ناراحيدرة

part 30

رواية ''''نــاراحــيدرة''

////بقلم نمارق رحيم ////

بارت _30

وبعدها اجه يكلي؟
اخ منج ،
مرّة كتلج حيل فحطان بظروفي ..
ومرّة كتلج نار كبّرة بوسط روحي !
ومرّة كتلج خلهم يغارون مني ..
وياج احس بنفسي اقوة ..
ليش طفيتي الچمر بعيوني گوة ؟
وليش كدام البشر صرتيلي نَزوة !
وليش فرعتي الحجي وصار الميسوة !
وليش سويتيني غنوة !
ياما كتلج والله احس بنفسي حيل وياج اقوة .

⭐⭐⭐⭐⭐⭐⭐⭐⭐

رجعت الصورة للملف واخذته، وطلعت من المكتب امشي بسرعة والف حسبه ابالي ركبت سيارتي  ورجعت للبيت من وصلت دخلت للبيت لاگاني حسن

حسن:- هاا وين چنت  اتصلت عليك هواي ما رديت

-چنت بالشغل صاير شيء بغيابي؟؟..

-اي اجه صديقك قبل شوي..

- منو بيهم؟؟..

-عثمان..

-اها اي نسيت اخابره تمام هسه اشوفه شيريد..

كملت طريقي بٲستعجال للغرفة ( امي ) دخلت وگعدت يمها..

-هاا حجيه گاعدة..

عدلت گعدتها وگالت اي هله يمة..

ظليت ساكت متردد افتح الموضوع لو لا تالي گالتلي.. خيرك حيدرة احسك عندك چلمات تريد تحچيها لاتضم يمه احچيلي..

-عندي موضوع رايد استفسر منه هو مو موضوع الا سالفة قديمة بس چبيرة وصارلي فترة دايخ بيها وقلقان لا يطلع شكي بمحله!

-ان شاءلله خير حچي يمة اسمعنك گول..

بهالاثناء دخلت ناردين للغرفة ظليت ساكت..

ناردين:- هاا انت اهنا يمتى اجيت؟

-ناري بويه عوفينا شوي عندي سالفة وياها..

ناردين:- اها تمام لعد اسفة قاطعتكم..

دخلت طيبة گالت حيدرة اندگ الباب اكو واحد يريدك ضروري..

قبضت ايدي بعصبية شلوون بلوة يا الله منين اجيبها من هلنار  لو من هلحمار الاجه بهالوقت..

-تمام يابه جاي هسه اطلعله..

ام حيدرة:- يمة وچلماتك؟..

-بعدين بعدين..

طلعت للكراج اعاين سيارة عثمان مصفوفه بالباب سألته شعندك جاي بباب بيتي؟..

عثمان:- لك حيدرة وينك شگد اتصلت عليك وماترد انت نسيت كاظم ولك..

-چنت مشغول ليش شبي..

-شوفلك حل وياا كاظم دخيل ربك من سافرت ليهسه وانت ما رايح لهذيج المنطقة..

-غير امس رجعت لبغداد جائز كاظم گايله لگيت شغل بغير محافظة ورح اتأخر هذا سبب خليته يصدگ بين ما اني ارجع من السفر..

-وانت عبالك يصدگ؟..

-ياكل تبن لا يصدك شسويله مخلفه وناسي.. 

-لا حيدرة لا امشي يلا ملابسك وهاي الأمور بسيارتي خليتهن بس اصعد..

-يابه رايح بس اسكت صرعتني بصوتك اگلك حبيبي چاا واسد شنو فلمه اخ يابه..

-ولك شبيك اخ واخ چنك حبلة رح تجيب حبيبي هسه انت اخلص من شخصية كشكول تالي ارجع لأسد يمعود..

-وفالح مادري صالح اخ..

-غير خلصنه من هلموضوع من چنت بلندن تم كلشي بعد انسدت وكلشي صار مثل ما خططناه لعد ليش ما گالك رائد..

-لا ما گالي ملتهي يتمعشگ هل سرسري..

-الله يساعده غير صارله اكثر من 5 سنوات يشتغل خل يشوف حياته صار عمره 35 وهو بعده اعزب..

-اي يتونس حبيبي خصم الحچي انت روح وانا رايح لكاظم بغير سيارة..

