وعلي طالعه رواحتنه من الحضر ونجي اهنا انرفه عن نفسنه شويه سالفة الطائفيه اتركنها واني صوجي اشرح ابسط الاحداث
والله كلنه اخوان سنه شيعه مسيح صابئه كرد
كلنه اخوة اذا وگع واحد كلها تفزعله
خلونه متونسين ومرتاحين اهنا
يبعد رويحتي هاي وجوهجن الطيبه 😘
يالله هسه عوفونه من صدام
وخلونه بطلابتنه ويه لارا وراهب 😂😂😂😂
عيني السلك العسكري دامكم متابعين صيرو واسطت خير وهدو النفوس
عاد گحوو اعطسو بس نتاكد منكم موجودين
ترة من تطبگ عندي الحمرة والخضرة ابوي مااعرفه
حتئ صورة ابوي انشرها موبس صوركم 😒
وين متابعاتي ضمني وراجن فدوة
ختلني ختلللني 😂😂😂
،،،،،،،،،،،
راهب ابو غضب ج 2
بقلم زهراء الحسناوي
،،،،،،،،،
لارا،،لازم يختمها يرعد شمرت الموبايل
ابو طبع ميبطل طبعه ابد بدل مايغير الوضع للاحسن رجع يهدد
بقيت بفراشي مرات اذكر الاشياء الزينه الصارت ويانه الگه روحي وحدي ابتسم وفجأة اذكر من دخل وغزل تمشي وراه
اذا يحبني ومايريد يجرحني جان ابسط شي يگدر مايجيبها گدامي بنفس البيت
ويكدر يضم زواجه منها بدون محد يعرف
بس كالعادة يتفنن بااذيتي
تركت كل الجروح للزمن كفيل يروفها ويداويها بمرور الوقت
ماشفت وياه غير يوم واحد حلو وختمها بتحطيمي حطمني الدرجة كل جزء بيه احسه يصرخ من اذيته
مرت الايام وراهب ماكف محاولاته وياي ابد يوميه يتصل ومااجاوب لو يدز رساله اقرة وهم مااجاوبه
صرت اتلذذ بتعذيبه
مرات افكر اذا اتقدملي شخص راح اوافق بدون تردد
اريد احرگ گلبه مثل ماحرگ گلبي
اريد اضوگه من نفس الكاس الجرعني منه
هيج وصلت المرحله اريد بس ادمرة من حرگت روحي
ثاني يوم اخذتني النومه فزيت رايح الوكت والخط عايفني باوعت ع الموبايل مغلق مابي شحن اكيد الرجال متصل بيه. واني نايمه ومن لاگي الجهاز مغلق رايح عباله اغيب
تالي بسرعه بدلت ركض ركض وطلعت للشارع مشيت مسافه
ماحسيت غير سيارة وگفت گدامي
انخمش گلبي
ردت اعبر نزل سد عليه الطريق
راهب،،صباحي عافيه بشوفة وجهج
لارا،،ممكن تبعد عن طريقي
راهب،،اصعدي احجي وياج
لارا،،احاول ابعد وهو فاتح ادي كدامي ساد طريقي
گتله ممكن تبعد راح عليه الوكت
راهب،،والله مااعوفج اذا مااحجي وياج واذا ماصعدتي بالعباس اشيلج گوة
لارا،،عرفته يسويها نفخت خدودي بضجر
ابتسم بطرف شفته وعينه مني
اتوجه للجها مالته واني فتحت الباب وصعدت بالورة
عدل الجامه عليه مشه مسافه موبعيدة
مشه مسافه وگفنه گدام حديقه
بقينه بالسيارة طفاها والتفتلي
درت وجهي للجامه
راهب،،لارا
لارا، ،التفتتله بطرف عيني اباوع
راهب،،لتباوعيلي هيج افقد والله من اشوف عيونج
گوة متحمل بعيدة عن حضني وعيني
لارا،،گتله ممكن كافي تحجي هيج لتنسه احنه مطلگين وحرام تحجي وياي هيج
راهب،،لج انتي كلج الي مريتي وحبيبتي وصديقتي ورفيجة دربي
لتگولين حرام انتي بس وافقي هسه ارجع اعقد عليج بالقران روحي مشتعله بدونج نوم مانايم
لارا،،دنگت جريت حسرة
گتله اجيت متاخر كلش لان انته العلمتني مااصدگ بيك
تذكر من بجيت وتالي اتگلي تمثيل
رغم كلشي رجعت صدگتك وسلمتك ثقتي من جديد بس كالعادة دمرتني من جبتها واجيت
شنو العشته وياك فهمني ?
