#رغما عني
حفصه الهاشمي
ـــــــــــــــــــــــــــــ
قبل ما يسد التيلفون سمعت صوته وهوه يصيح // بهاءء انتظرر ولك لا تتهوررر ..
بقيت صافنه على التيلفون معقوله بهاء يمه عززا والله يتخبل
خابرت علي ميجاوب مره مرتين
ثالث مره هوه خابرني فتحت الخط بسرعه وقبل ما اكول اي شي اجاني صوته اليرعدد
/// يااسه كولي المهاب خلي يروح على بيت عمج بسررعه هذا الخبل اخذ السلاح والسياره وراح هسه بالتكسي اني خلي يروح مهابب
جاوبته بخوف /// عزاا زيد فدوه اخاف يسويلهن شي لا تخليي
عاط بيه بصوت عالي// لجج هسه انزلييي على مهاببب
سديت التيلفون منه ونزلت ركض حته كم مره ردت اوكع
فتحت الاستقبال على مهاب جان كاعد على تيلفونه ولابس دشداشه سوده وسروال
التقطت انفاسي بصعوبه وهوه كام عليه بفزع
//خيرر شكوو .؟
// مهابب مهاب بهاء راح على بيت عمه سوسن عرف بخطبتها
جاوبني بأستغراب// شدتحجين ولج شلون عرفتي انتي .؟
//مهاااب ماخذ سلاحح ويا زيد كالي بسررعه
خطيه طفر طفره كلت راح يصير بس سكر
طلع ركض على من الاستقبال لبس شحاطته بالغلط وهوه يسب ببهاء وصل يم الباب جان ينتبهه على شحاطته
سمعته يكول //شوف الثول
لبس شحاطته عدل وراح ركض حته تيلفوناته نساها
طلعت امي فخريه وهيه تلف فوطتها بأهمال
///خايبين شبيكم عفيه بيت اربعه وعشرين ساعه صياح خيرر ؟.
باوعت عليها لثواني جان يطلع علاء وراها وهوه يفرك بعيونه جان نايم ولابس بس البجامه والفانيله
///خير يالله صباح الخير شصاير شبي مهاب ..؟
//بهاء رايح على بيت عمه وعرف بالخطبه مالتها .؟
جاوبني بملل وهوه يمسي للمطبخ ويحرك بشعره// اي ويعني؟.
// علاءءء ماخذ سلاح وياا شبيكك
التفت عليه وفتح عيونه بصدمه اردف وهوه يركض لغرفته ///ولج يا سلاح يا طركاعه .؟
شفته اخذ التيشيرت ولبسه ومن الهبطه طلع حافي الا صحت علي رجع لبس شحاطته وطلع ركض
بهاء متهور من يوم يومه
اذكر قبل من جنه صغار من نلعب بالشارع بس يسمع واحد يغلط علينه يلزمه ويدكه دكه مال زمايل
امي كعدت بالمطبخ وتعد وتصف وتضرب على رجليناتها
///يمااا بهاء وليدييي يمااا الولد راح يضيع من ورا صماخ هالمكموعه والله اذا صارله شي اروح اذبحها بأيدي واخلص عليها العرمه بطول الخرا لعبت لعب بالزلم العرمه ..
///يماااا ترا هوه اذا يروح يذبحها ويذبح نفسه وراها شبيجج.؟
جاوبتني بعصبيه///انجبيي عابب هالوجه يذبح نفسه مو هيه هينه كومي كومي جيبيلي عباتي وجواريبي كومي خفت لهالوجه ؟.
رحت بسكوت جبتلها العبايه والجواريب
انطيتهن الها واني اكوللها // يما والله مهاب راح يلعب بينه طوبه اذا رحنه خلينه كاعدين وننتظرهم زيد هم هناك راح اترزل
جاوبتني وهيه تلبس جواريبها // دنجبي انجبي يرزلوج انتي بعدين انتي طالعه ويايه خوما وي غريب امشي يالله
ــــــــــــــــــــــــــــــــــــ
نزلت بسرعه واني اسمع امي تصيحح بفزعع وصوت بهاء عالي يسب ويغلط
//// لاااا بهااءء نززل السسلااح لا تضربهااا ..بهااااء
طلعت ركض للطرمه بأنفاس منقطعه ..
