#رغماً عني
#حفصه الهاشمي...
ـــــــــــــــــــــــــ
يا لكِ من أرضٌ إمتلأت مِن دماءِ شعبِها
غار عليهمُ الضالمونَ ضلماَ وبهتانا
عصِفت بأفئدةِ الوالدات قَهرٌ يكمنُ في خلايا ارواحهُنَ
أرضٌ بثتُ ألرعبَ بقلوب شبابِها
ولا زالوا صامدينَ ومتعايشينَ فوقَ رُفات إخوتهم الشهداء
بقلمي ......
ــــــــــــــــــــــــــــــــــــــ
نور
كاعدين اني وامي بملل قاتل امي صافنه على التيلفزيون تشوف برامج مال طبخ واني كاعده وحاطه ايدي جوه حنكي بملل وصافنه عليها اريدها تخلص علمود اديره بس هيه وصفه ورا وصفه ....
اندكت الباب بقوه وصوت عمتي فخريه يوصل ليمنه اشرتلي امي على الباب وهيه لابسه النظرات والدفتر والقلم بأيدها تكتب بعض الوصفات ...
كمت بكسل فتحت الباب الها دفعتني بقوه وفاتت هيه وياسه وتهلهل واطش جكليت كمت اشك بنفسي اني انخطبت بس بعدني ما تزوجت ...
سلمت على ياسه واني أأشرلها على امها غمضت عيونها بأنزعاج وهزت راسها بعدم قبول ....
فاتت عمتي للبيت وهيه تهلهل ومستمره اطش جكليت وتهوس ببعض أهازيج الاعراس العراقيه
//// كلللووش هايه الرادها وهايه التمناهااا كلوووش ..... بهوئي لا تحجي حجي خلي المخده وارتجي ....كلللوش
باوعت على ياسه بأستغراب بهاء شنو ..؟؟
طلعتلها امي وعمتي تكوللها /// خايبه اني مو فرحت لبناتج و طشيت الهم جكليت يالله افرحي لولدي لعد ..
باوعتلها امي بأبتسامه وكالتلها /// اي افرحلج ولدج مثل ولدي ... بس خير انشالله منو خطب منو اتزوج ...
طكتها عمتي بهلهوله وعيونها ادور بين ارجاء البيت علت صوتها وكالت
//// يبهااء طفي اللاله عيون رتوجه جتااله ... وبهاء خوووش اخو يستااهل الهوسه كلللووش ....
اردفت وهيه تباوع على امي /// خايبه شبيج غير خطبنه لبهاء جا ما تدرين صارله كم يوم حجينه بموضوعه بس بقه انسير على العالم ونخطبها رسمي ...
جاوبتها امي بصدمه /// به بهااء ؟. ش شلون وافق .؟؟
جاوبتها عمتي بأعتراض // اي اي بهااء جا شتردي خاتوون خووما يبقه مجبوس علىى سحييره ... على طاري سحيرره وينها خلي ابشرها ههههه خلي تفرحله مثل ما فرحلها
اردفت وهيه تباوع على ياسه وعليَ /// خايبات شبيجن ما تهوسن ..وطار من ايدها لسحوره .. وطار من ايدها لسحوره كللوووش
سحبتها ياسه من ايدها بهدوء واحنه صافنين عليها وايدنه على قلبنه بس لا تجي ياسه تخبص الأمه خبص هوه موجود وخابصه الدنيه عليهِ انوب يتزوج يجوز تنتحر ...
/// ماما كافي عاد امشي خلي نرجع يما عيب ترا
دفعتها عمتي بقوه وهيه تصيح عليها //ليش يابوو ... ليش عيب ناهبين احنه بايكين ورث ابوهن اشو ابن عمهن لازم يوكفنله بهيج يوم
اتقربت امي عليها وباستها وهيه تباركلها بس بضوجه وملامحها واضح عليها الحيره والحزن
باركتلها اني هم وتفكيري بسحر لو تعرف شيصير بيها
// اي جا سحر وينها ما تجي تبارك لأبن عمها لو خاتبه بس لا مفرحانتله
ياسه // ماما كاف..
