#اساور_الفضة_ج٢
#نهى_الحسون
#البارت_الخامس
هالة اباوع لقاسم
راص على اسنانه بغضب وكوة لازم نفسه
ما ينفجر
جان يسوق وكل شوية يغلط ويسب على سواق السيارات عبالك بس هو يعرف يسوق
ادري بي ديساير امي كوة على اعصابه
داس على روحه بالكوة وافق يجي ويانا ياخذنا نشتري الذهب لهدى
امي من البارحة بالليل انطتهم خبر يجهزون روحهم
حتى يجون ويانا ويختارون
طبعا اني بهاي الايام التهيت عن هدى وما اتصلت عليها
لان صادف المشاكل بين قاسم وامي
اضافة الى اني هم كمت اتهرب من هدى لان
اخاف تسألني عن سالفة قاسم ورهف
لذلك فضلت ما اتصل عليها احسن
قاسم.. يعني هو مشتراة الذهب سالفة مال نسوان
انا شسوي جاي وياكم لو هي شغلة عناد
اباوع لأمي
.. شطلعت هاي ترة والله ورمت كلبي
يمة قاسم هذا زواج مو لعبة يعني الاصول تكول تجي
ويانا وتشوف البنية وتشترون حلقات سوية
.. هذا هو حجية صار التردينه يصير
اباوع لأمي من يكللها حجية
تخزرة بعيونها وتزم شفايفها بغيض
ادري بقاسم بعده لا زال مستمر يعامل امي ببرود
ومن يوم الصار قاسم بطل يذكر كلمة يمة
عبالك ديعاقبها واذا يريد يحجي وياها كلة يكللها حجية
وصلنا لبيتهم وقاسم بالكوة دخل السيارة بالفرع مالتهم لان ضيك
والجهال يتراكضون من جوة السيارة كل شوية امي
تعيط عبالها دعم جاهل
يباوعون عالسيارة بأستغراب لان مبين عليهم مو كل يوم يشفون هيج سيارة
.. هسة يمة جان سمعت كلامي وتركت السيارة براس الفرع مو احسنلك من هاي اللوعة
.. شنو خو ماكو شي واخليج تمشين هذا الطريق كله على رجليج
.. اوف منك شكد عنودي هذا الولد
باوع عليها صفح واخذ نفس وما علق على كلامها
وكف السيارة بباب بيت ابو شيماء
التفت علينا قبل لا ننزل وحجة ويانا بتحذير
قاسم.. ما اوصيكم عود ناموا. يمهم
علمود اعوفكم واروح
.. لا ما راح نطول شغلة دقايق على كد السلام
ناخذ البنات ونطلع لان امي انطتهم خبر من البارحة
ام قاسم .. ها يمة قاسم اشتغلت رحمة الله شوف من هسة اكلك احنا طالعين مو تسممنا وتظل تحجي كدام البنات وتخشن خاطرهن عيب يمة مااريد تسود وجهي كدامهم
.. ما عاش الي ينزل مقدارج حجية وجهج طول عمره يبقى ابيض
يالله روحوا بس لا تتأخرون
.. الله يرضى عليك ويهديك يارب
نزلنا وامي دكت الجرس لحظات وانفتح الباب
وكفنا مصدمين من منظر شيماء المفزوع
شافت امي وصاحت .. خالة ام قاسم لحكي بابا راح يموت هدى
ام قاسم.. ياستار استر شكو شصاير
.. بابا ديضربها. بالغرفة وقافل الباب اختي راح تموت جوة ايده
اجانة صوت قاسم وهو راكب بالسيارة جان منزل الجامة
سأل وهو عاقد حواجبها
.. هالة شكو شصاير
امي دارت عليه .. يمة قاسم انزل الحك البنية هذا ابوها
اتخبل وراح يموتها
نزل قاسم وسد باب السيارة وراه وعين على امه وعين على شيماء
اقترب وسأل.. شكو شصاير
شيماء تستعجلهم.. عفية قاسم داخلة على الله وعليك
خلص اختي من جوة ايد ابوية لان راح يموتها
قاسم بنخوة .. فوتي دخلي جوة وسويلي طريق
شيماء فتحت الباب على وسعه
.. ادخل ادخل ماكو احد غريب
دخلت تركض كدامنا وخلتنا وراها
واحنا اتبعناها اسمع قاسم يحجي بغيض وية امي
.. يالله هاج استلمي هي هاي القسمة الزينة الي كتلتي روحج عليها
خزرته امي وفاتت جوة للبيت ودخلنا من المطبخ وبعدها للهول
شفنا بيبيتهم سليمة وضحى واكفات يم باب مسدود
وشيماء راحت تدك عالباب
وكف شعر راسي من سمعت صوت هدى تتوسل وتبجي
وصوت ابوها عالي يغلط ويسب
يمة انمرد كلبي عليها
انتبهت لوجه قاسم من سمع صوتها رص على اسنانه بغضب وكور ايده بقبضة
حجة من بين اسنانه وية شيماء
.. شيماء شوية سوي مجال خلي احجي وياه
شيماء ابتعدت عن الباب وهي تباوعله بأمل
وصوت صرخة هدى الاخيرة تنذر بالخطر
اقترب عالباب ودكه حيل عبالك يريد يخلعه
كال بصوت عالي رج البيت رج
.. لك اثير عار صير رجال وافتحلي الباب انا قاسم
...............
