#اساور_الفضة_ج٢
#نهى_الحسون
#البارت_الثاني
هدى
اباوع للمرية الواكفة كدامي شكلها غريب
ظليت فاتحة حلكي هاي شلابسة وشمسوية بروحها
اجتي سليمة تحجي من وراي تسألني منو بالباب
شافت المرية وكالت
.. هاي منو
رجعت اتفحص شكلها مبين عليها عمرها ميقبل غلط ببداية الاربعين اذا مو بنهاية الثلاثين
جانت صابغة شعرها اصفر
كركمي عبالك قحط الوان وحاطة كمية مكياج كلش ثقيل كحل اسود وحمرة حمرة طوخ بيها كيلو حاطة وداكة حواجبها تاتو اسود حبري وصاير بمرور الزمن اسود مزرق
وعندها شامة يم الشفة الفوك
وجانت حاطة العباية على كتفها ما اعرف شنو دور العباية بالموضوع اذا الشعر طالع والستر معدوم
وجوة العباية لابسة الجينز المطاط والزرور كبار
عبالك دتسوي دعاية لافخاذ دجاج سادية
والبدي الضيق الي مبين
كل الزوائد اللحمية الزايدة اخاف محد ينتبه عليها راح تلفت انتباهه بنشازها
هي وكرشها ادري ما شافت روحها بالمراية قبل لا تطلع
وصابغة الاظافر احمر والذهب اللابسته يكول جامخانة صايغ متنقلة
يعني كسر بجمع شكلها مشبوه مو راحة
حجت وهي تعلج وتباوع علية كصتني من فوك ليجوة
عبالك دتعاين بضاعة
.. اكووووول ياحلوة اثير وين فوتي صيحيلياه كليله
مهرة تريدك
وبهاي الاثناء اجتي شيماء وضحى وكفوا يمنا يم الباب ونظرات الفضول تقرة عندهم الف شكو ومنو هاي متفاجئات
سليمة جاوبت المرية
.. وانتي منو حبيبة حتى اصيحلج اثير
اباوع عليها تعلج وتطك بالعلج
.. انتي كليله مهرة وهو راح يعرفني
جانت تحجي وعيونها تبصبص
علية وعلى شيماء وضحى
جاوبتها .. بابا طالع ما موجود
اني كلت بابا وهي باوعت علية
بشهكة
.. لاتكولين انتي بنت اثير المكموع
اباوع لشيماء سحبتني وخلتني وراها بحركة حماية وحجت
.. العفو منو حضرتج انتي لحد هسة مكلتي منو
اشو هاي دفعت شيماء وبيبي من طريقها ودخلت للبيت
وكامت تصيح
.. ولك اثير اطلع ليش لابد ورة النسوان عبالك ما اعرف انت بالبيت
والله اليوم الا اسوي بيك سواية اخلي الناس كلها
تحجي بيها انت تعرفني زين اني مهرة محد يندك بية
دخلنا وراها وهي تفتح بالبيبان مالت الغرف عبالك عندها لعبة الغميضة وكاعدة تدور
شيماء بغضب
.. شنو انتي ما تسمعين كلنالج بابا ماموجود
ليش تلحين وانتي على يا اساس تفوتين للبيت هيج بكل
صلافة
باوعت لشيماء بتركيز وكعدت تتفحصها وكأنما ستوها انتبهت عليها اتخصرت
ورفعت حاجبها وكالت
.. عشتو والله طلع اثير مو هين نايم على ذهب
منو يصدك اثير التعبان المهتلف عنده هيج بنات
اشو هاي كعدي على الكرويتة الخشبية الي بالمطبخ
وحطي رجل على رجل باوعت لضحى وكالت
.. لا تكولين انتي هماتين بنت المكموع اثير
ضحى هزت راسها بموافقة
.. اكول رحمة على موتاج متجيبيلي كلاص مي حسي اشحط من ورة ابوكم المهتلف
اباوع لشيماء واكفة فوك راس المرية الي اسمها
مهرة بس شكلها بغلة
كتفت ايدها كدام صدرها
وضحى الفطيرة راح تطلع من الثلاجة ماي
وقدمتلها
اخذته منها وشربت الماي وطلعت جيكارة وكعدت تدخن وتباوع على جيكارتها ما عبالك احنا واكفين يمها
لا هي كلها بكفة وشكل سليمة الفاتحة حلكها على المرية مصفصفة
جنها بزون انباك عشاها
رجعت شيماء كررت سؤالها وهالمرة بأصرار
.. راح تكولين انتي منو لو شنو ناوية تطولين بكعدتج ويانة
كلنالج بابا ما موجود اتفضلي حضرتج طلعي برة
احسن ما الم الناس عليج اخليهم يطلعونج منا جلاليق
ضحكت بصوت عالي مستفز
همستلها لضحى بصوت ناصي
.. ما هذه الضحيكة
جاوبتني ضحى كاتمة ضحكتها
