#اساو_الفضة
#البارت_الثاني
#الكاتبة_تهى
جمدت بمكاني متفاجئة حطيت ايدي على حلكي
ممصدكة اقتربت المرية ورفعت راسها تريد تحجي وياي ومن وكعت عينها علية اختفت ابتسامتها وعقدت حواجبها مستنكرة
.. لاتكولين انتي بثينة بنت ام سامي
دمعت عيوني وهزيت راسي بموافقة الغصة اتزاحمت وية الدموع بحنجرتي وسلبت مني الكلام
.. ياايمة هاي انتي بثينة ما اصدك
اقتربت مني وحضنتني بقوة وكملت
.. عزة لج خالة بثينة هاي شصاير بيج ما دا اكدر اصدك عيني
معقولة انتي بثينة يعني لوما عيونج العسلية ما عرفتج
ما بيج اي شي من بثينة القديمة وماظال بس بقايا بثينة لج هاي ليش هشكل متغيرة
خنكتني العبرة وحضنتها حيل مثل الطفل الي يشوف امه هشكل كان حالي من شفت ام فرزدق صديقة امي الروح بالروح
اتبادلنة الاحضان
وسحبتها من ايدها واني ما مصدكة معقولة الدنيا تجمعني بأعز ناسي كلتلها احس الزمن رجع بية
.. تعالي خالة لا نبقى واكفين نسولف بالباب خلي ندخل جوة
دخلتها للبيت وكعدت بالمطبخ يمي
ام شيماء_ شلونج خالة شخبارج و الولد شلونهم ..ياربي متدرين شلون مشتاقتلج والله من شفتج عبالك شايفة امي الله يرحمها
._ الله يرحمها لامج.. والولد فرزدق وصادق تزوجوا وصار عندهم اولاد وبنات
سولفيلي انتي شلونج ولج صايرة هواي تشبهين المروحة امج لو تدرين من رجعت من الاردن شكد سألت عنج بس محد يعرف بمكانج وين صفة بيج الدهر
من ذكرت اسم فرزدق اتزوج حسيت رجع بية الوكت لذيج البنية الي كلبها يصير مثل الطير يرفرف بس ينذكر طاريه .. يالله معقولة بعد كل هاي السنين بعده كلبي يحن عليه واني بكل ضني زماني نساني كل شي غمضت عيني
_ متدرين خالة شكد جنت مهمومة بس من شفتج احس نص همي راح
_ يابعد كلب خالتج تعالي كعدي يمي واحجيلي عن احوالج
جنا نحجي واندكت الباب
التفتت ام فرزدق عالباب وكالت
_ اخاف عندج شغل وانا ضايقتج
.. لا هذولي يمكن بناتي اجوي من المدرسة
رحت فتحت الباب ودخلو البنات
يباوعن على ام فرزدق .. شيماء سألتني
_ ماما منو هاي المرية
_ هاي خالتي ام فرزدق صديقة امي روح بالروح اعتبرها امي الثانية بس مع الاسف الظروف بعدتنا
وهمة انتقلوا من يم بيت اهلي وبعد فترة سمعنا بيهم سافروا للاردن ومنها بعد انكطعت عنا اخبارهم
روحي سلمي عليها
ام فرزدق _ صلوات على النبي هذني الحلوات بناتج
ابتسمت _ اي خالة هذني بناتي خلي اعرفج عليهم
صحت للبنات تعالو بنات لتستحون ترة ام فرزدق مثل جدتكم
اشرت على شيماء
_ هاي شيماء بنتي الجبيرة
_ ما شاء الله عروسة شكد عمرها
_ عمرها ١٥سنة وهاي بنتي الثانية مروة عمرها ١٤ سنة وهاي بنتي الثالثة ضحى عمرها ٧سنوات اما هاي الشحرورة ام عيون التلمع فهاي
بزر الكعدة هدى السنة الجاية اسجلها صف اول
.. ما شاء الله صلوات على النبي ربي يحفظهم الج ويفرحج بيهم بس مكلتي شنو ماعندج ولد
_ لا والله خالة مصار عندي ولد
_ لا تأيسين من رحمة ربج
اشرت على بطني
_ وهسة انت حامل بشنو بولد لو بنية
_ بنية
_ الحمد لله اهم شي تمام الخلقة ولد بنية كله خير من الله
صرت اسألها وتسألني على احوالي
- شنو صارلكم شكد من انتقلتوا هنا ؟؟
_ مصارلنا هواي من انتقلنا
واني هسة داشتغل خياطة اذا تحتاجين تخيطين تعالي عندي خيطي
_ صلوات تخيطين همزين كلتي بعد كلة اجيب قماشي يمج شنو منو تجيج من نسوان المنطقة
_ والله خالة محد تجي تخيط عندي لان مو هواي بالمنطقة يعرفوني اخيط لذلك من شفت الخياطة وكف رزقها صرت اشتغل عند بيت المختار اساعد ام رائد بشغل البيت وتنطيني هالقاسمه الله
_ تعالي كليلي هاي شصاير بيج ورجلج شلونه وياج
وليش دتخيطين وتشتغلين بالبيوت شنو رجلج وينه عنكم شنو مديصرف عليكم؟؟
_ والله يا خالة ما اعرف شحجيلج
_ احجي خالة خليني اعرف لوين صفة بيج الدهر انتي ريحة الغالية صاحبتي
_ اني من اتزوجت اثير كاعد عطال بطال وهو الله يحفظه كوة يدور على شغل
وجنت ادعي ربي يرزقه بوظيفة وبالف ياعلي بالكوة حصل وظيفة واتعين وصار موظف بالبنك وكلت الف الحمد لله هانت وانحلت مشاكلنا وراح تفرج
بس يا فرحة ما تمت مرت سنة وجان يجي اليوم الاسود
.................