جان بهاء واكف بنص الطرمه وسلاح بأيده اول ما فتت ضرب طلقه بالهوى وهوه يصيح على امي
بهاء /// عمممه والله اذا اتزوجت اكتلهاا هسه عمممه والله ....سحررر باعييليي سحرر ادفنج هسه وادفن نفسيي وراجج انيي الي انتظرتتج تكبرين واخذجج انيي مو هذااك الساققط سحرر
جاوبته امي بتوسل وهيه تضم سحر وراها /// يماا بهاء اترك السلاح لا تسويلنه كارثه ما تنحل الامور هيج يابه
جاوبها بعياط /// انتوو ما تنحل وياكم بالعين واغاتي الا بالعين الحمره
اردفت واني اتقدم علي /// بهاء يا عيني اترك السلاح الشيطان حاضر لا تتهور ..
///نوررر ارجعيي ليورا لا والله هسه اضربها
وجهه السلاح على سحر وهيه مستمره بالبجي وما نطقت ولا كلمه
انفتح الباب الشارع بقوه وفات مهاب بفزع من ورا وهوه يصيح علي
/// انعل شيب الخلفكك ساقطط هيه هاي تاليها تهجم على بيت عمك ومابينهم حريمم نذلل
باوعله بهاء بعيون مضلمه وابتعد من ورا علمود لا ياخذ السلاح صار يصيح علي ويكوله
//مهاب زوجونيها ترا والله ادفنها اذا تروح لغيري
///ابن القندره ذب السلاح هيه متريدك لا تبقه تنعثل جيب الخرااا
بقه يصيح ويفشر على الكل وهوه يكول زوجونياها ما زوجونياها
فات علاء وخطيب ياسه هم
لزمه مهاب وزيد وهمه يحاولون ياخذون المسدس من ايده بس هوه معند لازمه لزمة الكفار الشيطان احتل كل ذره بعقله
ثواني من العر والجر الى ان طلعت طللقه خلت الهدوء يعم بالمكان كوله و وجه بهاء اتلطخ ببعض الدماء المتناثره
اخر شي كاله قبل ما يغمى علي
///لانعل ابوك لابو الجابك على هاي الدكه ...
و وكع مهاب من طوله على الارض وهوه سابح بدمه
ــــــــــــــــــــــــــــــــــــــ
مجتمعين الكل بهدوء مريب ومتوسطه رأس الجلسه امهم بهيبتها المسيطره على الكل
دخل عليهم بيأس يحاول يخفي ويضهر جانب الامل والاصرار على قراره
بدون لا سلام ولا كلام فات من يمهم واتوجه للدرج وهوه حته ما انطه نضره لأي شخص بيهم
صاحت علي بصوتها القاسي الغاضب وهيه ادك بعصاتها على الارض الرخاميه
///واضح خوش اليتيمه فرت عقلك فر على اهلك
جاوبها بملل //يووم لا تكولين عنها يتيمه ترا والله اهج من البيت
وكفت امه بعصبيه وهيه تضرب بدقات منتظمه بعكازتها
///خييرر خير انشالله يا عامر اني على تالي عمري تجي انته تعصي اوامري البنيه ما تاخذها يعني ما تاخذها تريد تزوج اخطبلك بنت خالي واتزوجها متعلمه ومتوظفه هم دكتوره اسنان بعد شتريد هم مثقفه وهم عدها راتب خلي عقلك براسك تعرف خلاصك
جاوبها بعصبيه من هذا الموضوع الي امه ما تقبل تتقبله
/// يوممم كم مره كايلج اني ما اريد موظفه مرتي ما اريدها تشتغل اني خوا متزوج راتبها ياهيه الراتبها قوي تركضيلي عليها داكولج ماا اريدها تشتغل اني رجال البيت اني الي اصرف عليها مو هيه خنثه اني خوما خنثه اخلي مرتي تشتغل وتصرف على البيت
/// عاامرر ... انتقي الفاضك من تحجي ويه امك ...اني ما كتلك تصرف عليك بس تساعدك براتبها علمود بيتك يكبر ويبقه شامخ لا تبقه غبي