قاطعتها امي بأبتسامه كاذبه /// لا خيتي والله سحر راحت لبيت عمها جراح علمود تقريها تمارا هسه شويه وتلكيها كدا...
قبل ما تكمل امي كلامها سمعنه صوت باب الشارع ينفتح وصياح مخيف مو طبيعي
ركضت للطرمه داشوف شبيها صوت سحر وعمتي
جانت كاعده عمتي رقيه على الارض وتضرب على رجليها بألم وتصيح /// ياا يمااا يا وليدي بعدك ورده بالبستان يا يماااا وين اروح يوووم راح ابني يا يماا راااح
وتمارا حاضنه سحر ومنهارين من البكاء
ركضت امي على عمتي // شبيج رقيه خير شصاييير منوو مااات ..؟
صاحت عمتي رقيه بصوت عالي وهيه تضرب على رجلها مره وعلى راسه مرة الثانيه
/// قتيببببه راااح سوسسسن رااح اببن ابطننني كتلوو ا الميخااافون الله كتلوا ....
الصدمه الجمت حواسنه ...باوعت على حالتها الكل صار يبجي دموعي نزلت ركض على ابن عمي الودع الحياة وهوه بعمر الورد
كلمات تصعب على القائل قولها ...
شعور يحاكي اوتار القلب ألماً ....
تتراقص مواقفٌ طفيفةٌ في أَعيننا ... تنير قلباً كساهُ الضلمةُ بعدَ رحيلِهم...
منظر عمتي المتهالك على ابنها الصغير المدلل .. يفطر القلب وينب بالروح خناجر الموت البطئ ...
.ـــــــــــــــــــــ
ثلاثة ايام على فاتحة قتيبه الله يرحمه .. والدموع ما نشفت من عيون اهله ...
منظر اخو وهوه يضرب على راسه ويبجي يقطع القلب ... ما قبلوا يشوفوا اهله ..خوفاً على قلوبهم المتحطمه لا تنكسر اكثر ولا حته غسلوله شهيد ودفنوا بدمائه الطاهره ...
كل حقد انمحى .... كل كره تحول الى حب ... كل ذره ألم تجمعت بقلوب اقاربه ...
اول ايام الفاتحه ...
صاحبه واخو وابن عمه بنفس الوقت قطع قلوب العالم ببكائه ...
ندب حضه على ما فرط بيهِ بسبب الحقد ...
خله العالم البشارع كلها تبجي على كلماته وتأنيبه لنفسه لان ما سامحه بمكالمته الاخيره ويا ...
كلماته يرن صداها بجدران البيت وتردي بأهل البيت قتيلين من ألألم ....
جان يصيح بعلاة صوته وهوه مجذي على ركبتهِ مقابيل التابوت الماقبلوا يفوتوا جوه وينفجعون اهله من منظر الشهيد .الي متزين جبينه بأثر الطلقات .....ومرسوم على وجها اثار ضلم المنفيون الطغوا بالارض ...
بهاء // ااااخ يا صاحبي الفرطت بي اااخ يا قتيبه ...... مسامحك يالغالي مسامحك دنيه واخره بس كوم .مسامحك يالقسيت عليك يالغالي ...منين اجتني هالقسوه واسد التيلفون بوجهك ...صوت بجيك لهسه يرن بأذني ويقتلني يا بعد اخوك انته ... شسووا بيك المجرمين ليتهن براسي هالطلقات ولا بيك يبعد بهااء واهله ... كووم يسندي ما تلوكلك نومة القبور كووم .. ... كووم بعدك شاب وفرحان بعروسته الماتهنيت بيها .... اخخخ يابويه يا قتيببببه ......
صوته يتضاعف ألم ... كلماته تغلغل بيها الندم والحزن
قلبه مكسور على ابن عمه ... صده اله وعدم مسامحته الى الان تحفر بعقله وقلبه .. الندم يرسم اثاره على حياته
ابو الي اتخربط من منضره وهوه يشوفه بالطب العدلي يتأكدون من صاحب الجثه ...
