منقولة
النَصِيــٍبً
الحلقه 10
رن نادر ع اصحاب عبدالله الي يعرفهم وكلهم قالوله مش قاعد
مانندروش عليه من صبح
زاد خاف اخره
انا" كنه السمح راقيله وزعلان اليوم
بشري " اه من حظي وخلاص
انا" كنه حظك تقول ايش دكتوره وبسيارتك وسماحه ربي عاطيك شن تبي اكثر من هكي
بشري" يعني هذينا يكفن اني نكون فرحانه
انا" موضوع وراه راجل شكله
بشري" شن عرفك
انا" هكي احسيسي
وشكله خاينك اخر
بشري" ياريت خاني كان مش مقهوره لدرجه هذي
انا" شن فيه شن السبب الي سيبتو بعضكم معناها
بشري" النصيب والقدر يفرقوا فينا
وبدت تبـــــــــكي
انا" جيت جنبها وقعدت نهدي فيها بطلي بكاء
احكيلي
بشري" كــان يقرا معايا في الكليه اكبر مني 5 سنين من هنا بدت علاقتي معاه كان يقولي بس انتخرج ونبدا نشتغل انجي ونخطبك بس تو مانقدرش نجي لي هلك وانا مازالت نقرا ماعنديش شغل المهم تخرج وبدا يكون روحه وكان راجل وقد كلمته وجاء لي بابا
انا" لعند هنا تمام بكل شنو تبي اكثر من هكي
بشري" بابا رفضه
انا" وليش
بشري" عادات وتقاليد :/
انا" شن التفاهه هذي
بشري " و الله نحكي جد
عادات وتقاليد عيلتنا الكريمة ماناسبوش عيلتهم
انا" هذا تخلف -_-
شن سبب لي خله يرفض للدرجه هذي اكيده في سبب كبير
بشري" علشان يوسف عمه قاتل واحد من قبل وخش للحبس
وباتي قال هذي عيله متناسبناش اني نعطيها بنتي
انا" هو شن ذنبه
بشري" هاتي من يفهم -.-
انا" ي روحي حرام تنظلمو في حاجه انتو مش ذنب فيها
بس مفروض حاربتي الدنيا علشانه كان اتحبيه
بشري " واللهي نحبه ونموت فيه لحد تو عمري ماشفت راجل غيره في حياتي جاوني واجد يخطبو فيا ورفضت علشانه لاني لو انا ماكنتش له مستحيل يلمسني راجل غيره
بس شن نبي ندير عارضت بابا قعدت شهور مانحكيش معاه بس شن في يدي حيله
قالي كان تبيه انجوزه لكي بس انسي انه عندك هل ولا تجينا لا نجوك
انا" مستحيل جدي يدير هكي نحس فيه متفاهم
بشري" الا في مواضيع هذينا
عادات عيلتنا تكرهك حياتك
وهذا سبب كبير من انه باتك اجوز خيريه
انا" باهي وهو وينه تو
بشري" بعد شهرين من رفض بابا له نقل اوراقه وقعد يشتغل في مستشفى في البيضاء بيش ينساني بس اليوم في صبح رد رد وشفته شفت عيونه نظرت الحب الي فيهن مازالت نفس ماهيا من سنتين
انا" قصدك موضوع له سنتين مفارقين
بشري " اها مش متحمله اني نشوفه قدامي كل يوم
تعرفي لما شفته خشيت في بعضي معش عرفت نصرف معاه خفت نضعف كنت نحساب روحي ناسيته ناسيه حبه
بس كانن اوهام كلهن
انا" موعرها بكل بس كان النصيب يبيكم لي بعضكم حيجي يوم وتردو صدقيني الي كاتبه ربي حيصير
بشري "بعد تحبي تو تحسي باحساسي
انا" هئه من قالك مش حاسه بيكي
بشري" شن فيه
انا " ليله اعترافات هيا شكلها
بشري" هو كساد وانا غامه ع قلبي احكيلي
