#زوج أختي والماضي
بقلمي انا الكاتبة #رواء هادي
تابعوا حسابي على الانستغرامroyan4h@
لاتنسون تعلقون بين الفقرات وتخلون لايك قبل القراءة تشجيع لي من أجل الاستمرار ...
قراءة ممتعة للجميع.
ليس شرطا من تحبه يسعدك و لا كل من ، تكره يحزنك فالسكين رغم نعومتة ملمسها ،تجرح والدواء
رغم مرارة مذاقه يشفيك .
زهراء رجعنا عالبيت مالتنة طايرة منالفرحة كلت لامي ولبيبي ابوي تكفل بكلشي بخصوص دراستي بالحوزة وكال
اني اتكفل بكامل المصاريف
بيبي ماصدكت وكالت شجاه وتغير وصار حنين !؟
حجيت وياها وكتلها هو حنون بس غير مرته وحدة خبيثه ومتحب يقترب النه ويزورنا ويدارينة ويجوز هسة
حس على روحة وكال ألتفت لأولادي
ماقتنعت ابد خليت وكامت رحت بالغرفة طايرة من الفرحة منتظره شوكت اروح للحوزة ولتقي هناك بالملايات
لعروفات بنجف الاشرف
راح حسين وده جم مستند الـ كاظم وراها رجع وره ساعة
_ راح يسجلج ويكول وره ثلاث أيام تجي تداوم
_ ان شاءالله
رجعت عالغرفة اخذت..... الموبايل وكعدت عالجرباية اراسل هند العوبة على الفيس بوك
_ هند العوبة موجودة ؟
ردت علية وره اربع دقائق ...
موجودة زهورة ايي شكو ماكو
_ باركيلي
_ ألف مبروك بس على شنو ؟
_ سجلت بالحوزة وراح اصير ملاية هههههه
_ صدك ولج سويتيها وسجلتي بالحوزة ؟!!
_ ايي والله
_ خررب بيومج واني عبالي جنتي تضحكين علية
وطلعت السالفة صدك
_ اني مو كلتلج اريد أسجل من قبل
_ ايي كتي بس عبالي تشاقين
_ لا ماتشاقه
_ على العموم ألف مبروك مرة أخرى موفقة ان شاء الله
_ الله يبارك بيج ،ايي وين ماوين وصلتي
_ وين اوصل؟
_ بالتفكير
_ياتفكير ؟ هذا
_ ريان لتغشمي روحج
_ اهووو هم ابو عيون الزرقة ايي ليش تذكريني
بي مو جنت ناسيه والله
_ انجبي شنو ناسية فكري بكلامي
_ زهراء والله مو بايدي اليوم حاولت اباوع عالصورة عالفيس بوك مكدرت اشوف عيونه اصلا خفت سديت
الإنترنيت ورحت نمت
_ تخافين ؟؟!
_ والله أخاف عيونه تشبه أعيون الدكتور ستار لجان
ياخذنه تذكرتيه ؟
_ ايي اتذكره دكتور ستار وبالمناسبة هند
_ هاا
_ تجين وياي اليوم نروح يم بيت ام عباس
_شسوي اروح يم بيت ام عباس ؟
_ اروح اجيب كم شغلة من عدهم لبيبي واني مايخلوني
اهلي اطلع الوحدي تعاي وياي
_اممم
_ هاا
_اكول لامي
_ماشي كوليلها هسة واذا قبلت تعاي علية علمود نروح هسة
_ خل انطيها خبر وارجع
__انتظرج
دقائق ورجعت ردت _ جايه
_اوك
كمت وديت الموبايل عالشحن رحت عالكنتور طلعت الشال والعباية لبستهم طلعت انتظر بالطرمة اجت هند شويه وندك الباب رحت فتحت طلعت بوجي
_ يلا امشي بس بسرعة نرجع
_ لعد شعدنا دقائق ونرجع
سديت الباب وراي وطلعنا نتمشى بالشارع بيت بيتين وتلاث ورابع بيت ام عباس أستغربنه سيارة بيضة طابكة
بالباب مالتهم
هند _ منو يمهم
_ مادري ؟
_ خل نرجع بعدين نجي
_ لاا شنو نرجع غير متصلة المرة بيبي وكايلتلها
تدزنه احنا ناخذ الاغراض
_ اخاف يمهم خطار واحنا ناس غربة عيب
_ شعلينا احنا واذا خطار بس ناخذ الاغراض ونرجع
_ بعد أنتِ عناد
دفعتها _ امشي صايرة تخجل المحروسة
وكفت التفتت علية "
والله استحي ماعرف ليش
_ اني ما استحي امشي
_ اسمعي زهراء
_ شسمع ؟
_ اني راح أبقى هنا واكفه وأنتِ ادخلي جوه جيبي
الاغراض وتعاي ماشي
كتفت ايديه اباوعلها ...
اروح أني وأنتِ هنا تبقين الوحدج زين
ماتخافين ريان يطلعلج !
فتحت اعيونها وكالت ...
أمشي خل نجيب الاغراض ونرجع بسرعة ...
يلا امشي
ضحكت بقلبي بس..... مبينت لها اعرف بيها جبانه استغلها بخوفها من ريان هههه ماتجي الا بالعين الحمرة دكيت هي الباب ننتظر ينفتح انفتح الباب بقينا مصدومات
بشكل الرجال الطلع لنه
_ السلام عليكم
هند رجعت يم زهراء بسرعة من شفت ريان فتح الباب من شافنه سلم وأبتسم ردت زهراء اني
محجيت أصلا لساني ربط
_ وعليكم السلام ريان
_ تفضلوا ادخلوا جوه
_ دام فضلك بس خاله ام عباس موجودة
_ ايي عمتي موجودة
هند همست الزهراء _ شيصير منهم ؟
ريان أبتسم يمكن سمعني وكال ...
أبن اخوها شلونج هند
هند بدون ما اباوعله انظاري بالكاع جانت رديت
بصوت شبه مسموع
_ الحمدالله
_ دومج بخير ان شاءالله .. عليش واكفين بره تفضلوا
زهراء هند اجت يمي خايفة ....مبينه منه وهاي شلون صدفه شافته كبالها وهي تخاف منه فوك كلشي دخلنا جوه
هو كبالنة يمشي يمكن عرف بيها
مضايقة من عنده دخل قبلنا للبيت اسمعه كال
_ عمه زهراء وهند اجوي لعدكم
ام عباس _ هلأ بيهم خل يتفضلون عمه
ريان رد من عتبة الباب "
تعالوا ادخلوا عليش واكفين
دخل هو احنا تقدمنا خجلانات مانعرف منو يمهم هذولة غير ريان نزعنه من رجلنة ودخلنه جوه سلمنه
_ السلام عليكم
مجان احد غريب موجود بس ريان ولدهم نعرفهم ٣ واحد مزوج واثنين اصغار دا يدرسون.بالثانوية كعد ريان يم ام عباس وانظاره على هند
ام عباس _ الحجية شلونها
زهراء بقينه واكفات وحده بصف لخ ...
الحمدالله بخير تسلم عليكم
_ الله يسلمها .. شلونج هنودي اشو.خجلانه احسنج
هند خجلت بالزايد مااريد اباوعلها وريان كاعد
بصفها يباوعلي احسه رديت
_ الحمدالله بخير خالة
_ يااا كوه تطلع الحجايات شبيج خاله خجلانة
_ لاا مخجلانة
زهراء _ خالة اذا ماتصير زحمة الاغراض جاهزات؟
ام عباس حجت ويه بنتها ...
جاهزات كومي يمه جيبي الاغراض
كامت البنيه وكالت ام عباس ... اكعدوا عليش واكفات
هند _ مرتاحات بالوكفة خالة
ريان _ واضح ههه
هند بس مااردت اذبحة هذا شبي ؟ بس يباوع ويضحك ماشايف كبالة بنات خررب بحظي .... منين طلعلي هسة لو ادري يي يكون اقارب والله جان مجيت ابد
وي زهراء
جابت الاغراض البنيه اخذتهن زهراء اشو بقت تحجي وياها فوك ٤ دقائق عبالك متعمدة تبقى تحجي وتسئل
على هذا وهذالك وهذا ريان
سمط اجداد اجدادي بنظارته علية بس مااريد اشرب من دمه واخلص منه من شوكت هيج عينه زايغة
اجه الاتصال الـ ريان كام طلع ...بره ارتاحيت كلش
من طلع يخابر نبزت زهراء
_ هم يلا نمشي
همست _ اي
زهراء _ مرخصتج خالة
_ مرخوصات حياتي سلملي على الحجية وعلى امج وأنتِ هم هند سلميلي على الوالدة والوالد
هند _ يوصل خالة
طلعنا بره البيت اخذت نفس طويل بالطرمة بدون وعي كتلها
_ ردت اموت واني جوه وهذا ابو عيون الزرقة اكلني
اكل بعيونه جنت متمنيه افكسهن له
فزيت على صوت كحة رجولية منورة ظهري ...