ابنه الصغير ,, جان كل يوم يصبح على مشاكسته وينام على صوت طلباته من اخته ..انهار واغمى عليهِ من منضر ولدهُ اليكسر القلب
طلقتين مزينه جبينه رسمت بقدره اسم الشهيد .. اثار الكدمات الضاربي اياها .. اتمناها بيهِ ولا بأبنه ...
ـــــــــــــــــــــــــــــــ
سحر ....
ايام مرت وقتيبه جوه التراب نايم ...نسيت كل شي ابن عمي واتوفى وزوجي هم
اندب بحضي واندب بنفسي على الي سويته ويا
صحيح لو كالوا الانسان ما يحس بالنعمه الا من تروح من ايده ...
قتيبه صح معشت ويا لحظات هوايه .. بس اله ويايه مواقف تبجي ضميري الما رضه يسكت
الي ما بطل نوح وبجي على الاعزاز ...
رحت يا قتيبه ... هاهيه .. جنت اكولك عوفني بس مو بهالطريقه ..جنت ارفضك وانهزم منك بس هسه اني ادور عليهِ
كلمات عمتي رقيه بالفاتحه وهيه تبجي وتباوع عليَ قطعت قلبي ,,,.
جانت تضرب على نفسها ملخت روحها وهيه تلزم ملابسه وتشمها وتبوس بيهن /// رااح يسحرر رااح ..... رااح الماردتي عافج ورااح ...لبالج طلبج يقطعة قلبه لبالج طلبج ....ينهزم من العالم ويجي يشكي نفرج اله بين احضاني ... ويكول اصبر راح تحبني ...طشرتي انتي ولمه التراااب لمه .....كشرتي ولمه التراب يا يممممماا
ـــــــــــــــــــــــــ
نور,.......
توالت الايام على الحزن
قتيبه صورته ما فارقت مخيلة اهله ابد
هوايه جانت تتغربط عمتي ويشيلوها للمستشفى لو ضغطها لو سكر ... ادهورت حالتها ...
سحر حابسه نفسها وسط الاحزان والدموع ... بنتلها غرفه من الندم وسكنت بيها ..كل يوم تكعد بالساعات تسوي جلسة استغفار لقتيبه ولبابا
دائما تحلم بقتيبه يضربها بالحلم لو يسحلها من شعرها وتكعد متصركعه علينه ...
تدفن راسها بحضن امي وهيه تصيح وتبجي يماا عيونه تخووف يماا ضربني منا
وتلزم شعرها بأيدها وتبجي .... وامي تبقه تقره عليها بعض الايات ...... حالتها مو قليله ايضاً كولنه قلقين عليها
اول ايام جانت امي تكوللها هاي هالكد ما تفكرين بيهِ وتندبين بنفسج يجيج بالحلم على هيج هيئه وسحر تبجي وتكوللها لا يما هوه يريد يكتلني ...
بالمرات الاولى قنعتها امي اضغاث احلام عقلج الباطني يصورلج هيج امور ...
بس حالتها استمرت الى الاربعين مالة قتيبه ... و وراها هم
صارت تخاف تنام تكول لأمي راح يجيني يضربني .. صارت تخاف حته من النوم ... نزلت اغراضها واني وياها لان تخاف تصعد وحدها فوك
صارت تنام يم امي وما انطفي الضوه الا هيه تنام يالله نطفي لان تخاف ...
احلامها شويه هدأت من صارت تنام يم امي ...بس ما انقطعت ,...
ــــــــــــ
بالاربعين مالته اتجدد الحزن وكأنوا اليوم يالله مات ....
عمتي رقيه كضتها كولها بالمستشفى ويحطولها مغذي ....
بالاربعين بهاء اجه لبيتنه علمود نروح لبيت عمو جراح ... وصلنه لبيت عمو وعيونه مليانات ندم
منفوخات وحمرر من كثر البجي ...
ما باوع على سحر غير مره وحده ..وانصدم من مضهرها وحالتها الوصلت الها
ضعفانه وجهها الطفولي صارهزيل واكتسه باللون الاصفر ..عيونها ذبلانه من قلة النوم ...
باوعلها مره وحده واحتدت ملامحه بألم وحزن ...
