رواية : نــاراحيــدرة
//// بقلم نمارق رحيم ////
بارت _36
⭐⭐⭐⭐⭐⭐⭐⭐
بغداد - الكاظمية - صحن الامامين الجوادين (عليهم السلام)
حيدرة
ايدي علئ راسي اجر النفس گوه واخزر بي وهو گاعد گبالي مبتسم ويضحك على عصبيتي
- احترگت عشيرتك واحد واحد علئ هاي الخطة
- اعجبك يول
- شلون هيچ خططت ؟ طلعت مو سهل!
- لعد شعبالك غير عقلي يوزن ذهب
- رائــــد !!،
- عيونه يا يابه لك حويدر اشتاقيتلك
- الله يطيح حظك لك ما فكرت بينه ؟ حيوان
- اهدئ علئ كيفك ما تسوه
- لازم نفسي عنك چي احنه بالحضره الامام لو مو كاعدين بهذا المكان المقدس، چان سويت وجهك خريطه و تعرف ضربتي شلونها،
- اي لعد تعلمني بيك، اتذكر قبل عود بالشقه وضربت عثمان بوكس ببطنه، ضل يومين يا ياكل و يتقيء ههههههههه
- لاتضحك حمار احچيلي كلشي، شلوون خططت كل هلشي و بدون علمي!، شلون مثلت علينه ان انت ميت ؟!
- اولاً تعرف شغلنه دائماً ناخذ ادوار و شخصيات حتئ ما ننكشف، فٲخر يوم اليه بشخصيه الاخيرة لحگني واحد، عرف بيه اتجسس عليهم و اعرف كلشي عنهم فا حاصرني بالشارع علئ الجسر السريع، و راد يصاوبني و فعلاً صاوبني بس يربك جنت لابس جوا ملابسي ضد الرصاص، حتئ انقذ نفسي بهيج مواقف،
ما تدري علئ يا ساعه تجيلك الطلقه تايهه من شخص قاصدك ،المهم مثلت عليه اني ميت و قطعت نفس دقايق وهو شرد رئستاً، خابرت علئ حمزة و سولفتله كلشي اجا و جاب الاسعاف نقلوني للمستشفئ بدون احد يدري ..
- ايا طايحين الحظظ حمزة هم يعرف !!
- اي اسمع، لحتئ ما ننكشف ما ردت احد يعرف حتئ انت لحسن الحظ من سمعت بصوحبك مات بزوك ابرت تخدير بعد ما تحملت طبعاً غير انا عزيز عليك
- خر* * عليك و عليه، كمممل
- اي انت تخدرت لساعات اهواي و بقيت 3 ايام بالمستشفئ فا ما شفتني صدك متت لو لا، و عبالك دفنوني
- كمل ؟
- اي بقيت بالامام شهرين متتاليه، لحتئ هذوليج يصدكون ان اني متت و ما نقلت الاخبار، حتئ القبر سويت بٲسمي حتئ ما يشكوون بشي
- و انا مثل جحش كاعد يم قبر فارغ و امدح بيك و بطل و سبع تف علئ جهرتك يا خايس
- ههههههههه خطيه انت يلا تكبر و تنسئ
- ايا ملعون علئ هاي الخطة
- رائد انا مو سهل
- لحظة چاا و امك الماتت من سمعت خبر وفاتك شنو قصتها ؟
- باع اولاً
- لا تگول باع
- يابه اولاً هي مو امي مرت ابوي و انت تدري
- اي اعرف جاي احجي عليك لان انت موتتها
- اسمع هيه ما تدري بيه لا بشغلي ولا تدري تصاوبت و چانت بكربلاء بالبيت، فا صارت بيها جلطه و ماتت وهي سابقاً چانت مريضه،
صح انقهرت عليها لان احترمها و احبها بس هذا حكم ربك شسوي ؟
- اي الله يرحمها، و انا الخابص امه محمد و اگول گلب الام ما تحمل خبر وفاة ابنها العزيز ورا ايام ماتت
- لا بشرفك
- لاتضحك حيوان انت، هيه هاي دگه ناقصه تسويها بيه ؟ نوب من اتصلت عليه ورا اسبوعين جلفت بمكاني شلون ميت و يخابرني ومن سمعت صوتك عبالي روحك والعباس من الله لاا يطيك
- بربك ماعبالي رح يصير هيج بيك من مثلت عليكم، طلعت خوش صديق ههههههههه،
