لاتنتظر أن ابكي بعد فراقنا.. أو حتى أن انعزل في ركن من اركان غرفتي لأستحضر ذكرياتنا واحدة واحدة.. لن اتحسر على ماض كان يجمعنا ولن أبكي
على مستقبل لن تكون حاضرا بطياته.. لن اكتب برجفة قلب رسالة في أواخر الليل لأخبرك فيها كم أنني اشتقت لك.. ولن تدمع عيني بكل مافي داخلي من حب لأخفف عني وطأة الفراق.. سأنسئ انك مررت بهذا القلب يوماً وأن سألوني كيف انتصرت
سأخبرهم بأنني تركت كل شيء ورائي بما فيهم انت
وقمت انا
لارا،،رجليه بقن بمكانهن عبالك شايله بيهن حديد
اباوعلها اشلون بالگوة تمشي بطنها جبيرة والجبه حصر عليها
راهب يباوعلي بتعب الحجيه ذبت السجينه واجت تمشي ب اتجاهم
الحجيه، ،هله يمي الله يجويك
لارا،،عمتي ماتعرف الاجت ويه ابنها بقت المرة ماتعرف شتحجي وراهب ساكت كل شويه يباوعلي
اخذتها عمتي دخلتها لجوة خطيه كل ضنها جايه ضيفه ويه راهب
وگف يمي رفعت عيوني بعيونه عيوني مليانه دموع وعيونه مليانه تعب
راهب،،لارا
لارا،،رفعت ايدي بمعنئ مااريد اسمع منك شي تركته ودخلت وراهن وگفت بالباب الحد هاي اللحظه اتمنيت مايطلع تفكيري صحيح
نفسي حار وسريع وجهي صخن منتظرة اسمع منهم
الحجيه، ،اي يمه ماگتلي منو ضيفتك?
لارا،،ضل ساكت وهي تباوعله صفح تالي عدلت گعدتها وكالتلها
غزل،،اني مرته وام ابنه
الحجيه،منو ?
غزل،،اي عيني مرته بعقد سيد وشهود
لارا،،احس واحد ضربني علئ وجهي
التفتت اله بسرعه لكيته يباوعلي بقهر
هزيت راسي متاسفه علئ روحي
ركضت ع الدرج كانه ماكو شي گدامي غير طريق اركض بي
صعدت اركض وگلبي يريد يطلع دخلت للغرفه فتحت باب البوفيه جريت الجنطه گمت اطلع بالهدوم واحط بيها
وعلئ الساني كلمه وحدة ارددها بدون وعي
مو مرتين تكسرني م مو مرتين تكسرني
انفتح الباب ودخل گعد كدامي علئ اركب رجلي جر ايدي سحبتها منه بقوة ماباوعتله
ضليت اجر واحط بالجنطه
راهب،،بس اسمعيني
لارا،،م مومرتين تكسرني
راهب،،بس اسمعيني والله غصب عني
لارا،،اتوقفت عن الحركه باوعتله مااعرف شحجي وياه
اختنگت والكلمه حشرت ابلعومي صرت مثل الاخرس البلسانه حجي مايگدر يگوله العبرة ذبحتني اتمنيت اضربه اتمنيت اصرخ اعيط بس ماگدرت
لزم ايدي دفعته
عطت بي بصوت منجمع بحنجرتي
وخررررررر
لزم اديه اثنينهن طوقهن ثبتني عن الحركه كعد وراي واحتضني بقوة يريد يهديني
رجعت عطت بي وخررر عني ولللك وخررر عني
راهب،،مااعوفج والله مااعوفج اذا مااتسمعيني
لارا،،دفعته بكل قوتي صرت الزم برگبتي نارر مستعرة بصدري مثل جمرة استقرت بالقفص الصدري بقيت اهمش وافرك بصدري شكله ارتعب من منظري راد يلزمني دفعته
انهاريت حسيت روحي مضحكه اله