نزلنه كولنه سمعت يصيحني بالسياره قبل ما انزل
التفتت عليهِ اتكلم بصوت مبحوح وحزن // نورا خلي اختج تاكل ما شايفه شكلها شلون صاير يخوف ميصير هيج
جاوبته بتنهيده /،/ والله بهاء نجيب الاكل الها تدفعها وتكوم تصيح علينه ...
جاوبني بحده /// مو هوه بكيفهاا ما بينه حيل نحير بيها فوك مصايبنه ...
هزيتله براسي وفتت وراهم
ــــــــــــ
ونفس الشي مرة الايام .. نفسها سحر هيه هيه ما اتغيرت ...
عامر يخابرني اذا مو كل يوم بين يوم ويوم ....
وللفاتحه هم اجه بس ما شفته سمعت من البنات مهاب ميقبل يشوفني
واحنه هم جنه بحاله مو مال يشوفني ....
مرت سنه كامله على وفاة قتيبه الله يرحمه ....
سحر نوعاً ما اتحسنت ....
ـــــــــــــــــــــــــــــــ
بيوم من الايام اجه علينه عمو جراح ...وعمه رقيه
فوتناهم للأستقبال الابتسامه الكاذبه واضحه على وجههم بس عيونهم تبث العكس
سلمت عليهم امي وكعت فاتحنه عمو جراح بموضوع عرسي وعيب هم من اهل عامر والولد
امي كالتله احنه مو مستعجلين ..خليها بعدين
بس عمو جراح رفض وكال الرجال محضر كولشي والشقه من اول يوم خطبها كام يحضر بيها
ميحتاج نأخرهم هوه عامر حجه ويايه وحددنه اني ويا العرس بنهاية الاسبوع يعني عدكم 6 ايام تلحكون تحضرون نفسكم بيهن
امي اعترضت بس عمو كال فشله من الرجال واتحدد العرس بنهاية الاسبوع اي يوم الجمعه
مرت 3 ايام وامي مغبوصه بيه وسحر هم طلعت شويه من جوها الكئيب ورسوبها بالصف الخامس هم أثر عليها
عمتي رقيه جانت تطلع ويه امي للسوك يحضرون الجهاز مالتي وبالايام الباقيه كامت تطلع عمتي فخريه ويانه وياسه علمود يحضرون لياسه هم لان خطيبها يريد يستعجل بالعرس حسب ما كالتلي ....
مرت الايام ركض ركض ...
الى ان اجه يوم عرسي يوم الجمعه ...
صح فرحانه بس متوتره هوايه اذكر من خابرته قبل العرس بيومين ..سألته على اهله وامه لان جنت خايفه اخاف عارضهم واجه خطبني
//عامر اهلك ليش ما اجوي للخطبه انته مو كلت همه ببغداد شوداهم للفلوجه...؟
جاوبني بهدوء قاتل /// حبيبي احنه عدنه بيت ملك بالفلوجه والوالد شغله صار هوايه بالفولجه فأمي كالت نرجع ونرمم البيت ونكعد بيهِ ومن صارت اوضاع الفلوجه طلعوا للشمال يم خوالي ..
///يعني بالعرس يجوون لو لا .؟
//حياتي انتي تعرفين الطرق شلون صايره مو ؟؟. ... والله ما يكدرون يجوون ولا همه يتمنون يجون ويفرحولي بهيج يوم بس لا تخافين امي خلت اختي بدالها هيه راح تقيم بكل واجباتها وعمامي هم راح يجون ..
///عامر اخاف اهلك معارضين عليَ علمود هيج ميجون ...
::// لا لا حبيبي انتي شدتحجين بالعكس هسه تشوفين من تصير الاوضاع زينه يجون واعرفج عليهم لا تفكرين هيج ...
ـــــــــــــ
صحيت من افكاري على صوت ام الصالون وهيه تكولي بأبتسامه// العريس اجه ياخذج يابه نيالج شنو هالطول هالجمال اسمر ويخبل شحال لو ابيض جان كسح كلوب البنات ...
جاوبتها بأستغراب // لا حياتي غلطانه زوجي مو اسمر ابيض ..