-اي زين عفية عليك روح من طريقنه المختصر خوش لحتى ما تتأخر..

-تمام..

-في امان الله..

-الله وياك..

رجعت دخلت جاي اسد بالباب چان اشوفها واكفة شافتني وانكمزت..

-هلا چنتي تسمعيني؟..

ناردين:- لا طبعاً..

-سمعتي كلامي انا وهو؟؟..

-لا..

-اها !

-منو هذا كاظم؟..

-شنو هالتصرف ليش واكفة تسمعين كلامي مو گلتلچ شغلي خليچ بعيدة عنه..

-هيچ والله طكني فضول وسمعتكم تحجون..

-منين طكچ؟..

-اهوو هسه شصار ليش تصيح عليه شكلتلگ اعصابك اوووي..

-انتي تخلين واحد عنده عقل سالم ما تتحملين يعبر يوم اذا ما مسوتلچ فد فاينه من فواينچ ومشاكلچ الما تخلص

-ريلاكس اوووي..

شردت بسرعة ركضت واني اضحك صعدت للغرفة واني احچي بصوت مسموع..

اموت واعرف هذول اصدقائة منو همه؟ وكاظم منو عثمان منو وشنو ديشتغل..

يربي چان دكتور شحلاته، اشو گلب صار من جماعة مافيا !.

هيه هاي العايزه و يطلع من المافيا، عزا يطلع يتشغل بالسوق الاسود يبيع و يتجار بالاعضاء الناس، يا اصخام بوجهي بس لا صدگ

داحچي چان التفت وانخرعت خرعه من شفته واكف وراي وطخيت بيده من المسافه القربية

-يا يمه دخيلك ربي بسم الله قل اعوذ برب الفلق شنيييه من طلعتلي..

ضحك وگال.. ماتدرين بيه انا جني متنقل..

-ياا صدگ لا لا عفية لا تحچي هيچي والنبي اخاف تره عزه وانوب اطلع متزوجة جني..

-بس حلو ينطلع بي..

-اي غير انت عسل على المربى، لوز على الكعك، سمسم على الكليچه..

-على خر* *

-مو وجه غزل دروح اوووي..

-ولج كافي گلبي رچيچ..

-شسويت؟..

-وتسأل اخخ يابه اخخخخ..

راح للكنتور طلع علاگه بيهاا ملابس سألته شنوو راح تتبرع بيهن؟..

-اي اشوف فد واحد حمار يلبسهن..

-اكلك شي..

-لا..

-كلمة وحدة..

-هل كلمة الوحدة رح اتصير سيناريو فلم كامل..

ضحكت حيل دار عليه وظل يضحك وگال..

-گولي يابه غردي لا تبقى حسره بگلبچ..

-حلو من تصير عصبي..

-اخ يمته صاير انا عصبي..

-صارلك ساعة تحچي بأعصاب چنك طماطة معصبة..

-ترى بعدني هادئ يابه وطماطة طلعت نوب نعم الله عليچ..

قفل الكنتور وراح للميز فتحه تالي باوعلي بنظرات شك سألني فاتحة الميز صح؟..

-لا منو الگلك..

-شميت ايدي وعرفت جاوبي فاتحته ها؟..تره واضح فاتحته انتي..

-اي شسمه بالغلط وما لزمت شي..

هز راسه طلع مفتاح ثاني وقفله تقرب مني ولزم ايديه اثنيهن..

-ناري الكنتور والميز خط احمر لا تفكرين مجرد تفكير تفتحيهم صيري عاقله ولا تلعبين بكيفج ملفاتي كلها مهمه وياا بختج تفتحين واحد..

-اي خووش..

عافني وطلع صرت افرك بأيدي بضوجة واعيب بلساني عليه واقلده ملفااتي مهمة ويا بختج مهمة مهمة دروح اوووي..

واحد حقير بس ياطركاعة گلبي الي نبض اله.. سمعت موبايلي يرن فتحته وشفت المتصل ( نبراس )

بسرعة گلبي انقهر مجرد ما شفت اسمها اتذكرت ليله البارحة والصدمة رديت عليها هاا هلا حبيبتي..

-ولچ ناررردين رح اموووت والقران ما بيه حيييل بعد..

-يا گلبي شكوو ولچ يخبله شنوو شبيج لا تخوفيني عليچ..