جان الوقت ظهر
نزلت اسوي جاي لأثير وتركت البنات يمه بالغرفة دخلت للمطبخ على كيف حتى متشوفني عمتي ام اثير
حطيت القوري عالنار واني بالي كله مشغول بأثير وضعه ما عاجبني هاي الايام هواي متغير علينا صاير ما يتحاجة على الاساس انا عايزة ضيم وهو يجي يزيد فوك ضيمي مدري شجاه وشغيره جنت صافنة وعقلي مشدوه سالفة تجيبني وسالفة توديني
سمعت باب الشارع اندك حيل
جان بالاول الدك عالباب وبعدها صار يضغط عالجرس ويدك عالباب بالحاح مثل المستعجل
صار الدك كلش قوي عبالك راح يفلشه طلعت من المطبخ احجي
.. يمة ياستار استر هذا منو هشكل ديدك الباب
لاكتني عمتي
ام اثير.. هذا منو بالباب بالله شو روحي صيحي لواحد من الولد خلي يروح يشوف منو بالباب حرك للجرس حرك
رحت صعدت فوك حتى اصيح لأثير لاكاني حماي امجد عالدرج ديلبس الفانيلا مستعجل
سألني .. شنو منو بالباب
.. ما ادري اني صعدت حتى اصيح اثير يفتح الباب
.. انا رايح افتح واشوف منو
كمل طريقه ونزل جوة جان الوقت ظهر دخلت للغرفة
شفت اثير كاعد ويمه البنات شيماء ومروة وضحى وهدى نايمة بسريرها وبيدها مميتها دترضع
اثير.. شنو وين صار الجاي
.. خليت القوري عالنار واندكت الباب وصعدت اصيحلك بس امجد راح يشوف منو بالباب
جنت احجي وياه وسمعنا صوت عياط وصياح رياجيل وهوسة جوة
طفر اثير من السرير
اثير .. شكو ياستار
راح ركض على باب الغرفة يريد يفتح الباب ويشوف شكو
بس فجاءة اندفع باب الغرفة بقوة بحيث انخلع من مكانه
وصارو بوجهنا جماعة مسلحين
دفعوا اثير واني عطت بخوف
.. يمة صخام انتوا منو
اباوع لأثير يباوعلهم مخطوف وجهه بخوف مفزوع منهم
واحد منهم سأله
..انت اثير .... ....؟؟
كله .. اي نعم انا اثير
صاح الرجال .. يالله شباب جتفوه وجيبوه وراي
يمة اني شفتهم ديضربون اثير كدامي اني والبنات
وهويريد يخلص نفسه من بين ايديهم وهمة اتولوه ضرب
عزة بعيني صرت اصرخ بدون شعور رحت عليهم اريد ابعدهم عن اثير بس واحد منهم دفعني وخلع جتفي من الالم وشفت روحي واكعة بالكاع
بناتي صارو يتصارخن خايفات ومفزوعات من المنظر ومن الخوف كامن ويصيحن .. بابا .. ماما
ويبجون قيدوا اثير كبال عيني وسحلوه من بين عائلته همة ينزلونه عالدرج سحل واني نزلت وراهم اعيط خايفة عليه ما اعرف هذولي منو وشنو يردون منه
صرت اصيح واحشم بالناس شفت حماي امجد همين مجتفينه ومكعدينه بالكاع وواكفين اثنين مسلحين فوك راسه وخالتي تتوسل بيهم يتركون ابنها وتكللهم خالة
داخلين على الله وعليكم هدوا ولدي
بس المصيبة محد يجاوبنا عبالك دنحجي وية اصنام
بعدها
سحلوا امجد واثير واخذوهم بسيارة
بس طول ما همة يجرجرون بأثير واني وعمتي نصرخ ونتوسل بيهم يتركونهم
اباوع لعمتي وكفت كدام رجال طويل ضخم عنده شوارب وسألته تترجى بيه
ام اثير.. يمة فدوة رحتلك ولدي وين ماخذينهم
جاوبها بنترة وصوت عالي
.. بعدي عن طريقنا وخلينا نشوف شغلنا ودفع عمتي من طريقه وراح
وعمتي ام اثير طلعت بالباب وظلت تحشم بالناس
.. يبوي .. يبوووووي يالوادم لحكو علينا انهبنا واخذوا اولادنا
التمت الجوارين والمشكلة وقت ظهر حارة يعني اغلب الناس نايمين ببيوتهم ومحد بالشارع بس على صياح عمتي طلعوا الناس من بيوتهم
واجوي الجوارين وسألو عمتي عن الصار وكعدت عمتي تحجيلهم الصار واني ادك والطم على وجهي
.. يمة سودة بوجهي اثير راح يروح من ايدي
عزة العزاني هاي وين جانتلج يابثينة
خطية اباوع على بناتي شلون يتباجون ويسإلوني ماما
ليش اخذوا بابا شراح يسون لبابا
واحد من جوارينا من سمع كلام خالتي ووصفتلهم المسلحين كللها خالة هذولة المسلحين من الامن يعني ولدج اخذوهم الحكومة شوفي شنو مسوين ولدج
عمتي بس سمعت الامن وحكومة ..
كعدت بالكاع وفتحت شيلتها وصارت تدك وتلطم
.. يبوووووي سودة بوجهي ولدي راحوا
ابو احمد .. حجية صلي عالنبي لتخافين انا عندي معارف بالامن راح استفسرلج واعرفلج شصاير
ام اثير.. ولك خالة منين اجتني هاي المصيبة السودة
يمة ولدي ما عندهم اي شي عسكرية وخادمين بيها ومتسرحين منها وما لهم شغل لا بالسياسة ولا بالدين ماشين بصف الحايط سودة علية
يرحون ويرجعون بطريقهم ومالهم شغل لا بحزب ولا الهم شغل بدين ولا يوم سمعتهم حجوا عالريس القايد
او جابوا سيرته بالشينة
الرجال.. والله حجية ما اعرف شنو اكلج بس خلي استفسر واردلج خبر
ورة ساعة كلمن رجع لببيته واني باقية على كعدتي بالطارمة اندب حظي وادعي بكلبي
وبناتي كاعدات يمي وهدى جانت صغيرة نايمة بحظني ترضع
وكلها بصوب وخالتي ام اثير بصوب تروح تروح وترجع عليه دارت علية تغمني وتغلط علية
..ها يابنت الفكر كسحتي ابني بجرفتج الفكر انتي وبناتج
مجاوبتها هسة احنا بيا حال