مرتين امنت بي وسلمته ثقتي وبالمرتين كسرني وكل كسرة اقوة من القبلها
گمت من مكاني ركضت ع الباب ردت انهزم بطرگ روحي
بس هو جان اسرع مني لزمني رجعت دفعته وركضت للموبايل اريد اتصل بخوي يجيني
مالگيته غير سحبه من ايدي مشه الجهت الباب راد يطلع ركضت دفعني وگعت بالگاع
طلع وسد الباب سمعت بس طگه القفل كمت ادكدگ بي مثل المخبله
كسرت الباب بالضرب بثنين اديه
سمعت صوت الحجيه وره الباب اتناشغ تريد تفتحلي وهو يصيح اليفتحلها الباب احرگ البيت علي
الحجيه،،اخذذذذهااا جايبهاا وجاي فرحاان بيها گرت عيني بيووم الجبتك
راهب،،يااامة الاسلام ليش محد يسمعنيييي
لارا اسمعهم يتعاركون هو وعمتي وره الباب
صرت ادگ واگلها عمممه خلي يفتحليي
راهب،،مااطلعين اذاا ماسمعتينييي فااهمه
لارا،،گبت العيطه جوة هوسه البيت انخبص
ماهمني كلشي اريد بس اطلع منا
ماادري شگد ضليت علئ هذا الوضع تعبت وانهد حيلي گعدت ورة الباب تعبانه والعجيب دموع ماكو بعيني شاطت دمعتي
صارت الساعه ب10بليل انفتح الباب گمت تعبانه عدلت حجابي وشلت عباتي ردت اطلع وهو يباوعلي دخل وقفل الباب من جوة
راهب،،ماترحين اذا ماتسمعيني
لارا،،مااريد اسمع جذبك انطيني المفتاح خل اطلع
راهب،،ماترحين
لارا،،كلامه بهدوئ يذبحني گمت اشهگ بالنفس
مديت ايدي بمعنئ انطيني المفتاح
راهب، ،وروح ابوي الماشايفه ولاشابع منه مااطلعين اذا ماتسمعيني
لارا،،بقيت افتر ادور علئ شي اكسر بي القفل وهو گاعد ع الجربايه يباوعلي بقهر بدة يحجي بدون مااباوعله
راهب،،الله شاهد علئ كل كلمه راح احجيها
من يوم الحبيتج وعقدت عليج بكتاب الله
مادنت نفسي علئ غيرج
ومن يوم التعاركت ويه غزل بخطوبتنه ماشفتها بعد ولارحت اوصلت بابها
الصار بيناتنه قبل ماادخل بحياتج جنه انروح اني وقاسم البيت سعديه شرب ونسوان وعربدة
بيوم قاسم كال سعديه جايبه بنات بالباكيت
كل ضني حلوة ماجنت اضن بعدها بنيه واول شخص يلمسها اني بيومها ضجت كلش وبعدين گلت عادي شغلتهن هاي
لارا،،التفتت باوعتله مشمئزة من كلامه وقرفانه
راهب،،انطيتها افلوس حتئ تسكت
وبيوم العرفت هي حجتلج عن سالفة انتقامي كرهتها وضربتها ومن يومها مارجعت الذاك البيت
صار سبع اشهر ماشايفها
اتصلت بيه قبل كم يوم وگالت اني حامل ب ابنك ماصدكتها وحضرتها
رجعت اتصلت من رقم ثاني مرة واثنين واني مغلس عنها كلت جذب وجاي تتبلي عليه منو يگول الطفل مني
تالي ثاني يوم بيوم الاجينه من الفندق اتصل بيه لواء هاشم وعميد ميثم وذوله اصدقائي كلش
رايحه للدوام وفاضحتني جدامهم
ولان همه اصدقائي طمطمو الموضوع واتصلو بيه
رحتلها شايط اتمنيت اذبحها كتلها موابني بس انصدمت بكلامها من گالت تگدر تسوي تحليل DNA