-ناردين اخوي لج اخوي يجي للبيت يكعد يمنه مثل الخطار مثل الغريب ما يخليني حتئ الزم ايده ،اخلي ايدي علئ چتفه يبعدها ما چنه هذاك الچنت انام بحضنه هسه يگلي كلشي اتغير ..صار اخو بس غريب حاله حال الغرررريب

دمعت عيوني بحرگه وبچيت.. شنسوي يا عمري هذا قدرنه هذا مكتوب النه وما عدنه اعتراض على حكم ربنه رغم الي صار كلش قوي على گلبنه بعد 19 سنه من حياتنه والسنين الگضت هسه يلا عرفنه اهلنه طلعنه يتيمات منصغرنه .. امنه وابونه ماتوو من چنه اطفال وعافونه عند عائله اعتبرناها عائلتنه..

-والله ما همني اعرف امي اصلاً سعاد بعد السوته بينه علمود لؤي اعتبرتها غريبة فلاا اگولها ماما لأنو ما تستحق

-هيه وينها بالبيت يمچن لو لا؟؟..

-لا ببيت خوالنه هه اقصد اخونها..

- لج نبراس حتئ لؤي مو ابن خالنه و هيه تدري من سنين و كل التحرشات تشوفها و تسكت و تدري غريب و حرام وتسكتت وخلتني اسكت چنت اخاف منها لان تضربني الله ينتقم منه ، وحسبي الله و نعم الوكيل بيهاا

- اي شوفي شلون ما تستحي ابد ضلت ساكتة وكل يوم تكرهنه بحياتنه، هو حتى بابا ليش جان ساكت ما گال؟ ،،ما اريد احد اقربله بس اخواني و انتو خواتي و ابوي

-الله كريم خيه مصطفى ونور وينهم شلونهم؟؟

-نور نامت قبل شوي لان البارحة كلها ما نمنه وكضيناها بس بچي واليوم الصبح اجه سالار هو وحماچ حسن سولفو لمصطفى هم خطية انصدم وظل يضحك عباله دنشاقه وياا ولحد الان ما مستوعب الگالوا اله

-اي مو احسن من حالنه..

تنهدت :- صدك ناردين البارحة و احنه نحچي اني و نور و نتذكر ماضيينه خطر علينه سؤال علئ ابونه اقصد بابا جاسم

گالت ابوي و اتذكرت البارحة اني من خابرت امس امي عليه وحيدرة گالي راح اكلج منو الدعمه وچنت حيل منهارة.. تالي من اجو خواتي وسالار وبدو يحچون فاجئونه من كالو هيچ ابد ما جنت متوقعه السر هذا فلا اجه علئ بالي هيج شيء ونسيت سالفة الگاتل بابا

-الوو وينچ ناردين وياي!!

-هاا اي وياچ..

-داكلج ما عرفنه كاتل ابونه مرت سنة واحنه القضية سادينها ومحد فتح السالفة

-اي صح، اگلچ بعدين احاچيچ يصيحولي..

-تمام حبيبتي الله وياچ..

سديته منها عفت الموبايل بسرعة ونزلت جوا اصيح حيدراا وينك حيدراا..

طيبة:- حيدرة طلع قبل شوي..

ضربت راسي بغباء ونسيان..اي صح نسيت

طيبة:- ليش شبيج شنو صار..

-لا ماكو بس نسى شيء من اغراضه وردت انطياه يلا لعد صاعدة للغرفة..

-تمام حبيبتي..

صعدت وسديت الباب.. بچيت بصوت واني اصيح واعض اصابعي:- شلوون نسييت شلوون !!

البارحة التهيت بالسالفة ونسيت اسأل حيدرة
هوو كال اعرف الداعم منو بسرعة اخذت موبايلي ومسحت دموعي واتصلت

رن وطول يلا رد :- ها ناردين..

-تعال للبيت هسسسه هسسسسه..

حيدرة:- ليش شكوو صايرلج شي؟ احجي!

-تعال وتعررف لا تتأخر..

حيدرة:- تمام رح ارجع هو انا بالطريق هسه..

-تمام انتظرررك..

غلقته وشمرت الموبايل وگعدت على الارض لميت رجليه لصدري وصرت ابچي بقوة.. كلشي اتجمع ببالي..