احمم
التفتت بسرعة جان ريان خزرني بعيونه راسن وكال ...
تفكسين عيوني هند ؟
هند مرديت اصلا جريت ايد زهراء ومشيت بسرعة ميته من الخوف سمعته كال
_ تعاي فكسيهن اذا يريحج هذا الشي هههه
مرديت اصلا سويت روحي مسمعت .....كلامة فتحت الباب وطلعت وكفت بره كتلها
_ الله ياخذه منين طلعلي جنه طنطل
_ هو مو جان وراج من البداية أنتِ مشفتي
_ سمعتي شكال ؟
_ ايي خطيه ترى يحبج ومايتحمل
_ مايتحمل شنو؟ لج مايخجل يباوعلي كبال ولد
عمته هسة شيكولون
_ شدراني اني امشي لا يطلع مرة ثانية
باوعت عالباب وكالت ...
جوه دخل تلكينه .. هاي السيارة مالتة شي ؟
_ يمكن
_ راح انتقم لعد
_ شسوين ؟ ولج
راحت يم السيارة وكفت باوعت بالكاع كتلها ...
شراح تسوين هند ؟
دنكت بالكاع شالت حصوة حاده جنها سكينه شخطت الباب السيارة بقوة وكالت
_ هاي مني لابو عيون الزرقة هدية
_ عززة العززاج هاي شسويتي والله هسه يذبحج اذا
شافج امشي خل نولي ...امشي
شمرت من ايدها الحصوة واجت تضحك ...
ارتاحيت حيل والله جرحتها اله ههههههه
_ طاح حظج ليش مو حرامات سيارة جديدة هيج سويتي بيها شسوالج الولد بس كولي
_ خوفني ويباوعلي واني ماتحمل احد
يسويني فرجه بنظرات
_ والله اذا عرف أنتِ هيج مسويه بالسيارة
والله يشنقج شنق
_ اشحداه
طميتها ابديني الاثنين _ امداج زعطوطة
طول الطريق ارزل بيهاا هي ...ولا جن بس تضحك عبالها مسويه انجاز عظيم واني ادري راح يعرف اكيد هي سوت
هاي الحركة يعرفها وحدة عناد
وراح تسبب له مشاكل هواي
وصلنا للبيت هي من عتبة الباب رجعت ..ع بيتهم واني دخلت انطيت الاغراض لبيبي وصلت السلام وره العشة اهلي كاعدين بالاستقبال يحجون واني كاعده روحي طافرة سمعهم
يكولون باجر يجون عيال
انفال علمود يكطعون مهر محكمة اصلا ماجان بالي يمهم خليت وكمت بالي كله يم هند ماعرف وين راح توصل وياها وي ريان وشلون راح تنحل هالعلة
رحت تمددت بالفراش مالتي اخذت الموبايل بايدي تصفح فيس بوك اجاني إشعار من ريان
وكف قلبي عن النبض اكيد عرف هي مسويه الدكة
الناقصة بالسيارة مالته
فتحت الرسالة المكتوب ...
زهراء راح اسئلج سؤال بس
جاوبي بصراحة
اخذت نفس كلت ...
راح اجاوب والله وشيصير خل يصير وي هند.طبها
مرض خل تتحمل عمايلها الخبيثه
_اسئل وان شاءالله اجاوب اذا اعرف الجواب
_ اكيد تعرفين
_ اسئل؟
_هند اللي شخطت السيارة ؟
_ تريد الصدك ريان
_ اي اريد الصدك
_ هي والله شخطتها
_ هههههههه عرفت بيها راح تسوي شي
_ ايي وشروح؟ تسوي وياها هسة ؟!
_ ماسوي شي باجر اودي السيارة اعدلها
وخلص قابل شسوي
_ مضايج ؟
_ لا ماضايج والله بس حبيت اعرف هي لو لا
_ عجيب أمرك لو غير واحد بمكانك جان كلب الدنيا
كلب علمود السيارة
_ ماتسوى والله
_ لهالدرجة تحبها ؟
_ مو احبها اموت عليها وحق شهيد كربلاء
_ ربي يجمعكم
_ الله يسمع من حلكج .. اكلج هي شكالت عني ؟
_ والله يا ريان تكول مااريدك
_ اعرف راح تكول ماريد من البداية بس بلكت تقنع بي أنتِ من يمج فدوة قنعيها وخليها تاخذ عني نظره حلوة
ترى ماعرف شبيها وياي تخاف
_ والله اني حجيت وياها بس ماكو فايدة
_ شلون هسة لعد.؟
_ تعرف ليش متريدك
_ لا ماعرف ؟
_ تكول عيونك الزرقة تخوف واني مااريد واحد عيونه زرق
_ ههههه صدك جذب هاي شبيها خبلة شنو تخاف من
عيوني شسوي اني غير الله خلاقني هيج
_ هي خبلة وهذا تفكيرها
_ راح البس عدسات علمودها اذا تريد
_ ماتريد
_ اروح اغير لون عيوني علمود تقبل بي قابل
_ شنو تغير لمونه نسوان ألف وحده تتمناك
_ من ألف اني اريد وحده منهن وهي هند
_ وشلون بيها هند شلون
_ اني اعرف علاجها شنو
_ ريان فدوة اروحلك لا تسوي شي غلط مثل هذيج الليل اكعد عاقل واني اوعدك احجي وياها وبلكت الله تقبل بيك وتكونون سوه بقرب وقت
_ ماسوي شي غلط والله راح اسوي شي حلو
_ شراح تسوي ؟
_ نهاية للأسبوع القادم راح تعرفي
_ ان شاءالله خير مو شر ريان
_ كل الخير ان شاءالله، أسف اذا زعجتج زهراء
بس تعودت احجي وياج والله
_ لا عادي مصار شي هلا بيك ريان
_ وبيج اكثر تصبحين على خير
_ وأنت من اهل الخير باي
_ بايات
طلعت من المحادثة اهفي بايدي هذا الولد طلع ميت عليها وهي ولا بالها ولا خاطرها تبادلة الشعور
_ امداج هند اذا رفضتي والله يحبج حيل وين تلكين هيج إنسان يحب وحده وكلشي مستعد يسوي علمودها
والله قليل حيل نلكه هيج أشخاص
الله يهديج ان شاءالله وتقبلين بي والله خطيه الولد هسة مشلوع قلبه شلع منوراج
ثاني يوم الصبح .
كعدت كالعادة سويت ......ريوك الأهلي وحسين طلع بالشغل كملت الشغل وكعدت عالدرج أمي اجت كبالي
_ راح اروح اشتري مسواك نسوي دولمة اليوم
_ الله صار هواي ماماكلين دولمة
_ اي هواي
راحت اخذت العباية وطلعت واني كمت يم بيبي شفتها شتريد ماتريد بس طلبت مي انطيتها ورحت عالمطبخ اجهز لحم وجهزت شوي اغراض موجودات عدنا
بالثلاجة ربع ساعة واجت أمي كعدنا بالمطبخ .....أني وياها نشتغل طفت الكهرباء صار المطبخ حار نار
ضجت _ هسة وكتها تطفئ
_ هاي هي الكهرباء عدنا تجي ربع ساعة وتطفئ خمس ساعات تحملي
_ اتحمل واسكت خل نروح نسويها بالاستقبال يم بيبي
_ يلا
اخذنه الاغراض يم بيبي كمنا نسوي بيها دقائق قيلا وخلصنا اخذتها اني الجدرية خليتها عالطباخ بقيت بالمطبخ أنتظرها تطبخ لأن اخاف تشيط
والعرك يصب من كصتي حارة نار اهفي بايدي على وجي فتحت قلق الجدرية البخار صار بوجي
حركني
_ ااه هسة وكتك هو أني صايرة بيضة مستلكة اااه .. اااه
وره فترة صارت طفيت الجدرية وطلعت رحت عالبيتونة فتحت الباب السطح والشبابيك البيتونة لأن حارة
صاير البيت حيل واحنا بالصيف بنجف
جونه يصير ناار جهنم حتى المبردات تكوم تسحب سموم ماهلكد حار جونه يصير
صار وقت الاذان اذن كلمن كام يتوضى صلينا كلنا واني رحت قلبت الجدرية جهزت الغدة دخل حسين وي
گلبي الجدرية
_ اليوم دولمة مسوين
_ اي
_ ميت منالجوع زهورة بسرعة جيبي الغدة
_ ثواني ويكون عندك
أبتسم وطلع واني كملت الغدة وطلعت ماعون لهند الخبلة لأزم أذكرها مثل ......ماتذكرني كلماتسوي شي تذكرني خطيه تحبني واحبها حيل اخوات احنا ليشوفنه
وره ماكلنة الغدة شلت الصينة صبيت جاي الهم اخذت حصت هند ورحت منفوك الحايط اصيح عليها والجو حار نار بره الشمس صكعتني صكع
طلعت _ هاا ولج خبلة طلعة بالحر شتريدين ؟
_ هالج حصتج من الدولمة
اجت اخذتها _ هاي ماناسيتني ؟
_ شلون أنساج عوبه غير اختنك اذا اكل شي عليج
_ سوده علية حبيبتي أنتِ
_ فدوة العمرج حياتي هاج اخذي
_ اكلج اكلج زهورة
_ كولي ؟
اجت بصف الحايط صعدت عالكرسي صارت كبالي وكالت بهمس _ ريان دازلي طلب صداقة على الفيس
_ لو تدرين شصار البارحة بالليل ؟
_ شصار ؟
_ عارف أنتِ مشخطة السيارة مالته واجه حجه
وياي وكالي ..