هاي المرة من يومها ابد ما تفوت فرصة اذا ما تتهجم علية شكو مصبية تصير بالبيت تطيح براسي وتعلكها علية وتنزل علية غلط ومسبة عبالك عندها شماعة تعلك عليها الرزايل سكتت خليها تحجي لوحدها وخليني اني محتارة
بضيمي احاجي بروحي رفعت راسي اشكي همي
ربي فدوة رحتلك ليش كلما اكول هانت
تطلعلي سالفة عوجة لا عالبال ولا عالخاطر تردني ردود لنقطة الصفر
صار الليل واحنا ماعندنا اي علم عن ولدنا وين صفة بيهم الدهر
لليل اجة جارنا ابو احمد وعم الولد
كعدوا بغرفة الخطار وعمتي لبست عبايتها وراحت يمهم كبل رحت وراها لبست ربطتي ودخلت وراها
اريد اعرف الصار
ام اثير .. ها حجي بشرني وكلي لكيت ولدي
كللها.. حجية اتطمني مثلما كلتلج ولدج ماخذيهم الامن وهسة همة بالسجن جاي يحققون وياهم
.. يمة صخام بوجهي يعني شنو ولدي ضاعوا ومحد راح يلحك عليهم بعد
.. حجية كولي يالله خلي نفتهم من ابو احمد
التفت عمهم وحجة
.. خوية ما عرفت همة ليش ماخذينهم
.. والله الي افتهمته منهم ان الموضوع يخص ابن اخوك اثير
الي يشتغل بالبنك عليه قضية تسريب فلوس مزورة لداخل البنك اما امجد استفسرت منهم كالوا باجر يطلقون سراحه ما لكو عليه شي
ام اثير .. يمة صخام بوجهي اثير يشتغل بالفلوس المزورة لا يمة كول غيرها
اثير ماعنده بهاي السوالف
كون هو صدك مثلما تكول يزور لعد وين الفلوس الي حصلهم من هالتزوير وليش الخير ما يبين علينا
اشو هذا بيتنا على حطت ايدك من اتعين اثير لحد هذا يومك كلشي مجايب للبيت لا ثلاجة ولا تلفزيون
لا غراض ويادوب يصرف على عياله
.. والله حجية ما اعرف شنو اكلج بس الجماعة ما يخطون هيج خطوة اذا ما متأكدين وعندهم معلومات وادلة تثبت ان اثير الة يد بالتزوير واحتمال راح يحيلون اثير للمحكمة وينحكم
اجتني كلمات ابو احمد مثل ضربة العامود من يوكع فوك الراس ويقسمه نصين اي انا هذا حالي من
كال اثير يشتغل بالفلوس المزورة وراح ينحكم انا حسيت الدنيا افترت بية وضاكت الواسعة بعيني
يعني شنو اني وبناتي راح نضيع زين شلون وشوكت وليش اثير يسوي هشكل
مامعقولة ما اصدك ماعنده شي بحياته
يدفعه يسوي هشكل هو صحيح غير مسؤل
بس مو لدرجة يوكع روحه بالمشاكل ويودي نفسه للتهلكة
بس فجاءة اتذكرت موقف مشبوه لأثير
شهكت ولطمت على حلكي مصدومة
التفتت عمتي وعمهم وابو احمد يباوعون علية
عمتي بس شافتني غمتي وظلت تحجي
..لا حلت بركة بيج بومة
طلعت من يمهم جسمي كله يرجف من الي عرفته صعدت فوك لغرفتي
دخلت للغرفة ولكيت بناتي كاعدات يدرسن اتجيت عالباب وكعدت بالكاع ابجي بيأس وقهر التفتوا يباوعون علية وبعيونهم نظرة تسأل
اجتي بنتي شيماء اقتربت مني ومدت ايدها مسحت دموعي واتبعنها خواتها وكفوا قريب علية
شيماء.. ماما ليش دتبجين ؟
ضحى.. بيبي ضربتج ؟
جاوبتها مروة .. هي اكو غيرها عجوز النار ياربي هاي شوكت تموت ونرتاح منها بس تحجي على ماما
باوعت لبنتي الصغيرة هدى اجتي يمي اقتربت مني تريد تكعد بحظني
مديت ايدية وحطيتها بحظني ودموعي مبطلت
التفت تباوع علية وبرطمت شفايفها تريد تبجي وياي
انمرد كلبي عليها
شكول عليك يا اثير شنو ذنب هاي الطفلة بعدها حتى ما لحكت تفطن على وجودك بحياتها
جانوا بناتي يحجون خطية ميدرون بأبوهم شنو مسوي من مصيبة
شكالتلك روحك يا اثير وسويت هالمصيبة زين مفكرت ببناتك المكرودات
رجعت شيماء تسألني .. ماما ليش دتبجين
احتاريت شجاوبها شكللها
اكللها ابوج حرامي يشتغل بتزوير الفلوس وراح ينحكم
لان مد ايده عالحرام علمود نفسه الدنية
مو علمود بناته
اي اثير كضة طول عمره يمشي بطريق المنكر شرب ونسوان دومه مخربط واناني بس معقولة وصلت بي المواصيل تدفعه يخطي هيج خطوة ويورط نفسه بعملية قذرة ويزور الفلوس معقولة لهاي الدرجة باع اخر قطرة شرف بوجهه
جريت نفس عميق
احمد الله الف مرة ما صارف عليه او على بناته
فلس احمر من مال الحرام
هسة عرفت ربي شكد يحبني اني وبناتي
اي عسى ان تكرهوا شيئاً وهو خيرلكم
جنت شكد اشتكي من اثير لانه ميصرف علية
اني وبناتي جان حيل بخيل علينا ويقطر علينا المصرف بقطارة
اي نعم افضل نموت اني وبناتي من الجوع ولا لكمة الحرام تدخل ببطن بناتي
ومر شهرين على اثير بالسجن يالله انحكم
وامجد حماي طلعوه ورة يومين من اخذوه
كثرت اسألت بناتي عن ابوهم
حماي امجد كللهم .. ابوكم سافر
عبرت عليهم كذبة عمهم لان بنات صغار مينتبهون
على كلام عمهن وبيبيتهم من يتناقشون بينهم بموضوع اثير
ومرت الايام علية وعلى بناتي وزادت معاناتي
وية عمتي احس بيها شنت علية الحرب
وكامت تحتار شلون تسود علية عيشتي اني وبناتي
وضاكت علية الحال وصرت بعازة الفلس
خاف جان اثير ينقط علينا بالمصرف هسة
صرت بحسرة الفلس