موت ابوي، يوم زواجنا المشؤوم ،العملية، تعامل سالار،ألم اختي التؤام ،اهلي الحقيقين، موت لؤي،

صرت ابچي ابچي حييل حسيت روحي رح تطلع من البچي الچنت حابسته بگلبي وكاتمته طلعته بالبچي..

تالي ضحكت ودموعي على خدي.. وهمست تهون.. وتعدي.. ورح تجي ايام حلووة..

لؤي الله اخذ حقي منه وسعاد  ارتاحيت منها ومن ظلمها .. صفنت على المرايا وگمت ايدي صارت على وجهي ظليت مركزة بملامحي اه شگد متغيره يا ناردين !

انفتح الباب وچان يدخل ويشوفني بهاي الحالة تخبل واجه گال بأهتمام وقلق.. يا ناري شكوو شصاير جاي تبچين؟؟..

-اي ابچي عليك..

-بعدني ما ميت..

-ليش ما جاوبتني..

رفع حاجبه وگال توني اجيت جواب شنو؟..

-منو الداعم بابا؟..

ألتفت ما جاوبني.. شبيك دا احجي وياك ماعبرني جاوب وها لا تگول ما اعرف منو الداعم لأن تدري وتعرفه متأكدددة !!

-لا غلطانة ما اعرف..

-انت امس كلتلي تعرف..

-گعدي احچي وياج..

كعدت اجه كعد يمي ،:- اي احچي

-اسمعي انا عبالي الكاتل ابوج لؤي بس طلع مو هو والكائنات

-منو لعد؟

-ما اعرف

-امي من خابرتني كالت ابوك هو الداعم!!

-ما اعرف..

-يعني صح كلامها ؟؟

-جاي اكلج ما اعرف ناردين!..

-ابوك وينه؟ ولا مرة شفته ليش ما اجه ليش ما تحجي وياا ؟؟؟؟

-هذا ما اسمي أب من سنين مالي علاقة بي

-ليش؟؟

-بسبب سوالفه؟؟

-يعني قصدك سوالف مكسرة وياكم!..

-اي بالضبط.. 

-وليش ما حاسبته؟ ما دافتهم من جهه عندك اي شخص تقتله لو تحبسه وابوك عادي! زيش ماسويت شيء مادافتهمك حيدرة

- مو بسهولة ناردين انتي شنو عبالج انا رئيس العراق مثلاً والسلطة بيدي؟

- انت بس فهمني شغله وحدة بحياتي ما لحيت علئ شيء بس شغلك اريد اعرف شدا تشتغل؟؟

-شنو شغلي مثلاً ، تدرين بيه دكتور

-دكتور؟ هههه لعد ليش ما تروح للعيادة مالتك؟

-منو كلج ما جاي اروح؟؟..

-ما اشوفك مهتم وما ذكرتها اصلا من نخطبنه لهذا اليوم مغلس عليها!..

-ارجع واكول لاتدخليين بشغلي ابقي بعيدة عن هذا الموضوع بذات وهي تصفى وتنحل..

-وابوي!..

تنهد وتمدد على الچرباية وگال..
- تعبااان هواي تعبااان..

-اني اكثر!

- اريد ارتااح يناري حمل البگلبي مو شوي وعقلي ماجاي يفرغ من التفكير صرعني والمصايب والمشاكل تجيني بكد شعر راسي

-ليش ما تفتحلي گلبك؟..

-صعب..

-ليش؟

- انتي متصورة اكلج يابه هيج شغلي وهيج اسوي وهذا الكتل ابوج بسهولة!..

-يعني انت تدري الكاتل ابوي منو؟

-اي ادري!!!

-منووووووو! لا تلعب بأعصابي حيدرااا! 

-ما رح تسوين شيء ولا تغيرين اذا اكلج وتعرفينه..

-اريد اعرف الي دعمه تحاسب او لا !

-چان بالسجن تالي طلع برشوه..

- شنوو ما فهمت؟؟

-بعدين تفهمين بويه هسه تعبان وعلي خل انام ساعة واكعد اذا اتأخر كعديني..

-هيج صاررت! تمام حيدرا..