جاوب
ليله وحدة ودفعتني ثمنها غاللي
اتركني الله يخليك عيش حياتك واني هم من حقي اعيش حياتي لهنا وكافي ورجعه انسه ارجعلك لوشيصير
جر حسرة كتف ادي وانتجئ ع الكشن وجها الجهتي يباوعلي بقهر عيونه تلمع
درت وجهي مااريد اضعف كدام دموعه
هو الخلاني اقسئ هو العلمني ابادله بنفس قسوته
راهب،،ليش هيج وياي?
وين راحت لارا الحبيتها ?
علئ ايدج اتغيرت وصرت انسان ثاني
ليش مجاي اتسامحين?
ولج زلمه وخليتي دموعي تجري وراج مثل الطفل
ليش تتعمدين اتذليني ?
لارا،،اختنگت گتله وخانگتني العبرة
ليش اني مااتغيرت علئ ايدك?
جنت اتمنئ يكون عندي ابن عم اتفاخر بي
تالي طلع ابن عمي يخطط يدمرني
مو صح ياابن عمي المحترم ?
راهب،،ليش مجاي تنطين فرصه وتنسين ?
لارا من زغري عشت مظلوم وعيت ع القسوة والتعب خشن جلدي ع الضرب الحصلته من خالي اخو امي
ولج والله حتئ منهولات نضفت واني طفل
اختنگت وفقدت بنص المنهوله خلف الله ع الناس طلعتني
وكلشي ماحجيت خاف امي اتموت
اطلع من المدرسه اروح انضف الشط عن الشنبلان اجي فرحان بالفلوس وامي اتضل تلطم
شحجيلج وشحجيلج ?
شتتوقعين بعد كل شي شفته اقسئ لو مااقسئ?
ابوج الدمرنه ودمركم وامج السبب الاكبر
مااريد شي من الدنيه بعد اكتفيت
رايدج بس انتي يمي حتئ احط راسي ع المخدة وانام مرتاح
لارا،،مسحت دمعتي وهو هم عدل گعدته مسح وجها بثنين ادي
باوعلي بالجامه
راهب،،وعلي بعز روحي انتي ياضالمه
شنو من گلب شايله دخيل ربج
لارا،،انته العلمتني ع الضلم احصد من الصنعته ايدك
راهب،،ضلي بهذا اعنادج ماتدرين اذا طخت براسي
وحگ علي اخطفج لو يطلع ابوج من گبرة ماارجعج
لارا،،خزرته لتجيب طاري ابوي رجال مات
دار وجها اسمعه يدردم بينه وبين نفسه
راهب،،اتريدني ادزله ثواب من غبشه اخلي يگمز
لارا،،ادري قصدة يشتمه بس ماحجيت مااريد اتعارك وتالي يسوي شي اخذني وصلني للجامعه متاخرة
دخلت رايح الوكت والمحاضرة باديه
جان استاذ عمار يشرح
گلت صباح الخير وردت اتوجه المكاني استوقفني صوته
عمار،،انتظري وين رايحه?
لارا،،نعم استاذ?
عمار،،ماواگف كدامج بياع خضرة تجين شوكت متحبين اتفضلي اطلعي برة ممنوع احد يدخل بعدي
لارا،،اتمنيت الگاع تنشگ وتبلعني فشلني گدام الطلاب
اول مرة استاذ عمار يتعمد يهيني
درت وجهي الدمعه واگفه بطرف عيني فتحت الباب وطلعت مختنگه
رحت گعدت بالحديقه جوة الشجر مااتحملت نزلت دموعي اهفي علئ وجهي اريدهن يسكتن ماكو
عيوني واعرفهن معلمات اعله الحزن والبجي
عرفت اليوم من اوله بدة بدموع الله يستر من تاليه
كل ماامسح دمعه تنزل غيرها حسيت احد گدامي رفعت راسي
همام،،ليش تبجين?