وتتاكد ومستعدة اروح وياك ويسحبون التحليل من الطفل وهو بداخل احشائي
بقيت حاير واثقه بكلامها معناها الطفل الي لو موالي ماگالت نروح نحلل حتئ تتاكد
اسبوع واني مااعرف راسي من رجليه لااگدر اتصل بيج ولااگدر احط عيني بعينج
مااعرف شتصرف اتصل بيه هاشم گالي تعال يمي
رحتله واني مدوهن الف حسبه براسي ماجنت متوقع راح اوگع بفخ غزل بيوم من الايام وراح تستخدم هذا الشي ضدي
هاشم نصحني اعقد عليها قبل ماتفضحني بدوامي اكثر گال اعقد عليها فترة منا لمن اتجيب وطلگها
وساعتها سوي التحليل وتاكد من ابنك
واذا طلع كلامها جذب اني اتصرف وياها
ماجان عندي غير حل اخذها واسكت لو تفضحني گدام الكل وساعتها اخسر احترامي واخسر وضيفتي
عقدت عليها بس عقد سيد
وغلاتج عندي
لارا،،رفعت ايدي مااريد اسمعه يجيب طاريي علئ السانه
گتله والله وسماواته اكرهك كره بس الله يعلم بي
مرررتين ياظالم النفس
مرتين تطعني بظهري
گعدت بالگاع مختنكه كملت كلامي
مرتين امنت بيك وبالمرتين ذبحتني تعرف شنو ذبحتني?
دمرتني انته
فهمني گلبك ماوجعك وانته تسوي هيج?
مافكرت بيه?
ماگلت شبعتها ضلم ?
كافي ترة الله فوكك ويشوفك
نهضت من مكاني باوعتله كتله مااگول غير حسبي الله ونعم الوكيل حسببيي الله ونعم الوكيل بيك ياراهب
والله وداعت گلبي الدسته مرتين تحرم عليه من اليوم مااريدك لويصوغوك ذهب نزلت من عيني وكرهتك وكرهت روحي وكرهت گلبي الغبي الحب شخص مثلك
جر نفس بقهر گام بالگوة فتح الباب وطلع بدون ولاكلمه رجع قفل الباب من برة
صار مايطلع من البيت والباب النهار كله مقفول
واذا ترك باب غرفتي مفتوح معناتها. يقفل باب. البيت الرئيسي وياخذ المفتاح وياه
الحجيه ضغطها دوم صاعد ومگاطعه راهب ماتحجي وياه ابد وفاطمه تتعب وتطبخ والاكل ينشمر محد اله نفس ياكل
غزل ماخذة الوضع هيته تلبس وتكشخ ولااتگول كل الصار بسببي سمعت من فاطمه انطوها الغرفه البصف غرفة الحجيه بيها غراض وفراشات مال الشته
مااشوفها ولااختلط بيها لان من انزل انزل للحمام فقط وارجع للغرفه راهب حابسني والموبايل اخذة خاف اتصل بااهلي حتئ موبايل فاطمه والحجيه سحبه منهن
يخاف اخذه واتصل بمحمد
اسبوعين والوضع بالبيت ماينطاق وراهب ترك دوامه وگعد بالبيت مااكعد وياهم ابد ولاانزل حابسه روحي فوگ والاكل فاطمه تجيبه
حتئ سارة مااجتني اعرف راهب منبه قاسم ماتجي يخاف اتصل من موبايلها لوانطيها رقم محمد وتتصل بي هي
نزلت المغرب اريد اتوضه واصلي وگفت گدامي
غزل،،اووو ست لارا
والله مقهورة عليج حابسج فوگ
لارا،،وخري عني بالعافيه عليج اشبعي بي
غزل،موزين تركته الج كم شهر?