- غير انا حمار و صدگت
- حمار اصيل يطگ بالگاع يشوگ شگ هههههههههههه،
- ك*** ما كلتلي هدا الصاوبك منو هو، لان انا قبضت عليه غير نعلت سلفه سلفا علمودك تالي طلعت ما ميت انت ،
-يول يستاهل وابو الزايد بي، غير كاتل 2 شباب بعمر الورد، ومفجر 3 بيوت بديالى، وأحنا ردنه نقبض عليهم تالي اجه برجله وهو الممنون، وجماعته البقية عثمان قبض عليهم
- هلاا العبببب هلتيس الثاني طلع يدري و يمثل عليه ايا ك*** .. نوب حارك اعصابي و احجي واكول لازم دم رائد ما يروح هدر و هو يجاوبني طبعاً و احنه وياك بكلشي
- كفو منه عثمان بيض وجهي هههههههههه
- لاتضحك لا افرغ المسدس ب****
- لا يابه الا هلمكان الحساس خرب يومك حويدر هههههههههه
- امشي كوم نطلع للاعضمية، رايد اختلي بيك
- شرايد مني لك كو* * فقير اني كفيلك الله، مو مرجله منك تغتصبني ههههههههههه
- نعله عليك رايد اطلع قهري بيك
- يعني اليوم تنيمني بالمستشفئ
- جعلك تطلع منها بكفنك، امشيي كدامي اليوم ابتلي بيك اراويك نجوم الظهر بعز الصبح،
...
ناردين :- اجيت من الكلية سبحت و كعدت وياا رغد لعبت وياها، و تغديت، خابرت علئ حيدرة لان اتٲخر
جاوبني :- هلاا بضي عيني وناري هلا بهلصوت اليرد العافيه
استغربت رجعت اباوع علئ اسم الرقم، (احبه وما يحس بيه)
تسائلت نفسي، شنوو معقولة حس بيه ؟
-ها هلو
-يا بعد گلبه لحبيبچ گولي يابعدهن ليش متصلة محتاجة شيء؟
-لا تصدمني اليوم نازل عليك الوحي؟ عيوني وبوية شصاير
-چا غير انتي بنيتي وناردينتي..
-هلو هلو ههههههه..
-ضحكتچ..
-شنو شبيها؟..
-ترد العافية..
-باي..
سديته بوجه ما تحملت صدمني نازل عليه حنيه الا صاير شي.. ردت ارجع ادگ عليه چان ينفتح الباب و دخل يضحك..
اخترعت.. صدگ تحچي گلبي راح..
-ابوسه لگلبچ..
شمر السويج واجه يمي بعد كذلتي وباسني..
-فرحاان ناري فرحان..
-دوم يارب بس شنو المناسبة؟..
-اگلچ بس مو تنصدمين فدوا لعيونچ الاحبهم..
-ماشي گول؟..
ضحك وحضني من ظهري وگال وراسه برگبتي..
-تتذكرين صديقي الي مات قبل شهرين؟..
- اي رائد الله يرحمها، و يغفرله و يسكنه فسيح جناته مع الخالدين والصابرين و المؤمنين ،اي شبي ؟
ضحك قوي.. بووووية شگد ترحمتيله..
-ها ليش مايجوز للميت غير الرحمة..
-ما ميت عايش والله..
-عزا شبيك تخبلت ما يصير هيج تحجي ميت وطلعت اربعينيته..
-عايش بويه انا الي فهمت غلط الموضوع صار تشابه بالجثث ثانية وطلع مو رائد..
-ياااا عزا خطية واني اترحمله بكل صلاتي لان صديقك وشسمه ختمتله القران..
-هههههههههه يستاهل هلگوا* *..
-لساانك.. صدگ شلون دريت بي عايش؟؟..
-دريت بعد المهم هذا هو سبب فرحي..
-مممم..
-صبيلي غده وعلي جوعان..
-ولو مريضة بس رايحه اصبلك..
-شنو مريضة شكو
دار عليه وتلمس خدي بسرعة وگال حرارتچ مرتفعة!! تعالي تمددي على الفراش..
-اي فلاونزة..
-وين اكو وحده فلاونزتها بالصيف..
-بعد هو هذا حظي..
-چا اگعدي لا أتعبين رايح انا اصب لروحي..
-نادر حيدرة نادر..
ابتسم:- اعجبج..