شهكت بخوف"
شكالج ولج وشراح يسوي وياي
؟ يمة اني سويت
أبتسمت كلت خل أخوفها شوي .
_ يكول إلا اندمها على هاي الدكة اني محترمها وعايفها براحتها وفوك كلشي أحبها واريدها بالحلال تكون أم بيتي وچنه لامي هي تتبطر علية وتخرب السيارة مالتي هيج
تجازي الرجال الزين ..
سدت حلكي بايدها بخوف،
_ لا تكملي فدوة اني سويت هسة والله يجي للبيت مثل هذيج المرة هسة شراح اسوي زهراء
بعدت ايدها اجاني صوت حسين من الاستقبال ،
_ زهراء تعاي فوتي حارة بره لا تضربج ضربه شمس
رديت_ جايه
_ وهسة شلون زهراء ؟
_ شعلي اني اتحملي غبائج مو كلتلج أكعدي راحة وعوفي السيارة مالته هسه شيخلصج منه وأنتي تعرفين الزلم شكد يحبون السيارت اذا توسخت يتخبلون وأنتِ
سويتي الباب خريطة العراق
_ الله يكسر ايدي ان شاءالله ولامسوي هالدكة فدوة ساعديني اخلص زهراء والله معندي غيرج
_ الحل الوحيد
_ شنو ؟
_ وافقي عليه وجفي الشر واوعدج راح يعيشج أميرة زمانج
باوعتلي بحاجب مرفوع معجبها الوضع
ضربتها على راسها بإيدي ،
_ طبج مرض اتحملي خبال ريان وأبقى بعنادج
وخل راسج اليابس يفيدج
نزلت بسرعة خربانه ضحك بقلبي خوفتها اعرف بيها جبانه حيل بلكت توافق بي واخلص منها ومنه دخلت
جوه حسين كال
_ ماتشبعون سوالف أنتو
_ لاا
_ هسة يصير بيكم ابو صفير واحير بيكم
_ مايصير اطمن
هفه بايده معاجبه الوضع كعدت يم بيبي كبال المبردة ميته من الحر كتلها
_ كاطعين مهر انفال
حسين _ ايي كاطعين وهسة هم يم بيت أبوي
يمكن اليوم يباتون يمهم
زهراء _ مبيها شي
أمي _ شوكت تداومين بالحوزة ؟
حسين _ باجر تداوم الصبح أني اخذها وارجعها بنفسي
زهراء _ باجر مو كلت كعب باجر أنت
_ هم كالوا بعد باجر تجي تقدم بنفسها وتتعرف
على الحوزة وتاخذ نظره عليها
زهراء _ هم صدك اخذ هند وياي هم
حسين _ هاي من زينات بعد
حمزة .كطعت مهر ويلي جو النجف شكد حار نار جهنم يشتعل شعل رجعنا عالبيت عمي كعدنا بالاستقبال كبال
السبلت ميت من الحر
كبالي أخوي يضحك، رامي بايده الموبايل يقلب ،أبوي نايم بالكاع عالفراش ولد عمي كبالي كاعدين واني جنت أتمنى ارد عالبيت وره ما نكطع مهر
بس أمي مقبلت وكالت أريد اروح أزور اهلي بالمقبرة وازور الأمام علي (ع) احنا جايين بعد
كمت رحت تمددت ... فوك الفراش خليت ايدي على عيوني أحاول أنام ماعرف ليش أجت ابالي زهراء فجأة
أبتسمت همست بداخلي _ وهاي جابها بالي، شنو بالي دوما يجيبها لي بوقت لغير مناسب
_ زهراء صارت ماضي وأنتهى وأنت بطل تجيبها لي كالمرة وتخرب علية للحظات الحلوات من سابع
المستحيلات بعد اشوفها كبالي
صح هي بقت حسرة .... بقلبي جنت متمني اخذ منها هواي أشياء بس ولو لحظة وحدة فكرت بيها أخذتها عروس لي بس جنت أشوفها كبالي لعبة اتسلى بيها لا اكثر
محب يتها أبد بس حبيت اكسر خشمها وكبريائها لأن أغلبية الطلاب الجامعة حاولوا يقتربولها وهي ترفض كالمرة واني سويت تحدي وي ربعي
وكدرت اجيبها للدرب بسهولة وربحت التحدي عليهم كلشي يصعب علية أحبه اني وأحب اجيب الأشياء الصعبة لأن بيها لذه تصير وطعم حلو يكون بيها بلأخر.
زهراء.صار وقت المغرب اخذت هند وروحنا للأمام كالعادة نمشي بشارع الطوس اني وياها هي كل دقيقة تلتفت يمين ويسار تخاف يطلع ريان اني شبعانة ضحك عليها
تخاف منه
_ لا تخافين ماموجود
_ اخاف يطلع هو جنه طنطل ماتحسين الا كبالج صاير
_هههه تخافين
_ ايي والله اخاف
_ اطمني اللي يحب مايأذي محبوبه
_منو كال يحبني ؟
_ هو كال يحبج
_ واني ما احبه ابو عيون الزرقة
_ باعي ريان كبالنة واكف
اجت وراي بسرعة _ زهراء
ضحكت _ اشاقه ههههه
ضربتني على جتفي بنص الشارع مناك الزوار فشلت
_ طاح حظج زهراء
_ امداج فضحتينا مناك الزوار
_ شلون تجذبين علية
_ شسويلج تحجين بحيل صدر ومن اجيب طاري ريان تصيرين دجاجة خانسة
_ من حقي اخاف رجال ويكدر كلشي يسوي واني
مرة لا حولة ولا قوة
_ خلي ايمانج قوي بالله وهنا امامج اطلبي القوة والصبر وخل يحلج علتج ويوجهج على الطريق الصح طبي
ادعي من كل قلبج وشوفي شلون راح تنحل
_ ونعم بالله
بالطريق الأمام وصلنا يم الامانات نزعنه الحذية خليناها بالامانات والموبايلات هماات ما حسيت الا شخص
طخني بجتفي بقوة
التفتت بسرعة انصدمت وتيبست بدمي طلع حمزة من شافني انصدم مثلي وبقى يباوعلي واباوعله بصدمة لا اني
احجي ولا هو يحجي
هند _ هاي شبيك أنت كل مرة تضربها
حمزة _ مادري أسف
زهراء سحبت انظاري عنه اصلا تجاهلته رحت يم
هند لزمت ايدها همست
_ امشي هند
هند _ شجابك هنا ولك
حمزة _ لازم اخذ رايج من اجي ازور حيوانة تعلمي احجي
هند _ لزم حدك ولتغلط
حمزة_اغلط نص
هند _ قليل التربية والأخلاق ماعليك عتب لو احراج... امشي زهورة امشي مزاجنة تعكر بشوفه الحقراء
حمزة. راحن من يمي وهاي هند لسانها اطول منها هانتني وراحت اتمنى اذبحها هسه وادفنها بالكاع وهاي زهراء حجاية وحدة ماحجت وياي واصلا ماباوعتلي ولا عبرتني
بقيت اباوع عليهم شلون يمشون حتى اختفوا بين الزوار النار شتعلت بقلبي شعل سديت قبضة أيدي بقوة
_ شلون تجاهلني هل الحيوانة حتى ماباوعتلي
وأنتِ هند اني اعلمج بسيطة
زهراء دخلنا الضريح لزمت الشباك كل قوتي وابجي وادعي من الله الإمام يحميني ويحمي هند وياي ويبعد كل شر عنه ويحمينه من كلشي ويوفقنا بحياتنا
ومايخليني اصادف حمزة بحياتي بعد والله تعبت كالمرة يطلع كبالي ويسوي شي غلط وياي اني اريد انسى الماضي واعيد ترتيب حياتي من جديد
واحقق جميع أحلامي وامنياتي وازوج شخص يحبني ويحترمني واعيش عيشة حلوة حال اي بنية وكون عائلة حلوة وصغيرة واصير ملاية معروفة بالنجف الاشرف
كملنا صلاة وزيارة طلعنا من الإمام نمشي بشارع الطوس انظاري بالكاع مااريد ارفع يعني اخاف
يصادفني حمزة
ما انتبهت إلا هند واكعة بالكاع عاطت _ اااه
انتبهت عليها بسرعة شفتها واكعة بالكاع بنص الشارع على بطنها نزلت لعدها بخوف
_ هند.شبيج وكعتي
غمضت عيونها بوجع ...