و عمتي الله يحفظها حتى الاكل الي ناكله تشوفه هواي علينا اني وبناتي
صرت انام واكعد واني شايلة هم بناتي
وافكر بالعيشة شلون ادبرها
حماي امجد يشتغل على كده ويادوب موفر عيشتنا وتعرفين الدنيا حصار هاي الحجي ح شهر الرابع 92 هدى بنتي توها صاير عمرها سنة ... ومثل ماكتلج امجد هو عنده عائلة محتار بيها وانعم الله عليه من متكفل بأكلنا وشربنا
بس هي الحياة مو بس اكل وشرب
وبالذات اني صاحبة بنات والكبار شيماء ومروة عدهم مدارس ويحتاجون هواي اشياء
باوعت بغرفتي عندي مكينة خياطة جنت اخيط بيها لبناتي دشاديش او بجايم ومرات اخيط بيها الملابس المفتوكة
واجتني الفكرة اخيط لنسوان منطقتنا ومن عهدها صرت اخيط بالبداية كم وحدة وبعدين انعرفت بالمنطقة لان خياطي سريع وحلو مرتب وحتى تكلفة الخياطة قليلة صحيح الي احصله من الخياطة قليل بس احسن من ماكو
وصرت احط الفلس عالفلس حتى اوفر لبناتي
جنت كلش فرحانة لان كدرت الكة باب رزق الي ولبناتي
اما عمتي ام اثير بالكوة قبلت اتخليني اخيط للنسوان كلما تشوف وحدة تجي تريد تخيط تظل تحجي لان
ما يصرفلها النسوان يدخلون ويطلعون لبيتها
لذلك حطيت مكينة الخياطة فوك بغرفتي وفرغت زاوية صغيرة خليتها خاصة للخياطة والقماشات
والنسوان الي يجون علية بسرعة اصعدهم فوك بسكوت احاول بقدر الامكان ما اخلي عمتي تحس حتى ما تسويلي عرس وتظل تحجي كدام النسوان وتفشلني
والحمدلله كدرت عن طريق فلوس الخياطة اسد بعض من احتياجاتنا
وجنت شايلة هم جبير لبناتي خايفة عليهن من هاي الدنيا
خصوصاً هنة بنات وما عدهن اخ يكون الهم السند
لذلك جنت كلش حريصة على دراستهم
واحاول اوفرلهم الي يحتاجونه من ملازم ودفاتر او اي شي ثاني يخص المدرسة
واذا اشوف عندهم درس يصعب عليهم كبل البس عباتي على راسي واخذهم واروح لبنت جوارينا الي مخلصة تعليم ومتخرجة
واكعد يمها واخليها تشرحلهن
خطية هي متقبل تاخذ فلوس التدريس لان تعرف بية وبحالتي ماعندي امكانية ادفعلها
لذلك صرت اخيطلها ببلاش
هذا كلة يهون علية من اشوف بناتي شاطرات بالمدرسة
عندي شيماء ومروة كلش شاطرات بالمدرسة
اريد بناتي يكبرون وياخذون شهادات
حتى يكدرون يعتمدون على نفسهم اي الشهادة بهذا وكتنا سند للبنية والله مو بس بهذا الوكت بكل وكت الشهادة سند للبنية تنفعها خاف الوكت يحوجها الهة ما تظل تنتظر الناس يعطفون عليها ما اريد تكون حياتهم مثل حياتي اريد الهم الاحسن
ومرت الايام طويلة
اي ايام التعب والصبر دائماً تكون طويلة
جنت دائما انتظر اسمع خبر عن اثير واصبر روحي واكول بثينة صبري واتحملي ان شاء الله ربي يفرجها عليج
من دخل اثير للسجن لليوم ما شايفته لان اثير يرفض نروح نشوفه اني والبنات بالسجن
بلكي السجن يصيرله عبرة من الصار ويتوب ويتغير حاله
بعد مدة وبيوم من الايام حلوا البنات من المدرسة
ودخلت علية شيماء تبجي وراها مروة مضروبة وقميصها
دكمه مكطعة وجان منظرهم يخوف
ركضت مفزوعة .. لج يمة شومة شبيج تبجين
شيماء.. ماما صدك بابا مسجون
.. منو كلج هذا الحجي
جاوبتني مروة .. اليوم جنت كاعدة بالصف
و المعلمة طلبت مني بابا يجي للمدرسة تريد تحجي وياه
علمود مستواي بالمدرسة
كلتلها .. بابا مسافر
بس وحدة من الطالبات كلتلها
.. ست مروة جذابة ابوها ما مسافر ابوها مسجون
لان هو حرامي
وانا كمت عليها وكلتها لا تجذبين بابا مسافر وما اسمحلج تحجين هشكل عن بابا سامعة
ريناد ضلت تضحك علية وتكول ابوها
حرامي وما كاعدة راحة ما اتحملت جريتها من شعرها
واتعاركنا اني وياها والمعلمة فكتنا وودتنا للمديرة
ودزو على شيماء اختي وطلبوا باجر ما اداوم اذا ميجي ولي امري
ظليت واكفة كدامهم مصفصة اباوع بوجهم لا حول ولاقوة
ما اعرف شجاوبها
شيماء بقهر.. ماما جاوبيني صدك بابا بالسجن
دنكت راسي وحجيت بصوت واهن
.. اي ماما ابوكم صحيح مسجون بتهمة تزوير الاموال
وسكتت مكدرت اكمل
مرات الحياة تحطنا امام الامر الواقع وتفرض
علينا المواجهة
شكد جنت اتمنى اجنب بناتي هذا الموقف الصعب
بس شكل موضوع ابوهم ميتحمل يبقى سر اكثر من هيج وصار لازم البنات يعرفون حقيقة ابوهم
شفت نظرة الصدمة انرسمت على وجوهن
و مروة فتحت حلكها تريد تحجي
بس اني سبقتها
اني كأم يفرض علية اكون صارمة وياهم بهيج موقف وما انطيتهم مجال يحجون غيرت الموضوع بسرعة
وعقدت حواجبي بوجهم
.. يالله لا تكعدون تنصبولي مناحة
وحجيت بكل جدية واني مخنزرة بوجهم
وانتي تعاي ست مروة بالله احجيلي ليش المعلمة طلبت تشوف ولي امرج
دنكت مروة وحجت بخذلان
.. لان اتعاركت وية ريناد
.. لا اني ما اقصد عالعركة انتي كلتي المعلمة طلبت مني اجيب ولي امري تريد تحجي وياه بالله على شنو طلبت ولي