// يا اتبله عليج يمه هوه يكولي صيحيلي عمتي سوسن كتله اسم العروس كالي نور ..
اجتني ماما وهيه تلبس عبايتها //يلا يما كومي خلي البس البرنس مهاب اجه ياخذنه يكول لفلفوها زين ...
لبستني ماما ويانه ياسه وعمتي رقيه ...
لابس قاط اسود عاكس جماله مطلعه من صدوك هيبه ... دعيت بقلبي الله يسعده ويلكاله التكدر تسعده ...
اتقدم علينه بسرعه وهوه يطفي جكارته ..باوع عليه ثواني واني منزله راسي وما اشوف اي شيس منه ومن نظراته
سمعت امي تسحب نفس وتكوله // يلا يماا مهاب يلا ..
ركبت بالسياره اني وبدلتي البيضه طول الطريق عيونه ما فارقتني ضجت من نظراته الي ...
نظراته تحسسني داسوي شي غلط تخوفني من المستقبل والي راح يصير ....
وصلنه للبيت ما سوينه العرس بقاعه ولا سوينا جبير احتراماً لعمو جراح وعمتي رقيه
صارت النسوان تهلهل وتركص واني بالي مو يمي تفكيري كوله اهله ليش ما يجون
الي اجه من اهله بس عمته وبنتها واخته وبناتها ثنين كبار وعمامه ثنين وخاله
لحظات واجوي الاطفال ويصيحون العريس اجه العريس اجه ...
ونفس الحاله مهاب ما قبل يفوت يشوفني الى الزفه
لبستني ماما الرداء واجه عمو جراح باسني براسي وعيونه مدمعه
///الله يسعدج بنيتي وما تشوفين حزن بحياتج الجديده .. حضنته قوي وبسته غمضت عيوني واني اتخايله ابويه من جان يكولي اني اسلمج بأيدي لزوجج واكص ايده اذا حاول يأذيج
دمعت عيوني من تذكرته شكد تمنيت يكون موجود وهوه الي يسلمني اله بأيده
التفت عمو على عامر الي جان يباوعلي بنظرات اعجاب وحب
اردف عمو وهوه يحط ايدي بأيده // عامر ترا نور عزيزه علينه كولنه والله ان سمعت بيوم مضوجها ما يحصلك خير ولا تشوف نور الشمس
ابتسم عامر وهوه يلزم ايدي ويكوله// عمي احطها بعيني مو بالارض اني ما صدكت احصلها عاد اضوجها بعيوني ..
ودعت امي واهلي بدموع غزيره متوقعت هالكد راح ابجي على فراقهم
سحر دمرت نفسها من البجي ..واني هم حضنتها وبجيت هوايه وياها
صعدنه بالسياره وجان مهاب الي يسوق ما ردته هوه يزفني بأيده
عيونه حمر ومنفوخات بس يتصنع دور اللامبالاة ...نزلت راسي بأسى عليهِ واتمنيتله وحده غيري تصون حبه وتكدر تسعده
عامر بصفي ولازم ايدي
صاح عليهِ مهاب وهوه يكوله
/// ها يالعريس تعال اكعد بصفي شعندك ورا بس لا تخاف مني ..؟
جاوبه عامر بضحكه /// غير يم عروستي شعندي يمك اخاف اكعد يمك وتاكلني شكلك يخوف استاذ مهاب
جاوبه مهاب ببرود // دكوم كوم اكعد هنانه عندي كلمتين وياك ..
نزل عامر وصعد يمه ...اعرفه يسوي هيجي بس علمود لا يكون قريب يمي ....
اجتي عمتي رقيه كعدت بصفي وبدت الصفه طول الزفه احنه ساكتين وحته ما شغلنه اغاني ...
وصلنه للشقه الي راح تكون بيتنه اني وعامر
زفونه بهلاهل من قبل عمته واخته فوتني للشقه وما شفت منها شي رأساًً ودوني للغرفه
فاتت عمتي رقيه وعمته بقوا يحجون ويايه بمواضيع عده ...عمته جانت كولش حبابه وكل شويه تباوه عليَ وتكولي الله يهنيج ويسعدج والله اني حبيتج مثل بنيتي
جانت كولش حبابه وقلبها طيب
ورا ساعه ونص يالله فات عامر طلعوا عمتي وعمته
وعمته توصي عليَ
اتقدم ناحيتي بخطوات وهوه مبتسم ...