جاوبها بغضب // يومم ليش انتي موظفه اشو مو موظفه وبيتج عامر وبس راتب بابا اليصرف عليكم خرب بيتج لو لا
/// ولكك عامررر .,.. تقارني انيي بهاي اليتيمه الفاشلله لو بيها خير جان كملت دراستها واشتغلت اني بيتي يختلف وهايه نور متزوجها يعني متزوجها واشوف كلمتك التمشي لو كلمتي
عافها وصعد الدرج بخطوات ترسم مدى غضبها على الارض
ايام وايام وهوه يحاول يقنع امه استخدم وياها كل الاساليب من الاقناع
بالعين واغاتي باللطف وحته بالاحتجاج والغضب وافراض رأيه عليها بس هيه ما يفيد وياها
صارممه بكل شي مع العلم هيه ما كملت دراستها الى الثالث متوسط وتركت وماعدها وظيفه بس تحب يكون جناينها كلهن صاحبات وظائف عاليه وشهادات
ـــــــــــــــــــــــــــــــــــــــــ
الصياح بالبيت والجيران التمت كلها ببيتنه علاء وزيد شالو مهاب وهوه ما داري بالدنيه شنو صاير ويا
دموعي ونحيبي ما توقفو شوفة مهاب بهاي الحاله خلاني انسه موقفي ويا وكل شي بس يصحه
زيد/// بهاءء لكك كوادد شسويتت .؟
بهاء ما يرد عليهم ابد رجع زيد على بهاء طلع كلبجات من سيارته وقيده وهوه ما عارض ابد بس يباوع على قميصه الي انترس دم اخو الكبير ويرجع يباوع بنظرات قاتله على سحر
لبست امي عبايتها وصعدت ويه علاء ركضت اريد اروح وياهم اريد اطمن علي اشوف عيونه السود من جديد مفتوحه بس منعني علاء وهوه يكلي فوتي للبيت
ـــــــــــــ
راحو امي وعلاء ومهاب الفاقد وعيه وياهم وجيارنه ابو احمد هم راح وياهم والعالم صارت لخه على بابنه
وزيد كلبج بهاء واخذه ويا وين ما اعرف ؟.
رجعت على سحر وهيه كاعده بوسط الطرمه وتباوع على بقعى الدم الي انسالت من جسد مهاب
ضربتها راشدي خليتها تفز وتباوع عليه بصدمه وعيون دامعه
///عجبججج الصارر كلهه من وراجج كتلج اختاري صخامم عندتي الا خرا الجلب قتيببه والله اذا يصيرر شي لمهابب اشمرجج من فوكك السطحح انتي وبهاءءء خراا عليكممم وعلى حبكمم
اقتربت عليها بغضب ولزمتها من كتفها بقوه // جنتي خاييفهه لا يتكسرر بهاءء هاجج هذا مهاببب بالموتت ...واحددد يتكسرر احسنن ما يموتت واحدد غبببيه ...
دفعتها بقوه وكعت على الارض وهيه تبجي
اندت الباب بقوه رحت فتحت الباب بسرعه بلكي شي خبر عنهم
دفعتني وفاتت بعصبيه وهيه ترفع ايديها وتدعي علينه
/// يا ربيي هذني البنيتين شوفهن عذابك مثل مديعذبن ولديي ياربي ان
سكتت وفتحت عيونها بصدمه وهيه تشوف الدم الي تارس الارض باوعت عليه بعيون مفتوحه ورجعت باوعت على سحر
اشرت على الدم ودموعها نزلت
/// نن نور هاي هذا دم منو ننور ..؟
سكتت ما جاوبتها شكوللها دم ابنج الضربه اخو اتقدمت عليه ياسه وهيه تصيح //م احجيي نورر دمم منوو بهاءء
ارتفعت شهقاتي وبكاء سحر
وكعت ياسه على الارض وهيه تبجي وتنوح /// يمااا بهاءءء راحح منوو ضربببه بهااء يعني ماا
قاطعتها سحر ببجي // مهابب ياسسه مهاااب ضربه بهاءء
صاحت عمتي فخريه بصدمه وهجمت على سحر بحرقة قلب
صارت تضرب بيها بلا وجع قلب مره راشدي ومره جر من الشعر ودفرات