انا" نحكيلك بس هو مايسماش حب مش عارفه شن نقوله
بابا كان عنده صاحبه اسمه عمو هشام في ماليزيا تعرفوا ع بعضهم غادي قعدو كيف خوت واكثر من وانا صغيره وهما علاقتهم كبيره كان عنده عيل كبير اسمه ادم من زمان كانو يقولو بيسان لي ادم وادم لي بيسان ونحن انجبرنا او بالاصح نفرض علينا الشي هذا انه نحن نقعدو لي بعضنا مشت سنين وكنت انا وياه علاقتنا كويسه لحد ما متعودين ع بعضنا كنه كيف خوت من ناحيه امتاعي مافيش حب مافيش احساس اني لما نشوفه قلبي يرعش ونخاف واو نفرح كاني نبي نشوف شخص عادي بس هو كان راسم اماله عليا كان يتخيل فيه زوجته وكل حاجه بس انا ماحبيتش قبل 9 شهور من وفاه بابا وماما الله يرحمهم
بشري " الله يرحمهم ويغفرلهم
انا" المهم قتله صارحته بي مشاعري بيش لانظلمه ولا يظلمني وماما كانت عارفه وقالتلي احسن حل اديري احكيله كل حاجه وهيا الي ساعدتني اني نحكيله
قتله اني انا مانحسش بروحي نحبك نحس في وجودك كانك خويا بالضبط كنت السند امتاعي من وانا صغيره بس مشاعر حب مافيش
ادم " يجي بعد زواج ماتخافيش
انا " انا مستحيل نجوز انسان مانحباش او زواج تقليدي
نبي نجوز ع قصه حب يشهدلها الناس كلها
ادم" عطيني فرصه نخليكي تحبيني
انا" مستحيل نشوفك اكثر من اخ وصديق ليا
ادم " اوكي تمام ربي يسعدك ويهنيك
انا" ويسعدك ي خويا
بشري " مبرد دمك وقحه انتي واجد :o
انا" سكري فمك وخليني نكمل :3
بشري" وجعني الراجل
انا" انـــا مايوجعك غالي -_-
بشري" حرام كسرتيله احلامه
انا " بس ندمت
بشري" وليش مش كان قرارك
انا" كان قراري بس بعد غاب عليا حسيت روحي خسرته حتي كأخ
بشري" باهي وتو تحكو
انا" لالا من لما سافر لي بريطانيا معش شفته
تعرفي حتي ماعزنيش ع وفاة بابا وماما
بشري " بلكي ماسمعش
انا" عمو سمع وجاء عزاني بس هو لا
اكيده واخذ موقف مني مازال بس ماكنتش نبي يصير هكي كنت نبي يقعد اخ ليا في الغربه الي كنه فيها
تعرفي من زمان كان خاطري نرد لي ليبيا اوكي انا غادي عايشه حياتي ومش ناقصني شي ونطلع ونخش براحتي بس كان حلمي اني نشوف بلادي الي انا منها
بشري" حي ع الوطنيه شن تبي فيها بلادك تبدلي انتي اقعدي هنا وانا نقعد مكانك غادي
انا " تم اتفقنا
بيشو نسالك سوال
بشري" اسألي
انا" شن قصتها حنان هذي
بشري" مرات خويا ابراهيم
انا " اها ليش ماحسيتهاش حبتني بكل
بشري" شن قالتلك قالت حاجه زعلاتك
انا "لالا ماقلت شي مسكينه بس هكي ماحسيتهاش متقبلتني
بشري" انتي تعرفي انه حنان اخت خيريه وهنا اساس بنات عمي
انا" اهاااااااااااااا قولي هكي
متضامنه مع اختها يعني :/
بشري" عيب عليكي خيريه عكس حنان بكل طيبه وحنونه واجد تو لما تقعدي معاها تعرفيها كويس بس حنان اعوذ بالله منها ديما ديرتلنا مشاكل وخلاص وموضوع شور اختها وهيا خاشه خشمها في كل حاجه -.-