.. اشششش سكتي خلينا نفتهم هاي منو
حجت مهرة
.. شوفي حبيبتي ما راح تهزين شعرة مني
وتهديدج التافه خلي الج اني مهرة ما اتهدد
شمرت جيكارتها بالكاع وسحكتها بحذائها
.. اني ما اجيت هنا علمود اعرفكم على نفسي
خلي ابوكم المهتلف هو يكللكم مهرة منو
اني اجيت علمود اطالب بالديون
الي اخذهم ابوج والي صارله كومة يتهرب من عدنا ميقبل يوفيهم
عباله السالفة سهلة كلك اضحك عليها اخذ منها الفلوس
ميدري اني مهرة محد يكدر يندك بية
وكلما يتأخر بتسديد الدين احمل عليه فوائد اكثر ويزيد المبلغ
سليمة لطمت على صدرها
.. عزة العزاج يا سليمة هذا الي جنت خايفة منه
اثير ياخذ فلوس بالفايز
.. اكول اليوم الله حابكم اجيت اني لوحدي اطالب بالفلوس
كولي لابنج المرة الجاية ما راح اجي لوحدي
اجي واجيب الجماعة وياي وهو يعرف كلش زين
شنو راح يصير اذا اتدخلو الجماعة بالسالفة
باوعت علية اني وخواتي وحجت بتهديد مبطن
.. وماشاء الله ابنج عنده بنات حلوات
والجماعة ما راح يترددون لحظة وحدة
يرجعون الدين عن طريق الحلوات مالاته
وكف شعر راسي من ورة تهديدها دارت وجهها وطلعت
من البيت وكأنما بيت الخلفها
ظلينا مصفصفات
سليمة.. يمة صخام هاي وين جانتلي هاي مبينة وحدة
مو زينه شغلتها الله اليعلم وين لكاها اثير
دارت وجهة على شيماء
.. بالله شو اتصلينا على ابوج خلي يجي يشوفلنا حل للمصيبة
ضربت على رجليها وكعدت تندب حظها
.. من يوم اليفيتوا على بيتي وانا المشاكل هدت على راسي فرد هدة
من ورة اثير وبناته اريد يوم يعدي علية وماكو مشاكل ماكو مصيبة مجبتوها لبيتي
جاوبتها شيماء
.. بيبي البارحة مو اتصل علية وكال انا راح اتأخر وما ارجع للبيت فد يومين
.. اي اتصلي عليه خلي يفهمنا شنو نسوي بهاي الطركاعة الي لفت علينا
ما سمعتيها شلون كعدت تهدد
بعدما اتصلت شيماء على بابا وجاوبها ظل يحجي عليها
شلون يدخلون مهرة للبيت وعصب وظل يغلط وكال
انا ما راح اتأخر ارجع واشوف شغلي وياها
بعد لا تدخلوها للبيت
اطيح حظج اذا سمعت بيها
داخلة للبيت
............
هالة
بعدما رجعنا من بيت ابو شيماء امي اتصلت على كل خواتي وعزمتهم عالغدة وكلتلهم تعالوا بس انتوا
وجهالكم ولا تجيبون رياجيلكم رايدتكم بموضوع
.. اكول يمة ليش عزمتي خواتي كلهم شراح تسوين
باوعت علية وبالها مشغول
جانت تتحرك بالمطبخ مطلعة الدجاج وخابرت عالسايق
عمو حسنين المصري هذا رجال جبير بالعمر من زمن بابا
بقى هو وعائلته يمنا مرجع لمصر
ومن بعد بابا قاسم قرر يخليه يستمر بشغله
وخلاه سايق يمنا للبيت يكمل شغلاتنا
لان قاسم دائما مشغول ومفارغ ياخذنا ويطلعنا ويكمل
احتياجاتنا وعمو حسنين خوش رجال يأمن علينا وياه
انتبهت على امي دتحجي بالنقال وية حسنين
.. حسنين مو تنسى وياك جيب اربعة سمج مسكوف
وركي ولبن وخبز حار
سدت النقال ورجعت كررت السؤال
.. شنو يمة احجي وياج بالج وين مشغول
.. شكو شبيج تحومين فوك راسي مثل الذبانة الشتا
.. سألتج ليش عزمتي خواتي
.. شنو شبيج قابل اول مرة اعزم خواتج عالغدة
.. لا مو اول مرة بس انتي متعودة
كل مرة تتفقين وياهم قبل يوم عالجية
بس هسة اشو فجاءة قررتي يجن عالغدة
واتصلتي عليهم
خصم الحجي كولي يا نبع الحنان على شنو ناوية
..اوف منج يا لزكة
يالله ارتاحي
انا عزمت خواتج حتى يكونون موجودات
لان راح احجي وية قاسم بسالفة الخطوبة
على يوم الجمعة وردت خواتج هنا حتى يساعدني يقنعون اخوج
لان ما احزر ردت فعله اذا عرف بالي قررته والي سويته من وراه