رحت عليها واني اصيح ،،/ عمممه ,..عممه عوفهاا راح تموتت جوه ايدجج
///بناتت القنادررر خليتوو الاخ يكتل اخووو اليوم ذبحها على ايدي الكح... الساقطه
نامت فوكها وهيه سمينه وسحر ناعمه وتضرب بيها وين اليوجعها
بالزور يالله سحبناها اني وياسه وهيه تعد وتصف ما بقت غلطه بقانون الفشار الا وكالتها
صاحت على ياسه وهيه تكوم /// كوميي كوميي انتي الثانيه مشيينه للبيت خلي اشوف ابوج وين اخذوا ولدي الله لا ينطيج يا سحر حسبي الله عليجج يا حقيره ولد ذابح نفسه عليج كل يوم عركات ويه ابو علمود جهرتج الزفره الله ا ينطيجج
طلعت هيه وياسه وسدت الباب وراها
وسحرملعوب بيها خلقه
كومتها وفوتتها جوه وهيه بس تبجي غسلتلها وكعدتها على القنفه ما حجيت وياها اي شي خليتها تبجي على راحتها الى ان نامت من ورا البجي
خايفه على مهاب منظر الدم وشكله شلون فقد الوعي لهسه بالي كل ما اتذكره اخذلي شوط من البجي
كمت خابرت على امي ومن حظي الحلو طلع تيلفونها بالبيت انوب زدت بالبجي كل ساعه واكول هسه يرجعون ويرجع وياهم بس هيهات
مرت الساعات وساعه تجر اخها وراها ..
الى ان اسدل الليل ستائره المظلمه على قلوبنا الي امتلئت ب الالم
صارت الساعه 9 ونص واني كاعده على السجاده وادعي الله يشافي ويكومه بالسلامه ويهدي النفوس
سمعت صوت الباب يندك كمت بسرعه وخوف رحت فتحته فات عمو جراح وبين على شكله تعبان سلمت علي واني انتظر فد خبر يطمن قلبي ..
// ها عمو مهاب شلونه .؟
مسح على لحيته بتوتر وتعب وحط راسه على القنفه واتمدد
/// بهاء اخذه زيد للحبس .. خبلنه الكواد لعب بينه لعب
جاوبته بخوف // عم عمو شنو يعني راح يسجنو .,؟
// لا بابا زيد يحلها من يمه هسه بس خلي يكعد مهاب ويكوم بالسلامه ولكل حادث حديث
// عمو يعني مهاب بعده ما كعد بعده فاقد الوعي ؟.
// بابا شبيج تبجين الرجال سوله عمليه وطلعو الرصاصه جايه ببطنه بس بعده بي اثار المخدر .. انشالله مابي شي
// انشالله
طلعت من يم عمو وطفيت الضوه علي
لكيت سحر جانت تتسمع علينه اجتي عليه اول ما طلعت وهيه تبجي
/// شنو يعني بهاء راح ينسجن نور شنو ينسجن هوه مجان يدري والله بهاء مو مجرم
/// انجبي ما ينسجن صوتج نصي عمو يريد ينام امشي من وجهي هسه
ــــــــــــ
مرت يومين ومهاب طلع من المستشفى وصحته صارت احسن وبهاء بعده بالسجن مهاب كال خلو كم يوم علمود يتعلم من اخطائه
وسحر كلابتها مناحه
وامي بين كل شويه تروح لمهاب وتوديله انواع الشوربه تكول زينه تنطيك طاقه وكل ما تباوع على سحر تنترس عيونها بالندم و الاسف بس فات الاوان على هذا كوله
من ثالث يوم اصريت على امي علمود اروح وياها اشوف مهاب بالزور يالله اقتنعت
اذكر من شفته ابتسامته اعتلت وجها وزينتها بألم
عدل من كعدته وهوه يكول بمرح // واني اكول المستشفى ليش نورها زايد اليوم طلعت نوري منورتها
ضحكت بخفه واردفت // شلون صرت خوما متوجع .؟
جاوبني بمراوغه وهوه يغمز بهناية كلامه // وداعتج هسه صرت زين ؟.بس ادري بيج ما بجيتي عليه يجوز فرحتي مو بلا ؟.