لارا،،درت وجهي وامسح بدموعي
جاوبته مابيه شي
همام،كل هاي الدموع ومابيج شي?
احجي منو وياج?
لارا،،صرت احجي من بين شهگاتي گتله
ا اتاخرت وطردني الاستاذ
همام،،ههههههه طفله والله
لارا،،التفتت علي خزرته
همام،،لارا راح اطلب منج طلب اتمنئ ماترديني
لارا،،باوعتله هزيت راسي ودنگت
همام،،ممكن نصير اصدقاء?
لارا،،رفعت راسي باوعتله
همام،،الله شاهد نيتي طيبه اتجاهج
اصدقاء لااكثر ولااقل
لارا،،بقيت مدنگه الشمس صارت بعيني
بقه صافن بوجهي دار وجها عني للجها الثانيه كور ايدة علئ شكل قبضه
ضرب علئ گلبه مرتين بهدوء ويتمتم ويه روحه بكلام مامسموع گتله
نعم تحجي وياي?
همام،،لايبوي مااحجي عليج احجي ع الشمس الراح تجلطني
لارا،،عرفت قصدة درت وجهي ابتسمت
همام،،اي يابه هيج ابتسمي وانعل ابو الاجه لابو الراح لوعندي عيونج ماابجي ابد لان حرامات اخربهن واعميهن الخاطر ناس ماتسوئ دمعه منهن
لارا،،نهض من مكانه گال انتظريني دقايق
راح واجه جايب عصاير
همام،صديقتي لاتفرحين كلش من اليوم راح نفتح دفتر الدين بيناتنه مرة انتي تغديني علئ حسابج ومرة اشربج عصير علئ حسابي
لارا،،ضحكت من بين دموعي گتله كلش كريم مبين اني اغديك وانته تشتري عصير بربع
همام،،والله لگيت عصاير اثنين بربع بس گلت فشله
هاي اول مرة خل ابذخ بالصرف گدامها
عود ع الجايات اشتري منهن
لارا،،ههههههه شباذخ هو ربع
همام،ماتعرفين قيمته عندي معطته من گلبي معط
ضلت عيني وراه من انطيته عبالك منطي واحد من جهالي
لارا،،هههههههه الله يساعدهم
همام،،منو?
لارا،،جهالك
همام،،همه وينهم?
يابه اشاقه بعدني مالگيت وحدة تشمر عباتها عليه وتقبل تاخذني
لارا،،ههههههههه ليش
همام،،نسوان هلوكت ادور الزلمه المايع من جماعت ماما غطيني
لارا،،ههههههه لا لاموكلنه
همام،،جا اذا انتي مو منهن ليش ماتكسبين بيه ثواب وتاخذيني قبل مااعنس
لارا،،غصيت بالعصير ابتسمت اجامله
بس ماجاوبت
انتهت المحاضرة هو راح ماادري ماسالته نسيت يمكن حتئ هو مطرود هم حاله من حالي گاعد برة
بس شفته مركز ويه شاب من شافه طلع راح وراه احس كلبي لعب من تصرفاته
،،،،،،،
سارة
كل شهر عمتي تسالني ماكو شي منا منا بالطريق
اگلها لاعمه ماكو
عبالها هلشي بيدي صح صارلنه 10اشهر متزوجين بس مومعناتها مايصير عندي يمكن لو تمر سنتين بدون اطفال تزوج قاسم
هي زينه وتحبني بس من تسالني اتحسس من الموضوع عبالها بيدي واني مانعته ماتدري الرزق من الله
العصر كملت شغل البيت ودخلت الغرفتي اخذت ملابس سبحت وطلعت
رجعت للغرفه جنت لابسه اتراك وردي
مشطت سويت ضفيرة فرنسيه احبها
انفتح الباب دخل قاسم شافني ابتسم سد الباب وانتجه علي
رفع حاجبه وحك حنجه
قاسم،،اذا زعلانه شكو ترتبين?