مددني على الفراش وباس خدي وطلع..
نزل للمطبخ تالي اجا بيده ماعون زبادي وتفاح وقوطيه ببسي دايت..
-عود صدگ هيج تتغده؟..
-اي مممم..
ضحكت.. بالعافية ابو عضلات سداسيه والسكس باك..
ضحك وگعد علئ القنفة فتح اللابتوب.. وبدا يشتغل..
دخلت رغد اجت تجر بيدي وتأشر
-ها عمري شبيچ منو مضوجچ..
سمعت صوت صياح جاي من جوا صياح حسن ونبراس..
اهوو هم توم وجيري رجعو اتعاركو شلتها ونزلت جوا دخلت للهول خالتي وطيبة يضحكن..
التفتت اباوع علئ نبراس واكفة گبال حسن وهو يباوع بوجها وخربان ضحك و هيه دموعها عشرة عشرة..
-انت ششايف روحك وتبچي تؤامي..
حسن:- يابه بس اكلها بز اطيح وتبچي شدعوه عليها ماتتحمل شقة..
-شنو سويتلها ولك؟..
حسن:- ولك بعينچ لچ..
نبراس :- باعي مسويه كيكه صغيرة اليه و لرغد ومخليتها بالثلاجة لحتئ تبرد، تالي الگا ماكلها ابو جووووعه
-وانتي تبچين لان اكلها بالعافية عليه..
حسن:- يا بويه اروحلچ فدواا..
نبراس:- ولچ يمااا اريد كيكتي تعبت بيها 3 ساعات يجي هو ابو الراهي وياكلها !!
حسن :- بووويه خفه لهل حلگ..
نبراس:- حسسسنننن!!..
حسن:- الف عافيه علئ گلبي تخبل عاشت ايدچ
ضحكت عليهم وگلت الها بس الكيكة؟..
نبراس :- لاا ولج اليوم الصبح ماخذ البدي مالتي من الحبل طيبة شارته بالطارمه وياا الملابس المبلله، جان هوو ماخذ البدي و مسوي وصله مسح يمااا قهرررني قهررني ولج
حسن :- ديلا برنسيسه هو بدي بخمستالاف..
-ياا شبيكم صدگ چذب..
نبراس:- خل يبطل خباثه..
حسن:- خل تبطل تمووع..
نبراس:- صخام بعينك اني مايعه؟ اشوو ما تستحي زودتهااااا..
خالتي:- صدگ لو گالو العقل مو بالعمر.. يمه استهدوا بالرحمن صلو على النبي..
راحت نبراس للغرفة زعلانة ولحگتها طيبة..
باوعت لحسن:- انت هي عمرك 25 وهي مرحلة ثانية شبيكم زعاطيط الحمدلله والشكر اعقلوو بطلوو اخبال..
دخل حيدرة من سمعني وگال:- الله بالخير
جاوبتة.. ها ليش نزلت مو چنت تشتغل ابو المهمات..
-غير على صياحهم نزلت وين اگدر اشتغل..اگول حساني روح ارجع اشتغل نسيت شغلك مال اليوم..
غمزله وجاوبه:- ها اي صح رايح..
عفتهم ورحت لنبراس، گعدت يمها..
-باع حظي على شنو تبچين خيه..
نبراس:- ناردين ما اريد ابقى هنا صار الي اكثر من شهرين ما مرتاحه بگعدتي احس متقيدة اتعارك ويا حسن على اتفهه الأشياء وهو يضحك وينرفزني حيل..
-بس وين ترحين!..
- رح اخابر طالار يوديني يمه لأربيل احسن
-نسيتي!..
- لا ما نسيت سالار مو اخوي من أمنا وأبونا بس هو يبقى بالنسبه إليه اخ صارلنه 19 سنه انتوو الغيرتو وسويتو غريب
وأبتعد وبعدين هياتني عايشه وياا حسن وهو مو أخوي اشو ما گلتي لا؟؟
-حسن ابن عمچ يحل عليچ گعدتچ وياه..
-شسووي اموووت نفسي گوليلي؟ ما مرتاحة هنا
-ههه تعايشي مثلما عشت ليش عبالچ اني ما مقهورة لو گلبي ما مورم بس شنو بيدي اسوي؟ ماعندي احد بهالدنيا بس حيدرة..
طيبة:- نبراس شدعوه عليچ هو يشاقة وياچ كافي يمعودة لا تبچين لخاطري..