ترة هو من البدايه الي وكتلج ارجعه اوفيت بوعدي
ويجي يوم اخلي بيدة يشمرج برة
لارا،،ابتسمت ب استهزاء
انتي وياه الجهنم وبئس المصير ماتهموني
وياريت اطلعين گد كلمتج وتشمريني برة لان اتسويلي فضل ماانسا
تركتها ومشيت احسها وراي واگفه تباوعلي
رجعت للغرفه فرشت سجادتي وصليت
ويه كل سجدة دموعي تنزل ع السجادة
رفعت عيني لفوگ گتله يارب عبدة من عبادك الضعفاء اني
ارحمني ياارحم الراحمين ماعاد بيه حيل للتتعب ولابيه حيل الكلشي
مااريد غير تحفضني بحفضك وتخلصني من كلشي
ردت اگوم بس استحليت الگعدة ع السجادة اتمددت بوضعيه الجنين نمت مادريت بروحي احس روحي بين ادين الجليل گاعدة
حسيت احد يندسني فزيت شفتها الحجيه
الحجيه،،گومي ييمه گومي والله خايفه دموعج هاي بيوم تحرگنه كلنه
لارا،،عدلت گعدتي وطبگت السجادة للنص
جرتني عمتي خلتني بحضنها وراسي بصدرها
الحجيه،،والله ييمه اني اكثر منج محترگة روحي
لااعرف اصلها ولافصلها وجماله المكان الاجت منه
لارا،،سكتت ماكملت كلامها
الحجيه، ،استغفرك ربي واتوب اليك
ييمه مالج غرض بيها منا لمن اتجيب وتروح بحال سبيلها لااانه ارضاها علئ روحي عندي جنه مثلها لان جنتي وحدة وبس الي هي انتي ماعندي غيرج ولاراهب يرضه يكمل وياها ولو مافاضحته جدام ربعه ماخطه هاي الخطوة
لارا،،بقيت اشهگ بحضنها
گتلها عمه اني وراهب انتهينه طابت نفسي منه مستحيل اتقبله مرة ثانيه اهواي جرحني واهواي طعني بظهري ومارحمني
اريدج بس اتساعديني حتئ يتركني الله يخليج
الحجيه،،استهدي برحمانج بنيتي گولي ياالله خل السالفه شويه تبرد وساعتها يحلها الف حلال
ياالله گومي انزلي وياي مااختنگتي صارلج اسبوعين خاتله اهنا?
لارا،،مااريد انزل عمه خليني اهنا مااريد اشوفهم
الحجيه، ،براحتج ييمه بس والله مااعرف اكعد اذا مو انتي يمي
لارا،،اعذريني عمه بس والله مااريد اگابلها
الحجيه،،هذا هو بنيتي براحتج
لارا،،تركتني الحجيه ونزلت شويه وصعدتلي فاطمه جايبه الاكل وحتئ هي مامتعشيه مرات تجي تتعشه يمي ماتريد تعوفني وحدي
ثاني يوم كعدت اسمع صوت جوة وهوسه مااهتميت لان هذا حال البيت صار من اجت غزل يوميه راهب يتعارك وياها
مرة الايام وصار علئ جية غزل شهر ونص
اربعه وعشرين ساعه مكياجها صارخ كل ماانزل للحمام الگاها متزينه ومرتبه نفسها
واني اليشوفني يگول طالعه من المقبرة بكفاله
غديت عظم وجلد التفكير نخر راسي نخر والقهر يسل بنادم سل
انقهر علئ حالي صار سبع شهور من دخلت راهب بحياتي بس بذني الاشهر شفت المصايب وياه عبالك كبرت عشر اسنين لگدام
الساعه ب1بليل طلعت اريد انزل للحمام انفتح باب غرفة راهب طلع لازم غزل بقوة من زندها لابسه روب مفتوح من النص ومبين شلابسه جواه دنگت وعبرتهم اسمعه يرزل بيها ويطردها
ثاني يوم العصر الحجيه دزتلي فاطمه گالتلها خل تنزل يمي
نزلت لكيتها تشرب جاي ويمها ماعون كعك اتفاجئت بجية سارة
صدك مشتاقتلها لان من زمان ماشايفتها راهب محاربني من كل الجهات يخاف ارجع انهزم مرة ثانيه
سارة،،والله گلبي طاگ عليج يعمري هاي شصاير بحالج?