.. هههههه انا من هسة راح احظر واقي الرصاص
واخذ احتياطاتي لان الواحد ميعرف شوكت تدك اجراس الانذار تنذر بقدوم العاصفة
وعالاكيد قاسم ابنج مراح يسكت
.. ميحتاج توصفيلي شنو راح تكون ردت فعله اعرف
..هسة سدي الموضوع وتعالي وياي ساعديني بالمطبخ
التهيت وية امي ايد للمطبخ وايد انظف البيت
امي بيها طبيعة تحب كلشي تسوي بيدها
الطبخ التنظيف وحيل حريصة عالنظافة
علمتنا كلنا اني وخواتي وقاسم نتخبل من اكل المطاعم وما نستنظف الاكل الجاهز
بحيث قاسم اذا سافر للخارج يكول اكضيها كلة لفات جبن وفواكه وبسكت وعصير
يكول ما اعرف شنو لحمهم ما استنظف
عالساعة بالوحدة بدوا خواتي وجهالهم يجون للبيت
اجتي منى وكوثر وجهالهم
وامي اتصلت على قاسم كلتله تعال اليوم عالغدة خواتك هنا متجمعات وهو وعدها يحاول يرجع من وكت
جانت تحجي وياه وسمعت امي شلون كامت تصلي وتهلي وتبارك
شوية وسدت النقال من قاسم وجرت نفس مرتاحة
..ها يمة شنو شبي قاسم
..شكل هدى وجها خير على اخوج
.. شنو قاسم ربح باليانصيب
.. لج لا ثولة ربح المناقصة وصارت من نصيبه هو وصاحبه
.. يا صلوات على النبي قسومي اخوي يستاهل لان هلك روحه بالتعب واشتغل وهواي علما صارتله
.. اندعي كون اخوج يبقى هيج مزاجه صافي وباله مرتاح حتى من افتح الموضوع وياه ميعصب
.. امين يارب تنولين التردينه يا يمة
منى.. شكو شصاير اشو كاعدات لوحدكم تبسبسون شاركونا الحديث
هديل دخلت وراها.. لا تعبين نفسج وتسألين محد راح يجاوبج الله وكيلج صارلي يومين اسألهم شكو شصاير
بالبيت محد يلتفتلي ويبرد فضولي
امي ابتسمت
.. بعدين راح تعرفون شنو الصاير
ورة فترة جنا نحضر بالاكل لان قاسم اتصل وكال جاي بالطريق
ودخل للمطبخ ابن كوثر يركض ويصيح
وراه كوثر تركض بهرولة ولازمة النعال تريد تضربه
اجة وصار ورة امي ولزمها من طرف ثوبها يستنجد بيها حتى تحمي
زين.. بيبي عفية ختليني امي تريد تبسطني
جانت عيونه تلمع بوكاحة
لزمته امي وحطته وراها وباوعت لكوثر تحذرها
.. لج كوثر عوفي الولد شبيج كل شوية وهادة عليه
راح تخبليه
كوثر تأشر بأيدها تتوعدله بحركة ( اصبرلي انا الك بسيطة )
.. يمة انطينياه خلي اربي هذا طالعة عينه ولسانه صاير طويل
كل شوية الكاه ضارب واحد من الجهال متعارك وياهم ولا فوكاها
داير على خواته مثل الديج ايدة والضربة وياهم
و الموديل الجديد يطلع بالشارع يتعارك وية جهال المنطقة
ضحكت ام قاسم وحضنت زين
.. لج عوفي بداعتي عليج خلي شتردين منه رجال
حمش طالع على خاله قاسم تدرين كلما اشوفه اتذكر قاسم اخوج بصغره
جان مبجي جهال المنطقة وكلها تصيح منه الغوث
هالة .. لج كوثر لا تعبين نفسج غسلي ايدج من هذا الولد
لان ابو المثل يكول ثلثين الولد عالخال
وانتي خطية صرتي اول ضحية للجينات الوراثية
كوثر صاحت.. يبووووووي شدوا روسكم يا كرعان
جانت عايزة والتمت هي بقت بس يطلع على خاله
والله يشيلونة من المنطقة
لان قاسم ابوي جان وراه يركض
ويحل المشاكل بس
زين ابوه مطفي وكافي خيره شره ماله بالمشاكل
دكتور يمشي بصف الحايط يتكفى الشر
منى.. عمي شفايتلي لو واحد من ولدي يطلع على خاله
قسام نجر وسبع مو احسن ما يطلع
فاهي ماكول حقه وكل خير ما بي
جنا نحجي وجان يدخل ابن الحلال بذكره
دخل قاسم وسلم علينا وراحوا خواتي حضنوه
وباسهم من راسهم وهدوا الجهال
يرحبون بخالهم وهو هم مامقصر شكله مسوي حسابهم
وجاي وجايب وياه علاليك حلويات وجبس الهم
واني من شفت الحلويات والجبس نسيت روحي ورحت اركض وية الجهال
