي طرت ولزمت النجوم بيديه ، لكن..
محمد// لكن !!!!
هدى// الواقع غير ، اني تعبت حيييييييل حيييييل محمد.
گام محمد وتعدل بگعدته يمها وقرب وجهه عليها ورفع وجهها بيده وباسها من شايفها .
محمد// هدى انتي الي بس ، سمعتيني والي صار مراح يتكرر .
هدى// اني عرفت انت شنو سويت بروان
محمد// لا تذكرين اسمها گدامي .
هدى// شئنا ام ابينا هي داخله هاي المعادله وابوك فارضها علينا .
محمد// كلتيها انتي بنفسج ، ابويه ، مو اني . واني محد يگدر يفرض عليه شي مااريده .
هدى// راح تزاعل وتعارك ابوك بسببي وراح يبقى الذنب هذا ويايه طول مااباوع بوجهك ، واني اعرفك انت شگد تحبه وتحترمه .
محمد// هو يريد هيج يصير بيني وبينه مو اني ، اكيد راح يصحى بيوم من الايام ويحس بغلطه .
هدى// واذا مصحى ؟؟ واذا اصر على موقفه؟ اني مستحيل الي ماارضاه على نفسي وامي ، ارضاه عليك وعلى ابوك . ولزمها وجع قوي وعصرت نفسها
محمد// شنو؟؟ شدتحسين ؟؟
هدى// وجع بمعدتي ماادري شبيه ؟
محمد// شوكت اكلتي اخر شي
هدى// بال١ الظهر ويه البنات
محمد// تدرين هسه ساعة بيش ؟
هدى// ما جوعانه هسه ، اريد احجي وياك ، لازم احجي ، والا راح اتخبل .
محمد// اسمعج ، يمج اني ، ناكل ونكمل حجي بعدين
هدى// لا ، اريد نحجي هسه مااتحمل بعد .
محمد// تمام ، كملي
هدى// اني مو احبك ، لا
محمد// متحبيني؟؟ كذابه ..
هدى // لا مو احبك ، اني اعبدك ( عيونها بعيونه )
محمد// اول مره اسمعها منج ( گلبه صار يرگص)
هدى// شوف عندي الله ، ماما ، انت ( باسها من ايديها) يعني بهاي الدنيا بس انت وماما . وماگدر اشوف واحد منكم يتألم او يصير بيه شي ، مراح اتحمل واني تعبت ( بدت دموعها تنزل) والله تعبت تدري من سمعت عمو البارحه شنو حسيت ؟
محمد// هدى
هدى// خليني اكمل ، خليني احجي وارتاح
محمد // كملي
هدى// حسيت انو حايط من بيتنا الي يلمنا اني وياك وگع ، مراح اگدر اشيل هذا الذنب وياك ، مراح اگدر اخليك تزاعل ابوك من ورايه .
محمد// وتتصورين اذا انفصلنا راح اسامح ابويه ؟ راح اگدر اباوع بوجهه؟
لزمت ايديه الاثنين // راح تسامحه لخاطري اني لان هو رباك هو يموت عليك .
محمد// بس بقى تگوليلي روح تزوج زربان ، والله يالله ، انتي شتخربطين!!؟؟
هدى// اقتلك واقتل نفسي اذا تزوجتها ( صارت تشهك ودموعها تنزل) بس مااريد اكون سبب بكره ابوك الك او غضبه منك دخليك افهمني اني بين ناريين هسه . ثم تعال اگولك انت ليش ماتفكر بيه .
محمد// كل هذا ومامفكر بيج .
هدى // شوف ، شوف من هسه بديت تعيرني انو اني السبب.
محمد// لا تحورين كلامي بكيفج .
هدى// انت مافكرت بكرامتي ولو لحظه ، بعزة نفسي ، شلون تريد اقبل على نفسي اتزوجك وابوك ميريدني ويعتبرني حشره او شي قذر دخل بينكم ؟؟
محمد// لا تهولين الموضوع .