ظهري يوجعني ماعرف منو
ضربني ... اااه
التفتت بسرعة وره ظهري ماشفت احد رجعت
باوعتلها احاول اكومها
_ ماكو احد ؟
كعدت بالكاع بوجع ...
والله واحد ضربني وكعني بالكاع اااه. .
ظهري زهراء
العالم كلها تباوع علينا اجه كم شخص ورجال جبير بالعمر كال
_ شبيها عمي البنية وكعت ؟
زهراء _ والله معرف عمو وكعت فجأة بالكاع
وكالت واحد ضاربها ؟
المرهزبعمر متوسط _ اكيد واحد من الزوار لأن ازدحام عالطريق كومي يمة كومي
هند احس ظهري راح ينفطر من الوجع اكلت ضربة قوية حيل ماعرف منو ؟ ضربني بس ماردت ابجي تماسكت روحي كومتني زهراء والمره
زهراء _ شلونج هند
هند _ زينة
المرة _ الله يكسر ايده ان شاءالله شلون ايمد ايده
على بنية طاح حظهم
الرجال _ ناس شبعانة خبز يابة بيتكم وين خل اوصلكم
زهراء _ شكرأ عمو ماكو داعي بينتا قريب
عن هنا دقائق ونوصل
المرة _ اخاف يتعرضلكم مرة ثانية
هند خفت اكثر واجه ابالي ريان سواها اكيد لزمت
زهراء من ايدها _ زهراء
زهراء باوعتلها _ شبيج
_ ريان
_ ريان شعلي رجال اسكتي
زهراء _ لا والله ماكو داعي اكيد واحد من الطريق ضربها بالصدفة ويجوز مشافها هاي هواي الحوادث
هواي تصير ويه الزوار عمو
الرجال _ بكيفكم يابة ديربوا بالكم على روحكم
_ ان شاءالله عمو
راحوا المرة والرجال والعالم هم احنا رحنا نمشي هي لازمة ظهرها جنها حبلة بوجع بس ماردت ابجي عليها اول مرة اشوفها بهاي الحالة
ماعرف منو سواها ريان مستحيل يسويها اعرفه خوش أدمي ؟ بس منو ياربي
لازمة ايدي وكالت _ ريان هو سواها اكيد اااه ظهري
زهراء راح أموت ...
_ والقرآن مو ريان
_ مو هو كايلج راح يندمني على عملتي فاسواها اليوم
_ والله العظيم اني جنت اضحك عليج اصلا كال عادي خل تسوي اي شي يعجبها ماضايج منها
وكفت باوعتلي _ ليش جذبتي علية؟ لعد وخليتيني أخاف
_ رتج تقبلي بي والله أسفة هند مو قصدي
_ ضجت منج زهراء
_ حبيبتي أنتِ لا تضوجي والله اريد مصلحتج
واحبج واريدلج الخير
مشت كم خطوة وكالت "
يعني ماضايج من تصرفي ؟
_ ايي والله وطلب مني اقنعج تقبلي بي خطيه الولد يحبج من صدك وهاويج وشاريج
باوعتلي بحزن ،
_ قلبي مايتقبله شسوي زهراء شسوي
رحت يمها لزمتها من ايدها وامشي وياها "
حاولي تفكري بي من تنامين على
الله تكدري تتقبلي
_ صعب اتقبل
_ هند سؤال
_ جواب
_ تحبين واحد أنتِ
باوعتلي راسن ضحكت وكالت "
ايي أحبج أنتِ صدك عوبه أنتِ منو يستاهل
أحبه وانزل نفسي له
_ لا كلت اخاف وتحبين كلشي يصير لذالك
جاي ترفضين ريان
_ ريان خوش ادمي بس عيونه ما احبهن
لذالك جاي ارفضة ههههه
_ امداج ترفضين رجال يحبج علمود للون عيون ؟
_ ااه ايي ظهري رد يوجعني اااه
_ الله يكسر ايدي أيده ان شاءالله
_ اللهم أمين يارب العالمين
ريان اني جنت كل يوم اطلع وقت المغرب علمود اشوف هند اعرف بيها هي وزهراء كاليوم يطلعون يصلون صلاة المغرب والعشا بالأمام كمت كاليوم اروح
بس ماطلع كبالهم اباوع من بعيد عليهم بس اليوم انصدمت من شفت حمزة تصادم ويه زهراء ضربها بجتفها
وهي ماردت عليه تجاهلته
اما هند سمعت بيها تحجي على حمزة هو غلط وهي غلطت اعرف حمزة واحد نذل وشيطان كلشي يكدر يسوي علمود يوصل لشي اللي يريده واحد واطي
بقيت وراهم أمشي بشارع الطوس فجأة شفت حمزة ضرب هند بطريقة عالسريع واختفى بين الزوار من ضربها حسيت ضربني اني راسن وكعت بالكاع
بقيت حاير اروح اساعدها ؟ اخاف اروح وتكول اني لضربها تعصبت رحت وراه أمشي وكف بمكان بره كبال فندق شعل جكارة وبقى يدخن ويبتسم
اقتربت علية وكفت كباله اخزر بي ،
انتبه علية وكال بضحكة،...
هاا ريان
تحركت صرت كبالة تماما "
فرحان بعملتك القذرة ياقذر
باوعلي بعدم فهم ؟ ... شمسوي اني ؟
_ اسئل نفسك شلون مديت أيدك على بنية
لا حولة لها ولا قوة
باوعلي بنظرات مالها تفسير وكال "
منو كال أني ضارب بنية ! ؟
_ اني شفتك بعيوني ضربت هند
بلع ريجه شمر الجكارة من ايده وكال
... وأنت شعليك ...ولي منااا
أبتسمت بنفاذ صبر جريته من تيشيرت مالته علية بقوة ،
احمد ربك واشكره احنا بنص الشارع مو بمكان فارق عن العالم لجان هسه اكتلك وادفنك بالمقبرة يانذل شلون تمد ايدك على بنات العالم شلون جاوب ماعندك
ذرة أخلاق انت
بعد ايديني عن نفسه بقوى وكال...
مالك دخل أنت مو صاير محامي براسي
وتحامي البنات العالم
سديت قبضة أيدي بقوة ردت اجيبة بوكس بنص وجه بس وكفت العالم صارت تباوع علينا بنظرات شك واني معروف بالنجف حيل ابوي محامي معروف وجبير
اشرت بصبعي كباله بتهديد _ اذا شفتك مرة ثانية مقترب لهند لو الزهراء وحق شهيد كربلاء راح اسوي سوايتك سواية واخلي كل العالم تحجي بيك فاعذر من أنذر
ضحك بستهزاء وكال "
هههه خوفتني والله ههه باع جسمي
صار يرجف هههه
_تستهزء
_ونص هههه
_ لا تشوف وجي بريئ وتستخف بي والقرآن وره هذا الوجه عمايل سودة دير بالك حمزة من غضبي
_ خوفتني والله
_متخاف
_ابد وثاني شي شعليك بزهراء وهند
_مالك دخل بس حذرتك
_ شكو تهدد ؟!
_ حذرتك بعد ودير بالك تقترب منهم
عفته ومشيت منيمه جنت أتمنى اشبعة ضرب وانسي أسمه بس ماكدر عالم هنا ومااريد يكولون العالم علي اني واحد يدور مشاكل وموخوش ولد ويجي حجي على اهلي
منورة هذا النذل
الله ياخذه ابد مايبطل نذالة وسفالة ، قلبي بقئ يم هند ماعرف شلون حالتها هسه واني شفت شلون جانت
الضربة قويه اجت بيها ؟
زهراء جنت يم هند حتى تعشيت يمهم خطيه هواي متأذيه جانت من ظهرها حتى صاير مكان الضربه حمرة سئلوا
وكالوا شبيها كلنا وكعت بالأمام
لأن جان ازدحام حيل لفنه الشغلة ..... اذا دروا احد ضاربها بالشارع اكيد ماراح يخلونة نطلع بعد لو على كص اركابنة بقيت كاعدة يمها بالغرفة
هي نايمة عالظهرها وتضحك خبلة
_ تضحكين ؟
_ من الوجع والله اضحك
_ الله يساعدج هسه ماطاب ؟
_ شوي أحسن يمكن اكلت بوكس ؟
_ أنتِ بشنو حسيتي
_ بوكس والله قوي اجاني
_ الله يكسر ايده ان شاء الله منو هذا السواها ؟
_ اندري ياواطي ابن واطي سواها
_ ايي والله واطي
_ انطيني الموبايل خل اكنك شوي بلكت أنسى شوي الوجع
كمت _ هسة
رحت جبت الموبايل لها انطيتها رديت كعدت اخذت موبايلي أول مفتحت اجاني إشعار من ريان باوعتلها دا تقلب
بالموبايل مو يمي فتحت
_ السلام عليكم زهراء ، هند شلون صارت خوما متأذية ؟
نصدمت من هيج كال بقيت افكر بكلامها بس لا صدك هو ضربها وجاي يمثل علية ؟ ويكول أحبها وعادي تسوي
أي شي وياي باوعتلها
بحزن وكلت بيني وبين نفسي ....
