#زوج أختي والماضي
بقلمي انا الكاتبة #رواء هادي
تابعوا حسابي على الانستغرامroyan4h@
لاتنسون تعلقون بين الفقرات وتخلون لايك قبل القراءة تشجيع لي من أجل الاستمرار ...
قراءة ممتعة للجميع.
رفع راسه وباوعلنه راسن ابتسم بمكر واحنا بقينا مصدومات مانعرف شنحجي وشنكول شلون هو
نفسه العريس ؟ !
هند _ عززة العزانه ولج حمزة العريس !؟
اعيوني انترسوا دموع مكدر انطق كلمة وحدة لساني ربط هو يباوع ويضحك باوعت علينا انفال
ابتسمت وكالت
انفال _ ماتسلمون شبيكم ؟
باوعلنه بإبتسامة خبيثه واحنا بقينى مصدومات مانعرف شنحجي وشنكول شلون هو نفسه دموعي بسرعة تجمعوا بعيون مكدر احجي كلمة احس كل الكلام طار من لساني
هو يباوع علينا وأبتسامة خبيثه على شفايفة
حجت انفال مرة الخ لان بقينى بمكانة واكفات ونباع بصدمة ماتجون شبيكم واكفين شنو تستحون ؟!
هند_ لا ليش نستحي
لزمت ايدي هند وكالت بهمس ...
شجعي ولا تبينين كدامة خايفة و متأثرة
زهراء دمعة نزلت أصلا مكدرت اتماسك روحي رفعت ايدي مسحت الدمعة كتلها
_ القدر كالمرة يطلعة كبالي عبالك دا يتعمد ؟!
_ انسي خل نسلم ونكسر عينه
مرديت عليها راحت وكفت كباله هو يباوعلها بضحكة نذل ابد مايغير اطباعة القذرة
_ ألف مبروك برفاه والبنين حمزة
حمزة _ الله يبارك بيج يوم الالج
زهراء رحت. وكفت كباله بس انظاري للكاع
بلكوة طلعت الكلمات ؟
_ ألف مبروك برفاه والبنين
لزمت ايد هند بقوة اخذتها ومشينه طلعنة الاستقبال بسرعة كبل للمطبخ دخلنا سديت الباب عفت ايدها اباوعلها تباوعلي راسن نزلن الدموع عشرة على عشرة
_ هند شفتي العريس طلع حمزة صخام الصخمني
هند شلون هيج شلووون ؟!
حضنتني هند بسرعة ..
_ الله ياخذه شلون طلع العريس وين يعرف أهل مرت ابوج ياربي هاي هم حاله هسة
_ هند اكيد راح يكول كلشي لأختي عن الماضي
_ لاا مستحيل يكول
_ والله يكول وهسة أختي تبطل تحبني وتكول عني
وحده قليلة شرف وأخلاق
بعدتها عني خليت ايديني على اكتوفها هزيتها _ وحك العباس ابو فاضل اذبحه واشرب من دمه اذا جاب طاريج
بكلمة كبال أختج
_هند أختي
_ شبيها أختج ؟
_ راح تعيش وي إنسان نذل واطي معندة أخلاق
_ ايي والله هاي شلون طارت من بالي خطيه اكلتها انفال
_ اي شنكدر نسوي بعد
_ الفاس وكع بالراس اليوم الحنة وباجر العرس
_ لو ادري من أول هو العريس والله مجان خليت أهلي ينطونها له بس مدري مدري هو العريس
_ لعد اني ادري
_ هند خايفة حيل خايفة يسوي شي ؟
_ ميكدر يسوي اطمني
_ مكدر اطمن واني اعرفه شنو من ابني أدم
بعدت أيديني عن اكتوفها مسحت ادموعها من خدودها
_ اسكتي كافي بجي المكياج خرب أمشي عدلي
المكياج لا احد يشوفج شيكول عنج ؟
_ ماكدر اطلع واشوفه كبالي مكدر
_ انجي اطلعي هسه يكول هاي تغار من اختها اخذت اختها وعفتها أمشي اطلعي وكسري عينه
_ مكدر
_ انجبي تكدري أنتِ قوية خلي عينج بعينه ولا تبيني متأثرة بزواجه من أختج كوني طبيعية كبالة اوك
شهكت هزيت راس طلعنة المطبخ رحنى عالغرفة مرت ابوي عدلت المكياج باوعت عالمراية علمود اكون قوية ما ابين
كبالة متأثره بالشفتة قبل شويه
طلعنا رسمت أبتسامه مزيفة على شفايف دخلنا الاستقبال جان يلبس بيها الذهب سوو هي الحنة هي خطبه لأن
مستعجلين عالعرس
هند طلعت الموبايل كامت تصور مقطع فيديو واني واكفة كبالها ابتسم رفع راسه باوعلي مستغرب ضحكت بوجه
رفع حاجبه مستغرب ؟!
يمكن عبالة اني دا ابجي هسه وخايفة منه خطيه نصدم بس نذل طلع راسن رفعلي حاجب
واني نزلت انظاري همس ..
عديم الأخلاق
هند كملوا كلشي واني اصور بس لو بايدي اذبحة بس يباوع على زهراء مشال عينه عليها ابد برغم عروستة طالعة ملاك وكاعدة بصفه نذل ماعليه عتب
حمزة شكد فرحت من طلعن هن نفسهن هند
وزهراء ام لسان الطويل صعبة المنال،
بس ويلي اخذتلي عقلي مجنت أدري بيها هلكد حلوة تطلع بالمكياج ولبس مال السهرات والمناسبات هي جانت بالعباية وبدون مكياج انوب بالمكياج زدادت جمالاً.