سارة،،البارحه بليل اتاخر بالرجعه عفته ونمت زعلانه من يوم طلاگ راهب ولارا صار قاسم يتاخر بالرجعه ع البيت يضل ويه راهب لان وضعه كلش تعبان ضغطه دوم مرتفع
ضجت من لارا لان تصرفها اناني شخص يحبها كل هذا الحب اتخلت عنه بسهوله
قاسم حجالي كلشي يخص راهب وحجالي المصايب والضلم العاشهن بحياته انطيته كل الحق بتصرفه
وعه وفتح عيونه ع التعب والقهر
حقه يقسه بعد الاذيه الشافها مرات قاسم يحجيلي مواقف صارت ويه راهب محد يدري بيها غير قاسم اتعجب اكو ناس ظالمه الهاي الدرجه
فززني صوته
قاسم،،خبلتي شبيج تتصفنين?
سارة،،معليك بيه ارجع الصاحبك يفيدك
قاسم،،اهاا اهنا الحجي
سارة،،درت وجهي عنه مااتحمل اخاف اضحك بوجها مرات حتئ اذا جنت بقمة غضبي بس احط عيني بعينه اضحك مااسيطر علئ نفسي
كتمت ضحكتي گوة واني منطيته ظهري
اجه حضني وحط خشمه برگبتي
قاسم،،اشبي الحلو مالتي اليوم زعلان?
سارة،،باوعتله صفح گتله علئ اساس ماتعرف
قاسم،،يعني تغارين من اخوي?
سارة،،ترة اني هم مرتك والي حق عليك شوف نفسك صارلك اشهر علئ وضعك ماترجع غير نص اليل يوميه ابدل واكشخ مااريد شي منك بس هم اغار من اشوف اهتمامك براهب اكثر من اهتمامك بيه ابدل واكشخ انتظرك في سبيل نسهر سوة تالي انام واشبع نوم وانته بعدك ماجاي
قاسم،،انطي الروحج عطوة انهديتي فرد هدة
زين اشلون ارضيج?
سارة،،غير طبعك وارضه عنك
قاسم،،سارة كبري عقلج راهب تعبان ومريض مااگدر اعوفه حتئ ماجاي يوفق بين شغله وحياته الشخصيه لان غياب لارا اثر علي كلش الدرجة اكثر المرات اغطي عن تهربه من الدوام لان مگابل بيتها راح يسبب بفصلة
هسه عوفيني من راهب ولارا خليني محتار بيج
شو تعاي لجاي صايرة حليانه ولج شتاكلين?
سارة،،ههههه عود هاي رومانسيه?
قاسم،،مرتي صايرة ادورين رومانسيات مبين طاگج الجفاف
سارة،،اذا انضل محتارين براهب معناتها ننسه الخلفه
قاسم،،ههههههههه والله انعلج ابو الخلفه انه وزعاطيطي تحت امرج
سارة،،منحرف
قاسم،،دتعاي موشعلتي شيب الخلفني
سارة،،رجائا ابتعد لان حالفه ميصير تتقربلي
قاسم،،وليش حالفه??
سارة،،من اتاخرت البارحه ضجت وحلفت مااخليك تلمسني
قاسم،،هو مبين راح اخلص عمري ادفع كفارة مال حلفانج
احلفي مرة ثانيه وشوفي اشلون اگص السانج
سارة،،بلحظه جرني اله تيهت روحي وتيهت الزعل وحتئ نسيت ليش زعلانه
هذا قويسم ابن روحي يعرف اشلون يكسر الزعل
،،،،،،،،،،،،
لارا،رجعت للبيت بس مامرتاحه بسبب كلام راهب كلشي ولاارجع اضعف واخضع الحبه من جديد
مابيه كسرة جديدة ولابيه يلوع گلبي مرة ثاني وصلت وياه مرحلة حد الاكتفاء
حتئ لو احبه مستحيل اسلمة ثقتي مرة ثاني لان تعبت بقيت افتر بمكاني وروحي تفور حتئ صدري رجع يحرگني
واني اذكر ضربه الي بيوم الاحترگت بالجاي ضربني گدام اخواته
بس اكثر موقف يحز بخاطري بيوم الضربني بالحزام وكسر اصبعي
ماانسئ هلشي بحياتي لان الاذيه الشفتها بيومها صعبه تنحمل
جريت الموبايل كتبتله
مااريدك تطلع گدامي مررة ثانيه
خليني بعيدة عنك ومرتاحه
عبالك ارجعلك ?