سكتت غيرت الموضوع صارت تسولف على الدوام..
تالي تذكرت وگلت الهن.. عزه بنات تدرن شنو صار..
-شنو؟..
-تتذكرن صديق حيدرة المات قبل اشهر جان اسمه رائد
طيبة:- اي رائد الله يرحمه شبي..
ضحكت..ولجن طلع عايش حيدرة گالي مساع..
طفرت نبراس من الفراش وصرخت بصوت عالي:- چذذذذذذب !!
-والله..
نبراس:- دا تشاقين صح موو؟..
-"سولفتلهم"
نبراس: عزه انطيني الموبايل بسرعة..
-ياااا ليش؟؟؟..
نبراس:- اريد اتصل على نوير..
-ليش شدخلها هيه..
نبراس:- ابشرها غير..
-ولچ ليشش هيه شنو تعرفه؟؟..
ظلت صافنة تالي جاوبتني.. لا لا غلسي..
-هاااا عندج شيء ضامته عليه ولچ؟؟
نبراس:- لا شنو اضم قابل..
-چذابة والنبي اعرفچ من تچذبين عيونچ تفضحچ..
نبراس: لا ولچ ماكو شي شسالفة بس بيومها مخابرة نور اني وسولفت الها وخطية هم انقهرت مثلما انقهرنه احنا فگلت ابشرها بهالخبر..
-اهااا..والله حتى اني فرحت لانو طلع عايش صديقة.. حيدرة هواي انقهر علية..
دقايق وطلعت اني وطيبة من الغرفة..
نبـراس:- اخذت الموبايل اتصلت علئ نور سولفت الها كل شي..
أنصدمت ما صدگت عبالها أشاقة حلفتلها بـ50 نبي يلا أستوعبت ضلت تبچي وتضحك من الصدمة والفرحة ما مستوعبة..
ما تعرف شنو تسوي صارت تحمد الله وتشكره طلع ما ميت..
...
نور
طلعت رقم رائد لحتئ اراسله أيدي ترجف وگلبي يدگ سريع دموعي علئ خدي
دزيتله رسالة "صدگ أنت عايش ؟
ما رد يمكن ما فاتح نت أو ما فاتح هذا الرقم
أباوع علئ الرسالة وأضحك مسحت دموعي و مسحتها، رحت علئ السجل الحظر اكثر من 9 أرقام الهُ حاظرتة
كلبت بيهن اكو حساب مخلي صورتة الشخصية گلت يمكن فاتحة
فا راسلته :- هلو رائـد
نفس الشيء ما فتح الرسالة رجعت أدرس كيمياء سجلت بمدرسة بأربيل وأنتقلت من بغداد
تالي رحت تعشيت لـ12 ردت انام وچان يتصل علية حرت شسوي أرد لو لا ؟
خفت لا سالار يدخل لو يسمعني مصطفى ويفهمون غلط ولو صُدگ هالشيء غلط بس ما أتحملت أريد أعرف أخباره
سديت الباب ورديت بخوف وأرتباك
- الو ؟
رائـد: هلا بيچ نور
سمعت صوته ردتلي روحي أبتسمت لا ارادياً بعدما چان صوته يضايقني ومصدر توتر وخوف إلية
- هلوو رائد شلونك شلون صحتك ؟
- الـحمدلله ناقصهم بس أنتي
- هاا !
- ضايج منچ وروحي واصلة لبيتكم
- شبيك ليش هيچ تجاوبني وأني داگولك الحمدلله علئ السلامة
- الله يسلمج صدك جذب ما تقصرين بس شعجب منج من الشيطان
- هو مو صوووجك صوچي أني وحدة حماره اسئل عنك و قلقانه عليك و انت واحد حقير
- أوي يالرقيقة
سكتت بس صوت بچيي ينسمع جر نفس طويل وگال مُتنهد :- أسف يروحي أشاقة وياچ لا تبچين بوية
ما جاوبتة ضليت ابچي ما سكِتت دموعي يجرن بقهر ..
- ولج كافي بعد گلبي لا تبچين بروح ابوچ
- روح رائد مع السلامة
- لحظة أوكفي نوور
سديته وحضرته سويت الوضع طيران حتئ ما يتصل وخليته صامت
گعدت ابچي ولازمة گلبي
ليش ضعفت گدامه هو منو بالنسبة إلية ؟معقولة هذا الخوف والبچي من نار حبهُ ؟
معقولة أني أحب رائد ؟ وگلبي تعلق بهذا الأنسان ؟
...