بس هسه لا خبلتني وخلتني. أتمنى تكون بدل انفال بهل لحظة هاي طويلة جسمها متناسق بيها كل معالم
الأنوثة واضحة عليها
اما انفال بعده جسمها ناعم مابيه أنوثة قوية وطاغية مثل زهراء راح أموت منوراها اليوم مكدر اشيلها من بالي
أبد هي كبالي تضحك ما متأثره
بشوفتي وكني ما صدمتها جانت طبيعية بس اعتقد دا تمثل كبالي قوية لان من سلموا طلعوا بسرعة وره ٨ دقايق يلا رجعوا ومكياج متجدد بوجهها
اني حفظت كلشي بوجهها اباوع عالشفة حمرة وردية
شفايفها تاخذ الروح بس مال بوس
كلشي بيها يمووت صايرة ملاك بعينه بهل الفستان الأبيض طالع عليها فدشي بدل ما احلم بليلة عرسي وي انفال كمت اتحلم بليلة عريس وي زهراء من شفتها هيج
حلوة طالعة
زهراء اشرتلي انفال راحت عليها وكفت كبالها
دنكت عليها شاورتني وكالت ..
_ عدليلي البدلة دا ضايقني
_ ماشي
سحبت نفسي كعدت بصفها من الجهة الثانية
عدلت البدلة لها وراها كمت كتلها
_ وهسة
_ هاهيه
أنتبهت حمزة يباوعلي خزرته بس ما اهتم أبد رسم أبتسامة مشيت يم هند كعدت وره فترة كالوا راح يروح العريس
واهله فرحت حيل راح يولي حمزة
يم عتبة الباب أشرتلي أخته الصغيرة سارة وكالت
_ تعاي زهورة فدوة
هند _ شتريد منج هاي ؟
زهراء _ اندري
هند _ كومي شوفيها شتريد منج
زهراء كمت رحت ...... يمها جانت واكفه يم عتبة الباب يعني بصف اخوها النذل عديم الأخلاق حمزة
وكفت بصفها _ هاا شتريدين سارة ؟
_ عادي تاخذين صورة وياي ؟
_ اسفة مأخذ صور
_ ليش ؟ ترى احنا أقارب صرنا
_ واذا أقارب ماخذ صور اني اعذريني
_ ماشي براحتج زهورة
ردت اروح ارجع بس العريس كام يمكن راح يرحون وكاموا اقاربة جانوا بعدد ١٠ نسوان تقريباً اني ضعت
بيناتهن ماعرف اتنفس حتى
ماحسيت له ايد تسللت على خصري وكرصتني بقوة بحيث توجعت حيل راسن ضربتها ماعرفت
منو سواها بي ؟!
رجعت عالحايط ستندت خايفة حيل اجه ابالي حمزة سواها باوعت عليه هو التفت علية من
عتبه الباب
أبتسم غمزلي عين وراها طلع اني نصدمت معقولة يطلع كل هذا منه و يتحرش بيه بيوم عرسه ! ؟
طلعوا و راحت بسرعة يم هند كعدت عالجهة ماكو يمنه نسوان بس احنا الاثنين دمعة بطرف عيني
هند _ شبيج دمعة بطرف رموشج ؟
_ أني أنتهيت هند
_ شكو؟ شحجت وياج أخته الواطي؟
_ ماحجت شي بس طلبت تأخذ صور وياي واني مقبلت
_ شلها بالصور ؟
_ شدراني ولج صارت وياي مصيبه مصيبه
_ شصار ولج شصار ؟
_ حمزة تحارش بي من طلع
باوعتلي بصدمه _ شلوون ؟
_ والله كرصني من خصري بقوة شال لحمي
شيل لحد الأن جاي اتوجع
_ بعده موجود لو وله
_ روحوا شتريدين تسوين ؟
_ اروح أبتلي بي وبل الخلفوه انعل ابوه يابو الخلفوه هذا كلب ابن الكلب شلون هيج يسوي ..