جاوبتني شيماء .. ماما المعلمة اكدت على قدوم ولي امر مروة لانها كلش شاطرة وصاروا المعلمات ياخذونها للصفوف المتقدمة حسب كلام المعلمة تكول اختج نسبة ذكاها يفوق عمرها حرمات ينهدر هيج نموذج
شكد انقهرت من موقف ابوهن بس يافرحتي من سمعت بمروة بنتي متفوقة بدراستها يعني صدك ربي ياخذ شي وينطي شي ثاني ورحت يوم ثاني للمعلمة كالت بنتج تكدر تعبر مراحل يعني تعبر صف وتدرس بالعطلة وتمتحن
وصدك قدمت لمروة على التربية علمود يشملها قرار العبور
ومرت علية اربع سنين شفت بيهم الويل وصادف وقت حصار وحصرة عالناس اللكمة وبعدما ايست من خروج اثير من السجن لان طالت المدة وجان يجي اليوم الي يصدورن بي قرار الافراج عن السجناء
جانت فرحتي ما سايعتني ممصدكة اثير طلع من السجن
كلت راح يجي يساعدني وارتاح من نكة عمتي
جنت متأملة ان يكون السجن غير من اثير واتعض من الماضي
وفعلاً السجن كدر يغير اثير واطباعه لكن مع الاسف تغير نحو الاسوء اخاف جان بس يشرب ونسوان هسة
صاير ضرب وصياح وخانكني اني وبناتي وحصرة علينا الطلعة وصار بخيل اكثر من قبل
وفوك هذا كله عمتي توزه علية علمود خلفة الولد
وهو بروحة ما عايش يردني اخلفله ولد
اكل راسي حتى احمل
ومرت الايام واثير كثرة مشاكله بالمنطقة وصار كل يوم يتعارك وية واحد من المنطقة
والله وبيوم من الايام جان متعارك بالمنطقة وتبين سبب العركة واحد من اهل المنطقة معير اثير بسالفة التزوير
وعمتي من يومها كالت تنتقلون لبيت علي حماي وهشكل راح يبتعد عن المشاكل
وانتقلنا لهذا البيت والحمدلله ارتاحيت من عمتي بس الراحة شكلها مامكتوبتلي العيشة صارت اصعب من قبل
ام فرزدق.. ليش يمة صارت اصعب من قبل
.. خالة اكتشفت عيشتي عند بيت عيالي احسن بهواي
لان هناك المصرف خفيف علية يعني الاكل والشرب كلة وية بيت عيالي وبعد الانتقال صار المصرف هواي
لذلك اضطريت اشتغل عند بيت المختار
ام فرزدق.. والله يا خالة الله يساعدج ويعينج على ما بلاج
بس لتزعلين مني اذا كلت هاي حوبت ابني فرزدق بيج
شكد كتل روحه عليج وكم مرة اتقدملج وانتي ترفضينه
دنكت بقهر .. خالة بعد ما يفيد العتاب ولو هو الموضوع راح وكلمن مشى بطريقه وشاف حياته
بس صدكي وامني بالله اني رفضتكم غصب عني
ابوي غصبني عالزواج
من اثير والله يرحمه هددني اذا ما اتزوج ابن صاحبه يذبحني ويذبح فرزدق
ام فرزدق .. حرامات والله تعاي شوفي هسة فرزدق شلون الله رزقه وفتحها عليه من وسعه وصار عنده خير من الله
ومعيش مرته وجهاله بنعيم وفوك هذا كله لو تشوفين مرته جنها عريف شرطة تخرع وشايلة خباثة ما شايلها احد
هسة لو انتي جنتي ومتزوجة فرزدق جان هسة
اني وياج كاعدات نتسامر بس يالله كلشي بالقسمة والنصيب ما مقسوملنا تصيرين من نصيبنا
.. اي والله خالة كولي مامقسوملي ارتاح بحياتي مكتوبتلي شلة الحال
ربي يهني لفرزدق ويرفع شأنه ويعلي مراتبه فرزدق انسان طيب والنعم منه
.. امين
ام فرزدق باوعت للساعة
.. عززة هاي شنو الوكت يركض اركاض
ماحسيت عليه شوف هسة الكة الولد مخبوصين لان كلتلهم انا رايحة لبيت ابن عم فرزدق بيت ابو قاسم
هنا يمنا بالمنطقة كلت اروح لمرته اتحمدلها السلامة صارت عندها بنية
خطية هاي ام قاسم قصتهاهم مثل قصتج خلفتها كله بنات
بحيث صاروا عدها اربع بنات يالله صار عندها قاسم
وبعد ولادة قاسم حبلت وجابت بنية وبعدها بكم سنة هم رجعت مرة لخ حبلت وهسة جابت البنية السادسة
واني رايحة اتباركلها
.. ابنها شكد عمره
.. عمره ١٣سنة بس خطية امه شكد جانت تتعشم تجيب اخ لقاسم بس ماكو ربج مكاتبلها
.. ياخطية يالله الحمدلله على الاقل صار عندها ولد
.. اي عفية بس هو شلون ولد الكاع تصيح منه الغوث من وكاحته وشيطنته ما ظال واحد بالمنطقة
ما متعارك وياه خطية ابوه وامه يستحون من الناس من يجون يشتكون عليه فانتي ديري بالج نبهي بناتج
من يطلعون بالمنطقة خلي ياخذون خذرهم من عنده
خاف يضربهم
.. يمة اسم الله على بناتي شحده يوصللهم
.. هو ماخذ الناس فلاحة ملاجة على ابو هو وحيد اهله
وجاي على حشف ونشف فتشوفينة كالب الدنيا واهله مدللينه
يالله خالة شوف شلون اخذتنا السوالف خلي اروح
مو تنسين اشوف يوم امر عليج اخذج للمستوصف تراجعين
.. ان شاء الله خالة
مرت الايام وخلصو البنات امتحانات اخير السنة
وشيماء امتحنت ثالث متوسط بكلوريا وخلصت
شيماء.. ماما منا ورايح اني اروح بمكانج اساعد ام رائد بشغل البيت بعد امتحانات وخلصنا وعندي عطلة وانتي الحمل متعبج
.. والله ياماما الله يبارك بيج بس ما اريد اتعبج بعدج صغيرة لاحكة عالتعب
.. ميخالف ماما عود من تولدين وتكومين على حيلج
رجعي استلمي الشغل من جديد
باوعت عليها وصدك كلامها الالام زادت
عندي هاي الايام
.........