انا" ااهاااااااااااااا
باهي خلينا نردو لي موضوعك
بشري" ها :/
انا" يعني حتقعدي تشوفيه فيه يوميا
بشري" الله غالب -_-
مع اني رقتلي انه رد بس فرحت واجد بكل بكل اني يوميا نصبح ع وجه حنشوفه من بعيد حتي لو مش حيجمعني النصيب امعاه بس شوفته عندي بالدنيا كلها
انا" نعليا علي حب المطرطش
بس نقولك كان تحبي حاربي بيه الدنيا كلها
بشري " وهلي
انا " جدي حيوافق مع ايام
بشري " تبيني نجوزه ونبيع هلي مهما كان انا نحبه بس مانقدرش
انا" مش هكي قصدي ي حماره
بشري" ضربتي ع ظهري تحشمي عمتك
انا" هههههه فيه عمه تحكي مع بنت خوها ع حب -_- عليك حاله وخلاص
المهم قصدي انا بيها انتـي تمسكي بيه ماتفرضيش فيه خليكي جنبه وخليه يقعد جنبك وحاولو تقنعو جدي بأي طريقه مش من اول طريق تضعفو وتسيبو بعضكم
بشري " تبي الحق انا رفض اني نكمل امعاه وهلي رافضين
مع انه هو كان يبيني قالي حنحاول نقنع باتك مغير خليكي جنبي بس انا مارضيتش اني نعطيه امل ع فاضي
انا " وتو قاعده تبكي عليه انتي الي ضيعتيه معناها
مش من اول تضعفي خلي يكون عندك اصرار ومع ايام يشوفك جدي متمسكه بيه حيوافق صدقيني
بشري" هابا خلاص معش فيها اكيد في حد في حياته
انا " لالا اكيده مازال يحبك كان في حد في حياته راه ماردش واشتغل معاكي في نفس مستشفى
بشري" زعمك
انا" ميه في ميه وقولي بيسو قالت
قعدنا نحكو من موضوع لي موضوع لين اذن الفجر
صلينا ورقدنا
نادر " ساهر في صاله ويفكر في خوه وماقدرش يرقد ابدا
سهي " حبيبي مازالت واعي
نادر" مش جايني نوم
سهي" كنك مضايق في حاجه
نادر" لا مافيش خشي تريحي
سهي" خش صلي فجر وخش تريح
احكيلي ممكن نقدر نساعدك
نادر" عبدالله اليوم كله مختفيه نرن عليه مقفل ورنيت ع اصحابه مايعرفوش عليه حاجه
سهي " ربي يستر ماتشغلش روحك بلكي قاعد عند واحد انت ماتعرفش
نادر" كيف تبيني نرقد وخويا مش باين
كان صارتله حاجه انا سبب انا اهملته
سهي" ماتحطش الحق عليك اكيده تو يروحو وتفاءل خير حبيبي هيا صبي صلي
سهي ونادر كانت علاقتهم كأي زوجين عاديين ازوجو زواج تقليدي انجبرو عليه
سهي كانت تحب نادر واجد بس مشاعر من طرف واحد نادر يعامل فيها كزوجه فقط مش كحبيبه
جاء الصبح نضت لقيت جدتي فوق راسي
جدتي " بيسان هيا ي بنتي نوضي نادر يستنا فيك بره
انا" ليش
جدتي " قال علشان تسجيل حاجه هكي والله مافهمته نوضي شوفيه
انا" اوكي علشان الجامعة
جدتي" هيا تو نوتيلك فطور
انا " لالا ديرلي نسكافيه بس
جدتي " هكي ع ريق لازم تاكلي
انا" ماعنديش نيه
جدتي" صبي بلا دلع خير ماننفصل عليك
يلا
انا" ههههههه نجيلي الواعر انا
جدتي" هابا منكـ
دوشت ولبست وطلعتله
انا " صباحو حب ندوري
نادر" رايقه اليوم
انا "الي صبح ع وجه السمح هذا مايكونش رايق