_ اسكتي هند اسكتي بعدين نحجي
_ هاي ماينسكت عليها يتحرش باخت مرته وين
صايرة وين دايره فهميني زهراء
_ احس حياتي راح تدمر
_ والله ادمره ولا اخلي حياتج تدمر هسة خل تزوج انفال وتعيش ويا ويصير يجي لهنا وراح ننتقم منه ونزلة لاسفل السافلين والله كلهن نطلعهن منه وحدة ورح الخ
_ شسوين ؟
_ خل يجي اليوم المناسب وراح تعرفي شسوي بي هل ايده لكرصتج يحتاجلها كسر اشتهه اخت عروسته من عمت
عينك وعين كل رجال مثلك يفكر تفووو
كرهت روحي ماعرف ؟ ليش آول مرة اكره روحي هل درجة
واتمنيت مجاية لهاي الدنيا من أساس صدمة عمري وحياتي كلها ..جانت من شفت حمزة عريس أختي
والصدمة الثانية من تحارش بي
ماعرف ؟ الآيام الجاي شضامتلي وي حمزة وعلى شنو ناوي اخاف بعده ناوي على ألاشياء القديمة اللي ماكدر
ياخذها اخاف يرجع يهدد
بالماضي علمود يوصل الشي اللي يريده
بدت الحنة صوت الملاية جان حلو كلش اجواء حلوة بس اني محسيت بالطعم والذى ابد بس الخوف والتوتر نايم جوه قلبي وأشياء من تخيلاتي المرعبة
تحوم فوك راسي اباع لأختي بحزن ماعرف شلون راح تكون حياتها وي هيج إنسان عديم الاخلاق
أختي الصغيرة منا ومنا أني اخاف يطلع الماضي مالتي ويا وتدمر حياتي كلها وبعد محد يحبني ويحترمني
واخاف اهلي اذا دروا
يكتلوني اكيد هيج أفكار كامت تجي بالي لما أنتهت الحفلة واني مفصولة عن الأجواء
راحوا المعازيم انفال راحت بدلت وسبحت واني وهند عزلنة البيت ورجعنا كلشي المكانة وراها اجه ابوي واخواني واحنا رجعنا وي أحمد للبيت
امي بدلت وراحت تسوي العشة دخلت الحمام كضيتها بجي جوه الدوش واندب حظي المصخم،
طلعت من الحمام كبل لغرفتي سديت الباب رحت كبال الميز كعدت عالكرسي باوع عالشكلي ....أعيوني حمرة دم صايرة منفخة من البجي نفتح الباب دخلت أمي الفتت
عليها بسرعة شافتني وكالت
_ شبيهن عيونج حمرة صايرة ؟
تلبكت _ من سبحت فات شامبو بيهن
_ غير تنتبهي اخاف يوجعوج ؟
_ لاا
_ هاي العين الماصلت على النبي حسدوج يمة
مرديت رجعت أباع عالمراية بحزن اسمعها تكول
_ مشطي وتعاي اطكطك فوك راسج حرمل
وأقرأ معوذات عليج
_ ماشي
راحت أمي خطيه متعرف اني شواكع على راسي من مصايب وشنو الهموم والأحزان اللي بداخلي
حمزة امي واخواتي وخالاتي من شافوا زهراء وهند تخبلون كالوا من عدهم بنات اكبار ومخلصات دراسة ليش مكالونه عنهم وخلونه ناخذ انفال القاصرة
ماشاءالله اختها من ابوها تاخذ العقل كاسرة العروس جانت وتناسب حمزة اكثر من انفال اني اعلم اقاربنا شلون ضمت علية زهراء وهند ليش مكالت
عليها وجابتلي انفال الصغيرة .
امي حمت فول كاعدة يمي وتحجي متعصبه امي واعرفها تدور حلوات وشاغولات وسئلت عليهن النسوان كلها تحمد بزهراء وبهند بشطارتهن واخلاقهن وجمالهن
مخلي ايدي على خدي ووافكر بزهراء فعلا جانت جميلة لا بقى الجمال والأناقة اما انفال ضايعة بالبداية ناعمة كلش وقصيرة وخجولة بنفس الوقت مو مثل
زهراء تاخذ العقل وخليتها بالي اجيبها لدرب يعني اجيبها
امي_ شفت ام رانيا شكد حقيرة ضمت علينا أختها وبت عمها والله من شفت اختها دخلت وياها بت عمها بقيت صافنة وفاكة حلكي من الجمال والأناقة
حمزة_ شتردين هسة نبدل العروس بأختها ؟
امي_لو بايدي اغير
حمزة_شنو صايرين هنود وماندري نغير العروس
امي_ماكاتلني القهر غير ام رانيا من كتلها شوفيلي بنية حلوة ومعدلة من يمكم جابتلي انفال القاصرة وضمت زهراء اختها لجنها لعابة وتترمش وبت عمها هند
حمزة_من آخر اعرف زهراء واعرف هند جانوا وياي بنفس الجامعة والقسم ماحبيت وحدة منهم هسه جاية ترديني اخذ وحدة منهم لا يمة ماريد عوفيني على
مرتي اربيها على ايدي احسن مااخذلي وحدة
هي تربيني لو تشلعلي قلبي
امي_دنجب مسوي روحة قنوع شفتك شلون تباع لاختها بصدمة انصدمت من شفتها مو
حمزة_لاا
امي_ايي
حمزة_ يمة كافي سدي الموضوع
امي_سارة اخذتي صور لزهراء علمود اشوفها
سارة_مقبلت
امي _عود ليش مقبلت
سارة _تخاف ننشرها
حمزة_لمنو تشوفيها ؟
امي_شايفتنه همج خوما همج ننشرها يلا
اخذيلها صور بالبوكة بالعرس
سارة_ اي
حمزة_شلكم بيها
امي_اشوفها لاخواتي لماجني واخواني خل ياخذونها
حرامات تتفوت هالحلوة
سكتت مارديت نار وشتعلت بصدري شنو تشوفها علمود واحد منهم يأخذها زهراء بقت حسرة بقلبي مستحيل اخلي شخص ثاني يتهنى بيها وياخذها .