هدى
ادري بروحي استاهل الضربة لان اتعديت حدودي واتجاوزت على بابا
بس غصب عني خوفي على شيماء كان اقوى مني
اجيت اموت بدمي من شفت شيماء دخلت علينا وجهة اصفر وملابسها كلها دم
وعرفت بعدها اتعرضت للاعتداء
والسبب افعال ابونا جان كلبي يفور عليه
وكأنه ما اكتفى بالمصايب الي يجيبها النا كام كملها
بقصة فلوس المهر
اني ما همتني فلوس المهر بكد ما همني اختي شيماء
كامت ترجف من العصبية والصياح علمود اخذ الفلوس
تتعارك وياه وهو يجاوبها بكل برود
يكللها .. لازم انطيهم الفلوس هددوني بيكم يأذوكم
اذا ما اوفي الدين
اني هنا عقلي فصل عن المعقول
ليش هو منو وصلنا لهاي المواصيل
وليش احنا نتحمل مسؤلية اخطاءك كل مرة
شوكت يصير اب مثل العالم وياخذ دوره. ويانة
وهنا مااعرف شلون انطلق لساني
وحجيت بحركة كلب مال واحد خلص وصل حده
............................................................................
لسان حال هدى
بقلم @hoda-s
ابي..
كم تمنيتك ابا
تسكن الوجدان مني
بين كحلي وعيني
تصارع الحياة من اجلي
وبروحك تحميني
تكون لصوتي صدى
يملئ الكون والمدى
ويدك الكريمة زنابق الحب تهديني
فأقبل اليد الحانية ابي
فهي لي سندي ومعيني
تمنيتك تراتيل لصلاتي
وبك تفتح لي ابواب السماء
فيزهر صوتي وتصل دعواتي
تخشع لورعه وزهده النجوم
فيسافر عطره الطيب بصلواتي
تمنيت.. وكم تمنيت
ضاعت هباءا امنياتي
ارتمي شوقا على صدرك
فيجري الحب في وريد اوصالي
تدب الحياة فيها
فأصبح زهرة برية
مورقة عن يميني وشمالي
اختصر في حضنك ابي
دفء كل مافي الكون من رجال
وكفك حنون كنسمة
حين اغفو تداعب اجفاني
وحديثك الطيب موعظة
لاتفارق كلماتها لساني
تمنيت ان اكتب بك شعرا
يختصر في اسمك كل المعاني
ولكن هيهات يا ابي
هناك فرق كبير
بين الحقيقة والاماني
#Hoda بقلم هدى سعد
..................................................................................................
هد علية وضربني وتالي دخلني للغرفة
ورجع ضربني راشدي ثاني على خدي وكعني بالكاع
بس هالمرة حسيت سمعت صوت صفير بأذني
طووووط
وحرارة نزلت من شفتي مسحتها وباوعت شفت دم
شاف الدم
بس ما اهتم وكعد يغلط ويسب زحفت للخلف
شفته اتوجه علية يريد يضربني جسمي كام كله يرجف من الخوف
..لج كلبة بنت الكلب اذا ما اعيد تربيتج من جديد
الظاهر انا هواي خليتج على حل شعرج لحد ما
طغيتي
اريد افتح حلكي ماكو الكلام راح
رفسني برجله واجتي الرفسة بكتفي لان جنت متكورة على نفسي
جنت بس اصرخ بالم
واسمع شيماء وضحى يدكون بالباب يتوسلون بي يفتح الباب
.. اذا ما اخليج تنعلين اليوم الصرتي بي ما اتسمى اثير
ولج انتي البرص تحجين وياي هيج وتراددين.