وصرت اتعارك وياهم حتى اخذ حصة من العلاليك
وامي تحجي وتصيح علية واني ناطيتهم الاذن الطرشة
.. لج هالة الغبرة بعد شكبرج تصيرين وجاية تتعاركين عالحلوايات
اخذت العلايك مالت الحلويات والجبس من ايد الجهال
.. لايمة لا تفهميني غلط ترة اني اخذت الحلويات منهم
لان وراهم غدة خاف يشبعون روحهم بالحلويات وما يتغدون
هديل.. يمة راح ابجي طين على الخالة الحنونه
.. اني اصل الحنان فديتني
.. شوف هاي صدكت روحها
خاب انتي اصل اللطلطة تعلميني بيج
عاطت بينا امي
.. كولكم تسكتون وتجون وياي نصب الغدة لا اطك راس براس انتي وياها
بسرعة ركضنا وراها لان اذا تكلم الحاكم
انصاع الشعب ينفذ الاوامر بطاعة
امي الحاكم القاسي العادل
رحنا صبينا غدة وكعدنا نتغدة واولاد كوثر كعدوا بصف خالهم قاسم
جنا ناكل ونسولف كلنا بنفس الوقت
ونضحك ونجاوب وكأنما عدنا سباق منو بينا اكثر وحدة تحجي
بس قاسم وامي جانوا ياكلون بهدوء
اباوع عليه يفلس السمج ويطلع العظم ويحطه كدام اولاد كوثر زين وزيد
قاسم يكره المسؤلية ودائما يتهرب من حملها
خصوصا من توصل السالفة لزواجه
يكول ما بية حيل حمل عائلة ومسؤلية اتخبل منها
تعال حطلك مصدر لدوخة راس وجيب مرة وخلف اولاد وتعال ياقاسم اركض وراهم واتحمل مسؤليتهم
بس من اشوف تعامله السلس وية اولاد خواتي
اشوف شكد تلوكله الابوة والعائلة بس الظاهر هو هواي
ما عنده ثقة بنفسه
وفاهم الموضوع غلط
والله مرات احس بي متخذ من رهف حجة حتى يتهرب من الحاح امي
علمود الزواج وما تظل تضغط عليه
او يمكن هو اختار رهف لان هي تشبهه متحب المسؤلية مثله
ودائما تريد نفسها .. شافها اكثر امان من غيرها
اهووو هسة اني شنو كعدت اشتغل محلل نفسي
انتبهت على امي تحجي وياي
.. خيرج هالة انخرستي داحجي وياج متردين
.. ها ماما كولي شنو ردتي
.. صارلي ساعة اسألج حطيتي قوري الجاي عالنار
بين ما نتغدة يفور
جاوبتها منى.. اني حطيت القوري عالنار
لان ادري بيكم انتي وقاسم تحبون بس تكومون من الغدة تشربون جاي
بعدما خلصنا الغدة وغسلنا المواعين وكلبتهم على وجهم
عالمنشفة حتى يوشلون الماي
هديل حضرت صينية الجاي ورحنا كعدنا بالصالة يمهم
باوعت لوجه امي بدة ينطي اشارات
عرفت راح تفتح الموضوع وية قاسم
طلعت الجهال بالحديقة ودخلت كعدت يمهم
وصرت كلي اذان صاغية
انتبهت لخواتي التزموا الصمت وكأنما حسوا على توتر امي
اخذ قاسم استكان الجاي الثاني من بعدما صبتله امي
وكعد يخوط بي
لاحظ الهدوء الغريب ورفع راسه وكعد يباوع علينا وحدة وحدة
ضاكت عيونه مثل الذيب الي حس اكو مؤامرة ضده
عدل كعدته واتكة وبدة يشرب جايه
ويراقب متأهب لاي هجمة مرتدة
انتبهت لامي كعدت تحمحم
وحجت وهي تخوط بستكان الجاي مالتها
.. اكووووووووول يمة قسام
.. ياستار استر صارت بيها قسام
ها يمة كولي واحجي شنو العندج
.. شكولك يايمة تعرفني وحافظني
.. كم غالية عندي حتى ما اعرفلها
.. الله يخليك الي يايمة لعد ما دامني انا غاليتك وعزيزة على كلبك
خلي اكلك انا قررت بهاي الجمعة نسوي مشية زلم
اريدك تبلغ عمامك واقاربنا نروح نخطب بنت ابو شيماء
ونسوي المهر واني اليوم رحت انطيتهم جزء من المهر واتفقت وياهم
اباوع لقاسم امي جانت تحجي ووية كل حرف تنطق بي امي
قاسم ينكلب لون وجهه بالتدريج لحد ما وصل للون الاحمر القاتم
شمر الجاي بالكاع وانكسر الاستكان ونهض من مكانه
هديل كمزت من مكانها وعاطت
لان الاستكان وكع يم رجلها والجاي حار محد اهتملها
لان كلنا العيون مبحلقة بترقب على قاسم.