ثاني يوم خابرت مرت أبوي دزت علية كلت لامي ماروح مريضة أني امي مقبلت كالت ليش ماتروحي عرس أختج
وراح يجون ياخذونها الظهر
لأن الطريق طويل وعيب عليج متروحين طنكرت
رديت بصوت عالي بوجه أمي
_ كلت ماروح يعني ماروح
رحت عالغرفة اسمعها تكول_ هاي شبيه تخبلت ؟
بيبي _ عوفي البنية متريد تروح
_ عيب مناك العالم عرس أختها وماحاضرة شيكولون
_ شيكولون خل يكولون البنية متريد تروح
_ هي من البارحة مو على بعضها ماعرف شصاير وياها
حتى عشة ماتعشت ولا تريكت ؟
_ حسدوها الله لا ينطيهم البارحة كلها تحجي بيها وبهند
سديت الباب بقوة .... بقيت واكفة بنص الغرفة دموع تجري مااريد اروح البيت أبوي أبد بعد كرهت كلشي بيت أبوي امي بيبي خطيه معدهم أي فكرة عن حالتي
وعن البارحة شصار وياي بالحفلة
اجت علية هند الصبح حجت وياي حاولت ......تقنعني اروح للعرس مقبلت كالت مدام ماترحين اني هم ماراح
اروح حالي من حالج والله
_ كتلها شعليج بي أنتِ روحي
_ مااروح
_براحتج أمج تروح ؟
_ ايي يرحون هي والجناين وامج وبيبي هم
يرحون أني أبقى يمج بالبيت
_ أريد اروح ازور الأمام
_ العصر ان شاءالله نروح
_ ان شاء الله يلا كومي خل نتريك ميته من الجوع
_ ماشتهي اكل ليش ممكلة ؟
_ لاا ماكلة بس ريوك ثاني متعوده أكل ماكو مامشتهيه
كومي خل ناكل عالواهس
اجت أمي جانت كاشخة وكالت من عتبة باب _ احنا رايحات ديرن بالجن على نفسجن بعد ماوصيجن
هند _ لا توصي حريصات عمه عود اخذوا صور للعرسان
_ ان شاء الله في أمان الله
_ الله وياكم عمه
شحطتني شحط غصب عني خلتني أكل وأكل ماتوقعت راح أكل هلكد صدك اني ثولة وعوبة من الخوف بطلت أكل
وشرب ماجنت أدري بروحي جبانه
عالساعة بالتلاثة رجعوا أهلي عالبيت أختي وجهالها وبيت عمي الجناين بيت عمي الاثنين رايحات كبل عالبيوتهم
مناك كعدوا بالاستقبال
أختي _ هاا ولجن ليش ما اجيتن ؟
امي _ كلها تسئل عليكم حتى العريس بنفسه سئل
باوعنه وحده على الثانية بصدمه حجينه سوه _ العريس ؟
بيبي _ ايي يكول وين هند وزهراء ليش ما اجوي ؟
هند _ وين يعرفنه ؟ علمود يسئل
أختي _ ليش هو مو جان يدرس وياجن بنفس
القسم بالجامعة
بلعنة ريجنه ردت هند _ ايي صح جان ويانه بس شمدريكم ؟
بيبي _ العريس كايل من شايفجن البارحة بالحنة عارفجن
زهراء _ ايي واذا
أختي _ ليش ماكتن من البداية جان وياجن بالجامعة ؟
هند _ اي ويانه بس مالنا علاقة بي
أختي _ عوبات ليش ماجيتن والله اجوي شباب تاخذ العقل بالجمال ابقن على قلوبنا محمظات
هند _ اوي اوي لمونة شباب
زهراء _ اووووي
أختي _ وجعوووي كضن عمرجن كاعدات بالبيت وأنتِ زهيرة مسوية روحها مريضة وينج مريضة اشوف الاسد
ياكل بيج سنة مايخلصج ليش ما اجيتي
زهراء _ مالي واهس
هند _ واني هم مالي واهس مثلها ف بقينا بالبيت
أختي _ دومجن واهس ماكو كومن فرشلي افراش
اريد انام وانيم الجهال
هند _ الجهال واحد علية واحد على زهراء
بيبي _ عوفي الجهال وكومي روحي لبيتكم وي
أمج خطيه تعبانة واكيد نعسانة
هند _ بيبي تطرديني ،؟
_ لا ماطردج بس هم يلا ترجعين لبيتكم
هند _ ايي والله نعست حيل واريد أنام كومي يمه خل نرجع عالبيت وان شاءالله العصر جايه
زهراء _ انتظرج
أختي _ وين ؟
هند _ نروح نزور وين قابل
أختي _ ايي والله أني هم اروح وياكم علمود بالليل
وره العشة يجي ياخذني عباس
هند _ ماتباتين ؟
أختي _ لاا ماكدر ابات
راحت هند واني فرشت افراش ... لاختي وجهالها بغرفة أمي حسين خطيه جان نايم بغرفة أمي تعبان كلش اجه
من الشغل اختي نيمت الجهال
بسرعة جهالها عقال وبسرعة ينامون يشلعون القلب عكس بقية الجهال يشلعون القلب يله ينامون معلمتهم بس
يعوفون روسهم على مخدة ينامون
واني باجر عندي دوام بالحوزة وكلشي ..... مامحظرة عزززة العزاني نسيت منورة الخوف والعرس اخذت الكتب
وكعدت عالدرج اقرأ
شافتني أمي _ سالمين دا تقرين
باوعتلها _ ايي والله جاي اقرأ
_ شعندج وتقرين ؟
_ مامحضرة كلشي وعندي كومة واجبات
_ ليش الحوزة هم بيها دروس مثل المدرسة ؟
_ يمه حالها حال أي دراسة إمتحانات واجبات ولازم
احظر الواجب باجر عندي دوام
_ اقري لعد يمة اقري
راحت أمي بقيت اقرأ لحد العصر رفعت
راسي عالصوت حسين
_ زهورة سويلي شي اكله قبل لا اروح عالشغل
عفت الكتاب عالدرج _ من عيوني
كمت رحت عالمطبخ عفت الجاي عالنار فتحت الثلاجة اباوع شسويله شسويله جان اكو جبن واكو بيض وروبة خاثر صحت علية من المطبخ
_ حسين اجيبلك جبن لو اسويلك بيض ويا روبة خاثر
_ جيبي جبن مستعجل
_ ماشي
طلعت جبن وياه خبز صار .....الجاي صبيته وديت له رحت رجعت عالدرج اخذت الكتاب رجعته بالجنطة مالتي
بيبي كعدت وكلها كعدت
راح حسين عالشغل صارت الساعة بالستة اجت
هند كعدنا بره بالطرمة اني وياها نسوالف
_ خابرت أمي على عمتي وكالت هسة هم بالقاعة
_ هاا
_ ايي تكول عازمين شكد عالم
_ غير معارفهم هواي
_ ايي اكيد معارف هواي اكلج
_ كولي
_ هسه شلون تكون أول ليلة لانفال وي حمزة
تخيلي وياي التفاصيل
باوعتلها بحلك مفتوح اضحكت وكالت ...