لعد صبريلي
جان يحجي بصياح اقترب مرة ثانية يريد يكمل ضرب
صرت اتوسل بي يعوفني
.. بابا ابوس ايدك كافي
بس فجاءة سمعت الباب اندك حيل
جمدت بمكاني بأمل وبابا مثل حالي اتصنم
سمعنا صوت رجال خشن معصب
.. لك اثير عار صير رجال وافتحلي الباب انا قاسم
يمة انا سمعته كال قاسم وانا كلبي اجة يوكف
ياربي شنو هذا العذاب حرت ممن اخاف
على الاساس اني جنت ناقصة ويجي قاسم
رفعت عيوني وانتبهت لبابا انكلب وجهه وحجة وهو واكف بمكانه
.. ما افتحلك الباب وانت منو كلك تفوت لبيتي بدون علمي
شوف ولك اسمعني زين اخذ اهلك وارجع منين ما اجيت
ولا تدخل نفسك بشي ما يخصك
لا تخليني اطردك
عم الهدوء
يمة وبعدها ما حسينا الا عالباب انضرب بكل قوة بصوت يصم الاذان
هو منا باب سليمة عاوي ونوب هذا هرقل
انطاه رفسة ما حسيت الا على قاسم داخل للغرفة
مثل الغيمة السودة يرعد
يمة هو اني شفته دخل للغرفة واني كمزت من مكاني واكفة شفته هد على بابا
واني هي صرخة وبعدها ما حسيت على شي اغمى علية
شيماء
دخلت ورة قاسم للغرفة وشفت هدى واكفة بالزاوية ترجف
شافت قاسم هد على بابا وهي كبل اغمى عليها
ركضت عليها
سليمة كعدت تلطم وتصيح يبوووو هجمتوا بيتي
وام قاسم كعدت تهدي بأبنها تترجاه ما يسوي شي لأثير
.. يمة قاسم اوكف خلي نفتهم شنو السالفة
قاسم .. عوفيني عليه خلي اشوف هذا السكط شبي
اقترب على اثير بتهديد
.. ولك اثير تطرد منو ولك ما جابته امه الي يتطاول على قاسم
اثير بلع ريكه وحجة
.. شوف قاسم انا ما اتعديت عليك انت الي اتجاوزت علية
دخلت لبيتي وكعدت تصيح وتهدد وانا مو يمك ولا بكرباك
.. ولك شلون ما اتعديت علي وانت لازم مرتي
ومتوليها ضرب
وهي عرضي والي يتجراء يهين عرضي اشرب من دمه وادفنه بكاعه
اثير بتوتر حس بالتهديد
.. شوف يا ابن الناس هي بنتي وانا حر بيها اكتلها اموتها بكيفي
وانت ماعندك مرية يمي
اني غيرت رأي ما ازوجك بتي خلاص هاي هي كلمن يكعد بمكانه
يالله هسة تكدر تاخذ اهلك وتطلع
.. ولك اثير اتقي شري
لاتخليني اجرم بيك واعلمك شلون تحجي مثل الرياجيل
ولك انا ما جاي اخذ رأيك تزوجني بنتك لو لا
لان هي بالاصل مرتي وعاقد عليها
يعني الموضوع طلع من جوة ايدك وصارت تحت حمايتي
سليمة.. ولك يمة اثير اتكفى الشر ما تشوفه جنه ثور هايج علينا
ام قاسم وكفت كدام قاسم وحطت ايدها على صدره تمنعه يهد على اثير
.. يمة قاسم لاتخلي بالك وياه ترة هذا معصب ما يعرف شنو ديحجي
لزم ايديها ونزلهم
.. بس لحظة حجية خليني ارجعله ذاكرته خاف هذا نسى نفسه
لك عار مو انت ذاك اليوم كتلت روحك وسحلتها
حتى اخذ مرتي
.. اي وهسة بعد ما شفت خبالك قررت ما ازوجك بتي
التفت قاسم على شيماء وهالة وكللهم
جهزوها خلي اخذها للمستشفى وباوع لأثير بتحدي
.. بالله خلي اشوف رجال يفتح حلكه ويمنعني اخذها
شيماء جابت عطر يم خشم هدى صحتها شوية
وهي وهالة سندوها حتى تكدر توكف على رجليها
واثير سد عليهن الطريق وكف كدامهن