ناردين
حيدرة يوم عن يوم يتغير للأحسن لكن حيرني بين اليحبني والما يحبني..مر شهر الايام نفس الي قبلها..
اليوم يصادف 11/11 .. عيد ميلاد حيــدرة
حتئ تاريخ ميلادة مميز قررت اسوي اله شيء بسيط ويبدي سنة سعيدة
لأن قبل يومين جان مو طبيعي ابد متوتر حيل حتى الكلية خلا غير سايق يوديني ويجبني وسيارة مضلله ونبهني هواي ومن سألته ليش؟ جاوبني خايف عليچ.. وصاني ما اختلط بأحد ولا اطلع لغير مكان بدون ما يعرف..
فگلت اسوي عيد ميلاد بالبيت وهو طالع يمكن شغل واكيد يتأخر للعصر .. أتفقت وي طيبة انسوي اله كيكة دخلت للمطبخ حضرنه القوالب وكل شي جهزته تالي طلع بس حليب ماكو مخلص عدنا..
طيبة: چا عوفي يجي حسن من دوامه وانگول اله يجيب كيكة جاهزة..
-لاا اريد اسوي بيدي..
-چاا شلون والحليب؟
-سهلة عادي هو هذا ابو المحل يمنه
-اي ومنو يروح؟..
-اني لعد منو..
-لاا ناردين تدرين كلش زين حيدرة ما يقبل أطلعين بدون علمه
-اووو طيبة لا تعقدين الأمور ابو الاسواق بفرعنا مو بعيد شنو رح يصيرلي مثلاً..
-اگلج گعدي راحه وسكتي ما عايزين مصيبة..
-اريد اسويله مفاجئة وافرحه بشيء بسيط عليچ النبي لا تخربيها..
رحت لغرفة خالتي اخذت من كنتورها عباية لبستها فوگ دشداشتي ما عرفت شلبس ومالي حيل ابدل باوعت الساعه بـ2 الظهر
شافتني نبراس بقت تصيح عليه ما اهتميت اخذت خمسة وطلعت بره الشارع فارغ ولا شخص طالع لان الدنيا ظهر ..
مشيت إلى نهاية الفرع بس حسيت بشيء غريب كأنو شخص يراقبني..دخلت للاسواق اشتريت حليب وطلعت بسرعة وعيوني على الطريق..
وصلت لشارعنه قبل ما ادخل للبيت حسيت على صوت هورن سيارة وراي!! ارتعش جسمي وعم الخوف بداخلي بس ألتفتت ليورا صار بوجهي واحد ملثم بقناع جرني من رگبتي خلى كلينكس على خشمي وبعدها ما حسيت بشيء..
..
حيـدرة
صفيت سيارتي بالركن وانتبهت على كيس حليب متبدي قريب من الباب استغربت ودخلت للبيت.. سألته طيبة وينچ..
اجت وهي تلطم على خدها ونبراس وگفت يمها تبچي..
تغيرت ملامحي من هدوء الى قلق وشكيت بسرعة وسألتهم ناررردين بيهاا شيء؟؟؟؟
طيبة: خويه ما ادري شحچي والله..
-شنووووو ناررردين وووينج تعااالي..
طيبة:- حيدرة مو هناا ناردين..
ركزت بعيونها ورصيت على اسناني اردفت..
-چا وينها ! احجوووو؟؟؟
طيبة:- ناردين صار إلها ساعتين طلعت للمحل تجيب حليب من الاسواق وبعد ما رجعت والله كلتلها لا ترررحين لا ترررحين حيدرا ماا يقبببل بس طلعتتت !!
-شنووووو! تحچين صددگ؟؟؟ خررب گلتلها لا اطلعييين لا تولييين شكوووو طلعت وعاندددت ؟؟! هسه ويييين الگاها بياااا گاااع ليششش ما اتصلتوووا علييييه؟؟؟
طيبة:- على حظنا كلنا مخلصين رصيد والله..
نبراس: حيدرة فدوه سوي شيء ارريد اختي الله يخليك گلبي رح يوگف عليها..
-ولحسين گلتلها اصبري بس هليومين لاا اطلعيين بدون علمي يابه استجنيي الوضع مو تممممام ليييش تعااند بويه ليييش!! حساني وين ؟
طيبة: حساني طالع من الصبح للشغل..