صاح بغضب بصوت عالي رج البيت
.. منو انطاج الحق تتصرفين من يمج
شلون تخطين هيج خطوة جبيرة بدون ما تاخذين رئي
شنو انا طرطور كاعد بالبيت لو ما مالي عينج
اريد افتهم ليش كل مرة تحطيني بموقف صعب
وتحصريني بزاوية
امي كامت من مكانها واتبعناها اني وخواتي وكفنا
امي راحت وكفت كدامه
.. اسمعني زين قاسم لو يصير عمرك ٦٠ سنة
ويصير عندك احفاد هم راح تبقى بعين امك ابنها الصغير
الي تحاول تحمي وتدافع عنه
هاي سنة الحياة وفطرة البشر
غصب عني كلبي ما ينطيني اشوفك تدمر حياتك واكعد اتفرج
.. بالله فهميني شلون عالجتيها لحياتي المتدمرة
شنو ربط سالفة الخطوبة وقرارج بهذا كله
.. يمة قاسم انت من اول يوم اختاريت بي بنت عمك رهف
وانت ثبتتلي انت متعرف تختار وراح تحطم حياتك
.. ولا تكولين بنت اثير خريج السجون راح تكون احسن من رهف
وهي الي راح تبني حياتي وتلزم بيتي وتسند ظهري
جان صوته يرعد وهو يحجي كمل كلامه
.. شوفي يمة كطنة وشيلها من اذنج ما اتزوج بنت اثير
لو تنطبك السما عالارض وهسة تتصلين عليهم
وترحين ترجعين الفلوس الي انطيتها الهم
باوعت لامي رصت اسنانها بغضب ورفعت راسها تباوع لقاسم الي واكف كدامها وحجت وياه بكل قسوة
.. شوف قاسم اذا ما توافق على هذا الزواج
يحرم علية الاكل والشرب وبعد لا اشوفك ولا تشوفني
انسى عندك ام من هاي اللحظة
منا لحد ما الله ياخذ امانته وارتاح من اللوعة
دارت وجها ومشت لغرفتها وهي ترجف من العصبية
دخلت للغرفة وسدت الباب بكل قوته وسمعنا صوت قفل المفتاح
وهنا عرفنا امي اعلنت الحرب ضد قاسم
ياربي شلون اثنين امي وقاسم واحد اعند من الثاني
شلون راح تنحل
كمزت من مكاني مفزوعة على صوت تكسير الجام
باوعت شفت قاسم ايده متروسة دم والطبلة الي كدامه مكسرة وصايرة وصل
ركضت منى وبيدها المنشفة ولفت بيها ايد قاسم
وكوثر كعدت تلم بالكزاز
وهديل كعدت تدردم بصوت ناصي
اسمعها تكول
.. الله ياخذ هدى واهلها من ساعة السودة الي عرفناها بيها
منى تحاول تسيطر عالدم وتحجي وية قاسم
.. شبيك قاسم اتخبلت اكو واحد يسوي سوايتك
.. اي والله تخبلت من ورة سوالف امج
مو بس اتخبل زين مني باقي براسي عقل
احلفج بالله اكو ام تسوي هيج بأبنها بشنو جانت تفكر من
طلبت مني احط ايدي بأيد اثير واتزوج بنته
شلون عقلتها وهي تدري بية انا شنو رأيي بالموضوع
منى.. ادري بيك انت شايل هم رهف وحبك
قاسم.. لا تخليني اسب ابو رهف
بابا انتي شبيج ما عندج عقل
بعيداً عن رهف حتى لو جنت ما احب مستحيل اختار اتزوج هيج وحدة
منو هي ومنو ابوها شلون تعقلونها
ارضى على نفسي اناسب رجال مهتلف مثل اثير
يعني اذا رب العائلة هيج شنو اترجى من بناته
ولاتكولين اخلاقهن وتربية
بابا انتوا كلشي متعرفون عن الناس ومعادنهم يراونك ذهب ويبيعونك تراب كلشي اتوقعي من هالبشر بهذا الوكت وانا شنو يضمنلي ان هي مو مثل ابوها شلون راح اتطمن اامنها على بيتي ومالي وحلالي وعرضي
والله ياعالم صعبة امج تطلب مني اشمر روحي بالنار وتكلي مصلحتك
منى.. اتهدى ياخوية مو هيج الحجي على كيفك
انت ليش تحاسب البنية على اعمال ابوها واخطاءه
ترة هي مالها ذنب خطية
نفض ايده من بين ايدين منى والدم بعده يجري
.. اني صارلي ساعة شنو جنت احجي
يعني معقولة انتوا لهاي الدرجة عميان ومتشوفون الي انا اشوفه
هو مو صوجكم صوجي انا الموخوش ادمي كاعد احجي وياكم
خلة وطلع وكوثر طلعت وراه تتوسل بي يرجع
.. عفية قاسم لاتعوف امي وتطلع
ترة انت تعرفها كلش زين من تحلف ما تتنازل عن قسمها لو على موتها
.. ما عليج هسة لليل راح تهدء وتراجع نفسها وراح تعرف بنفسها غلطانة
وغلطت بحقي وتتخلى عن حلفانها
عفية ما اوصيج انتبهي عليها وكليلها اتراجعي عن حلفانج
وقاسم يدفع الكفارة مالتج