شبيج مصدومه سدي حلكج لتدخل
ذبانة بي هههههه
_ هند شنو هاي موعيب
_لا ليش عيب شكو بيها لو عرفنه شيصير مايصير وياها اريد اعرف قليل الأخلاق شلون يتعامل وي
عروستة بأول ليلة له
_ هنددد
_ وجعععع شبيج صراتي حمرة من الخجل
_من شوكت أنتِ هيج
_ من زمان ههههه
_ امداج فضحتينا هند
_ شمسويه أني وفضحتج
_ هسة تقبلين يجي احد يسئلج شصار ماصار بليلة
عرسج وشلون جان زوجج وياج ؟
_ لا ماقبل بس الج اكول عادي هههه
_ والله راح انزع النعال واكطعة على راسج اسكتي فضحتيناا عوبه مجنت ادري بيج هيج تدوري سوالف
_ انزعي انعالج واضربي هاا اكطعة لج وارده .. لاا اني مو هيج بس حبيت اعرف عن قليل الأخلاق شلون
يتعامل بس هيج والله
_ عوفيج منه طبه مرض
_ ماعوفه اذا ماعرف بليلة العرس ماراح ارتاح ابد
_ هند شبيج تخبلتي
_ ايي اي ايي تخبلت
_ منو راح يكولج ؟
_ أني راح اعرف بطريقتي الخاصة
_ راح ترجع هند أم الاستخبارات اللي كلشي ماينظم عليها
_ ايي
_ يلا كومي هم يلا نروح للأمام سوالف وياج مابيها فايدة
_وأنتِ عاد بيج فايدة ملاية زهراء
_ تعيبي ؟
_ لااا ماعيب على وحده جبانة ههههه
كمت اباوعلها بخباثه _ اذكرج ريووون
كامت باوعتلي بعصبيه _ ليش تذكريني بي
_ منو جان يخاف من خيالة ومايطلع عتبه
باب البيت هاا تذكرتي
_ ريان جان يخوف بمعنى الكلمة ولحد الأن
بعده يخوف من حقي اخاف
_ واني هم من حقي اخاف من حمزة وأنتِ تعرفي
حمزة شنو من ابني أدم
_ عديم الأخلاق
_ عفيه عليج عديم الأخلاق واخطر مخلوق عديم الاخلاق
_ انسي واني انسى ان شاء الله بعمرنه مراح
نشوفهم بعد كولي آمين
_ اللهم آمين يارب العالمين
دخلنا للبيت لكينه أختي لابسة العباية واكفة
بنص الاستقبال اشرت عالجهال
_ سجى الهند وعلي الزهراء يلا اخذوهم لكم اليوم
و اني بطرك عباتي امشي
هند _ سجى تعالي وياي
زهراء _ تعال علاوي وي خالتك حبيبتك
شلنه الجهال اني وهند علي جان ثكيل حيل وجبير بالعمر عمره أربع سنوات للباب تعبت نزلته
_ مبيه حيل أشيلك والله ثكيل صاير
هند _ هههه
أختي _ واني كلتلج شيلي كاوديه شايلة رجال بطولج
هند _ حبيبتي سجى خفيفه
زهراء _ عمرها سنتين وخفيفه ريشه خوب مثل علاوي سمين
اختي _ قل أعوذ برب الفلق خليتي عينج عليه
هند _ ترى زهراء تحرك الخضر عاليابس ههههه
أختي _ ادري بيها
زهراء _ هنودي
فتحت الباب هند وكالت "
عيون هنودي ههههه امشي امشي
نزلنه عالطريق نمشي سوه ..... علي ايده بايدي أختي تمشي بطرك روحها هند بصفي شفت بيت ام عباس وكلت بقلبي هسه مال يطلع ريان ويخنسها ههههه
بس حرامات ماكو يكولون مسافر خارج البلاد ، أبد ماتبطل مني بس تصنف وتضحك هاي الطريق تضحك علية وتكول علي يشبهج تماما بس عيونه زرق على ابوه
اباع على شكل أبن اختي مايشبهني أبد يشبه ابوه تماما صح البنية تنطيني شبه قليل بس لولد لاا وصلنا الأمام دخلنا نزور شلت علي وهند هم شالت سجى زرنا وطلعنا أختي كالت
_ خل نرجع مدام زرنا
هند _ خل يأذن ونصلي ونرجع
زهراء _ احنا متعودين تصلي كاليوم يلا نرجع
_ ماكدر أبقى الجهال يكومون يبجون
زهراء _ مرجع اني والله أبقى عالصلاة والجهال
واحد يمي ويم هند بعد شكو نرجع
هند _ أني هم أريد اصلي وادعي وقت الصلاة هنا
_ ماشي لعد خل نكعد بره ننتظر وقت الاذان
كعدنا بره ننتظر الصلاة المغرب نباوع عالعالم رايحة وجاية صدك منظر حلو ويرد الروح شفت ضباط اجوي لابسين عسكرية شكلهم حلو واحد.جبير
بالعمر شعر راسة كله شيب أبيض الثاني بعمر ريان للحية عالية مخلي سودة شعره أسود ضخين بشرته بيضة
ثلج ويلي مو جمال سبحان رب الخالق
هند شافته وكالت بهمس _اويلي يمة مو جمال زهراء
_ سبحان رب الخالق
_ هذا واحد يباوعله عيون عسليه تخلي العيون
لتباوعله تنشل من النظر
_ ولج هند شبيج زحفتي
_ جماله يخلي لوحدة غصب عنها تزحف
بعدت انظاري عنه لأن شافنه نباوع وضحك همست لهند
_ ولج هند شافنه نباوعله