اثير.. شوف قاسم بنتي ما تطلع وياك من البيت الا على جثتي سامعني
قاسم وصل حده هو جان بس يدور على حجة حتى
يهد على اثير وزنكه من قميصة ولطشه عالحايط
.. اذا جانت طلعتهم على جثتك فهاي محلولة سهلة
اسهل منها ماكو
وجان يضرب اثير كلة براسه خلة خشمه
يصب دم ويوكع دايخ بالكاع
سليمة.. يبوووووووي .. يبوووووي راح يموت ابني
راحت سليمة على اثير هي وضحى
قاسم .. اثير هاي الضربة اعتبرها لمسة ريشة
بالنسبة عالناوي عليك بس بختك ببناتك هنا
والا كلبي حيل محمل عليك
دار وجهه عالبنات
يالله بنات اتحركوا خلي اخذها للمستشفى
هدى
جنت كلي ارجف مثل السعفة
جانت شيماء ساندتني وتمشي وياي وهالة حطت على راسي حجاب
من الهبطة والخوفة نسيت حتى الم الضربة
رفعت راسي اباوع عليه يمشي كدامنا نافخ صدره
يمشي بطريقة تخوف وكأنه يكول ياشر اشتر
صعدنا بالسيارة وهو صعد قبلنا
كعدت بالنص بين هالة وشيماء ملت راسي وحطيته على كتف شيماء
اريد اضم روحي بس وين اروح
ساق السيارة
واسمع ام قاسم كل شوية تكله يمة قاسم انتبه دير بالك
هسة انت عليمن طاير ليش تسوق سريع
فجاءة لزم بريك قوي ووكف السيارة بنص الطريق ودار وجهه على امه
.. اكلج حجية ليش ما تجين انتي تسوقين السيارة بمكاني
ام قاسم حجت مخترعة
.. يا .. يا.. انت صدك تحجي الله ياخذ عدوك
على هاي الدكة والله انت مو عاقل وكعت كلبي
ارتعد جسمي همست يم شيماء
.. عزةةةةةةةة لج شيماء غجعيني (لجعيني)للبيت
هذا امه بكبغها غاح (بكبرها راح)يجلطها
لعد اني شنو غاح يسوي بية
.. اشششش نصي صوتج ترة سمعوج
شهكت بخوف وحطيت ايدي على حلكي
حجة بصوت .. اكول شيماء شنو صاير ليش ابوج
ضرب اختج
ام قاسم.. هي مو جديدة عليه من يومه هو ما يخاف الله ببناته
ام فرزدق تكول ايده والضربة وياهن
.. اي بس مامعقولة منا للدرب يجي ويضرب
لابد وان اكو سبب
كلبي انقبض من سمعت سؤاله
عزة هذا ما يفوته شي حسيت بتوتر شيماء
مثل الي وكعت بورطة ومتعرف شنو تجاوب
غمضت عيوني بأستسلام وكطعت النفس وحبسته بصدري مترقبة جواب شيماء جان موقف كلش محرج
شيماء .. بالحقيقة هدى وبابا صارلهم اسبوع متعاركين
هدى معترضة على اسلوب بابا
لان هي تعرف بابا ضغط عليك بسالفة الدعمة حتى تتزوجها
واليوم جانت تحجي وياه ان يتنازل عن هذا الزواج
وكالتله اني طبت وكلشي ما بية واترك الرجال يشوف حياته
هي مو بالكوة ما يريد يتزوجني
وانت تعرف هي هم بشر وعندها كرامتها
حالها من حال البنات ترفض تتزوج بهاي الطريقة
لواحد رافضها ومن حركة كلبها صيحت على بابا
وبابا عصب عليها وضربها
جانت شيماء تحجي بطريقة مؤدبة حتى توصل لقاسم رفضي للموضوع
بصورة حلوة بنفس الوكت هي ما جذبت
فعلا اني انتفضت بوجه بابا على كل ما بدر منه ويانا من ظلم
ام قاسم حجت.. يايمة هدوة صدك جذب ليش تفكرين هيج
هو قاسم وين يلكة احسن منج
هو صحيح زواجكم صار تحت الضغط
بس صدكي انا والبنات الكاع ما شايلتنا
من الفرحة ومنتظرين اليوم الي تنورين بيتنا وتصيرين جنتنا