نادر" يعني انا سمح
انا" ماهو انا اختك اكيد بتكون هكي عندك شك
نادر" لسان فيك
انا" بس عسل صاح
نادر" هيا نطلعوا
انا" واتيه
جدتي " وين ماشيين
نادر " نبيها تسجل في جامعه
جدتي" هاكي ي فرخه كولي درتلك سندوتش وعصير فكينا من نسكافيه امتاعك مش كويس ع صبح
انا" امنوره
نادر" قدرت عليكي صاح ( بصوت واطي )
انا" بكل غيرتلي حياتي واجد بس للاحسن
جدتي" شن تقرمو فيا انتو
انا" شي ي روحي حبيت ع راسها وطلعنا
وقعدت ناكل في السيارة
نادر" بيسا
انا" همممم
نادر" سم
انا" في بطنك -.-
نادر" ماتفكريش اتحجبي
انا " اممممم موضوع مش في بالي الحق
بابا كان ديما مسكر راسه ويقولي البسيه
بس انا مانبيش
نادر" بس حرام
انا" عارفــه
نادر " مادام عارفه ليش ماتلبسيه راكي مش في ماليزيا بيش تاخذي راحتك وتو انتي جامعه يعني هنا بلاد مش امان بكل
انا" ماتخوفنيش زياده
نادر" علشاني فكري في موضوع
انا "من عيوني
سكتنا ونادر طول الوقت يبحت في فون امتاعه
انا" ان شاء الله خير كنك متوتر
نادر" مش متوتر
انا" لا متوتر
نادر" سكت
انا" شن فيه
نادر" رايحه تحكي واجد
انا" تو نسكت معش نخليك تسمع صوتي راه
نادر" لا صوتك سمح
انا" خويا ينابش فيا O.o
نادر" تحشمي ع وجك
انا" سوري هيا احكي كنك مضايق
نادر" خايف ع عبدالله
انا" امممممم
نادر "عارفك مضايقه منه بس هو طايش ومن امس مختفيه
انا "حي عليا كنكم ماكلمتو الشرطة وسألتو مستشفيات
نادر" ماقلتش لي حد
حتي امي في صبح قتلها رن عليا مع انه تلفونه مقفل من امس
انا" ان شاء الله خير
متفكرش افكار شينه وخلينا نتفألو
مش يقولو اخبار شينه توصل بسرعه خلاص اكيده مافيش شي
نادر" تخافي عليه
انا "مش خويا اكيد
نادر" مع انه مفيش موقف سمح جمعكم
انا" مش هكي انا عاذرته اكيده مستغرب انه طلعتله اخت وخشت حياته فجاءه حاسه بيه
نادر" عقلك اكبر من عمرك ع فكره
انا" عمره ماكان الكبر بالعمر -_-
نادر "ياشيخه هيا وصلنا
انا " هي
راجل " ي وليدي وقف هنا تره
شاب " ياباتي شن فيه
راجل "في راجل طايح هنا
شاب " نزلو وشافوا
راجل" هيا نسعفوا
شاب" فكنا من مشاكل ي باتي البلاد رايحه تخوف
راجل " تخيل روحك في مكانه
العيل ينزف قاعد
جاء يجري وقعد يشوف فيه مازال عايش ولالا
شاب" هيا مازال عايش
ساعدني ي باتي نركبو لي سياره ونشيلو لي مستشفي
نزلنا وخشيت للجامعة ( قاريونس ايام ماكانت في جامعه قصدي تو مدارس هههههههه ) :v
سجلت في هندسه ودرت واراقي كلهن
وردينا للسيارة رن فون نادر
نادر " عمتي بشري
انا" شوفها كنها
نادر" ايوه ي بيشو شن جوك
بشري " الحق خوك ي نادر الحق خوك
نادر" شن فيه عبدالله
يسألوني لمن اكتب ومن احب
ولا يعلمون انني
مازالت اكمل في خيالي قصه اعدمها النصيب :( :(
يتبع .........