هدى// ابداً مو تهويل بس هذا الي ده احسه ، ابوك ميريدني من اول يوم محمد وجنت اتغاضى عن تصرفاته ويايه واحاول ابررله او اخلقله اعذار ، بس هسه كل شي انكشف وتذكرت شلون جان يعاملني وشلون يعتبرني نكره او حشره .
محمد گام من الفراش وگعد ونزل رجله وانطى هدى ظهره .
هدى// اذا انت تقبلها عليه اني مااقبلها على نفسي ولا امي ولا اخوتي اذا عرفوا راح يقبلوها.
محمد على نفس وضعيته وهدى تريد تخلي ايديها على ظهره وتلزم نفسها ..
محمد// مراح نعيش وياهم ، احنا ببيتنا ومستقلين عنهم .
هدى// بس اني مراح اگدر اشيل ذنبك ، ولا نفسي تسمحلي انو ابوك يستحقرني ، يعني لو تقنعه وهذا من رابع المستحيلات ، لو ..... ( سكتت)
محمد // گوليها ، ليش سكتي ؟ گوليها حتى اگدر اقتنع انو تگدرين تنفذيها.
هدى// اذا الموضوع يخص كرامتي ويخص كبريائي وعزة نفسي ، اگدر
اندار عليها وعيونه مليانه دموع ووجهه احمر ومخنوگ ولزم معصم ايديها قوي وعصره// گووووليها ، ارييييد اسمعهاااا منج ، گوووووليها
هدى تبجي بحرگه// اگووولها ليش مااگولها
محمد// دا اگولج انطقيها ، اريد اسمعها من لسانج
هدى بصوت ناصي// ننفصل ..........
محمد// اهااا ( ترك معصمها وكانت اصابعه طابعه عليه) .
وگام من الفراش وصار يفتر بالغرفه ، وهي تفرك بمعصمها وتبجي .
محمد// تگوليلي اعبدك ، وتگوليلي مااكدر اعيش بدونك ، وتگوليلي ننفصل ، اگولج انتي روحي اني دنيتي انتي كل شي ، تگوليلي ابوك ، روان ...
يفتر بالغرفه مثل الفهد المذبوح وهي تباوع عليه وتبجي .
هدى// امي اخاف يصير بيها شي من ورانا ، امي مااتحمل اخسرها، اني بين نارين محمد ، اخوتي اذا عرفوا مراح يقبلون ، ضرغام اذا سمع ابوك ميريدني وراح نتزوج راح يگلب الدنيا ، امي مراح تقبل نتزوج مدام ابوك رافضني ، اني تعببببببت ، انييييي اريد امووووت ، اني فوگ وجع الحرگ اكووو نار بصدري من البارحه لليوم ، فوگ هذا كله نفسي وعزتها وكرامتي ، وانت ، انت النفس الي اتنفسه ، انت صرت كل شي حلو بحياتي ، انت عمري ، اني مجنت اعرف شنو يعني حب وعشق ، وعرفته وياك وبيك ، ومستحييييل اقبل وجودي بحياتك يحرمك من ابوك او اي انسان عزيز عليك ، نار محمد نار تاكلني اكل ، الصرخه الي صرختها اليوم من ميري تعالجني كان ربعها الم الحرگ والباقي احساسي انو راح افارگك .
وگف بنص الغرفه وبدا يتقرب من الفراش وهي تباوعله بخوف لان عينه ووجهه كان مليان غضب .
محمد// وتتصورين اذا گلتي ننفصل او طلبتيها مني اني راح انفذ واگولج سمعاً وطاعه يعني مثلاً لو شنو؟؟!! انتي مرتي سمعتي ، مرتي ، واگدر هسه اجرج لبيتي بحكم القانون واكبر راس اخليه جوه قندرتي.
هدى تباوع عليه بخوف وگامت ترجف// متسويها انت ، انت اكبر من هذا الشي ، متسويها ( صوتها يرجف)
باوع عليها وشافها خايفه وترجف ، تقرب منها وگعد على الفراش ويباوعلها ، وهي ترجف گدامه وخلت ايدها وره مفتحتها✋ گدامه..
محمد// اسويها هدى ، اذا تطلّب هسه اسويها.
&&&&&&&&&&&&&&&&&&&&&&&&&&&&&
نهاية الجزء العاشر