هالة.. اي والله صدك اني احسب يوم يوم على زواجكم
ام قاسم لكزت قاسم بخاصرته
وحجت من بين اسنانها بصوت ناصي وية قاسم
.. ابو الهول انطق احجيلك كلمة تبرد بيها الموقف ترة البنية خايفة منك
حجة بصوت خشن
.. على شنو تخاف مني يمها بكرباها اني
حتى تخاف مني
رفع صوته موجه كلامه لهدى ولأول مرة يحجي وياها
.. شوفي يابنت الحلال الي صار قسمة ونصيب
وكلشي قضاء وقدر الله لا اعتراض على حكمه
فأرضي بنصيبج مثلما انا رضيت بنصيبي
وبهاي الاثناء وكف السيارة يم المستشفى
ونزلو البنات وهو وام قاسم نزلوا
ام قاسم بغيض بصوت ناصي
.. بربك اكو واحد يطمن وحدة بهيج اسلوب
دار وجهه عليها
.. اكلج حجية شتردين مني اجذب عليها
ترة الله وكيلج هي واصلة حدها
لا تكعدين تختبرين صبري ترة ماضل عندي صبر
دخلنا اني وشيماء وهالة وقاسم وامه يمشون ورانا
اسمع ام قاسم بس تتهامس
كلام قاسم وترني بالزايد واربكني
جانت هالة لازمتني من زندي عبالك راح انهزم منها
حجيت وياها موجوعة
.. هالة عفية عوفي ايدي يمكن كتفي مخلوع وانتي دتزيدين الالم
هالة.. يبووو.. بية ولا بيج
ابتسمت ابتسامة معوقة
.. اسم الله عليج. هو انتي قابل ناقصة
انتي كلش كافي عليج اخوج قاسم
جنت احجي واباوع عليه اتقدم على الاستعلامات
وحجة وية الولد وبعدها الولد اشرله على غرفة الطواريء
دخلنا لكينا الدكتور كاعد خلف المكتب
قاسم سلم عالدكتور وشرحله الوضع على انه
اتزحلكت بالحمام ووكعت
بس لفت انتباهي كلمة زوجتي
ما اعرف شصار بية كلبي كام يخبص
من الخوف وكأنما من نطق هاي الكلمة
حط علية ختم الملكية الخاصة
اجتي هالة يمي واخذتني للسرير
.. يالله حرم السيد قاسم ممكن تصعدين عالسرير
حتى يشوفج الدكتور
كعدت عالسرير بمساعدة شيماء وهالة
استلقيت على ظهري
والدكتور كعد يسألني على اماكن الالم
واني كعدت اوصفله اماكن الالم
.. دكتوغ (دكتور) كتفي ديأذيني غوحي ( روحي)
غاحت( راحت) من الالم
قاسم
.. هاي شنو اشو هاي كاعدة تنعوص
زمخ بيها بغضب.. اكول عدلي حلكج واحجي عدل
لا اجي اعدلج السانج
يمة كمزت من مكاني وباوعت عليه
.. تغة ( ترة) هو الدكتوغ سألني عن مكان الالم
ام قاسم كاتمة ضحكتها على منظر هدى فاتحة عيونها على وسعهم
تباوع عليه بخوف سحبت قاسم على صفحة وحجت وياه بصوت ناصي
.. يمة على كيفك وية البنية ترة هو هيج السانها
من تحجي الراء متلفظها
هالة.. شبيك قاسم نسيت من جنت تنصب عليها
وتطلب منها تحجيلك كلمات كلها بالراء
.. اي ادري بس هي هسة كبرت معقولة بعدها اتغوغي
جان يحجي ويباوع عليها بفضول على تعجب
مشال عينه منها طالما الدكتور يفحص هو واكف فوك راسهم
الدكتور.. شوفي انا راح اضغط على المكان وانتي كليلي وين نقطة الالم
لزم الدكتور ذراعي وكعد يحرك بيها بصورة دائرية
حتى يتأكد ماكو كسر او خلع
هو حركها واني عطت بألم
.. دكتوغ على كيفك دتأذيني
.. وين الالم
.. هنا
اشرت عالمكان وعيوني على قاسم جان كلش مدخن
اريد اعرف هسة اني شنو سويت وهو معصب