وكفت بتوتر واني افرك ايد بأيد من الخوف
لزم ايدي البارده بأيده الدافيه وهوه يكولي بأبتسامه
///يابه غير هذا مهاب دمرني صارله ساعه لازك بيه كل ما يريدون اصعد يلطش هوه
باوعت بعيونه المبتسمات للحظه اجتي عيون مهاب الحمر كدامي
انقهرت حيل ونزلت راسي بحزن على مهاب صح ما بقلبي شي تجاها بس مهما يكون يبقى ابن عمي انزعج من اشوفه بهيج حاله
هوه جان دائما يوكف ويايه تعودت عليهِ ورايه ورايه ...بس هسه هوه صح ويايه بس مو من قلبه
اتقرب عليَ عامر ومجان يحتاج ينزل لمستوايه لان هوه اصلا بطولي تقريبا
دفن راسه برقبتي وبقه يتنفس من رحيق عطري
ارتعش جسمي بخوف وخجل
ابتعد شويه عنه واني اعصر بأيدي واصابيعي
باوعلي بأبتسامه وسحبني وكعدنه الجربايه
بقه يحجي ويايه بمواضيع عده الى ان التمس استجابه مني
واتقرب اليَ
جان ماكر كل ما ابتعد عنه بسبب خوفي يحجي ويايه ويلهيني الى ان اشوفه اقترب مره الثانيه
الى ان صرت زوجته .....
ـــــــــــــــــــــــــــــــــــــــــــ
ياسه........
بعد وفاة قتيبه الله يرحمه
بهاء كولش تغير
اغلب وقته يم المقبره كل يوم يروح يزوره .. وحته على اساس يخطب بس بيوم القرر يخطب بنت جيرانه اتوفى قتيبه ولغه الموضوع من اساسه
قتيبه اختطفوا وقتلوا
ماكان اكو هدف من اختطافه فقط تصفية شباب العراق
عمو جراح مرات اسمعه يكول الحمدالله لكينا جثه والله اكرمه بالصلاة عليهِ ودفنه
ولا جان حطوا ويه المقابر الجماعيه ومن سابع المستحيلات نلكا الحمدالله على كل حال ...
الله يرحمه ويغفر اله
زيد متغير ولا سوالف ام الدبك اتغيرت
بس زيد كام يصير حيل عصبي وكل ما يحجي ويايه يعصب ويكولي صارلنه اكثر من سنه شوكت نفضها عاد
واني ما بيدي شي قابل شسوي
الى ان حجه هوه ويه مهاب لان هوه ما يحجي ويه بابا
طلب من مهاب انحدد العرس وصدفة نور عرسها حددوا عاد مهاب كال اطلعي وياهم انتي وامج وجهزوا نفسكم بأقرب وقت نسوي عرسكم هذا الخبل متخبل علينه ناقصين احنه مجانين
ومهاب هم متغير 24 ساعه باكيت الجكاير يمه وغرفته متروسه دخان
بعرس نور ورا الزفه اختفه ما شفنا بعد الى ثاني يوم هوه ما موجود ...
بيوم خابرني زيد العصر فتحت المكالمه ويا وهم معصب نفس عادته اول ما حجه ويايه كال بحده
// بديتي تجهزين نفسج ترا العرس راح اقربه ياسه
// اي زيد اي .. بس لو اعرف انته ليش كل ما تحجي ويايه معصب شكو سامع شي اخاف متندم لان خطبتني كول عادي تر..
قاطعني بحده /// كاافي تاكلييين تببن ياااسه اني البيه مكفيني لا تكعدين تحللين بكيفج زيين ..
//شنو البيك؟.. صاير شي وياك؟.
جاوبني بتنهيده // اي صاير بس اني ما حبيت اضوجج بالموضوع
جاوبته بخوف // ليش شكو؟.