حيدرة

طلعت وطبگت الباب قوي ضحكت على اعصابها وتنهدت وجريت نفس طووويل.. فركت راسي .. حتى لو اگول الها الداعم منو ما رح اتغير شي

ما جانت الصورة واضحة لأنها صورة قديمة حييل صعب اتعرف على صاحبة الصورة منو لذلك سكتت بالي مشغول حيل من الأسم معقولة صدفة ؟ وتشابهة بالاسماء؟؟

لازم الگا ابوي لاززم وضروري لأنه الوحيد الي يعرف كلشي بالي صار بالماضي! 

دك موبايلي المتصل ( سالار ) جاوبته..

-حيدرة مو كلت ندور على اهلهن اشو بعدك ساكت على الموضوع؟؟

-حبيبي سالار كتلك خاي الموضوع عليه ويجيك الصافي فد اسبوعين..

-لكن هواي!

-غير جاي ابحث قابل شبيگ لبيگ وعرفت اهلها

-تمام انا خواتي ما اكدر ابقى يمهن اكثر بعد! جاي اتعذب حيدرة…

-اخ ياخوي تفرج ان شاءالله انت وينك حالياً ؟؟

-بـ بيتنه..

-چنت الصبح ببيتي ليش رجعت؟

-اي رجعت خوب ما ابقى يمكم قابل مخلفيني وناسيني زحمة خويه..

-يا عيب لك صدك تحجي من شوكت هالسوالف ما بيناتنه ترى يمعود تعاال بروح العزاز..

-لكن شلون؟ والبيت يضل فارغ؟

-چاا مصطفى اخوك وينه؟

-بـ بيت امجد ابن عمي..

-تعال بليل لا اجي عليك غصب…

ضحك وگال.. تمام ان شاءالله

سديته منه لازم الگا حل لأخواته ما يصير يظل معلك هيج اجه ابالي رائد! رئستاً اتصلت عليه

-اكلك انت مو رايد نور وتگولي احبها؟

-اي احبها والحسين

-ليش ما تجي تخطبها؟

-رايد من زمان، بس شايل هم لا ترفض لأنها ما تحبني ابد حتئ من احچي وياها ما تحملني بت اللذين

-كول يا الله انا وياك

-هاي شنوو واضح التتطورات انت وياي متأكد؟؟

- اتوكل جيب اهلك وتعال اخطبها لا تضيع وقت على الفاضي تالي تروح من ايدك وتنخطب لغيرك..

-افااا اكسر راس الخلفوه الي ياخذها مني يا بيت؟؟

-بيت ابوها..

-واذا ماقبلوا بيه؟ اكيد هي رح اطلع ألف مليون عذر واسباب

-لا وربك تقبل تقبل خلي موافقتها عليه..

-لعد ما اصدك من باجر جاي والله العظيم..

سديته منه لاززم خواته ما يبقن بالبيت لان هواي اشياء رح اتصير وما اريد يتأذن بسببها وسالار يروح لأربيل وياخذ مصطفى ويا افضل وتبقئ بس نبراس اشوفلها حل

...

ناردين

كاعدة بالمطبخ نزل حيدرة سألته وين

حيدرة :- طالع ليش رايدة شيء؟

-لا بس ما تتعشه؟

حسن:- اي طلعيله الروبة المشگره

طيبة:- لا ذبيتها بالزبل حشاكم ما تنوكل هههههه

ابتسم وهز راسه وگال لا ما رايد عشه اتعشه بره

اجت امه تمشي على العكازة وگالتله وين رايح؟

حيدرة:- ها محتاجة شيء؟..

- ما توديني للدكتور؟

حيدرة :- ليش متأذية من شيء؟..

- يشوف رگبتي بلكت طابت ياله

-ماكو دكتور يفتح بالمغربية هاي هسه بعدين باچر اخذچ الصبح مجرد فحص مو ضروري ادري

-چاا خووش

رجعت للغرفة وهو طلع عفت الي بيدي ورحت وراه..

حيدرة:- ها ؟؟

-اشتريلي شي وياك..

-تأمرين شنو مشتهية؟

-مشتهية حلا جيبلي نساتل..

-نستلة وتاكل نستلة طرگاعا..

ضحكت وسكتت..

-ناري مساع مو چنتي تبجين ؟؟
-وانت مساع مو چنت معصب؟؟
-شلون يعني ما اهدئ؟؟
-وشلون يعني ما اضحك؟؟

-ههههههه يااابه لك فدوا

-مو تنسه النساتل..