قاسم بقلة صبر .. اكلج حجية رحمة على والديج سكتيها لا اجرم بيها
خلي شيماء اختها تحجي وية الدكتور
هاي لازم يخيطون حلكها ويحرمون عليها النطق
ام قاسم.. يايمة نصي صوتك لاتسمعك البنية والله تتخبل
هي منا كوة جايبها للطريق ونوب انت تطلع عضلات
حنجرتك علينا كل شوية زامخ بيها
راح الدكتور وكعد يم المكتب وكتب ورقة
وانطاها لقاسم.. لازم تسوي اشعة لكتفها
حتى نتأكد اذا كان عندها كسر او فطر
اخذها من عنده وباوع لهدى
.. بيج حيل تكومين لو اجيبلج كرسي متحرك
جنت لازمة كتفي متوجعة
بس سمعت صوته طفرت من مكاني مثل الجندي المقاتل
من يوكف كدام القائد وياخذ تحية
.. لا ما يحتاج اكدغ ( اكدر) امشي على غجلية ( رجلية)
.. استغفر الله ربي الهمني الصبر
اجتي هالة تسندني وشيماء بقت يم ام قاسم بغرفة الطواريء
لان ايدها مجروحة ومتكدر تساعدني
هالة.. هدى نصحة لوجه الله تعالى بعد لا تفتحين حلكج
وتكعدين تغوغين لان اخوي يتخبل
من وحده تتنعوص بالحجي
وانتي الله يحفظج من تغوغين تجيبين التايه
هدى بصوت ناصي.. عفية غجعوني ( رجعوني )
يم شيماء ما اغيد اسوي اشعة
هالة ناصبة عليها
.. لج عوبة سكتي لا يسمعج قاسم
و يغجعج ( يرجعج ) سحل لاختج شيماء
باوع علينا وخزرنا
كبل حطيت ايدي على حلكي وصرت عالصامت
واليحجي وياي اجاوبه بالاشارة
اخذنا صور اشعة لكتفي
وكعدنا ننتظرها تطلع
وهالة العوبة تضحك علية واني ربي حطني تحت رحمتها هي واخوها
كرصتها من حركت كلبي
وهي تضحك وتحك بمكان الكرصة
.. اااخ وجعتيني الا اكول لقاسم عليج
وبسرعة لزمتها من ايدها وكعدتها يمي
.. دنجبي وكعدي تغة (ترة)والله امسح بيج الكاع
بس اصبغيلي ( اصبريلي) خلي يطلع اخوج
وانا اشوف شغلي وياج عوبة ناصبة علية بسيطة انا الج
.. ههههههه اخ يمة بطني والله شكلج واتني
خايفة يخرب ضحك وين هدى ام اللسان
قاسم بخزرة لهالة
.. بس كافي صوتج نصي شكد تحجين
بالعة مسجل
ما اعرف اضحك عليها لان انقصفت مدري ابجي على حظي
اباوع على شكله جانت اكتافه كلش عريضه ومفتولة
بحيث القيص يريد يطك من وراهن
واجة ببالي مثل (وين رايح ياصعلوك بين الملوك)
ابن اللذين والله عليه طول الا بشدة
حركت ايدي بدون ما انتبه انوجعت
.. اخ يمة
اتلمست منطقة الالم
استغفر الله هسة اني بيا حال
وكاعدة اباوع عليه وادرس شكله
عبالك عندي بي امتحان
جان كل شوية يباوع علية عبالك ديشوف كائن فضائي
بس فاجئنا اني وهالة من كال
.. اكول جنية انتي شوكت كبرتي
فتحت حلكي مصدومة من كلامه
وصرنا اني وهالة وحدة تباوع للثانية
هالة.. هههههه والله يا قاسم بعدك تتذكر من جنت تصيحها جنية
عبست الوجه هسة هو ما اتذكر الا هاي التسمية مالت الجنية
ولو هو اي شي راح يتذكره من الماضي
اني اعتبره نقطة سودة ضدي اشو المواقف وياه كلها غبرة
طلعت الاشعة واخذناها ورجعنا عالطواريء
وشافها الدكتور وكال لا زين ما بيها شي
عندج بس شوية تمزق عضلي
راح انطيج مرهم وابرة تسكن الالم
كمزت من مكاني .. لا عفية دكتوغ ما اغيد