جاوبته بسرعه ونفي // لا لا والله اصلا ورمت عيوني من البجي عبالي راح يصير بيك شي والله .
صفن عليه وهوه مبتسم اردف بمكر // امم يعني تخافين عليه مو .؟
//اي اكيد مو ابن عمي انته .؟ شلون ما اخاف عليك مهما يكون تبقه ابن عمي وبمثابة اخويه الجبير ..
باوعلي وقلص عيونه // بلا هاي مال مثابة اخويه عوفيها على صفحه منوين صرت اخوج اشو لا امج فخريه ولا ابوج راضي ..
باوعتله بأستغراب وعقدت حواجبي // ليش عمو راضي الله يرحمه شجابه بالموضوع ..
ابتسم وسحب علبة الاكل من ايدي وهوه يكول // ام لسان صايره هوايه تحجين جيبي خلي اشوف شجايبين اشو شهيتي مفتوحه على الاكل هذا الكواد بس لا من ضربني ببطني فرغ الاكل الجنت اكله طول عمري ..
ضحكت علي وامي كل شويه تكوله خوما يوجعك شي خوما تعبت هوه ماشالله مثل الحصان كل شويه
يكول عمي العالم راح تنعمي عيونها من النور هاي هيجي مسويه بينه يا ضالمه
واني مثل الثوله اضحك علي
ــــــــــــــ
بيوم الخطبه وعقد القران مال سحر لان برغم كل الصار قتيبه وعمو مصرين على انو يصير يوم الجمعه العقد
حسب ما كال عمو علمود بهاء بالسجن نستغل الفرصه لا يروح يسويلنه مصيبه
ما عزمنه ناس هوايه بس بيت عمو جراح وحته خواته المتزوجات ما اجوي لان وضعنه والضروف ما تسمحلنه وعمو مسلم هوه اجه وبعض الجيران
بس ياسه وعمتي فخريه ما اجوي وحته مهاب ما اجه
اكيد ما يجون شلون يجون ويكسرون بأخوهم حته اني ما حبيت انزل ولا اطلع من غرفتي ..الا ان صاحتني امي بغرفتها
نزلت عليها شفتها كاعده على جربايتها ولازمه راسها رحت على ركض واني اسألها
// شبيج يماا اشو لازمه راسج خوما مريضه .؟
جاوبتني وهيه بعدها على وضعيتها
// نورر يا نور .. اني جرمت بأختج طفله بعدها ال17 ما عابرتها وجبرتها على شخص تكرها وجرمت ببهاء وحته مهاب كل الصار بسببي من خوفي عليها عمكم مسلم طمعه يتحكم بي مو هوه خفت لا يسويلها شي لو يجبرها على شي
// يماا بس انتي تعرفين بهاء شكد يحبها مستحيل يسويلها شي مو زين ما يصير تحكمين على بهاء من تصرفات ابو
// يما لعد منو الراد يذبحها اني لو بهاء
// يما هاي هالكد ما يحبها اصلا تلكين سحر فرحت بتصرفه وتمسكه بيها ما سامعه ضرب الحبيب مثل اكل الزبيب ..هسه شراح تسوين ترفضين مو
جاوبتني بسرعه // وشنكول للعالم .. راح تاكل وجوهنه الناس ليش بيوم خطبتها لغو كل شي لا يما لا خليها تكمل على خير ولكل حادث حديث الله يسعدها ويه قتيبه انشالله
كالت هيجي وطلعت من الغرفه ...
الله يعينج يسحر ..
ـــــــــــ
واكفين كولنه على غرفة سحر وهيه قافلتها على نفسها ومتقبل تفتح لأي شخص وبس صوت بجيها نسمعه
امي //يما سحر لا تحركَين قلبي عليج شو افتحي الباب الشيخ ينتظر جوه يماا عيب من العالم شكوللها .؟
جاوبتنه من ورا الباب بصوت مخلوط بالبكاء // يما انتي حركتيني اني .,ما اريده بطلت كوليلهم بطلت خلي يروحون ما اريد اتزوجه ما اتزوجج
قبل ما تجاوبها امي اجه عمو جراح وهوه يأشر لأممي علمود تبتعد وكف يم الباب وطرق علي بخفه وهوه يكوللها
// سحر بعد ابوج انتي افتحي الباب احجي وياج والتريدي يصير ..