دنكت راسن وكالت _ غير تكولين شافنه خررب انفضحنا
_ مو كلتلج أنتِ وكعتي ميته
_ شدراني خررب
أختي _ شبيجن تبببسن ؟
زهراء رفعت راسي شفته مشه دخلوا جوه الأمام كلت لأختي
_ ماكو شي راح ياذن
هند رفعت راسها أبتسمت وكالت "
خل نكوم نتوضى ونرجع
كمنا شلنه .. الجهال أني وياها رحنا عالحمامات توضينه ورجعنا شويه كعدنا وصارت وقت الاذان
صلينا بس صلاة المغرب اختي يلا ويلا مستعجلة ماعرف شبيها رجعنا عالبيت بالطريق نمشي صادفنه
أحمد ابن عمي اخو هند
وكف كبالنة وكال "
هاا راجعين منوقت اليوم شعجب؟
أختي _ والله أني رجعتهم
احمد _ دومج مستعجلة هههه
أختي _ ايي وآلله ههه
احمد _ يلا يابه ارجعوا
هند _ وأنت وين رايح ؟
_ رايح اصلي
هند _ شعجب اليوم تصلي بلأمام ؟
احمد _ حبيت اصلي تحقيق خوب تحقيق فتحتي
هند_ استغربت
احمد _ دولي أم الاستغراب
هند _ منترجع جيب وياك حبشكلات فدوة احمد مو تنسه
احمد _ ماتشترين بطريقج
هند _ ربع دينار ماشايلة وياي والله
احمد _ اكو واحد يطلع بره البيت وماياخذ ويا مصروف
هند _ نسيت ديلا حرك جيبك وجيب وياك
احمد _ ماشي
راح احمد واحنا كملنا الطريق .....وصلنا هند البيت مالتهم ورجعنا دخلنا للبيت نزعنه العبي دخلنا المطبخ اني وفاطمة أختي نصب العشة
جاي نصب منزلين الجدورة بالكاع هي كبالي تصب التمن ،
_ زهراء اريد احجي وياج
_ ايي احجي
_ أقارب عباس يريدون يجون عليج خطاب
اخذت نفس تذكرت حمزة كتلها "
منو هذا ؟
_ خريج كلية العلوم صارلة سنتين من متخرج وهسه هو بالجيش لأن تعين ماكو ولد خلوق وحباب كلش
واهله خوش اوادم
_ شسمه ؟
_ أركان عمره ٢٨ سنة
_ وين شايفني ؟
_ شايفج أكثر من مرة ومعجب بيج وكايل لأمه عليج واجتنه اوت البارحة حجت وياي واني حجيت وي امي وبيبي كالولي الرأي رايج أنتِ ولازم احجي وياج واشوف رأيج
اخذت نفس نزلت الماعون المرك بالكاع اخذت صفنه بكلامها باوعتلي رفعت حاجبها
_ هاا شتكولين ؟
_ ماعرف لازم افكر
_ فكري منا الباجر ورديلي الجواب والله الولد ميت عليج وحرمات يتفوت والله خوش ناس وعالم
_ الله كريم فاطمة
_ الله كريم
وره العشة اجه زوج أختي عباس شكد احبه واحترمه خوش ولد وحباب ومحترم حيل بقوا لحد ١١ بليل وراها
طلعوا بره يرحون اجه كبالي وكف
عباس _ حجتلج فاطمة عن ابن عمي اركان
زهراء بخجل _ اي
_ شنو رأيج بي
_ أني كتلها أفكر وردلج الجواب ترى أني ماشايفه شكله وماعرفه علمود اقبل بي بسرعة
ضحك وكال _ تدورين حلوين زهراء هههه
باوعتله وأبتسامة على شفاي _ معناها موحلو
ضحك _ هههههه
فاطمة _ هاا عباس تضحك ؟
حسين _ شحجت وياك وضحكت عباس ؟
زهراء حجلت حيل ...ماعرف شكول هو صار يضحك بصوت عالي وهم يسئلونه اريد اشرد بريشاتي
وين مادري ؟
عباس _ هيج مو وي زهراء تذكرت موقف وضحكت
حسين _ هاا
فاطمة _ خير ان شاءالله
عباس_ هسه تشوفينه بعينج وبعدها احكمي عليه
ماشي أختي الصغيرة
_ ان شاء الله
راح منيمي وكف يم فاطمة اجه ابنه علي اخذه بحضنه واني افكر بكلامة عباس مستحيل يختارلي شخص موزين هو يحبني ويحترمني معتبرني أخته الصغيرة
يخاف علية حيل مثل مايخاف .....على أخواته طيب ليش مافكر بالعرض الزواج اذا لولد خوش ولد وشكله حلو و
معدل شكو بيها اقبل ارتبط وخلص
منا حمزة طلعلي من .جديد واخذ أختي اخاف يسببلي مشاكل اذا شافني بعدني بنية وبدون زواج وهو واحد قذر واطي كلشي استرجي من عنده
راحوا بيت أختي بيبي ...... راحت نامت وامي هم راحت نامت بس بقيت اني وحسين كاعد كبالي
_ زهراء
_ هاا حسين
_ حجت وياج فاطمة وعباس بخصوص اركان ابن عم عباس
خجلت حيل _ ايي حجوا
_ وأنتِ شنو رأيج
_ والله حسين بعدني مامفكرة
_ اني اكول فكري زين يلا تردين الجواب النهائي
_ هو هم هيج كلت
_ أني شايف لولد مرتين لو تلاث خوش ولد وبالجيش يكولون واحد محترم حيل وأخلاق عالية وهاي ألاشياء حلوة
بالولد اني اشوفها ..