كل شي ولا ابغة (لاعفيه دكتور مااريد كل شي ولا ابرة)
قاسم بصوت ناصي
.. احتركت عشيرتج فضحتينا
التفت لهالة
.. هالة اخذيها منا لا اسحلها
اشو كامت تغوغي علينا هسة الدكتور شراح يفتهم منها
باوع للدكتور.. ما عليك بيها دكتور
اكتب الوصفة واني اخذ العلاج من الصيدلية
هالة الفطيرة كعدت ترجم لقاسم
.. شبيك قاسم قصدها تكول هي تخاف من الابرة ما تريدها
قاسم.. يالله هاك استلم اجتني العلة الثانية كعدت ترجم
اكول تمشون من كدامي اثنينكم لا والله اطك راس براس
رحت كعدت يم شيماء اتمنى اختل وراها
هذا بس يزمخ بينا اخذنا حاصل فاصل
طلعنا من المستشفى
وبعدها وكف بالطريق يم صيدلية اخذ العلاج
لان هاي النوعية مال الدوة ما متوفرة بصيدلية
المستشفى
دك نقاله ورد عالمتصل
.. هلا رائد شلونك
اي اليوم راح اتأخر عليكم
بعد انت تعرف هاي السوالف مالت الخطوبة
لازم الا حلقات وذهب والله اليعلم بعد شنو يردون
.. يالله زين لا تلطش انتظرني ما راح اتأخر عليك
الولد موجودين
.. لعد تمام جايكم حضروا نفسكم اليوم الا اغسلكم غسل
سد النقال وكعد يحجي وية امه واني
كلبي وعقلي وفكري راح لغير وادي
من سمعت بأسم رائد.
احس بروحي اختنكت خذلان الحبيب جرحهم
صحيح يطيب بس ما ينسي
وصلنا للبيت وشيماء ساعدتني انزل من السيارة
وهو جان واكف متأهب
وحجة وية شيماء قبل لا يصعد بالسيارة
.. شيماء اذا ابوج حاول يعيدها مرة ثانية ويضربها
لا تترددين بالاتصال علية
شيماء.. مشكور ما تقصر لا هو بابا بسرعة ينسى غضبه لا تخاف
دخلنا للبيت ولكينا ضحى منتظرتنا يم الباب
.. ها شيماء بشري شلونها هدى
جانت تحجي وتباوع لهدى تتفحص بشكلها
.. لا زين طلعت بس رضوض وانطوها علاج
دخلنا للبيت ولكينا عمو امجد وسليمة. كاعدة يمه
سليمة.. صلوات على النبي رجعن الحبايب
ها وينه عنتر ابن شداد اشو ما اجة وياج
شيماء.. وصلنا واخذ اهله وراح
باوعت لأمجد.
.. ها عمو شلونك
.. والله يا عمو بعد شلوني من ورة ابوكم
من العصر طالع من البيت ادور عليه ماكو رحت لمكان شغله
طلع الاخ فاصلينه عن الدوام
صارله ٣ اشهر وعندج الحساب
انا كلت من يوم طلع هذا صاحبه المهتلف من السجن كلت راح تبدي رحمة الله
شيماء.. اكول عمو بابا اخذ مهر هدى كله وباجر ام قاسم راح تجي تاخذها تريد تشتريلها ذهب
بيهم
تكدر تسلفني المبلغ واني عندي سلفة بعد شهرين استلمها
بس ينطونياها اسددك
باوع علية وكال .. بالله خلي اجيك اموري واشوف اذا جوة ايدي هذاالمبلغ
كبل انطيكم اياه وان شاء الله ما اقصر وياكم
.. عفية عمو كون باجر الصبح تردلي الخبر ضروري
لان باجر يجون حتى يشترون حلقات
حتى اذا ماحصلت اروح اشوف رباب صاحبتي بلكي تكدر تساعدني
شال نقاله وكال.. لا عليمن ننتظر لباجر
هسة اجري اتصال على صاحبي واشوف عنده جوة ايده لو لا
كام من يمنا وطلع بالطارمة
يجري الاتصال
شوية ورحع وهو يبتسم
.. هذا هو عمو دبرتهم
باجر الصبح ان شاء الله يمج الفلوس
............