-عفيية عفييية كملت بوية هذا الچان نااقصص
سألتهم وين راحت وطلعت رحت للأسواق حاولت اخذ من الرجال معلومة مفيدة ماكو مجرد اجت اخذت حليب وطلعت وما يعرف شي.. رجعت للبيت شفت الكاميرات مكسورة هالشيء مخطط اله من قبلهم !
مباشرةً اتصلت علئ عثمان وبلغته گال رح اندور من هالساعة.. بين تفكيري وتلاشى أفكاري رن موبايلي رقم مجهول جاوبتة رئستاً..الووو
-حاليا صارت عدنا
-إذاااا لمستوووا شعرررره منها ادميكم وعلي اذا انتو زلم تعالوو واجهوني مو تخطفوون عرضي من وراي يا حثااااله يا جبناااااء
-حظر 50 مليون تجي مرتك گدام بيتك
-رح احظر 50 طلقة براسك وراس اسيادك ساعة وانا يمكم
-لا تحاول تلعب جيب الفلوس واخذ حبيبتك..
غلقته منهم وانا قابض ايدي بتوعد الهم..
طيبة:- خوية صدگ نخطفت؟؟؟
نبراس:- اختي بروح ابوي حيدرة ردها إليه سالمة!..
ما جاوبتهم صعدت بسرعة ركضت للغرفة طلعت مسدسين خليتهم على خصري دگيت على عثمان وگلتله الخاطفها عرفته
-ان شاءالله ترجع الك سلامة لا تخاف كلنا وياك أنا والفريق والشباب كلها
-ان شاءالله حظرو 3 سيارات انا اندل المكان عبالهم ما ادري وين مخليها ناردين لان مراقبهم علئ الصامت صارلي 7 أشهر
عُثمـان: كفو لعد رح اجي انا والفريق جايين بظهرك رووح وتوكل علئ الله
قفلته منه ورجعت موبايلي بجيبي فتحت الكنتور طلعت الجنطة خليت بيها اوراق وملفات وطلعت نزلت جوه يسألني شنو صار ما جاوبتهن طلعت من البيت ركبت سيارتي
وصلت لبداية الشارع المكان مراقبه من ست اشهر بدون ما يحسون واعرف كل تحركاتهم واعرف ما مخلين حراس هنا دقايق و وصلو عثمان والفريق بسيارتهم
-بالاول انا ادخل تالي انتو لأن ما اريد اخسر ناردين رعرف بيهم يغدرون..
اذا ما خلوني اطلع انا وناردين فراح أصيحلك بأعلئ صوتي ابقئ قريب من المكان حتئ تدخلون بالوقت المناسب والصح
عُـثمان: صار بوية وهاك هاي الجنطة
- بيها 50 مليون مو
عُـثمان: أي يابه لعد نغشهم ههههههه
غمزلي وضحكنا سويه .. رجعوا سياراتهم ليورا لحتى محد يشوفهم ويخرب الاول والتالي انتظرت نص ساعة واندگ موبايلي كذلك برقم مجهول عرفتهم هما فجاوبتهم
-جبت الفلوس وين انطيها الك؟
دزلي نفس العنوان الواكف بي أنا وغلقة بوجهي اتاخرت ربع ساعة تالي يلا دخلت حتئ لا يشكون اجه شخص ملثهم مد ايده وسحبني
- مسدسك طلعة فوراً
- أتفضل ..
"نطيته مسدسين..
تالي دخلني لغرفة بيها الرئيس سألني
-وين الفلوس ؟
-بالجنطة بس قبلها أريد ناردين
-الفلوس بالأول
سحب مني الجنطة شافوا بيعونهم وزنو انو هاي 50 مليون دخل شخص ثاني بيده ناردين مربوطه ايديها وعيونها
-نـاررررري..
صرخت بأسمي قاطعتها بسرعة سديت حلكها بيدي الله ستر چان انفضحت قبل ما نهجم عليهم..
-الفلوس صارت عدكم هسه اگدر اروح صح؟
ضحك وجاوبني: حبيبي مو بهذه السهولة صح احنا وعدناك واتفقنه نستلم الفلوس تستلم مرتك بس ما تطلعون بسلام وعايشين اثنينكم لازم تنقتلون مو اغبياء احنا يا اسد ..