_ اهم شي الأخلاق عندي
_ واني هم مثلج عندي الأخلاق فوك المال وفوك كلشي لأن المال يجي بعدين بس الأخلاق والاحترام
شيجيبهن ذني بعدين
_ صح
_ لذالك فكري زين وردي الجواب
_ ان شاء الله
_ ان شاء الله، مانعستي ؟
_ والله نعست حيل وأريد انام
_ كومي نامي لعد هههه
_ ههههه كايمه تصبح على خير
_ أنتِ من اهل الخير
ثاني يوم الصبح خابرت انفال عالساعة بال١٠
باركتلها واطمنت عليها جانت فرحانه حيل خطيه عاتبتني علمود ما اجيت للعرس اني وهند
خجلت حيل ماعرف شكوللها كتلها وتمرضت وهند بقت وياي اعذريتي بالسبعة ان شاء الله اجي لعندج
عاد قنعت خطيه وراها سديت الخط من سمعت صوت حمزة كاللها منو وياج عالخط
_ أختي زهراء
كال _ شتريد داكة ؟
وكع قلبي بالكاع حتى الموبايل وكع بالكاع من نفتح الباب الغرفة بدفرة سمعت صوت عالي
_ حيوانه ليش ماكتيلي
إلتفتت وره ظهري جانت هند خليت ايديني عالصدري لتقط أنفاسي _ الله ياخذج اخذتيلي قلبي شبيج خبلة
_ شلون يجون خطاب عليج وماتكولين هاا
_ منو مالج؟
_ منو مالج شنو ؟ احجي عدل ولج
نزلت بالكاع شلت الموبايل اباوع عليه اخاف مكسور الحمدالله مبي شي كمت كتلها
_ حتى الحجي طار من حلكي منوراج بس كوليلي أنتِ شنو من بشر تدفرين الباب هيج جنج ارهابية
تخوصرت تباوعلي وتهز بخصرها مثل المصريات ...
منو هذا اركان وشلون شكله حلو
لا زنكين فقير كولي
_ لاا عندج كل المعلومات بعد ماكو داعي اكول
اجت وكفت كبالي _زهيرة تغردي لو اخليج تغردي بطريقتي
_ اغرد شنو بلبل صايرة
ضربتني على راسي ابيده _ غردي
_ اااه راح اغرد والله بس لا تسودني علية فدوة
كعدت عالجرباية خلت رجل على رجل ...
تعالي اكعدي ابصفي وغرديلي كلشي
رحت كعدت يمها مبيه حيل تشحطني شحط
اعرفها خبلة كتلها
_ بلأول خابرت انفال وباركتلها
_ ايي حجتلج شصاير وياها باول ليلة
_ هند شبيج ؟
_ شنو شبيه غير حجيتي وي أختج الصغيرة ولازم
سئلتيها شصاير ماصار وياها
_عوزي لو اسئل والله
_ امداج عوبه لو أني سئلت على كلشي ايي شلونها اخبارها اخاف ماكلها قليل الأخلاق
_ لاا بعده ابني ادم ههههه
_ هههه عبالي صار وحش واكلها ههههه
_ ههههه تعرفي سديت الخط من سمعت صوته
_ وين سمعتي صوته؟
_ يكوللها منو وياج عالخط
_ ايي
_ هي كالتله اختي زهراء ريد يكوللها شتريد دباعي شكد غبي
_ امداه هذا شبي مختل لو شنو
_ نذل وربج
_ اعرفه نذل هسه عوفينه منه خليولي وكوليلي
اركان منو هذا ؟
_ ابن عم عباس
_ بس لا يطلع ابو عيون زرقة
_مدري بعد وآلله
_ يلا أنتِ مايهمج العيون أنتِ يهمج الأخلاق مو
_ اول شي اي الأخلاق لأن من شفت أخلاق حمزة كرهت شكو رجال بدون أخلاق ثبتلي الأخلاق اهم شي بالحياة بس اريد شكلة بي بركة يعني ينطلع بي باب البره
_ لازم حلو ومعدل خوب تاخذين واحد اجكم
وأنتِ مصكصكة على أخر
_ والله أني بعدني مامقررة
_ شتنتظرين ؟
_ جاي افكر بالموضوع كلت لاختي اليوم الصبح
تنطيني مهلة مدة أسبوع
_ شدعوة مدة أسبوع شعندج
_ أريد افكر زين
_ ولولد شايفج؟ يعرفج
_ ايي شايفني أكثر من مرة وكايل خل تاخذ راحتها بالتفكير
_ هذا مبين ولهان بيج ههههه
_ يمكن ؟
_ مثل حظي ههههه
لزمتها من خصرها ابيدي بقوة _ مثل حظج طلعلج عاشق ولهان ونطيتيه طرد من الباب
كمزت للكاع بسرعة _ بس المخابيل الله يشمر عليةمنو اجه براسه خير وماقابله بي