سودة بكصتج هند بس لا هو سواها وجاي
يضحك عليج
باوعتلي هند مستغربة...
هاا شبيج تباعين ؟!
_ ماكو شي بعدج متأذيه
_ الحمدالله خف الألم اكثر من قبل
_ الحمدالله أني راح ارجع
_ وين باتي يمي فدووة
_ لاعيني مكدر ابات بيبي لوحدها تبقى بالغرفة
_ماشي
كمت اخذت العباية من فوك الجرباية مالت هند
لبستها انظاري عليها
_ ديري بالج على نفسج واذا صار وياج شي خابريني
_ شيصير قابل ؟
_ كلشي يصير مو بعدج متأذيه
_ ألم خفيف عندي والله هسه ربع ساعة يختفي كلشي
_ ان شاءالله يختفي كلشي وماتزورك الضربة للصبح
_ ياا بيش طالبتني ازورك
_ ماطلب بس كل ضربه قوية بلأخر تأخذ أثر
_ ان شاءالله ماتاخذ
_ ان شاءالله يلا تصبحين على خير
_أنتِ من اهل الخير
بستها من خدها وراها رجعت عالبيت الوحدي لكيت حسين بره واكف جان سألني عليها وراها دخلت جوه حجيت
كلشي الاهل كلام مو صح أول مرة أكذب
أني بطبعي مااكذب أبد بس اليوم ..... انجبرت لأن اذا عرفوا مستحيل يخلونها نطلع بعد بره أهلي واعرفهم
رحت سبحت...... وبدلت كعدت بالغرفة امشط شعري كاعدة بالكاع كبالي بيبي نايمة وأتذكر حمزة كرهت روحي ألف مرة
شلون حبيت هيج انسان
ثاني يوم الصبح حوالي الساعة بال ٨ خابرت انفال علية حجيت وياها طلبت مني اجي وياها علمود نشتري نيشان العرس هي بعدها صغيرة وماتعرف بهالمواضيع
طلبت من أمي اروح وياها مقبلت كالت ...
ناس غرب شنعرف منهم وادزج وياها خل امها خالاتها يرحون أنتِ بعدج بنية ماكو طلعة
_بكيفج بعد يمة راح اكوللها متقبل امي وخلص
_ ايي كوليلها واعتذري
حزنت رحت كتلها ...امي متقبل اجي
خطيه هي هم حزنت حيل وكالت عادي حقها متقبل ناس غرب يلا خيرها بغيرها ان شاءالله
_ ان شاءالله اعوضج بغير شي حياتي نفولة
_ ان شاء الله يلا مرخصتج راح نطلع
_ مرخوصة حياتي في امان الله
_ الله وياج زهورة
كملت أتصال وياها واجه ابالي ريان البارحة راسل واني مرديت عليه نسيت لأزم أعرف هو وره ضرب هند لو
واحد غير وشلون عرف بكلشي ؟
رحت كعدت عالدرج فتحت الماسنجر جان
ناشط الحمدالله راسلت
_ صباح الخير، ريان شلون عرفت هند متأذيه ؟
رد علية بسرعة ...جنت هناك وشفت كلشي ، هسه شلونها خوما متأذيه ، كولي زهراء تره قلبي
مثل النار عليها ؟
_ الحمدالله زينة بخير ، يعني شفت منو اللي ضربها ؟
_ الحمدالله اي شفته
_ منو ضربها ؟
_ انسي مااريد اذكرج بشي يمكن ماتحبي تذكري
_ احلفك بعزيز قلبك ريان كول منو ضربها ؟
_ ايي ليش تحلفيني والله راح تتأذين اذا عرفتي منو
_ اطمن ماراح يصير بي شي كول منو ترى اني
شكيت بيك أنت البارحة والله
_ تشكي بي أني ؟ ترى مو رجال اليمد ايده على مره
_ منو ؟
_ راح أكول ... حمزة
بقيت مصدومة من كال .....حمزة وتذكرت من تلاغت ويا بسببي كرهته أكثر منقبل هذا طلع مورجال ابد يضرب بنية علمود غلطت علية لك شنو من بني ادم هذا ؟
_ زهراء وينج خما صار وياج شي الووو
بقيت بصدمة حيارة نزلت دمعتي عالشاشة الموبايل منوراة ماجنت متوقعة يطلع بهل نذالة والسفالة والحقارة وتوصل ويا يضرب بنية بنص الشارع ومناك العالم
طلعت من شرودي للحظة مستحت دمعتي
رجعت كتبت الريان
_ مابي شي ريان ، بس شكد نذل حمزة طلع لك هذا معنده ذرة رجولة لو أخلاق ؟! يمد ايده على بنية
بنص الشارع
_ هه اللي يلعب على بنات الناس شترجين ، اصلا ذرة رجولة معندة هذا شبه لرجال فقط أختي
_ حجيك صدك ، أني اترخص
_ مرخوصة أختي وأسف اذا كلامي زعجج وذكرج بالماضي
_ لا لا اصلا ارتاحيت من حجيت وياك وبعدت الشك عنك الماضي نسى وراح الحمدالله
_ الحمدالله خليج قوية ولا تتأثري بالماضي ترر الماضي مضى وراح والحاظر ان شاءالله أفضل
_ان شاءالله باي
_ باي
كمت رحت عالغرفة دمعتي بطرف عيني ماجنت متوقعة بي هيج نذل وتوصل ويا يضرب هند كبال الناس وبنص
الشارع شنو من بني أدم هذا
لا عندة ذرة أخلاق لو ذرة غيرة لو رجولة كلشي ماعنده من هاي الصفات بس صفات القذرة يمتلكها
بقيت كاعدة بغرفة الحسرة والخنكة بصدري جبيرة ماعرف ؟ لمن احجي واكول أني تعبانه حيل صارلي سنوات وكرهانة روحي منورة حمزة ونذالته
كبال هند ابين ناسية الماضي وأتذكر شي منه لكن بالعكس متأثرة كلش بالماضي ولحد الآن دا يسبب لي مشاكل بعدني بالاحزان نفسها والألم نفسها بي ماكدر أنسى
شلون تحارش بي
بهذيج ليلة من طلب ..... مني أشوفه بره الأمام باليوم عيد القدير من هذيج ليلة عرفت بي واحد نذل
ومجان يريدني أكون شريكة حياته بس جان يريد يسلة وياي جني وحدة قليلة شرف ..... وحالي حال بنات لتسلم حالها بحالها هيج جان مصورني
الحمدالله كدرت اخلص منه بفضل هند ومن هذاك اليوم بعد انفصلت عنه للأبد مدار لساني على السانه القذر
مر اليوم عادي سمعت أختي انفال مشترية النيشان العرس اليوم جايبين كلشي وباقي بس الذهب كايلين تشتريه من بغداد لأن هناك عدنا معميل
ونشتري كلشي منعندة ومحددين موعد للعرس بعد أسبوع يكون العرس اني تحمست حيل أريد اشوف نسيبي الثاني شلون يكون هم حلو مثل الأول لو لا ؟
اجت امي وقت العصر من بيت عمي وسئلتها عن هند كالت زينة مابيها شي جنها صل ههههه
خربت ضحك الحمدالله طلعت .... بخير واني خايفة طول الوقت عليها واكول اخاف تأذت لأن حالتها
مو حالة جانت بالليل
وره العشة اجه ابوي واخوي وأختي انفال فرحت حيل بيهم لا طرت من الفرحة سلمت وكعدت يمهم
وراها كامت انفال وكالت
_ اريد احجي وياج زهراء
_ ايي
كمت رحت للغرفة أني وياها ....حسيتها عندها شي كعدت عالجرباية بيبي باوعتلي بحزن
باوعتلها مستغربة ؟ ... انفال شصاير وياج ؟
_ حمزة
من سمعت أسم حمزة حسيت جسمي كله ارتعش رعش .. حمزة منو ؟
_ خطيبي شبيج مو اسمه حمزة
أخذت نفس طويل وراها زفرت ...
ليش هو اسمه حمزة !