ضحك وجاوبني لا ما انساچ..

سد الباب ورجعت دخلت گعدت يم امه واجت طيبة جريتها من ايدها لحتى تكعد يمنه ما قبلت

-شبيچ ليش ما تحچين وياا امچ؟؟

طيبة:- رجاءً لا تتدخلين بيه ناردين..

-هاا على راحتچ..

راحت التفت لعمتي شفتها تبچي :- يا خاله ما اعرف يا عمه المهم شبيچ تبچين من وره طيبة موو ؟

- بكيفج اثنيهم ، ياله

- لعد ليش

سكتت ،تالي كالت :- تعاي حبوبه اكعدي يمي حداي

كعدت يمها بقت تسولغلي علئ حيدرة من جان صغير و اني خربانة ضحك چان بس يخوزر ويعصب على لا شيء وكبر ونفس طبعة ما اتغير

- بس حبوبه گلبه طيب ما يتمنئ الشر لواحد و اهواي يساعد الناس يساعد الكل

- خاله ليش صارت مشاكل بينكم وشنو هيه ؟ وليش ماتحچون

- ما اكدر احچيلچ السالفه عبن خافن ما يقبل لأنهو موصيني ما اگولن لواحد

- هاا خوش

- لا تتضايگين يمة

- لا ما تضايقت ولا زعلت

كحت ، :- صحه صحه هسه اجيبلج مي

كمت جبتلها كلاص مي دافي صبيتلها و انطيتها ،اخذته مني و ما عافت ايدي

- هاا خاله عمه ايدي ايدي

عافت ايدي وگالت بتنهد :- الوحمه الي بيدچ ذكرتني بوحده غاليه عليه

- ها و منو هيه ؟

- ما تعرفينها حبوبه بس كولي الله يرحمها .

- شنو ميته !

- اي من سنين ماتت ،بس بعدني اتذكر كلش زين ايدها وانتي ايدج اليمنه مثل وحمتها

- هاا الله يرحمة

- امين

حسيتها اتذكرت وانقهرت حيل تالي اذن المغرب فرشتلها السجادة للصلاة كالت.. يمة مااكدر ادنگ

-شلون تصلين چا..

-انه وكاعدة واروحن فدوه للچا وصاحبتهه..

-ياروحي خاله فدوا لگلبچ..

جبتلها كرسي وطبلة خليتلها التربه والسبحة ورحت توضيت وصلينه سوه ..

دخل حيدرة ورگع الباب قوي اجه عصبي ما اعرفت شبي صعد بسرعة للغرفة اخترعت ولحكته وصعدت ورا !!

شفته خلا اوراق بالكنتور ورفع موبايله وخابر وهو يگول رائد لا تجي باچر اجل الموضوع بعدين..

سكت تالي كمل كلامة :- اي صارت شغله جديدة رووح للمركز باجر اجي انا اي يالله الله ويااك

سويت روحي توني دخلت وما سمعت شيء وبسرعة سألته ليش اجيت معصب صاير شيء وياك؟؟..

بسرعة شكر الغراض من ميز المرايا..اخترعت من صوت الغراض التكسرن ياا شبييك حيدرررا !

دفعني وهو يكول شششش ولا حررف ولا كلمة

طلعني من الغرفة وسد الباب قفلة اسمع بس صوت التكسير !

اجت طيبة على الصوت وگالت ياا عززززه شبي اخوي!!

-ما اعرف والله علمي علمچ! خايفة عليه لا يسوي شي من ورا عصبيته!

صعد حسن يريد يدخل لغرفته من شافنه اجه يمنه

حسن :- شنو هدا الصوت ؟

-حيدرة سد الباب وديكسر

حسن :- هاا تمام روحن لا تخافن مابي شيء هسه يهدئ..

طيبة :- اريد اعرف شبي شنو سبب غضبه؟

حسن :- روحن سون العشه جوعان

راح دگ الباب گال افتح انا حساني شوي وفتحله دخل وسد الباب ..