والله عندي اموت ولاارجع اعيش تحت رحمتك وضربك من جديد
انته ماتحبني بس اتحب اتكفخ بيه بالرايحه والجايه
حملتني تهمة بنت اختك زين مامتت جوة ايدك
الله اعلم اذا رجعتلك واتهمني مرة ثانيه يمكن تذبحني بساعة عصبيه وبعدين عود خلي ندمك يفيدك
وهلمرة راح احضرك مو بس من الموبايل
لا اعتبرني حضرتك من حياتي كلها
تم الحضر
كتبت اخر جمله متعمدة وبعدها حضرته من كل البرامج
شمرت الجهاز لزمت رگبتي روحي تريد تطلع
بليل امي دخلت الغرفتها نامت ومحمد طلع بقيت بس اني صعدت الغرفتي
قريت عندي امتحان باجر
سمعت صوت موبايلي ينبه عن وصول رساله
جريته من الميز فتحته
همام،،صديقتي گاعدة?
لارا،،اي
دزلي طوبه
همام،،طوبتنه وكعت بحديقتكم ممكن اتشمريها
لارا،،ضحكت دزيتله سجينه
همام،،والله خبيثه
لارا،،اكو حجاية بس فشلة اكولها
همام،،ههههه موزاحف والله بس مااعرف شحجي بس اريد افتح موضوع وياج
لارا،،استلمتو الحصه?
همام،،ههههههاي خوش موضوع ينرفز لاوالله بعدنه لان بايگيها الربع وماكلين فلوسها لان راتبهم قليل
لارا،،هههههه منو همه??
همام،،السياسيين
لارا،،ههههههه صدك راتبهم قليل ??
همام،،اي عمت عيني ينامون بدون عشه
خايبه خليني ساكت لاانزل دوسه ونص وبعد شيسكتني
لارا،،ضل يفتح مواضيع عاديه
لگيت روحي اشاركه بالحديث وبالمواضيع
مرت الايام واني وهمام علئ نفس الوضع مجرد كلام عادي بين صديقين وزميلين لااكثر ولااقل
العجيب بالموضوع ماكو شغله مايعرفها عني كانه عندة عين يمي يعرف كل اخباري الصغيرة والجبيرة
من اسأله يگول معليج
مرة حجالي عن اهله عرفت ابو شيخ عشيرة معروف وهمام الجبير بين اخوانه عندة ثلاث اخوة اصغر منه واثنين بنات كلهم متزوجين بس هو رافض فكرة الزواج
سالته ليش ترك واشلون رجع للدوام بكل سهوله دائما الگاه يتهرب من سؤالي لو يبدل الموضوع بدون ماانتبه
مرات اشوفه عينه علئ شباب محددين من يشوفهم يضل عينه منهم ومرات يلحگهم
بقت حياة همام الشخصية مبهمه يعرف كلشي عني بس مااعرف عنه غير ابن شيخ معروف واهله بالعمارة
بليل گاعدين نتعشه سمعنه صوت رمي طلق بالباب وصوت واحد يصيح بااسمي بعلو صوته
گمز محمد يركض للباب وامي طلعت وراه مرعوبه تلف بحجابها
واني هم طلعت اريد اشوف شكو لان بابنه مرتين اندگ بقوة
جمدت بمكاني واني اسمعه يصيح
راهب، ،لارااااااا
يتتبع، ،،،قرائه ممتعه 😍