خلة وطلع وبعد ما رجع
هدى
يوم ثاني بالكلية اتصلت على فاطمة وطلبت منها تمر علية بالكلية محتاجة احجيلها عن الي صار وياي
خلص الدوام والتقيت بيها وجنت كلش مختنكة
فاطمة .. حييييييييل هذا كله صار وانا ما عندي علم
.. لج ثولة اذا هو اني ام الموضوع مصاغلي (مصارلي) هواي من عغفت (عرفت)
تردين انتي تعرفين
.. وهسة وتالي شراح تسوين
.. ما اعغف (مااعرلف) كلبي خامد ميقبل ينطيني حل شكله مستسلم
وعقلي يكلي هو ماكو واحد اسوء من ابوج فعادي اتقبلي
الوضع واخذي الاموإ (الامور) على بساطتها
.. زين معقولة هيج بكل سهولة يترك حبه لرهف
بعد كل الي سمعناه اكلج مستحيل يتنازل هيج بكل سهولة
لان انتي مشفتي الي انا شفته من جانوا سوية يم الدرج بيوم فاتحة ابو قاسم
مشفتي نظرات عيونهم شلون جانت مفضوحة بالحب
بس اتوقع هالة جذبت من كالت قاسم موافق
هدى.. هو انا هذا واحد من الاسباب الي مخبلني
ومخليني ما اتقبل فكغة (فكرة) زواجي من قاسم
على يا ضيم اتزوجه والله يغاويني (يراويني) النجوم بعز الظهغ (الظهر)
وكولي كالت هدى
جنت احجي احس جسمي ارتعد بس مجرد اتخيلت الوضع شلون راح يكون بيني وبينه
.........................
شيماء
بالمستشفى بعدما انتقلت بقسم النسائية والولادات
ارتاحيت من مضايقات المرضى
صحيح هذا القسم لايخلو من المشاكل بس شي اهون من شي
جنت امشي اني ورباب سوية لان اني انتقلت على نفس قسم رباب
وانتبهت على نفس الرجال هذا الشهر ثالث مرة اشوفه
حجيت بصوت ناصي وية رباب واني اباوع عليه ..
.. معقولة هاي صدفة هذا الرجال شنو عنده هنا
رباب باوعت على نفس المكان الي اباوع عليه
.. يا هذا مو نفسه الرجال الي اندعمتي بي بذاك اليوم
.. اي هو نفسه وعلى مرتين الكفه
يباوع علية من بعيد بس الحلو بالموضوع ابد ما اقترب مني او اتواكح وياي
.. اي هو مبين علية من شكله هيبة وشخصية مو مال واحد يقدم على هيج حركة تنزل من قدره ويتودد ويزحف عالممرضات
.. اي صحيح كلامج اصلا مبين شوية عنده انفة او تكبر
بس تعاي اكلج هذا شنو دكتور
.. لا لا ما اتوقع شكله ممبين عليه دكتور
متشوفي اسمر مملوح وخشن يعني اي نعومة او لمحة للدكتور ماكو
كولي ملاكم لو مصارع اكولج صح
فلتت مني ضحكة بس بصوت ناصي واحطيت ايدي على حلكي
.. الله يلعنج رباب فصخنا الرجال تفصيخ خطية
رفعت راسي واجتي عيني بعينه يمة
كلبي فوت نبضة من نبضاته
ما اعرف شنو بي هذا الرجال الي خلاني اتعثر بمشيتي
ودست على رجل رباب خرب عزة بعينه مو عيون
دنكت وتخربطت كلي عود هاي اني الجبيرة
رجعت اتمالكت نفسي ورفعت راسي وما وجهتله اي نظرة
وكملت طريقي ورباب تمشي وتغلط وترزل بية
.. الله يلعنج حشة مو رجل شنو كسرتي مشط القدم مالتي
ادري شلابسة حذاء لو مزرف زرفتي رجلي
.. دمشي والله ما اعرف شصاربية من باوع علية انخبصت
رباب.. هنا الحجي طلعت الاخت دايخة بغير وادي
ولا يهمج باجر اجيبلج اسمه واسم امه واجمع لج معلومات عنه بعد شنو تردين
.. عابتلج هسة الي يسمعج يكول موصيتها حتى تسال عليه
اكول بس صدك هاي المرية الجبيرة الي وياه منو
.. اكيد امه
.. لا ما اتوقع امه لان هاي المرية مبهذلة وشكلها تعبان يعني ابد ماكو اي ترابط بين اناقته وشكله وبين شكل المرية التعبان وملابسها البسيطة
.. والله ما اعرف شنو اذا تردين اسألها
.. اهو انتي شلون بيج كل حجاية والثانية
تكولين اسأل هسة الي يسمعج يكول كاتلة روحي عليه
هو مجرد فضول ومن وراج طيرتي ابو الفضول يالله امشي كدامي ورانا كومة شغل
.. اي نسيت اكلج البارحة شفت ليان عند الدكتورة
وبس شافتني كامت تخزر بية شكلها بعدها ما ناسية
.. خليها تولي هاي حشرة مزعجة بس غير ضارة
لان ما تكدر تسوي شي غير بس تزن عالاذن
........