اشر عليه ورفع المسدس بوجهي مباشرةً خليت ناردين بظهري صحت بصوت أعلى من العالي بحيث هز المكان هز عثماااااااااااااااااااان ..
بس سكتت بسرعة أتردد صوت الشرطة عالي وهم أنصدموا منين اجوو..
-اياا كلب طلعت متصل على الشرطة
-انا مو غبي وعندي عقلين بدل الواحد
- ولا حركة بس تتحرك خطوة طلقة بمرتك!
كسرو الجام وصار رمي قوي سحبو بيديهم ناردين وصارت يمهم ضلمت الدنيا بعيوني يارب عديها مثل كل مره أحنا المُنتصرين!
خفت على ناري لااا تجيلها رصاصة دخل عثمان وبيده المسدس حاصروهم من الشباك ومن الباب رفعو ايديهم بأستسلام..
عُـثمان: شمرووا المسدسات فوراً يلااا..
نزلو المسدس والثاني جان يسحبه من الكاع بحركة سريعة ضربني طلقة تايهة ببطني.. صرخت ناردين وماعت روحها بالگاع انغمى عليها من الصوت الرصاص وشدة الموقف
كلبشوهم وطلعوهم گعدت بالگاع لازم بطني اجا عباس وبيده علبه الاسعاف يعرف بهاي الشغله لانه دكتور يشتغل ويانه والحمدلله جنت ماخذ احتياطي ولابس حماية ضد الرصاص والرصاصة مو خطرة جرح مو عميق..
گمت رحت لناردين المتمدده بالگاع ما كدرت اشيلها بسبب الجرح حاولت اكعدها وفعلاً گعدت صحت بيها گومي بدوون اسئلة بسرعة خلي نطلع..
شافتنه مستعجليين والوضع جدي بسرعة كامت لازمة راسها بألم صعدنه للسيارة لورا خليتها بحضني اهدئ بيها وعثمان يسوق طلعنه من المكان المهجور المابي ولا بيت ولا شخص ساكن اهنا فا العصابات احياناً تاخذ قربانها والفدية بهذا المكان لان ما معروف ببغداد إلي يملئه الهدوء
بعد 3 ساعات بالطريق وصلنه لبيتنه المشترك نستراح بي بين فترة وفترة نزلت كعدت ناردين حتى تدخل لان رجعت نامت الطريق طويل وصلني عثمان وهي دخلت..
قبل ما يروح كال:- لا تقلق حبيبي رح تجي حماية اهنا تحرس بيتك فد 3 ايام، اما حسن فاخابرته وبلغته بكلشي وعرف يتصرف صح..
-تمام وشنو يصير خابرني..
-اي دير بالك على نفسك يلا في امان الله
-ان شاءالله توكل الله وياك ..
دخلت وقفلت الباب شفتها كاعدة على الكرسي بالمطبخ بداية البيت ومغمضة عيونها
-ها الله بالخير
بقت ساكتة سألتها بضحكة.. ها بويه شبيج
كلتلها هيج وفتحت الثلاجة طلعت منها 3 ابطاله ماي شربتهم وانا واكف نشف ريگي..
وگفت بعصبية واني اضحك بوجهة..حيدرررا ويين عايشييين فهمنييييي
- بالعراق العظيم
-يخطفونيي من بيتك ويرعبوني وتدخل انت والشرطه مسلحيين وتنقذني ياررربييي
-يا بويه افدي العصبي انا اهدي مو زين عليج
-شنووووووو اهدئ ما ااااعرف الهدووء اني ضربوك طلقة خل اشووف الجررررح اشوو بعدك واكف على حيلك !!
-مابيه شي وداعتچ..
-تراااا والله ضربوك طلقة رصاااصة بمسدددس ناررري مو بمسدس مي..
-مبين اعصابج تلفانه هاج هذا بطل ماي اشربي
-انتتتت صدگ تحجي اشو ما مهتتتتم وعادي تحجي ببرود ولا كأنوو جنت بوسط ناس مسلحه والرمي عدهم ببلاش !!
-وشتريدين مني اسوي
-نوب هلاا يا بيت جبتني عليه
-بيتنه انا وجماعتي
-عزا بعينكم هسه توضحلي كل شي والله منوو انت گووول!