ناردين:- شنوو صاير غرريب؟

طيبة:- ما اعرف، بس مو جديدة هو هيج من زمان مرات يجي ضايج وروحه صاعده لخشمه يسد الباب ويطلع قهره بالغراض وثاني يوم يجيب غيرهن وهكذا

- ياا خبالوو خبالوو

طيبة:- اي والله صدگي قبل سنة اجه ضايج بس حييل يعني مو مثل كل مره لا حيل وكانت قوية دخل للغرفة وفلشها تفلش لا ضلت چرباية صاحية لا كنتور استلم منه كسرها تكسر

-ياا وتالي شنوو؟؟

-ثاني يوم شمرها وجاب اثاث جديد..

-نوب يگلولي مخبله طلع هو اضرب مني..

-لاااااااا مو مخبل اخوي بس يعصب ترى!!

ضحكت متفاجئة من ردة فعلها وگلتلها اي ترى اشاقة شدعوا !

سكتت وراحت سوت عشه وساعدتها تعشينه كلنه وهو بعده بالغرفة ما نزل كال حسن مايريد ياكل

اندگ الباب من خلصنه عشه راح حسن فتح الباب دخل هو وسالار كعدو بالهول كعدت يمهم جانت طيبة بالمطبخ تغسل بالمواعين ما تدري

چان تدخل هيه وبيدها صينيه كلاصات و قوري چاي، دخلت تضحك دارت وجها وشافت سالار اخترعت و طاحت الصينيه من ايدها

همزين ما احتركت وانصلخت من الچاي لان حار بسرعة طلعت تركض ما تدري بسالار موجود وما لابسه حجاب دخلت بدشداشتها ..

دنك سالار ما باوعلها ،گال لحسن :- اسسف اروح الظاهر ما ماخذين راحتكم

حسن :- لااا هي دخلت وماتدري بيك وجنت انت مدنگ تحجي وياي ما شفتها وبعدين هي مثل اختك شسالفه خويه

سكت ماحچه شيء ..سالاو طبيعته هادئ و يحچي بهدوء كلش صوته مو عالي حتئ اذا عصب ما يصيح دائماً يسكت ما يحچي اهواي ، ومن يحچي يحچي بالتفاهم .

رحت لطيبة المطبخ شفتها ايدها علئ خدها وتبچي وعيونها وخدودها حمر

-يا شبيج طيوب صايرة طماطة..

- ولج شافني مفرعه انه اذا اطلع ما يلمحون مني شيء وهو شافني لا حجاب ولا ملابس مستورة

- قابل متعمده ديلا يمعودة عادي يابه وذا شسالفة مثل اخوج هو ،هذا حسن اكعد يمه وعادي بملابسي ودشداشتي

- انتي ما متحجبه وعندج هلشي عادي

- شلون يعني الطم وياج ،ابقي ابجي رايحه اكنس الكزاز لا ننجرح

اخدت المكرافه ولميت الكزاز، اجه حسن اخذها مني :- عوفيها و روحي لغرفتج انه اشيل الكزاز

- ماشي

باوعت لسالار شافني و دار وجهه ..برطمت و رحت لطيبة

- يمعودة ما تسوه كل هلدموع

- فشله

- اكلج اشو انچبي اني جوعانة وهاي تبجي شنو ما بقئ شي من العشه ما زاد

سكتت ما ردت ..فتحت الثلاجة طلعت ماعون الكباب سويتلي لفه اكلتها
ورجعتلها اضحك عليها ..

نزل حيدرة ما يتحاچه نازل بس بالبنطرون وفانيله تعلاكة سودة وشعره مكفش وعيونه حمرر وايده مزلغه بيها اثار دم و خراميش سجين

تقربت منه وهو يم المغسله.. شبيها ايدك عود صدگ صاحي انت مسوي هيج بنفسسك؟..

جاوبني وهو يرص على اسنانه..
-لا انا مجنون لذلك ابعدي مني ..

غسل وطلع وصله شد جرح ايده بيها ..

- على اقل عقمها لا تلتهب مايصير حيدرا ؟

ما رد عليه وصاح بصوت عالي..
- طيــبةةةة روحي جيبي قميصي..

- عوفها مشغولة اني اروح اجيبها

صعدت جبته انطيته اله لبسه ودخل للهول كعد يم سالار..

مدري شديحجون وشنو دا يخططون؟ صاحلي دخلت..

سالار:- باجر رايح لأربيل

-شنوو ليش !

سالار :- نبراس رح تجي تبقئ يمج اما نور ومصطفى يرحون وياي فد شهر ونرجع لبغداد

-اهاا بكيفك اي روحووا..