لارا،،ابتسمت بقهر ودنگت
سارة،،لتضوجين يگلبي والله لومنج البس واكشخ واخلي يشيل روحه ويطگها من البس كدامه ومامعبرته
لارا،،الحجي سهل سارة بس الفعل صعب
سارة،،ولج هسه هي هامه جهامه ماتشوفيها جنها زلمه
صح حلوة بس طويله وضخمه اذا تگعد عليج اتجعصج
لارا،،ضحكت گتلها طبها طوب شلي غرض بيها حلوة النفسها مواليه
سارة،،والله من نزعل اني وقويسم
البس بغرفتي احلئ سيت عندي كون مفضوح
واتمكيج واتعطر والمسكين يضل يبلعم تالي يسحل روحه سحل ياالله اسامحه
لارا،، انتي خطيرة وين اكو مثلج
ام قاسم،،ادنن لهنا گاعدات وحدجن مطياتنه ضهرجن
لارا،،ابتسمت ل ام قاسم تحجيها بشقه
سارة،،اگلج عمه شفت بنت ام حسن من اجتنه لابسه ثوب حلو عجبني اقماشه
ردت منه
ام قاسم،،صار يمه من اروح للسوگ اجيبلج
لارا،،ضلن يحجن ع الاقماشات وانواعهن لان عمتي خياطه جانت
الحجيه،،هسه الوادم اطورت كل اسبوع ينزل موديل جديد مال اقماش
الله يرحم ايام گبل من عرست جابولي قماش
جان يسمو فلگحني اباب الدكان
لارا،،غصيت بالجاي
وسارة صفكت بيدها خربانه ضحك
سارة،،والله لوابقئ لابسه كونيه مااروح لبو المحل واگله انطيني وياك مترتين من فلگحني ههههههههه
لارا،،جنه نضحك ونسولف طلعت غزل من الحمام اطگ بعلجها تباوع صفح
الحجيه وام قاسم دنگن ماعاجبهن وضعها
واني وسارة لبسناها حتئ ماباوعنه بخلقتها
سارة،،اول مااجيت شفتها لج شنو هذا لبسها صدك ماعدها خجل
لارا،،ماحجيت وبگلبي اگول هي التسلم نفسها الرجال غريب بالحرام شتترجه منها
عافتنه ودخلت الغرفتها ام قاسم اخذت سارة وراحت
واني رجعت الغرفتي
بليل صعدتلي فاطمه جابتلي عشه مخلمه مال لحم بمجرد ماشفتها معدتي صارت تاذيني لعبت نفسي نزلت اركض دخلت للحمام اتقيئت
رفعت راسي غسلت وجهي وطلعت صارو بوجهي كلهم گاعدين يتعشون ماشفتهم من نزلت لان جنت بس اريد اتقيئه
راهب،،لمحت بعيونه نظرة قلق
تركتهم ورجعت المكاني اجتني الحجيه
الحجيه،،اشبيج يمه ?