///هذا عمي ابو ودق صارله فوك الشهر يجي ويتوسل بيه علمود ارجعها على ذمتي وعلمود ايهم ومن هالسوالف ديضغط عليَ حيل كم مره رديته وكتله عمو اني موجوده مره بعصمتي بس ماكو فائده نايم زمال بعقله
جاوبته بضحكه/// ههههه اي عادي ترا اصلا حرام لان الله يكول ( وان طلقها فلا تحل له من بعد حتى تنكح زوجً غيرهُ) فمي,...
قاطعني وهوه يسحب نفس/// متزوجه غيري متزوجه ياستي
انمحت الابتسامه عن وجهي تدريجياً وجاوبته //شل شلون يعني
/// هيه شخبلها عليَ غير ابن خالتها ...ورا ما طلقتها ورا العده بأسبوع اتزوجها وضحك عليها الحقير ...تستاهل ورا شهرين مل منها وطلقها وراح سافر لالمانيا
/// و ويعني هسه راح ترجعها زيد ؟.
/// لا عمري انتي كم مره كتلج ما اكلبها هايه بعد وفوكاها لامسها واحد غيري خلي تولي ... بس اني اريد اجيبج يمي واسد حلوكهم بقنادر عتيكه هم ...
ــــــــــــ
وصدك ورا عرس نور اجه زيد وحددو العرس بعد اسبوعين
بوقتها جان عمو جراح موجود
جان يباوع على بهاء الصافن بعالمه ...
فاجئنه عمو وهوه يعلن للكل
// اي انشالله انروح نخطب سحر لبهاء ...
انصدمنه كلنه من قراره
باوعله بهاء بعيون حزينه يكتم فرحته احتراماً لعمو
اعترض بابا وهوه يكوله
//// لا ابني ما ياخذ زوجة ابن عمه ختولي هيه رفضته ما يرجع ياخذها ..
جاوبه عمو بحده وعصبيه
//// مسسسسلم ... بهااء يتزووج سححر ..والله مرة الثانيه اذا سمعتك تحجي هيج عليها ما يحصلك خييير
اشتد الكلام بين بابا وعمو الى ان وكف بهاء وهوه يوجه الكلام لبابا
/// مثل ما تريد عمو سحر اتزوجها وبأقرب وقت هم...
عاف الكل وطلع
بابا عصب وحلف ما يروح لا لعرسه ولا لخطبته
بس بهاء ما يهمه
الله جبر بخاطره ورجعتله صح بضروف قاسيه
بس بالنسبه لبهاء حلاله ورجعله.....
مرت يومين وعمو جراح انطانه موافقة سحر
استبشرت جوارح بهاء بفرح ...
وابتسامته رجعت لوجهه
بيومها راح على قبر قتيبه وبقه عنده بالساعات
حسب طلب سحر ما تريد حفل فقط عقد شيخ بيناتنه وخلص
بهاء انزعج من قرارها بس كتم غيظه
وصدوك عقدوا شيخ بيناتنه وحته نور ما عزموها
عبالك مثل الحراميه بس سحر جان عاجبها هيج ...
ورا ما عقدو شيخ صعدت لغرفتها وقفلت الباب
بهاء ينتظرها بالاستقبال علمود يشوفها بس هيه ما تقبل
عصب بهاء من تصرفها وطلع من البيت واحنه هم رجعنه وبيت عمو جراح ايضا
تقريبا ساعه 2 ونص باليل
ــــــــــــــــــــ
سمعنه صوت صياح عمتي سوسن وطرقها على الباب
كعدنه كولنه مفزوعين من صوت بجيها وصياحها
طلع مهاب بالفانيله الداخليه والبيجاما .. وعلاء وبهاء يركض
فتح بهاء الباب
وهيه لزمته من فانيلته وتصيح
بنيتي رااااحت ...سحرر راحت تلاحكوها فدووه راح تمووت
..........................
بنوتات اسفه على التأخير
طبعا اكو بنيه جنت واعدتها انشر بارحه بس والله انقطع عندي النت جان اطالبني بفصل هسه شلون اني مطلوبه فصل ههههه افزعوليي
توقعاتكم الحلوه ...
دمتم سالمين ...
حفصه الهاشمي..........