طلعت ضايجة واحس بخنگه يمكن اكثر من شهر رح يبقون طلع واجوو ورا ساعة.. دخلت نبراس وبيدها الجنطة..

حيدرة:- انا الگلتله يجبها لحدما يرجع من شغلة وعملة

-اي افرح بيها اني..

سالار:- رايح ان شاءالله باجر اتوكل ناردين موبايلج يمج اتصلي عليه بكل وقت ترديني بي

هزيت راسي.. ماشي ما تقصر..

تنهد وطلع.. سلمت نبراس على طيبة واجت يمي ظليت شابگتها .. وحيدرة وحسن طلعوو بقينه بس احنا قررت تنام بغرفة طيبة وخلت ملابسها بكنتورها ..

وكعدنه نسولف ونحجي كعدت يمنه امه صارت الساعه 12 يلا دخلو اجو اثنينهم كعدو يمنه الهول ..

ونبراس اطكطك باصابعها ما متعودة علئ وجود حسن ويانه گعدت بصف حيدرة يحجي وياها وتباوعلي وتضحك..

غرت وكمت كعدت يمهم سألتهم ليش داتضحكون..

حيدرة:- شدخلچ؟

-لا والله؟ تعصب عليه وتضحك وياها !

حيدرة:- اضحك وياا اختي شعليج انتي؟

-حلووو

-شكد تحجين شوفي هدوء اختج مو مثلج بس تكمزين..

-مد ايدك..

باوعلي مستغرب وگال.. رايدة تبوسيها؟..

-اي مدهاااا..

خلا ايده بحضني رفعتها وعضييتتتتها حييل عاط بيه وظل يعصر بيها خزرته وگلتله مرة الثانية اذا ما تعدل اسلوبك اشوفك غير وجهة ترا انا ناردين ..

رغم جان معصب بس من سمعني ابتسم وطگها ضحكة وگال وهو يغمزلي.. ومو سهلة ناردين..

ناردين:- اي جا شلون يابه يلا انا گايمه عندي شغل اذا نعست اصعد نام بغرفتك تصبح على خير..

ظل يضحك ويگول لاتحاولين تقلديني تبقين ناري الوكحة..

حسن :- اي يمه شلونج شخبارج مشتاقلج

- الحمدلله يمه انت مشتاقلي شعجب؟

حسن :- اي والله بگد رحمة الله صارلي هواي ما شايفچ

-الصبح چنت يمي..

حسن :- مشتاق لهدوئج

- النهار كلها اصيح بيك وصوتي راح..

حسن :- ايباا الحجيه ما تفوتلها سالفه

-اعرفك اعرفك واعرف شنو تفكر حبوبه..

ضحكت على سوالفه باوعلي حيدرة وگال
-جيبيلي كلاص چاي..

-ما اشتغل عندك..

-شنو بعدج ضايجة شلون انراضي الحلو هسه..

-روح كسر غراضك وگلي لا تتدخلين بيه..

-جيبيلي جاي وانطيج نساتل..

-جبتهن يعني؟ عبالي نسيتهن..

-اي شلون انساچ نسيانچ صعب ترى..

-خوش بس ترى رح اصبلك علمود النساتل مالاتي مو علمودك..

-احلى من يصبلي چَا..

طيبة:- اروح وياج خاف ماتعرفين تسوين

-لا شسالفة اعرف بسيط الچاي..

كمت ودخلت للمطبخ طلعت الچاي والشكر تذوقته خاف يطلع ملح واتفشل طلعت الجداحة اشغل وافر بالعيون الطباخ ما يشتغل ..

كلت اصيح لطيبة احسن تالي كلت لا شسالفة هو جاي ادبرها ،، صرت اجرب بيهن كلهن واجدح بالجداحه واخاف اشغل تالي جربت اخر وحده اشتغلت وياي خليت الجاي وكفت انتظر يفور

واشم ريحه غاز قوية عبالي الريحة من الشارع مو من القنينة فار ورحت وكفت حتئ اشيله واصب..

چان ينفجر الطباخ عليه و صرخت ........يتبع||

⭐⭐⭐⭐⭐⭐⭐⭐⭐

اقرا التعليقات كلها و ارد عليهم لذلك اكتبو وعلقو 💕.

#نمارق_رحيم