شويه وفتحت الباب جانت لابسه بدله مستوره ما طالع منها اي شي ولونها اسود اذكر اشترتها امي الها بخطوبة ياسه وعيونها مورمه وما حاطه ذرة مكياج
صفن عليها عمو بحزن وفات هوه وامي وسدوا الباب وراهم ما قبلوا افوت وياهم
بقيت كاعده افكر بيها خطيه اختي الصغيره العمرها 17 سنه تنجبر انقهرت من كل قلبي عليها سحر من صفحه وبهاء الي بالسجن من صفحه الله اليستر من يعرف شراح يسوي والله يتخبل
ومن صفحه عامر المخبل يريد يحجي ويه مهاب وامي والله اروح بيها الاثول يقبلها على اخته علمود يقبلها على حبيبته هاي اذا جان يحبني ...
شويه وطلعت سحر وامي وعمو الابتسامه مرسومه على شفاه سحر ابتسامة طفل اشتروله حلويات
رحت عليها كتلها // ها شصار راح تبطلون .؟
جاوبتني بضحكه // لا راح نكمل
باوعت عليها مصدومه راحت هيه وعمو على الاستقبال علمود يعقدون واني بعدني على نفس وكفتي وفاتحه عيوني بصدمه منها
مو هسه جانت تبجي اشو دتضحك هاي الخبله رحت على امي
كتلها // يما شبيها سحر بس لا تخبلت ترا كوله بسببج اذا اختي اتخبلت .؟
جاوبتني وهيه تمسح دمعتها وتضربني بخفه على راسي // ثوله انتي مابيها شي الله يسعدها ..
عافتني وراحت كل عقلهم هاي العائله
سمعت من ورا الباب وهيه تكول للشيخ بصوت حزن
// اقبل ...اقبل ..اقبل
ــــــــــــــــــــــــــــ
مرت اسبوع على عقد قران سحر ولهسه صدمتها بيه سحر الجانت مقطعه نفسها على مهاب قبلت وطلعتلهم بأبتسامه وفرحه هم
بس قتيبه كل ما يجي هيه تنهزم وتصعد لغرفتها وما تشوفه ابد هوه جان يضوج ويبين علي العصبيه بس يسكت ما يحجي شي
المصيبه بهاء بعده بالسجن سمعت من مهاب راح زاره وبهاء بقه يبجي ويعتذرله وبعده مصر على سحر
مهاب كالي اخويه اخر شي من احجي ويا يكولي دير بالك على سحر واجل الخطبه مالتهم لبين ما تعفي عني واطلع اشوف شبيها اتغيرت هيج واني اسكت ما اجاوبه شكوله سحر صارت على ذمة ابن عمك ..
مرات من اشوف سحر تضحك لو مبتسمه اعصب عليها حيل هذاك المكرود نايم بالسجن من وراها وهيه تضحك هنا مرات ارزلها بس هيه ما تحجي
ـــــــــــــــــ
جنت كاعده بالطرمه واباوع على حديقتنه الي مزينتها الورود جان وقت مغربيه هيج شي كمت اريد افوت جوه طلعتلي امي وهيه تضرب على وجهه بخوف وتحجي بصوت مسموع شبه عالي
/// سررر زواج بالسرر يسحرر خبلجج عامرر خبلج النذل يا حقيره شتزوجين بالسرر ولجج
باوعت عليها بخوف اكيد كاللها عامر الغبي ضيعني وضيح حياتي
// يم يماا وا والله مو ان
انفتح باب الشارع بقوه وفات مثل الاعصار وعيونه بكصته من العصبيه اتقدم عليه بلا احم ولا دستور وضربني راشديي
/// عامرر ينوريي عامرر ..
ــــــــــــــــــــــــــــــــــــــ
بنوتات راح انشرلكم مشهد من رواية زمهرير الاوجاع ياريت تشوفوها اذا عجبتكم
رأيكم وتصويت
صرت كريمه كل يوم دانشرلكم ههههه وانتو عاد سوو تاكاتتتتت
دمتم سالمين .عسلايات..
حفصه الهاشمي