_اي
_ والله ماسئلت على اسمه قبل اعذريني معرفت
_ عادي تعاي أكعدي اريد احجي وياج
كعدت بصفها اباوعلها تباوعلي احسه بعيونها
حزن جبير حيل ؟
_ اي احجي شعندج وياي
_ حمزة واحد عصبي حيل ومايتفاهم أبد اليوم رزلني بالسيارة من جنه اني ويا الوحدنا
_ وليش رزلج ؟ اخاف سويتي شي غلط
_ لاا والله مسويت شي اصلا اني ماحجي ويا استحي بس بسلامته ماعرف شبي عصب مني
وكام يغلط ويسب ...
_ لحظة لحظة كام يغلط ويسب بهالسرعة
وأنتِ رديتي لو بقيتي ساكتة ؟!
_ ماحجيت ولا كلمة عفته يحجي بكيفة أخاف
يضرب لو يفسخ الخطوبة
_ شنو تخافين ولج هذا من هسة جاي يتمرجل براسج باجر من ياخذج يلعب بيج طوبة كتي لأمج عليه ؟
_ ايي كتلها
_ وشكالت حجت ويا وي امه
_ لاا تكول هاي هم الزلم دومهم يحجون هيج
عادي تعودي علية
_ شبيها أمج هاي معدها كرامة لو شنو بنتها بأول ايام خطبتها خطيبها مايتحرمها وهي تكول عادي
_ شسوي أني والله مجنت قابلة ازوج ردت أكمل الدراسة حالي حال صديقاتي بس هي لحت علية وكالت خوش ولد والدراسة ماراح تزوجج بعد بهيج قسمة حلوة
وشوفت عينج بطلني من أول يوم كطعنة مهر وهسه بين على حقيقته واحد صعب التعامل ويا والله اني خايفة ازوجه وضربني لو يسوي شي محلو
نزلت ادموعها اخذتها بحضني _ استغفر الله شدعي عليج عمة من حرمتي طفلة صغيرة من أحلامها هسه الحياة
ماتمشي إلا بالزواج عدكم
_ زهراء أخاف يطلع مو خوش أدمي
_ ان شاءالله يطلع خوش أدمي يجوز متعصب
من شغلة وفش خلكة بيج
_ ماعرف ماعرف
بقيت أهدى بيها ماعرف شكوللها البنية خايفة منه واني ماعرف ؟ شحجي وياها ماحجي ماعرف ليش غلط عليها وسبها وعليش هيج خايفة وندمانة على الخطوبة ؟!
المهم قنعتها شويه ضحكت خطيه طفلة بريئة بعدها كلشي متعرف عن الدنيا وقسوتها ماعرف هاي شلون
راح تتحمل مسؤولية الزواج
اذا يكولون عمتها ....وحدة تاكل الطفة وحاكمة عيال البيت حكم فرعون وبنتها الجبيرة اخلاص يكولون احمد وحسين وحدة لسانها اطول من لسان امها بألف مرة
وأني خايفة وماكلة هم انفال لأن وحدة فقيرة حيل تحجين وياها تحجي كله ع صامت ومنا بعدها صغيرة ماتعرف شي عن الزواج و المسؤولية وحكم الرجال شلون يكون
بقوا لحد الساعة بال١١ وراها راحوا ،
حجيت وياي أمي وكالت شحجت وياج ؟
_ ماحجت شي بس كالت هيج وهيج اشتريت
بالنيشان العرس وبس
_ هاا واني عبالي صاير شي وياها
_ قابل شيصير يمة
_هاا اروح أنام أني وأنتِ هم نامي
_ تصبحين على خير
_ وأنتِ من اهل
راحت رحت دخلت جوه الغرفة تمددت بالفراش ماكلة هم انفال بعد ماجنت ماكلة هم هند هسه صارن أثنين منا
أختي ومنا اختي الثانية ماعرف ؟ شسوي
احاول انام ماكدر تجيني أفكار من الماضي تلقائي ... عن حمزة وعن الجامعة وعن آول يوم صادفني بي و اخر
يوم بي ودموع تنزل من أعيوني
بحركة احس نار شتعلت بقلبي أدعي الله يصبرني وينسيني هالذكريات المحزنة تعبت حيل تعبت وبعد ماتحمل أكثر
وراح يذكرني بحمزة خطيب أختي
اسمه مثل اسمه وهاي طلعتلي صفحة ...
ثاني يوم رحت للحوزة وي أخوي هند اول يوم جان يوم عادي تعرفت على كل هناك واخذت درس الآول جنت فرحانه ..... حيل وشوي نسيت الحزن بقلبي .
والله اجه موعد هند ترد الجواب الـ ريان وكاعدة
يمي بالغرفة بيت اهلها اني وياها
_ شراح يكون الجواب ؟
ضحكت .. الجواب القديم راح يكون
_ لاا هند لا تكسرين قلب الولد خطيه والله يحبج
_ طبه مرض محد كاله يحبني أني محبه والله
ولا راح افكر بيوم احبه
_ شبيج أنتِ تجيبي المشاكل لنفسج
_ لا مشاكل ولا شي هذا زواج مو لعب جهال اوفق من الخوف منه وراها اعيش حياتي وي شخص مجبورة عليه تريديني كولي لو أنتِ بمكاني تقبلي بي جاوبي
نفخت هوى ... لو أني بمكانج وهيج ريان يحبني ويريد يطلب ايدي من عتبة الباب مو من الشباك وحق الله اقبل واكوله أهلا وسهلاً بيك وهسه شراح تكون رده فعل الولد ؟
من تكسري قلبه هند ؟
_ اكسر قلبه هسه احسن ماكسر قلبه بعد الزواج خل يتحمل والله اووي عوزني لو ازوج ابو عيون
الزرق ريان
طميتها ابديني الآثنين _ طبج ألف مرض مو مال واحد يحبج ويحترمج أنتِ أنتِ مال واحد يغديج كتلة ويعشيج كتلة والله هالجمال كله ومال وحال وأخلاق ولج البنات مايصدكن يزوجن واحد مثله وأنتِ تبطري بنعمتج
_ اووي لمونة ريان ابو عيون الزرقة
_ والله جايي اشوف منيتج جاية على ايد ريان
ضحكت بصوت عالي .. هههههههه
_ اضحكي وره هاي الضحكة بجاوي طويلة
هنودي وكولي زهراء مكالت
_ ماراح ابجي ابد اطمني خل اردلة الجواب
عصبت منها حيل وخايفة بنفس الوقت لأن الزلم من يفقدون اعصاب يكونون أشخاص غير الأشخاص لتعودنة
عليهم واني اخاف عليها
هي عوبة ولا تهتم ابد وتسوي لشي لبراسها بدون تفكير لو واعي واني ادري بيها اصلا مفكرت بريان ابد هي من البداية جانت رافضة واكيد راح ترفض
كتبت بالرسالة .
السلام عليكم أخ ريان
فتحت حلكي _ أخ ريان أنتِ شلون تكتبين أخ !؟
_ شكولة لعد حبيبي ريون ههههههه
_ طاح حظج هند والله هسه يتعصب منج منورة كلمة أخ لج احذفيها قبل لا يشوفها وكتبي السلام عليكم ريان اريد احجي وياك احذفي بسرعة ولج احذفي
كامت بطولها عالجرباية _ والله محذف أنتِ معليج
أني اكول أخ علمود احرك دمة هههههه
باوعتلها _ لاا أنتِ وحدة شاخطة ولج هذا رجال
مو جاهل علمود تلعبين بعصابه
كعدت بصفي بضحكة _ شاف الرسالة باعي
شفت جاري الكتابة ...
باوعتلها _ هسه راح تكب العيطة وأني معلي اذا تعصب عليج مو تجين زهراء زهراء ساعديني فدوة
_ لا تقلدين علية مخاف اني من ريون ابد راح اكوله مافيدك روح شوف غيري وخلص قابل شراح يسوي
هند_باعي شكتب يكول شنو أخ أني منين جاي
أخوج احجي عدل هند
_ ردي اخت ريان اكلج منين اجيتي أخته أنتِ اشو ماعايش وياج بنفس البيت ولا انتِ عايشة ويا منين
اجت الأخوه بيناتكم ؟ِ!