شيماء
امي وضعها هاي الايام معاجبني صحتها صارت بالنازل
احاول اساعدها ولو بشي بسيط خطية هي هواي تعبت بحياتها علمود تعيشنا اني وخواتي
صرت كل يوم اروح لبيت ام رائد اساعدها بشغل البيت
بالحقيقة ام رائد متسوي اي شي حتى الطبخ عافته علية
خطية امي معلمتني على كلشي تنظيف طبخ حتى حلويات علمتني اسوي
وام رائد مرتاحة لشغلي
حاولت بقدر الامكان ما اخليها تشتكي من شغلي او تشوف علية تقصير حتى ما تضغط على امي وترجع تشتغل عندها
كلشي تمام ببيت ام رائد بس هاي الايام
ابو رائد نظراته صايرة مو راحة باتجاهي
كلما ادور وجهي الكاه يراقبني ويباوع علية من جوة لجوة بس اني اسوي نفسي غبية ومنتبهت عليه
بالاول فضلت اسكت بس ما اعرف شجاه صار يوم عن يوم يقترب مني
ويحاول يستغل اي فرصة حتى يلمحلي ويتحارش بنظراته او بالكلام جنت كلش اتضايق منه وصرت اتعامل وياه بحذر واحاول ما ابقى لوحدي بأي مكان جنت اصيح ليلى لو رائد يبقون يمي من اشتغل
رايحة لبيت ام رائد ومثل كل مرة متعودة ادخل اذا الكة بابهم مفتوح جان رائد يلعب بالدراجة الهوائية بالباب
سألته عن امه كال
.. امي وليلى طالعين لبيت جدي وماما كالت اذا اجتي شيماء خليها تدخل و تشوف شغلها بالبيت انتبهت سيارة ابوهم مو بالباب فرحت مموجود حتى اخذ راحتي بالشغل واخلص بسرعة وارجع للبيت
رحت دخلت حضرت المنظفات والماسحة ووصلة المسح طلعتهم وشكلت دشداشتي
وكعدت انظف واني مندمجة بالشغل وافكر بكلام صديقتي فيحاء راح تقدم على اعدادية التمريض مثل اختها الكبيرة
تكول اختي بعدها طالبة وصارت تضرب ابر للناس بالبيت وتاخذ ضغط وتضمد العمليات وتطلع للبيوت وجاي تحصل خير من الله
كمت اكلب الفكرة براسي اريد احجي وية امي ما دام خلصت الثالث متوسط حتى تقدملي على الاعداية التمريض واساعدها بمصرف البيت لان منا علما اخلص اعدادية وبعدها الكلية وتعالي علما استلم الشهادة وبعدين ياعونت الله منا علما احصل تعيين يعني يحتاجلي كم سنة حتى اكدر اشيل عن امي حمل البيت والمصرف
جنت ملتهية انظف وحسيت على حركة وراي التفتت وشهكت بخوف
عمو ابو رائد واكف متجي عالباب ويباوع علية جانت نظراته مقززة
نزلت ثوبي وعدلته بسرعة
وصرت امتمت بالحجي
.. هلو عمو محتاج شي
عض شفته واقترب مني
.. لا عمو مامحتاج شي بس اجيت انطيج هاي
باوعت بيده علاكة
جان يحجي وعيونه سافرت على طول جسمي يباوعلي بشراها بقيت واكفة جامدة بمكاني من الخوف لو يذبحوني ما يلكون قطرة دم بية
.. هاج اخذي البارحة شفت ثوب حلو واتخيلته عليج وما كدرت ما اشتريه الج
.. شكرا عمو ليش كلفت نفسك بس اني ما اريد
.. دخذيها اعتبريها هدية مني الج بس لا تكولين لام رائد عنها
.. لا عمو ما يحتاج اكللها لخالة لان اصلا ما راح اقبل اخذها
اقترب مني ولزمني من زندي
وقربني عليه وهمس
.. هو انتي وين صاحلج واحد يقدملج هدية
صيري حبابة وسمعي الكلام واخذيها خلي اشوفها عليج واوعدج بس تصرين حبابة وتطيعيني اغركج بالذهب والفلوس و...
ما انتظرته يكمل جانت انفاسه حارة
نترت ايدي منه جان لازمني قوية احس زندي يريد ينخلع من مكانه دفعته بالكوة وابتعدت عنه
كلي ارجف اجيت اتقيء من الخوف
كام يغلط
.. بنت الكلب لج انتي تدفعيني
اتجه علية يريد يلزمني
و فجاءة دخل رائد للمطبخ بس ما انتبه على وضعنا ولا حس راح للثلاجة وطلع دولكة ماي وكعد يشرب اجيت ابجي من الفرحة شفت ابو رائد ابتعد
وطلع من المطبخ بسرعة
اني ما انتظرت يطلع رائد من المطبخ
خفت خاف يرجع علية من يطلع ابنه
كبل طلعت من بيتهم اركض مثل الخبلة بدون ما التفت ورحت دخلت لبيتنا لاكتني امي
.. ها ماما شومة شبي وجهج مخطوف لونه ليش راجعة من وكت وشبيها انفاسج سريعة منو راكض وراج
بس شفت امي كدامي رحت ركض عليها وشمرت نفسي بحضنها وصرت ابجي واعيط وارجف من الخوف
مكدرت اتحمل اضم بكلبي اني متعودة شنو يصير وياي
اجي احجي لأمي
.. يمة دخيلك ربي شبيج شومة احجي منو وياج
جنت ابجي واناشغ وحجيت لأمي عن كلشي
باوعت علية لمتني لحضنها وصارت تبجي بحركة
.. سودة بوجهي يمة شومة انتي يصير وياج هشكل عمت عين الدنيا الله لا يوفقه بجاه الحبيب محمد
كون تنشل ايده المدها عليج الناقص العار
جانت تحجي وترجف بقهر
ام شيماء
مصيبة شيماء والله اندليت مكان كلبي من القهرة
ما اعرف شصار بية احس النار صارت تطلع من وجهي
شكد صعبة عالواحد من يشوف وصلة من كلبه يدنسونها ويلوثونها حسيت بطعم مر بحلكي
والله شعور ما ينوصف صعبة عالوحدة بينا تعرف ببنتها اتعرضت للتحرش
شكد مار علية ضيم وشكد شفت لوعات وقهر بحياتي بس مثل هاي اللوعة مامر علية
..انعل ابو الشغل لابو اليروحلهم وينظفلهم والعيشة كافلها الله بعد ما ترحين لبيتهم ولا تتقربين منهم
ورب الكعبة بس اشوفه اتفل بوجهه الناقص الحقير
الله كون يكسر ايده الي انمدت عليج
اباوع على امي خطية كامت تحجي وترجف من القهر
بس والله غصب عني كلتلها مكدرت اتحمل اسكت اكثر من هيج خفت يسويلي شي