لارا،،مابيه عمه بس معدتي تاذيني
الحجيه،،زلمتج يگول خل اتحضر روحها اخذها للمستشفئ
لارا،،مابيه شي عمه يمكن اكلت شي غثني العصر
الحجيه،،هو انتي شتاكلين يايمه ماتشوفين وجهج اشلون صاير اصفر
لارا،،تركتني ونزلت بعد ماايست مني مااريد اروح للمستشفئ وياه
ثاني يوم الصبح اول ماكعدت اتكررت الحاله هم اتقيئت روحي طلعت لان ماماكله شي علئ ريگي وبليل نمت بدون عشه راسي افتر صار عندي هبوط
طلعت واني استند بالحايط صار وجهي بوجها
متخصرة اواگفه يم الدرج باوعتلي من فوگ لجوة
غزل،،لوعندج كرامه جان رحتي منا
لارا،،درت وجهي الها
گتلها عندي كرامه الدرجة هو مجلب بيه وحابسني يمه مومثلج ضاله تفرفرين بالمراكز تردين بس ياخذج
غزل،،هااانت وداعتج هانت ماضل شي واگطفج بالشارع
لارا،،اعلئ مابخيلج اركبي وياريت تستعجلين واطلعيني منا لان اختنگت من شوفت وجهج
عفتها تحجي بصوت ناصي وتغلط
صارت كل مااشم ريحة اكل لو اگعد الصبح لازم اتقيئ شكيت بروحي حامل بس گلت هي ليلة وحدة مستحيل يصير
وتالي ارجع واگول ليش مستحيل ماكو شي مستحيل عد رب العالمين
احس روحي تايها وضايعه اذا صدگ حامل معناتها خلص مااگدر اخلص منه هم راح يتحجج بالحمل اتمنيت يطلع مجرد اعراض بسبب معدتي ومايكون اكو حمل
الاكل گطعته لواكل لگمه لو مااكل ابد
الدوخه لازمتني النهار كله بس اگوم تفتر الگاع بيه
الظهر نزلت للحمام واني مستندة بالدرج احس غشوة علئ عيني
دخلت للحمام سبحت واني گاعدة بالگاع گمت علئ كيف لبست والدوخه زادت ردت بس افتح الباب واطلع اختنگت
اول ماطلعت لزمتني دوخة قوية وگعت اشوفهم واسمعهم بس ماعندي طاقة احجي
مااعرف شوكت وصلنه للمستشفى وشوكت شكلو بيدي المغذي
عمتي يمي گاعدة وراهب يحجي ويه الدكتورة
الحجيه،،ها ييمه اشلون صرتي?
لارا،،هزيت راسي الها مابيه احجي
الحجيه،،والله يبنيتي وكعتي گلوبنه ليش هيج ?
منو يستاهل اتاذين روحج لجلة?
لارا،،التفت عليها راهب بس ماحجه وجها تعبان حيل وجوة عيونه سواد مبين من السهر
الحجيه،،منا وجاي لازم تاكلين اذا موالخاطرج الخاطر الابطنج شنو ذنبه?
لارا،،وشه صارت بااذني هزيت راسي مامفتهمه كلامها او بالاصح مفتهمه بس مامستوعبه
الحجيه،،حامل ييمه ويرادلج تغذيه الحمل يرادله قوة موانتي مخلصتها مااشتهي ومااشتهي
لارا،،الساني معگود مااعرف شحجي كل الاعرفه مااريدة بس ماحجيت ابد بقيت ساكته
كمل المغذي وطلعنه للبيت عمتي ماقبلت انام فوگ گالت منا وجاي اتنامين يمي بالغرفه
فرشتلي بالگاع اتمددت وفاطمه جابت تشريبه ثاردتها وفوگها لحم وگلاص عصير زبيب
فاطمه، ،اكعدي اكلي حتئ تسندين روحج
لارا،،گعدت اكلت لگمتين وشربت نص الگلاص دخل راهب
بس بقه بالباب واگف گالها
راهب،،يمه اذا كملت انطيها علاجها موتنساه
لارا،،بقيت مدنگه كانه مااشوفه وارم گلبي منه
طلع وعمتي انطتني علاجي فهمتني علي
اخذته واتمددت
خليت ايدي علئ بطني اتلمسها
بداخلي اگول راح ابقئ طول عمري مااگدر اتخلص منك ياراهب
المن راح يجي هذا الطفل?
شنو ذنبه يفتح عيونه علئ اب وام منفصلين?