بيت ام قاسم
قبل الخطوبة بيوم
هالة
البيت خبصة وخواتي سرور وفاطمة الي بالمحافظات
اجوي همة وجهالهم وخالاتي وبناتهم اجوي
وترسوا البيت
وامي الكاع ما شايلتها من الفرحة
بالله عماتي وعمامي كان عندهم برود
همة شوكت فروحولنا حتى هسة يفرحون ويانة
قسم اليوم ما طلع للشغل بقى بالبيت
علمود يكمل احتياجات الخطوبة باجر الشيوخ وعمامنا
من بعيد يجون كلهم
واليوم امي كالت لقاسم باجر تجيب وياك سيد حتى يعقدلكم من جديد اريد كلشي يتم على حسب الاصول
كالت انا ذاك العقد ما مقتنعة بي مو قانوني
وقاسم باوع عليها بحيرة وجاوبها
.. يالله هسة هي بقت على هاي صار تدللين نجيب سيد
بعد حجية تأمرين على شي ثاني
جان يحجي ببرود وية امي مثل الي يريد يكمل واجبه
فقط
امي جاوبتها.. سلامتك يمة ما رايدة منك شي غير بس
افرح بيك
.. ان شاء الله
جنا نحجي وجان يندك الجرس
واجتي منى
.. ماما زوجة عمو محمد ورهف اجوي
ام قاسم .. روحي صيحي لخواتج
كامت امي وباوعت لقاسم
.. شنو انت راح تبقى هنا كاعد
حسيت على نبع تريد تصرف قاسم ما تريده
يشوف رهف
بس وين هيهات تكدر لقاسم
عو مجرد ذكر اسم رهف العيون كامت تلمع
قاطع كلامهم دخول بيت عمو محمد
اباوع لقاسم كام من مكانه بلهفة
وعيونه منصبة على رهف
الي جانت عيونها حمر ذبلانة
دخلوا خواتي وجهالهم
وصارت هوسة
ورهف كعدت على صفحة
وقاسم راح كعد يمها
اباوع عليه شلون يباوع عليها عبالك لوحدهم
ناسين وجودنا امي وخواتي وامها
سلمت عليه وعيونها تنطق بالعتب والزعل
قاسم.. شخبارج رهف ليش عيونج ذبلانة
رهف.. تسألني عن اخباري واني اخباري كلها
عندك
هذا كله صار كدام امي الي كامت تحوم تحجي وية
ام رهف وعيونها على قاسم ورهف
اباوع عليها كل شوية تودي واحد من الجهال على قاسم
ورهف حتى يخرب عليهم اللحظة
امي تريد تنفجر من تصرفات رهف
اندك الجرس امي كبل حجت مثل الي جانت منتظرة هاي اللحظة حتى تطلع قاسم
.. يمة قاسم هذا يمكن ابو السقوف الثانوية الي جنت متفقة يجي للبيت بالله شوفه هو
كام قاسم من مكانه
.. هاي شنو شوكت اشو اني ما عندي علم بي
.. شفتك ملتهي بالشغل كلت اغير السقوف
لان ما بقى على عرسك شي
واريد اسوي غرفتك اغير ديكورها كله
كلت فد مرة اجيب هدى حتى تختار الديكور الي يعجبها
اباوع لقاسم رص على اسنانه بغيض وباوع لرهف الي دنكت ودارت وجهه بعيد عن نظر قاسم
اباوع عليه كور ايده وطلع من الاستقبال مثل الاعصار
اباوع لرهف كامت من مكانها
وطلعت ورة قاسم
يمة هي امي شافتها طلعت وراه
وهي كامت تكمز هههههههه يمكن صعد عندها السكر
من ورة رهف
كمزت من مكاني على كرصة امي
حجت بصوت ناصي
.. ولج عوبة كومي لحكي على اخوج
يتبع