ومن يومها لا اني ولا امي رحنا عتبنا لبيت ابو رائد ورة يومين دزت ام رائد ابنها حتى اجي اساعدها بس امي طلعتله وكالتله .. كول لامك شيماء بعد ما تجي تشتغل عندكم امها مريضة
امي فضلت السكوت ومتحجي لان تعرف كلش زين اذا حجت الناس كلها راح تذب الصوج بينا
لان ابو رائد معروف بالمنطقة واحنا مصارلنا هواي من انتقلنا لهنا بالمنطقة ونطلع احنا الغلط
راح رائد وبعدها اجتي ام رائد
طبعا تجي لان اني وامي هواي سادين عنها وفايدينها بالبيت والا هي كاضيتها كلة دياحة متدري بطبخ بكوي تنظيف ومن ترجع للبيت تلكة كلشي جاهز
دخلت وسلمت على امي وبيدها سلة فواكه وكالت هاي ابو رائد دزها الكم مخصوص ويسلم عليكم ويكول الحمد لله على سلامة ام شيماء
والله اشتاقينالكم
جانت امي تحجي وياها من ورة خشمها وكوة تجاوبها
.. الله يسلمج حبيبة ليش كلفتي نفسج
.. لا هذا واجب
دارت وجهة علية
.. اي صدك شيماء اشو هالايام متجين عدنا تساعديني
.. ماما مريضة ما اكدر اتركها وحدها
.. واذا امج مريضة خواتج موجودات يديرون بالهم عليها واحنا بيتنا هياته يم بيتكم يعني تكدرين تنظفين وترجعين
ام شيماء.. شوفي ام رائد شيماء بعد ما تطلع تنظف
ابوها ما يقبل يكول البنية كبرت وعيب طابة طالعة كل ساعة من البيت
ام رائد.. براحتكم اني حبيت افيدكم لان اعرف بيكم انتوا بحاجة الفلس
.. العيشة كافلها الله بعد شنسوي هذا حكم القوي عالضعيف
طلعت ام رائد وباوعت على امي احس بالذنب بأتجاهه
عميت عليها وسديت عليها باب رزقها
اجة بابا ودخل وصاح صبولي غدة
دخلت للمطبخ لكيت امي تكلي طماطة
حطتها بالصينية وحطت خبز وخضرة واني وياها اساعدها وصاحت للبنات
كعدنا كلنا ناكل وبابا ويانا جان ياكل وينافخ
.. ادري شنو ترة والله ملينا من الطماطة الكلي
.. احمد الله واشكره مو زين وحصلت اكل يعني هم ما تشتغل وهم كاعد تتشرط
شوف اثير سوي حسابك تطلع وتدورلك على شغل لان اني بطلت من بيت ابو رائد بعد ما اشتغل عندهم
لان صحتي انتكست
هو سمع حجي امي منا وهو حرك الدنيا على راسها
وكلب الصينية وظل يكفر ويغلط ويسب بأمي
وهي ساكتة منطقت بأي حرف بس تباوع بعيونها وتتحسب عليه
والله انمرد كلبي على امي بس ما بيدي شي اقدمه الهة واشيل عنها اباوع على خواتي خايفات كل وحدة ماخذة صفحة وتباوع بعيونها مروة جانت لازمة كتابها وحاطة ايدها على اذاناتها خطية هي حتى بالعطلة تدرس
وضحى واكفة بزاوية وتاكل بأظافرها بخوف التفتت ادور على هدى ماكو غمضت عيوني واتذكرت هدى كلما يتعاركون امي وابوي خطية تطلع من البيت وتوكف يم باب الشارع تخاف من بابا اذا يعصب حتى ضرب يكوم يضرب ظل يصيح
.. شوكت الله يخلصني منكم وارتاح انتوا الله خالقكم بس علة على گلبي
وطلع من البيت بعدما كلبه جحيم علينا
اباوع لأمي ساكتة متحجي اي اشي بس دموعها تصب جرت حسرة وباوعت للبنات مسحت دموعها
.. شومة يمة كومي حمي الطماطة لخواتج خطية ما لحكو يتغدون من ورة ابوج سواه سم عليهم
كمت اخذت طاوة الطماطة وحميتها وحطيتها بالصينية وامي صاحت للبنات .. تعالن يمة اكلولكم لكمة مو زين تظلون على لحم بطنكم
اجوي البنات بس هدى ماكو رحت مديت راسي من الباب حتى اصيحها تجي تاكل بس ماكو
رجعت وكلت لأمي هدى ماكو بالباب
.. كومي ماما ضحاوي لبسي نعالج وروحي شوفي اختج وين ولت
راحت ضحى تدور عليها شوية ورجعت
.. ماما دورت عليها ماكو ملكيتها رحت يم بيت ام قاسم عبالي تلعب وية بناتهم هم ما لكيتها
كامت امي ولبست عباتها وطلعت تدور هي وضحى على هدى
ورجعت امي وهدى ماكو جانت خايفة
وكلساعة تلزم بطنها موجوعة
.. شلون بية صخام وجهي ولكم اختكم ماكوا
مروة.. لتخافين عليها متضيع ولا يصير بيها شي بزونة بسبع ارواح اصلا اليخطفها يرجعها عليج يوم ثاني من ورة السانها ووكاحتها
.. لج غمة هاي بدال ما تكومين تدورين ويانا على اختج
جانت امي تحجي واندك الباب كبل ركضت بسرعة افتح الباب
وجان اشوف هدى
.. لج جنية وين جنتي كلبنا الدنيا ندور عليج وانتي ماكو
جانت رافعة راسها تباوع على شيماء ورموشها الكثيفات يرفرفن على وجنتها
.. جنت ببيت خالة ام غائد اتغدة وية غائد وليلى
اي صدك احنا دورنا بكل الاماكن ونسينا بيت ام رائد ما اجة على بالنا هدى تروح عندهم
جرتها امي وحضنتها وبنفس الوكت ترزل بيها
.. لج والله اذا بعد عدتيها اشلع اذاناتج
رجعنا كعدنا نكمل غدة وامي تثلم بالخبزة وتوكل بهدى
هدى.. ماما ما اغيد اكل اني اتغديت وية غائد هناك
ببيتهم
.. ماما هدى سمعيني زين بعد ما ترحين لبيت ام رائد عيب ماما
هدى.. اي بس اغوح اتغدة عندهم
امي ابتسمت على برائتها
.. لا حتى غدة ما تتغدين عندهم احنا هنا نسوي غدة وتاكلين ويانا
.. لا ماما اكلهم طيب بي لحم هواي وعندهم تلفزيون اباوع وياهم كاغتون جوغجي ( كارتون جورجي )
وغائد ينطيني حلويات
مروة.. يالله هاج استلمي وانت صارلج ساعة تدورين خايفة عليها والست رايحة تشبع بطنها
امي سكتت واحتارت شلون تجاوب طفلة وتمنعها من شي تعتبره من حقها
الاطفال يعتبرون كلشي يكدرون يوصلونه يعتبرونه متاح الهم وهلشي من حقهم