هدى
وصلني الخط براس الفرع نزلت
واجاني علاوي ختيبي الاجلح يركض حافي كالعادة
ووياه جماعته مشى بصفي وهو عاكد الحواجب وضايج
.. اكول هدى صدك هذا الخبر الي سمعته
.. كول شنو سمعت
.. عالاساس انتي راح تنخطبين يوم الجمعة
ابتسمت بداخلي شوف هذا الفصمة عايش الدور
بكل عقله يحجي
.. اي صحيح راح انخطب يوم الجمعة منو كلك
.. ما عليج منو كلي انا عرفت من وحدي
جان لازم بيده عصا سودة شكلها صوندة مجاري قوية وداخلها خشبة
ماعرف منين يجيب هاي الخزعبلات
جان يمشي مثل الشقاوة
وكعد يحجي بغضب ويهدد
.. شوفي هدى سمعيني زين مو تكولين علاوي ماكال
خرب والله راح افطس من الضحك يحجي وسنونه مكشرهن جنه ارنب
.. لا تضحكين ترة انا جاي احجي صدك
خاف ذاك شمرت عليه حصوة وشرد
وداعتج هذا الثاني افلش سيارته وكولي علاوي كال
وصلت يم بيتنا وجان علاوي ضايج وكعدت اواسي بي
.. ولك علاوي انت الروح والرية بس انت وبس والباقي خس
بيمن تريد احلفلك ابوي غصبني على هذا الزواج
.. ما عليج انا اطيره الج خلي علية
ضحكت والله اتمنيت تفكيري حر مثل تفكير علاوي
جان هواي امور بحياتي اتغيرت وتصير سهل حملهن
اقتربت من يم بيتنا وشهكت
وعلاوي باوع علية يتسائل
هاي سيارة سيف الناقص شيسوي هنا جاي عدنا الله ياخذه
سألني علاوي
.. شنو شبيج
جاوبته وبالي مشدوه
.. ها هيج كلشي ماكو
جنت امشي واتقدمت اريد ادخل لبيتنا بس فجاءة
اتربع الشيطان براسي
باوعت على علاوي وجماعته
وحجيت بمسكنة
.. خرب لك علاوي الحكلي هاي سيارة خطيبي اوووووف
هذا شجابه هنا رفعت راسي للسماء ادعي
ياربي شوكت تخلصني منه
علاوي .. روحي فوتي للبيت ما عليج لا تضوجين
جان يحجي لازم العصا السودة بأيد ويضرب بيها بالايد
الثانية مثل مدير المدرسة من يريد يعاقب طالب
هيج جان شكله والنية واضحة من عيونه
.. الله يخليك الي يا حزام ظهري يا علاوي البطل
تركته ودخلت جوة للبيت لكيت
ضحى بالمطبخ تفرك ايدها بتوتر وشيماء واكفة
تصب الجاي وعمو امجد واكف يمها يريد ياخذه
اخذ الصينية وطلع
باوعت لضحى وحجيت
.. شنو سيف اجة هنا
جاوبتني بارتباك
.. اي رايح لعمو امجد يريده يتوسطله حتى يرجعني
للبيت واني ميتة خوف ما اريد ارجع
.. لا ترجعين ما مجبورة ظلي هنا احسنلج معززة ومكرمة
سليمة طفرت من يمها
.. شنو هو انتي بكيفج تبقيها هنا
هي هاي الناقصة بقت بس تتطلك وتكعد ببيتي
مو كافي الي جاي اشوفه منكم ومن ابوكم كل يوم مصيبة
خليها ترجع لبيت رجلها لا تشجعينها تكعد هنا
ترة الله وكيلكم كوة متحملتكم مو كاعدة تعزمين براسي
جانت سليمة تحجي وما نسمع الا صوت صياح
وضربة قوية واتبعها صوت تكسير
وبعدها اصوات صياح الجهال تتراكض بشارعنا
يقلدون صوت سيارة الشرطة
بلحنها
وي .. وي.. وي.. وي
باوعت من باب المطبخ وشفت سيف طكها ركضة وفتح باب الشارع
حبست الانفاس بلحظة صمت
بعدها اتبعها صوت انفجار الغضب الساطع
ما اسمع غير بس
صوت كفران سيف والسب والغلط وعمو امجد طلع
وراه يريد يعرف شكو شصاير
اسمع امجد يصيح عالجهال يسألهم هذا منو فلش جام السيارة
اني سمعت كال جام السيارة اتفلش وانا حسيت بماي بارد نزل على كلبي