سويت روحي افكر ضربتني على بنطي بقوة ، انجبي حيوانة جاي تحركين دمي أنتِ الثانية
عطت ، اااه طاح حظج وجعتيني
_ طبج مرض رتج عون طلعتي فرعون زهيرة
كعدت عالجرباية اباوعلها "
ردي عليه عليش تتعاركين وياي
وانهي كلشي ..ردي
انطتني الموبايل "
أنتِ احجي ويا على اساس أني
دفعت الموبايل بايدي"
وأني شعلي ردي
_ زهراء
_وجع ماعلية أني وثاني شي أني انسانه مؤمنة ودا ادرس علوم الدين حرام علية أخدع واكذب
_ صارت سيد براسي خل احجي واسكت
الله لا يعوزني لج
_ ردي خل اشوف شلون يعصب ريان ابو عيون
الزرقة على كولتج كيوت هذا هههه
_ اي والله كيوت وفاهي ههههه
_أني فكرت بكلامك زين وصلت القرار نهائي
_ وشنو قرارج ؟
باوعتلي وكالت .. يكول شنو قرارج
_ ايي كولي قرارج وخلص أنهي كلشي هند وارتاحي اني
وياج بيى قرار تاخذي والله
_ راح تطبكين وياي ؟
_ اكيد راح اطبك وياج ردي عليه
_ راح ارد
_ روح شوف غيري أني مفيدك أسفة ريان مكدر اتقبلك
باوعتلي أبتسمت وكالت .. كلتلة كلشي دفعة وحدة وانتظر رده ان شاء الله يرد بهدوء ويتفهم
_ ان شاء الله يطلع متفهم
رجعت كعدت بصفها اباوع عالمحادثة اشو هو بقى مصدوم ميكتب ؟ استغربت كتلها !؟
_ ليش ميرد ؟
_ مدري ؟
صار جاري الكتابة ....
_ كام يكتب هند
_ يارب يكتب شي حلو مايكتب شي يخوف مثل عيونه
اجه الرد مالته...
براحتج هند أني مجبرج على شي ماتردينه واطمني ماراح اسويلج شي لو إزعجج بحياتي كلها
هند _ههه مو كتلج فاهي هههه
_ مو فاهي متفهم ريان امداج كسرتي قلبه
والله مبين من كلامه متأثر
_ عادي واذا كسرت قلبه خل ارد عليه
ردت عليه ، شكرأ ريان راح ادعيلك تلتقي بشريكة حياة تليق بيك وتكون بنت ناس وعالم
_ مااريد بعد ارتبط راح اسافر
زهراء _ وين يسافر ؟
هند _ شدراني وين راح يولي ريون ؟ خل أسئلة وين يولي
زهراء _ اسئلي
_ عفوأ ريان بس وين راح تسافر ؟
_ ويهمج وين راح اسافر ؟
_ لا مايهمني بس حبيت أعرف وين تسافر وبس واذا مايعجبك لاتكول براحتك
_ ايي ماكول مرخصتج هند
_ مرخوص أخ ريان في امان الله
شاف الرد مالتي بعد مارد ابتسمت كتلها ...
نزعج مني والله حيل حتى رده
جان بارد باعي
_ ايي مبين مزعوج بس مراح يسوي شي غلط
واحد مثقف ويعرف شلون يتصرف
_ اي الحمدالله خلصت من شي اسمه ريان
_ ارتاحيتي
_ ايي والله حيل ارتاحيت جنت خايفة حيل من رده فعله اكلج هذا شجاه ؟ وكعد عاقل
_ الهداوه من الله سبحانه وتعالى.. اكلج تجين
وياي باجر للحوزة
_ اي اجي وياج ضوجة بالبيت ومنورة ريان صرت
مطلع هسه راح اطب اطلع براحتي
_ ألف مبروك حريتج ههههه
_ هههههه
_ هند العصر نروح نشتري ملابس للحنة عكب
باجر الحنة مالت انفال
_ اي والله نسيت عندج فلوس ؟
_ ايي بيبي انطتني ٦٠ ألف من الراتب
_ ولعد ليش مانطتني أني بس الالج تنطي
_ أني الحبيبة أني لمداريتها أنتِ شمسويتلها
_ والله معلي أني اريد افلوس هسه من بيبي حالي من حالج
_ اسكتي والله انطتج وافلوسج عندي
_ وينهن ؟
كمت .. لحظة خل اطلعهن بس لاتكولين كبال أي بنية من بنات العمام والخوال ترى يغارون ويكولون بيبي تفرق بي الحفاد بس لهند والزهراء تنطي
_ماكول ابد اريد الفلوس
_ شكد طماعة
_ حقي الشرعي هذا جيبي
فتحت الكنتور طلعت .....الجنطة رحت يمها كعدت طلعت الفلوس حسبتها انطيتهن لها
_ هاي ٦٠ ألف مالتج
اخذتها .. هاي صدك حاسبة احسابي بيبي وحالي من حالج ؟
_ هي كالمرة من تنطيني تنطيج ماتفرق بيناتنة ابد
_ زين تسوي حكمة العادلة حلوة
_ ايي هسه شراح تشترين ؟
_ اروح اخذ فلوس من أبوي فوك ذني وأشوف
شاشتري مااشتري؟
_ ٦٠ ألف كافي قابل شراح تشتري أنتِ
_ اعرف كافي بس لأزم اضرب ضربتي وأخذ افلوس
من ابوي بحجة الحنة
_ تموت على الفلوس هند
_ منو مايحب الفلوس اني أحب اجمع علمود
اسوي قطعة ذهب هههههه
اجه وقت العصر رحت أني وياها للسوك اخذنه ملابس ورجعنا للبيت مالتنا نبدل كبال بيبي
جبت فستان طويل للكاع بلون الأبيض جنه بدلة عرس سعره ٥٠ آلف حبلت وجبت يمه ماعرف ليش ؟
من شفت هذا الفستان طار عقلي وكلت الا اجيبه وهند هم عجبها وكالت أول مرة تشترين شي حلو
لبستة جنه بدلة بردان اطول من ناحيه الخصر ضيق من جوه منفوش كلش حلو شافتني أمي وبيبي
بقوا مصدومين
بيبي _ أنتِ العروس
أمي _ هسة يكولون أنتِ العروس لو اختها !؟
هند _ واحنا شعلينة بالعالم هي عجبها وجابته واني هم عجبني خل تطلع حلوة دومها تلبس
شي يلعب لنفس
زهراء _ صدك هند لبسي يلعب النفس
هند _ ايي والله جنهن ملابس بيبي
بيبي _ هههههه
أمي _ ألف عافية يمه ملبوس الهنة إن شاء الله
زهراء _ الله يعافيج يمة
بيبي _ حجي هند صدك بعد لبسي هيج ملابس حلوة مو كلة جبب واطول جنهن ملابس مرة جبيرة بالعمر
زهراء _ يعني اغير اسلوب لبسي تردون
هند _ بالضبط
بيبي _ اي غيري
زهراء _ وأني طالبة حوزوية شلون اغير
بيبي _ الدين مايمنع من الكشخة وتمتع بالحياة الدين فقط يريدج تحترمي نفسج وتكوني انسانه مميزة واعية وماتكذبي وتخاف الله وتحافظ على سترها وعفتها
زهراء _ ان شاءالله بيبي
مكياج هند جابت أني مجبت مدام هي جابت أني وياها واحد بكلشي نشارك اذا أني اجيب شي هي بعد ماتجيب نحب نتشارك بكلشي هيج تعودنا من جنه اصغار
ثاني يوم الصبح اخذتها واخذنه ...أحمد للحوزة هناك عرفتها على جم ابنيه اعرفهن بعمري واكبر مني عيش
وشوف من النسوان هناك
بس كلهم حبابات وطيوبات وبنات ...... شيوخ وسادة كبار بالنجف الاشرف دخلت وياي عالدرس هند
اجت الأستاذة كامت تدرس بينه عن اطوار
الأصوات هند همست لي
_ وهاي شلون تميزون الأطوار؟
_ نميز
الأستاذة انتبهت علينه وكالت .. زهراء رجاءً
أسكتوا أنتِ وصديقتج
زهراء فشلت كتلها .. حاظر أستاذة
هند همست بعد مالأستاذة ندارت عالسبورة تكتب
_ هاي شلون انتبهت علينا ؟!