اندك الباب وراحت ضحى تشوف منو
فاتت ام فرزدق محملة بالمسواك اتعودنا عليها كل يوم تجينا وتسأل عنا وتكعد وية امي ويسولفون ويشربون جاي كل يوم عصرية ام فرزدق صارت شخص مالنا غنة عنها
احس امي ترتاح من تكعد يمنا
سلمت عليها
.. هلا ببناتي تعالو شوفو شنو جبتلكم
تجمعنا حولها وفتحنا العلاليك بفرحة جانت جايبة لكل وحدة بينا ثوب
طرنا من الفرح بس هدى خطية بدلتها كانت جبيرة عليها
ام فرزدق.. ادري هي مو عمرها ٥-٦سنوات اني كلت للولد اريد بدلة مال عمر ٦ وهاي قياس مال ستة
ام شيماء وهي تضحك.. اي مو نسيت اكلج هدى سنفورة ناعمة بالكوة تطول
ضحى.. اي خالة طولها شبر
هدى.. شبغ بعينج عوبة
هدى عندها لدغة بحرف الراء وجانت دائماً تتجنب نطق الكلمات الي بيها حرف راء تستحي منها
ام فرزدق .. يمة فدوة للترتل بلسانها
دنكت راسها مستحية من ام فرزدق
مروة.. شوف شوف والله وعندها حركات بعد وتخجل
هدى.. ماما صيحي على بناتج شوفيهم يعيبون علية
سحبتها ام فرزدق وحطتها بحضنها
.. والله يغارون منج لان حلوة
طلعت السانها وكعدت تسوي بيدها حركة الحنيصة للبنات
اباوع لام فرزدق لزمت كف هدى الصغير وظلت تباوع عليه
ام شيماء انتبهت على حركة ام فرزدق
.. ها خالة بعدج تتنبئين بقراءة الكف
ام فرزدق ضحكت .. والله يمة مرات تصير عندي بصيرة واقرة ومرات كلشي ما اشوف وتصعب علية القراءة
رجعت تباوع على ايد هدى وكالت
.. هاي البنية الله مبارك بيها وعندها نفحة رحمان بوجها
وبركة من الله بس يامكثر عثراتها
هدى.. اي خالة اني كلساعة اعثغ (اعثر) واطيح
ابتسمت ام فرزدق على برائتها
طفرت هدى من مكانها بس سمعت الباب اندك وصوت بنت ام قاسم تصيح عليها من ورة الباب راحت تركض
ام شيماء.. ها خير وين مولية
.. اغيد العب وية البنات حلية
.. مو ترحين بعيد بس امد راسي الكاج بالباب
.. اي ماما
البنات بس عرفوا ب ام فرزدق تقرة الكف راحو كعدوا يمها بلهفة ويسمعونها شنو تحجي بأهتمام
ضحى مدت ايدها بلهفة
.. خالة خالة اني اني اقريلي الكف مثل هدى
ام شيماء تضحك على شكل بناتها
.. لج ضحيوة بعدج هالكدود وتدورين قراءة كف
ضحكت ام فرزدق .. حبيبة خليها
تعالي خلي اقرالج
لزمت ايدها وباوعت عليها وكلتلها
.. انتي خالة التردينه يجرالج وتوصلين بس تلكين بابه مسدود لا انتي طايلة سما ولا انتي طايلة ارض
ضحى ظلت تباوع عليها بدون فهم
.. يالله كومي منا هاي اني قريتلج كفج
مروة.. واني خالة الله عليج اقريلي همين شوفيني شصير بالمستقبل
.. لزمت ايدها وباوعت على كفها وصارت تكلب بيه شوفي انتي الزرع الزرعتيه تحصدينه وراح تكونين حايط ينسند عليه
مروة .. يعني شنو حايط
.. يعني تكونين سند لخواتج
ظلن البنات يضحكون على الكلام ام فرزدق
شيماء.. خالة كولي غيرها عفتي الناس كلها ملكيتي غير مروة هي كلاص ماي ما تنطي لو تشوفنا نرافس واربعة وعشرين ساعة تبجي بوجه الله
ضحى .. اي صدك خالة اني ذاك اليوم اكللها انطيني شوية جبس ما قبلت وطردتني من الغرفة
مروة.. والله الي عنده هيج خوات وحوش مثلكم حرام عليه يحن عليكم
ام شيماء.. يالله هاج استلمي ام فرزدق وتكلي حايط وسند هههههه
شيماء التفتت على ام فرزدق
.. خالة عفية واني نسيتيني اقريلي هماتين مثلهم
.. تعالي يمة شومة خلي اقرالج بقت عليج قابل
لزمت كف ايدها
.. شوفي يا حلوة انتي تشيلين حمل مطروح مو الج وطريقج كلش طويل
كان كل كلام ام فرزدق الغاز مفهمنا عليه
ام شيماء.. يمة شومة اخذي خواتج وطلعي عندي حجاية وية خالتج
ضحى. ماما من شفتج وشفتيني تطردين بينا
.. امشي ثولة شوف اللسان صاير شطوله
طلعوا البنات وكعدت ام شيماء تحجي لام فرزدق على سواية ابو رائد وية بنتها
ام فرزدق.. والله زين تسوين بطلتي من الشغل
الله ستر زين ما سوة بالبنية شي الله يسود وجهه على هالسواية
.. بطلت بعد ما اروح
احفظ مالك ولاتخون جارك والعيشة كافلها الله نموت من الجوع ولا العار يلحكنا وينهشون بلحمنا
ام فرزدق.. شوفي خالة على طاري العيشة اني ذاك اليوم من رحت لبيت ابو قاسم ابن عم فرزدق سمعت مرته كالت نريد حارس
لان ساطي عليهم حرامي وابو قاسم كام يخاف على بناته وابنه هيج سمعتهم بالله خلي اتأكدلج عينوا حارس لو بعدهم حتى اذا بعدهم اكللهم على اثير رجلج بلكي يشغلونه
.. والله خالة ياريت تسوين فضل ما انساه الج
واجوي البنات بيدهم صينية الجاي والكعك صبو جاي وكعدو ياكلون كعك وجاي
ام فرزدق.. يمة البنات عشرة واكول قليلات
يمة البنات صاغهن الصايغ ومات
هاي كلمات ام فرزدق كلما تشوف البنات ترفع معنوياتهم وتسندهم حتى لو بس بالكلام
جانوا يسولفون ويضحكون ومروة همست للبنات
.. اكلكم انتوا صدكتوا كلام ام فرزدق
ضحى.. اصلا اني كلشي مفتهمت
شيماء.. شبيكم خالة دتاخذنا على كد عقلنا وتحجيلنا هذا الحجي حتى هدى تصير عاقلة
وعلى طاري هدى سمعوا صرختها العالية كمزوا من مكانهم مفزوعات
ام شيماء.. يمة شومة ركضي شوفي اختج شبيها
فتحت شيماء الباب وجان تدخللهم هدى ودمها بطولها
.. يمة يا ستار بنيتي
يتبع