_ امده حظي ريان مخبل
_ ايي مخبل وعيونه زرقة
_ وأنتِ مال عيون زرقق أنتِ مال عيون حول
_ عيون حول ولا عيون زرقة
_ ان شاء الله يطلعلج ريان من جدة وجديد يربي
دعاء فقيرة يرجع ريون
_ انوب فاتحة زيجها وتدعي الحيوانه ولج بطلي
دعاء والله ماريده ماريده
_ ربي دعاء فقيرة بعد تزوج هنودي الريون العاشق الولهان
اجت عليه مطلتني عالسرير وتضرب بي "
ريان عاشق الولهان ان شاء الله
مايرجع للعراق ابد
جرت شعري بايدها "
وهذا الشعر الطويل راح اكطعة لج اذا جبتي
طاري ريان انووب
_ اااه هند اكعدي شعري ااااه تملخخخ اااه
كرصت اخدودي ابديها "
تكولي بعد ريان
_ لا لاا ماكول بس اكعدي اكعدي
نزلت من فوكي للكاع وكالت "
اموتج اذا جبتي طاري ريان ابو
عيون الزرقة
كعدت عالجرباية اعدل بشعري "
عاد ميت عليج هو خبلة
ليش كتلتيني
_ اذبحج والله
_ بعد ما احبج
_ غصبا عليج وعلى الخلفوج تحبيني
باوعتلها _ ولج شنو من بنية أنتِ ماعرف شحب منج ريان لو يدري بيج خبلة هيج جان شرد بريشاته
_ لا تخليني اجيب اجداد اجداد اجداد ريان
افضل الالج تنجبين ... زهيرة
_ سكتت سكتت والله
_ عفيه غردي
_ شغرد ؟
_ تقبلي لا
_ مو كلتلج راح أفكر مدة أسبوع
_ نروح للسبعة مالت انفال ومن نرجع ترجعي
الجواب النهائي مو
_ ايي
_ أني اروح انتقم من حمزة قليل الأخلاق هناك بيتا
_ شسوين ولج؟
_ اكسر ايده لمدت عليج وكرصت خصرج
_ عززة العزاج ولج انسي
_ ماكدر أنسى والله صعبه حيل انساها له
_ خليولي واحد واطي شنسويله
_ الواطي يتأدب
_ إكعدي راحة مابينه حيل وياها
_ أنتِ مبيج حيل أني لا بيه كل الحيل
_ لا يالكعبة تخبلت المرة
_ هو أني خبلة ماكو دأعي اتخبل بعد
_ عوفج من قليل الأخلاق ريان وين مسافر ؟
اجت كعدت بصفي _ والله مدري أنتِ تدرين ؟
_ لااا مدري
_ بقت حسرة بقلبي أريد اعرف وين مسافر
؟ ابو عيون الزرقة
باوعتلها بخباثه "
متريده وتكره اسمة وتريد
تعرف اخباره ؟
خزرتني _ اذبحج
_ لااا شبيج تخبلتي هند جوزي
_ ادخلي على الفيس بوك مالته وشوفي منزل منشورات
وين وهسة نعرف وين مسافر
_ هم صدك
اخذت الموبايل من فوك المخدة بايدي دخلت عالفيس بوك كبل على حساب ريان انتظر يحمل الإنترنيت
ضعيف حيل جان
_ مايحمل
_ كومي خل نكعد عالدرج
كمنه رحنى عالدرج كعدنا عاد حمل نفتحت الصفحة نباوع بالهفه ننتظر يحمل الصفحة كاملة ونشوف المنشورات
مالاته شمنزل مامنزل ؟
حمل أول صورة منزلها بلأمام الرضا ( ع) بايران وي شباب بعمره تقريبا جانوا اربعة وهو الخامس
_ يران
_ شعنده بايران هذا ؟
_ مدري والله بس طالع حلو حيل بالصورة
_ اي
ضحكت _ ههههههه
_ شبيج تضحكين ؟
_ كتي طالع حلو وهاي آول مرة تكولي على ريان حلو
_ اني مو عليه كلت حلو على هذا ابو الموروني
_ امممم علية
_ على خالتج
_ امداج على هالحجاية
_ واني شكلت بس كلت على خالتج ههههه
_ عوبه فلا تعرف تحجي
_ علميني فدوة
_ جامعة اربع سنوات ماعلمتج اجي أني اعلمج ابو
طبع مايغير طبعة غير الجفن
_ صح والله نزلي جوه خل نشوف بقية الصور
انطيتها الموبايل "
هاج أنتِ كلبي
اخذته كامت تكلب بالصور وأني اباوعلها احسها ملهوفه على شوفه ريان يمكن تجذب وتكول اكرها وجاي تمثل الثكل بقيت اباوعلها واضحك بسكوت ماكدر احجي هسه انكتل
منها اعرفها مخبله وشاخطة
يتبع ...
لا تنسون كل شخص يعلق ٥ تعليق حلوة ويخلي لايك