_ هند اسكتي كافي حجي مااريد انطرد منوراج
هند _ ماشي ماشي
كملنا من الحوزة طلعنت بره وكفنة بالطرمة كتلها "
خابرتي أحمد ؟
_ دزيتله رسالة ورد راح يجي بعد نص ساعة
_ ننتظر هنا نص ساعة
_ايي شنسوي لعد الطريق بعيد اذا نريد نرجع مشي عالرجلين
_ نتنظر شنسوي
اجت بتجاهنا بنت السيد عمرها ١٧ سنة طالبة بالثانوية وجاي تدرس هنا بالحوزة هماات ماعرف شلون تلحك هاي تدرس هناك وهنا ذكية ما شاء الله
وكفن كبالنة وكالت ،
_ زهراء هاي صديقتج لو اختج
هند _ بنت عمها وأختها وصديقتها
زهراء _ بت عمي
البنيه _ ربي يديمكم لبعض هم جاي تدرس بالحوزة ؟
زهراء _ لا بس اجت وياي
البنيه _ هاا
هند _ شكد عمرج أنتِ ؟
_البنيه ١٧ سنة طالبة بالثانوية وطالبة حوزوية
هند _ بشرفج شتلحكين تدرسين بالحوزة بالمدرسة
خوب اخذي وحدة منهن
زهراء _ تلحك
البنية_ هو أني مالحك والله بس شسوي ابوي يكول ادرسي وي أمج حتلوه بالأسبوع مرتين تجين لهنا
هند _ امج طالبة هنا
البنيه _ لا مديرة الحوزة أمي
هند _ ماشاء الله الحوزة طلعت لكم انتو
البنيه _ لا لا بس مديرة أمي بيها والله
هند _ لا تحلفي حياتي وهسة انتِ جم يوم تجين للحوزة
البنيه _ يومين بالأسبوع اجي موهواي
هند _ هيج تلحكي عالدروس مالتج
البنيه _ ايي
زهراء هند تسئل اسئلة مالها داعي اشوفها مشغلة تحقيق وي البنيه اريد اسكتها ماكدر ام لسان تموت والسوالف الطويلة الحمدالله البنية صاحولها
وراحت واحنا هم اجانه أحمد رجعنا عالبيت بدلت وكعدت راسلت انفال أسئلتها الحنة مالتها بيها دك وركص لا ؟
كالت لاا راح اسوي مولود بس العرس بالقاعة
واكيد بي دك وركص
اني مايهمني العرس لأن ماروح بس للحنة رايحة اكيد وأني منا ما اسمع أغاني ابد استحرم
فرحت حيل من كالت مولود
اجه ثاني يوم موعد الحنة رحنى من الصبح اني وهند هناك علمود نساعدهم بالشغل ماعدهم احد بس أختي الصغيرة وبالمدرسة ومرت ابوي مبيها حيل تشتغل
مرت أبوي _ زهراء خابرتي عالملاية ؟
زهراء _ ايي عمه اخابرتها وكالت عالساعة
بالخمسة العصر جاية
مرت أبوي _ العريس يجي عالربعة ليش مكتيلها
تجي عالربعة ونص
زهراء _ عمه احنا شعلينا بالعريس هو بس يجي يحني العروسة وبعدها يروح الحنة النه مو الهم هم
مرت ابوي _ يلا مصار شي كملوا الشغل
كملنا شغل وعزلنة الإستقبال جان بي تخم كرويتات طلعناهن بس عفنة الكرويتة وحدة بالنص علمود العرسان لأن عمتي عازمة هواي نسوان وأقاربها خير من الله
وره فترة أذن صلينا وصبينة الغدا تغدوا غسلنا الماعين كملنا كلشي من شغل أبوي وأخواني راحوا عالبيتنه هناك يم
حسين البيت هوسة راح يصير
اجتي أختي وجهالها عالساعة بالتلاثة الظهر وانفال اخذوها نسوان اصلا مطلعت شفت منوا اجه اخذها بقيت
بالغرفة وي هند
أني وهند عالساعة بتلاثة ونص بدلنة وخلينا مكياج اجت أختي الصغيرة تتوسل اخليلها مكياج
عفتلها والله شي بسيط وحلو طلع عليها من شافت الفستان مالتي ومال هند تخبلت بقت مصدومة بيهن اجت مرت أبوي دخلت الغرفة بقت .مصدومة بلبس
والمكياج تخوصرت وكالت
_ أنتن العرايس واني مادري ؟!
انتبهنا عليها اني واختي وهند ردت أختي الجبيرة
فاطمة_ والعرايس احسن منهن قابل عمه
مرت أبوي _ لامو احسن بس لبسهن مال عرايس
أختي _ هسه هذا الموديل وكلها تلبس هيج بالحنة هن بنات ومن حقهن يكشخن ويلبسن
مرت أبوي _ مبيها شي ألف عافية اكلج امج و
عمتي شوكت يجون ؟
زهراء _ جايين بالطريق
مرت أبوي _ خطار اجه عدنا اروح اشوف منو
فاطمة تعاي وياي
كامت فاطمة _ جايه عمه جايه
راحت اختي هي وعمتي كالت هند ...
معاجبها لبسنه ؟!
اختي .. ايي والله معاجبها شبيها أمي .؟
زهراء _ اندري يلا كملتوا علمود نطلع يم الخطار
كالن _ اي كملنا
طلعنا بره بالأستقبال سلمنا عالخطار جان بيت عمي وبيت خال عمتي نسوان والبنات يباعونة اني وهند بنظرات غير نظرات ماعرف شكو شي غريب بينه
واحنا مندري ؟ شنو مسوين جريمة '!؟
حجت أختي الصغيرة بهمس الـ هند ،
_ هند جاي يحجون عليكم يكولون لابسات بدلات
ومكياج عرايس مخليات
هند _ وهن شعليهن ترى اكوم ابتلي بيهم والله
_ يغارون علمود طالعات تخبلن
_ عين الحاسود بيها عود ان شاء الله
_ان شاء الله
زهراء _ ماعليجن منهن خل يحجون
أختي _ هن شعليهن علمود يحجون بكيفهن
هند _ يغارون الجكمات باعي مكياج يلعب النفس
مخليات هههه
أختي _ هههههه
زهراء لا ضحكت ولا شي اصلا مامهتمه ابد مالي خلك احمل ذنب واشيل غيبة العالم هذني متعلمات عالحجي
هند وأختي الصغيرة
وره فترة اجت أمي وبيبي كعدوا والبيت انترس نسوان كلها أقارب والجوارين ما شاء الله عمتي مامخليه احد
لما عازمتة واني وهند وأختي
ماكعدنا دقيقة شغل في شغل قدم ضيافة قدم مي قدم جاي للنسوان الكبار بعد مدة كالوا اجت العروسة والعريس بالربعة ونص اجت ... العروسة دخلت جوه احنا جنه بالمطبخ اني وهند دا نشتغل اجت اختي الصغيرة
_ العروسة اجتي وجاي تسئل عليكم
هند _ والعريس هم اجه
_ اي جاي يمكن بسرعة يرجعون البيتهم
زهراء _ لعد خل نطلع نسلم ونشوف العريس نفولة شلونه ؟
طلعنا وصلنا الصالة كلت الهند "
هند شكلي شلونه ؟
باوعتلي كرصت اخدودي بايديها الاثنين وكالت "
تنكرطين كرط والله ...يمة
فدوة ام خدود
_ خدودي هنودي
سحبت ايديها تضحك"
راح تضيع العروس هههههه
_ وين تضيع
_ والله هسه اهل العريس يكولون هاي العروس
منو ههههه
_ وأنتِ لعد
_ أني سمائي للون بس أنتِ أبيض عروس والله
بس يحتاجلج عريس معدل ههههه
دفعتها بالصالة قوي"
امشي حيوانة امشي ههههه
والله دخلنا من الباب بهدوء نمشي وحدة بصف الثانية رفعت راسي باوعت عالعريس جان لابس بنطرون كيبوي أزرق وقميص أبيض ورباط ازرق
مدنك راسه ودا يحجي وي مرة جبيرة بالعمر جانت سمينة بس كشخة مجلجلة جلجل بالذهب يمكن هاي أمه
حمزة "جنت احجي وي أمي بشغلة ضرورية وره ماخلصت رفعت راسي باوعت لكدامي انصدمت شفت أثنين
بنات جنهن حوريات بلأخص ام الأبيض
اخذتلي عقلي ماجنت متوقع اكو هيج وحدة حلوة عدهم هي جانت تسولف وي اختي سارة وتضحك بس ملامح
وجهها جانت مو غريبة علية
حسيت نفسي اعرفها اقتربت من انفال ...
انفال هاي البنات منو ؟
_ هاي أختي من ابوي زهراء وهاي بت عمي هند
بقيت مصدوم هند وزهراء ؟ رجعت للماضي مالتي هم جانت زهراء وبت عمها هند معقولة هن نفسهن اني مشايفهن بالمكياج جانوا بالجامعة مايخلون خير شر .
_ ياريت تطلعن أنتن والله العب بيجن جولة
زهراء اجن اخوات العريس واقاربة تعرفوا علينا جانوا خوش عالم والبنات حبابات سلمنا على ام العريس
مبين عليها خوش ادمي
هند _ عيب منه ماسلمنه عالعريس خل نسلم
زهراء_ اي يلا امشي خل نسلم عليه
رحنا نسلم عليه وجانت الصدمة النه طلع ماجان على البال أبد العريس هو نفسه حمزة النذل الواطي لماعنده
لا تربية ولا أخلاق!!...
رفع راسه وباوعلنه رأسن ابتسم بمكر واحنا بقينا مصدومات مانعرف شنحجي وشنكول شلون هو
نفسه العريس ؟ !
هند _ عززة العزانة ولج حمزة العريس !؟
اعيوني انترسوا دموع مكدر انطق كلمة وحدة لساني ربط هو يباوع ويضحك باوعت علينا انفال ابتسمت وكالت
انفال _ ماتسلمون شبيكم ؟
... يتبع
اهمشي تفاعلكم بالقصة حبايب قلبي وكل شخص يعلق ٥ تعليقات حلوة ويخلي لايك ...