اي مو هاي السيارة الي كسر اختي وشمرها علينا علمودها
خلي يفرفح ويجرب لوعة حركة كلبنا من ينضرب شي عزيز عنده
صفكت بكل فخر والتفتت
جان اشوف سليمة وشيماء وضحى واكفات وراي والعيون مسلطة بشك علية
والسؤال جان واضح بعيونهم
ابتسمت ابتسامة مال واحد صادوه
حجيت بدفاع
.. هههههههه اني مسويت شي لا تباوعون علية هيج جني مجرم
شيماء بشك.. هدى منو ورة تكسير الجام
.. واني شكو دتسألني قابل جديدة على احمد راضي
اشو جهال المنطقة كل يوم كاسرين كلوب لو شباك
هسة بقت على سيارة هذا الحقير
هو الفرع صغير وكوة تدخل السيارة شكو مدخلها
وصافها يم الباب بعد خلي يدخلها للهول مو احسن
عفتهم واني اهز بيدي
.. تهي بهي والله ناس عطلانة
بعدها سيف التهة بسيارته ونسى سالفة ضحى
واخذ السيارة وراح يصلحها عبالك مو سيارة مكسرة
الي يكول واحد من جهاله. مضروب عمة بعينه
بس همزين. عاف ضحى هنا وما اخذها
............
هالة
اباوع لخواتي كاعدات بالهوال وحدة تباوع للثانية
ولا وحدة بينا كدرت تقنع امي تاكل او تاخذ علاجها
منى.. يعني شنو راح تبقى على هذا الوضع معقولة امي
اتأذي نفسها علمود تمشي الي براسها
هالة.. لا منى امي زعلانة من قاسم لان البارحة علة صوته عليها
وعصب وضل يحجي وهي استهضمت تعرفين بيها
وضيفي فوكاها عنيدة وهي حلفت وبعد عندج الحساب
كوثر .. يعني امي من البارحة دخلت لغرفتها ومتقبل تطلع منها
شلون بالله احنا شنو ذنبنا تعيشنا بخوف عليها
هالة.. سكتي قاسم كل شوية يتصل علية يتطمن عليها ويسألني اكلت لو بعدها
ونوب هي عندها السكر
اخاف يصير عدها هبوط من ما تاكل
والله ياربي هاي وين جانت النة المصيبة
خلص اليوم وصارت الساعة با٩ بالليل
وقاسم اتصل علية وكلي لا تسوين عشا اني جاي وجايب العشا واشوف بالله شلون متاكل
دخل للبيت وجهه مدخن ادري بي نقطة ضعفه امي بس ما يقبل يخضع او يتنازل لقرارها
لان يعتبر طلبها صعب تنفيذه
يمكن لو تطلب روحه ينطيها بكل سهولة
بس مال يتزوج بنت اثير هاي هواي عليه
انطاني علاكة الاكل وكلي حطيهم بصينية وجيبهم وراي لغرفة امي
حضرت الصينية وصبيت الاكل
جان جايب شوربة وكباب ومعلاك وتكة ومقبلات وخبز حار وعصير برتقال
دخلت للغرفة لكيت قاسم كاعد يم رجلين امي
وهي جانت كاعدة على سريرها ودايرة وجها من عنده
جان يحجي وياها وهي مترد عليه ولا كأنما واحد ديحجي وياها
حط ايده على لحيته بغيض واتلمسها
اشرلي اقرب الصينية وحطاهة كدام امي واترجاها
.. يمة ابوس ايدج واحط نعالج على راسي كلشي طلبي مني
حتى لو تطلبين روحي ترخصلج الا هذا الطلب ما اكدر عليه والله هواي علية
مجاوبته امي
.. يمة ليش تمتحنيني بيج وتنزلين غضب الله علية
بزعلج شلون اهون عليج اتعذب
بقت على نفس وضعها مردت عليه
اباوع عليه مد ايده على كلاص العصير وشاله وقربه من شفايفها
.. يمة اروحلج فدوة شربي العصير
لا يهبط عندج السكر واذا على الحلفان اني ادفع كفارة
عنه بس اكلي دفعت ايده بغضب وكامت من مكانها
ومشت تريد تطلع بس مع الاسف ما لحكت تطلع
جانت تمشي وهي ترجف
عرفت امي هابط عندها السكر وهاي الحركة
داخت واغمى عليها
قاسم نهض مفزوع ووجهه مخطوف لونه
.. يووووم
يتبع
♥🌹♥🌹♥🌹