-عزرائيل هههههههه
-اووووي متزوووجة كوووميدي وما ادررري
-تمام تمام اكلج بس مو هسه ارتاحي بالاول
-ردت اموت تدري؟ ثاني مره انخطف اول مره خطفوني لبيت دعاره وهسه هاي مره لخ مادري وين جابوني
-كلتلج يابه لااا اطلعين كلتلج لو لاااا احجي؟؟ ترا بيج كتله وعضه من الاذن قوي نفسج واهدي هسه..صلِ على النبي
گعدت ابچي بصوت عالي.. گومني دخلني بغرفة بيها قنفات حضني لصدرة ظل يهدئ بيه..
تالي طلع يغسل.. اباوع علئ البيت كبير.. درج دواري واضح انو اكو هواي غرف فوك، مطبخ كبير ببداية البيت وصالة كعدني بيها
كالي كومي اصعدي فوك فتحي الغرفة الي تعجبج نامي بيها هزيت راسي لان صدك بعدني دايخه احتاج انام بعدني خايفه من الي صار
صعدت الدرج تصميمه دائري وطويل حيل على اليمين غرفتين وعلئ اليسره 4 غرف وحدة بصف الثانية
فتحتهن كلهن واتفاجئت كلهن مأثثات بأحلى تأثيث وحدة احلى من الثانية..
نمت بوحدة منهن ..ما ادري شكد نمت ..ما حسيت بالوقت ..بس الظاهر صاير يوم ثاني لان اكو شمس واضحه من الشباك، ..والساعة بـ7 الصبح
لعد شكد نايمة من البارحة ...التفتت شفته نايم بصفي بدون ملابسه، شكله تعبان
كعدته صبحت عليه وكعد جر قميصه وكام رحت ورا نزلت جوا دخلت للمطبخ وياا غسلت وجهي الشمس صارت بعيوني فسديت الشباك ..
حيدرة :- ها ناري جوعانه تتريگين وياي؟..
-لا ما اريد نفسي مسدودة..
غمزلي :- افتحها الج ؟
باوعتله صفح وهو ضحك..
-ام الحليب ماگعدتي راحة..
-غير يحظي ردت اسويلك مفاجئه بعيد ميلادك..
-ما قصرتي الله يكثر من امثالچ وخيرچ..
-صدگ نسيت اگلك كل عام وانت بخير..
-هههههههه وانتي بخير يابه ديلا علئ اساس هو شلون ميلاد اسود مصخم..
-اي بعدين نحتفل..
-لاا يابه احتفاليش عمري صار 39 سنة هاي سوالف مو الي..
ضحكت.. لاا بالله..
-وداعة عبدالله..
طلع موبايله خابر ما اعرف منو.. گلتله ويامن داتحچي؟..
-عثمان
-شيقربلك
-صديقي بالشغل مو گايلچ عليه
-اهااا ما ادري ناسيه..
-روحي جيبي موبايلي الثاني تلگي بنفس الغرفة الي نمنه بيها ..
-هلا وموبايل ثاني..
ضحك وگال.. استخدمة بس للشغل بي ارقام احتاجهم..
هزيت راسي بمعنئ (اي) وصعدت فوگ دخلت بنفس الغرفة دورت علئ الموبايل ما لكيته ..
فتحت الكنتور شفته مخلي علئ الرف اخذته وقبل ما اسده شفت ملابس عسكرية!..
اخذتهن باستغراب ونزلت بسرعه جوا..
انطيته الموبايل بدون ما يشوف الملابس البيدي وگلتله بصوت هادئ يعكس الانفجار الي بداخلي..
-حيدرا..
گال وعيونه بموبايله :- هاا..
-الموضوع زاد عن حده؟..
-شنو خير شبيج ناري!..
-اريد توضحلي كلششي!
-شنو اوضح شصار؟..
-شغلك! اريد اعرفه..
-هيچ شغلي شاغل بالچ ومهتمة تعرفين ؟
-اي اريد اعرف شغل زوجي انت گلتلي البارحة رح اتگولي! انت منو حيدرة لو اسد ؟..
-حيدرة يابه
- شنووو شغلك ؟ گول لا تهرب من الجواب لا تچذب عليه وتگول دكتور لأن من صعدت للغرفة شفت ملابس عسكرية!
تحمحم وجر نفس تالي اطلق صدمته إليه..
حيدرة:- انا ضابط عسكري بالأستخبارت العراقية.. يتبع
⭐⭐⭐⭐
#نمارق_رحيم