وارجع الوم روحي لان سلمته نفسي لو ماضعفي وغبائي لان صدگته جان ماوصلنه الهيج مرحلة
اسبوع واني نايمه بغرفة عمتي وفاطمه تخدمني مداريتني مثل ماي البصينيه مهتمه بااكلي وحتئ ملابسي تغسلهن
گمت للحمام من طلعت صارت بوجهي مخنزرة
ردت اعبر جرتني من ايدي
غزل،،لتفرحين بي اهواي
لارا،،نترت ايدي منها گتلها مافرحانه لان ابو راهب
تركتها ورجعت للغرفه
مااخليت تهديدها ابالي گلت هاي مقهورة وهيج تحجي
للعصر، ،سمعت غزل اتگل العمتي اخذيني للسوگ دخلت الثامن ومامجهزة للطفل
عمتي المسكينه ماتگدر تحجي شي للعصر اخذتها لان غزل اصرت اله تروح وياها
المغرب رجعن ماجرات تكسي راهب طلع ويه قاسم مااخذهن
ثاني يوم دخلت فاطمه جابتلي الغدة وياه گلاص زبيب
شربته كله بس هلمرة حسيت بي طعم غريب مثل طعم الورق اليابس
كملت الغدة ورة ساعتين بدة عندي الم خفيف ابطني
گلت يمكن هذا الشي عادي عند الحامل
للمغرب زاد الالم گمت اتلوئ بفراشي واخذاني العرگ عرگت كلش
لازمه بطني واعصر بيها حسيت اكو شي ينزل مني
گمت وگفت شفت روحي نازل دم
استندت ع الحايط فتحت الباب وصحت عممممه
اجتني تركض اخترعت من شافتني لازمه بطني محنيه
الحجيه،،يييمه اسم الله الرحمان شبييج ابنيتي?
لارا،،الالم ذبحني گتلها عمه بططني الحگيني
علئ صوت خبصة عمتي انفتح باب الاستقبال طلع راهب يركض ب اتجاهنه شافني انخبص
سوة الدرج شبختين ثواني ونزل لابس دشداشته وبيدة السويج
راد يلزمني نترت ايدة ولزمت ايد عمتي
فاطمه لبستني عباتي وحجابي وحتئ جواريبي خلت الشحاطه جوة رجلي لبستها وعمتي لازمتني وطول الطريق تنخه تندعي وتنذر كون حملي مابي شي
راهب،،طاير بين السما والگاع يمشي سريع
وصلنه المستشفئ الزهراء بالنجف بسرعه حولتني الدكتورة الصاله الولادة
رحت واني بدني كله يختض خايفه
ماخلن الحجيه اتفوت وياي انطنها عباتي ونزعني تراجي انطنهن العمتي
دخلت واني لازمه ذكر الله يلهج بلساني
فحصتني الدكتورة گالت عندج نزف لازم سونر خل نتاكد بلكي يطلع فطر بالجارة والطفل بعدة عايش
رحت اخذت سونر گالن مابي نبض ميت ولازم هسه كرداج اتسوين
رجعت الصالة الولادة وراهب يفتر منا ويرجع منا انخبص عمتي بجت اجه باسها
راهب،،المهم لارا يمه المهم لارا مابيها شي فدوتها الجاهل
لارا،،دخلني للصاله وحضي ذبني ويه دكتورة اتگول گصابه ماترحم
استحي مااگدر اخلي تفحصني ضربتني علئ رجلي
الدكتورة،،ياالله حبابه موهسه استحيتي
لارا،،انصدمت بكلامها وخفت قاطات ضربتني ابرة تخدير وقبل لايشتغل مفعولها سوت الكرداج
بحيث السسترات لازماتني واني ارفس جواهن واصيح بعلو صوتي احس روحي جاي تطلع
منا لمن كملت حيلي مهدود وصوتي مبحوح من الصريخ
تركتني الدكتورة وخلتني بيد السسترات نضفني وعمتي متصله بفاطمه محضرتلي ملابس جايبهن قاسم وجاي
خلوني بالاستراحه ودموعي تجري مااعرف عليمن ابجي الطفل مافرحت بي من حبلت بس ليش هسه عيوني مايرضن يبطلن بجي
بقيت بالاستراحه للوحدة بليل يالله رجعوني
راهب يمشي علئ كيييف بالسيارة نايمه بالكشن الورة متمددة ومخليه راسي بحضن عمتي الجابت الطريق كله تبجي
وصلنه للبيت دخل السيارة جوة نزل راد يلزمني جريت ايدي اتعديته ومشيت علئ كيف
رفعت راسي صارت بوجهي غزل مبتسمه رفعت حاجبها نظرتها مااعرف شنو هي مثل الي جاي اتگلي ترة حذرتج ونفذت تهديدي
نيمتني عمتي بالغرفه ماگدرت انام للصبح بطني تاذيني
من الفجر راح جاب معلاگ شوي انطا العمتي گعدت يمي اتسويلي لفات اصغار جنت ارعش من الجوع احس ماعندي طاقه
اكلت لگمتين وشبعت لحت عمتي كتلها مااگدر
صرت مااعرف لليل من النهار النهار كلة خاتله بالغرفه النفسيه صفر اتمنه افتح الباب وانهزم
گاعدة يمي فاطمه العصر سمعنه صوت صرخة غزل
طلعت فاطمه تركض
اخذها راهب والحجيه للمستشفئ واخذو وياهم ملابس للطفل مبين عدها طلوگ
مارجعو غير بليل نيموها بغرفتها والطفل يمها
اجت فاطمه گالت خطيه راهب حتئ مافرحان بهذا الطفل وبيوم السمع بيج حامل راد يطير من الفرح
عرفت الطفل هي مسميته ايهم
يومين وراهب التحق لان صارله شهر مجاز
مر اسبوع علئ ولادة غزل واسبوعين علئ موت طفلي
اختنگت من الغرفه ومن البيت كله صرت يوميه العصر اروح يم سارة اغير جو وفعلا تخليني انسه غزل وراهب
بعد كم يوم نزل مجاز الطفل سبحته عمتي العاشر
من شافت راهب احتارت شتسوي كل شويه وخلته بحضنه وتحجي وحدها وهو مغلس عنها
ساعه اتگله نفس حواجبك وساعه نفس وجهك
صارت تحير شتسوي حتئ تكسب اهتمامه بيها وبالطفل
العصر،كاعدة يم عمتي جابته خلته بالگاع يم الحجيه
غزل،،عمه خلي يمج اسبح واطلع
لارا،،دخلت للحمام وعمتي خلته بحضنها اتعلقت بي كلش وهو الطفل سبحان الخالقه ابدع في ماصور
ابيض مدنفش العيون مجرورة والحواجب ايخبلن
گلبي رفرف علي شنو ذنبه امه غزل وابو راهب
اتمنيت احطه بحضني وابوسه
مديت اصبعي علئ حنچة ضحك حتئ اني ضحكت گتلها عممه يضحك باوعيله
الحجيه،،ههههههه بعدة ييمه مايشوف لان غشاء علئ عيونه للاربعين يالله يگوم يشوف
بس الطفل بهيج عمر امهاتنه اتگول يضحكه غزيل ويمكن غزيل ملك من ملائكه الله يجي للطفل يضحكه وهو نايم
لارا،، گتلها ماادري اول مرة اسمع بهيج شي
طلعت غزل من الحمام اخذته نيمته بالغرفه وبعد ماطلعت
عمتي زاد تعلقها بي كلش بس راهب مرات من يشوفه بحضن الحجيه يدنگ يبوسه
وبالاخير الگلب يحس وخاصتا يشبه ابو بصورة موطبيعيه حتئ الحجيه اتگول كله راهب بصغرة
سمعت من فاطمه اتگول راهب مقرر بس تطلع الاربعين يطلگها لان گوة متحملها علئ اعصابه
مرت الايام وصار عمر ايهم 38يوم بعدله يومين ويطلع الاربعين
غزل بالنهار مخلصين منها لان نايمه ويه الطفل يخلص الليل يبجي ماينام
بليل الساعه ب9گالت نعسانه اليوم ايهم حتئ الظهر ماخلاني انام
اني هم رحت للغرفه اني وفاطمه انام سوة يم الحجيه
الساعه 12ونص ماحسينه غير صرخة رجت البيت
من خوفي طلعت اركض مفزوعه